APRICITY -V

FIVE

U Faka min vawnna chu thlah ka tum a, ka banrek chu a hmer na telh telh thung. Akhuma bul kan thlen chuan theihtawpin ka tang a, min thlah ve ta hram. Akhuma lah chuan ka ban rek chu a melh ngat ngat a, biak huphurhawm khawpin a hmel a nelawm loh lehnghal.

“I ngaihdan ang kha engmah a thleng lo”U Faka chuan a ti a.

“Ka ngaihdan tur thlenga I hria chu I fing hle mai”Akhuma ve thung.

An inkarah ka ding a, kan boruak a tha dawn lo tih ka hria, U Faka chu kal turin ka nawr a, keiman ka chingfel mai ang, hetianga a awm vet lat chuan boruak hi a tha lo zel zawk dawn tih ka hria.

“U Fak, kal phawt teh, ka buaina a nia, lo inrawlh suh”ka ti a, kal turin ka nam deuh nawk nawk a, min en a, a hreh hmel ngang mai.

“I tha takzet ang maw?”a ti a, Akhuam a lo nui hak.

“Kal rawh inchhungah lut phawt ang”Akhuma chu ka kai a, in lam panpui ka tum a, ka kut chu a paih thla nghal hmak.

“Sawi dun tur in la nei ang, ka lo va kal phawt zawk ange”a ti a, a ngeiawm a chhuah tawh chuan a ngeiawm thiam lutuk hi ka thin a tirim fo thin.

“I rin tak tak theih dawn loh chuan bul tan pui kher a ngai mi?

Ka va hawi a, U Faka hmai a ri nghal chawrh a, a pai deuh nawk.

“Zothankhum..”ka au tuar a, a lo nui suk thung. U Faka hmui chu a rawn thi nghal a, chutiang em ema kut ram a ni tih hi ka hre lo nge, a hmachhawn mek vang hian insum theihna a nei lo zawk. Eng pawh chu nise ka duhdan a ni lo hrim hrim.

A bike chu a tinung a, a tlanchhuak zui nghal, ka en vung vung a, thil thlen dan chu a rang lutuk a, ka hamhaih nasa lutuk.

“Va lut tawh rawh”a ti dam dup a.

“Kha I hmui kha a thi ania, damdawi ka lo hnawih dawn mi?”ka tih chuan a lu a thing a, “Ka haw phei nghal zawk ange, boruak a tha lo zual mai mai”a ti a.

Ka mut hnu thlengin Akhuma ka be thei lo, a phone a switchoff tlat a, han thinrim viau dawn pawh ni ila ka phone a a miscall awm zozai vang chuan ka thiam lo ve tho bawk si. Chutah min rawn hmuh dan ber kher lah kha ngaihtuahna tha lo zawnga hman duh chuan a theih leh chiah bawk si a, nuam lo ka ti tak zet.

Thawm ri nak nakah ka harh a, Zothankhuama vanga ka mut tlemzia chu sana ka en rualin ka hre nghal. Ka phone chu ka han phawrh a, ka message pawh a chhiar vek tawh, min chhang duh lo. A lungawi hun nghah bak tih theih vak a awm tawh lo, inchhung tihfel tur a tam si, amah ringawt ka buaipui chuan engmah ka ti thei lo ang. Sitting room ka va chhuah chuan ka u te nupa pawh an lo thleng tawh, inleng neuh neuh chibaitu an rawn kal ve reng bawk a. Sangpuii nen nimin lama kan tihfel hman loh chu kan tifel chhunzawm mawlh mawlh a.

“I thianpa Akhuma kha nizanah pawnah hian a awm char char a, inchhunga lut tura ka tih pawhin a duh miah lo a. A call ngat ngat chea, I pickup thei bawk siloa, a lo nghak chhuak ta che em?”a ti a.

“Kan chhuah hnu deuh lawk khan a lokal tihna a ni maw?”ka tih chuan a bu nghat a.

“A tihchi loh rap mawle, U Faka’n min lo thlah kher kher bawk sia. Ka call apawh a pickup duh lo”ka tih chuan ka thil hruk lai chu ka chawl a.

“Nangpawh midang rawn inthlahtir mai tur che ania”a tih chuan a dik ka ti khawp mai. Mahse, khang hunah chuan min hrethiam tur a ni ve a lawm, a hma atang tawhin ka sawi fo a, ho te tea a thinrim dawn chuan kan inrem thei lo ang. U Faka nen inzawmna nei tawh lo mah ila ka u thianpa a nih tlat avangin a heng ang hi chu a lo la thleng dawn chauh. Keimah min rin miau loh chuan kan hlim thei ngai dawn chuang lo.

Chaweikhamah ka inbual a,  ka inbual zawh hnu thleng pawha a message leh call ka la dawn loh avangin biak ka tum zui ta bik lo. A thinrim loh hunah a lokal mai ang, tunah chuan engpawh sawi ila a thinrimpui dawn tho tho. Ka khuma ka phone dah chu a ri rak a, whatsapp message ka dawng tih ka hriat chuan ka thawmhnaw pawh ha hman loin ka ban nghal a. Akhuma a nih ngei ringin ka nui deuh sang a, mahse, ka thil hmuh vang chuan ka phone chu khumah ka paih let nghal pawp.

*Nizan chu zanreiah min ko chhuak a, kan ride a, ka hlim tak zet*

Thanpuii message a ni. An thlalak min thawn tel bawk, hlim takin awm dun mawlh rawh se.

Hetiang zawng hian maw kan tih dawn? Ka inpeih lo chung min nawr a, min nghah reng vanga ka inpeih aia hmaa bul ka tanpui hnuah thil hote vangin a thinrim a, a thinrim mai duhtawk loin ka rilru nat dan tur ber anga a hriatin a che zui bawk a. Ka rilrua ka khaikhawm dan chu- Mipa hi an lo inang vek tih hi. Ka lu na deuh bur pawh chu haiderin ka u te shooting neihna turah ka kal ve a. A tirah chuan U Faka vangin kal ka tum lo char char, mahse, ka chhuah harh a ngai. Sangpuii nen scooty in kan inphur a, ka scooty tura ka pa in min lei a ni a, ka khalh ngam thlawt loh avangin tihian Sangpuii’n a chang tawp a, a tangkaipui zia ka hmuh hian khalh ve ka chak thin. Mahse, engtikah mah kei hi chuan ka khalh ngam dawn lo tih ka hria.

U Faka hmui chuan ka mit a la lo thei lo, a kak phei raih a, a kamsir a tel avangin thlalakah pawh a mawi vakin ka ring lo. Vawikhatmah kan inbe lo a, awm ve lo ang maiin kan inen tawp. Ka hrechiang ve tawk a a mizia hi, amah vanga kan boruak a hriat vek avangin ka mamawha ka bia a nih loh chuan min be lo anga, min pan bawk lo ang. ka mamawh hun a lo thleng anih erawh chuan engpawh tawk dawn se min pui bawk ang.

Ka nui ri hak a, ka hrechiang hman lutuk hi a mak lem lo e. Engtin nge a lo dai sual ve theih zawk tia amah hrechiangtuin an sawi pawh hi a awm lo chuang lo, mipa invawng uluk leh engkim ngaihtuah kim vek thin a ni tlat a. Zothankhuma mizia erawh amah a la naupan zawkna hi a lang ve thin a, ka chungah hetiang takin a dawhtheih loh ka hre ngai lo. Min hrechiang ve tawk tura ka ngaih laiin min lo la hrechiang lo hle te pawh a ni ang, ka kalsan tawh lama let leh chi ka ni lo tih hi a ring ngam lo zawk emaw ni?

An naupang chhia tawh lo bawk a, ka u te chu an duh tui ngang mai. A tawp lamah phei chuan ka nghak peih tawh lo, Sangpuii hnenah chuan haw ka rawt ta  ringawt a, inah pawh tlang loin kan leng kual daih. Naktuk lama atangin school ka tan leh tawh dawn avangin rilru tih thawven chu ka duh ve hrim hrim. Ka thiannu Zamtei te inah kan leng a, pangpar a lo nei thar leh teuh tawh. Ka ngaina ve hauh lo na a, ka nu in a ngainat em avang hian ka ngaihvensak ve thin a, kan inchungah an hming ka hriatsen loh chu ka lakkhawmsak ve tawh.

“Hei I nu duh chi”tih pahin hydrangea chu min kawhhmuh a, ka lo va ban leh hman thawt thawt. “I mak… a la hun lo, thla lehah ka pe dawn che nia”a ti a, pangpar a ngaina bawk a, an chinchang lah a hria.

“Ka nu pawhin a thar a nei asin, I lo len huanh I dil dawn nia”ka ti a,a phur leh sarh tawh.

Chutia pangpar ringawt kan buaipui takah chuan ka rilru pawh a hlim chawpchilh veleh mai. A tlai chhiat tak tak hmain kan hawsan ta a, karkhat dawn ka chawl tawh bawk si a, zan lamah naupang zirlai ka in bih uluk ve hle a ngai tawh dawn. In kan thlenin ka u te pawh an lo thleng fel chiah a. A thianten an rawn zui haw tawh lo bawk a, an hahdam ve vang vang thei tawh ang chu. Chaw kan eikham fel hnuah keipawh room lam ka pan nghal a, ka subject min lo kep sak thintu Miss Muani nen chuan inbia in zirlai hmabakte chu ka zawt a, lehkhabu ka lachhuak nghal a. Ka lehkha zirlai atang tawhin lehkha thiam thei leh hre zung zung chi ka nih loh avang hian inbuatsaih nasat ka ngai thei em em a, hetia zirtirtu ka nih hnu pawh hian chu chu ka la chhawm zel a, a tha thei ang bera naupang hmaa lan ka duh tlat thin. Ka hriat loh chhungin ka phone ka lo melh leh zauh zel, a nihna takah chuan thian kan nih lai kha chuan inbiak duh loha intihtauh khum chang kan ngah thin. Mahse, hetianga kan awm hnu chuan tlemin a dan chu a lo dang chiang a ni. Ka be awm bik lo ti mah ila min lo be tur erawh chuan ka beisei reng. Insawifiah se ka ti a, lo thinrimin lo ankhum hrep hrep ila ka ti, chutiang tur takngial pawhin a reh hmak si.

Naupangho zinga ka awm hi chuan ka nun hi a hlim a, keimaha harsatna ka neih pawhin anni bulah hi chuan ka hrechang lo thin. Zinga ka kal tur ka hrilhhai hman kha ka ngaihtuah let hian ka inkhawngaih, a chhan chu tuk tin Akhuma’n min thlah a, chutiang chu a ni leh dawn emaw ka ti a, chu chuan min tihhrehawm deuh. A tira ka hlauh em em thin chu hei hi a ni, kan inthianthatna tichhe tawk lek hian kan awm ang tih hi ka hlau hle reng a nih kha. Tlaiah ei tur eng emaw ka lei khawl duh avangin ka haw tlang lova, kan dawr pawh tlawh pah ila a that ka ring. Ni li lai dawr kan hawn tawh loh avangin dawrtu an lo awm ve nual a, Sangpuii pawh a lo buai hle. Ka indah fel sawk sawk a, ka pui ve nghal mawlh mawlh a.

“U Te, chhunah khan Akhuma te ka hmu asin”a ti ta mai. Tunen nge an nih zawh ka chak viau a.

“Anih chu”a ri-ah erawh ka tichhuak thung.

“Hmeichhe pakhat nen an nia, hmeichhia kha a over hmel, a banah a vuan tung mai”atih phei chuan engmah ka ti thei tawh lo. Thanpuii a ni tih ka chiang em a, a mak ka ti lo chu mak ka inti zawk. Zan khat kan intithiam loa, a bialnu hlui bulah a let leh nghal amaw? Zothankhum leh! Ka theih ve zia hi ka lantir mawlh ang che.

Kar khat leh a chanve chhung zet keimah leh keimah inhneh tuma ka bei chu a hautak lek lek zel. Ka chhungte hriat ka duh loh avangin chaw ka kil ve hram hram zel a, a hmingin ka ei a ni ber. Ka nu hian ka awmdan hi a hai leh miah lo ang tih ka hria, mahse, ka hrilh ngam lo. Ka zak a ni ber ang chu, keimah leh keimah pawh hi ka inzah. A mak ngawt mai, thutlukna ka lo siam hma lutuk kha ka nu lakah ka zak a ni berin ka hria.

Ruah sur bawrh bawrh chu tukverh atangin ka thlir reng a, ka thawhpui tam zawk an haw tawh a, two wheeler keng ho nen kan tang a, ruah lah chu a tam telh telh lehnghal. Ka phone rawn ri pawh chu ka lo hre mai lo. A rik tawp rualin ka zu hmu a, U Faka’n min lo call anih chu. Whatsapp ah message a rawn thleng chawpchilh a.

*Gate bulah ka nghak che*

Note: Dah loh aiah ka rawn dah tak meuh meuh a ni e, nilengin hnaah ka buai ve a, hman changin tlar hnihte ka type a. A ngaihnawm loh viau ka ring t zet chu, next ah a tawp tawh ang. Ads click leh liam liam ila..