APRICITY- IV

FOUR


Casualty pawnah chuan ka tei kual chhen a, tinge boruak hlauhthawnawm deuh deuh hian min tlak buak leh thin le? Ka u chu nurse pakhat hian a rawn koh avangin a lut a, ka chhungte lo thlen hun ka lo nghak thung. Ka pa leh k u nupui tur U Nutei chu an rawn thleng a, thil awmdan ka hriat ang ang chu ka lo hrilh a, police an lo thleng chiah bawk. Ka u rawn chhuah chuan police pakhat nen an inbe mawlh mawlh a, ka lo en reng a, mi fimkhur lutuk pahnih an nih avangin tuemaw fimkhur loh vanga hetianga awm an nih hi ka ring thiam nghal mai.


“Driver chu a la harh chiah lo a, a thianpa erawh chu hliam a nei lova, kan hnenah kan la nghal”police chuan a ti a, ka u chuan a lu chu a lo bu nghat a.


“Tih theih vak a awm bawk siloa, ka lo va haw mai dawn mi?”ka u hnenah chuan ka han ti a.


“Faka I lo awmpui a ngai rih dawn a, I hreh em?”a ti a, ka inngaihtuah vang vang a, thildang vang a ni bawk si lo a, hreh anga lan chu ka duh chiah lo, ka lu ka thing a.


“Police station lamah ka va lan leh phawt a ngai dawn a, Nutei nen kal anga, ka pa chu lo va haw mai se, Faka chhungte lo thlen hma I lo awm lawk anga, kan insiamrem leh dawn nia. A tha em?”a ti a, a tha kan ti tlang aniang kan hnial lo.


Ka pa chu haw mai lovin a awm ve deuh reng a, U Faka ward lamah an dah tawh a, amah pawh a harh tawh. Mahse, a hliam chu a na ve deuh anih hmel, engmah a sawi lo na a ka hmuh ringawt pawh hian ka hre thei. A chal rawn thlan dep chu ka hruk sak a, a thaw leh halh thin a, na zual lai a nei em tih ka zawh lahin a neih loh thu a sawi zel bawk sia, ka hrethiam tawh bik lo. Nurse duty bulah chuan ka va sawi tawpa, enliam tawp kha ka thei lo a ni.


“Test result a chhuah hma chuan a kawchhung lam awmdan dik tak kan hrethei lo a, a lo na viau maithei a, a vanneih chuan a na lutuk lo thei bawk a. A pum a na a tih viau chuan min lo hrilh vat dawn nia”a ti a, ka hlauthawng ru tak zet.


Ka pa pawh min hawsan mai turin ka ti a, a haw hnu rei vaklo ah U Faka naute pahnih an lo thleng a, kan lo innel tawh em avangin kan inbe nghal bawrh bawrh a. Nurse thusawite chu hrilh nghalin haw ve phawt chu ka tum a ni. A maimitchhin tlat avangin a muhil turah ka ngai a, a puansin chu ka han pawhthatsak a, kal ka tum chuan ka banah a lo vuan a.


“Kal suh”a ti thawp  sap a.


“School atangin ka lo tlang a, ka va haw ve phawt anga, ka lo kal leh dawn nia”tha deuh chuan ka ti ve mai a.


“Nia, hei kan aw m tawh alawm. Rawn ngaihtuah suh, chanchin kan lo hrilh ang che”J-I chuan a ti a, pawn thleng min rawn thlah a.


“Enteh Hlute, lo biak che ka tumna hi a rei tawh tawp a, mahse ka inthlahrung a ka lo be leh lo thin che a”pawn kan thlen chuan a ti a.


“Eng chungchangah maw?”ka lo bo deuh hu a.


“Au Mama nen in chanchin hi kan lo hre har lutuk a. Inah a ngawi reng a, engmah a sawi duh bawk si lo a. Marami tih khan a lo be chhen a, zan khat chu a phone ka khawih ru a, nau pai chungchang te a lo tel a. Mak ka ti lutuk hi vawithum vel ka chhiar nawn nghe nghe. A tukah chuan ka nau awmloh lai sawn ka zawt a, tah chuan min hrilh ta vek a.


A sawi dan chuan Marami khan a lo lenchilh thin aniang, keini lah kan chawlh chuan khuaah kan haw daih zel sia, engmah kan lo hre ve lo a lo nia. Ka hriattirh a ka thinrimzia chu, ka u mah nise ka insum thei lo ka ankhum char char a. Amah lahin hrehawm a ti, a hnuah phei chuan a rai a ti lehnghal. Ka u chuan an chetsual ngei thu leh vawikhat bak anih loh thu ka bulah a sawi. A sawi hmangin khatia mipa ngam harh chi a ni tih ka hriat khan ka u chu uluk taka thil chhinchhiah turin ka ti nghal a, ka rin ang ngeiin a fa a lo ni lo tak tak. Khang hunlai khan ka u rilru hah lutuk kha thil pawh a ei tha thei ngai lo. A cher hman lutuk amah pawh kha, a tihsual ania a tuar tur a ni ka ti maia keichuan, a tuar reng bawk a. In inthen chhan dik tak hi engkim I hriat ve hrim hrim tha ka tih vangin ka sawi duah a nih chu, a tihsual rah I tuar ve erawh ka khawngaih che. Ka u aia mi tha hi I phu ka ti lutuk ania”a ti ta a.


A thusawi chhung zawngin ka kut a vuan tlat a, min thlah hnu pawh chuan ka kut chu a la khawng reng. Hre tawh tho mah ila hriat nawn leh chuan min la ti na tho. Ni e, hmeichhe thiam loh ringawt hi a ni bik lo, hnar duh tak tak nise hmeichhe pakhat chu hnar theih loh thu a awm lo. Mahse, a mak ka la ti tho, ti khawpa mi invawng leh pelhe ngai lo a ni si a.


In ka thlen chuan ka inbual nghal a, ka harh deuh huaiin ka hria. Ka u a rawn haw tawh a, zan lama damdawiin phei a tum leh nain ka nu leh paten an ngaihtuah a, kal lo mai se an ti. Kal turin min beisei deuh tih ka hria, kal erawh ka tum lo. Akhuma nen kan inbia a, zan lama lo leng turin ka ti a, mahni ringawta zan hun ka hman leh chuan ka inngaihtuah leh ngut ngut ang tih ka hlau. Thleng ka sil laiin a lo thleng a, ka pa chanchinthar en a va thutpui a, ka nu in ka u a buaipui anih ka ring, ka hmu lo.


Thingpui chawi chungin ka va fin ve a, chanchinthar a lo zo chiah. Tlai lam kan buai tak hluai avang khan chaw kan ei har ta phian  a, Sangpuii inbual zo a chau deuh aniang a mu nghal daih a. Ka pa pawh thingpui a in zawhin tukverh inkalh that leh that loh a en a, an room lam a pan daih. Ka nu a awm tel ve loh hi chuan ka pa hian tawng tur thlawt hi a hre lo a, inleng ka neih pawhin a inthiarfihlim mai zel.


“Tlai kha pawi ka ti lutuk aw”a no khawn karh karh pah chuan a ti a.


‘A pawi lo, I buai dan tur ka hrethiam alawm’ka ti a.


“A chungah rilru tha chu ka pu lo tih ka pha lo a, mahse, khang a lo thlen meuh chuan ka hlauthawng ve lutuk a”a ti leh a, ni e, a nihna dik tak a ni.


“Akhum, min ring thei tak tak dawn mi?”ka ti leh a, a hmel buai deuh nak chu ka hmu hman.


“Ka hrechiang che alawm”tih chiahin min chhang.


“Ka u thianpa ve ber anih vang hian kan ina rawn chuankai changte a nei lo thei dawn lo a, chung hunah chuan I tan a hrehawm ang tih ka hlau a”ka tih chuan ka kut a rawn vuan a.


“Kan innei vat anga a ni mai lawm. Enge nghah tur awm chuang ? Kan chhungte kan inhriatsak vek tawh a, kan pahnih lah kan inhrechiang em em bawk a”a ti a.


Ka ngawi deuh vang vang, ka thianpa nen inlaichinna thuk zawk kan siam anih chuan a tawp ka thlenpui ngam ve turah keipawh ka inngai. Mahse, nupui pasal inneih thleng thleng chuan ka la ngaihtuah pha miah lo. Kawppuite tihbeidawn hi ka duh lo thin em em a, ngaihtuah thui ngai tak thil erawh a ni lawi si.


“Ka u te hi han innei fel phawt se, muangchangin kan la ngaihtuah ang chu”a ri-ah erawh ka tithung.

--------------------------------xx------------------------------------xx--------------------

Ka u te accident kha ka rin ang ngeiin anni thiam loh ni lovin  a dik lo lam atanga car rawn tlanin a su a lo ni a, mahse, ka u te pahnih pawh vanneihthlak takin an nat dan a serious loh avangin an inbe rem a, tha takin an inthlah ve ta mai. Inneih a hnai tawh bawk nen chet lak a har hle a, ni tin school kal ka ngai  ve bawk nen zan lamah ka u room kan buaipui na lamah hian ka chau thei hle. U Faka hi tlemin a na deuh zawk a, karkhat lai damdawiinah a awm avangin indaih a har a, keimahni vanga hliam tuar anih avangin kan thlahthlam ngawt thei bawk si lo. Hetiang hunah tak hian Akhuma ka tan a tangkai em em a, chhun lamah eng ang pawhin hah mah se zan lamah min pui chawt a, kan tan thil tih a awlsam phah em em thin.


“Mate, Akhuma nen hian inngaizawng a ni lo maw?”ka nu in a ti ta nge nge.


Ka nuih tut tut a, lukhamtein min rawn vawm zui.


“Faka nen inthen ve thei hi a mak ngawt mai”a ti muang ban charh a, ka nu hi a hrisel loh avangin a tawngte hi a muang fan raih a, dawhtheih a ngai thin hle.


“Mihring hi kan lo inthlak ve thei a lo nih hi”ka ti a, a lukham min vawmna chuan ka va vawm let a.


“Akhuma chu a sual ka ti hauh lo a, in kum hi a inrual lutuk hi ka duh lohna ber chu ania. Hmeichhia chuan keini aia upa daih neih hi a tha a, I pa pawh kum 7 velin kan inthlau a, fa kan neih hnu chuan a lo tawk chiah a sin”a ti a.


“Mahse nu, naupan tet atanga inhria, kan mize chhe lai leh tha lai zawng zawng pawh inhriatsak sa vek kan nia, a tha viau lo maw?”ka ti a, ka nui sung a. “Chu lo rengah ka u in nupui a neih chuan nulat rei ka tum bik lo hrim hrim”ka ti zui nghal a.


“Engtik lai khan nge pasal neih te I lo ngam ve a?”min nuihzat em em lehnghal.


“Ka pa hian a phal ngei theih nan min lo sawipui ve la aw”ka tih chuan min rawn melh rum ngang mai.


“Nangni hi… in tum tak tak chu a ni em lo ang chu”ngaihthat loh hmel zet hian a ti a.


Ka chhan dawn lai takin doorbell a rawn ri a, Akhuma a rawn lut zui nghal. Ka nu chuan min rawn melh ralh a, a fanu duat hian pasal ka neih tak tak a hlauhzia ka hria. Engtikah emaw zawng ka la nei ve ngei dawn si a, keipawhin neihsan tak tak tur chuan ka la ngam bik lo.


Rei vaklo a thut hnuah ka u thiante an rawn lut ve a, ka u room lamah an inzui lut nghal a, kan inpeihi thawkhat tawh viau. Room an tihzau belh avangin electric wiring tlem azawng tih that ngai a awm a, chu chu an khawih dawn a ni.


“I room chu uluk vak a ngaih ve loh chu, pasal neih mai I tum si chuan”tih pahin ka nu chu a tho a, ka u room lam a pan daih.


Akhuma’n hrilhhai hmel deuhin min en a, ka tihngaihna hre lo chu ka lu ka lo thing tawp. Ka nu hi a duh chuan a chimawm ve thei lutuk ringawt, mahse ka va hmangaih tak. Kan naupanlai atanga tun thlengin kan duh leh kan thuruk kan sawi ngamna, kan thusawi engkim min ngaihthlaksak peih vek thin a nihna te hi ka chhuang ve thin. A lakah chuan thuruk a neih theih loh a, hrilh hlan hi kan nghakhlel em em zawk thin.


“Min neih I duh thu I nu I hrilh ni hram se..”min han fiam chhunzawm  nghal ah.


“Ka hne lutuk cheu”ka ding hluai a, min pawt thu leh nghal a.


‘khawi maw karkhat chhung ka tih theih loh kha tih ve ngei a ngai ania”tih pahin min rawn fawp a, ka nuih a za lutuk.

---------------------------------------------xxx-------------------------------------

Ka u te inneih hma ni chuan rehearsal neih a ngaih avangin U Faka chu hma deuh hlek ah a lo kal a, keipawh inchhungah ka buai em avangin ka chawl tawp a, kan chhungten min pui nasa chung hian indaih tih a awm thei lo. Hetiang reng reng chuan pasal neih pawh ka chak lo zo vek. Ti nge le pasal neih hi ka ngaihtuah ve tak fo le?


“Hlute, hei min lo suihthat sak lawk mai”pangpar ka siam mawlh mawlh lai chuan U Faka chu a lo kal a, a kut tuamna phelh deuh chu a rawn tilang a.  Ngawi rengin ka suih tha ve mai a, a kal mai dawn emaw ka tih laiin a rawn ding ve tar eng a.


“I u thianpa ang tal chuan min en leh hram la, hetia min hre ngai miah lo anga I awm hian min ti na “a ti sap a.


“Ka en che a ngai hran chuang hleinem, ka u thianpa I nia, I ni reng dawn bawk a”ngaihsam hmel zet hian ka ti a.


“I rilru chu a dam kim tawh tak zet tih ka hria, ka lawmpui che. Hlim hi I phu reng a ni”a ti a, a kalsawn ta a.


Chutianga ka hlim tak tak anga a hria chu ka lawm, dam kim vek lo mah ila ka hmasawnna a hmu chuan min tihlim tak zet. Tu nge ka nih ka inhrechiang telh telh bawk a, ka nundan thin pangngaiah khan ka let mek. Engtikah mah ka theihnghilh tawh dawn lo. Ka tana thil tha min tihsak zawng zawng pawh kha ka theihnghilh ngai tawh lovang, mahse chuvanga a laka bat nei ang maia kual leh erawh chu ka tih tawh loh tur thil a ni ve tlat.


Ka u te inneih ni chu a ropui ngei mai, hetiang em ema miten min hlutsak tur hian keini chhungkua hian mi kan lawm lohzia lah ka hrechiang. Ka nu leh pa hlim hmel chu hmuh a nuam hle mai, vawi tam tak ka u hi nupui nei tura an nawr hnuah ama thu ngeiin a han nei ve ta ania, keipawhin ka lawmpui. U Faka pawh taksa la dam chiang lo a nih hriat miah lohin tha takin ka u ni pawimawhah a ding thei a, ka u avangin ka lawm. Akhuma nen kan inzui nileng thak a, thlalak chhung tih loh chu amah lahin min kalsan a tum lo. Inneih tum zawng zawng an inneih vek lohzia tichiangtua ka tang ve ta ringawt hi a mak ngawt mai. Ka ngaihtuahna chu Akhuma tan a fair lo tih ka hria, ka lu chu ka han thing a, hun liam tawh a ni tih ka inhrilh nawn a tul leh fo thin dawn anih hi. Kohhran hall ah ruai kan buatsaih chu kan theh nghal a, catering a kan tih avangin a awlsamin buai kan ngai lova, a tih chi phian.


“In lamah kan lo va phei dawn mi niang, mo hruai kha a ni nghal mai dawn sia”Akhuma kutsil chu ka lo nghak a.


“Aw le, bike ka dahnaah khan lo zu kal la, inchhungah sawn ka bag ka daha ka va la leh ange”a ti a, a kal ta nghal a.


Bike bulah chuan ka lo nghak a, ka rin aiin a rei zek. Nghah ngaiin ka awm ngai lo bawk a, mi nghah hi ka thei lo.


“Hei hi in lamah lo va keng phei mai ta cheu, mo hruaina lamah ka rawn tlang dawn sia”ka bulah U Faka chu a lo ding reng a. A rawn kallai pawh ka lo hre lo. A thil ken envelope  chu min pe a, engdang sawi loin a kal lehnghal mai a. Ka lo enzui vang vang lai chuan Akhuma chuan min rawn kuai her a, “A va hmuhnawm awm vung vung ve”a la ti zui. Ka en a, a nui duh miah lo, a ho emai.


In kan thlen chuan ka inthlak nghal zung zung a, nichin atang khan Zothankhuma a la tum char char. Ka ngaihsak vak peih lo, tihian amahin a lungawi veleh mai ang. Room atanga ka chhuah chuan thutthleng a lo pu leh lauh lauh tawh, ka va nuih suk a, a nui ve ta vur vur a, a lungawi leh zan tawh tih ka hria. Programme kan hman zawh vek hnu chuan ka chau hluah hluah, u Nutei phei chu a hah ngawtin ka ring, nilengin hmel hlim tihlan reng a ngai a, pheikhawk sang leh a kawr zawng zawng nen, ka lo hahpui zawk. Ka u te an riah chhuah dawn avangin an room ah chuan a thiante nen an mamawh tur bag ah kan khung sak a. A thianteho an uang si, an mamawh miah loh tur an khung hnem si. Ka lo nui vak vak a, an hmuh hunah an lawm lo ngawt ang.


“In hman tawh chuan kan kal mai dawn mi?”U Faka chu room ah a rawn dak a, kan lo khi thu hlawm a hmuh chuan a hrethiam ve niang a nui ve var var a.


Inleng an haw zo tawh bawk a, hmun ka phiat mek a, Akhuma pawh a haw tawh. Ka u in min koh ri ka hriat chuan pawnah ka va dak a, motor ah an lo thu thap tawh.


“Lokal ve mai  la, hei I u Lawmi hi amah chauh che tur a awm dawn sin”a ti a, U Lawmi chu monu thiannu a ni.


“Awi ka peih lo e, ka lokal lo mai ang”ka tih chuan U Nutei chu a rawn chhuak leh a, min kaltir lui ta hram a. Kan tlan chhuah hnuah ka phone ka theihnghilh tih ka hrechhuak chiah lenghal. A pawi tawh lo mai, kan rei em lovang chu!


Ka u te chu hotelah an riak dawn emaw ka tia, a thianpa U Peka te farm ah a lo ni daih. an riahna tur room chu a nawm hmel zek lehnghal, khum engkim an lo siam peih vek tawh a, a hma ni atanga an chei tawh tih a hriat mai.


“Hei engmah tih a ngaih tawh loh hi, min kaltir ve kher a”ka ti a, an nui vel mai mai.


Beer an in lai chuan ka lo ngawi kar a, U Nutei nen chiah kan in lo, ka u in a in lai chu ka lo en renga, a in ka la hmuh ngai loh vangin mak ka ti deuh.


“I u ve ngei hi a rui hrim hrim, a in ngai der si lo”U Nutei’n a tih chuan ka lo thaw huai. Ka u hi ka lo hrechiang ta lo emaw ka ti a, ka hriatdan chu a lo dik reng tho.


“I chau ngawt ang, nilengin in ding a ni deuh mai sia”ka lo ti a. A nui sen sen a, a ngainatawm ka ti.


Kan haw dawn meuh chuan min kaltir ve bertu U Lawmi chuan min hre tawh lo aniang, car pakhatah a chuang daih. U Faka leh U Peka chiah ka hre baw ksia, U Peka motor ah an khat vek tawh bawk sia, hetiang tih hriata lo kal miah loh tur a nia, ka u chungah pawh ka thinrim phah hial. A tawpah tihngaihna awm tawh hek lo, U Faka motorah chuan ka chuang ta nge nge a. An thianten a hmaa thutna min lo dah awl ve ngei a, a hnung pan talh chu a mawi lo deuh bawk si, lungawi lo ru zet chuan ka thu lut ta nge nge a. A thiante lah an pawr mai sia, ka va ning ber tak. Ka u tana thawkchhuak vek an ni bawk si, dawhtheih hi a va ngai thin tak. Kan veng a hlat ber avangin midang a thlah phawt a, a tawpah kan veng lam kan pan ta a. Sawi dun tur kan nei lem lo bawk a, a hla play chu kan ngaithla ta mai mai. In kan thlen dawn chuan motor chu a tiding chut a, ka va melh nghal a. Min en loin hma lam chu a melh ngur a, ka va hawi phei ve chuan kan gate bulah Akhuma chu a lo ding  reng. Hmanhmawh zet hian chhuah ka tum a, U Faka’n rang zet hian ka kut a lo vuan a, thin thlak sak ka tum a, min vuan nghet mah mah a ni.


“Eng nge I duh?”ka ti hrawk a.


“Keiman ka lo sawifiah ang”zawi deuh, khauh far hian a ti a.

Note: Ads i hmuh chuan i click dawn nia