APRICITY-VII

SEVEN

Akhuma damdawiin atanga a chhuah ni chuan Zamtei’n min rawn sawm chhuak a, an in lam pan chuan kan chhuak a. A nihna takah chuan khatia a rawn harh that hnu pawh khan kan inbe miah lova, engemaw tak felhlel a awm ang tih ka ring. Mahse, engahmah a ngai lo anih chuan va tihbuai chhen emaw kha ka tum hran lova, Thanpuii sawi anga an lo tha leh tak tak anih phei chuan inrawlh tumna pakhatmah ka nei lo. Tuna ka kal ve pawh hi kan pahnih inkar sawi fel theih a nih takin tih thuah leh ka thiantha ber anihna anga va kan a ni mai.

An in kan thlen chuan Vespa pawl lo ding chuan ka mit a la nghal zar a, chu chuan keimah bik ka dinhmun chu a tilang chiang viau pawhin ka hria.

“Henu han zahtheih  lohzia hi”Zamtei chuan a ti hlak a, ka lo nui mai mai thung. Khawvelah hian kan duhzawng leh tha kan tihzawng chu kan um thei a, a thei apiang dinchanna khawvel a ni miau a, engmah hi mak leh thil thleng thei lo a awm lo.

Inchhung kan luh chuan an chhungte neuh neuh an lo awm ve a, a then chu haw an lo tum mek a niang, Nu Ruati chuan a lo thlah hlawm a. Room lama kal mai tura min tih avangin keini pawh inching lamah kan chho a. Room kan thlen dawn chuan Thanpuii nui ar ar ri kan hre hmasa ber, ka thiannu ka va melh a, a lo ner nang a.

“Kan tlangval chu I va dam tawh awm ve”Zamtei chuan a ti lut nghal a.

Akhuma nen kan inmelh nghal, ka hawisawn nghal daih a, Thanpuii chuan a hmai vel wipes in a lo hruksak a. Chutia kan va luh takah chuan Akhuma chuan a awmdan chu a siam rem deuh a, Thanpuii lah chuan a ngheng pah deuh bawk sia, hmuh an nuam miah lo.

“Nu Ruati khan kan damdawi hawn kim loh kha a va chah leh a, an rawn thleng taw hem tih ka zu en lawk ange”tih pahin a tho a.

A kal hnu chuan Zamtei chuan kawngkhar lam chu a melh run a, chutah Akhuma lam chu a hawi a.


“Enge in awmzia hi?”tih pahin kan pahnih chuan min melh dun a.

“Karkhat chuang damdawiin lamah ka awm a, engkimah min puitu leh min thlahthlam miah lotu chu Thanpuii kha ania. Nikhua pawh ka hre mumal lova, chutih lai chuan thenkhatte chu an bialpa hlui ten en an lo leng vel mai mai a. oh… bialpa hlui? A thar zawk nge?”kha zet hian a nui a, min melh pah reng bawk.


“Zamte, ka haw dawn”ka ding hluai a.

“Thudik hi chu a kha thin asin”Akhuma bawk chu.

“Thudik I hriat hunah ngaihdam min rawn dil miah suh”tih pahin ka kal nal nal.

Ka lo kal ta kher chu ka inchhir lutuk, Thanpuii’n a thluak a suk sak vek tawh tih ka hria. Na ka ti lo a ni lo, thudik zawn chhuah hmaa thutlukna a lo siam chuan ka thinlung hi a tina ber. Mipa hi an lo inang vek, hmeichhiain an tih peih a an kherh peih chuan an rilru hi a nghet ve tak tak lo. Tunah chuan ka nuam tihdan ang angin ka awm taw hang. Mipa hi ka mamawh ber an ni reng reng lo, kha leh chen kha ngaihzawng pawh ngaihsak lovin ka awm alawm. Pawn ka chhuah chuan Thanpuii chu damdawi keng va va chung hian a rawn hawi a, min nuih sak a, eng rilru nge a put ang tih ka hrethiam lo. In ka thlen chuan ka khumah ka bawk thlawp a, ka awm zawn chu ka dawm vang vang a, ka tuar chhuak thei tur a ni. Ka huphurh ber erawh ka nu hmachhawn a ni, awlsam taka Zothankhuma nen kan inkawp thei kha mak a la ti reng tih ka hrai. Ka thiantha ber anih vangin kan inhrechiang a, min lo nawr ve deuh reng nen inkawp ka remti mai kha keipawhin ka ngaihtuah hian mak ka la ti thin. Tumah dem tur an awm lo, keimah hi ka demawm ber. Kan inkawm lai anga awlsam taka engkim hmachhawn tura ka lo inngai kha a lo nih lohzia tunah ka hre chauh a, kha chen lo inkawm tawh thin si heti em ema kan inring lo tawn hi thil thleng thei anih pawh ka lo hre ngai lo. Thian ang pawhin kan lo inhmangaih miah lo em ni tih dawnin engkim tihsak kan inhuam thin a, kan ti reng bawk thin. A khaikhawmnaah chuan ani chu Thanpuii tana ruat a ni ang tih a ni. An hlim dawn phawt chuan kei chuan ka thiantha ber leh reilote ka bialpa lo ni ve chu ka chan mai ang chu.

Zan ka mu tha lo bawk nen ka rit bur mai. U Nutei’n tui lum in tur a lo siam mek a, min hmuh chuan min lo siam kep nghal a. Ka nu pawh pawnah a pangparho a kawm kual leh tawh a niang ka hmu lo.


“Faka an transfer dawn kha I hria em?”a ti a, ka lu ka lo thing ringawt. Engmah ka lo hre miah lo, keimah buai buaiin ka buaia, midang chanchin engmah ka lo ngaihven hran lo.

“Tunkarah chuan an tihfel ka ring, a uiawm dawn ngawt mai”a ti leh a.


“U Nute, Akhuma nen kan inthen daih asin”ka ti sap a.

“Maw? A ni maw?”mak tih hmel deuh hian min melh a, kan chanchin tlangpui ka hrilh tawh avangin chutia mak a ti pawh chu a awm ka tit ho. Kan inkawp ve ta cheng a, rei kan daih der si lo, ka zak ru ngawt mai.

“Te, (ka u min kohdan hian min ko ve mai thin) Faka lah hian a la duh hmel ropui che sia, ni leh daih ula”a ti a, k alp nui hak.

“Mipa hi ka tana duan an ni ve lo aniang”nui chungin ka ti a, a hnar a lo tum dat.


“Khuma chu a fel ang tih ka ring lutuk, mahse, kum inrual hi chu e a tha lo asin. Tun angah te hian lo puitling zawk se chuan hetiang hian in awm pawh ka ring lo”a ti a, a dikna chen a awm vetho. U Faka nen kan inzui chhung khan hetiang ang chi buaina hi kan tawk lo tih theih a ni. A dawhthei a, min hrethiam em em a, midang laka min pelhesan thleng khan mipa dang hi an awm ve tih hre lo khawp khan amahah ka nghet ve tih ka hria.


“Heti hian single ila nuam zawk, rilru hahna tur a awm lo a ni mai”ka ti a.

“Kan inneih zana kan riahchhuah dawn kha I la hria em? Tah pawh khan Faka hian alawm kaltir ve tur chea min ti chu, Lawmi kha chu kan chhuanlam mai mai nih kha”a ti a, ka ngaihtuah let a, ni e, ka kal chhan ber khan min ngaihsak lo ka ti reng a ni.


“Nangmahni nupa anga hlim deuha ka awm theih dawn loh chuan ngaihzawng neih pawh ka peih tawh lo”ka tih chuan a lo nui var var a.

-------------------------xxx------------------------------------------------------xxx----------------------------------------


Kan zirlai naupangte excursion in Kolkata ah ka hruai dawn a, Sir Tea nen kan ni dawn. Ka rilru tih thawven a ngaih lai taka chutiang thil ka tawng chu ka lawm khawp mai. Kan kal hma zanin  U Faka’n chaw a rawn ei a, ani pawh a hnathawhna tur thar lam a pan tawh dawn. Chaweikhamah ka insam duh avangin room lamah ka luhsan a, ka inseam zawh meuh chuan dar 9 a lo ri der tawh. Sitting room a ka chhuah chuan U Faka chu a lo la leng reng a, ka u te nupa nen checker an khel a, ka thawmah chuan an lo hawi thap a.


“Thingpui ka in dawna, in duh ve em?”ka ti a.

“Faka hi rawn lum kep la, mut kan duh tawh sia ka lumsak peih tawh loa”U Nutei chuan a rawn ti a, ak va en chuan awmze nei deuh hian min lo siai vel.

An sawi ang tak takin thingpui so hma hmain an room lam an pan daih. An inkhelhna hmanrua chu ngawi rengin ka seng a, thingpui chawi pheiin U Faka nen chuan kan in dun a, chutia hmun danga a han awm vang vang tawh tur chu a ngaihawm ve reng mai.

“Hmannia ka thil sawi tum kha, Thanpuii chungchang kha sawi turin min duh em?” a ti a.

Ka no chu ka hum vang vang a, ka hriat chak rualin awmze awm tawh lo han ngaihthlak chu rlru a tin a mai mai dawna hriatna ka nei.

“Sawi lo zawk mai rawh”ka tih chuan a bu nghat a, “Nat nawn fo pawh hi ka chak lo”ka tih zawm a.


“Hlute, I thinlung tina tu ang chuan min hrereng bik suh aw. Kan pahniha kan hlim hun chhungte kha min hriatsak reng la, chuan, ho tem ah nise I tan ka theihtawp ka chhuah thin tithe pawh”inthlahrun hmel deuh hian a ti a.

“Aw le, ka haw hran chuang lo che ania. Mihring I ni ve thoa, tisual theilo I ni bik hleinem”ka ti a, ka ngawi dat a, chutah sawi zawm lehin,”Mahse, tumah ka chunga I tih ang khan ti ve tawh suh aw”ka tih chuan a maimitchhing a.

“Khawvelah hian thil pakhat chiah siamthat theih ni dawn ta se, ka thil tihsual kha tinawn tawh lo turin ka dil ang. Chu chiah chu nang nena min pawthrangtu kha a ni si a”a sawi zawh chuan muangchangin a rawn meng a, a mittui ka hmu ve a nih chu. Mipa inti pa ve tak a ni thin, mittui te hi a neih pawh ka lo ring ngai lo hial a, a pachang a, a tuarchhel em em bawk a, ka chunga thil a lo tihsual khan a vaw na ve ngang a ni ang.


“I hnaah rinawm takin thawk la, ka chhuang em em thin che, a chhan chu I hnaah I dik a, I rinawm tlat vangin. Khatiang bawk khan I thawk zel dawn nia, U J-I te min lo biak mawlh mawlh bawk dawn nia”ka ti a. Kan thingpui inna no chu ka seng a, kan boruak hahthlak ru zet chuan min ti chau.

A haw dawnah pawn thleng ka thlah a, ka kut chu a hmer vawng vawng a, “Kan inhmuh leh hunah chuan I mitmenga na zawng zawng kha lo dam kim vek rawh se aw”ati a, ka kut  chu thlah a hreh hmel ve tak zet. Chulai hmunah chuan dam takin tiin kan invai liam ta a.


---------------------------xxx-------------------------------xxx-----------------------------------


Kolkata lamah kan naupangte nen kan ri chel chul a, lunglen leh khawhar hre hman lek lovin hun kan hmang a, karhnih zet kan cham. Kan cham chhungin hmun pawimawh leh nuam tak tak kan tlawh hnem a, chumi piah lamah kan naute zirna atana thil pawimawh lah kan ngaihtuah nasa hman. Sir Tea remhriatna kan tangkaipui leh tak zet.

“Miss, Sir nen hian ni daih ula”kan nauten an tih chuan kan va nui nasa tak.

“Thil thleng ngai lo tur a nih chu”Sir Tea chuan a lo ti deuh hmuk a.

“In sir ang hi chu duh ila ka nula tawh lo ang”ka lo ti  ve thung a, kan hlimpui em em zel.

Kan haw dawn zanah chuan call ka dawng hlawl a, ka thinlung la tinghing dawt thil a ni. Chu chu, Zothankhuma’n nupui a nei dawn!

Ka thu hnawk a, ka thawmhnaw ka siamlai chu ka dah a, ka nawm loh chhuanlamin kan naupang thenkhatin min tihpui ta ringawt. A mak em em e, chutiang em ema lo induh chu tinge kei kha min tihbuai kher? Ka tah chu a chhuak miah lo, mahse tap thei ila ka ti. Kawng tluangin kan naupanlai hunte, kan puitlin hnu ngaihzawng kan neih dawn pawha engkim kan inrawn thin laite chu ka mitthlaah a rawn lang a. Hetianga kan tawp hi tuman an ring lo ang, keipawhin ka ring ngai lo anih kha.

Naupang kianga ka hlimna kha a hlutzia chu in ka luh rualin ka hrethiam nghal chiah, ka chhungte min endanah an lo hre ve tawh tho tih a lang. Ka nu chu ka hmaizah ru ngawih ngawih, ka pa phei chuan engmah a hretak tak lo zawk a, chutiang bawkin ka u te nupa lahin ka serious an ring lo a niang, an ngai thutak lo. Ka nu erawh chuan inneih kha ka duh tak tak a ring a ni maithei, rilru na tur ang tlat hian min en a, ka dinhmun a ti lai vek.


“Hlu, a mak eee.. Khatih khawp khan Thanpuii bula let a tum tawh lohzia leh a duhzia chekha min hrilh kur dup zel a, mihring hi a va mak theih tak”Zamtei’n a ti vawng vawng a.

Ka hun kal tawh hi inzir nan hmang thei hlauh ila ka ti zawk, ka duh chu ka nei mai thei thin ni a ka lo hriat thin, midang bula ka sawi chhuah ngai lem loh ang chite hi ka paih a hun tawh. Hlimna chauh ka duh avangin ngaihzawng pawh min tihlim thei tur nia ka hriat leh chutiang mi nia ka ngaih te chauh ka thlang thin a, mahse,an vaiin min tina tu vek an ni. Ka nunah hian ka hriatchian tak chu, tupawh hian thil kan tisual thei a, kan famkim heklo. Chung kan famkim lohna leh kan tlin lohna lai kan inhliahkhuh loh chuan tumah hi ka inrempui thei ngai loving. Zothankhuma chungah pawh ka thin a rim viau dawn thin na a, ka rilru chapo luatah heng hi a thleng tih chiang takin ka hria. Tlawm ka duh ngai lo, anmahni tlawm hnap se tih rilru hi ka pu lian em em a, chu chuan tun hi min hruai thleng ta a nih hi. Ka zahawmna ka ngaihpawimawh em em thinte khan min tizak a, tlawm ka hlauh luattuk na te khan min titlawm ta ngawih ngawih zawk a nih hi.

----------------------------x------------------------------------------x-----------------------------------------

Biak in dar ri chu ka ngaithla reng a, ka thiantha ber tia ka lo sawi thin Akhuma nupui neihna tur dar chu a ri ta. Biak in chu ka thlir vang vang a, min neih a tum em em na hmunah ngei khan a hmangaih ber Thanpuii nen zawk an innei dawn ta. Ka nui sak a, ka thiannnu Zamtei chuan ka kut chu a rawn hmer salh a, min ngaihtuah tih hriat zet hian a thaw halh bawk a.

“I ti thei tak tak ang maw?”

“Ka thiantha ber tia ka lo sawi thin meuhin nupui a nei dawn a, engvangin nge ka kal theih loh anga, ka thlir theih lo hang?”

Biak inah chuan kan lut dun ta a. An thutiam chham laite chuan ka thinlung chu a rum ve vawng vawng tho mai, mahse, midang ni lovin keimah ngei ka ni. Ka thianpa a nihna tal min laksak lova, kal hi ka tih ngei ngei tur zawk alawm. Pawnah chuan chibai ve ngei ka duh leh tlat, ka thiannu mitmeng buai nak chu ka hrethiam, pawi ka ti lo. Kumkhuain, engtikah mah, ka thianpa tiin ka sawi nawn leh tawh dawn lova, tun hi kan inthianna anga kan hun hnuhnung a ni.

“Ka lawmpui lutuk che”tih paha ka chibai chuan a hmel a buai nak mai, ka nui sang a. Chutah buai rei duh lovin min rawn ban ve vat a, Thanpuii mitmeng verther zet chu hai der luiin thla kan lakpui ta hram a. Thingpui kan dawh lai chuan Zamteii chu a nui tat tat a, nghal min ti tih ka hre mai. Ka duhnaah chuan ka lu ka zo ve alawm.

Ni a ral a, thla a ral a, Krismas kan hnaih ve ta viau mai. School session pawh a tawp a ni ruai tawh, pawl sawmpahnih exam tur erawh study camp kan neihpui laklawh avangin class chawlh hnuah pawh kan la riahpui a, ka rilruah mi pahnih an lo lang thin. Ka hna min tui pui em em thintute, ka riah dawn phei chuan tuemaw zawk zawk min thlahtu ka nei thin a nih kha. Ka ngaihtuahna avang chuan ka nui sak a, hun liam tawh hi kan la ngai fo anih hi.

In atanga ka chhuah chuan pawnah car a lo ding reng a. Miss Puitei’n a scooty a min rawn sawm dawn avangin kawnah awm turin min ti a, pan ka tum mek a ni. Glass a rawn in hawng a, Akhuma a lo ni reng. A nupui neih hnua kan inhmuh leh vawikhatna a ni a, a nupui neih vang nge a cher ve kuam mai.

“Ka lo thlah ang che”

“Ka thiannu in min nghak a, a ngai lo mai”

Ka tlan nghal dawr dawr a, min rawn umzui tih pawh ka hre lo. Puitei lo dingreng ka hmuh chuan ka ding a, ka thaw hlawp hlawp mai.

“I thiannu hi biak lawk ka duh a, ka rawn thlah mai ang”ka hnunglam ka hawi chuan Akhuma chu a lo ding ve reng.

Puitei chuan min melh tawn zak zak a, chutia min rawn umzui tak siah chuan ennawm chhuah kher ngai ka ti lo, Puitei chu kalturin ka ti ta nge nge a. Motor kan luh hnu chuan school lam kan pan dawn emaw ka ti a, mahse, anmahni in lam kan pan daih.

“Khawnge kan kal dawn?”ka tih chuan min chhang lo.

“Ka tlai ania, a chi loh emai aw”ka ti hlur a, chutah muanchang hian motor chu a khalh a.

“Hlu, I ngaihdam tlak ni tawh lo mah ila min ngaidam rawh aw”ati a, ka phu zawk.

“Engkim a nih tur ang a ni vek tawh a, hetia thar thawh leh hi a tulna a awm miah lo”ka tih chuan pawi tih hmel zet hian min melh a.

“Ka rilru na hi min hmu ve thei lo mi? Ka tih sual rah ka seng mek a nih hi, rilru na leh hrehawm reng rengin hun ka hmang a, ka kham tawh a ni “a tih chuan an kawt kan thleng der. A chhuk chu ka en reng a, chhuk ve pawh ka tum hran lo. Ka ngaihtuahna chu a chawl thupin ka hria.

“Lo chhuk la”tih pahin kawngkhar chu a rawn hawng a, ka chhuak mawl ve tawp. An in chu a reh thap a, a chhungte an awm lo nge ka hre lo. A kalnaah chuan ka zui ve tawp, inchhungah kan lut a, sitting roomah rilru hah hmel zetin Thanpuii a lo thu. A pum chu a lo puar ve al tawh a, an inneih hma aiin a hmeltha ka ti zawk. Chutia a han rai te chu inhmeh riauin ka hre bawk a, min hmuh vang chu nge a hmel chu a dang bam mai.

“Le, Hlutei nen kan inzawmna I tihchah dan chu sawi tawh rawh le”ati chang ta fak a.

Thanpuii chuan min rawn pan a, ka kut chu a vuan a, a tap titih a ni nghal mai. Thil awmzia ka hre bawk si lo chu ka hawi kual ta vel mai mai.

“Ni e, ka tih dik loh vek a ni. Hlute, min ngaidam rawh aw. Akhuma hnena dawta hek a, a rilru khalh sual sak tu chu keimah hi ka ni.”a ti a, a tap ta hlawp hlawp a.

“In thusawi hi ka hrethiam lo, Akhum, ka tlai dawn nia”ka tih chuan sana chu a melh ve zawk a.

“Faka nen damdawiin kawta in inkuah lai thlalakte, ina in inlen chilh lai leh bazar thlenga in hun hman dun hmuh fo takah kha chuan ka rilru a hel telh telh a, I hmel hmuh tur a awm lo thin bawk nen khang a thil hmuh zozai kha awih lo thei ka ni bik lo”atih takah chuan ka fiah uar uar.

“U Faka…”ka nui chhuak hak a, mahse, ka nuihzat vang a ni hauh lo.

“Ni e, khang zawng zawng kha ka plan vek a nih kha. Akhuma nen in inkar tichhe tur chuan U Faka kha a tawk tih ka hria a, chuvangin hmanruaah ka hmang ta mai a nih kha. Dmdawiin in lo kal tuma I hlau tlanchhia pawh kha ka ruahmanna vek a nia, ka duhthusam ang ngeiin thlamuan tumin a lo kuah che a, ka ruahmanna kal tluang lutuk kha mak ka ti zawk asin. Hunawl pe thei map lo chein Akhuma ka vil a, a chhungte bulah dawt nena inpawlhin kan la hlim dun thu ka hrilh fo bawk thin. Ani hi luhlul lutuk a ni tih chu I hriat vetho kha, nikhua a rawn hriattirhin I hming a lam nghal, chutatang chuan ka hun a intan vechiah tih hriain I chanchin tha lo lam hlir kha ka hrilh ta mawlh mawlh mai thin a ni. Mahse maw, ka duh ang ngeiin inneih thlengin kan innei ta ngei a, a hlim hmel hi min hmuh ngai lo asin. Nau ka pai tih a hriat tlaia a nui kha a nuih vawikhatna a ni hial ang”a mittui chu a hru tawk a. “Ka tuar thei tawh lo a ni, engkim hrilh ila, min ngaihdam theih chuan ka hlim chauh ang tiin ka inpuang ta anih hi”a ti ta a.

Ka kut chu ka hum ngawt ngawt a, chu chu a thlen ka ring reng a ni. Thil mak tak a ni lo zawkin ka hria, mak ka tih em em zawk chu heng hi U Faka khan a lo hre vek em ni? A mak tih mai loh chu ngaihtuah dan pawh ka thiam lo.

Naupanghoin an thiam loh min zawh loh karah nichin lawka thil thleng kha ka lo ngaihtuah leh thin. Tahnpuii’n”U Faka khan min ringhlel a, a chhan chu a hma pawhin Mazari kha ka tihpui thin a, nangmahah a nghet bawk si, a inah te khan ka lenpui thin a. Ka bialpa bestfriend chunga ka thil tih duh a ngaihtuah khan min ring thlawt lo a ni ang chu, min lo chhui zui tak tak a. A zawng zawng chu hre lo mah se engemaw tak ka ti tih chu a hria ang. Mahse, ka rin loh deuhin tihan tun thlengin in ngawi ta si a, engmah a sawi lo anih ka ring ta a, kei erawh a ni telin ka rilru a nuam loin ka inthiam lo a, zan muttheih loh ka nei chho ta bawk nen, tunah hian engkim ka sawi ta anih hi. Min ngaihdam theih ka ring tawh lo a, Akhuma pawhin engtin pawh min tise ka pawm vek ang”a ti a nih kha.

Nupa an ni tawh a, hrehawm leh nuamah pawh inthen lo tura intiamna nei tawh an ni, hunk al tawh kha siamthat theih phah dawn se chuan kei ngei pawhin engtin emaw tih ka duh, mahse chu chuan engmah a siamtha thei dawn lo a. Chuvangin Akhuma pawhin, “Engtia tih nge I duh?”tia min zawh khan hlim taka awm dun a, ngaihdamna nen a nupui nih tir zel turin ka ngen ta anih kha.

------------------------xxxxxxxxxxxxxx----------------------------x---------------------------x-----------


“I muang thei bik emai, kan tlai dawn nia”tih paha Zamtei rawn lut chu ka lo en reng a. “Ehe, tinge I la insiam loh a?”tih pahin ka thawmhnaw bawm a hawng nghal rawk rawk a. Vawiin ni hi kan Pro pastor induction service neih hun tur a ni a, zaipawl kan zai dawn lehnghal. Zing atangin ka tho fuh lo chu ka insiam hlei thei lo, ka lu a rit bawk si , thulh ka lo rilruk lai takin ka thiannu a rawn lut leh ta anih hi.


“Ka thulh ang chu ka lo tia sin, ka nuam thei lo”ka tih rualin ka tarmit a rawn khai va a.


“I bun thatchhiat vang a nih kha, insiam vat rawh”tiin min nawr ta dat dat a.


Biak in kan thlen chuan kan tlai lek lek mai, zai tur kan ni si, tlar hma lamah zaipawl thutnaah chuan kan kun phei ta kut kut a. Mipui lah chu an tam phian lehnghal, tu ber chu nge kan pro pastor tur chu tia ka hawi kual lai chuan amah ngei chuan min rawn melh ve ran a. Khawiah emaw chuan ka hmu tawh a ni, ka ngaihtuah vang vang pawhin ka hrechhuak zo tawh lo.

Inkhawm banah thingpui kan dawh laiin ka hminga min rawn ko ri ka hria, ka hawi let a, kan pro pastor kha, Johny-a ngei kha. Min rawn pan lai chuan a hrechhuak chiah,  KTP General Confernce ah Khawzawlah khan kan thleng tlang tak. Khatih lai kha chuan BD pawh a la zir lo, MA a zawh kum a ti maiin ka hria, kan inzui ni tin zan tin ve anih tak kha.

“Awi, ka hrechhuak zo tawh lo tep che a”tih pahin kan han inchibai lawp lawp a.

Kum khat a liam dawn meuh chuan kum engemaw zat min lo zawng rilru ve reng thintu Johny nen chuan pangngai takin kan inkawp a. Hetiang hi ka tawng ang tih ka ngaihtuah phak loh leh ka ngam loh chu ka tawng ve ta tlat a nih chu.  U Faka kha ka theihnghilh ngai lo, ka hre reng thin. A chang chuan ngaihdam chak chang ka nei thin, mahse ka thinlungah kha ser kha a reh tawh dawn si loa, kan hlim thei tak tak tawhin ka ring lo a nih kha. Tunah erawh chuan ka beisei ngam tawh loh ka thinlung hian hahdamna a hmu ve ta. Thlasik laia nilum nuam takin min tuama kan dam sawng sawng thin ang hian ka thinlung hi tunah chuan Johny vangin a dam ve ta sawng sawng mai.


Note: A tawp dan hi a mak e, ka rin loh dan deuhin a tawp, hihiiiiiiii. Fakna milem kha click leh sak ila, thawnthu dang nen ka lo let leh nghal dawn.