APRICITY III

THREE

Akhuma rawn thlen lai chuan ka nu pawh a rawn harh ve chiah a, a bulah chuan thuin a kut chu ka vawn sak a, a mitmeng erawh a la fim kak loin ka hria.

“A that leh vat I ring em?”Akhuma ka bula a rawn thut chuan ka lo ti a.

“Lungngai mah ta che, a tha leh vat dawn alawm”a tih chuan ka lo bu nghat a.

“Mate, in lam kan rawn kalsan rum rum si a, ka va haw lawk anga, Akhuma a awm a, I u a awm bawk a, ka lo let leh vat dawn nia”a ti a, a chhuak ta nghal a. Ka u chuan kan chhungte a be kual aniang, pawnah phone a hmang daih.

Doctor chuan a rawn endik leh zung zung a, ka nu pawh a rawn harh tirh ai khan nikhua a hriat hmel tawh zawk. Mahse, reiloteah a damdawi hanthawh a ni maithei, a muhil leh ta siai siai a. Damdawi lei tur an ziah chu Akhuma’n a lei zung zung a, tih theih dang vak a awm tawh loh avangin haw turin ka ti a, min hawsan mai erawh chu a hreh hmel deuh. Chutia haw tura kan innawr lai tak chuan U Faka a rawn thleng veleh chiah a, Akhuma nen an inhmu chiah chu an inmelh hlum dawn emaw ka ti hman.

“Hawh ka thlah ang che”Akhuma hnungah chuan ka nawr nghal a. A inhum ruh chu ka hmu reng, a tang deuh nain a tang rei lo.

“Thlah ka ngai hleinem, i nu kalsan suh”a ti sup a.

“I thlen hunah min lo hrilh la aw, fimkhur la”ka tih chuan min pawt hnai a, ka chalah chuan a rawn fawp kher a. Ka lo mur nghal sung, a hrehawm ka ti nge ka lawm pawh ka hre lo.

Ngawi rengin ka nu khum bulah chuan kan thu a, kan ngaihtuahna chu a inang lo viau maithei. Ka tana thil hrehawm deuh pakhat chu, ka u thianpa a nih piah lamah ka nu leh pa nena inpawh leh inngaina tak an lo nih avang hian keini inthen vang ngawtin kan chhungkua nen kan inzawmna a tawp ve si lo hi a ni. Minute 20 vel chutia kan thut hnu chuan ka phone chu a rawn ri a, Akhuma’n a thlen tawh thu min hrilh.

“Ka mitmei pawh inveng thei tawh lo chu anih ber kha a”a tih chu ka hre sual emaw ka ti, a sawi zawi lutuk a.

“A dik lo hmasate an zah loh chhung hi chuan tumah zah hi ka tum bik lem lo”ka ti ve kher.

Min chhan a tum lai takin ka u a lo lut a, cabin lama kan awm theih thu a rawn sawi chuan ka thaw huai. Ka pa a rawn thelng ve tawh bawk nen haw  turin ka insiam a, ka pa pawh chaw ei sa in a rawn kal a, tiffin dah a ngaih tawh loh hmel.

“Zanin chu ka riahpui anga, in lam kha lo enkawl tha ula”ka pa in a ti a.

“Pa, kan awmlai hian ka nu chu kan sawn dawn lo mi?”a ti a, an inrawn hnuah ka nu ala harh lo bawk nen nurse ho chuan sawn rih lo mai turin an lo ti a.

Pawnah chuan kan han ding a, kan motor kan hawn dawn chuan ka pa in hman mamawh thut a neih kan hlau bawk nen U Faka motor chuan kan haw ta zawk a. Ka u nen an inbe mawlh mawlh a, ka lo ngaithla liam vel mai mai. Chhun lama nisa ka do ve khanglang khan ka lu a tin a ngut ngut lehnghal, kam boruak tawn hian min tichau vek. In kan thlen chuan room lamah ka lut tlang nghal a, ka inbual sawk sawk a, ka mu daih. Ka u in chawei turin min lo ko a, ka ei peih lo. Ka phone ka phawrh chuan ka thiante miscall leh message a lo tam hle a, ka nu chanchin min rawn zawhna a ni hlawm. Chanchin chu ka han hrilh ve hlawm a, ka nu tana ka tawngtai zawh hnuah ka mu ta daih. Ka rilruah ka nu chu a awm reng a, zing hma taka thawha ka nu bula awm theih vat chu ka chak. Ka mitthlaah U Faka a rawn lang leh zauh thin a, ngaihtuah loh hram hram ka duh ber thung.

Sunday ni mah se damdawiin lam kal ka ngaih avangin inkhawm ka tum lo. Chaw ka ei hma deuh a, taxi in damdawiin lam chu ka pan ta a. Ka nu ei theih tur tlem azawng ka keng tel bawk. Ka va thlen chuan cabin lamah an lo insawn tawh a, ka patea leh nutei an lo awm a, ka nu pawh ka beisei aiin a lo harh tha. Ka eitur kensak chu ka pe a, a eihnem chiam lo na in chutia a ei thei chu ka lawm tho mai.

"Ka va haw phawt anga,Matei a awm chuan in ngaihtuahawm loh ang tiraw?"ka pain ka nu chu a han rawn a.

"Ka that khawp hi va haw rawh u, inkhawm te kha i la kal kim kha va inkhawm la"a tih chuan ka pa chu a lo rum nghut a, ka lo nui vur vur.

"I fate an awm hi chuan min mamawh lo thin mange"a ti a, ka nu pawh a lo nui ve tawp.

Ka nu bulah chuan ka mu a, a damdawi ei hun leh jection hunah nurse an rawn kal a, a bak zawng chu kan nufa titi nan hun kan hmang. Chawhma inkhawm ban hun velah ka pa leh a thiante an rawn lut a, ka thiante rawn kal tum an awm bawk. Pawnah ka chhuak a, ka thiante hmuh pahin canteen ah ei tur ka leia, kan room bulah chuan ka lo nghak ta a. Rei ka thut hmain ka thiante pawh an lo thleng a, mahse ka pa thiante an la awm nual avangin pawnah chuan kan thu a, Zamtei chu  vui ve nauh nauh. Kan venga ka thian neihchhun an nih avangin an vui ngam pawh a awm ve reng, mahse, khati teh thut anih avang khan tumah ka hrilh lem lo ta kha a nia, min hrethiam tho ang ka ring.

"U Faka kan hmu a, hetah a lokal ve dawn maw kan tia, a lo la chho miah si loa"Rti'n a tih chuan ka thu mar leh at tawh.

"Kei chu a la duh hmel che hi ka ti thei e"Zamtein a lo la ti zui.

"Min duh tawh loa hei kan inthen reng hi"ka lo ti hmuk. Ka thiante bula ka awm hi chuan a hming lam lo hian an awm thei lo aniang. Chutia kan sawi lai mek chuan a rawn lang tak tak a, kan ngawi thap.

"Hlutei hi ka lo hruai chhuak lawk ang aw" tih pahin min rawn kai nghal a. Lo hnial let hman pawh a ni lo.

"Hey, enge.. Sawi tha ve mai la" tih pahin min vawnna chu phelh ka tum a.

Inhnuai lamah min pawt zel a, enge hepa hi a hriat le? A motor dahna bul kan thlen chuan min thlah a, ka thaw hlawp hlawp a. A chetdan mak sak thei deuh deuh hi a hre ve lo emaw ni le?

"Sawi tur i neih loh chuan ka kal dawn nia" tih pahin ka inher a.

"Marami kha arai a"

Ka ke pen a tawp chat a, hnunglam hawi lo turin ka insehruh ngat ngat.

"Chuvang chuan maw kan lo inthen a. Kan inthen chhan hre miah loa thla hnih ka awm hnuah ka hre ta a, ka lawm tho mai. Chu pawh ka nu damdawiin awmlai, ka rilru hah ber lai lehnghalin" ka nui a, mahse ka nuihzat lohzia chu a hrechiang ber ang.

"Hlute, ka mawhphurhna hlen chiah kha alawm ka tum. Ka bum thei lo che a, hrilh che kha ka thei bawk si lo a. Na taka ka siam che kha hrehawm ka tih loh bik i ring mi? Mahse, vanneihthlak deuha ka fa a lo nih leh si loh ah chuan hrilh hmasak ber che ka duh a, min lo ngaihdam theih mial takin" a tih chuan ka puakkeh mai dawnin ka hria.

"Kan inkawplai renga hmeichhe dang i lo mutpui vang hrim hrim pawhin ka ngaidam tawh lo ang che" tih pahin ka kal nghal.

A hma khan kan inthen chhan ka hre chak em em a, tunah ka hre ve lem a ka rilru a nazual emaw tih mai tur a ni leh si. Heiham! Hepa hian min ti na hnem mange! Ka thiante bul ka thleng chiah chuka mittui a rawn tla tawp.

"Heyyy.. Tinge? Engtin nge a lo tih che?"Zamtei chu a ding chhuak nghal hluai a. Ka va vuan a, ka lu chu ka thing a.

Ka pa thiante rawn chhuak thawmah ka mittui chu ka hru tawk a, ka thiante chu ka luhpui ta nghal a. Ka awmdan phung pangngai zan lo chu ka thiante chuan an hai lo, ka nu chu thingpui an in tir a, a eitur pawh an buaipui vek. Ngawi rengin ka lo melh reng a, kawngkhar rawn ri rak leh Akhuma rawn lut pawh chu ka lo en reng ringawt. Ka bulah a rawn thu a, min ngaihtuah tih hriat zet hian min melh a, ka lo nui lui a, a harsa lam mah a ni. Ka nu leh ka thiante hmuh theih loh tur hian ka kut chu a rawn vuan a, ka tah chhuah mai lohna tura ka in hum ruh zia chu!

Ka pa tiffin hawn tur ka pack fel a, zanah riah nghal ka tum avangin ka pa pawh haw hma tir ka duh a, an kum a lo upa tan ve bawk nen hahchawl se ka duh. Pawn thlengin ka thlah a, ka pa chuan min ngaihtuah ve deuhin ka hria.

“Mate, a hrehawm lo ang maw?”a han tinawn leh a.

“Min ngaihtuah lo la, ka nu pawh a that sawt em kha”ka tih laiin Akhuma a lo chhuak ve a.

“Pa Mawi, ka lo riahpui ang zanin chu ka hman alawm”a rawn ti a. Ka pa pawh a thawveng huaiin ka hria.

“A ngai kher lo ania”ka pa kal hnu chuan ka ti a.

“Ka riah pui dawn cheu tih I pa ka hrilh tawh kha, ka riahpui tho ang cheu”tih pahin a lut daih lehnghal.

Zanah chuan ka nu drip khai a kal muan em avangin kan veng deuh char char a, dar 10 velah a zo a, a muhil nghal ta bawrh bawrh a. Akhuma nen chuan kan phone ve ve khawihin kan inbe lem lo.

“Fakzuala mitko kha I lo hmu em?”

Ka va melh chuan a phone a lo la en reng, min hmu thei dawn lo tih hre reng chungin ka lu chu ka thing a.

“Ka hnek anih kha”

Ka chhang lo.

Thutthleng atangin a rawn tho a,ka nu khum bula Dunlop ka phahah chuan a rawn mu ve a, lo namsawn ka tum a.

“Ka duh aiin ka la hnek na lo zawk a”a tih chuan amah ka vawnna chu ka thlah a.

“A chanchin sawi ka peih lo ania”ka ti nghat a.

“Dy.. hetiang khawpa nangmaha nghawng a la nei hi chu ka na a ni”a ti ta thlawt a.

Ka inthiam lo ve deuh, ni e, phat rual a awm lo, keimahah hetiang em ema nghawng nei hi ka la tawng tlat lo a.

“Engmah kan inkarah a awm tawh lo a, theihnghilh tuma hmalam ka pen mek lai hian a chanchin ka ngaihthlak reng chuan hmasawnna ka nei dawn lo asin”ka lo ti a.

A thaw ri hak chu ka hria.

“A neih let leh ngei tur thu ka hmaa a sawi khan ka insum zo loa, ka hnek ta anih kha. A hnenah chuan ngaihdam ka dil lo ang, mahse, I hmangaih ber ania, I chungah erawh ka inthiam lo”a ti a, a tho a. A mutna ngaiah a va mu a, a phone a bih leh nghal.

“Akhum..”

Min chhang lo.

“Zothankhum..”

A rawn rum nghut a, ka tawng chu a hria tih lantir nan a mit a rawn ti che zeuh a.

“Nangmah nen hian kan inkawp theih hi I ring tak tak mi?”ka tih chuan a mu lai chu a tho deuh hluai a, min rawn en a, ka fiamthu leh fiamthu loh hriat a tum aniang.

“dy.. eng ang pawhin hun duh rei mah se ka nghak ang che ka tih kha. Min duh turin ka tilui thei lo che a, mahse, ka nghak phawt ang che”a ti a.

Ka kut chuan ka va hui a, mak tih hmel deuh hian min en a, ka mutna bul chu ka han beng a, ngawi rengin a rawn kal. A mutna ngaiah khan a rawn mu a, inhmatawnin kan inmelh ran a.

“U Faka bulah hian ka let theih ka ring tawh lo. Chuan, ka rilru phir lai taka I hnen pan ka duh lo bawk a, chuan…”

Ka sawi leh hmain min rawn fawp thut a, ka hamhaih lutuk a, ka awm dan ngaiin ka lo awm reng ringawt. Ka rilru buai nuai karah ka lo fawp let ve tih ka hriat meuh chuan awmzia a awm tawh lo. Ka inla hrang a, min rawn khawih a tum tawh bik lo. Rizai chu ka hnuk chho a, ka inlukhuh nghal daih. Ka thianpa ngawih ngawih, vawikhatmah a laka zahna ka la tawn ngai loh lakah ka zak ru ta chem chem mai.

“Ka bialnu I ni tawh ania, ka venghim zel ang che”a ti a, a la nui nghawr dawt zui.

Engtin tin emaw ka lo muhil a, ka nu thawmah ka harh a, a muhil tha thei lo anih ka ring, a bulah ka insawn a, kan muhil dun ta bawrh bawrh a. Zing kan harh leh meuh chuan ni a lo tlang sang tawh hle a, ka nu chiu turin nurse a rawn lut chiah bawk.

Akhuma mutna ka va en chuan a lo ruak tawh a, ka phone ah message a lo hnutchhiah.

*in ka thleng chiah aw, I mu lai hmuh theih reng kha ka duh ang* smiley

Ka nui sak a, ka chhang let lo.

Ni 4 damdawiin kan awm hnuah kan chhuak ve ta, ka nu pawh a tha chho zel ang chu. Ka putea fanu Sangpuii kan hnena a awmlai a ni a, dawrah ni tin a kal thei a, kan tangkaipui hle. Keipawh school lamah ni tin ka liam a, kal lamah Akhuma’n rokhawlhna a neih loh chuan min thlah ziah a, tlai lam erawh dawrah a buai tawh thin avangin min hruai lova, ngai pawh ka ti hran lo. Ka nu hian min ringhlel deuh tih ka hria, mahse engmah ka sawi duh rih lo. Ka rilru hi ka la en vel a ni ber, anihna takah chuan kan inhriatna a rei tawh a, inhriat belh leh inngaihsak velh chiam kan ngai lem lo. Kan awmdan ngai reng khan kan awm a, mahse, thian kan nih laia kan tih ngai  miah loh pakhat kan tih tak erawh a awm, kan infawp ve ta fo tih hi.

--------------------xxxxx------------------------xxxx------------------------------------

Ka u in chaw kan eilaiin nupui neih a duh ve tawh thu chu nui chungin a sawi a, ka pa in a lo la thutak em em lehnghal. Ka u chu ka ve melh a, a lo thutak ve ngang mai. A bialnu hi kan hre vek tho a, a thawhpui a ni tih leh nula fel ve tawk tak tih pawh kan hria. Kan inah vawihnih vel chu a lo kal ve tawh a, misual tak a nih ka ring lo.

“I tih ve tak takte chuan palai te pawh kan tir ve ang chu,  in pahnihin lo sawi dun ula, engtikah nge kan kaltir theih ang tih chu a hriat ang chu”a ti a. Ka u chu a nui deuh rengin ka hria.

“Min duat tawh lo sawt anga, ka peih lo”ka tih chuan min rawn nuih a.

“Ka naute I la ni reng dawn tho alawm”a ti a, ka lo nui ve ta nge nge.

Ka u lakah hain ka pangchang em em a, chutianga awm thei tur chuan min duat hle reng bawk a. Kan inkarah kum 6 a tla a, hei vang pawh hi a ni ang, a sawi ang deuhin min naute chei ve em em tih ka hria.

Chumi atanga chhiara karkhat naah palai chu an kal ta tak tak a, chhungten an hriat tawh sa leh engkim an sawi hnua kal an ni bawk a, a hun leh ni tur an ruat fel nghal mai. Ka u in thianah U Faka a hmang dawn a, ka rinse leh hriatsa ni mah se min la nghawng tho. A chhan chu kan inah a rawn tal tam a ngai dawn tih ka hria a, Akhuma mitmei ka veng lo thei tawh lo bawk.

“Ka room chu a ngai hi hman mai ka duh a, nakinah inching lam hi chu kan la zawm vat duh dawn tho si a”a tih avangin a room chu kan tizau a, ka room kan tizim ta thung. Ni e, inchung hi sak zawm mai tura kan ruahman vek tawh a ni a, ka nu han damlo chho ta leh ka u nupui han nei tur bawk nen tihian kan dah ta rih a ni.

“Ka room hi kan tihzim dawn tho chuan mikhual room zawk hi ka duh”ka pa bulah ka ti a. Ka pa pawhin min remtihpui nghal mai, ka u room an chei rualin chu chu ka chei tir ve nghal a, ka nu erawh chuan min ngaihtuah deuhin ka hria. Ka dawih ve zeuh zeuh a, zanlaia ka nu te bula han insawn mai changte hi ka thiante hriat thu loah chuan ka nei ve thin. Ka room hmasa aia fal deuha ka awm tur chu a ngaingam lo deuhin ka hria. Mahse, kan mizia tur engmah kan la inhre lo a, ka u te chu zalen deuhin awm se ka duh vang a ni.

Room chei tantirh lamah U Faka a rawn lang ngai lova, a nithumna vel atangin a rawn lang a,  sawi hmangin a zin daih ni awm tak a ni. Kan inbe ngai lova, kan inkal pel vel mai mai. Min hria angin a awm lova, keipawh a awm ang chiah chuan ka awm ve. Ka nam nul mai theih chhan chu Akhuma ka tan a ding reng tih ka hriat vang  a ni.


Zirtawpni tlai a ni a, school lamah meeting kan neih avangin tlemin ka bang tlai deuh a, ka u in vawihnih lai min lo call. Whatsapp ah pawimawh chu min hrilh mai tura ka tih lahin a read leh thei mang si lo a. Rilru nghet zan lo chuan ka thu tluan ve ta parh. Kan zawh hnu chuan rang fe hian ka tlan chhuak a, ka u chu ka call back a, a la dawn lo emaw ka tih hnuah a rawn la ve ta hram.


"Damdawiin lamah rawn tlang nghal la, hei Faka nen kan accident a, kei chu ka na lo, Faka hi a na deuh hlek a"a tih chuan ka khur leh nghal vek. 

Akhuma ka call a, bungrua a thlen avangin a buai thu phone lo chhangtu chuan a sawi avangin Sir Tea chu min thlah turin ka ti ta ringawt a. Damdawiin lam pan chuan kan tlan chhuak ta nghal a. Ka pa te a hrilh tawh em tih pawh ka hre si loaa, ka rilru chu a hmanhmawh ve em em ringawt.

Casualty ah an lo la awm a, ka u ka hmuh chuan ka pan vat a, a chal chu an lo tuam a, hliam dang chu a nei lo a ni maithei.


"Doctor in a en mek a, a la harh tha thei lo a"a tih chuan engtin emaw tak hian ka awm.

NOTE: he story hi chu tawitea ziah ka tum lawk sa anih avangin a thui viau thei lo ang.