IRRESISTIBLE- VI

Six

*Feli POV*

Hun a liam ve zel a, keini inbuatsaihna pawhin a vawrtawp a thleng tawh a, karleh lam hian district a kan hotuten min rawn endik tawh dawn a ni. Kan inbuatsaih danah sawiselna tur kan hmu tawh mang lova, staff interview berah hian kan zam ang tih hlauin kan nurse te pawhin theithawp an chhuah a, tutepawh min zawt se chhan theih loh nei lo turin ni tin kan inzir ve reng a ni. Zoa bialnu kha hetah a rawn awm ve a, a hming pawh Mali an tiin ka hria. A takah ka la hmu ve lova, a hmelthat thu ka thawhpuiten an sawi nasa bawk a, ka hmu chak ve tawh ngawt mai. Nunpuia lah hian a vei thu a lo sawi ve chhen a, stalk a bansan thei lo a ni ngei ang.

“Fel, Duhawmi hi ka duh lo pawh a ni lo, Mali hi a chhe lo ka ti ve em a ni”ka bulah a ti ziah lehnghal. Duhawmi nen khan an ni tawh a, Duhawmi pawh hian an inngaihzawn a rin loh lutuk vang hi aniang a thik miah lo lehnghal. Keimah ni ve ta ila ka thin a rim dawn tehreng nen engahmah a ngai lo thei hi a fakawm zawk.

Rawngbawl pahin IG ah ka crush Hyun bin thlalak thar a awm em tih fan account  ami chu ka bih leh duk duk a, hepa hi chu ka veiin ka atchilh ve thlawt a ni. A film chan en loh pawh ka nei lo, amah ka duh zual em emna chu social media hi a khawih mang lova, a intihbuai tir duh miah lo hi hman atanga vawiin ni thlenga ka la duh tluan zel chhan a ni. Mipa social media a inlan sekte hi ka ngaithei lova, dik tak chuan Kima pawh hi ka duh aiin a inlan tam, IG ah post thar a lo neih leh tawh hi! A thlalak chu ka like sak a, comment a awm thla leh tuar. Sang chuang fe likers a nei ziah a, amah hi a chhe lo hrima ka hrethiam tho mai. A thlalak ka like zo deuh chiah a min lo call nghal.

“I la bang lo emaw ka tia, ka lo call lawk duh lo che a”a rawn ti a, tunlai chu an college function pawimawh tak a awm dawn avangin a rawn haw tlang ngai lova, in a luah tho avangin pawi ka ti hran lo. Keini lah hetiang hian hunbi pawh awm thei lovin kan buai em em si a, a tha zawkah ka ngai.

“Weekend chu helamah I rawn hmang ang chu tiraw?”ka ti a

“Hyun bin min thlir san reng dawn loh chuan ka lo haw ang”a’n ti ngei ah.

Sunday  khan The Swindlers ka enpui a, ‘a pa ve reuh em a nih khi’ min tihsak a, ka lawmzia kha.

(Hyun bin)

Chhun lamah ka chauh deuh avangin chaw ka eikham hnu rei vakloah ka mu a, tunlai chu zing pawh ka tho hma thei lo. Zinghnih vel chu Zoa’n ka kawngkhar a rawn kik vak vak zel a, ka hawn veleh a kal daih zel. Zing ka walk thang ve si a, ka kal chhuah loh chuan a ngaih a lo tha lo emaw ni? Kayakalp zawhah hian kan pu in rem atih chuan haw chhoh ve lawk ka duh a, ka chhungte ka ngai ve tawh riau. Ka nu leh ka unauten tlaiah khan min rawn be bawk a, ka pa hi chu whatsapp ah min rawn biak bak hi call hian min rawn be vak ngai lo. Min rawn biak ve zeuh chang pawh hian sawi tur a hre lo thei si, ka pa chu ni lo se ka nel lo ngawtin ka ring. Ka mut a chhuak har zek, zan dangah chuan tun angah hian ka muhil daih tawh thin kha ania, ka phone ka dah tawh chu ka han la chhuak leh a. Ka rilrua lo lang hmasa ber chu ka han search a, Mali kha Nunpuia;n a sawi zing bawk a, ka’n en tak tak ange. A indah dan kha ka lo hre fuh chiah tawh lova, rei vaklo ka zawng a, a hnuah ka hmu hram. A thlalak tam zawk chu a hnathawhna hmun, a room ah tih ka hre mai. An chhungkaw thlalak leh Zoa a tam leh a, a bak chu an uite leh zawhte thlalak vel. Zoa nen an lakna chu ka han en chiang vel mai mai a, an inhmeh ve ngawt mai. Ka rilruah kan pu hian account a nei ve lo mawni ka ti neuh neuh a, amah han chhuizuina tur awm ang Mali account atangin ka hmu lo. A tawpah Kima account ah ka lut a, an comment hi a  reply ngai lem lo tih ka hre ve tawh, tlaia a thlalak pawh tu vak mah a reply lo. Ka la sawi loh pakhat chu amah hi zaithiamho hian modelah an sawm ve fo a, a duh ngai lem lo. Vawikhat erawh chu DJ-I hian a sawm nasa ve si a, an lo inthiantha ve tho bawk nen a tan sak a, chutatang chuan a lar ve ta hluai hrim hrim a ni. Mahse, tun hnuah erawh vawikhatmah a duh ta lo, film chang turte hian an be leh nawlh thin a, a nuih a za thei hle. Ka chhuang ve ngawih ngawih a, a nungchangah pawh sawiselna tur ka hre lo. A ruka a lo inthup thei viaua min lo bum a nih chuan kei hi chu ka keh chhe dawn chiang sa a, a hre ve vek tho ang.

Kan hospital landan tlema dang ta deuh raih chu gate atangin ka thlek vang vang a, a hma pawh khan a mawi ve tawk viau kha nia, tunah phei chuan mit a la zar tawh. Zoa idea neih thatzia chu hetah hian a lang chiang ngang mai, kan pi hmasa kha hmeichhia a ni zawk na in an inthlau deuh hlek chu a ni.

“Ka tih that duh tak tak chuan in mit a tla lo chauh zel dawn anih hi”

Ka phu zawk a, ka hnungah Zoa a lo ding reng. Chhanna chang pawh ka hre lo, ka nui ta ringawt a. A hma ngaihtuah chuan fiamthute hi a duh ve sawt a, staff te bula tal hrat hrat te hi a ching ve tawh a, Kayakalp hi kan tan chuan malsawmna a ni ringawt. Hnatlan tam na na na chuan kan lo inpawhin an lo innel a, thawhhona a tha lo thei lo. Kan kal phei tlang a, a office ah a lut tlang a, kei erawh chu nurse duty room lamah ka lut a, thingpui hang an lo neih leh tawh ka ring.

“Kan BDO thar hi kan pu bialnu an ti asin”Nu Sitei, nurse chuan a ti a.

“A thlalakah khan a hmeltha ka ti zawk, atakah kha chuan a ngo vak lo” tihte, “Mi hausa leh hausa hi an inkawp zel a”tih te kan sawi zui nak nak a, ka in zawhah muang tawh lovin kan room lam ka pan ta nghal a. Monthly report ka ziah fel zawh hnuah kan room hnunglama hnim ka thlawh zawh loh chu ka va thlo leh a, rilruah hna aiin kan fai lovang tih hlauhna a khat a, kan awl hman meuh lo. Tutepawh mahni hna kan thawh zawh chuan tihtur awm an gang tiin kan bur leh nghal a, dustbin chungchang ringawt pawh byheart ngai a tam si, a thenin an lo zir a, kan ri ve nawk nawk thin. 

Chutiang hun kan hmang ve nawk nawk a, endiktute lokal hun tur a lo thleng ve der mai, kan inbuatsaih tha ve tawk bawk a, tutemah chu kan zam lovin ka hria. Kan district CMO leh SMO an rawn kal a, ka thiannu Mami a lokal ve hlawl bawk. Ani hi Synod College a ka kalpui thin a ni a, Health worker ka training san leh daih avangin kumhnih bak kan inzui hman ta lo. Min hmuh chuan mak ti zet hian a khek raih a, chutiang bawkin keipawhin, chutia kan ri hlut chu midangho chuan min lo thlir thap thung a. Zinga an lo chhuah avangin an chawei tur kan lo buatsaih nghal zung zung a, kutsil tura a rawn chhuah rual chuan ka bulah a rawn ding a, “Fel, in pu saw chhe lo tawp”a ti zawi sap a, ka lo nghawk zauh a, kan pu a ding hnai si a hriat chu ka hlau deuh. Ani lah chuan engahmah a ngaih loh hmel em em a, a thawven ngaiin a la thawveng reng a nih dawn hi. Chawte an eikham hnu chuan kan pu leh nurse ho chuan kan hospital chu an enkual pui a, nurse duty roomah keiniho chu thinphu dep depin lo awm thung. A thenin staff interview na ami tur an lo sawi mawlh mawlh bawk a, kan buai tlang a ni e.

Darkar chanve vel a liam hnuah kan awmnaah chuan kan puteho chu an rawn lut dial a, kan CMO chuan Mami chu zawhna min zawt turin a ti a, min zawt ang tih hlauin ka thiante chu ka inphentir a, ka ngeizia chu hnuai lam bih chungin min ko chhuak a, a la nui suk zui. Ka thiannu a ni ve em em a, mite duhsak ve tur a nia.

“Five moments of handwashing kha han sawi la?”

Ka thiannu hmaah chuan ka zam lek lek alawm le, Zoa lahin min lo en kur bawk si, a awl tehreng nen ka sawi sual tep.

Midang pawh a zawt kual nual a, a zawt khirh vel sia, ka thiannu kha a ni tawh lo emaw tih tur khawpin a hna a lo tlin vel tawh a, hostel kan awm tlanlai te kha chuan lehkha pawh a zir tha peih mang lo thin, a thiam thei ve em zawk a, tunah chuan a lo puitling ve tawh a nih dawn hi.

Kan zawh fel hnu chuan thingpui kan intir leh a, kan pu berte chuan kan hmunhma vel chu nuam a ti ve ngang aniang, thla a la deuh sek mai.

“Mam, kan titha  in I hria em?”ka bula arawn thut chuan ka lo ti a.

“Nangmah chu awm lo la chuan pakhatna in ni ang”a ti leh kher nih chu, a la nui duh miah lo zui.

“In pu hi kherh ta che I va mawl tak”a ti leh zat a.

“Ihmaw, ani aia chhelo ka nei alawm”ka tih chuan a ner nang a.

“Khawi lama mi mah kha I nei lo ange”tih pahin ka phone min dil a, “A thlalak min hmuh rawh”a ti leh nghal.

Ka phone chu ka phawrh a, Kima thlalak chu ka hmuh a, a thlir vung vung a.

“A hmel hi a common emai, ka duh chi a ni lo”tih pahin ka phone min pe.

“I chang chuang lo a ka lawm e”nui chungin ka ti a.

Kum engemawzat hnuah kan han inhmu leha, department khatah kan lo thawk reng chu a ni sia, a va nuam ve mai mai tak. Thingpuite an inzawh hnu chuan kalna tur an la neih avangin chu lam pan chuan an chhuak a, number te inpe tawnin inbe zel turin kan inthlah ta a, ka tan hian a tangkai dawn tih ka hre reng, mamawh ka neih hunah pawh ka han chah zel mai dawn a ni.

“Zanin tlai chu kan chau tlang tawh bawk a, ka quarter-ah chaw kan eikhawm dawn nia. Hotel ami ka chah a an rawn dah ang, tumah buai ngai lovin kan lam tlaivar dawn nia”Zoa chuan kan awmkim laiin a ti a, kan lawm aniang kut kan beng dar dar mai.

*Dr Zoa POV*

Mahni in lam panin kan haw thla dam dam a, Feli hlim hmel hmuh hi chu a va nuam tak. Amah a special em em na chu engtiklai mai pawh hian hlim hmel a pu thei reng a, tute pawh hlim tak hian a be thei vek. Keimahni min rawn dawrtu kum lam upa te leh thil kalhmang hre lo ve tak takte pawh hi zaidam takin a lo hrilhfiah peih te hi a mizia ka ngainat em em chu a ni. In ka thlen hnuah ka phone ka en chu Mali miscall leh message a lo awm reng.

*Zo, chaw ka rawn ei dawn nia*

Ka call nghal a, zanin tlaiah chuan a rem loh thute, ka nauteho nen chaw kan eikhawm dawn tih ka sawi a, mahse min hnial leh nghal zat.

“Ka hnawhsak viau dawn em ni? Rawng pawh ka lo bawl tawh hleinem, ka eikham veleh ka haw mai dawn nia”a ti ta tlat, ni tawh mai teh se. Mahse, khua ami te zawng zawngin kan la inngaizawng anga an hria hi chu ka duh lo tak zet  a ni.

Ka inbual zawhah ka room ah ka inthlak mawlh mawlh a, inthlak turin an haw hlawm kha a nia, athen chu an rawn thleng tawh a niang an rawn ri nak nak mai. Kawngka a ri rak a, Mali a rawn lut.

“Ka rawn chhuak dawn, lo va chhuak rawh”ka ti bul nghut a, ka lung awi lo tih ka lantir hmiah.

“Zo, helaia ka rawn awmchhan hi haider suh, tihhlawhtlin ngei pawh ka tum”zam miah lo hian min melh kal a.

“Hetiang hian awm suh, awmzia a awm chuang lo ang”min rawn ban a tum chuan a kut chu ka lo thehsawn a.

“Engvanga hetianga i rilru hi danglam tlat nge a nih? Kha leh chen kha rilru dang pu miah loin kan awm a, tuna taka hetia I awm hi ka hrethiam thei lo”beidawng zet hian a ti a.

“Chhuak phawt ang”tih pahin kalpui ka tum a.

“Min khawngaih miah lo em ni”a tap titih der, tum dang ang chu nise ka kuah anga, ka hnem ang. Mahse, tunah chu chu ka ti anih chuan beiseina a nei leh anga, beiseina siamsak ka duh tawh si lo. Hmeichhia te hi mipa aia nem zawk an ni a, tihnat hi ka duh loh ber thil a ni thin, keipawhin danglam lo ila, hlim tak khan la awm thei ila tih chang ka ngah ve mai, thinlung hi a lo danglam thei miau si a.

“Nakinah I lo chhuak ve mai dawn nia”tih pahin ka kal a, hetiang ringawt chuan a dik dawn lo tlat. Ka chhuah dawn veleh min rawn zui leh ang lawi a.

Kan chhuak chiah chu sitting room ah Feli a lo lut chiah, chutia room atanga hmeichhia nen han chhuah chu mak a ti ngawtin ka ring. Min melh zawk a, a bag a dah a, a kalsawn leh daih. Koh let a, insawifiah chu ka duh, engvanga chu chu duh ngawt nge ka nih pawh ka hre chuang lo. Rilru nuam lo angreng takin ka awm run a, Mali awm vang chu nge ka nauteho chu an phawk vak lo. Mahse, mi â a ni bik lo a, a sawi ang ngeiin a chaw eikhamah a haw ta a, thlah turin min beisei viau na a Nunpuia ka thlahtir. A haw hnu chuan kan boruak pawh a nuam chawpchilh nghal mai a, pawnah a thenin chair an thiar chhuak a, ka guitar la chhuakin kan zai tan a. Kan boruak pawh a nuam chho dawn viau e. Thingpui hang te kan inzawh hnu chuan guitar chu midang ka pe a, Feli bulah ka thu a, kan zai tan leh nghal. A phone a rawn en zek zek chuan ka lo melh ru hram a, Kima call a dawng a ni ngat ma, ka lo thik nghal hlur. A tho a, a kalsawn hlek a, a chhang ta a, ka lo en reng. Rei vak lo hnuah a rawn thu leh ta a, ka hlim veleh ta. A mak ngawt mai, min duh ngawih ngawihtu ka duh ta lova, ka hnawl a, ngaihzawng nei tih ka hriat reng ka duh leh tlat a, keimah ang hi engzat tak awm ve ang maw?

“Sir, karleh lam chu ka haw chho ve lawk dawn mi ka ti deuh a, kan inthar kan luah tawh dawn a, ka nu ten ka awm ve theih an beisei deuh a”a tih chuan ka kiai suk a.

“Kan sawi tha leh dawn nia, haw lawk ka lo tum ve tho a, chhoh rualte kan tum anga”ka ti a, ka pa min chah angin haw lawk chu ka lo tum sa ve reng reng a, ka nau chungchangah chhungkaw inhmuhkhawm a ngai ni awm tak a ni. Kayakalp buaia kan buai avangin chu lam pawh ka hawi thei lova, ka hman hun min nghaka ni mah tawh zawk. Ka ngaihtuah phak miah loh Feli nena Aizawla haw rual chu a theih maithei a nih hmel, ka phur nghal zak mai.

Thawhlehni a ni a, Aizawl kan chhoh ni tur a ni. Zing chhuah ai chuan chaweikhama chhuah law law ka duh avangin Feli pawh a thiannu te inah chaw a ei tih ka hria, ka hman veleh a thenawmte inah chuan ka sawm a, ani pawh a lo hman fel tawh. Cham rei a tum lo bawk a, bag pakhat zawng a keng. A hnungah a lut fel a, kan tlan chhuak zui nghal. Mama hi a tlan chak thin a, keimah nen kan nih hi chuan pawi ka ti vak lo. Tun tum erawh Feli a tel ve a, a hma atangin tlanmuang turin a hrilh sa a, a tir lamah chuan a tlan chak bik lo. A rei telh telh a, a tlan chak telh telh a, Mamit kan pelh atang phei chuan Feli chu a rui deuhin ka hria. Tukverh ah a dak a, front glass atang chuan ka melh leh zeuh thin, Mama pawh a inthiam vak lo aniang, a ngawi roh roh.

“Feli, din lawk I duh em?”ka ti a, Mama chu ka dintir a.

“Aw, pawi I tih loh chuan sir”a ti a, a chhuak nghal a. A va chhuak hman tawk a ni ber e, tisawna harh huai tawh ang chu.

“I speed hi a chak mah mah thin a”Mama bulah chuan ka ti a, nuam lo a ti ang tih ka hlau ve tho bawk si,mi hauh lam hi ka thiam zawng pawh a ni lo e. Tui bottle chu kengin ka va pan a, tui chu ka pe a, a hmai a tai hlar mai.

“Pawi ka ti lutuk”a ti tham chial a.

“Hrehawm ti suh aw, chuan fuh loh tumte hi a awm alawm”ka ti a, kan chhuak leh ta. A muhil lai chu ka han thlek leh thin, chutia a muhil thei chu ka lawm ru hle bawk. Keipawh ka lo chhing ve a aniang, phone riah ka harh a. Ka phone ka dap a, ka lo ak reng si, ka ke zawn chu ka zu bih a, phone a lo let reng. Ka lakang a, phone ri a tawp chiah. Phone wallpaper ka hmuh chuan ka nuih a za ru hle, kum hei zet hi a ni ve tawh a, Korean mipa thlalak te a la lawm em em chu a ni sia, ka va hawi a a lo la mutui bawk a, tiharh lo law law mai ang.

*Comment hian min tiphur deuh ber, comment a awm that loh chuan a ngaihnawm loh aniang tia tui loh hi a awl ve lutuk ania aw u)