APRICITY - VI

SIX

Ka phone screen chu ka melh reng a, ruah chuan ban a tum hmel bawk si lo, rilru a buai ve phat. Ka thianteho lah chu raincoat nena kal an tum ta bawk nen duhthlan tur dang ka nei ta lo. Tukverh atang chuan ka han dak a, gate bulah U Faka chu a la ding reng. Ka nihliap chu ka la a, ka chhuak ta nge nge, motor ka thlen chuan ka huh nasa hman viau tho mai.

“Motor chhung hi tilum ang aw”a lo ti dam diai a. Nidangah chuan he motorah hian tlangnel takin ka chuang thin a, vawiin ni erawh chuan a dan a dang ta daih mai.

“I lokal duh kher anih kha, ka u pawh ka call ve thei reng a”ka ti zawi sap a. A lo nui hak thung.

Kan in kan thlen chuan a rawn chhuk ve nulh a, rawn lut kher lo se ka duh tehreng nen. Ka nu chuan min lo ngaihtuah leh hle a, chutia U Faka nen kan inzui min hmuh chuan tlemin mak a ti deuhin ka hria. Room ah inthlak turin ka tlang nghal a, ka phone chu ka han hmet eng a, Akhuma miscall a lo tam ngang mai. Ruah sur nasa lutuk vang khan a ri pawh engmah ka lo hre lo. Ka han call back dawn a, a tlang thei leh tawh lo. Ka inthlak fel a, room atang chuan ka chhuak a. U Faka chuan thingpui a lo in mek a, min hmuh chuan a nui a, nuih let pawh ka peih lo.

“Nu, ka pui lo mai ang che. Naktuk lama mi tur inbuatsaih ka duh a”ka ti a. U Faka’n min en reng chu ka hmu lo der tlat a.

“Ni e, puih pawh ka ngai vak tawh lo, ka zo tep e”a ti ve mai a. Pawnah a chhuak a, tui ka in laiin a lo lut leh a, “Faka chaw ei ve ta che. Tukin zingah thenawmten vawk an talh a, kan chang ve thei hlauh a”a ti a, tul lo ka lo ti ngang mai.

“Ei a chakawm khawp mai, mahse, ka ei ngun mawlh mawlh emai. Vawiin chu  ka ei lo phawt ang”a ti a. Roomah ka luhsan ta a. Ka rilruah hi chuan a thi hmak bik lo. Ka chhungte tan lah hian engkim a huamin a ti vek si a, ka u thu kha lo awih ila a tir atang khan u ang chauh khan lo en ila tha tur.

Ruah ka do hman vang kha ni maw, ka khua chu a sik deuh er er a, ka lehkhabu inchhawp pawh chu ka bih tha peih der lo. Khumah chuan ka inthawlh kak a, vawt tiin rizai chuan ka intuam hlun a, dawhkana nachhawkna chu ka han ban a, ka hmawm nghal a. Ka chawl rei bawk si a, damlo thei ka ni lo hrim hrim. Ka lo muhil a ni ang, ka nuin chawei dawnah min rawn ko a, ka lo harh tha viau.  Lukham hnuaia ka phone chu ka han ban a, Akhuma chu call ka tum a, a la tlang thei chuang lo. Ka phone chu ka melh nghek a, awmzia a awm der si lo.

Zanah pawh ruah chu a la tla ser ser reng a, ka room kawngka ri rakah ka hawi chhuak a, Akhuma chu a lo ding reng a. Lut turin ka sawm a, thuthlengah chuan a rawn thu a. A jacket hnawm deuh danah ruah a la sur reng a nih hmel.

“Ka call I pickup thei si lo a, min lo call back ve em chu ka ring a”a ti sup a.

“Chuan?”

“I thin a la rim reng ami?”

Ka nui hak a, thinrim loh a ring emawni?

“Ka tihpalh, ka awmdan kha a dik lo tih ka hria. Ka tum reng vang pawh a ni lo, mahse, hepa hi chu ka thik em a ni”a ti a, ka rilru a dam nghal sawng sawng.

“Thanpuii va hmu hial tur khawpa I thin a rim erawh a mak ka tit ho”ka ti a.

“Maw?”

Ka sawi zawm peih rih lo, min kuahna kut chu ka vuan a, ka ngai ve em em a, tunah  amah zawkin min rawn pan a, buaina lo chawh chhuah leh chu ka peih rih lo. Mahse, thudik erawh chu ka hre duh tho ang.

“Vawiin khan ruah a sur nasa sia, ka ngaihtuah lutuk che a, rawn hruai che ka tum a. Ka call I pickup thei si loa, ka rawn kal tawp a, mahse, in lo haw vek tawh a”a ti a.

“Nia, ih..” U Faka min rawn hruai thu chu sawi ka tum zuau a, ka sawi leh ta lo.

“I nu in I nawmsam loh thu a sawi a, ka rawn lut ve ringawt a, a pawi em lo ang chu”a tih chuan ka melh a, min lo melh ve reng a. A hma zawng pawhin ka room ah hian kan inkawm nasa, a changin a riak thul. Chutiang chuan lo awm tawh thin mah ila khatih lai kha chuan thian kan ni a, tunah chuan a dan a dang tawh a, venthawn a nei tih ka hrethiam mai.

“Anih chuan chhuak phei ila”ka ti a, ka tho uai a, rang fe hian min pawt thu leh a, min fawp vang vang a.

“I sual si, hei ka ngai tawh”a’n ti ngei ah. Ka hmui chu a kutin a thai neuh neuh a, a bulah hi chuan lungawi loh reng pawh hi a theih thin loh.

Chumi zan chuan rei tak thlengin kan titi a, ka nu bula ka fiamthu kha a lo la thutak em em lehnghal. Inneih vat a duh thu leh hetia rilru nuam lo deuha awm reng hi a nin thu a sawi leh a. Ka u te chu chhuanlamah ka hmang a, kumkhata lut leh chhuak awm that loh thute chu ka hriat ang angin ka han hrilh ve a, a la ngai ho em em lehnghal.

“Ka hlauh ber chu kha chen lo inkawp tawh kha in ni sia, Faka bulah I let leh hi ka hlau em a ni. Lunglen hunte I nei ang tih hi ka hlau a”a tih chuan a rilru chu ka hrethiam khawp mai.

“Chutia tihte chuan nangpawh Thanpuii bulah I let leh lo ang tih a sawi theih hleinem”ka ti khauh a.

“Min hriatchian kha, engtikah mah let ka tum lo. A bula let leh tum ni ila bul ka tan pui lo ang che. Nang hi chang lo che pawh ni ila, a hnenah chuan ka let tawh lo ang”a ti a, kan inen a, kan nui ta var var a.

----------------xxx---------------------------xx--------------------------------------x---------

Class ka lak mawlh mawlh laiin ka phone chu a rawn ri a, ka silent khan ka hre sia, zia lo ti zetin ka bag atang chuan ka phawrh a. Ka thiannu Zamtei a lo ni. Chhun lamah min tihbuai ngai loh avangin chutia min rawn bia chu pawimawh a awm a nih ka ring, pawnah chuan ka chhuak a, ka va chhang a.

“Hlu, Akhuma a accident, an bungraw rawn thleng an unload na lamah a chesual a nia, hei damdawiinah kan kal dawn. Khatatang khan rawn tlang ve mai rawh”a rawn ti a, ka che buai nghal vek.

Principal bulah kalin thil awmdan chu pehhel deuh chungin ka sawi a, min lo phalsak hnu chuan ka naupangte chu assignment ka pe a, ka chhuak ta nghal a. Taxi rawn tlan chu lo pharin Zamtei sawina hmun lam panin kan tlan chhuak a. Ka thaw a sa hat hat mai, chutia Zamtei meuh chiai chu a dik hauh lo tih ka hria. Damdawiin kawtat ka thiannu chuan min lo nghak a, hla deuh hlekin Akhuma te nen hian an inchhung a, chutatanga hre vat pawh chu a lo ni nghe nghe.

“Engtin nge a awm?”ka aw chu a khur deuh a.

“Ka hre chiang bik lo, U Jona khan nikhaw hre loin a awm a tia, chu zawng chu a ni mai”a ti a, kan lut nghal a.

Akhuma n, Nu Ruati chu thlabar deuh hian a lo ding a, min hmuh chuan min rawn pan a, “Tunah chuan test hrang hrang nei turin an hruai a, ala harhchhuak lo reng reng”a lo ti a.

An chetsual dan vel Zamtei’n a zawh chuan, “Vawiin ber kher chu kan mutia te an rawn kim thei tlat lo a, bungrua a tam sia a lo pui ve a ni awm e. An in hlan chhawnna lamah engtin emaw a rap pelh a niang, motor ke bula a inkhawh lut e an ti mai a. Motor kha a lo che deuh bawk nen an inchilh hman deuh aniang”a ti a, ka thaw hawk. Engtin nge niang? Ka rilru chu a nuam lo tak zet.

Tih theih awm hek lo, kawtah chuan kan thiandunin kan thu a, chutia kan thut deuh reng lai chuan Thanpuii leh a thiannu hi scooty in an rawn inphur a. Min rawn hmu pawhin ka hre lo, Nu Ruati chuan a lo be vat a. chhungte nen inhre pawp vek hman an nih avangin ka tan pawh thil thar a ni hran lo. Mahse, ka mit tikham bertu zawk erawh chu engkimah a inrawlh a, a bialnu la ni ang maiin engkimah an rorelna a lo inrawlh kim ve vek! Zamtei chuan ka ban chu a rawn hmer vak a, kan rilru a inang tih ka hria.

“In va fel ve”tiin  min la rawn be ta deuh deuh a.

Ka ngaihdan ni tawh lo sa bawk nen ka thinrim bur, a langah erawh ka nui lui sang thung. Kan haw hnu pawh chuan ka thinrim ka sa deuh pup pupin ka hria. Nu Ruati te tan pawh kei chu Akhuma thiannu ka ni mai a, Thanpuii erawh chuan changtunu ber dinhmun a chang thung. Ka thinrim chu ka insawh nghat nghat a, a harh chhuah hma chu ka kal tawh lo ang ka ti hial. Mahse, chu em erawh ka ngaingam hauh lo ang tih ka chiang thung.  Ka inbual a, ka inbual zawh chuan U Jona, Akhuma u chu ka call a, chanchin ka zawt a, a harh chhuah tawh thu leh a la biak tlak vak loh thu min hrilh a, Thanpuii ala awm em tih hre chak viau mah ila ka zawt ngam ta lo.

----------------------------x-------------------------------x--------------------------------

Chaw kan eikham hnuah kan chhungkuain TV kan en a, doorbell a rawn ri ral ral a. Ka nu in lut turin a ti a, U Faka a rawn lut hlawl. Ka rilruah thil pakhat a lo lang nghal, damdawiinah kalpui atan ka rilruin ka lo hauh nghal. Nihnih a liam tawh a, Akhuma chuan hma a sawn lo khawp mai. Amah a harh tawh a, a la tawng peih tlat lo. Test hrang hrang result ah pawh thil pawi lutuk a thleng lo niin a hriat tawh a, mahse, amah a la nikhua tlat lo.

“U Fak, damdawiinah min kalpui la..”ka lo ti sap a, zawhna zawt mitmenga min melh pahin a lu chu a bu nghat a.

“Kha, a thianpa Akhuma a awm a, kalpuiah a lo sawm leh ringawt che anih kha”ka nuin a ti ve mai a.

“Han insiam la, a tlai hmain”a lo ti veleh mai a.

“Insiam vak pawh a ngai lo, ka hman a ni mai”ka tih chuan ka thawmhnaw a rawn en a.

“Kawrlum ha rawh”a ti nghut.

Room ah ka lut a, kawrlum chu ka han ha a, ka ngaihtuah chiang a, mahni bialpa hluite chutianga han sawm chu ka inthiam vak lo, mahse, ka u min kalpui ai chuan ka la thlang zawk tho. Kalkawngah chuan kan tawng mang lo, kan rilru kan kawm ve ve te pawh a ni ange.

“Thanpuii em ni kha?”

Ka va melh a, a thusawi vang chu a ni ang, a inthiam loh leh hmel deuh.

“Um”a thusawi hrethiam tak chuan ka lo ti ve mai a.

“Engemaw I hria tur a awm maithei”

Ka kut ka lo vai a, “A pawimawh rih lo”ka lo ti.

“Ok”a ti sup a.

Tunah chuan Thanpuii leh Akhuma inkar engmah hriat ka duh lo, amah a rawn harhfim hunah engkim ka hre duh; ama hnen atang ngeiin. Damdawiin kan thlen chuan ka chhuk vat a, an cabin awmna kha mahni kal chu ka hreh ngang mai. U Faka lah chu motorah a thu run a, han pun em chu ka hreh ve deuh bawk si.

“Kalpui I ngai em?”a rawn ti ta nge nge.

“Aih, ka rei lo ang”tih leh kal ka rual a. Ka dawih em avangin min ngaihtuah deuh a ni maithei, ka va hawi chuan min lo en zui vang vang a, ka va nui sak a.

Step ka chho te chu a reh angreng sia, kalpuia ka lo sawm lo chu ka inchhir hrep mai. 2^nd floor ah an awm avangin ka thleng ve mai a. Nu Ruati leh Thanpuii an lo awm pang.

“Hlute, I va fel ve”Nu Ruati’n a lo ti var a.

Thanpuii chuan Akhuma kut chu a lo hru a, ani erawh a muhil a nih ka ring. Hmuh hrehawm ka tia, ka hawisawn daih.

“Nia, sawtah sawn kan kal a, a remchang em a ka lo kawi lawk anih hi”tiin dawt ka sawi ta ringawt.

Rei vak lo ka thu a, ka hmuh duh ber a harh bawk si loa, ka hawsan leh ta ringawt. Ka kal tur chu Thanpuii a rawn tho vut a, min rawn kuah a.

“Nangmah vangin kan inkar a pangngai leh phah a, ka lawm lutuk ania aw”a ti a. Egmah sawi tur ka hre lo. Step ah chuan ka tlan thla deuh zawk zawk tih chu ka hria. Step tawp berah ka inchhuih a, ka rak deuh hlut a. Ka dinna bul rawn che dawt chu ka hmu a, enge tih pawh ka hre lo, mihring ni chuan ka hre lo. Ka thauah min man a, chak fe hian ka tlan ta hlawp hlawp a.

“Enge a?”tiin U Faka motor nghenga lo ding chu a rawn ding ngil zawt a.

Ka hlau lutuk chuan ka hnunglam chu ka kawk ringawt a, rang zet hian ka kangah a rawn man a, min pawm chawt a. Ka tha khur a reh thei lo, min pawm nghet sauh a. Ka thaw a pangngai thleng chuan min pawm a, ka zia hnu chuan ka inla hrang a, inthiam lo angreng deuh hian ka han melh a, hmun dang a lo hawi daih. Kan haw lamah phei chuan kan inbe tawh lo hrim hrim.

Ka mut hmunah te chuan ka ngaihtuah neuh neuh a, ka awmdan hi ka lo ngaihtuah ngai loh dan hlir a ni. Hlimna ka hmu ve dawn chauh a, kan inkarah inrawlh an lo awm zel a, kei hi ka tlluang dawn lo ni maiin ka hria. Akhuma nen kan inthen anih chuan tumah ka nei tawh lo ang tih thlengin ka ngaihtuah a, ka muhil lawk thei lo. Thanpuii nen an inkar sawi a tum khan lo ngaithla ve hrim hrim ila a tha tur a nia, awmzia a awm tawh der si lo. Hetia tuilairapa awm hi ka thiam ve lo a ni ber e.

Note: Heti zawng hi ka type hman chu a ni leh tawhhhh… a manganthlak, a ngaihnawm hman lo hle mai. Type zawh law law ka duh nen, keimah tak hi ka tui lo hman takngial dawn. Khitiang aia tam deuh khi a awm leh chuan  a tawp kan khar thei tawh ang. Tu zawk nge changtupa ni dawn tih a tawpah keipawhin ka hre chauh dawn a nih hi J