A,LA TLAI LO

“TWENTY TWO -  A LA TLAI LO”

Darkar thum chhung chhuak miah lovin ka lehkha ziahna room-ah ka in khung tawh a, ka lehkhabu chhuah leh mai tur ka ziahlai chuan ka rilru an luah thei lo. Ka rilrua awm reng zawk chu chhun lama ka thingrem mawnga ka lehkha dahthat ka phawrh kha a ni. Ka han maimitchhing vang vang a, hun hian mihringte hi min lo tidanglam thei takzet anih hi ka ti a,  mahse thil pakhat erawh engtikahmah danglam ngai lo tur a awm. Kum tin October thla apiangin chu hun chu a rawn in herchhuak anga, October thla chhunga ni sawmhnih pahnih hi an paih anih ngawt loh chuan ka na anga, ka na nawn leh thin ang. Ka laptop chu ka han khup thawk a, ka sana chu ka han thlek zauh a, tunah chuan kumkhat chhunga ka huphurh ber thin hun chu alo thleng ta. Ka thutna atang ka tho a, coffee chu ka lem khalh a, hna tam tak ka inchhawp hnawk mek a, mahse pen khat pawh ka pen belh thei silo. Kum nga chu heti hian a ral veleh mai chu a ni si a, thinlung natna inpe tawn chunga ka hmangaih tak nen kan inkalsan atanga chhiar phei chuan puitling ka lo ni ve ta takzet a ni. Tukverh chu ka han hawng a, thlifim rawn thaw lut heuh heuh chuan ka rilru na pawh a rawn chhem dam sawng sawng hian ka hria. Mite chuan harsa taka ka beih hnua ka hlawhtlinna chu min lawmpui a, mahse ka hlawhtling tluantling chiah em tih chu ka inzawt nawn fo  thin; he hlawhtlinna phenah hian hlawhchham rukna ka nei miau si a! Ka phone nghawr det det chu ka hria a, ka kekawr ipte atang chuan ka han la chhuak a, kum tin he reminder ka set hi a rawn ri thin-
“Twenty two- A la tlai lo”

Bung 1-na

Ka tihdan thin pangngaiin kan kawmthlang a sikul naupang vei zut zut chu ka han thlir leh a, mipa leh hmeichhe thenkhat chu an in khawih rak chel chul a, kum khat dawn chu nitina ka thil hmuh anih avangin ka tan thil danglam leh thil thar ani lo. Ka ke an cherna ruh zet chu ka kut chuan ka han khawng karh karh a, engtia rei nge hetiang hian ka nun ka hman a ngaih dawn tih lah ka hre silo. Ka lehkhabu chhiarna pindan lam pan chuan ka han bai phei saih saih a,  ka thian tha ten ka khawhar hlau a lehkhabu min rawn thawn tam tak zinga pahnih ka la chhiar loh chu chhiar tan ka tum a ni. A phek hmasa ber chu ka han keu a, kutziak mawi fahran hian thu tawite alo inziak a,
“Miss, I dam ka duhsak lutuk che ania aw” tihte chu ka han chhiar ri a.
He thil hi tu min rawn thawn nge ni ang aw tih ka ngaihtuah ngial hnuah pawh ka hrechhuak zo lo. He accident rapthlak tak mai ka tawh hma khan private school pakhatah chuan ka thawk ve lawp lawp a, kum tam pawh ka la thawh hman hma-in ka chungah vanduaina lo thlengin ka chawlhsan a ngaih phah ta kha a ni a, ka zirlai zinga tuemaw ber anih chu ka ring ve ta ngawt mai ani. Muangchangin thingpui in turin choka lam chu ka pan a, ka nu nen chuan thingpui kan in a, chutih lai tak chuan kawngka chu a rawn ri rak a, ka nau chu a rawn lut a, bawm lian vak lo hi a rawn keng bawk a,
“Eng thil nge ni a?”tia ka nu in a zawh chuan,
“Khilai step-a ka rawn chhuk dawn khian mipa pakhat hian min lo pe a, ka u ta tur anih thu a sawi a, a kal leh nghal daih”tih pah chuan min rawn pe a. A ngaihna hre lo deuh chuan bawm chu ka han hawng a, cake tui hmel zet hi alo awm a, a bula lehkha them chu ka han la a,
“Miss, dam thuai teh”tih chu alo inziak a, lehkhabu min petu tho kha ani tih ka hre mai. Ka thaw halh a,
“Tunge maw anih a hetiang hi a rawn tih fo mai le?”ka ti sap a. Ka nu chuan thil awmzia min zawt a, ka hriat bik loh thu ka sawi chuan mak a ti hle a, keipawhin mak ka ti a ni.

Nipui boruak chuan ka taksa pawh a tiharh sawng sawng a, reiloteah ka ke hmang hian ka duh duhna hmunah ka kal veleh thei tawh ngei ang tih chu ka beisei a, ka chak zawng leh ka duh ang ngeiin ka nun chu hman ve ka chak tawh a ni. Kha accident rapthlak tak khan ka mang lam thlengin min la tibuai fo a, ka bula na tuar rum te leh mitthi te kha ka ngaihtuah chhuah apiangin ka nun ram hi a chau ngawih ngawih a, ka natbelh hialin ka hre thin. Ka nunah mi pawimawh em em ni thin khan natna khuma na tuara ka awm laiin khawngaihna nei miah lovin min kalsan bawk a, ka natna avang ringawt pawha  hrehawm ka tawrh nasat nen, phatsan ka ni leh zel te kha mahnia tuar atan chuan a nasa mah mah a ni. Thinlung na ngawih ngawihin hun ka hmang a, ka nu hi awm lo se ka tuar chhuak thei kher angem ka hre lo. Hun reilote chhungin kha hliam kha alo dam ve a, dam kim thlap lo mahse min phatsantu avanga ka mittui tih tlak hi ka remti bik tawh lo ani. Ni tla tur chuan ka mitah min rawn chhun sar sar a, ka chanchin ngaihnawm lo leh lungchhiatthlak zet chu chu nitla tur chuan liam pui daih se ka ti rilru vawng vawng a. Hlimna hi a zawnga zawng ni ngat ila zawng, hmuh mai theih in ka velah pawh hian a awm reng alawm, mahse hlim hi ka hlau ru tlat tawh ani ber. Chhungkua hlim taka hun kan hman laiin ka pa duhtak chu kan hnen atanga laksak kan ni a, kan chhungkua kha khawvela chhungkaw hlim ber kan nih ve hial ka ring thin. Chutah ka pa dinhmun kha engemaw chen chu rawn luah ve turin mipa fel leh tha ber nia ka hriat kha ka han tawng leh a, ka pa tel ve lohna khawvelah khan hlimna pawh ka tawng leh ta kha ani a, mahse chu takngial pawh phalsak ka ni leh ta chuang lo.
Ka ke a dam tan tawh a, ka duhna hmun ah kal vek thei lo mahila chutia awm hmuna dam tha taka ka awm ringawt pawh chu nuam ka ti. Ka hun tam zawk room ah ka inkhung a, ka suangtuahna vah kual tir velin chung chu ka ziak chhuak a, ka nun hi thawnthu a ni a, chu thawnthu chu engtikahemaw mi ten an la chhiar ve dawn hian ka hria a, ka suangtuahna avang chuan hlim takin ka nui ve thin. Nikhat chu ka thawhna hlui sikul ah function pawimawh tak an nei dawn a, Principal chuan tel ve ngei ngei turin vawi tam min rawn sawm a, phone ah mai duhtawk lovin kan inah hial min rawn kalchilh a, keipawhin min sawmna chu tihhlawhtlinsak ngei ka tum ve a ni. Ka duhdan ang thlapin ka inchei a, hetiang taka duhthusama ka inchei theih lohna chin a rei ta bawk a, darthlalang hmaa ka ding te chu ka nui var var a, ka hlim a ni. Ka thawh laia ka kawm ve ber nen sikul lam pan chuan kan inphur chhuak ve a, a hmun kan thlen pawhin min lo lawm der thiam ve hle. Ka duh vanga chawl nilova accident ka tawh avanga chawl ka nih avang hian ka la intineitu ve em em a,  a neitu lam pawhin min ta chei ve viau bawk. Kan principal fapa Remruata chu ka thutna bula chiah ah a rawn thu a, ka thawhlai kha chuan MA zir in phai ah a la awm a, chawlh hmanga a rawn haw khan ka class la hi min pui ve thin. Tunah a zirlai zir zovin a pa sikul ah a lo pui ve hi alo ni a, kan inhmuh chuan ka nui sak a,
“Kan inhmuh lohna chin a rei ta hle mai”ka ti a,
“Ni e, ka rawn haw chhoh hma khan vanduaina I tawh thu te kha ka lo hria a, a pawi ka ti takzet a ni”a ti a.
Midangin min rawn chimbuai tak avangin kan titi lai pawh kan ti tawp a, programme nuam leh hlimawm tak kan hmang zui nghal a. Ka naupang hluite chuan min lo ngai ve hle bawk a, a nuam ka ti takzet a ni. Thuthleng pangngaia thut ngat ngat chu ka taksa in alo la ngeih vak lo ni tur a ni, ka khua chu sik mai tur ang hian a awm a, a ruk tak chuan ka talbuai hle a, ka awmdan chu min chiktu tan chuan hai mai theih pawh a ni lovang. Ka chal ka dawm vang vang a,
“I nuamsam lo deuh em ni?”rawn titu lam chu ka han hawi a, Remruata chuan min ngaihtuah hmel zet hian min lo en a,
“Ka khua hi a sik dawnin ka hria, damdawi ka lo pai mai silo”inthlahrung tak chuan ka ti a. Ka pang chu a rawn dek a,
“Um, a awm tan anih hi, minute khat min lo nghak lawk rawh”tih leh kal a rual a. Reiloteah Remruata leh a pa chu an rawn inzui a,
“Mapui, Remruata hian thlah haw che sela pawi I ti em?”Principal chuan a ti a,
“Sir, thlah kher ka ngai hleinem”ka ti a,
“A zialo hle mai, chawhma lam te khan lo ngaihven deuh tur che ka ni asin”a ti a, amah vek chuan, “Bawiha, va thlah rawh aw”a han ti leh nghal zat a.
Ka hnial pawhin awmzia a neih loh em avangin thuawih takin Remruata chu ka zui a, an motor in min thalh haw ta a. Kan in kan thlen chuan Remruata chuan min zui lut a,
 “Ka ngaihtuahawm loh hi, va let leh rawh”ka tih pawh chuan min hnial tlat a. Inchhung kan luh chuan ka nu alo awm a, a rin ai ka haw hma thu a sawi chuan Remruata chuan ka nawmsam loh thu alo sawi vat a, ka nu chuan damdawi min pe vat a,
“Keimahni vangin a damlo leh ringawt mai a, a zialo khawp mai”a tih chuan ka nu in alo hnial vat a,
“In tan inthlahrunna tur a awm reng reng lo. Amah tak pawh hian han chhuah harh vel hi a chak tawh a, a nuam ti ber ber alawm anih”a ti a. Thingpui lum tura ka nu choka lam a pan veleh chuan Remruata chuan ka kut chu a rawn khawih dek dek a,
“Ka lehkhabu rawn thawn che kha I chhiar tawh em?”a ti zawi sap a,
“Maw..?”ka bangbo viau mai, ka han ngaihtuah let a,
“Kha kha nangmah I lo ni reng a?”min petu ka hriat loh kha amah ani reng tih ka hriat chuan mak ka ti ani tih ka thup thei lo. A nui sak a, ka kut chu ala vuan reng tho a,
“Hrilh duh che hi ka ngah lutuk asin, mahse tunah chuan sawina hun ani lo tih ka hria, I dam that velah ka hrilh ang che”a ti a. Ka lo nui ringawt a,
“Ka hrilh hunah che chuan I thinrim loh pawhin I nuih a za maithei”min melh ralh chung chuan a ti a,
“Ka dam vat I duh chuan phei la, ka mu anga, ka dam mai ang”ka ti a, a nui chhuak hawk a,
“I nu khan thingpui min lum sak in ka hria a, ka in sak I remti vak lo tihna ani ang maw?”a ti a, ka kut chu ka la sawn a,
“I van tawngthei”ka ti sap a, a lo nui thung.
Zana ka muhil lai chu ka thangharh hlawl a, chhun a thil thleng te chu ka ngaihtuah neuh neuh a, khang lehkhabu kha Remruata hnen atang ka dawn alo ni reng a, ani hian enge a hriat? Ka thawhlai pawh khan innel tur khawpin kan inchenchilh tam lova, a zirna piah lamah mi hausa fa anih vang te khan ka hnaih ngam lo hrim hrim. Thawklehkhatah kan inpawh thut a, kan innel thut a, rei tak lo inkawm tawh ang maiin vawiin ni ngei pawh khan kan inkawm ani si a, ka hrethiam lo. Ka han inlet thak a, ka mut lah chu a chhuak lo telh telh lehnghal, ka khawsik alo reh vek tawh avangin ka taksa pawh chu alo zang vak a, ka muhil thei chuang in ka ring lova, ka tho ta nge nge a. Ka lehkhabu bawm a uluk taka ka dah fel then chu ka han haichhuak a, a kawma thu inziak chu ka chhiar nawn leh a, ka then sak a, a phek hnung ber chu ka keu a, a hma zawnga ka la hmuh miah loh chu ka hmu hlawl a,

Best wishes,
Remruattluanga
A hma khan engtinnge ka lo hmuh loh theih zawk, ka khup thawk a, a awm na ngai ah chuan ka dah leh vat a. Ka khum ah chuan ka inthawlh kak a, ka mitthlaah Remruata chu a cham reng mai.

Ka nu chu mamawh leiin a chhuak a, ka nau pawh class kal turin a chhuak tawh a, inchhung ka ti fel mawlh mawlh a, ka tihfel zawh veleh ka lehkha ziah lai ziah zawm leh chu ka tum a ni. Ka room lam pan ka tum lai chuan kawngkhar kik ri ka hria a, ka va hawng vat a,
“I tha tawh em?”Remruata chu kawngkhar bulah alo nui sang a,
“Nang maw? Lo lut rawh”ka ti ban chap a, inchhung lamah kan inzui lut a. Sitting room ah chuan inhmatawn in kan thu a, a hmel hmuh chu a nuam ka ti, chutihrualin ani hi hnaih lutuk ka hlau si,
“I chhungte an awm lo ani maw?”a ti a, an awm loh thu ka sawi a, ka bulah chuan a rawn in sawn phei a, ka lo zam ru kher mai. Ka bul chetah chuan a thu a,
“Ka pa school-a i rawn thawh tirh a chawlh hmanga ka rawn haw hmasak ber kha ka la hrereng thin” ka en a, min lo en ve chiah a,
“Ka hmuh hmasak ber che khan hmeichhe danglam tak I ni tih ka hria, zep lo chuan khatih hunlai khan ngaihzawng kawplai pawh ka nei reng, mahse ka thinlung kha I hneh tlat si a, mak ka in ti thin. I class lakna bula lo awm ve te kha a nuam ka ti a, hnaih che kha ka duh rualin midang ka tih ang mai chuan ka nel ngam lo che. I accident thu ka hriat khan min deng na lutuk a, engmah tihtheih ka nei silo. I chanchin hriat chak in ka pa ka rawn be fo a, zawh fo erawh a rem lohna chin kha a awm ve a, ka rilru kha a ipik ngawih ngawih thin. Ka exam zo ka rawn haw veleh kan tur che in ka rawn kal a, damdawiin khuma I lo mu reng ka hmuh khan ka thinlung hi a na em em a, nang hi ka duh che ani tih ka inhrechhuak bawk. Vawi tam tak rawn kal nawn leh tum in ka bei a, mahse ka ngam lo, a chhan chu ngaihzawng I lo nei reng anga, ka tum loh deuh hian ka hmu ang tih ka hlau tlat a, nat kha ka hlau ani”a ti a, a hmai chu a han tuai puat a,
“Nang hi ka duh takzet che ani tih hrilh tur che hian huaisenna ka neih zawng zawng ka sawmkhawm a, mahse ka huaisen tawk lo zel a, tun hun hi ka thleng ta anih hi. A rukin, a ruk takmeuh in i chanchin hi ka ngaihven reng thin. Mapui, i rilru ka hre miah lo chungin kei hi chuan midang ka ngaihtuah thei lo ani”a ti a. Kei ve mai mai hi chutiang chuan mipa pangngai tak hian min lo ngaihven ve ang maw? Ka thaw halh a, ka mumang chu a ni em si lo,
“Remruat, kan dinhmun avang ringawt pawh hian kei hian sawi tur ka hre lo”ka ti a, ka rilru dik tak pawh a ni. Ka darah min rawn khawih a, amah en tur chuan min kuai her a,
“Dinhmun maw? Kan sawi dawn anih chuan kei hi chawmhlawm satliah mai, nun khawchhuahna zawnga bei ve mek ka ni e. Chu kawng ka zawh mek naah chuan nang hian min ring tawk takin min kalpui thei angem?”a ti a.
A hma atang tawhin mi puitling tak ani tih chu ka hria, a nu leh pa vang hian chapo dawn pawh nise thil awm lo ani miah lo, mahse chutiang mi chu a ni lo. Ka han maimitchhing a,
“Remruat, hun min pe rawh”ka ti a,
“Awle, I duh ang tawk hun chu ka pe ang che, min tih beidawn loh hram ka beisei”a ti a.

Zan tin Remruata chu a rawn leng a, min nawr miah lo mahse beidawn a tum lo tih ka hria. Chawlhni zan a ni a, ka inkhawm bang chu haw tlang mai lovin committee member kan thu fual a, in ka thlen chuan Remruata chu a lo thu reng a,
“Va haw har bik ve”a tih chuan ka nui suk a, room ah inthlak turin ka tlang a. Ka chhuah leh chuan Remruata chu alo muthlu bam a, a bulah chuan ka thu a, rei vak lo hnuah ka thawm hria in a rawn harh a,
“Ka lo muthlu leh ringawt tawh, nizan ka meng rei lutuk a”a ti a,
“I taksa duat ve tur che alawm, mut vang vang tur che ania”ka tih chuan min melh hrawk a,
“Min thlakhlelhna hi chu I nei lo ve ngawt mai tiraw?”a aw ah chuan tlemin a beidawng ve in ka hria.
Sawi tur hre lovin kan ngawi reng a, a phone a rawn rik chuan ka bul mai a a dah avangin tum em em lovin ka lo en hram a, hmeichhe hming chu a rawn lang a, rang takin a reject nghal hmak a. Ka thil hmuh chuan ka awm a ti nuam chiah lo, ani hi midang tan hian ka phal tak tak chu ka ring lo, mahse dinhmun inthlau leh lutuk hi chu nakinah ka natna mai mai ani ang tih ka hlau si a, chu chuan ani nen hian kar min dan hian ka hre tlat a ni. A phone chu a tuai vir a, enge a sawi leh dawn tih chu ka lo ngaichang tawp a, a hnenah hian sawi tur ka hre hlawl lo chu ani lo, mahse sawi tan dank a hre lo ani. A tawpah chuan a rawn tawng chhuak ta hram a,
“Mapui, dinhmun vang bawk chuan em ni min hnar dawn? Kei hi hei aia dinhmun chhia ah hian ding ta ila, min duh angem? Keimah ka nih vanga min hnar nge I nih kan dinhmun vang chuan, chu tal chu min hrilh ve ang chu tiraw?”a ti dam dap a. Ka han thaw hak a,
“Remruat, dinhmun vanga hnawl nih natzia hre tur hian I dinhmun hi a la chhe ve lova, mi hausa ten in tawrh ve loh leh inhriat loh tam tak hi keini chuan kan tuar asin. Nakin zelah tuna I rilru ang hi I pu lo maithei a, dinhmun vanga hnawl ka nih ngat phei chuan ka na dawn lutuk, chuvang chuan ka rilru tak tak hi ka inzawt chiang ngam lo ani e”ka ti a.
Ka kut chu a rawn la a, a hum vang vang a,
“Engtikahmah chu I hlauhthawn em em dinhmun inthlauh vang chuan kei hian ka thlauhthla ngai lovang che. Kei hian hlauhthawnna ka nei lo emaw I ti hlauh ange, tuman ka hnen atanga an lakhran che hi ka phal dawn lo a ni. Engpawh hmachhawn ngai se ka thawk tek tek chhung chuan I tan hian ka ding zel ang, thildang ka tiam thei lo che anih pawhin chu chauh chu ka tiam ang che”a ti a. Ka mittui tling pam chu duat takin a hru a, ka ta ni tura ka suangtuah phak loh chu ka ta a ni ta reng mai, a rawn kun hniam a, a hmui nel thep chuan min rawn fawp vawng vawng a.

Bung 3-na
Chona thar hmachhawn tur ka nei a, huaisen taka ka kal phawt chuan engkawngah pawh ka hlawhtling thei tih ka hria. Ka tuina kawngah Remruata chuan min tuipui thiam em em a, nitin a thil tawn atanga ka tan a tangkai dawn nia a hriat chu min hrilh chhawng peih reng a, ka suangtuahna hlawhtlintir chu a tum ber anih thu min hrilh thin. Ka tan pawh thil awlsam ani lova, mahse ka beidawn dawn apiangin min fuih a, ka pa thusawi kha min hriat nawntir thin. Nikhat chu ruah a sur cherh cherh a, ka room ah inkhung in ka thawnthu ziahlai mek chu ka ziak melh melh a, ruah chu a bang duh meuh lo. Ka nu chuan min rawn ko a, chhun thingpui in a hun tawh anih ring in ka sana chu ka en a, a lo hun loh avang chuan mamawhna dang min nei nia ngaiin ka va chhuak phei a. sitting room ah chuan Remruata chu alo thu a, a kawr chu a hnawm deuh chep a, min hmuh chuan a nui sak a,
“Tun ang hunah I lo lan pawh ka ring lova..”ka ti a, a bulah chuan ka thu a,
“Ka ngai lutuk che a, ka insum thei thlawt lo” a ti a, ka hmui ka tipawrh a, a nui sak a. A kawr ka han khawih chuan alo huh angreng viau a,
“I damlo ange shawl sin zawk la I kawr hi dah ta che”ka ti a,
“Mi it palh ang”ka bengbulah chuan a rawn ti sar sar a, a nakah chuan ka nghawk salh a, a au that a,
“Kungfu thiam bialnu neih ka duh miah lo ania aw”a han ti leh zauh a, rum takin ka melh a, a nuih a za telh telh thung. Thingpui kan in zawh hnu chuan school lama a let dawn leh dawn loh chu ka zawt a,
“Ka kal tawh lo mai ang, naktukah ka zin dawn si a, chuvang chu nia chhun chhuna ka rawn kal”a ti a,
“Zan lamah insiam ka duh awm sia, ka rawn kal theih ka ring chiah lova”amah vek chuan ati a. A zinna tur chungchang chu a sawi tha duh vak lo na a exam tur a nei anih ka ring. A sawi chin bak chu ka zawt duh hran lova, tul a tih chuan min hrilh mai turah ka ngai.
Ka computer dawhkan hmaa thuthleng ka dah ah chuan insi rialin kan thu a, shawl kan inzawn a, ruah chu a la tla cherh cherh reng a,  rei tak la in zuiin la inkawp lo mahila kan pahnihah hian kan duh chu a kim ni mai hian ka hre thin. Ral lehlama chhum zing chiai chu kan thlir reng a, a pang lum nuam taka min kuahna chu ka thlahlel a, ka ning ngai lo. A darah ka lu ka nghat a, ka thlamuanpui lutuk hi a mak ka ti zawk thin. Ka beng chu a khawih leh neuh neuh tawh a, ning viau thin mahila ka ning phal lo a ni ber,
“Thil pakhat ka hrilh ang che aw”a tih chuan ka lo bu nghat a,
“Engmah I lakah hian zep neih ka duh loh vang chauh ani tih min hriatsak hmasa dawn nia”a ti a, chutah,
“Ka tleirawl chhuah hlim hian damdawi ka khawih ve hman a, a mak khawp mai, mi tam tak chuan zu te kha an in hmasa a, a hnuah damdawi  khan an thlak leh ani mai a, kei ve chu damdawi kha ka khawih nghal hmiah a, zu ka in thei miah lo”a thaw halh chu ka hria a,
“Kan chhungkua min dah sang lutuk hi a ruk tak chuan ka zak thin, ka sawi chuan kan chhungkaw mualphona ani a, sawi loh theih hi ka duh ber chu a ni. Mahse ka ring em em che a, ka tan hi chuan I danglam ka tih tawh kha, ka nu hi ka pa letling chiah a ni a. Ka pa hrechiang apiangin pa tha anih thu an sawi zel ang, ka nu erawh zahawmna ngai pawimawh em em, hausakna hmachhuana engpawh ti duh mi ani thin. Sual kawng ka dai ve pawh kha ka nu vang ah hian ka puh lo thei lo, ka duh lo chung hostel ah min dah a, ka pa hlata awm kha ka duh ngai lo. Ka lungleng rilru na khan ka thiante khawih ang kha ka khawih ve ringawt a, mahse vanneihthlak takin ka pa in min rawn lachhuak a, kum chanve tlinglo hret ka khawih ve hman tihna anih chu”a ti chuai raih a.
Ka han insiamrem deuh a, a sawi leh tur chu ka nghak ani tih a hriat in a aw chu a han thian a,
“Tun thleng hian ka khawih nawn leh ta miah lo chu ani a, mahse a hrehawm lai ber chu maw, khang ka thil tih thin te kha ka ti thin a ni tih hre miah lova ka nu in addict te a hmusit thin ani”a ti a, a sawi zawng chuan a thinlung chu a rum tih ka hre thei,
“Ka sawi tawh kha, kan chhungkaw mualphona ani tih hrereng chunga ka hrilh chhan che chu I hre tawh bawk a, I rin ang em em chuan keini hi kan dinhmun a sang lo tih hi lo theihnghilh suh ang che”a ti a.
Engmah sawi tur ka hre lo, nghet zet hian a kawngah chuan ka kuah a, rilru nat hmel taka min rawn en chuan ka lo nuih seih a, ka tih ngai loh ang takin ka han fawp zeuh a, a meng kawk a, ka hmui ka la sawn tur chu phal lovin zei tak hian min lo fawp nghal thuai a.
Karkhat dawn a zinbo hnuah Remruata pawh chu a rawn haw leh tawh a, exam a pek thu chiah min hrilh a, enge a exam tih pawh ka hre chuang lo. A hma aiin a rawn leng tlem deuh bawk a, chu chu pawi ka ti hran lo. Ka hnathawh laiah theihtawp chhuah ve ka duh a, hunawl ka mamawh a, ka thlakhlelh ve tho avangin rawn len a tumin ka hnar phal bik lova, chutia a rawn kal tlem pawh chu pawi ka ti lem lo a ni. Ka duh angin ka taksa chu a la chak tawk lova,  chutiang chu ni mahse ka phak ang tawk hna chu ka zawng ru ve deuh reng bawk a, Remruata pa chu inhawng viau mahse school lama thawh chu ka tlin chiah in ka la inhre lo bawk a, ka dil buai duh lem lo. Nikhat chu ka beisei tawh loh hnuah private company pakhatah ka hna dil chu ka tlin thu min rawn hrilh a, ka lawm ve kher mai. Ka hriat veleh chuan Remruata ka hrilh nghal thuai a, chawmhlawm ringawt nih ai chuan ka phak ang tawk ka thawh chu min lawmpui ve ka ring a ni. Mahse ka rin loh deuhin min lo chhang a,
“Hna i mamawh tih i sawi ngai silo a..”a ti ban charh a, engmah ka sawi leh hma in amah vek chuan, “Ka laklawh a, nakinah ka rawn be leh mai ang che”tiin phone chu  a dah a, a awmdan chu mak ka ti deuh a, vawikhatmah hetiang hian a awm ngai si lo.
Zanah pawh chuan min rawn biak hun ka nghak a, thildang ti dawn pawh nise min hrilh hmasa thin, zantir atang a reh vang vang a, biak hmasak chu ka hreh ve tumhrang bawk nen, zan hun a rei duh ngei mai. A tawpah ka insum thei tawh lo chuan ka va call ta ringawt a, a la dawn lo emaw ka tih hnuah a la ta hram a,
“Min rawn be dawn emaw ka ti a”inthlahrung tak chuan ka ti a,
“Ka lo theihnghilh a..”a tih chuan ka thinlung hi a na nghal vawng vawng, “Chaw in ei tawh em?”a rawn ti nghal a, ka chhang dawn a, ka tawng chhuak mai thei lo, phone chu ka dah ta ringawt a.
Min rawn biak a theihnghilh anih chuan kei hi min ngaihpawimawh lohzia a tilang ani lovem ni? Ka mittui chu a tlak loh nan ka insangmar teuh a, phone call rawn kal leh pawh chu ka la duh lo, ka switchoff a, ka melh ngai chu ka melh ngawt ngawt a. Minute 20 vel a liam hnuah ka nau in min rawn ko a, Remruata rawn kal thu min rawn hrilh a. Ka han thu lui deuh ngat a, muangchangin sitting room ah chuan ka chhuak phei a, inngaihtuah muk hmel fe hian Remruata chu a lo thu a, min hmuh chuan a nui sak a, a hmelah erawh engemaw tak chu a awm tih ka hria. Ka nu nen chuan eng engemaw sawiin an titi hlut a, ka nau chu room lamah a inkhung a, tv remote chu ka keng a, en tur ber pawh hre lovin ka hmet kual deuh sek a. Rei vaklo hnuah ka nu pawh chuan room lamah min luhsan a, kan pahnih chiahin kan awm ta. Ka remote ken lai chu min laksak a,
“Entur ber pawh I hre lo anih kha”a ti a, a off ta daih a. Ka beng rawn khawih a tum chuan ka lo thle sawn a, a nui huk a,
“I awmdan kha  nuihzatthlak”ka ti hmuk a, a nui ri hawk a,
“Thinrim tawh suh, I thinrim hian ka buai vek tih I hria em?”a ti a, ka lo nui hak a,
“Min theihnghilh hmak khawpa I awm thei kha a mak a, nang ni la i thinrim ve tho angem?”ka ti a. A thutna atang chuan a tho a, tukverh awmna lamah chuan a kal phei a, a hawng a, a dak vang vang a, muangchang hian a rawn inher a, min en a,
“Ka theihnghilh tak tak che chu I ring em ni?”a kuangkuah a, uluk fe hian min en reng a,
“Tunlai chu ka hah ani, Mapui, ka hah takzet a ni. Min hriatpui loh hian thil tam tak ka hmachhawn ve asin, kan pahniha kan nawmna tur beisei hian thil harsa tak tak pawh ka ti thin a, chuan I hnen atanga I chanchin hriat ka lo duh ve na chu ka tisual ta viau em ni?”a ti ta fak fak a.
Ka ngawih reng avang chuan amah bawk a rawn tawng leh a,
“Ngaihsak nih hi ka duh a, ngaihpawimawh nih ka duh a, chu chu ka tisual anih chuan a thleng tawh lovang”a ti a. Ka tho a, a bulah chuan ka va ding a,
“Remruat, ka tihpalh lutuk, I rilru tur ngaihtuah miah lovin thil ka lo ti a, ka tihpalh lutuk”ka ti a, min lo kuah vat a,
“Kha mai te chauh kha alawm ka ngaihthlak duh leh ka hriat duh, i tan hian pawimawhna neih ka duh ani”a ti a. Vana arsi phe neuh neuh chu kan thlir a,
“Engpawh kan chungah lo thleng se ka thusawi I hriat hma chuan eng thutlukna mah siam ngai suh ang che aw”a ti a, ka lu chu ka bu nghat a,
“Min tiam rawh Mapui”tiin ngenngawl tak hian a ti a, “Awle, ka tiam a che”tiin a biangah chuan ka fawp zeuh a,
“Kan pahniha kan awm zel dan tur hi chu tuman min relsak a ngai lo, ka chhungte emaw I chhungte pawh nise ka duh lo, keimah ngei hian kawng ka zawng zel ang”a ti a, a thusawi chhung chuan ka lo en reng a, min en chuang miah lo hian a kutin ka hmai chu a rawn nawr sawn a,
“Hmeltha tak ni ila chuan min en tlawk tlawk mahla a pawi lova, chutiang ka ni mang silo”a han ti a.
A darah chuan ka lu ka nghat a, a kiangah hi chuan ka thla a muang a, ka ngaih a ngam zan thin, hei hian midangte laka a danglam bikzia min hriat nawn tir thin.

Ka hnaah nitin ka chhuak a, zan lamah hunawl ka neih phawt chuan ka lehkhabu ziah lai chu ka thutchilh chawt thin. Ka tan chuan suangtuahna leh mang lam chauh a ka hmuh thin ni mahse a hlu ve em em a, engtikah emaw chuan he ka suangtuah thin hi miten an la chhiar ve anga, a tak ang maia ngaih theihin ala awm dawn nia ka hriatna te chuan ke pen zel turin min fuih sauh sauh thin. Nilengin ka buai a, lunch ei hun pawh ka lo hrechang tawh lo, ka phone rawn ri ral ral ah chuan dar zat chu ka hmu a,
“Engmah ila ei lo ani maw?”phone lehlam atanga rawn titu avang chuan ka then sak a,
“Ka lo laklawh deuh a, nang i in eipuar tawh em ni?”ka ti ve nghal zat a,
“Pawnah rawn chhuak teh”a tih chuan ka thutna zawna parda in zar chu ka keu a, kan office kawtah chuan Remruata chu alo ding vang a. Ka phone ka dah a, hmanhmawh takin ka tlanchhuak a,
“Ka nu te office ah ka kal a, a remchang em a ka rawn kawi anih hi”a ti a, kan office bula restaurant ah chuan kan inzui lut a,
“Zanin ka rawn leng thei dawn silo a”inthlahrun hmel tak hian a ti a,
“Hm…”ka hmui chu ka han ti pawrh a, “Hmeltha an thinrim ngailo”tiin ka biangah chuan a han piai a,
“Hun thawl ka nei dawn tihna ani mai alawm”ka tih chuan min en deuh ha a,
“Ka rawn len hian ka tibuai che tih i sawi tumna chu ani em lo ang chu maw?”a ti a,
“I hrethiam kan nui dun a. Kan thil ei lai kan eizawh hma deuh chuan nula pahnih hi an rawn lut ve a, Remruata chu an rawn bia a, inhmelhriat tha tak an ni in a lang. A rawn be hmasa tu zawk chuan engtinemaw hian Remruata chu a rawn chhaih zauh a,
“I ho emai”a ti hlar a, chumi te pahnih chu an nui har har a, min kalsan ta a. Min rawn melh chuan ka lo tum deuh bar a,
“Thian hlui satliah an nih kha”a ti a, ka chhang lo. Anihna takah chuan khatianga thuk taka rawn fiam ngamtu an awm kha ka duh lo,
“Kal ang”ka ti a,
“Lungawi lo deuha inthlah ka duh lo tih i hriat kha”dam dap hian a ti a, a,amah vek chuan,
“Ka bialnu hlui anih thu ka hrilh tlang mai ang che, nunhlui chu nunhluiin a liam mai tur ani dawn lovem ni?”a ti a, ka kutah chuan a rawn vuan a,
“Mapui, tumah hian i dinhmun hi an luah zo dawn lova, an luah dawn hek lo, chuvang chuan min ring tawk la, rintlak takin ka awm bawk ang”a ti a. Ka zak ru ngawih ngawih, engatinge hepa hi a puitlin theih bik em em? A tlan liam tur chu ka thlir reng a, min rawn bye bye chuan ka lo vai let ve lauh lauh a.

BUNG-NA
Remruata nen kan chungchang hi ka ngaihtuah sual chang chuan kan pahnih hian kan inkawp tluan theih hi ka ring lo thin a, amah ka rin loh vang ni lovin engemaw tak hi kan inkarah hian hnawk a awm niin ka hmu thin. Chu ka lo hmuh ruk leh ka hlauhthawn ruk chu ka rin ai mahin a lo thleng hma a, rilru lama ka inbuatsaih loh luatah ka na hrep dawn tih lah ka hre silo. Nidang ang bawkin kan office bulah restaurant ah chuan ka thawhpuinu Atei nen lunch kan ei a, kan luh fel hnu lawkah hmeichhe pahnih, Remruata bialnu hlui te bawk chu an rawn lut ve a, kan thutna bul mai ah chuan an rawn thu ve a. An rawn ri dun leh har har a, ka awm an ti nuam thlawt lo,
“Remruata nu in chaweiah min sawm a”tih ri avang chuan ka thu ngil deuh at a,
“Kal loh phal chi ani lo ani maw?”a thiannu in a tih chuan a chhanna chu ka hre pha tawh lo.
Ka thin chu a na vawng vawng hian ka hria, ka hnathawh tur inchhawp chu ka keu kual vel mai mai a, ka phone chu ka han hmet eng leh thin a, ka phone dawn nge dawn lo tih ah ka rilru a buai a, a tawpah phone loh chu ka titlu leh ta nge nge a. In ka thlen hnu pawh chuan ka rilru chu a nuam thei chuang lo, ka tluk loh leh ka phak lohte avanga hrehawm ka tih ber tum ani hialin ka ring. Sitting room lama ka va chhuah chuan Remruata chu alo thu reng tawh a, a thutna lo lam zawkah chuan ka thu a, min en reng a, ka melh duh lo lui thung. A nui ri hak a, ka nuihzat ve lohzia hi hria se ka duh ngawt mai,
“Eng kan ti leh ta nge?”a ti a, ka ngawih reng avang chuan ka bulah a rawn insawn a, “Hmeltha…heyyy.. Khatia i ngawih reng khan ka tan a hrehawm thin zia I hriat kha”a ti a,
“Kha nu kha ka thik”ka mittui chu a rawn tling nghal pam a, engmah hi ka zep peih lo. A mitmeng buai nak chu ka hmuh hmaih lo, a insiamrem vat a,
“A chang chuan kan tana tangkai miah lo hi kan hre thin a, kan na thin alawm. Nunhlui hi inzui tir reng ka duh lo ka tih tawh kha, engang pawhin min rawn hnaih leh mahse awmzia a awm lo. Engatinge khatiang vang mai mai khan ia lo nat thin”a ti a, duat tak hian min kuah a,
“Chaweia sawm chin chu an dinhmun a sang viau tihna pawh ani thei tho asin”ka ti a,
“Chuti anih chuan naktukah rawn ei ve mai ta che, dinhmun sang tehna anih chuan nang tluka rawn ei tur an awm hleinem”a ti a,
“Ka duh lo”ka tih chuan a nui kur kur a, “Ni e, i duh lo reng ang chu, mi dang ang i ni miau lo a”a ti leh mai a. Ka bula a awm hi chuan ka hahdam em em a, ka thinrim rei thei ngai lo. Nilenga hah erh a ka ngaihtuah zawng zawng pawh a bo leh vek tawh a, ka chiai hma lutuk thin hian min tihrehawm mai mai ani tih ka hria.

Hlim taka hun kan hman chhoh ve mek lai chuan harsatna bul alo intan reng a, ka hriat loh in vawi tam tak Remruata chuan kan pahnih tan a bei ani tih ka hriat ni chuan ka tliak hnawp a, dinhmun vanga hnawl nih ka hlauh thin kha ka chungah ngei alo thleng mek a lo ni. Ka office bang chu inah ka tlang mai lova, tih kawi tur ka neih avangin bazar lamah ka tlang a, mamawh ka lam khawm zawh chuan taxi stand lam ka pan a, taxi chhunga ka lut chiah chu car pakhat hi kan awmna lam pan chuan a  rawn tlan mek a, chu car chu ka hrechiang khawp mai, Remruata ta ngei a ni. A bula thu pawh chiang takin ka hmu a, ka thinphu nasa lutuk chu ka dawm vang vang a, nunhlui chu nunhluiin a liam mai tur ani titu ngei khan a nunhlui a mi bawk chu a buaipui leh niin a lang a, chu chuan min ti na a ni. Ka mittui chu ka hru tawk a, in ka thlen chuan ngawi rengin ka room ah ka lut tlang a, ka mittui rawn tla zawih chu hruk nachang pawh ka hre lo. Ka lu nat chhuanlamin chaw pawh ka ei peih lo, ka mu a, ka nu chuan min ngaihtuah lutuk ka hlauh avangin chhun lama ka hah vang ani tiin ka hrilh a, a fanu hi ka na tih a hriat ka duh lo. Chaweikham hnu vel awm ah chuan ka phone chu a rawn ri a, kan ina a rawn len theih dawn loh chuan tun hun hi min rawn hrilh hun ani reng thin a, tunah pawh a theih loh thu bawk rawn sawi a tum tih ka hria. Ka khum mawng lamah chuan ka phone chu ka vawm thla a, ka tah chu a chhuak zual sauh a, ka chak ve viau niin ka inhre thin, min duat lutuk avanga ka rilru lo no tawh zia min hriatchhuahtir a, hetiang mi hi ka ni duh lo. Zan dang ang chu nise ka phone pickup loh vangin kan inah ngei a rawn kal leh anga, mahse a ni tawh lo, a reh zui vang vang a, chu chuan ka thinlung hi a hliam a, ka tlawm ka ti bawk. Ka mu tak na a, ka muhil lo chiang kher mai. Ka tho a, pawn lam chu ka hawi vang vang a, khawvel thimna in a tuam mek kara electric phe eng uar chu hmuhnawm ti em em hian ka thlir a, ka sana ka en chuan zing lam dar 2 alo ri tawh a, chhuak lo eng ang mahse mut chu ka mamawh a ni. Khawvar dawn hnaih ah chuan ka lo muhil ve sek anih ka ring, ka harh chuan ni alo chhuak tawh a, ka nu che vel thawm pawh hriat tur a awm tawh. Ka tho a, ka phone chu ka han en a, engmah a lo awm lo. Ka thawh veleh message ka hnutchhiah ziah thin tak alawm, mahse chu chu ka ti lovang.

Hna atanga ka haw tur chu office kawta lo ding reng ka hmuh avang chuan ka ke pen chu a tawp chat a, nidang ang lo takin a sam chu a pawr phang a, a hmel phak chuap chuan a mut tlem zia a tilang bawk. Min hmuh chuan min rawn pan vat a, ngawi rengin a motor lamah min kai a, engmah sawi tur ka hre lo. Motor chhungah min nawr lut a, a rawn lut ve nghal vat a, a motor ti nung mai lo chuan steering a bawh a, min en vang vang a, ti lui tih hriat tak hian min nuih a, eng dinhmunah nge a din mek tih hre hauh lovin kei lah chu ka thin a rim ngawih ngawih a, ka be chak miah si lo. A motor chu a ti nung a, muangchangin a khalh ta delh delh a, kan tlan thui zel a, kan in lamah kan kal lo tih ka hriat chuan ka phawk deuh hru a,
“Khawnge kan kal dawn?”ka ti ta hram a. Min en lo chuan hma lam chu a melh ngar a,
“Ka hre bik lo..”a ti zuai raih a, kawngsirah chuan a ding a,
“Mapui, inru mai ang”a rawn ti tawl a. Ka kut chu ka hum ngawt ngawt a,
“I puihna hi ka mamawh takzet ani”a ti a,
 “Engvangin”ka aw chu a chhuak hram ani ber,
“I tello in ka awm thei lo, min neih chu duh mai rawh. Min neih duh phawt chuan engkim hi ka kalsan ang”a ti a, ka thaw hak a,
“I chhungte chuan min hnawl ta nge nge maw?”ka ti a, mangan hmel tak hian min melh a,
“Engtikahmah ka then dawn lo che, khawngaih takin keimah hi min ngaihtuah ve rawh”a ti a, ka nui lui hak a. Motor atang ka chhuk chuan min rawn zui vat a, engmah ka ngaihtuah thei lo, ka kal hmawk hmawk a, min rawn dawm bet a,
“Mapui, ka ti na lovang che ka tih kha, ka thunun theih bak thil thleng vanga i na anih chuan min ngaidam rawh. Mahse khawngaihin min ring rawh, i na zawng zawng chu tidam vek turin ka theihtawp ka chhuah ang”a ti a,
“Ka hua che”ka mittui chu a rawn baw zawih a. Motor ngheng chuan kan thu a, ka thinlung chu a tawt mup a, ka khaw hmuh te chu a tawi tuk mai hian ka hria,
“Ka nu chungchang chu ka hrilh tawh che kha, a mizia kha a la paih miau loh avangin kan pahnih pawh hi min pawh hran a, min tihhran hi a tum a ni. Mahse ka thlen tir ngai lovang”a ti a, min rawn kuah a tum chuan a kut chu ka lo vai thla a,
“Tunah hian min zui duh chuan engpawh hmachhawn turin nang hi ka nei ang che”a ti a, min duh lo tute inchhunga lawi chu tu in nge chak ngai ang? Ka lu chu ka thing a,
“Ka thei lo”ka tih chuan rawn kuah a,
“Ka nawr lui lo ang che, mahse min then tur hian i rilru hi vawikhat pawh lo siam suh ang che. Min lo nghak la, ka dinhmun hi ka sawhnghet ve anga, nang hi ka nei ngei ngei ang che, chu chu ka tiam a che”a ti a, nghet zet hian a kawngah ka kuah a, ka tap a, mahse ka tap chhuak lo.

Hun leh ni pawh a ngai ang chuan kan hmang chho ve zel a, Remruata chuan a hma aiin min ngaihsak zual emaw tih mai tur a ni a, keipawhin ka ring tawk a, amahah hian rinna ka nghat thuk ve takzet a ni. Tlai khat hna atanga ka haw tur chu pawnah Remruata chuan min lo nghak reng a, min hmuh chuan a then sak a,
“Min hrilh lawk lova rawn kal te i ching thar dawn elo?”ka ti a, a khi leh sak a,
“I hmanhmawh viau hran loh chuan I tei kual ang hmiang”a ti a, inkhawm zante anih lem loh avangin ka pawi ti hran lo.
Durtlang lamah kan tlan chho a, thlasik boruak a tel tawh avangin khua pawh a vawt deuh lam a ni tawh a, chhun lam erawh vawt tak a la nih loh avangin ka inthuam lum lem lo. Remruata chuan a kawrlum haklai chu a phelh a, min hak tir a, la tlai lutuk chu nilo mahse thlasik anih tawh avangin khua erawh a tlai chak hle thung. Presbyterian Hospital ep chiah ah chuan kan ding a, khua chu kan han chuan vel a, boruak thiang kalh chu am takin ka han hip vang vang a. Remruata chuan motor atang eitur a rawn la chhuak a, ngawi rengin kan ei dun malh malh a, a kut lehlamin min kuah a, sawifiah thiam si loh hian ka rilruah engemawti takin ka awm nghulh a, ka tah te chu a chhuak zawk lek lek.
“I mittui a tla elo?”tia min lo en reng tu chu ka han melh a,
“Engvanginnge a tlak ngawt ang?”tiin ka nui sak a,
“Ka hrechiang tawk viau che alawm”a thaw hak a, “Ka hmangaih che a ni tih hi ka la hrilh lo che tiraw?”a tih chuan ka hawi chho vat a, chiang tak hian min lo melh ran a, ka bu nghat a,
“Ka hmangaih che, ka hmangaih lutuk che”
“Remruat, keipawh hian ka hmangaih che alawm”ka ti sap a. A rawn kun hniam a, a  hmui lum thar thar chuan min rawn fawp a, thlahlel takin ka lo chhang let a.
In kan thlen chuan dar 7 alo ri lek lek tawh a, inchhungah ka lut tlang nghal a, ka nu chu ka hmuh mai loh avangin ka han ko a, min chhan loh avangin inthlak turin room ka pan a. Ka inthlak zawh hnu pawh chuan ka nu hmel ka la hmuh loh fo avangin a room chu ka han bih dek dek a, khumah alo thu a, a mittui chu a lo hru a, rang takin ka pan a,
“Nu…”a mitmenga natna kha ka theihnghilh tawh lovang. Ka kuah a, min rawn ban let tawk tak a, a thil ken chu ka han en a, ka pa thlalak alo ni.
“Nu, ka pa i ngai em ni?”ka ti a, ka pa thih atanga ka nu hetianga ka hmuh vawikhatna anih avangin ka thinlung hi a ti na takzet a ni.
“Bawihte, Remruata hi i thlah a ngai a ni. Ani chu chhungkaw hausa tak atanga seilian a ni a, keini hmeithai tan chuan kan cho phak rual a ni lo”a ti a, a mittui chu a hru a, “Vawiin tlaiah khan Remruata nu a rawn kal a, hmeithai fanu tan a fapa hi a phal loh thu chiang takin min rawn hrilh a, i nu hi ka tlawm vawng vawng asin”a ti a.
“Nu, chutiang chuan a rawn ti maw?”ka nu thusawi chu ka awih loh vang ni lovin chutiang taka hmuhsitna kan tawk chu mak ka ti a ni. Ka hnenah rawn kal in chung thu te chu a sawi mai thei lovem ni? Engvanginnge ka nu zawk a lo tawngkhum? Ka kut chu ka hum ngawt ngawt a, ka thinlung hi a na a ni.
Ka phone-a call rawn kal mek chu ka melh reng a, ka pickup thei lo. Ka thaw leh halh thin a, tlai ah khan ka awmdan a mak ka ti reng a, hetiang boruak kan tawh dawn vang hi alo ni lek si. Ka khumah chuan ka bawk thlawp a, ka pa kha la dam nise hetiang hian hmuhsitna kan tawk bik awm si lova, dinhmun vanga hnawl nih hi ka duh lo, ka duh hlawl lo.
“U, U Remruata a rawn kal ania”ka mu lai chu ka nau in min rawn ko a, ka room-ah rawn luhtir turin ka ti a, rei vak lo hnuah a rawn lut a, engmah boruak a hre lo tih hriat tak hian min rawn nuih a,
“Tlai boruak vawt ka hip pui che chu ka tifuh vak lo anih hmel, i enge na ber?”a ti a,
“Remruat, kan inbiak hi a ngai tawh lo, hetah hian tawp ang”
“Fiamthu na chi pawh a ni lo”zawi sap hian a ti a, ka hmelah ka fiamthu lohzia erawh a hria ang.
“Nang leh kei hi kan khawvel a hran daih ka tih tawh kha ila hria em? Kei hmeithai fa mai mai hian engvanginnge hei hi a tirah khan ka lo hriat daih tawh loh le?”ka ti a, engmah sawi lo chuan min melh ta ngat ngat a.
“Tuna tang chuan inhre ngai lo angina kan awm tawh dawn nia”tiin ka thutna atang ka tho a, tukverh chu ka han hawng a, ka duh ber chu boruaka zam ral riai riai chu a ni.
“Mapui, i thusawi duhdan chu ava mak ve! Kan theihtawp kan chhuah anga, kan bei ang chu tiin hma hun te pawh ka suangtuah ve fo asin. Min va beidawnsan hma leh si ve”a ti a, a tukhumah a kut a suih a, a kun ngawih ngawih a.
Ka thinlung chu a rum ve vawng vawng a, engmah tihtheih ka nei mawlh silo. Ka muhil thei lo chu ka let tawn chhen a, duh reng chunga hmangaih ber then ngai hi a fair ka ti lo a ni. Ka rum hak a, ka muhil thei chuangin ka ring lo; ka tho a, ka room verandah-ah chuan ka thu a, kan nunhlui ni ve tawh mai tur chu ka chhui let neuh neuh a.
Karkhat zet chu alo liam ve ta reng a, ka thawh hlim atanga ka muthilh thlengin Remruata chu ka ngaihtuahnaah hian a cheng reng a, ka muthilh ve hun chhung hi amah ka theihnghilh ve theih hun chu a ni mai. Ka ngai a, biak ka chak em em thin, mahse rem thei lo tur rem tir tum tlat hian awmzia a nei silo.
“In kawmthlangah ka thu, rawn chhuak teh”
Remruata message a ni. Krismas urlawk zan a ni a, inkhawm banah ka haw nghal a, ka nu leh ka nau erawh lenkhawmna lamah an awm tlang thung. Ka chhang duh lova, a haw ve mai chu ka ring a ni. Darkar khat dawn a liam hnuah ka nau chu a rawn haw a, mak tih hmel deuh hian min en a,
“U, khutah khuan U Remruata ang deuh a thu a”a ti a, a room lam min pansan nghal a.
Ka phone ka phawrh a, a number chu ka dial ta nge nge a,
“Haw rawh, ka rawn kal dawn chuang lo”
“Ka thu char char mai ang”
“Awle, i thu thu le, ka rawn kal chuang lovang”
Ka thu hnawk a, hetiang hian awm lo se ka tan a awlsam dawn asin, hetiang chuan ka chakna te hian min kalsan mai ang. Ka mu a, ka harhfim em em thung a, ka room kawngka rawn ri rak thawm ah chuan ka hawi chhuak a, ka nau chu thinrim hmel deuh hian a lo ding reng a,
“Engang mi nge maw i nih le? Hetiang taka khawvawt hnuaiah engtinnge i en liam theih?”ka nau tluka mipa zaidam an awm ka ring lo, mahse tun hi midang vanga ka laka a thinrim ber tum anih hial ka ring.
“Damloh i hlau lo em ni? Haw rawh ka tih che kha”a thutna bulah chuan ka ding a, khua a vawh em avang chuan thaw pawh a khu cham cham thei.
“Ka nu vang a ni tiraw min then?”a aw ah chuan thinrimna thuk tak a inphum tih hai rual a ni lo.
“Nilo, inkawp lo tur kan nih vang zawk hian”ka ti hul hak a.
“Mapui, pawi ka ti, ka venhim zawh loh che avangin. Mahse, khawngaih takin kan chhungte vang mai mai chuan inthen lo ang, ka theihtawp ka chhuah ang ka tih kha, chance min pe hram rawh”a kut vawt thler chuan min vuan a,
“Ka na lo a ni bik lo, mahse ka nu na hmel hi ka hmu thei lo a ni”ka ti a,
“Thleng nawn tawh lo turin ka theihtawp ka chhuah ang, ka dinhmun sawhngheh tumin ka theihtawp ka chhuah ang”a ti a. A sawi mai mai lo tih ka hria, keipawhin ka ring thlap bawk. Engvanginnge hun tha chu ka pek mai loh ang?
Chhungte dodalna karah a rukin kan inzui tha leh ta a,kan inhmangaihna hmang chuan engkim hi kan hneh theiin ka ring ve thin. A chang chuan ka beidawng ve ngawih ngawih fo a, mahse chuti maia tlawmsan erawh ka tum bik lo.
Kum alo thar a, kan nunah erawh chung kumthar chuan awmzia an nei lo. Kan inah Remruata chu a rawn len theih loh miau avangin office-ah a rawn kal fo a, thawhpuite hmaizah a nat avangin chu pawh rei kan ti thei lo. Ka ban hma deuh chuan hun ka insiam vat thin a, Durtlang lam kan pan vang vang thin. Khalai hmun kha kan him ve berna niin kan hria a, kalna tur dang pawh kan hre chuang lo. Tlai khat chu kan leng haw in ka thlen chuan ka nu chauh alo awm a, inthlahrung dekin ka room lamah ka lut tlang a, rei pawh ka awm hma in ka nu chu room-ah a rawn lut a,
“Ka hre lo emaw in ti ange, engkim hi ka hre vek ania, ka ngawih reng chhan chu ka nghak che anih hi”zawi dap thupe aw tak si hian a ti a,
“Nu, ka hmangaih em a ni, kalsan pawh ka tum alawm..”
“In unau hian ka theihtawpin ka enkawl cheu a, inthiante in phak lo ang tih hlau reng rengin ka awm thin. Ka thu awih hi chu in ba ve in ka hria, ka nawrlui lo ang cheu, mahse engtikahmah min hmusittute inchhunga i lawi luh hi ka remti ngai lovang”tiin ka room chu a chhuahsan a.
Ka khumah chuan ka bawk thlawp a, ka mittui chu a far zawih zawih a, engatinge kan inhmangaihna kawng hi a bumboh bik em em le?
Remruata nen inthen tura thu kan tihtluk zan chuan kan tap a, kan rum a, kan na a ni. Min kuah ngawih ngawih a, mipa ve tak ni thin kha a mittui a tling pam a, a zahpui hauh lo.
“Mapui, midang nei suh aw, kan chhungte rilru a dam hunah kan inkawp leh hi a rem ang tiraw?”a ti a, a awmah chuan ka hmai ka phum a,
“Remruat, min dem lo tiraw? ka tan chuan ka nu hi ka engkim a ni a, pa tellovin hei leh chen min enkawl a, a rilru na hi ka hmu thei thlawt silo. Kei hi ka na lo emaw ti suh aw, ka na takzet a ni, kan tan hun tha hi a rawn inher leh anih ngai chuan, ka bawhbelh tawh hauh lovang”ka ti a.
“Chutiang chuan ngaihtuah suh, ka hria che, hun tha lo inher leh tur chu nghakin i tan ka lo awm reng ang”a ti a.
Hringnun hi a hlutna ka hre lo; hmangaih ber kan neih theih miau si loh chuan! Ka nitin hun hman dan pawh a pangngaiin a kal reng a, mahse ka nui ngai mang ta tlat lo. Hmeichhe hlim thei tak ka nih thin vei nen, ka nun chu a inlet thawk a ni ber. Ka nu hmuhah erawh ka inthup hram hram thin a, ka nu hi ka ti na thei lo, ka tana engkim tuartu hi ka ti na thei lo. Remruata pawh ka hmu ngai mang lova, ral atanga han hmuh zauh chang erawh ka nei. Ka thinlung hmunruak hi ani chauh khan a hnawhkhat thei a, chu erawh thil theih a ni si lo.
Hun leh ni alo ral ve zel a, hriat loh chhungin kum pawh a lo vei leh dawn ta reng mai. Ka hna bansan in ka thuziah lamah ka insawrbing a, ka tuina berah chuan theihtawp chhuah tawp chu ka tum a ni. Ka nu leh ka nau in min thlawp tha bawk a, ka thuziah atana tangkai tur anih phawt chuan hmun hrang hrangah ka nau chuan min kalpui mai thin. Zankhat chu mi reh hun nia ka hriatah ka nau nen chuan kan vak chhuak a, tum lawk pawh awm miah lovin Remruata te veng lamah kan haw lamah chuan kan kal a, zan rei lam anih tawh avangin mi veivak pawh an tam lo. Remruata te in bul kan thlen chuan ka insum zo lo, ka nau chu ding turin ka ti a, gate chu ka vuan a, ka thaw kawk kawk a, ka nau chuan min rawn kuah a, engmah sawi lo mahse min khawngaih tih ka hria. Muangchangin kan tlan chhuak leh a, ka tlanchhuak chiah chu Remruata leng haw niawm tak chu an gate-ah chuan a tlan lut dalh dalh a, ka hmu chak a, mahse ka hmu ang tih hlau in ka maimitchhing ta ringawt a.
“Remruata i hriat thin kha anna pakhatmah a nei tawh lo”company-a ka thawhpui thin pakhat chuan kan inhmuh tumin Remruata chungchang chutiang chuan min hrilh a, engtianga danglam nge anih tih erawh rin ngaihna ka hre lo.
Ka lehkhabu chhuah mai theih a kan peih tawh chu ka han thlek vang vang a, ka rilruah Remruata a lang hmasa ber a, min phurpui thin zia te kha ka theihnghilh lo. A kawmah pawh chuan mite hriat theih si lohin kan pahnih thlalak chu chiang lo riai in ka hmang a, a kawm chu ka fawp zeuh a, “Remruat… I tan aw”tiin ka phun chhuak sap a.
Ka beisei phak bakin ka lehkhabu pawh kan hralh tha a, mite ngaihhlut a hlawhin ngaihventu pawh an tam hle a, hlawhtlinna hmel ka hmu ve ta reng mai. Ka rilrua thi thei lo mipa pakhat tan chu hlawhtlinna chu ka hlan a, ka nunah hian engtin emaw tak a rawn lang leh dawn nia hriatna leh beiseina chu ka nei tlat a, engvanga beiseina nung hi nei tlat reng nge ka nih ka hre lo.
“U, U Remruata khan damdawi alo khawih reng ani maw?”ka nau chuan kan chawei lai chuan a rawn tichhuak hlawl a, ka chaw bar chu ka tawp chiang ngei mai. “Niminah pawh kan class bang kha kan hmu a, a rui lutuk a, ka be ta lo”a tih phei chuan awmngaihna ka hre lo.
Ka tap zawih zawih a, ka hmangaih ber chanchin ka hriat chuan min ti na kher mai, engvanginnge a chanchinte kha hriat tuma ka lo beih thin loh? Mahni inthiam lohna hlirin ka khat a, mite hmuhsit leh endawng tuar tur chuan ka phal hlawl lo a ni. Ka tho a, ka hmai chu phih a, ka hmu dawn, engmah hian min dal lovang.
Darkar tam fe ka nau in a hmuhna hmun nia a sawiah chuan ka ding tawh a, Remruata hmel reng reng hmuh tur a awm lo, ka beidawng lovang. Ka hawi phei a, ka mi nghah chu a rawn thleng ve ta hlawl mai,
“Remruat…”phawk fe hian min melh tlawk tlawk a, “I dam thin maw?”ka aw chu khur lo turin ka thunun hram hram a.
“Mapui, hengah te enge i tih ve a?”a aw pawh ala danglam lo, amah zawk hi a ni danglam chu, ka thinlung chu a puakkeh mai dawn hian ka hria.
“Inbe lawk ang hmiang”ka tih chuan a nui sak a, a lu chu a thing a,
“Engmah danglam thei a awm tawh chuang lo, Mapui, ka tuh rah ka seng mek anih hi”a ti a, hnuai lam chu a bih tlat a.
“Min ngaidam rawh aw…”ka thinlung tak takin chu thu chu ka sawi a ni.
Durtlang lam panin kan inkhalh chhuak a, hun rei tak hnuah kan hmun ngainat em em leh kan himna nia kan ngaihna thin lam chu kan pan leh a, mahse ka bula thu mek hi ka hriat thin Remruata kha a ang tawh lo takzet a ni. Meizial chu a zu khu vut vut a, car ngheng chuan ka thu a, enghelh a nei a ni tih chu ka hrethiam, hmanah kha chuan min thlahlel ngawih ngawih a, tunah chuan thlakhlelh dang a nei tawh a ni. Ka mittui chu ka hru zauh a,
“Mapui, let tawh mai ila, a vawt ka ti e”a khur deuh tih ka hria, boruak chu a vawt lem lova, mahse a taksa hian mamawh a nei tih ka hai lo.
Ka rilru chu a nu bulh a, engatinge khatih lai khan huaisen takin ka lo vawn tlat loh ti tein ka inngaihtuah a, a sawt tawh si lo. Ka thingthi rawp a, engkim hretu hnenah chuan ka manganna chu ka thlen a, ani lo chuan min hnem zo dawn si lo. Ka zing tho chu ka lu a na bur a, zan lama ka tah nasat avangin ka mit lah chu a bui chuk a, ka dawihzepna khan min hliam let ve ta niin ka hria. Ruah a tla cherh cherh reng a, hetiang hunah hi chuan chhuah vah a peihawm lova, ina inkhung mai mai chu thil chakawm tak a ni thin. Ka insiam a, ka mit bui luk chu ka makeup hmang chuan tihbo ka tum a, ka inring hman lo, ka tap leh ta!
Ka lehkhabu tihchhuah leh mai tur atana mamawh ka tihfel hnuah ka rilrua awm reng ka tih ngam loh thin chu tih ka tum a; chu chu Remruata nen kan kal fo na thin Durtlang lama kal chu a ni. Ruah pawh a bang tawh a, khua erawh a vawt hrep a, taxi ka ko a, Durtlang lam chu ka pan ta vang vang a. A hmun ka thlen chuan a lo reh leh raih a, ka thinlung puakkeh mai tur chu helai hmunah hian bunruah ka duh a ni. Rei ka la awm hman lo, thawm ka hriat avangin insaseng mai inring in ka han che sawn a, ka rin loh lutuk in chulai hmunah chuan Remruata chu a lokal ve anih chu! Kan inmelh tlawk tlawk a, hmuh kan inring lo ve ve tih kan hria,
“Mapui…”tham chal hian a ti a, a thaw hak a, beidawng zet hian van lam chu a hawi a, “Hmuh che ka inbeisei lo lutuk a, ka hamhaih takzet a ni”a ti a.
“Remruat, helai hmunah hian i kal fo tiraw?”ka ti a, ka rin hi a dik a ni. He mihring hian min theihnghilh lova, min theihnghilh chu sawi loh, kan pahnih hmun bik ni thin hi a tlawh fo tih ka rin chu a nemnghehna ka hmu a ni.
He hmunah ngei hian beiseina sang tak nen kan hma hun kan suangtuah fo a, hlim takin kan nui thin. Mahse kan intawh leh chuan a hmun dang lo mahse kan nundan erawh a danglam tawh thung.
“Min ngaidam rawh aw”ka mittui chu ka khap per sak a, “Kan pahnih tana huaisen taka ka beih loh avang khan min ngaidam mawlh ang che”ka ti a.
“Mapui, i thiam loh pakhatmah a awm hleinem, ka dawihzep luatah ka nun ka hloh a,  a pawi zo ta vek a nih hi”a ti a, “Ka ngai thin khawp mai che”a then sak a,
“Nikhat te pawh ka theihnghilh ngai lo che, ka ngai em em reng thin che”ka ti a, a nui sak a.
“Mahse kan intawn leh dan hi ka va haw tak em! Nun hi a bul atang tan leh theih nise ka ti ngawih ngawih asin. I kiangah lo hlimna ka hmuh loh atang khan engmah pawisak ka nei lo, ka chhungte ka haw ngawih ngawih a, ka chak ber chu boruaka tham ral daih chu a ni. Ka nu hmel ka hmuh peih loh avangin pawn lamah ka hun tam ber ka hmang a, engmah ka sawi ngai lo chung hian an fapa hi ka beidawng a ni tih hre tur khawp chuan ka awm ve in ka hria. Mahse kan chhungkaw nun chu a pangngai reng a, ka rilru hahna te hi thlenna tur ka mamawh ve a ni”a thawk a sak talh a. A taksa mam pal thin te chu alo bawr chhawr zo tawh, a kut chu ka hmer vang vang a, ka thinlung hi ana a ni.
“Engatinge damdawi kher…?”ka mittui bawk chu a rawn tla leh a,
“Ka duhthlanna vang ni si hian ka duh vang a ni bik lo asin. Ka tleirawl laia ka khawih khan engmah keimahah khawih nawn chak na ka nei ta lo kha a ni a, khatiang bawk khan tunah pawh ka nih ka ring thin. Ka beidawng em em a, tihngaihna ka hre si lo khan damdawi chu ka khawih ta ringawt a, ka duh duh hunah ka chhuak thei alawm, ka addict hauh lovang tiin he khura ka luh dawn hian ka intiam ve asin. Mahse maw Mapui, alo ni hauh silo, vawikhat ka tih chuan vawihnih alo hring a, duh lo em em chung khan ka ti ta zel a, tun hun hi ka thleng anih hi”a aw ah chuan inchhirna te, beidawnna te a lang chhuak a, ka insum zo lo, ka kuah thlawp a. Min thlahlel ve a ni tih hriat tak hian min lo kuah let ve tawk tawk a, mi inhmangaih tak pawh then hi enge a hlawkna awm le?
“Remruat, theihtawp kan chhuah ang a, i sim thei em em ang tiraw?”ka ti a.
“Mi tam takin an tum a, an hlawhchham chu a nia lawm. Kei ngei pawh hi hmaichhanah ngei min tawngkhum tu ka tawng nual asin, ‘Mi puitling i ni tawh a, chhia leh tha hre vek tawh i nia, i chhuah duh tak tak chuan i chhuak thei lutuk ang, i insum theih loh vang mai mai anih kha’ te min ti bawl bawl thin. A dik alawm, chhuah pawh kan duh ve ngei a, mahse hei erawh an hre lo. Mi pangngai chuan insumtheihna an nei a, an ngaihtuahna in a tha lo an tih chu ti lo mai turin an taksa chu an thunun thei a, mahse keini addict-te chuan kha insum tang tang theihna kha kan nei ve tawh lo, kan insum theih loh a kan talchhuah theih lohna tak kha ‘addiction’ chu a ni.  A hrehawm kan ti ve ngawih ngawih a, mi pangngai te ang a mahni inthunun theih tluka chak chu kan nei bik lo. Kan nun a beidawng ngawih ngawih a, pangngai taka nun kan chak ve a ni tih min hriatpuitu chu kan addict pui te bawk an ni. Kan nun chhungril ruak leh natna sawichhuah hleihtheih si loh chu mite hian min rawn hmuhpui tawh silo, mite hmuhsitna leh endawngna chu kan chan ve reng tura ngaiin thinlung na ngawih ngawih in hun kan hmang ve thin asin”a mittui chu a rawn far fap a.
Ka mittui chu ka hru a, ka hru seng lo, he ruihhlo bawih ata a talchhuah theih nan amah chauha bei tur hian engvangmahin ka thlahthlam nawn tawh lovang.
Harsatna chi hrang hrang karah Remruata chu ka vuan tlat a, ka hmangaih thin kha ala ni reng a, ka hmangaihna pawh ala kiang lo. Ka theihtawpin ka fuih ve thin a, a chang chuan beidawn ram ram chang pawh ka nei ve teh meuh mai, mahse beidawnsan hi ka tum lo bur a ni. Zankhat chu tlai tawh angreng tawh takah hian min rawn bia a,
“Mapui, engtinnge keimahah hian beiseina hi i la neih tlat theih bik le?”a ti a, “Ka chhungte pawhin min beidawnsan tawh asin. Nitin ka thawh veleh ka chhiar theih turin message i lo hnutchhiah a, A LA TLAI LO tih i rawn telh zia chhan hi ka hre ve ta in ka inhria”a ti a. A thusawi mek laia a hmel awmdan turte chu ka ngaihtuah a, ka nui sak a, “Pathian lakah pawh hian ka la tlai lo ang tiraw?”a ti a.
“Remruat, inchhira pan tute hi a hnar ngai reng reng lo. Thinlung taka inchhir a, sim a a hnen i pan phawt chuan ani chuan alo la ngaidam duh reng che”ka ti a,
“Min lo nghak rawh aw, a rei tawh lovang. Min rin tlat vang leh ka tan i awm reng avang hian ka lawm lutuk ania aw. Min hmangaihna phei chu ka phu loh luatah sawi pawh hi a zahthlak a, mahse ka lawm ani tih i hriat loh hi ka duh lo.”a ti a. Amah vek chuan, “Nun thar nen ka lo let leh ang, min lo nghak reng ang tiraw?”a ti a,
“Ka lo nghak reng ang che, engtiang pawhin rei dawn mahse ka lo nghak ang che”ka ti a.
Ka room-ah inkhungin ka lehkhabu tihchhuah theih veka kan peih diam tawh chu ka en vel a, Remruata ngaihtuah neuh neuh chung chuan ka han maimitchhing a. Pathian zarah a nun chu a sim thei ang tih hi ka ring nghet bur a, ring lo ni ila hei chen hi amahah beiseina ka nei lovang. Home-a a awmna pawh thlakhat a tling tawh a, vawikhat chu ka kan ve tawh nghe nghe. Hlim takin min lo chhawn a, ‘suffer’ hrehawm lutuk pawh a tawrh loh thu min lo hrilh a, kan tawngtai chhanna a ni tih ka hai lo. Ka phoe rawn rik chuan ka ngaihtuahna atang ka harh chhuak hlawl a,
“Ruatfeli i ni em aw..?”
“Aw, ni e, enge ni ta?”
“Remruattluanga’n accident a tawk a, Durtlang Hospital-ah kan dah lut a, a chhungte kan be tlang thei lova, hmannia i rawn tlawh tum a I phone number i dah ah khan kan rawn be tawp che”a ti a.
Ka phi cheng a, engmah ka ngaihtuah tha thei lo, keimah hi ka fim lo a ni. Hospital kawtah chuan chanchin ngaichangin kan thu thap a, Home-a an hotupa leh Remruata pa chu ka thutna bulah an thu ve a, thil awmzia chu alo sawi mawlh mawlh a, “Compound tifaiin zing atang kan buai a, chaweikham veleh kan chhunzawm lehnghal a, Remruata leh a thianpa pakhat hi kawmthlang lungrem bula thing zar sat turin ka tir a, an ni pawh an kal nghal mai a. Rei vaklo hnuah a thianpa chu hmanhmawh zetin a rawn tlan chho a, Remruata chetsual thu a rawn sawi ta mai a, kan thlen thlak chuan nikhua alo hre tawh lo”a tih chu ka mang hriat ruai a, ka mumang nise, chu ka mang atang chuan harhchhuak ila tih ka duh ber.
Zanah pawh ala harh lo a, ICU-ah a awm avangin a hmuh mai mai theih si loh, kan inluh chhawk a, a tawpah ka hmu ve thei ta hram a. A hmel ka hmuh chuan ka mittui ka dang seng lo, a lu chu an tuam luk a, a hnara thawkna an vuah te chu ka melh tlawk tlawk a, rei awm theih ni silo chu mittui nen room chu ka chhuahsan a.
Tun hi Remruata’n ICU-a ni thum hun a hmanna chiah a ni. Beiseina sang tak nen nitin hun ka chhiar a, mahse kan beisei ang erawhin a tha chak lo. Nikhaw hrelova a awmna atang chuan rawn harhchhuak tawh se tih chu kan duh theuh a, tawngtaina bak tihtheih a awm silo. October thla eng tak hnuaiah chuan ka mittui chu ka hru zauh a, ka dara rawn vuan tu chu ka en vat a, Remruata nu alo ni. Hospital kawtah ka thu a, ka hmangaih hi hla takah ka kalsan phal lo a ni.
“I ngaihdamna chang tlak lo mahila min ngaidam rawh aw. Ka fapa nen keimah vanga in tawrhna hi engatinge ka chungah alo thlen zawk loh?”a mit chu a sen ram a, alo tap hrep tawh anih ka ring. “Ka tisual a ni tih hrereng chungin ka haider lui a, ka fapa hian sual kawng a zawh tirh pawh hian ka mawhphurhna hria ni ila chuan hetiang hi kan thleng awm silo, ka va’n inchhir tak em!!”tiin a kun tlawk tlawk a.
Ka ngawi reng a, ka ngaihdam thu chhak chhuak turin ka ka chu ka ang thei tlat lo, hei chen kan tawrh hnuah lehnghal, ka thutna atang chuan ka tho vat a, ka thinrimna te chu thunun hram hram ka duh a ni.
“I duh ang angin min ankhum rawh, i thawl hawk thlengin ti rawh”a ti dam diai a.
“Ka hua che, ka haw lutuk che, i fapa nen min pawhthen hian eng hlawkna nge i hmuh? Nangmah vang vekin heng thil hi a thleng a ni. Ka haw lutuk che”ka mittui chu a tla zawih zawih a, “Khatiang khan min dodal lo nila chuan vawiin ni hian hlim takin kan awm ve anga, chhungkua pawh kan din ve tawh maithei asin”a thaw chu a chham dawn in ka hria. Min rawn kuah a, talchhuah ka duh, mahse ka tang tur ka awm lo a ni.
“Ka fapa hi dam takin a rawn awm leh anga, hlim takin in awm dawn nia, min ngaidam ula, ka thil lo tih zawng zawngah khan khawngaih takin min ngaidam dawn nia”a ti a. A awm a la bei reng chung chuan ka tap ta zawih zawih a.
Karkhat a liam tawh a, Remruata chuan hmasawnna ala nei lo. Hospital chu ka chhuahsan lo tih theih a ni, ka awm loh lai tak hian min kalsan ang tih hlauhna in ka khat a, ka kalsan hla ngam lo a ni. A khum bulah chuan ka thu a, a kut te chu ka hru fai melh melh a, ka rilru chuan ka tawngtai pah reng bawk a, ka hnen atang hian min laksak ka hlau takzet a ni. A kut rawn phu zeuh chu ka hmu a, ka mitvai anih ringin ka mit chu ka han nuai a, mahse a che tlat a ni. Rang takin doctor ka ko vat a, hmanhmawh takin an che nghal zung zung a, chanchin hriat chakin room pawnah kan awm thap bawk a. Hun reilote chhung mah nise doctor chu rawn chhuak har kan ti a, kan phi sek hlawm a ni ber. Doctor rawn chhuah veleh Remruata pa chuan chanchin alo zawt vat a, “A rawn harh chhuak tawh e, a taksa erawh ala chak lova, biak vak kan la remti dawn lo a ni. Mapuii tih in awm chuan a ni kha a lam nasa khawp mai a, va lut lawk rawh se”a han ti a. Min melh thap a, a chhungte ai pawha min lam hmasa chu mak ka ti a, hmanhmawh takin ka lut vat a.
“Hey…”chung lam alo melh vang vang a, min hmuh chuan a nui sak a, “Dam lo tawh suh, ka ngai tawh lutuk che”ka ti a.
“Min ko vak vak sia, ka lo let leh alawm”a ti sap a, a aw chu hriat ala har khawp mai. “Ka taksa hi ka rawn hmu a, let leh chakna ka nei lo hrim hrim, mahse, tap chunga min ko lawm lawm kha ka rawn hmu leh a, ka lo let leh hram anih hi”a ti a, a chau lutuk ang tih hlau in tawng lo turin ka khap vat a. A kut chu ka vuan reng a, “I tello chuan ka awm thei dawn lo asin, min kalsan chu tum tawh miah suh aw”ka ti a, a mitmeng hmang chuan min chhang a. Doctor chuan awm rei a phal loh avangin ka chhuak leh vat a, hmasawnna hmuh zel chu kan inbseisei hle.
Hlim takin inah ka haw a, ka inbual fai a, rei pawh awm lova hospital lam pan lehnghal chu ka tum a ni. Ka nu chuan lainat hmel tak hian min melh a, “Bawihte… min ngaidam rawh aw. Ka thinlung a chapo luatah nangni pahnih hian na in tuar si a”a ti a, a nu chu ka kuah a, “Nu, i thiam loh engmah a awm lo, keipawh niila ka tih tur vet ho alawm”ka ti a.
Hospital ka thlen chuan Remruata pa chuan min rawn ko vat a, a hmela thlaphanna lo lang chhuak chuan min ti zam nghal vek thei,
“Mama’n a lam ngun tawh khawp mai che”tiin zui nghal turin min ti a. Remruata nu chu alo thu a, a mittui chu alo hru a, min hmuh chuan thutna min lo kian sawk sawk a, chau zetin Remruata chuan min lo melh a, a kut chu a rawn phar a, ka lo chelh vat a,
“Mapui, ka hmangaih che, ka hmangaih lutuk che ania aw”a ti sap a, “Vawi tam tak ka beidawn tawh hnuah beiseina thar min siamsak leh a, nunthar neih chaka min siam leh tu chu nangmah hi i ni. Mapui, ka lawm e aw”a mittui rawn baw zawih chu ka lo hru vat a, “A LA TLAI LO a ni tih kha min hrilh tu awm lo selang chuan vawiin nia thinlung lawmna ka neih hi ka nei awm der silo, Pathian hian nang hi min pe a, ka ringhlel lo”a thaw hrawk a, tawng tawh lo tura ka tih pawh chuan a sawi zawm zel a, “Pathian chhandamna changtu ka ni tih hi inhriat loh ka hlau a ni. Eng dinhmunah pawh lo awm ila, ka lawm zel ang”a ban ka vawnna chu la in amah chuan ka kut chu a la a, “Ka chau deuh a, ka mutsan ang cheu aw, mahse, vuan chung che hian ka muhil duh a ni”a ti a, ka lu chu ka bu nghat a, a maimitchhing chiah chu ka lo insum ve na chu paihbo ang mai an ni, ka mittui chu a luang zawih zawih a, tap lo kan awm lo.

Minute 20 bawr vel chu doctor-in room atanga min chhuahtir atang a liam leh tawh a, thinphu dep depin chanchin kan ngaichang a, ka beiseina neih erawh ala mit lo. Chhuna a harh bak kha a rawn harh leh ta miah lova, khua a rawn var anga, a rawn harh leh mai ang tiin beiseina ka la nei tak fan a! October 22 zing a ni a, ka sana chu ka han bih a, dar 8 alo rid aw tawh. Doctor rawn kal chu ka lo thlir mawl tawp a, “Kan theihtawp kan chhuah a, kan chhan thei ta lo a ni”a tih ri chu hmun hla tak niin ka ngai a, keini nilovin midang a hrilh niin ka ngai tlat a, Ka hmangaih Remruattluanga kha chu a thi thei lo! Min sawi nawk nawk a, min tahkhum tu chu ka melh ngawt ngawt a, ka nu leh Remruata nu an ni. Ka lu ka thing a, “A thi lo”ka ti sap a, ka nu te pahnih chuan min enrual a, “Ni e, nunna tak tak zawk chang turin kailawn a zawh zawk a ni, a thi lo”ka nu chuan a ti a, ka mittui chu a rawn tla thei ve ta. Ka tap hawm hawm a, kan beiseina kha a tawp mai ang maw?

Amah ngai em em tuten kan thlah ni chuan mipui pawh an tam hle a, ka awmdan kha sawi leh dawn ila ka sawi thiam lovang. Kumkhua atana ka hmangaih ber ka thlah liam tur chu na ka ti a, a natzia ka sawifiah thiam ngai lovang. Thlan chhunga a ruang an thlak lai chuan ka taksa chu a khawng mai dawn hian ka hria a, vawikhat tem ah he khawvelah hian ka hmu tawh dawn si lo. “Remruat, mangtha aw…”ka tap tawp thei lo, ka nau leh Remruata nau chuan min kuah a, motor ah min luhpui vat a, ka chau chhe lo chauh tawh a ni.

Engmah ka ngaihtuah thei lo, ka room-ah ka inkhung ngawt ngawt a, Remruata nen kan hlimthla thlir in ni ka chhiar a, engmah hian min hnem zo lo. Karkhat a liam hnu chuan a room chinfel an tum thu min rawn hrilh in Remruata pa chu min hruai turin a rawn kal a, a sulhnu fan chu ka chak lo hle nain ka duh bawk si. A tawpah chuan ka zui chhuak ve ta nge nge a, an in kan thlen chuan a room min panpui nghal a. A nu leh unaute chu an lo awm thap a, min hmuh chuan an insut ta faih faih hlawm a. A thawmhnaw kan thlep tha a, kan bulah chuan a awm ve reng nia ka hriatna chuan min kalsan thei lo. A nau chu koh ka han tum a, “Remruat.. “ka inrin hma in ka han ti phut a, tumah insum thei kan awm lo, kan tap zo ta vek a.

“Hei Au Mama wardrobe ah ka hmu a, lehkha ziah alo tui ve tih pawh ka hre lo”nui lui tih hriat tak hian a nui lui a, Remruata nau Matea a ni. Ka kutah chu lehkhabu chu min hlan a, “I hming a tam si a, i kawl hi a tha ang”a ti zui a. Ka kuah a, chu lehkhabu chu ka fawp zauh a.

Ka room ah chuan darkar chuang fe ngawi rengin ka thu tawh a, tukverh chu ka hawng a, Remruata nen kan hlim thin zia te chu ka ngaihtuah a, ruah sur laia a rawn len tum a ka room-a kan awm lai te chu ka mittui ti tla tamtu ani. Ral lehlama eng phe uar te chu ani nen khan han thlir le hila, kan va hlim dawn tehreng em! Matea lehkhabu min pek chu ka keng reng a, a chhungah hian eng thu tak inziak ang maw? Ka han keu de de a, a phek hmasa berah chuan ka hming leh ama hming chu a inziak a, “Always love, forever missed”tih hi a lo inziak kalh a. Ka keu zel a, kan intawn dan zawng zawng chu a tirte atang a lo inziak thla dal a, ka chhiar a, ka chhiar zel a… a changin ka nui a, a changin ka tap bawk a!

“Hma hun suangtuahna ka neih chhun ang angte chuan kiansan zai an rel a, beiseina chhete ka la neih ve chhun pawh chuan min MITSAN leh ta riai riai mai. Ka nunhlui ka ngaihtuah ngahtuah let a, a then phei chu ngaihtuah zui ngam loh khawpa zahthlak anih avanga ka mit ka chhin vang vang lah a tam, ka thiantha tam zawk biak leh tlawh pawh ka ngam tawh lo…” hei hi kan inthen hnua damdawi a khawih nasat lai vela a ziah a ni. Ka mittui chuan ka khaw hmuh chu a tifiah lova, ka han chawl vang vang a, ka chhiar zawm zel a, a phek tawp lam thu chuan min vel nawn leh ta, “Enge beiseina dik tak chu ni ta ang le? Beisei tur a awm tawh lo chung pawha beiseina neih tlat hi ani lovem ni? Mapuii tluka beiseina nung nei hi an awm lovang, amah vang liau liau a nun thar neih chak ka ni si a. A LA TLAI LO tia min hrilhtu hian tlai ngai lo Pathian hi alo hmu chiang em a, keipawhin engtikah emaw chuan a Pathian hi ka la hmu ang tih hi ka ring tlat a ni. Chumi hun a thlen hunah chuan ka hmangaih ber nen innei in chhungkua kan din ve ang a, hlim takin kan khawvel ni hi kan hmang ve tawh ngei ang…”

Ka tap chhuak hlawp hlawp a, ka hmangaih kiangah kal ve ka duh, nun hi ka chak tawh lo. Ka ding thut a, tukverhah chuan zuang  chhuak ila, thi ila, Remruata bulah kal ka duh. Au thawt ri ka hria a, a bak chu engmah ka hre tawh lo. ka harh leh chuan ka khumah ka lo mu a, ka nu leh ka nau chuan mangang zet hian min lo en a, ka nu phei chuan a mittui alo hru a, “Nu..” ka nu chuan min lo kuah vat a, “Dam ka duh tawh lo”ka mittui erawh a tel tawh lo.

“Tuna i awmdan zawng zawng hi Remruata’n van atangin alo hmu reng che asin. A lawm i ring em? Ani chu vanramah a kal ngei dawn a, i thiltum kha lo puitlin hman la a hnenah chuan i kal ve thei dawn chuang lo asin. Amah hrereng chungin i nun i hmang ang a, atan thil enge maw tak tihsak i tum zawk dawn lovem ni?”a tih chuan ka harh chhuak chiang hle. Ka zak ngawih ngawih a, ka thil tum atthlak lutuk vang chuan ka meng ngam lo a ni. Ka nau chuan min rawn kuah a, “U, U Remruata thuziah hi lehkhabuah tichhuak turin siamrem la, a hming a daih leh tawh ngai lohna turin theihtawp i chhuah zawk dawn lovem ni?”a ti a. Ni e, ka ti ngei ang, ka chhungte hi ka nei lovang tih ka hlau, anni vang hian hma hun beiseina ka neih phah leh si a.

TLIPNA
Kumdang ang bawkin thlanmual lam ka pan a, October 22 lo thlen apianga ka hmaih ngai loh chu Remruata thlana kal hi a ni. Thlan ka thlen chuan tumah hmuh tur an awm lova, ka duhdan tak a ni. Remruata thlan lung chu ka kuah a, ka mittui chu dan  ka tum buai peih lo, a luan hian a rawn luang zung zung a, “Remruat, min kalsan ni ang mai khan ka thinlungah hian ila thar asin. Engtikah mah nang hi ka theihgnghilh dawn lo che tih i hria tiraw?”ka bianga ka mittui rawn luang chu ka hru thuak a, “Ka ngai takzet che a ni tih pawh i hria tiraw? ka lunglenna hi khuareiah a reh ang tiin mi chuan min hrilh thin asin, mahse khuarei chu lo thleng ngai suh se; nangmah ngaia hun hman hi ka la duh a, ka la thlahlel lutuk che. I lehkhabu ziah kha ka chul mam a, tihchhuah mai theih turin ka buatsaih tihte hi min hriatpui tiraw? Remruat…. I reh ta vang vang si a, ka ngai em che a ni, ka mittui hi i hmuh reng ka duh lova, mahse ka thup zo chuang si lo chu anih hi, I hrethiam vek tho tiraw?”ka hmai chu ka hup a, ka tap zawih zawih a.
Thawm ri deuh hak ka hriat chuan ka mittui chu ka hru vat a, ka han hawi chhuak a, Remruata chhungte thlan chei tura rawn kal chu ka hmu nghal a, ka ding vat a, min rawn hmuh chuan min rawn pan vat a, kan natna kan inchhawk tawn theih dan ber hmangin kan vai chuan kan tap a, tumah inhnem tur chuang kan awm lo. Thlan kan chei zawh hnu chuan muangchangin thlanmual chu kan chhuahsan a, “Remruat, ka rawn tlawh leh vat ang che aw”tiin ka phun sap a, in lam pan chuan kan inkhalh chhuak ta vang vang a.