A MEASURE OF FAITH- XIV

Chapter XIV

(LAST)

Karkhat a liam der tawh, Muanhlua tha chak lo lutuk chuan ka rilru a tihah a, a chhungte pawh an mangang ru viau tih ka hria. Min ngaihsakin ka chungah an tha em em a, ka taksa a chak loh an hlauh avangin damdawiin lama ka awm tam pawh an remti lo. Inah ka awm a, ka rilru buai zual a reh bawk a, dawr lam an buai em avangin ka nu leh ka pa an awm chawt a, kei lah rilru hahna tur ka lo ngah ve bawk nen ka duh angin ka pui thei lo. Ka phone a rawn rik chuan ka han en vat a, Muanhlua number atangin a ni, a chhungte an nih ka ring nghal, ka han pickup vat a.

“Apui, Mama a harh a, hei I hming a lam reng mai”a nu in a tih chuan ka mittui a rawn tla ringawt.

“Ka lokal nghal dawn em ni?”ka ti a.

“Nakin deuhah an rawn hruai ang che, doctor in a check leh mek a, nangmah chuan motor rawn khalh reng reng suh ang che”a tih chuan ka nui ve hak a. 

Ka inbual a, damdawiin lam kal tur chuan ka inbuatsaih a, a ruk tak chuan ka inthlahrung em em a, thudik sawi hi a hun tawhin ka hre bawk. Damdawiin kan thlenin chawhnu lam a ni tawh a, Muanhlua pawh cabin-ah an sawn tawh dawn avangin a la hmuh theih loh. A nu leh a pitei te ho nen canteen-ah thil kan ei a, a damloh chungchang an sawi mawlh mawlh lai chuan a rawn harh chian zia vel an sawi a.

“A mak ka la ti reng, khati khawpa harh thei lo si a kut chul heuh heuh paha I hming ka lam khan a rawn harh deuh zawk  ni berin ka hria. Film vela kan hmuh thin, awihawm loh deuh hi a ang ka ti”A nu chuan a ti a.

“A tan I pawimawh hle a ni ang”a pitei min rawn nuih pahin a ti a, ka lo nui ve ringawt a.

Darkar khat dawn ka nghah hnuah a hmuh theih an ti a, cabin lam kan pan ta a. Kan luh lai chuan a la chauh hmel khawp mai, min hmuh veleh a nui sak a, a dam hmel ka hmu leh chu ka va lawm em!

“Ka bulah hian lo thu teh”zawi te hian a ti a. Ka va thu a, ka kut chu a lo vuan nghal a, a hmel dang bem ka hmuh chuan keimah vang tih bawk ka rilruah a lo awm.

“I lo harh leh avangin ka lawm lutuk ania”a kut chul heuh heuh pah chuan ka ti a, chau angreng tak hian min en a, “Min mamawh tih ka hria alawm”a ti a. 

A damdawiin a la hneh deuh bawk nen a muhil leh ta vang vang a, chutih chhung zawng chuan a bulah ka awm a, a chhungte pawh intifai turin ka haw tir hlawm a. Tuna hetianga a rawn harh leh thei hi ka tawngtai chhanna tih ka hai lo, chutihrualin rawn harh chhuak tawh miah lo ta se engtin nge ka awm ang ka hre lo. Mahni inthiam lo leh rilru hrehawm reng rengin ka awm reng tawh dawn a ni a, chung ka ngaihtuah ringawt pawh chuan ka hah vek thei. Ka ngaihtuahna ka lo kawm mawlh mawlh lai chuan kawngkhar chu a rawn ri deuh rak a, rawn let an awm leh tawh a ni maithei. Mahse ka va hawi phei chuan ka rin loh deuh zawk ka va hmu, Awma rawn pen lut leh min hmuh avanga pen tawp chat chu ka en reng a. Ka thutna lam ni lo zawka tukverh chu a melh a, a ipte a zen a, min hmuh chu a chak vak lo a ni maithei. A chhuak leh mai dawn emaw ka tih laiin a rawn lut ta zawk a.

“Chanchin ka lo hria a, a dinhmun a tha zel a niang maw?”min biak loh aiah min be ve a ni mahna, a tawng pawh a hriat theih tawk tawk.

“A tha ve zel e”

“Naute lam a tha em?”

Ka va melh a, khap miah lo hian ka dul lam chu a lo melh reng a.

“A tha khawp mai Pathian zarah, ka in checkup hnuhnun ber pawhin a tha hle tih doctor in min hrilh”ka ti ta duah a.

Chutia kan tawng lai chuan Muanhlua chu a rawn che deuh a, rang fe hian ka thut hnaih a, tui a lam avangin tui chu ka tulh nghal a, a kut chu ka hmehsak a, reilote hnuah a muhil leh ta mai a. Chung zawng zawng chu hmaih neih hlauh hmel zet hian Awma chuan min lo en reng a, dik tak chuan ka awmdan a tibuaiin ka chet a tikhawr ve reng.

A phone a rawn rik chuan a kekawr ipte a dap ruk ruk a, pickup pahin tukverh nghengin a ding a. A thusawi engmah hriat ka nei lo, a pian dik thlup leh hmuhnawm zet chu ka lo thlir vung vung a, a khabe hmul tlem a to siar siar te chuan amah a ti lang pa zual. Chung ka ngaihtuahna avang chuan ka nui deuh suk a. 

“Ka kal phawt ange, tha leh vat turin duhsakna ka hlan e”a ti a, a chhuak ta nghal a.

Ka thin phu deuh dut dut chu ka kutin ka han khawih a, ka thiltih mek hi a dik tawh loin ka kal thui tawh lutuk tih chu ka inhrilh mawlh mawlh a, Muanhlua dam hun ka nghahhlelh zual phah. 

Khami ni bak kha Awma ka hmu leh tawh ngai lo. Ka hriat danin Delhi lamah a awm leh tawh niin ka hria a, Muanhlua dam loh bakah keimah ka taksa a chak lo ta riau bawk nen chutiang lam pawh ka ngaihtuah hlei thei lo. Nikhat chu ka nawmsam vak loh avangin inah ka awm a, zan lam mut that theih loh ka neih tak zeuh zeuh avangin doctor pawh ka hmu leh a, damdawi min chawh angte ka ei mek a, ka zia phah zel turah ka inngai. Ka phone a rawn rik chuan ka lo muhil lek lek tih ka hria, ka han ban a, Muanhlua number anih avangin ka han pickup a. 

“Apui, tunah I lo kal nghal thei ang em? Hei Mama a buai deuh thut a, ICU lamah an dah leh nghal”mangang zet hian a rawn ti a. 

Ka ngaihtuahna a vir nghal zawk, rang em em hian ka zuang tho a, bathroom ah tlan lut nghalin ka hmai ka phih a, ka thawmhnaw thlakna hun pawh ka nei tawh lo. Ka nau inhnuaia lo awm chu ka ko chul a, damdawiin lam pan chuan ka inhruai nghal a. Khatih laia ka hlauhthawn zia leh thil thleng thei turin min tihbuai zia kha ka la sawifiah thiam lo.

Kan thlen chuan a chhungten min lo ko vat a, a nu hmel ka hmuh chuan beisei a tlemzia ka hrethiam ve. Min lo kuah a, ka beiseina neih zawng zawng kha an thamral mek tih ka hrethiam. 

“I hming a lam reng a, Mama hian a lo ngai em che a nih hi”a tih phei chuan awmngaihna ka hre lo. Ka mamawh laiin min tanpui a, hetiang dinhmunah hian a din phah a, ani’n min mamawh laiin a bulah pawh ka awm ve lo, chu chuan ka rilru hi a tina ngawih ngawih.

“Apuii tih in tih awm chuan lo lut lawk mai ta che”nurse pakhat hian a rawn ti a, Muanhlua nu kut chu nghet zet hian ka chelh a, hrethiam takin min kai phei a.

“Ka pi, pakhat bak a luh theih loh a”nurse in a tih chuan hreh zetin keimahin ka lut ta a.

A hmaa a taksa rawn eng ve tan ka tihte kha a lo thim leh vek tawh, ka biang a rawn lum thla pap a, ka kut hnunglam chuan ka han hru tawk a. A bulah chuan ka thu a, a kut chu ka han vuan a, chu veleh chau zet hian a rawn meng chhuak a.

“Apui, ka tihpalh aw. Ka hna ka hlenchhuah hman loh avangin ka tihpalh tak zet aw….”

A kut chu ka lakanga , ka fawp a.

“Chutiang sawi suh, i dam tha leh vat anga, hmabak tih tur kan neihte pawh kan pahnihin kan hlen dawn kha, ia tha leh em em ang”ka ti a. Chu thu chauh pawh sawi tura ka beih nasat a ngaihzia chu…..

“I hlim hi ka duh ber fo, lo tina tawh che mah ila, chu chu I hria tiraw?”

“Ka hria, ka tan engkim I huamzia pawh ka hria alawm”

“Ka ngai thei lutuk che, chuan, ka hmangaih che a, ka hmangaih em em reng che…”

A thusawi tawp lam chu a hriat that theih mang lo a ni ber, a mittui rawn luang chu ka hruk sak a.

“I chau lutuk ang, engmah sawi a ngai tawh lo..”keimah pawh ka insum thei lo, ka mittui chu a tla ve zung zung tho.

“Ka pi, lo va chhuak tawh rawh aw”nurse in a tih chuan kalsan ka va han huphurh tak!

Pawnah chuan rilru mumal pawh pu thei lovin ka thu a, ka melh ngai chu ka melh tlawk tlawk ringawt. Ka bula mi tawngte, mi thiltih engmah chu hriatchian pawh ka nei lo. 

“Apui, nizan chu Mama nen kan titi reng a, a mak eai hetiang teh thut hi ka ring lo asin. I naute chungchang thlengin kan sawi a, Mama fa a lo ni lo erawh chu ka rilru hi a na riau a”a nui sak a. “A pa erawh chu I remtihna telloa min hrilh a tum bau lo, a lo pian hunah pawh lo duat viau ang che tihte min chah a, ngaihthat lohna pawh ka lo nei lem lo. Tukin zinga a thawk rawm buai atang khan ka ngaih hi a tha thei tawh lo reng reng, kan chhungkaw chungchang thlengin zankuhua deuh thaw in kan sawi kha an I a, a thuchah hnuhnung vek a ni ta mai hian ka hria”a mittui chu a rawn luang zung zung a.

“Khami tuk, a accident zinga a chhuah chhan kha a hrilh che em?”ka tih chuan a lu a thing a.

“Ka thiam loh vek a ni’ka mittui rawn luang chu hruk pawh ka tum lo. “Ka tana thil min tihsak tur khan lo ngen lo ila chu dam tha takin a awm ve awm si a”

“Chutiang zawngin ngai duh reng reng suh, Mama’n thiltha a tih avanga a lo tuar a nih chuan keichuan ka chhuang em em reng zawk ang. Mihring hian kan thih hun tur hi kan pumpelh thei lo, khami ni khan he thil hi thleng lo mah se, thildang vangin a chungah thil athleng tho maithei asin”

A nu thlirdan chu a ropui ka tiin he leiah hian a rilru a nghah lohzia ka hria, a rinna that bik zia te, a thil pawmdan ropui bikzia min hriattir a ni. Chawhma chhung zawng chu chanchin ngaichangin thin phu dep depin kan awm a, dam chhuak tura ka beisei em em lai hian ka beisei erawh athleng lo mai ang tih hlauhna in ka khat. 

“Chanchin hi kan va hre har ve, tunge doctor chu va hmu ta ?”tih an inzawh thawmah chuan ka harh deuh zawk a. An bulah chuan mangang tihngaihna  hre si loin ka lo awm ve reng tihte, ka tho a. Ka han ding mar vel a. Pawn lam boruak chu dawn ka chak avangin ka kal sawn a, chulai hmuna chhuahna lo awm hmasa berah chuan ka chhuak a. Van dum pawl riai chu ka thlir a, thawk chu ka han la vang vang a. Engtia rei nge chutah chuan ka din ka hre lo, tleirawl pakhatin min ko lut a, Muanhlua nu chuan in lama hahdam turin min lo hrilh a, a tul chuan min rawn koh leh vat tur thu a sawi tel bawk. Dik tak chuan awm ve reng chu ka duh ber, mahse, chhungkuaa engemaw relte an duh thei a, chutia lo awm ve reng chu ka hnawk maithei tih ka hre si. Pawn lamah thalai engemaw zat an veng mite an awm tih ka hria, chungho kara han awm ve chu ka tum rilru viau na a, damdawi eia haw tho ka ngaih avangin ka hnial duh ta lo. Mahse, thutlukna erawh ka siam sual chiang hle. In ka thlena ka damdawi ka ei zawh fel rual chiahin phone call ka dawng a, Muanhlua boral thu!

Chhuatah ka thu hnawk a, ti nge? Tinge a kal tak talh chu le? A chhungte ka hmu ngam dawn em ni?

Zankhuain chhingkhat pawh ka chhing lo, an in lamah an inphur phei hnu lawkah ka nauin min hruai ve a, a ruang ka kil laite chuan mahni inthiam lohna hlirin ka khat. Ka zahna te an bo a, ka inchhir leh tawh loh nan a ruang chungah chuan ka tap chhuak ve hawm hawm a. Min kalsan kher hi a ngai a nih si chuan, tinge mahni inthiamlohna ka neih hi a hnutchhiah bik? Hei hi a ni ka hriatthiam loh chu.

Khua a rawn var hnu chuan ka tho a, ka inbual fai a, ka hmuh hnuhnun berna tur a nih avangin a ruang thlah turin ka inbuatsaih ve a ngai. Thihna hi mite tawh tur chauh emaw ka lo tih thin kha a lo ni bik lo, mi zawng zawngin kan tawk dawn, hei hi ka zir chhuah ve chhun a la ni e.

Ka nu in min kalpui a, rei vak lo a ruang bulah ka thu ve a, an chhungte an tam avangin ka inthiarfihlimsan ta. Hlutei pawh ka hmu a, a mitsen ram chuan a tap ve tih a entir. Amah ka ngeina a zual sauh a, ‘nangmah vang’tiin ka thinlungin ka dem! 

Kir leh tawh ngai lo tur leh hmu leh tawh ngai lo turin thlanah kan thlah liam ta; ka ngaih chang a tam dawn mange!

3 YEARS LATER

Dawr bungrua rawn thleng chu ka buaipui mawlh mawlh a, ka bulah chuan ka fapa in ka phone chu a en malh malh a, ka va thlir leh ngawih ngawih thin. Ka neihchhun, ka fapa liau liau a ni, ka hnen ata tuman min laksak hi ka phal ngai lo ang. A bek kir deuh chiat chu ka nuih sak a, hetiang tak hian mite hian an fate hi hmuhnawm an ti ve thin ang em? 

“Ma, ka ril a tam tawh a nia”a tih chuan ka va nuih sak a.

A ei tur ka chah sak a, ka thawh laklawh lai ka tih zawm mawlh mawlh bawk a. Ka fapa vang hian dam hlutzia ka hria a, nun hian awmzia a nei a ni tih min hriattir bawk. A chang chuan a lo puitlin hun turte ka ngaihtuah ve fo a, tunge a pa tih min zawh hunah enge ka hrilh ang tihte ka inzawt thin. Ka thutlukna lo siam dik tawk loh avangin ka fapa thlengin a tuar dawn tih ka hria, mahse, ka siamtha thei tawh si lo. 

Zanah chuan Bawihtea muthilh hnuah ka phone chu ka han en ve a, nilenga kabuai thin avangin khawihna hun ka nei mang ngai lo. Instagram-ah chuan ka han lut a, ka en fo thin Awma account ah chuan ka lut leh ta nge nge. A thlalak mawi tak tak a lo intlar thla dal a, a kutchhuak mawizia hi amah pawhin a hai lo ang tih ka hria. Ama thlalak erawh hmuh tur a awm ngai lo. Zanin erawh chu post thar a lo nei ve mial a, events liam tham engemaw a awm a nih hmel. Ka scroll zel a, a thlalak pakhat ka en chuan ka hmet tawp chawt a. Mizo hmeichhiaah chuan a lian pawl tak a ni ang, inhuat loh hmel zet hian an inkuah a, an nui sang a, ka mit ka chhing nghal thung.

Ani nen fa kan nei a, kan fapa pawh kum thum lai a ni tawh tih hi hre ta se engtin nge a awm ang le ? ka ngaihtuah ve fo thin, min dem ngawtin ka ring. Chutih rual chuan ka hlauh ber leh hetia ka ngawih tlang tak chhan erawh keima lam atang athlir chuan a dik thlap thungin ka hre si. Khatia Muanhlua boral takah khan ka dinhmun a lai ta hle kha a ni a, Awma bulah a fa tih hrilh ta ila a awih ka ring lo bur. Ka chan a chhiat tak vanga sawiah a ngai dawn tih ka hria, chutianga min ngaih ai chuan keimah chauha ka fa liau liau ni tura pian tir kha ka thlang ta a ni. Ka thutlukna hi a dik leh lo tho em ka hrelo, ka hriatchhun erawh inneih hmaa mipat hmeichhiatna lo hman hian eng rah tha mah a chhuah ngai lo tih chauh hi.

Bazaar chhungah Bawiha kai chungin ka thil zawn lai chu ka bih kual duk duk a, zawn hmuh a harsa em em lehnghal. Ka tum loh deuhin Hlutei ka hmu thut a, min rawn hmuh chuan a hawisan hmak a, mahse a rei lo kher mai. Ka fapa a rawn en a, mak tih hmel deuh hian a ka ta hau ringawt a! Bawiha chu ka han pawm a, nghet zet hian ka vuan a, chulai hmuna ka tihtur pawh hrechang tawh lovin ka haw pui ta dawr dawr a. In kan thlen hnu pawh chuan ka thla a la muang thei lo, khati em ema mak tih hmela rawn entu kha ka mitthlaah hian a cham reng a, ka fapa ka chan ka hlauhzia a chiang bawk.

Khang kum thum chhung zawng khan vawikhatmah Awma ka theihnghilh ngai lo. A hlim leh lawmna te chu ka lawmna a lo ni vel mai mai tawh a, nupui nei se amah ka beiseina nung rengte hi a rehin ka ring. Mahse, ka ngaihtuah chian hian ka phal miah lo tih erawh ka hria. Engtikah emaw chuan a la thleng ngei anga, chumi hunah chuan ka beiseina te pawh hian min tawpsan ve tawh ang chu. A tana rinawm ka lo tum ve tlat te hi ka nuih a za thin, engmah hre lo mah se rinawm lohsan hmasak hi ka tum lo ve tawp ringawt. Kei chuan fapa ka nei tawha, ka hlimpui tawk em em, nuthlawi tih min hre chung pawha min beisei vet u an bang bik lo, an tan beiseina ka siamsak ngai lo a, ka fapa nu ka nih hi ka duhtawk tih ka hrilh mai zel thin.

Muanhlua thihcham a nih avangin a chhungten Bawiha nen chawei turin min sawm a, anni hi Bawiha duat em emtu te an ni. An tu dangte nen an enhrang miah lo a, a birthday ah thil tha tak tak an rawn lei sak reng reng bawk. Bawiha pawhin a ngaina a, a pi leh pu tak takte ang maiin a ngai ve a, an ina kal te hi phur hle thin. An upa berte chhung an lo thleng tawh a, thlan lamah a then an kal bawk a, kei erawh chuan ei rawngbawlho ka lo pui thung. Muanhlua u fa Puipuii, tleirawl ve uai tawh nen salad tur kan zai a, a titi melh melh reng a.

“Pite Apui, Putea kha I ngai ve thin em?”a rawn ti hlawl a. (A pi in min kohdan tur a sawi angin min ko vet lat a ni)

‘Um, ka ngai thin khawp mai. Dik tak chuan, thi lo se chu nupuite a nei ve tawh awm sia”ka ti a,  rilru tihhlim ka tum vang a ni.

“Hmanah Hlutei tih hi a lo kal a, kan inah hian a lokal ngun thei lutuk. Aputea damlai pawh khan a lo kal thin, a ngaizawng aniang, mahse, putea khan a duh miah lo asin. Chunu chu hmanah a lokal leh chuan, putea roomah a au vak vak a. ‘ihmangaih ber Apuii hi a hlim ngai bik lo ang’ tih rite ka hria a, ihmaw, nangmah hi I nih ka ring a. Sawi chhuah hi ka chak thei lutuk, mahse, ka ngam ngai lo. Ka mumangah putea ka hmuh apiang hian sawi turin min ti aniang, min en ngwih ngawih thin a, chuan kha thu kha ka hrechhuak thin. Tunah ka sawi chhuak ve hrim hrim a nih chu”a ti ta reuh a. 

Thil kaldan leh thil awmzia zawng zawng  chu ka thinlungah hian  a rawn fiah nghal vek, mahse, engmah siamthat theih erawh a awm tawh lo.

Kan chaweikham hnu rei vak loah chuan kan haw ve ta a, room lamah ka lut a, Bawiha erawh a pi bulah a kal nghal a. Puipuii thil min hrilh te chu ka ngaihtuah let neuh neuh a, engkim Hlutei ah a tawp vek. Ka ipik churh chu a reh deuh beiseiin ka inbual ta ringawt a.Ka inbual zawha Bawiha inthlak tura koh ka tum chuan sitting rooma amah lo pawmtu ka hmuh avang chuan ka ding khawng ta reng a.

“Apui, hei inleng I nei ania”ka nu in a rawn tih chuan ka harhchhuak deuh zawk.

Kan room leh sitting room inkar chu ka tlan a ni deuh thaw, Bawiha chu ka va pawmsawn ringawt a, ka chet dan chu hrilhhai hmel zet hian min en thup thung. Single sofaah Bawiha ka thutpui a, ka chetdan awmze nei lo lutuk chuan min ti zak leh deuh.

“I pa a nuam vak lo a, ka han en ange”ka nu chuan a ti a, an room lam a pan zui nghal a.

Ngawi rengin kan thu a, tumah mah chuan tawng pawh kan tum lo. Chutah k chet dan avag chuan Bawiha  chu athla bar deuh nge, min pawm bet chial baw k a. Awma chuan mit tla lo lekin a ka pawm lai chu a en ngal bawk a, a thaw halh chu ka hria.

“Engtin nge hetiang thil liamtham lutuk hi ka lakah I zep theih?”a aw ah chuan min demzia a lang.

“Engmah ka zep lo”

A nui hak a, a zat vang erawh a ni lo.

“Bawiha, lo kal teh”dam dup hian a ti a. A kal dawn nge dawn lo min han en a, ka vawnna ka thlah thawl takah chuan rang deuh hian a tlan phei a, Awma chuan a lo pawm hnu hnu a.

“A pa hming I hria em?”

“Apa”

Awma chu a nui suk a, engmah sawi tur ka hre lo. An chezia chu ka en tlawk talwk ringawt.

“Naktukah enge ka lo hawn ang che”duat hmel deuha a tih te chuan ka tah a tichhuak.

“Chocolate ka duha , mahse, anu hian ei a phal lo a”

“Ka lo hawn che chuan ei a phal ngei ngei ang, ka lo hawn angche aw”a tih chuan Bawiha chu a hlim hle.

Ka nu in thil awmzia chu a man nghal deuh mai a ni ang, Bawiha chu a mut a lo chhuak deuh tawh bawk nen a rwan la ta daih a.

Awma chu a rawn tho a, ka hmaah chuan a rawng thingthi a. A chetdan chuan min thawng tak zet a ni.

“Ka tihpalh, in nufain hun harsa tak in paltlang a, engmah ka lo hriat loh avangin ka tihpalh tak zet”a ti ta a.

Ka insum theilo, ka mittui chu a tla zung zung a, Awma’n min kuahlai te chuan ka mittui chu ka dang thei lo. Hei hi a ni lawm ni ka lo nghah thin chu, engtikah emaw a lo thleng maithei tia beiseina nung ka lo neih thin chu.

“Keima thiam loh alawm, ka chapo luatah hetiang hi a thlen a ngai a”

Engmah sawi lovin ka hmui chu a hmuiin a rawn khar chhilh hmak a. Ka mumang a nih hlauin ka han insik vel a, ka mumang zawng a ni bik lo.

“Min va tihrehawm rei ve”a thutna lamah min kai phei a, inngheng chialin kan thu a.

“Engtinnge I lo kal duh zawk?”ka tih chuan ka hmui a hup a, “Chu zawn g nakinah ka la hrilh ang che”a ti daih a.

Kum thum chhunga a hun hman dan hrehawmzia leh khawharzia a sawi lai chuan nghet zet hian a kutah ka lo vuan a, a mitmeng thuk raih chuan a thusawi dawt a nih lohzia a tilang bawk.

“Min kalsantu ngai reng renga hun hman kha tlawm thlak ka ti thei asin aw.. Midang ngaihsakna nei thei miahloa ka awm chu a mak zual lai a la ni bawk”te a ti a, keimah chauhin ka tuar lo, kan pahnihin hrehawmna khurah kan lo tlu lut a lo ni.

“Ka tihpalh aw, khang zawng zawng a thlen hnuah khan min ring theiin ka ring tawh lova, ka chan chhiat hnua I faa ka puh ah I ngaih ka hlauh avangin ka sawi ngam tawh lo a”ka tih chuan a lo chek tlak a.

“Khang hun lai pawh khan ka fa a nih thu vawikhat chauh pawh sawi la, ka rilru a damin ka hlim hle awm si a. Kum 3 em em hi kan nghak lo tur”a ti a. Ka inthiam lo zua l sauh. Dar 12 a rik chuan sawi duh tam tak la nei mah ila kan inthlah ve ta a.

Muanhlua thlanah chuan kan ding a, ka tana thil min tihsak zawng zawng ka hrilh hnuah rirlu dam tak leh zahawm tit akin Awma duh ang ngeiin kan va kal kha a ni a. A thlana ka pangpar phun lo vul chek chu ka han khawih a, ka hnunah Awma chu thuin pangpar kung hnuia hnah tla chu a chhar fai a.

“Ka hmangaih ber ka hnenah I rawn thlen ta, thlamuang takin chawl ang che”a ti sap a.

Chu thu chuan min hneh hle mai, ni e, ka tana a beihna kha vawiinah hian a thlawn lo e.

“Apui, ka nau thil lo tihsual zawng zawng kha khawngaih takin theihnghilhsak rawh aw. Thil pawi zawk a thlen lai pawha a ngawih tlat vangte, thil tullo a sawi zawng zawngte kha. Keimah vang tal pawhin ngaidam rawh aw. Amah vekin I hnen min rawn hruai thleng si a”a ti a.

Bazaar-a kan inhmuh chungchang ka sawi chuan Awma chu a bu nghat a, “Ka fapa ka hmuh duh chuan haw vat turin min rawn ti a, min rawn vau a ni mah zawk ang chu. Engkim a thiltih zawng zawngte chu a rawn sawi a, ngaihdam min dil bawk a. Ka hna pawimawh em em kalsanin in nufa hmu turin ka rawn thlawk chhuak ta nghal a ni.Ka fapa ka hmuh rual chiah khan ka naupanlai hmel a lo lang a, hai theih a ni lo. I chungah ka thin arim em em bawk a, mahse, khang hun chhung kan lo tawrh kha tawk ka ti. Engmah hi tawrh belh tir che ka duh lo a ni”a tih chuan a kawngah ka kut pahnih ka va rawlh a, nghet zet hian min lo kuah let a.

“I pasal atan ka tlak em tih kum thum chhung fiahin ka awm a, chu fiahna chu ka paltlang ta in ka hria. I tana ka rinawmna te, ka tana I rinawmna zawng zawng avangin tunah chuan hlim hi kan phu ve tawh e.”a ti a.

Kan kal lama boruak nguai leh vawt sung chu a lo bo ta vek a, kan hlimna min tawmpui ve niawm tak hian khua a rawn thiang kuar a, van dum pawl pawh a lo lang ta uar a……