AKEDAH

AKEDAH
.
"A van chhe lo tak" ka nakah  a rawn sik hlawk a, "A naaa..." tih pahin ka thianpa en lam chu ka va melh ve a, "Chhiat lem loh saw" nui sang chungin ka ti a. Ka va pan phei nghal a, ka thianpa Zaia chuan zaktheilo min lo tih hmel leh tawh hle.
.
"Hai... Thansanga ka nia"
.
"Ammm... Doro-i"
.
A thiannu chu kawh pahin,
.
"Hei Mpi ani ve thung a"
.
Ka melh vang vang a, a hmai chu a tai hlar a, a chhelo chiang alawm. Kan han in chibai nghal a. Zaia pawh chuan min rawn pawh phei tawh a, kan pali chuan college canteen lam panin kan in zui nghal a. Class chu la nei dawn mah ila kal ka tum tawh lem lo.
.
Ka chanchin han sawi hmasa ila- ka hming hi Lalthansanga a ni a, Thansang tiin min ko mai thin a. Unau pali zinga a naupang ber leh mipa awmchhun ka ni. Chhungkaw khawsak harsa lutuk kan ni lova, hausa tia sawi theih pawh kan ni chiah chuang lo. Ka pa hi Middle skul zirtirtu ani a, kan upa ber hi Bank ah a thawk bawk a, a dawttu chiah hi nurse niin private hospital ah a thawk a. Ka u chiah nen lehkha kan la zir thung a ni. Unaua mipa neichhun tih takah kan neih bak aliam in mi an duat rawn ve a, a bik takin kan upa ber phei hi chuan a fa ang hial hian min enkawl a, kan kum alo inthlau bawk nen ka naupanlai pawh hian min awm nasa em em ani. Nula senior tia sawi theih a ni ve der tawh a, chhungkaw tan hian an lo hlu hle in ka hria. Ka pa hi chhungkaw enkawlna kawngah pa duhtui ve tak mai ani a, ka u te ho lenrei chhan hi niin ka nu pawhin a sawi thin. Mahse a fapa neihchhun lakah erawh a mit alo del ve deuh pawh ani maithei, ka tleirawl chhuah hlim atang zu ka in a, khawvel nuam ti ve tak niin ka nun ka hmang chho a. Hmeichhia hi kawp loh lai ka nei ngai lo. Ka hmel hi tha hluah hluah ni lo mah se ka zeina leh ka pawisa vang hian ka duh ka hlah ngai lo. Thiante zingah pawh leader chan chang deuh bik hi ka ni a, ka thilphalna avang hian thenrual pawh ka ngah. Heng ka thiante zingah hian Zaia hi naupan tet atanga ka kawm, thiantha bera ka neih zui ani nghe nghe. Sikul kal chho tlang zelin college hial kan rap tlang ta zel a ni. Mize inpersan hlak kan ni a, kohhran leh khawtlanga mi tangkai tak ani a, mahse a thianpa sual ve tak hi min phatsan ngai lo. Hei vang hian ka tan chuan ka thiantha ber tia ka chhal ngam ani.
.
Ka inbualna tur tui lum nghah pahin inchungah nilum ka ai a, earphone ah zai ka ngaithla pah a, kan kawmthlanga mi veivak vel chu ka thlir pah bawk a, rin loh deuhin Mpi leh mipa pakhat hi an rawn in zui hnak hnak a, an titi bawrh bawrh a, an hlim hmel viau lehnghal. College ah khan kan inhmelhriat ni bak kha ka hmu zui leh miah lo a, karkhat zet chu a liam tawh. A rukin ka zawng fo a, mahse ka beidawng anih kha. Tunah lah awlsam tein ka hmu a, mipa dang nen an la ni zui, a hit lo hle mai.
.
Tui lo zetin class kal tur chuan ka insiam a, nimin lama ka thil hmuh vang kha ani maithei, nuam lo ka ti ve ringawt. Bialnu neilai reng chung siin Mpi mawlh kha ka ngaihtuah zui a, hmeichhia ka buaipui hmasak ngai loh tehlul nen mak ka in ti zawk. Canteen ah thiante pawh an lo nui leh dar dar tawh a. Zing chaw ka ei loh avangin eitur ka lam a, ka ei lai chuan Mpi thiannu Doro-i leh hmeichhia pahnih hi an rawn lut mek a. Ka lo en renga, min rawn hmuh chuan ka lo nui suk a, nui sang chungin min rawn pan a, "I va in ei hma ve" a ti a. Zing chaw ka ei loh thu chu ka han sawi a, "Khawnge i thiannu Mpi" ka ti tel hram a, "Tunlai chu class a kal ngai lo, in lamah an buai deuh aniang" a ti a. Min chhan dan chu ka duhkhawp lo takzet ani. Ka zawt zui ngam tawh der bik silo. Ka ei zawh chuan  classroom lam panin kan in zui chhuak a, Doro-i chuan min rawn kheuh zeuh a, library tual lam chu a melh a, ka han hawi chhoh chuan Mpi chu a lo thu reng a. Doro-i chu ka melh leh a, a nui var var a, mi rilru i hre thei reuh mange ka ti rilru a, ka khi ve suk a. Han pawh mai chu ka ngam chiah lo a, ral atang chuan ka thlir reng a, ka hlauhthawn ruk hi a dik dawn niin a lang, a hmaa a mipa kalpui bawk chu a bulah kalin an thu tlang a, rei ka en thei tlat lo. Ka in her a ka kal tur chiah chu ka bialnu Esi alo ding reng a,"Koh koh pawha hre thei lo, enge i ngaihtuah em em" a ti hlak hlak a. Ka lu thak lo pui chu ka han hiat a, ka kuah a, classroom lam ka pan pui ta daih a.
.
Lehkhazir tumin lehkhabu ka inchhawp ve a, mahse ka rilru ah a lut hlawl lo. Bike chahbi ka la a, ka tlanchhuak leh nge nge a. Pan lam bik pawh ka nei chuang lo, atawpah Zaia te in ka pan a, amahin a lo awm a. Ka kal dawn thu hrilh lawk lova ka lan thut avang chuan mak alo tih hmel viau mai a, "I room ka hmang lawk duh" ka thil ah lai chu ka han tilang zeuh a, "thianpa, i ti khat viau tawhin ka hria a, ka lo lawm hman viau asin" a ti a. Chhang tawh lem lovin a room chu ka pan nghal a, min rawn zui a, "Lo lut ve kher lo mai la, i zahawm alawm" ka ti a. Ni e ka thianpa mah nise ka zah ru tlat a, a hmuh laia zu han in hi ka hreh thei hle reng a ni. Min rawn zui lut ta tho a, computer hmaah a thu a, hla a play zui nghal a, keipawh khumah thu in ka in tur ka thli a, ka in karh karh a, no ka tlak leh tur chu Zaia chuan a rawn la a, a in ta daih a. Mak ti lutukin ka melh kawk a, a vawikhat nan ka thianpa in a taksaah zu a thun ve anih chu! A ner sawk a, "A va tui si lo ve" a ti hak a, "Enge i hriat a?"ka lo ti thung a. Ka bulah chuan a rawn thu a, "Zu ka in ve tawh tih sawi ve hrim hrim ah" a ti a, "Ka kham lo zo ta vek mai anih hi" ka ti a, a rum hak a,"Thianpa, famkim a in hriat lutuk na ka neih hi a bo nan ti khan ka ti mai anih kha, ka that bik lohzia hi hriat nawn fo ka duh ani" a ti a. A darah ka beng a, "Thianpa, kha thil kha tih angai kher hleinem, mi tha tak zawng i ni ngei a, ka hria che ani" ka ti a. A mittui a tling tih ka hria, "I hria em? Keipawh hian tlangval fel tak niin ka in hre ve thin asin. I bulah te, kan thiante dang bulah pawh nise fel leh tha ka in ti ngawih ngawih thin. Mahse ka bialnu berin 'zu i in loh avang khan i tha ta viau ah i inngai a, i hahthlak' min tia min then ringawt a, chuvang chuan zu in leh in loh chu a danglamna ka hre duh ta alawm" a ti a. A chhan ahan sawi takah chuan ka nuih aza a, ka lo nui hak hak a. A ni erawh a za ve lem lo, "Talchhuah leh mai mai hi a harsa ania aw, vawikhatna leh a tawp nan hmang ang che" ka ti a, a bu nghat a, "Thianpa, vei deuh ka nei, hmeichhia" a tawng duh sawt riau mai ka thianpa chu a kai ve deuh anih dawn hi ka ti a,"Khawi lam lanu nge ni a?" Ka ti a, "kha i hria em? Hmannia chhelo ka tih deuh i va kal a chibai te i va buk leh hman tawh Mpi tih kha" ka thu ngil zawt, ka thianpa nen kan duh kan lo intawm reng chu niin.
.
Ka room ah ka tawm reng a, ka thiantha berin a tana hmeichhe try pui turin min sawm a, chutah ka duh ruk ve em em ala ni zui bawk nen, awmdan thiam a har duh hle. Mahse theihtawp chhuah ka intiam tawh a, ka ti ngei turah ka ngai bawk. Harsa vak lovin Mpi number chu ka nei thei hlauh a, hmeichhe laka zam ngai lo kha a vawikhat nan ka zam titih der mai. Whatsapp ah ka han be rawih a, a seen hnu ah pawh min chhang ta lawk lo, a induh ve viau em ni dawn kati a, ka msg hmu vek chunga min reply loh avang chuan a dang han thawn nawn chu ka duh bik lova. mahse a hnu deuh ah chuan min rawn chhang ve ta hram a, ka rilru a ka lo tihtauh na te chu a reh zui nghal ve mai bawk a. Ka mipa hmuh thin nen chuan ka han chhaih hmasa te te a, mahse a thian satliah anih thu in nalh zetin min khengthla a, a tawngkam tin chu ka lawm riau bawk a, "star tu che ka hria"ka tih chuan dang duh hauh lovin,"keipwh startu che ka hre treuh" a rawn ti ve hmak. Ka then sak reng mai a, zankhatnaah chuan ka sawi duh mai bik lo. A hre chak ve tho tih chu ka hria, mahse hetianga mi beng ti vir tawk leka chet lak hi ka thiam zawng tak mai ani a, ka in tithei ve duh tlat a ni. Ka thiana pawh ngaihtha taka lo awm turin ka han hrilh thawr a, min ringtawk ve bawk a,a ngaih a tha leh vet vet dawn tih ka chiang a ni.
.
Ka thianpa nen Chaltlang lam panin kan in phur chhuak vang vang a, phur tak teinka thiana lah chu a phur a, keilah ka dang a ro halh halh thung! Sawi chhuah theih si loh hian ka awmah a hnawh a, thiante tan hetiang thleng ka ti ang tih hi ka lo inngaihtuah phak ngai lo. Ka zarah Mpi leh Zaia chu an inhmelhriat chho a, an inbe ve fova, an inah leng tura sawm kan ni hial a, kan pahnih in kan inphur chhuak mek a ni. Kawngkhar kan han kik dat dat a, beisei ang ngeiin kan kal chhan chuan kawng min lo hawnsak a, kan in zui lut dial a. Tleirawl mipa pakhat hian computer ah games alo khel a, a nu nen tv an lo en a, "In lokal duh tak tak pawh ka ringlo a" tih pah chuan min melh a, a ha var rual suau lang chuan a han then bawk a, ka rilru a dik lo leh vek tawh, "Kan phur mah naklaia" tih pahin ka thianpa chu ka han nek a, chet pawh a lo che tha ngam lo thung. Rei vaklo kan thut hnu chuan a nu chu a che hrut a, "Tikhan Mambawih lo inkawm rawh u, Matea nen i ni Zovi chu kan han kan ange" a ti a, tleirawl games khel nen chuan an chhuak a. Mpi chu kan ep chiah ah a thu a, a sam dum kir deuh chiat, inhmeh fahrana a put chu a zut delh delh a, "Tikhan lo inkawm ula, keipawh ka chhuak ve ange,haw pahin karawn lam dawn che nia" Zaia bulah chuan ka ti a, "Khawnge i kal dawn?" An pahnih chuan an ti rual a, "Aw... nula ka rim ve ang chu....." ka ti a. Mpi chu ka va melh a, a lo thaw hak a, a chhan ka hre lo,ka inngaihbel mai mai pawh ani ang, a hmaa a hlim hmel kha a bo daih niin ka hria. Ka thianpa chuan min pawt deuh tau a, " I chet lak hun anih hi bawiha, Zochhuana te dawrah ka lo han leng ang, tha tak khan che ang che" ka han ti ru a, a huphurh tih ka hria. Mahse ka inrawlh chin tur ka inrawlh tawh a, an pahniha tihfel a ngai tawh a ni.
.
Zochhuana te dawrah chuan zial ka zu hlarh hlarh a, ka thianpa chu che fuh tak ang maw ka ti rilru neuh neuh a, Mpi hmel mawlh kha ka mitthlaah a cham a, hmeichhe dangte mita ka hnuh thin ang kha hmu ve in ka inhria a, mahse midang ang lo takin amah ah hian ka confi hauh lo. A ruk tak chuan ka thianpa chu ka thik a, ka rilru a diklo tih ka hria, mahse ka in control theih piah lam a ni. Darkar chanve dawn ka thut hnuah Zaia chu a rawn lang phe ve ta var var a, a hmel a hlimna eng zam chhuak chuan a hlawhtling tih a nemnghet a, lawmpui tur ka nihlaiin ka na ru tlat lawi si. Dawr kawtah chuan ka lo hmuak a, "Kan hmel atang chuan kan hlawhtling aniang maw?" Ka han ti a, engdanga min chhang lo chuan a han nui leh rah rah a, ka chahbi kenlai chu min laksak a, amah chuan bike chu a khalh a, "I zarah ka duhtak chu ka nei ve ta e, thianpa, ka lawm e aw" a han ti tlai leh hnuhnawh a, a hnunga thut pah chuan,"Ni e lawm ngawih ngawih tur i ni, thu i awih loh chuan i lak atang ka laksak leh mai ang che" ka han ti zui a. A nui hak hak a, tianga hlim hian ka thianpa hi ka hmuh lohna a rei tawh bawk a, lawmpui ngawih ngawih tur ka ni.
.
Zaia leh Mpi inkawp atang chuan ka thiana hian min mamawhna a nei tlem ta sawtin ka hria a, keipawh chu ka thiandang te zingah hun ka hmang hnem a, nuam pawh ka ti leh viau. Hlim hmel taka Zaia te pahnih in zui hmuh hi nuam ka ti thlawt lova, an bula awm tam loh hi ka duh a ni. Ka ngaihzawng neih nuam tihna te kha a bo a, bialnu nei lovin ka han awm renrawn a, nuam ka ti letling phian a. Mahse ka nun chu ka la hmang ho tluang zel a, class pawh ka kal tha peih mang lo. Zankhat chu rin loh deuhin Mpi msg ka dawng nawlh a, ka han chhiar chuan  birthday lawmnaa kal tura min sawmna alo ni a. Ka uan a chhuak a, "Changtupaa ka tran dawn loh chuan ka duh lo" ka han ti a. Min chhan pawh ka ring tawh chuang lo,mahse min rawn chhang let vat a,"I duhloh vanga thiante hnena i hnawn hnu mai ka nia" a rawn ti a. A awmzia ka hrelo,ka chhiar bawn leh a, ka la hre  chuang lo. Kal ngei ka tum thu chuan ka chhang ta ngawt a,kan dam anga ka kal ve ngeivang chu.
.
Mpi birthday party zanah chuan mi kan tam lutuk lo a, a kal chhun te erawh athiantha tak tak tecan nih ka ring. Keipawh Zaia zara kal ve ah ka in chan deuh reuh a, nuam ka ti lo ru angreng hle. Fel hmel tak tak kara han chettlat chu ka khawr ru riau mai bawk si, hetiang huna a veilam telloa hun hmang ngai lo ka lo ni bawk nen zan a rei duh dawn hle in ka hria. Room atanga Mpi rawn chhuak chu ka lo thlir reng a, a pian rem zaih mai kawrfual arawn ha chhuak a, a inhmeh hliah hliah, a taksa mam han mai te chu thlir ral daih mai a chakawm zawk. Min hnuh chuan a nui seih a, ka lo chhawn vat a, chutah changtupa thutna a pan nghal a,kei chu an piah deuh ah ka awm thung. Ka mitmei ru reng a, hlim hmel taka an titi kara a nui mawlh chu en pawha ennawn leh ngai thin an tih ang ngei hi a ni. Vawihnih vel chu kan mit leh mit a in tawng a, ka rilru a hriat loh nan ka la sawn hmasa duh lo. Kan college a ka hmelhriat pakhat chu a rawn tel ve a, min rawn hrilhru sar sar a, inchung lamah chuan kan inzui chho a. Tahchuan duh in ang ho an lo awm chu niin, ka hlim ve thei ta. Ka han tlak pap pap a, ka mitthlaah inhnuai lama ka thiante hlim hmel a lo lang a, namen lovin ka thik a ni. Rei vaklo hnuah min rawn ko a,kan chhukthla dial a, hun hman tur ang kan hmang chho zel a. A tawp lamah couple dance a awm a, single ho chu pair min zawnsak leh a, a hlimawm ta phian a. Ka pair tura min pawhchhuahsak chu tleirawl la naupan hmel zet hi a ni a, helai hmuna awm tlang rengsi ka lo hmu hauh lo chu mak ka ti zawk. Hmai sin lampang, a nuih zawnga biang sum lang fiah kak, pian thiam zet mai hi a ni reuh a, a hming ka zawh chuan Dinpuii anih thu a sawi a, tifuh in ti zetin ka khi sak a.
.
Dinpuii nen chuan pangngai takin kan inzui chho a, Mpi cousin a lo ni nghe nghe. Anihna takah chuan a chhelo em em a, mahse ka laka Mpi tlaknat angin a tla na ve lem lo.  Min duh a, ka hkimna tur ngaihtuah ve in ka kawp ani mai a, thinlung takin ka vei hran lo. Mahse midang ang lo takin ka kawp lova, tin, min nawr kal ve tlat hi a mak ka ti. Inkhawm ka peih lohzia a hria a, mahse thiam tak hian min thlem a, amah vang hian biakin pawh ka pan ve ta fo mai. A nungchang mawi lutuk mai leh rilru thianghlim zet hi tihnat ka hlau ve ta hial a! Pawl sawmpahnih zirlai chauh ala nih avang hian inleng pangngai ala nei tha ngam lova, a khat tawka ka kal ve zeuh tih loh chu ka leng ngai lo. A school ban ah erawh hun ka neih phawt huan ka lam thin a, kan inhmu ngun telh telh a ka ngainatna pawh a thuk sawt viau in ka hria.
.
Inrinni chawhnu lam ani a, ka thiante tlawhin ka lengchhuak a, ka haw lamah a remchang tiin Mpi chu ka tlawh a, class ka kal that loh vangin note hawhsak ka tum pah a ni. An in ka va thlenchuan amah chauh alo awm a, chutia keimaha min hmu chu mak a lo toh hmel hle in ka hria, a note hawhsak ka duh thu ka hrilh chuan a ner sak a, "Mamawh hunah chauh hian i lokal duh bawkxsia tiraw?" A ti a, ka lo nui thaw a, a nui tha duh vak lo. Room ah a kal a, a lehkhabu chu min rawn le a, "In pa lokal te chuan ka tibuai ang cheu tih hlau hek, in inkawm hhrang leh daih anga ka peih lo alawm" ka han ti a, "I over emai a, bialnu nei leh lutuk mai" a ti a. A hnungah ka beng a, "I nau chu ka duat ania lo lungngai suh aw" ka ti a, a hmui a ti parh tarh a, "Han lerhsan vaih teh i chaklo khawp ang" a ti a. A thusawi lai chu ka lo melh reng a, min rawn en a, ka lo la en ve reng avang chuan a zak tih hriat takin a biang chu a sen leh tek a, a duhawm tawk chauh in min melh rum a, insum hman lovin ka fawp ang tih chu ka hlau ber. Ka ding a, "Ka va haw tawh ange" aw lawi rut chuan ka ti a, bah nawkin min chhang a, kan pahnih inkarah hian awm hi chu a awm chiang ani.
.
Sunday zan inkhawm tumin ka insiam vek tawh a, Dinpuii chuan min rawn call a, damdawiinah a pu an dah thu min rawn hrilh a, an chhungkuaa an kal thu min rawn hrilh bawk a. Kal ve chu tha in ka hriaa, ka thawmhnaw chu ka thlak a, damdawiin lam chu ka pan zui nghal a. Ka va thlen chuan an lo awm ve nual tawh a, Dinpuii leh Mpi chuan min lo hmuak a, thil lei pah an duh avangin dawr lam kan pan a, Dinpuii chuan min lo kai vat a, a hmaa ka venthawn lem loh kan bula awm Mpi chu ka rilru in ka hrereng a, nuam ka ti chiah lo. Kan let leh lamah chuan kan hmaah a kal a, Dinpuii chu a titi barh a, a thusawi erawh hriat mang ka nei lo.
.
Dar 9 a ri lek lek tawh a, haw mai chu ka rilruk deuh a, Dinpuii chu ka han hrilhru sa sa a, mon thlah turin ka ti a. Ka bike dahna bulah kan ding a, nidang ang bawkin a titi leh siam siam a, kalsan mai hi a harsa ka ti thin. Ka kuah thut a, a ngawi hmak a, mi awm leh awm loh chu ka han thlithlai hmasa a, tumah ka hmu lo, a hmuiah chuan ka han fawp vang vang a, min thlah phal bik lo. Kan lo rei deuh ani maithei, khuh thawm ah chuan kan inthlah vat a, kan piah ah Mpi chua lo ding reng a. Dinpuii chu a zak tih ka hria, a kun tlat a, "Thansang, i ruala lo haw ve ka duh deuh a, a rem chuan" Mpi chuan alo ti a, "Min lo nghak rawh" ka ti nghut a, Dinpuii chu ka kai a, inchhungah ka thlah a. Anihna takah chuan Mpi chu ka haw ru riau, rei vaklo chu min lo nghak ve thei mai lo em ni? Mahse ka sawichhuak ta lem lo. An in bulah ka drop a, a lawmthu sawina oawh chu ka chhang tha lo. Chak zetin ka tlan nghal a, ka awmdan hi ka hrethiam lo. Dinpuii nat ka hlau viau tihna nge Mpi chu ka haw ta viau tihna? Chu zawhna chu a chhanna ka hre mai bik lo.
.
Exam a hnaih avangin class kan kal tawh lova, Dinpuii pawh board exam tur anih avangin hostel ah a awm a, kan inhmu ngai lo. Mahse kan vemgah hian day a kal an classmate a awm a,lehkha hi min rawn thawn reng thin a, keipawhin eitur te ka thawn a, a lawm ve hle thin. Hetihlai hian Dinpuii hi ka duh ve ta hle niin ka inhria. Ka phone ri cher cher chu ka lo hre lawk lova, kahan pickup chuan Zaia alo ni. Mahni tuanna mualah kan tlei dun bawk ani ang, engenaw chang zeuh zsuh bak hian kan inkawm meuh lova, chanchin erawh kan inhrilh ve reng tho. Ri bengchheng kar ah a awm ani ngei ang, a tawng chu ka hre hleithei lova, vawihnih vel a rawn tih leh chuan ka hre thei ta-"Thianpa, rilru natna damdawi kha min lo ken la, lokal vat rawh tunah" a ti a,phone chu a dah  nghal hmak a,a ngaihna hre lo zetin ka han call nawn leh dawn a, mahse a switchoff hman tlat.
.

.Ka thianpa meuh thinlung na taka a tap hmel hmuh chu thil nuama ni lo, Mpi nen an then vanga chuti taka na a a awm chu a mak hran love. A atchilh lo chauh a, a tan a inhuam thuk em em reng bawk a, mahse chu pawh alo tawk zo lo ani ang. An pahnih tana bul tantu ka nih angin tunah pawh ka mawhphurhna awm ve tlatin ka hria a, Mpi te in lam pan chuan ka inkhalh chhuak leh ta nge nge a. Ka thlen chuan an kawt ah pangpar tui alo pe a, ngawi rengin ka en reng a, min rawn hmu thut chu a phu zawk a, “Engtiklaiin nge I lo thlen a? min ti phu alawm” a ti a. Veranda a an thutthleng dah ah chuan ka thu a, a tui pek zawh chuan a rawn thu ve a, “I dam maw?” a ti a, “Engatinge nangmah hmangaih ngawih ngawihtu I tih nat?” a zawhna pawh chhang lo chuan ka lo ti a. Min melh zawk a, “Ka tihpalh, lem ka chang thei tawh lo ani” tih pah chuan a kun a, “Enge lemchan kher chu a ngaih na? Zaia hi I lo dh ve tak tak ngai lo a maw? I lo bawl kual vel mai mai a, ani lah chuan tihtakzetin a hmangaih si che a” ka ti a, ka chek tlak tlak a. Ka ding hluai a, “Thansang, pawi ka ti lutuk” a ti tham  chal a, “I khawsak dan hi ka huatzawng tak, I duh loh chuan engvanginnge a tir khan I hnar mai loh” ka ti a, “Tenawm lutuk” ka han ti leh hram a, min chhang tawh lo. Ka han en chuan a mittui a lo hru zeuh a, ka inthiam lo leh hnuhnawh a, engvanga Mpi laka hetia awm vak hi nge ka nih ka in hrelo,”Ka ti mah mah ani, tihpalh” ka ti a. Harsa zet hian a nui lui a, “Ka chan tawk lek ani alawm” a ti a, a bulah chuan ka han thu leh a, “Mp, Zaia baka hmangaihtu che hi I tawng mai mai tawh lo ang. Tiang tlangval fel, ruihtheihthil ti bawk silo te chu an vang asin” ka ti a, ka thlem ani ber, “Ni e ka ngaihtuah ve fo alawm, chuvang tak chuan ka phu lo ka ti a, ka then alawm” a ti a. A thusawi chu a awmzia ka hre lo hle,”I phu lo a I hriat nachhan tak chu eng ber lai chu nge ni a?”ka han ti a, “Midang thinlunga dah reng chung a ani kawp kha ka thei tawh lo ani, ka inthiam ngai lo bawk” a ti a. Ka en reng a, tunge chutiang taka a duh chu ni ang tiin ka lo thik ru leh hman viau a, “A fair daih zawk lo mi?” a han ti zui a. Chhan mai ngaihna ka hre lo, “Fair ringawt kha a tawk lo, mi rilru tihnat kha a tha pawh ka ti lo” ka han ti a, “Anih chuan ka let leh chu I duh hle ani maw?” a ti a, chiang zet hian min melh bawk a, tah tak chuan ka buai ta! A hmaa ka lo duh ruk em em a bo tawh emaw ka lo tih kha alo la bo reng reng lova, ka khawhar rukna te hi a kianga ka awm chiah hian a bo thin tih pawh ka lo hrechhuak ngai lo. Mahse engtikawng mah in ka tihlan hi a rem ve dawn silo, “Duh e” tih chiahchuan ka chhang a, “Um..a tha e, ka let leh anga a ni mai alawm a ti a, ka na ru veng veng.
.
Zaia pawh a nui leh uar uar thei tawh a, mahse ka che buai ta tulh tulh thung a. Mpi ka hmuh apiangin amah ka duhna hi a thar zel ni mai hian ka hria. Dinpuii awm loh vang mai mai ah ka han puh lui viau a,a mahse hai rual ani lo, duh leh hmangaih hi a hran a ni. Zing thawh hlima kan rilrua awm hmasa leh ka nmut dawna ka nngaihtuah hnuhnung te hi kan hmangaih te chu an ni an thin a, a dik anih angai chuan Lalmuanpuii hi ka hmangaih tihna ani ang. Mahse ka tana rem  ve thei ngai hauh lo hi ka buaipui niin alang. Dinpuii hostel a tlawh hun ani a, kal loh ka tum zet na a a hma in ka kal tawh silo nen ka kal leh ta nge nge a. Min hmu chu alo hlim ve hle a, a titi leh siam siam a, ka eitur kensak te chu tui ti takin a ei a, nidanga a titi ka tuipui ang kha ka ni tawh lo, “U T, I dam lo mi a” a ti hial a, ka that thu ka sawi chuan awih lo hmel takin ka pang a rawn dek a, “Ka dam alawm, ka tha lutuk” ka ti a, “Mahse nidang ang I ni lo, diklo a awm chiang” a la ti hram a. Rilru nuam lovin a awm ang tih ka hlau a, ka inthup hram hram a, a harsa duh ngei mai.
.
Exam kan zo a, ka nun dan hmasa ah ka let titih leh tawh a, khawlai nuam ka ti a, inah ka awm tlem leh tawh hle. Dinpuii pawh exam an zo a, mahse ka leng ngai lo. A lungawi lo ve hle thin a, vawi tam tka inthen ka duh thu ka sawi a, mahse min thlah chu harsa a ti ve si. Ka awmdan ang ang chuan min enliam rih ani ve deuh ber.  Zankhat chu ka leng ka haw lamin Mpi te ina len chu a leng tlat a, a buai lo tawk velin ka kai nghe nghe. Ka thlen chuan Zaia pawh alo awm a, min hmu thut chu mak an tih ve hmel hle. Ka thu ngawi reng a, Mpi chuan thingpui a lum a, Zaia chuan min be lovin tv lam chu a en deuh ngar a, keipawh chuan ka phone chu ka bih reng a, Zaia phone chu a rawn ri a, tunge a biak ka hre chiah lo a, a chhungte an ni in ka hria. Mpi awmna ah ava kal a, ka enzui lem lo, an rawn in zui phei a, “Thiana I la leng dawn mi? ka haw a ngai a, ka haw tawh mai ange”a ti a. Pawnah an va inthlah a, ka ruih vang nge ka hre lo, ka thianpa chuan nidang angin min en lo in ka hre tlat a, ka rilru chu ana ve a ni. Mpi chu a rawn lut leh a, thingpui min rawn pe a, “Thianpa chu engati teh thut nge a?” ka ti a, “A pa in a mamawh aniang” a ti a, “Tinge min huatna in nei em ni?” ka ti a, “Engvanginnge kan huat che anga?”a ti a. Ka rilru tet chu a chhuak thut a, ka ding hluai a,”Engatanmah min lo ngai lo anih hi, Zaia ka thiantha bera ka lo ngaih ve thin pawhin engahmah min ngai tawh lo”ka ti a, “Chutiang ani lo Thansang, I rui anih kha” a ti a,”ni e, ka zep lo ka in ngei, mahse ka rui lo. In tan hi chuan ka tha tawk lo tih pawh ka hria, mahse theihtawp ka chhuah ve asin”ka ti a. Ka chhuak a, Mpi chuan min rawn zui a,”Theihtawp I chhuah thin avang khan keipawhin ka zah che asin. Thansang, Zaia nen chuan zanin khan engkim kan sawi a, kan inkar pawh kan titawp”a ti a, mak ti tak hian ka melh reng a,”A pawi ka ti lutuk, I thianpa hian kei aia tha hi a phu ani” a ti a, inchhungah chuan a lut ta daih a. Pawnah chuan a ngaihna hre lo zetin ka ding a, ka thianpa mood off em em dan te kha ka ngaihtuah chhuak a, ka thin alo rim ve ringawt te chu ka inthiam lo zawk. Mpi awmdan chu ka hrethiam lo, keiman ka nawrh luih vangin a hma pawh khan alo let leh mai mai niin ka hre ta bawk a, ka thiana chu ka khawngaih a ni. Tih takzetin Mpi hi a duh tih ka hria a, hetiang tak hian tumah a la buaipui ngai lo.
.
Lunghnur takin ka haw a, dik tak chuan Mpi laka ka rilru chu ala pangngai reng, mahse ka thianpa thinlung tihnat chu ka duh hauh lo, chuvang chuan an inkarah engmah thlen tir ka tum ngai lo. Ka muthmunah chuan ka ngaihtuah chhunzawm zel  a, thiandun in hmeichhe pakhat kan han duh tlang chu thil fuh lo ber a ni. Ka tal ka tal a, ka lo muhil ve sek a, ka u exer la haw chuan min rawn kaitho a, mut chu kham lo viau mah ila ka tho ta hram a. Ka nu chuan thingpui min lo siam pah chuan,”I pa nen I pu tlawhin in zin dawn nia, nizan I leng I lo haw har lutuk a, hrilh hman pawh I ni lo a”a lo ti nghal a, “Ka pu chu a tha vak nange?”ka ti a, “That  vak loh pawh a awm lo, I pa skul chawlh laiin han tlawh ula kan tia, amahin motor khalh a zuam silo”a ti a. Chutih lai chuan ka pa pawh chu a zing chhuak a rawn haw chiah a, ka nu thu min hrilh zawh chiah chu a han sawi nawn veleh a, inbual turin bathroom ka lut a, ka inbual zawh chuan ka chaw kan ei nghal a, ka rilruah chuan Zaia a awm reng a, tlawh hman hram chu ka duh a ni. Chaw eikham veleh chuan Zaia te in lam pan chuan ka chhuak nghal a, an inah ka luh chuan a chhungte chuan phawk fe hian min lo melh thap a, “Khawnge Zaia?”ka ti a, “I bulah a riak ani lawm ni?”a nu chuan alo ti a, a riah loh thu ka sawi chuan an mangang tlang ta hle a, keipawh chuan a ngaihna ka hrelo. Mpi te ina kan inhmuh thu leh ka haw hmaa a haw thute chu ka sawi a, kan inah bak hmundangah a riakbo ngai silo, tunah khawiah nge a awm ang? ka phone chu ka phawrh chhuak a, a number chu ka han dial a, switchoff a in ti tlat bawk si, kei lah zin chhuak mai tur ka ni a, hetiang chuan zinchhuahna chi pawh ani tawp lo ang.
.

Ka pa ka phone a, kan zin tur chu thulh mai ka rawt a, a lo pawm ve mai bawk a, Zaia zawng tur chuan ka zawngchhuak nghal a. Mpi te ina kal chu ka rilruah a rawn lang a, an inkara thilthlengahchuan fello an awm tlatin ka hria ani. Mpi te in ka thlen chuan amahin alo awm a, min hmu thut chu mak a lo ti viau, "Thansang tun ang hunah te enge ni ta?" A lo ti a, "Zaia tunthlengin ala haw lo a, a biak theih bawk silo , engthil chiah nge in pahnih inkarah thleng" ka ti nghal tawl a. A thaw halh a, hnuai lam chu a melh ta tlawk tlawk a, " Thansang,ka hmangaih chu Zaia ni lovin nangmah i ni miau a, ka kawp chhunzawm thei lo ani" ka meng kawk a,"Muanpui" ka ti hrawk a, "Min ngaidam rawh. Ka duhthlan theih piah lam thil anih vang ani" sawi leh tur hre lovin kan ngawi dun ta reng a. Khang hun chhung zawng pawh khan min lo duh ve reng a, thil kal dan hi ava mak thin tak em! Ka phone a rawn ri a, Zaia nu alo ni a, Zaia chu rui chunga scooty a khalh avangin Bawngkawnah a lo chesual a, Greenwood ah an dah thu leh phone an dawn zawh chiah thu a rawn sawi a. Hmangaihna hi a chak a ni, misual te a siamtha thei a, mifel sa te pawh sualna khurah a hruai lut thei chu ani a. Mpi chu a kutah ka han vuan a,"Mp, kahmuh hmasak ber atang che khan ka duh tawh che mahse ka thian tha ber in alo duh ve si he a, ka rilru pawh ka sawichhuah hma in min hrilh si a, atana theihtawp chhuah kha ka tih tur ani miau si" ka chil chu ka han lem khalh a, "Thansang"mittui tlingpam in min lo en a, "Huaisenna lo nei deuh ila chuan hetiang hi kan thleng lo maithei asin tiraw?" Ka han ti a,"Ka hnaih theihna che anih beisei vang chauh hian asin i thianpa kha ka chhan, min rawn biak hmasak ber ni teckhan ka lawm em em a, mahse i thianpa vang tih ka hriat khan ka hlim ve na te pawh an bo nghal vek" a ti a. Hmangaihna hi ka rin zawng ani ngai lova, mahse hai rual ani lo,a lo awm ngei a ni. Mittui tling pam chuan min melh reng a,"Thansang, tih ngaihna thlawt a awm lovem ni?" A ti a, mahni hma chauh sial thei ka ni mawlh si lo,"Mp, a chang chuan kan duh loh dana kan awm hi a ngai ve fo thin ani. Hospital ah chuan va kal phawt mai ang hmiang" ka ti a,a insiam chu ka nghak a, Greenwood lam pan chuan kan inphur chhual nghal a.
.
Rin ai daih in Zaia chu a lo insawh na a, haw leh nghal mai chi pawh ani lo. Mpi hming chu a khat tawkin a lam reng tih ka u (nurse heta thawk)chuan a lo sawi a, Mpi pawh chuan chutia amah hmangaih ngawih ngawihtu nikhaw hrelova let reng a hmuh chuan a tap a tap a, ka khawngaih ngei mai. Harsatna ka tawh pawha kawng dik min kawhhmuh thintu ka thianpa chu ka en a, harsatna a tawhlaia atana ka ding ve thei lo chu ka rilru a na a ni. A chhungte an rawn thleng a, Mpi nen chuan pawn lamah kan thu chhuak a, "Thansang, ka sual tiraw?" Ka va melh a, ral lehlam chu alo thlir daih a,"Min hmangaihtute tihnat hi enge hlawkna awm?" Amah vek chuanarawn ti a, chhan mai dan tur pawh ka hre lo. Ka u chu a rawn kal a, Zaiaharh tawh thu a rawn sawi chuan Mpi chu a tho vat a, a kal nghal a, kei erawh pawnah chuan ngaihtuahna fim tak nena la thut ka duh a ni. Rei vaklo hnuah chuan Mpi chu lunghnur zetin a rawn let a, ka lo en reng a,”Min hmuh duh lo”a ti sap a,”LA nghak deuh la, rei a ni tawp lovang”ka ti a, a dar a san ak a, “Hawh phawt ka mamawh” ngawi renga ka thu a hmuh chuan,”I la awm dawn mi?”tih pahin a tho a,”Ka lo thlah ang che, ka kal leh mai ang keichu”tih pah chuan ka tho nghal a. Ngawi rengin kan in zui chhuak a.
.
Karkhat zet damdawiin a a awm hnuin Zaia chu in lamah enkawl chhunzawm turin an haw a, keipawh ka pu te khaw lam panin kan kal a, ka rilruah Zaia leh Mpi an awm reng a, ka tana mi pawimawh tak an ni ve ve a, an rilru nat ka duh lo bawk. Kan chaweikham chu ka patea fapa nen pawnah mei kan chhep hluah a, khua chu a vawt deuh sut bawk nen a nuam kan ti hle a, zai ang a ti a, guitar a rawn la chhuak a, kan pahniha kan zai chu tlangval lent um ho pawh chuan nawm hmel an ti ani ang, an rawn zai ve ta zel a, reiloteah kan thahnem ta hle a, kan zai tui ta phian a. ka phone chu a ri ral ral a, ka han en chuan Dinpuii alo ni. Kan thawm chu a rin deuh avangin ka kal sawn a, “Thansang…min lo bum char char ani maw?” a ti a, a rawn tap ta mai a. a ngaihna ka hrelo hle a, “Dinpui, enge awmzia”ka tih chuan a inhnit faih faih a, “Zuii nen in inbe thin mi?”a ti a, Zuii chu an hostel a awm ve thin a ni a, phone a ken ruk avangin Dinpuii ka biak duh changing amah kaltlangin kan inbe thin a, hostel an chhuah hnu phei chuan ka bengai lo. Kan inbiak ngai loh thu chu tha takin ka hrilh a, anihna takah  chuan ka mizia zawng zawng chu ka ti ngam lo, mahse ka danglam tawh takzet ani. Hmeichhe lakah vawikhatmah ka la insawifel ngai lova, tuman ka chunga an lungawi lohna an lantir ngam ngai hek lo. Mahse mipa tha tak nih ka duh ve pawh ani ang,”Anih chuan a tha anih chu, min rawn be ngai bawk silo, Thansang, ka ngai thei lutuk che”a ti a. Ka ngaihsak lohzia ka hre chhuak a, naupang te ni si a dawhtheihna chu ka fak em em bawk a, heti hian midang lakah ka rilru ka la pe chu ani a, ka dik lo hulhual ani. Mahse mihring ka ni miau a, ka duh vang reng a ni bik lo,”Dinpui, ka lo haw veleh ka lo leng dawn nia”tiin kan inbiakna chu kan titawp ta a. Ka ngaihtuah zui neuh neuh a, duh hle mah ila Mpi hi ka thinlung atang ka paihchhuah a ngai ani. A awlsam hauh lovang, mahse mipa ka ni a, ka thei tur ani.
.
Ni thum lek cham mah ila ka pute khua chu ka ngaina hman hle a, kan naupanlai tak taka kan kal bak ka kal nawn leh miah lova, thingtlang khua ka lo hmuh dan pawh a thlak danglam chiang hle. Kan haw zan chuan motor ka khalh chau deuh a, lengchhuak peih lovin ka mu nghal a. Zaia kan pawh duh viau mah ila ka chhak peih ta ngang lo ani. Ka mut dawn chuan ka phone chu ka han bih a, Mpi msg alo awm a, ka hawng vat a,”Thansang, I thianpa hian tunthleng hian min la be duh lova, engtinnge ka tih ang? Keimah vang anih loh thu msg ah min rawn hrilh a, mahse ka inthiam thei chuang silo”tih hi alo ni a. Ka han call nghal vat a, ka aw a hriat chuan a lungchhia a insum hman lo thelh a, rei tak chhung kan inbia a, a tuka hmuh ka tum tur thu te chu ka hrilh a,”Mp, min hmangaih thu I sawi kha ala pangngai reng em?”ka ti a, a rilru dik tak ka hrechak ani. A ngawi vang vang a,”Thansang, zanin thleng hian a la pangngai reng, mahse theihnghilh rawh, ka hlimna hi ka um thei lo ani”a ti a,”Mp, ka ngaisang lutuk che ania aw”ka tih chuan a rawn nui hak a,”Thian tha tak ni reng ila, ka nau hi duat takin enkawl la, chu chu ka ngen duh che ani”a ti a. Ni e, a duh ang ngei hian awm ka tum ang, kan inhmangaih hi a rem ve ta lo anih pawhin kan inhmangaihna tal hian rah tha kan chhuahtir tur alawm.
.
Zaia te in lam pan chuan ka inkhalh chhuak a, khua chu a duai deuh ruih vang nge keipawh ka ni deuh nghulh a, ka awm chu a nuam chiah lo ani. Ka va thlen chuan a room ka pan ding nghal a, alo tha tawh hle a, bai sawih sawih chuan alo kal ve thei tawh a, nidang ang bawkin min hmu chu alo hlim leh viau a, a titi barh barh a,”Thiana, Mpi hi tinge I biak duh miah loh a, a inthiam lo viau asin”ka han ti a, a nui hml chu a inthlak daih a,”Chuvang tak chuan alawm biak ka hreh, ka zak em ani thiana”a ti a. Mpi hrehawm tih theihzia te chu ka hrilh malh malh a, “Dik tak chuan hetianga ka awm vang maia alo let hi ka duh bik lo, hlim takin awm rawh se a tha alawm”a han ti charh charh a, he thu a sawi lai ngei pawh hian a rilru natna chu a thup zo lo tih ka hria, “I hmangaihzia a hrechhuak a, chuvang zawk chu alawm a ngaihsak che a, hetianga I awm pawh hi hrehawm a tih em em”ka ti a, a awih leh awih loh phei chu ka hre lo a, mahse a ngaihdan thlak sak chu ka duh ve a ni. Chutah a nui sak a,”Heti tak hian mi hi a lo duh theih ang tih pawh ka lo ring ngai lo, khami zan, kan inthen zan khan eng rilru pu in nge Bawngkawn lamah khan ka tlan tih pawh ka ngaihtuah thiam lo, ka rilru natna kha chak taka tlan a, boruaka an thamral kha ka ring ni  ta berin ka hria”a ti a. Tlai chawei dawn thlengin ka leng a, Mpi chu kan titi tui ber ani a, a chanchin lo chu thudang a leng lo ani ber. Chawei nghal turin min sawm a, mahse zan lamah Dinpuii te ina len chu ka duh avangin ka haw ta a, in ka thlen vela ka tih hmasak erawh Mpi biak chu ani. Chhhun lama Zaia nen kan inbiak dan chu ka hrilh thuak thuak a, a rilru pawh a nuam ve sawtin ka hria. Zanah leng turin min sawm a, “Ka bialnu rim a ngai ve alawm”ka tih chuan a nui ve sak a, “Keipawh naktuk chu ka bialpa ka va rim le hang”a han tih ve chuan ka rilru a ana ru viau ang lawi a.
.
Tunah chuan Zaia pawh a tha tawh a, Mpi nen boruak tha tak an hmang dun mek a, hlim takin awm reng se ka duh ani.  Mpi hi ka tan a vul ve ngai dawn lo anih pawhin lawmna pakhat chu min pe ve ta tho a, mihring nundan tur pangngai leh mipa tha tak ni ve tur min duh tirna hi, hei vang hian chan naah ka ruat lova, hlawkna ah ka ngai vethei tawh ani.
.
“Thianpa, ka hmangaih ber min pek let avang hian ka lawm e aw”
.
“Ka pek che a ni ngawt lo”
. “Thansang, buddy.. engkim ka hre vek asin, Mpi hmangaih ber hi nangmah I ni tih hi ka hria alawm, kha zan, ka accident zan khan engkim ka hria alawm”
.
“Engtin?!!!
Ka awki chu ka han san a,
.
“Doro-I kha I la hria em? Kha khan a tir atang khan min hrilh vek alawm, mahse ka hma ka sial tiraw? Ka tan ka bei ngar ngar si a”
.
“Thiana, chutiang anilo, in tawng tur dik tak in intawn vang zawk alawm” ka ti a, ka rilru dik tak pawh ani.
.
“Ka zak khawp mai, ka tan engkim I huam laii ka tan chauh ka lo bei ve si a”a ti a.
.
“Thianpa, duh ber Dinpuii ka tawng alawm, hlim takin nangni pawh awm rawh u”tiin dawt inpawlh deuh hlek chuan ka lo ti a,
.
“I lo duh ve takzet anih hi, ka lawmpui che” a rawn ti a, a rilru a thawveng hawk tih ka hrereng, chu chu ka thil duh ani reng bawk a.
.
Electric rawn thim thut chuan kan hun kal tawh ka lo ngaihtuah kir lai chu a rawn ti tawp a,
.
“U Thansang, u Mpi ten naute an nei anih chu” ka nupui Dinpuii’n a tih ri chu hria in inhnuai lamah ka chhuk a, damdawiin lama kal ve tur chuan kan in siam a, kan chhuak zui ta nghal a.
.
A TAWP TA…..
(a thupui Akedah hi chu phuah tur ka hre lova, ka nau te band hming ka hmang ve mai mai😊 )