IRRESISITIBLE-VIII

Eight

Ka zing walk zo ka haw chu ka kawtah hian mipa pakhat hi a lo ding vung vung a, ka in bul atang hian khua chuan vel hi a nuam ve a, zingkarah khua a that phei chuan a lang chiang  a, keipawh hian ka thlir fo.

“Hey.. heta awm hi mi I nih?” min hmuh chuan a ti a. Ka nih thu ka sawi chuan, “Lza ka nia, Dr.Zoa nau ka nia”  a ti a, a sawi takah chuan inanna te pawh an nei alawm. Zoa aiin a sang zawk a, a lang lian zawk hrim hrim. A thawmhnaw leh a sam vel tihdan chu tlemin a khawvel hmel a, an mizia a inan hmel vak loh.

“A nih chu. I u hnathawhna hmun I rawn hmuhpui a ni maw? Thingpuite lo in ta che” ka ti a.

“Kan vawikhat inhmuhna te a ni sia, nakinah zan lamah emaw remchang dangah ka lo leng dawn nia” a ti a, a haw chho ta a.

Aizawl atanga kan haw thlak hnu khan pangngai deuhin Zoa nen kan la inhmu lova, Monday atangin bial a fang zui nghal bawk nen hmuh tur a la awm lo. Kima pawh an principal an thlahna tur thilah a buai thin em a, nihnih chu a rawn haw ve a, nizan kha rawn haw tum a ni na a, a thei leh ta lo.

Vawiin chu ANC checkup buaiin ka buai a, copper T dah tur an awm nual bawk nen ka buai ve hle a, dar 2 velah ka zo thei hram a. Nidangah chuan kan pu haw hun hun hi kan haw ve theih hun a ni  a, vawiin erawh amah a awm lo bawk a, ka haw nghal daih. Lza kha pu kawtah a lo hawi leh vual vual tawh a, min hmuh chuan a lo nui sang a, a fel hmel reuh.

“Ka lo leng dawn” a rawn ti a, kan inzui haw a, nilenga ina awm chu a hrehawm ka rin em vangin ka hnial duh lo.

“I awm rei dawn em?”tia ka zawh chuan, “Ka u in I awm rei lo ang chu min tia lawm” a nui a, “Min hruai thla sauh sauh a, min zinsan leh nghal daih bawk sia, a ti ho ngawt mai” a tih chuan ka lo nuih a.

“Ka awmtirh chuan khawharthlak hi ka ti thei lutuk a, mahse khaw mi an fel bakah an khua hi a nuam hrim hrim a, nuam ka ti hma lutuk” ka ti a.

“Keipawh nuam ka tih ngei ka beisei “ a ti a, ka in kan thleng chiah. Duhawmi chu an kawtah puan a lo pho a, “Cake ka bake dawn lo phei ve rawh” ka va ti a, a phur leh nghal sarh tawh. Ka bula a hmelhriat loh awm ve erawh chuan a tihrilhhai deuhin ka hria.     

Thla a sik tan tawh avangin ka in pawh a vawt var tawh a, chhunah tukverh hawngsa veka ka chhuahsan thin avang hian a lum deuh huk zawk a, ka haw veleh ka khar a, tihian zanah a la lum pha a, a nuam ve viau thin. Ka inthlak zawhah cake ur ka tum avangin ka hmanruaho ka la chhuak a.

“Ehe, cake ur te I thiam elo? Ka lo pui ve ang che” a tia,  phone chu dawhkanah a dah a, min rawn thut hnaih ve nghal a.

“Ka hna piah lamah ka nuam tih ber a nia, ka ti ve nawk nawk thin a, ka thiam em em hran lo” ka ti a, Duhawmi a rawn lut ve nghal zat.

“Hei ka thiannu Duhawmi a nih hi, Dawm, Lza ania, Pu Zoa nau” ka ti a, an han inchibai lawp lawp a. A hawiharh chi leh fing chi a nia, an innel nghal thuai.

“Cheese cake ka siam dawn a, mahse, naktukah a tui chauh dawn ania zanin zanriah atana rin te kha in lo tum ringawt ange aw”ka ti a, an nui dun var var.

An pahnih chu ka melh tawn zak zak a, an vawikhat inhmuhna mah nise engtin emaw hian an awm, an inpawh hmel nghal tawp. Ka rin ang ngeiin Lza haw hnuah Duhawmi chuan min sik hrep a, “Love at first sight ang hi” a tia, ka thutthlengah chuan a thal nghal huang.

“Nunpuia…”

“Sawi suh, engmah a awm tawh lo”a ti hlar a.

Engmah ka lo hre ve miah lo tih ka hrechiah, Zoa’n a hruai  ve daih avangin Nunpuia nen pawh kan la inhmu lova, an tha ve zelah ka lo ngai a, an mak.

“In mak ve bawk e, in tha zel emaw ka tia” ka ti a.

“A bialnu hlui a theihnghilh thei silo, ka ning ka peih tawh lo” a ti hmak a, chutiang thil a nih chuan ka hrethiam khawp mai.

Kima’n Mamit nuam a ti lutuk pawh hi ka ngaih a tha lo lek lek, a theih hram chuan rawn haw a tum thin kha ania, tuna hchuan weekend ah a lo haw tawk a, weekdays ah hian rawn haw a tum tawh lo ni mai hian ka hria. Function te han hmang zo se, hei hi chu sawi thatpui leh ka duh ang.

Hun a liam ve zel a, Kima pawhin ka thu ngaipawimawhin a tam thei ang ber a rawn haw tawh a, kan hlim chho ve viau mai. Zan khat a rawn leng tur chu a rei em avangin ka call tawp a, a ring quit dawn emaw ka tih hnuah a pickup hram a, thawm ri deuh nawk nawk te ka hria. A hnu rei vak loah a rawn thleng a, a tshirt chu a rawn chuar deuh tun a, a kamsir a thi ser ser bawk.

“A thim lutuk a ka tlu a” a tih chuan ka awih lo lutuk.

“Khatianga kamsir sawh daih thu a awm lo “ tih pahin ka nam thu a, damdawi hnawihsak ka tum a. “A chhan sawi rawh le” ka tih chuan a nui a, ngaihpawimawh loh hmel deuh hian ka biang a piai a.

“Engmah a ni lo ka tih chu” tih bakin min chhang lo.

A len chhung zawng chuan ka dawp a, zuk sawi duh hauh lo a. Engang pawhin sawi duh lo mah se ka la hre awm tho emai a.

A tukah chuan thil mak deuh ka hmu leh tlat, Zoa chuan a mitko hi band aid a rawn bel phei raih a, a mood a la chhe em em zui. Chawhma chhung chiah a office ah a awm a, a haw daih.

“Nizanah mi kut a tuarin ka hria” Nunpuia chuan a ti sap a, ka va melh chuan a dar a san ak a, a bak a hre bik lo tih ka hrethiam mai. Ka ngaituah neuh neuh a, Kima nen hian engemaw an inakarah a awm em ni aw ka ti rum rum, chu em chu a nih ka ring si lo.

Zanah Lza a rawn leng lut hlauh a, a thuphungin vawiin lama ka pu mood fuh loh hmel thu ka lo sawi mai mai a.

“Nizan kha kan chaw eikham a chhuak nulh a, Mali inah a leng dawn emaw ka ti mai a, rei vak lo hnuah a rawn haw a, a mitko kha a rawn thi a, a chhan ka zawh lah chuan min chhang lem lova, a na lutuk lo bawka ka lo ngaihven chiam lo a. Mahse, tuna ka rawn chhuah dawn thleng khan a ngawi  char char a, engemaw a hriat ni?”a ti a, Kima nen an inkarah thil a thleng tih chuan an sawi kher ngai lovin ka hre mai. “In pa a lo leng duh ang, kan nu te inah ka va phei ange”tih pahin a nui a, Duhawmi te in lam panin a chhuak ta a.

Kima a rawn kal dawn loh avangin ka mu vat a, fb ah story te ka chhiar vel mai mai a, tlai ka haw dawna kan inbiak bak kha kan inbe tawh lova, tah khan a rawn len theih loh tur thu a sawi a, a reh ta daih. A hman hunah min lo biak mai ringin ka va be buai duh ta lo. Ka phone a rawn rik ral ral chuan ka thiannu Mami kha a lo ni a, ka pickup vat a.

“Thiannu, in pa kha DJ-I model kha a ni em?”a rawn ti a, a nih thu ka sawi chuan a chek tlak tlak a.

“Nang hi aw, a kawp che mi?” a rawn ti ta mai. A ngaihna ka hre lo kher mai.

“Enge I hriat a?” hlauthawng deuh tak hian ka ti a.

“An thawhpui nen hian an sawi nasa lutuk a nia aw, niminah pawh an inphur ka hmu ve a nia. Ka hmu fo a, engahmah ka lo ngai hran lova, vawiinah ka thianten an sawi a, Dji model an tih khan ka rawn hrechhuak nghal che alawm” a ti a, a sawi zawh chuan a thaw nghal halh a.

Kei hi bumin ka lo awm reng tihna a ni ang em? Mahse, chutiang turin Kima hi a fel lohna leh rinawm lohna ka la hmu ngai si lova, min care dan ngai rengin min care a, a hun min pek zawng zawng ka ngaihtuah a, chutianga pelhe hmana a awm ka hre si lo, ka ngaituahna a buai vek. Kima number chu ka han dial ta nge nge a, a pickup lo. Ka tinawn leh a, a pickup a, mahse inhau leh inhnial ri ka hre thung.

“Tunah khan hrilh vek rawh” hmeichhe aw in thinrim deuha a tih chuan ka nghing lawih a, min thawng lutuk tih piah lam a ni. “Fel, ka lo be tha leh ang che, thil buaipui lai ka nei lawk aw”tih pahin a dah a.

Ka thaw vak vak a, min bum tur anga ka ngaihtuah ringawt pawhin a na lutuk. Chu em chu a ni lo ang tiin ka inhnem char char a, thil pakhat ka ngaihtuah chhuak. Ka tho a, ka thawmhnaw ka ha sawk sawk a, Duhawmi te inah ka tlan phei nghal. Lza nen inhnaih angreng tak hian an lo thu a, min hmuh chu an inbeisei bik lo aniang an lo phawk deuh hru.

“Kimate inah min kalpui ru” ka ti thawr a, engmah an sawi bik lo. Ngawi rengin min zui ve mawp mawp a, ka tha khur nasa lutuk chu tihreh tumin ka thaw lak te chu ka ti rang a, ka va hmuh tum ang hian ni lo hram se ka ti.

Kima te in kan thlen chuan an garage lam ka pan nghal a, ka thiante chuan min zui ve zel a, a ngaihna an hre lo tak zet ang tih ka ring. Kima car chu a lo awm lo ngei, ka thu hnawk a, Duhawmi chuan thil awmzia a man maiin ka hria, inchhung lam panin a kal nghal a. Rei vaklo hnuah a rawn chhuak leh a, ka darah a rawn vuan a.

“Tlaiah khan Mamit lam panin a kal daih a nih chu, zanah a lo let leh dawn an ti achhungte chuan” a ti a, ka mittui a tla nghal zung zung.

Ka inchhung chu a reh tlawk tlawk a, Duhawmi leh Lza te min hnemna chu ka ngaithla liam vel mai mai, kum khat em pawh a la liam lova, tunah hetiang maia min awmsan chu a na ka tihzia hi ka sawichhuak thiam lo ang.

*Dr.Zoa POV*

Ka nau pawh thla khat dawn chu ka hnenah a awm ve ta, ka rin aiin nuam a tia . a nun pawh a fel raiu in ka hria. Feli inah len a hrat a, a ruk tak chuan ka thik thin. Kei lah chu ka leng ngam lo mai ni lovin lenna chi a ni ve der si lo a. A hnua ka hriat leh danah erawh chuan ka nau leh Feli thiannu chu an lo inngaizawng ve deuh a ni awm e.

‘Tea, ngaihzawng neih nan em em chuan a la hma lo maw? Thla khat awrh chauh I la awm si a” kan chawei  laiin ka ti a.

‘I hrethiam lo a nih kha” a ti a, a nui ang suk a, a bak engmah a sawi lo.

Zanah min chhuahsan ziah a, lehkhabu chhiar nana hun hman leh tawp loh chu tih tur ka nei ve ngai lo. Mali a rawn leng zeuh zeuh a, vawikhat chiah ka la leng ve thung. Mi rawn leng lo hnar haw thu lah awm silo, tui lo zeta ka kawm zan a tam ngei mai. Kan inngaihzawn that lai pawh khan ka leng khat a, amah hi a lo leng mai zel a, ka tan thil thar a ni hran lo. Tunlaiah chuan hmeichhe tam tak tihdan a ni a, ka nu leh pa pawhin an hrethiam aniang engmah an sawisel ngai lem lo. Ka hun tam zawk lehkhabu chhiar nan ka hmang a, min hriatthiam em avang hian Mali pawh rei tak kan inkawp theih phah niin ka hria. Ka thianten min sawm ngawih ngawih pawhin ka chhuah peih loh hi a tam zawk a ni awm e, ka hnaa ka kal hi ka duhtawk viau.

Mamitah kan office pui dawrin ka kal a, zan khat ka riak a, ka let leh lamah chuan ka thin hi a so bulh bulh, ka hlauh ruk ang ngeiin Rinkima hian Feli hi a tikual mai mai a, a hmuh phak lo ah duhtawkin hmeichhe dang a kawpsan tih mit ngeiin ka hmu. Hei hi a tir atang ka hlauh ruk kha a ni reng a, mahse engtin nge Feli hnenah ka sawi ang? Engati nge Feli chungchang a nih tawh chuan ka lo buai ve em em zel tih chu keimah ngei hian chhanna ka pe thei ang. A nat ka phal loa, a na tuar hmuh pawh ka duh lo, heng zawng zawng hi a chhan chu kei hian ani hi ka duh a ni. Thla khat chhunga hrehawm ber ka tuar a, loh theih loh ah lo chuan kan inbe lova, ka buai chhoh ve tho avangin harsa lutuk loin ka ti thei ve mai. Zanah erawh ka nau ka awt ngawih ngawih fo a, hnaih chak si, theih si loh hi a lo hahthlak a nih hi.

Feli in thlen hma kawng kawiah ka chaweikham chu ka ding reng a, Rinkima rawn kal chu ral a tangin ka lo en reng a, phone a rawn hmang phei mawlh mawlh a, Feli a be lo tih lah chu ka chiang ropui si a. A rawn hnai zel a, min hmuh chuan a phu deuh zuk a, a phone a dah a, kaltlang mai a tum chuan ka ko a.

“Feli hi infiam nan hmang suh”

“I lo buaina tur a awmin ka hre lo”

Ka va hnaih a, zam hauh lo hian min melh ve nghal ngar a.

“I awmdan zawng zawng hi ka sawi I duh loh chuan midang hi thlah la, a nih loh chuan ani hi thlah ang che” ka ti a, ka inher a.

“Ka thlah lo ve ve ang, chuan engtikah mah Feli hi I nei thei ngai lo bawk ang” a tih chuan ka insum hman lo, ka hnek nghal thuai a. Chutah ka hmai a ri ve sawk a, kan buai chhunzawm chu a ni deuh mai. A phone a rawn ri hlauh a, kan buai rei loh phah ta zawk.

In ka thlen chuan ka khawsak dan atthlakzia chu ka hrechhuak a, awmzia a awm tawh lo. Ka mitko chu a lo hnek thi ve hman a nih hi. Ka tifai a, damdawi ka hnawih hnuah bandaid ka bel a, kan mualpho teuhzia ka ngaihtuah chuan khumah ka bawk thlawp a , eng ka ti zo ta nge ka khawsak dan ngai loha ka khawsak tak fo chu le!

A tuk nilengin ka mood a fuh lo, Feli ka hmuhte chuan ka thin a rim dawn zel a, ka khawngaih bawk si tih theih ka nei si lo chuan min ti na a, ka hmu thei lo. Chawhnu lamah ka haw ta ringawt a, hetiang anih reng chuan ka mualpho thei takngial dawnin ka hria. Zanah pawh ka nau chhuak tur chu ka en reng a, lehkhabu chhiar a lang lova, engmah ka ti peih lo. Tv en pahin thutthlengah ka mu a, ka lo muhil daih chu niin kawngka ri rawkah ka harh a. Ka nau leng chu a rawn haw ve chauh a nih hmel, sana ka bih hram a, dar 11 a lo pel dawrh tawh.

‘Rei tak tak nula te hi rim loh tur a nia, an chhungte rilru turte ngaihtuah thlen tur aw” ka ti a, ka room lamah insawn ka tum a.

“Feli a tap nasa lutuk a, ka rawn haw thei lo a”’

Ka ding chawt a, ka nau lam chu ka hawi a.

“A bialpa khan a lo kawp tih a hrechhuak a, kan va manchhuak alawm” a tih chuan mak ka ti telh telh. An ina an va kaldan leh thil thlen dan chu a sawi a, ka rin aiin thil chu a thleng chak a, ka hamhaih lek lek zawk.                

Ka room tukverh atang chuan Feli in chu ka thlir vang vang a, Tea khan a thiannu in a riahpui dawn tih a sawi a, ka ngaihtuah mang reuh e. "Zothansang, awm hahdam mai mai rawh" tiin keimahin ka phun leh bul bul thin, hetiang hi hmangaihna a nih chuan hmangaihnaa zuan luh hi a lo chakawm hrep lo e!

(Vawiin chu ka rilru ka pe thei thlawt lo, chawhnu lamah type na hun tlem ka nei a, ka tyep zawr zawr a, tihian a lo chhuak ta a nih hi. A ngaihnawm loh deuh pawhin tihpalh u)