APRICITY -II

TWO

Kan school pawh exam te kan zawh fel tawh avangin mahni buai buaiin in lamah ka buai ve a, chawlh chhung a tha thei ang bera hman ve ka duh avangin awl ni pawh ka la nei meuh lo. Akhuma pawh dawr lamah a buai ve bawk a, kan inhmu zeuh zeuh thei chauh. Mahse, phone ah erawh kan inbe awl lova, kan khawharna kan inhnemsak viauin ka hria. Ani pawh kha leh chen a lo kawp tawh nen thawk leh khatah an tha lo thut kha a nia, awm thiam a har viau pawhin ka ring. Ka lakah beisei nei mah se ka awmdan leh khawsak dan min hrechiang bawk a, chutiang hawi zawngin min be tawh ngai lo. Chutihrualin, min en dan erawh ka hai bik lova, a hmaa a sawi tawh ang khan beidawnsan mai hi chu a tum dawn lo tih ka hria.

Darthlalang nawh pahin hla ka ngaithla a, chawhnu lamah ka nu thlak ka ngaih dawn avangin chhuat te ka nawh zawh hnuah ka inbual leh a, dawr lam chu ka pan ta nghal a. Dawr ka thlen chuan ka nu pawh chhuah inpeih atin a lo awm a, a chhuak zui nghal a. Mi vei vak an tam lo bawk a, ka thutna ka thawhsan meuh lo. Ka rin loh deuhin Thanpuii a rawn lang hlawl a, a sawi hmangin dawrah ka awm tih a hre sa a nih hmel.

“Hlute, khawngaih takin Akhuma hi min pe let leh rawh”

Inthlahrun hmel zet hian hnuai lam a bih a, a ngaihna ka lo hre lo viau thung.

“Thanpui, keiin ka pek leh pek loh ah che enge awmzia awm? In pahnihin sawi ula a tha zawk lo maw?”ka tih chuan a mittui a tling pam a.

“A hma kha chuan han inhauin han intithiam lo thin mah ila rei a ni ngai lo. Engkim I hriat vek kha, Akhuma mizia chu. Khatia kan intihthiam loh leh khan ngaihdam ka va dil a, mahse, nangmah a duh thu che min lo hrilh daih a, a tirah phei chuan nangmah pawh ka haw deuh che a. Mahse, tun thlenga in awm danah hian in pahnih inkarah engmah a la awm lo niin ka hria a, zak chung chungin ka lo kal tawp anih hi”a ti a.

“Enteh, kei hi chuan tha leh ula ka duh reng, ama bulah pawh ka nawr reng a, in tha leh mai turah ka lo ngai ve a. Tha deuhin sawi dun ula a that ber pawh ka ring”ka tih chuan a kut chu a rawn phar chhuak a.

“Min pui rawh, kan pahniha inhmuh ka rawtin I telloh chuan a kal duh loh thu a sawi zel si a, min pui hram rawh aw”a ti a. A lungchhiat hmel tak zetin ka hria.

Zothankhuma mai mai chu! Ka phone ka phawrh a, a number ka dial nghal a, a la pickup thei lo zui. Thanpuii bulah theihtawp chhuahpui ka intiam avangin ka intiam ang ngeia awm chu ka tum, ka thianpa a ni a, ka thu a awih leh mai em ang chu!

Zanah a rawn lang hlawl a, ka phone call leh message zozai kha chhang lova a awm hnua a hmel rawn lang leh lawi si chu ka ngei ru ngei mai.

“Thanpuii a lo kal a…”

“Ka hria alawm, engmah a danglam phah chuang lo ang”

Ka va melh a, tukverh ah dakin ral lehlam chu a lo thlir daih a.

“I sual emai, ti khawp hian a duh ve che a, tha leh rawh u. chu chu ka ngen ngawih ngawih che”ka tih chuan a kut zungchal chuan ka chalah a rawn nawr a.

“Ka duh che tih kha nangpawh min chhang let turin ka ngen ngawih ngawih che”a ti a, a la nui suk zui.

“Ka thutak a nia”ka tih chuan min rawn melh run a.

“dy.. nangman min duh lo mah la Thanpuii bulah chuan ka let tawh lo ang” a ti sap a.

Ka tawng leh dawn lai tak chuan min lo pawt chat a, “Ka rilru ka siam tawh chu ka sawhsawn ngai lo tih I hriat kha”a ti hriam ta hrak a, engmah ka sawi ngam tawh lo.

Thanpuii message rawn lut zozai chu chhang loin ka melh ringawt a, ka khawngaih vanga tha leh tur nise chuan an tha daih tawh awm si a, Zothankhuma ka ngeizia chu sawi vak ngaihna pawh ka hre lo. Min rawn biak a tum pawhin ka chhang duh lo a, hrem ka duh ve hrim hrim.

Chutianga hun kan hman chhoh chhungin school luh a lo hun leh der tawh a, karkhat chhung zet chu Akhuma nen kan inbe tawh lo a, an tha zel turah ka ngai . A tukah schoola ka awm laiin Thanpuii’n min lo bia a, zanah Akhuma nen an inbiak thu leh a rawn be duh ringawt pawh chu a lawmzia a rawn sawi siam siam a, chutianga an inbiak chhoh zel theih chuan an boruak pawh a that ve mai ka ring. Kan inbe zo chiah Akhuma call a rawn kal nghal a, ka han pickup var a.

“Ka rin dan vel a ni”a tia, a dah daih.

Ka phone chu ka melh reng ringawt. A thusawi awmzia kha ka hre lo hrim hrim. Tlai kan banin gate ka chhuak chiah a bike nghengin a lo ding reng a, min hmuh chuan a nui suk a.

“Khawnge I kal dawn?”ka tih chuan min rawn pan a.

“Ka lo hruai dawn che”a ti awlsam then a.

“Hei ka thiannu te inah hian kawi kan ngai asin, lesson plan kan siam dawn”ka tih chuan ka bag chu a la lawp a, a kal daih a.

“Ka rawn um ang cheu”ka thiante bulah chuan ka ti a, Akhuma chu ka zui a.

“Min biak duh loh vel chhan kha sawi rawh le”a tih chuan ka bag chu ka pawhthlaksak a.

“I hrereng alawm. Thanpuii nen inthat leh hma chuan ka be tha dawn lo che”ka ti a.

“Nizanah ka va biak thu chu I hriat daih tawh ka ring a, ka biak chhan I hre duh em?”a ti a.

“A chhan hriat kher chu ka duh lem lo, I biak kha ka duh ber chu ania lawm”

“Nangmah vang chauhin ka bia. Ka call I la duh lova, ka message I chhang duh lo bawk a. Ka biak theihna tur che anih phawt chuan ani chu ka be mawlh mawlh ang. A chhan erawh hman ang kha a ni thei tawh dawn chuang loa, nangmah ka duh vang chauh che a ni ang”a ti hmiah.

Sawi leh tur pawh ka hre tawh lo, ka en reng a, mit khap sawn lek lo hian min melh ve reng bawk a.

“Nakinah kan sawi tha dawn nia, tunah chuan tihtur kan nei, ka kal”tih leh tlan ka rual a. Min zui ta em bik lo. Ka thiante ka umpha vat a, ka va hawi let chuan min lo la en reng a, ka khawngaih ve deuh thut, ka kut chu ka va vai a, vai let duh lovin bike a tinung a, a tlan daih.

Zanah zirlai ka enlawk a, chumi hnuah ka inbual a, ka inbual zawh hma deuhin ka phone chu a rawn ri ral ral a, ka chhuah chuan a tawp chiah. Khuma ka phone chu ka va ban a, U Faka a lo ni. Kan inbiak lohna pawh a rei ve ta hle, ka nau tlawha ka zin dawn khan ani pawh a zin ve ta kha ania, ka zin laiin vawikhat min lo bia a, a bak chu kan inbe tawh lo. Ka thinlungah hian thi tak tak lo mah se kan inthen dan tehtawp chu ka tha a na ve a, va biak zui emaw a chanchin ka u hnena zawh emaw ka tum lo hrim hrim. Ka inthlak zawh hnuah mu pahin whatsapp ka khawih a, kan thianho group a ka rak zawt zawt laiin a message a rawn thleng.

*Ka ngai lutuk che*

Chu zawng chu. Ka seen a, ka reply lo.

Dik tak chuan keipawh hian ka ngai thin, khang hun chhung kan inkawp ve lai hun khan sawiselna tur ka hre ngai lova, min hruai puitlingtu leh ka hmahruaitu dik tak a nia , ka ngaisang tel bawk a. Kan inthen theih ka ring ngai lo, chutiang khawp chuan min duh ve a, ka tan a inpumpek ve. Chhan leh vang sawi tur mumal awm loa kan han tawp ringawt kha chu a ho zawnga ka ngaihtuah chuan ho ka ti a, han sawi vak dan pawh ka hre lo. Ka thiante pawh a chanchin min zawt lo tur leh sawi lo turin ka ti tawp a, tuman an sawi ngai lo. Theihnghilh theih a ni tawh dawn lo a, thil engkima hriatreng zel erawh ka tum ta lo.

*dy.. I sual emai aw. Min duh ve thei ngang lo anih pawhin Thanpuii hnena min let tir chu tum tawh suh*

Akhuma message ve thung.

Ka khawngaih ve ta deuh, mi duh lo chung han tihluih pawh chu thil dik ber a ni lo tih ka hria. Thanpuii ka khawngaih  vang ringawtin ka thianpa hi harsatna ka siam sak kher hi a tha pawh ka ti ta lo.

*I thutluknaa I inchhir dawn lohte chuan*tiin ka chhang ta nge nge a.

Ka chhanna a hmuh rualin min rawn call nghal leh daih. Hepa hi chu aw! Rei tawk tak kan inbiak hnuah ka mutchhuak tawh lutuk chu duhtawk mai ang ka ti a, kan inbiak tawp dan pawh ka hrechiang tawh lo. Ka mumangah chuan U Faka ka lo hmu nasa hle a, khawiah emaw hian kan lokal a, chutia kan kal lai reng chuan a lo ral riai riai a, ka lo au vak vak a, ka harh hlawl. Ka tui inchhawp chu ka han in khawlh khawlh a, a message minlo thawnte chu ka han chhiar leh a, harsatna a tawk em ni le? Biak erawh chu ka tum lo bur bawk si. Engtin tin emaw ka lo muhil leh daih a, ka harh meuh chuan ni a lo tlang sang hle tawh a, holiday tih ka hriat avangin ka tho nghal peih lo. Ka phone chu ka han ban a, kan thianho group-ah Miss Puitei te ina chaweikhawm an lo rawt fel leh der tawh. Anni ho hi school lama ka thawhpuite an ni. Vawiin te chu in tihfai te pawh ka duh asin maw le. Ka tho ta nge nge a, ka chhuah hmaa intih fel fai hman ka duh bawk si, chawlh ve ni hi chu chhungte pawhin kan tha chahwr hi an lo chak ve thin a ni ngai a, ka thiante tak hi chu!

Miss Puitei te in ka thlen chuan midang an lo kim thap tawh a, dawra ka kawi avangin ka thleng tlai deuh bik a ni. Sir Tea chuan sa a lo chan mawlh mawlh a, a thenin kan thil ken tur an lo siam bawk a. Kan ruahmanna hmasa thlakin inah eirawng kan bawl hmasa anga, Sir Tea te huanah chu chu kan keng chhuak leh dawn a ni.

“Hei salad siam thiam I chet a ngai ania”Sir Zautea chuan min raw nawr nghal dawt dawt a.

“awi in mak ve e, ka rawn thleng ve chiah a”ka tih chuan a sana a bih a.

“I tlai man a ni mai”a la ti zui.

Kan tih theih ang ang tiin kan phu suau suau a, rei vak loah kan inpeih fel der. Huan kan thlen chuan a hmun a lo nuam reuh phian mai. An enkawl uluk bawk a, thlai pawh a tam ngang mai. Thlamah kan indah lut fel a, chutia kan rik nak nak lai chuan kan awmna thlang lam atangin U Faka leh mi panga vel ka hmu thut a, huan vel chu a kawk a, a tawng mawlh mawlh bawk a. Chutia ka en reng lai chuan ka thiante pawh chuan an rawn hmu ve a.

“Vawiin hi kan huan an rawn endik ni tih ka lo hre tawh miah lo, mahse, a pawi chuang lo”Sir Tea chuan a ti a. Engmah ka ngaihtuah thei tawh lo, ka rilru chhungril awm dan  min hriatthiampui tur an awm loh avangin  ka hah ngawih ngawih.

“Aw.. Tea, kan huanah kan kal dawn lo I ti emaw ka tia,”patling chuan a rawn ti a. chu veleh  U Faka chu rang zet hian a lo hawi chho a, min hmuh chuan a mit chu a tizim sen a. Helai hmuna min hmuh hi a inring bik lo aniang.

Tea leh a pa chu an inbia a, enge an sawi pawh ka hre mumal lo. Kan thian thenkhatte chu tui cheng turin an insiam nghal sap sap a, tih tur hre loin ka thut ngaiin ka thu reng ringawt.

“Kan inhmu khat hle mai, I dam thin em?”tih riah chuan ka hawi chhuak a. Ka bulah U Faka a lo ding reng. Midang awm mang an lo awm tawh lova, Tea pa chuan phone in tuemaw  a bia a, ka thianteho chu tui an cheng tawh aniang an au chel chul a.

“Umm, dam e”ka ti zawi sap a.

Ka bulah chuan a rawn thu a, ka lo tang nghal tun ringawt.

“Ka message pawh min chhang duh ngai si lo a”engmah thleng lo niawm tak hian a ti vei sup a.

“Sawi tur a awm lo em alawm”ka tih chuan ka rin aiin ka aw chu a chhuak tha thei.

Eng emaw sawi leh a tum lai tak chuan ka thianten min rawn ko a, rang fe hian ka kal ta nghal a. Ka thinphu dup dup chu ka dawm a, hmana a bula awm a nawm leh hahdam ang khan amahah hahdamna a la awm reng a. Mahse, ka tan a ni ve tawh lo tih ka inhrilh nghal zat.

Engmah ka rilruah a lut tak tak thei lo, ka hun hman tum dan anga ka hmang lo lutuk chu ka nuihte pawh a za deuh. An haw mai dawn emaw ka tih laiin huan chhak lam an la fang deuh deuh a, a hnaah tih tak taka ti thin a nih avangin chutia en thuak thuak chu a duh leh miah lo ang.  A aw ri ka hriat ringawt pawh khan keimaha a thawh danglam zia kha ka la hail ova, mahse, enge ka tih theih chuang?

Lu na bura tui ka chen hnuah ka duhtawk ve ta. Thlai vel chu kan la a, an nei chikim bawk a, a nuam tak zet. Sir Tea nu in maian min sih sak a, hawn theuh kan duh avangin a sik hnem hle a, a man a dawng deuh der lo lehnghal. An thlai enkawl that tih hriat em em chuan engemaw min hriatchhuahtir zel bawk a. A hna lam thil anih avangin hriat ka ngah a, a sawi tui thei bawk a, huan tha deuh neih ka chak ve theihzia te kha. An khaw lama an huan thlalak min hmuh fo thin a, kan inneih huna ka duhtawka chei that min phalsak thu a sawi thinte kha ka rilruah a rawn lang thar leh tawh. Ka lu chu ka han thing nawk nawk a, a hre tawh awm lo emai tiin ka inhrilh leh thin, min tihah a ni tawp. Chaw ei kan tum meuh chuan khua a lo tlai ve tan tawh a, green house atanga tomato vel an rawn chawi chhuah chu ka lo thlir dauh dauh a, ka phone rawn rik chuan ka ipte ka han zen vat a. Ka u call a lo ni, ka nu dawr nghak lai luhaia a tluk thut thu leh damdawiin an pan mek thu a lo ni. Ka chiai lutuk chu ka thiante ka ti phawklek a ni ang, Miss Puitei chuan ka phone chu min phihthlak sak a, aman a be ta a. Ka nu hi thisen sang nei anih avangin a tluk hi kan hlau em em thin, tunah engtin tak nge a awm ang?

“Kan haw dawn chiah tho a, kan rualin haw mai rawh se”U Faka’n a tih riah ka ngaihtuahna a fim tan chiah.

“A..A ngai lo”ka tih chuan ka hnial tih pawh hre lo ang hmak hian ka bag a la a, ka thiante bulah chuan a thianpa nau ka nih thu leh ngaihtuah lo tura a tih chu ka ngaithla liam tawp.

Ka thiante tihbuai hreh lo ila chuan a rual kher chuan ka kal lo ang. Mahse, ka thiante chaw la ei lo tihbuai kha a tihchi der si lo a, duhthlan tur dang ka nei lo a ni.

A driver chu motor khalh chak deuh tur leh damdawiin lam pan nghal turin a ti a, a hnungah ngawi rengin ka lo thu a. Phone a hmang chhunzawm a, ka u nen an inbia tih ka hria. Ka phone a lo ri ve chiah a, Akhuma a ni. Ka han pick up chu nidanga ‘Aw”tia chhang tawp thin khan a hming chu ka han lam hram a. A hming ka lam rik veleh chuan phone hmang mawlh mawlh chung hian a thutna chunga darthlalang atang chuan min rawn melh hrawk a, ka lo en ve kal a. A en zama awm ka tum lo hrim hrim, a hawisawn hmasaah a tang ta a. Kawngtluanin kan tawng tawh lo.

Damdawiin kan thlen chuan ka u in min lo hmu vat a, ka pa in a awmpui mek thu min hrilh a. A tlukna lamah a lu a lo sawh deuh a ni awm e. Ka inthiam thei thlawt lo, nizan atangin a nawm vak loh thu a sawi a, kan chaweikhawm dawn thu zinga ka hrilh khan min phalsak ve ta mai kha ania, dawr kha lo nghak zawk ila chuan hetiang hian a awm kher awm si lo a. Ka mittui chu ka kutin ka han hru tawk a.

“Te, a tha leh mai dawn alawm hlauthawng suh”ka u in min hnem nghal a. Ka u hi mipa mah ni se ka thlamuanna leh ka lam tang, ka tana u nih tling em em a ni reng thin.

“Ka va inthlak law kanga, ka lo phei leh nghal ang”U Faka’n a tih pawh chuan ka melh reng ringawt. An tlan liam chu ka en reng a, lawmthu pawh ka sawi hman lo.