IRRESISTIBLE- II

Two

Kima pawh Aizawl lamah a let tawh a, kan inbe awl lo a, keimah ai mahin a lungleng zawk niiin ka hria. Mahse, chu chuan min ti hlim veng veng. A chhuk dawn tlai kha ka mitthlaah a cham reng, ka duh lo chung an upa ber U Ziri te inah min lenpui a, nau neih lama harsatna a lo tawh hrep tawh avangin kan inhre tha a, kan innel viau bawk. Ka len na chhan a hriat erawh chuan ka lai ve tak zet a, a nau nen chutia kan inkawp chu a lawm hle tih a sawi te chuan min ti lawm ru ve lutuk. Ka hnial chiam chungin chaw min ei luihtir lehnghal a, ka puar leh puar loh kha tun thlengin ka la hre lo.

“Feli, ka nau hi I hriatthiam a ngai viau dawn ania, hmeichhe pahnih kan pian hnua mipa piang tih takah nu leh pa leh u te atchilh rawn hi a ni ve a, a sual ve zeuh zeuh maithei ania”U Ziri chuan a ti a.

“A teuh lo, min duat ngai miah lo ania, hlawh ka neih tep tawh a ring a, min tlawn mai mai anih kha”Kima’na tih chuan a u chuan a melh rum ngang mai.

An unau inkawmngeihzia leh inpawhzia chu hmuhmawm ti zetin ka thlir a, an hnaiah ka awm thei chu vannei pawh ka inti. Chaweikhawm hnuah rei vaklo kan thu a, kan haw ta a. Ka inah rei tawk tak leng lehin a tuk zinga kal tur anih avangin inngai leh inthlahlel tak chungin kan inthlah ta kha ania. A hmel chu chiang takin ka mitthlaah a rawn lang a, a nuih zawnga a biang veilama biangsum rawn lang kalh zel chuan a ti lang tha zual. Amah hrim hrim hi hmeltha vut tih tur a ni hauh lova, a hang hret em aw tih tur a ni na a chu aiin ngo ta se a inhmeh ka ring chuang miah lo. Kei hi ka te chhe hauh lova, ft 5’4 a sang ka ni a. Kima lakah erawh ka lang lian lo hle. Ka rin dan chuan ft 5’11 vel a nih ka ring. A cher lova, a thau bawk lova, a sa a inphut mawi tawk em em a, a dar hlai pharh tha zet chuan  amah a tilang chhe lo zual a, ka chhuang ve tih hian amah ka sawifiah ber awm e.

Ka hna atanga ka haw tur chu kan doctor chuan min rawn ko let leh a, a haw daih tawh emaw ka tih kha a lo haw lo a nih awm chu. A office lam ka pan a, a hmel chu  a ngui deuhin ka hria. Tumah midang ka hmu tawh bawk siloa, mak ka ti angreng viau.

“Ka haw tir vek tawh a”ka ngaihtuahna hria niawm tak chuan a lo ti a.

Ka lu chu ka bu nghat ringawt a, inleng thutnaah chuan ka thu a.

“Fel, ka insawn dawn a”a tih chuan a mit ka va melh nghal a, fiamthu engmah a lang lo.

“Engati tehthut nge? Enge a awmzia?”tiin ka bangbo kher mai.

“Min luahlan dawn a”a hmelah chuan a lungawi lohzia a lang chiang viau bawk. “I hriat angin helai hmun hi kan khua ang main ka en tawh a, ka post hmasa ber a ni bawk a, ka awm tirh vel ka ngaihtuah phei chuan hma an sawn tih hairual a ni lo. Keimah vang vek chu ka ti lova, mahse theihtawp chhuaha sorkar ka nawrna leh khaw mipuite min puihna vang liau liaua tun dinhmun thleng hi kan ni ve a. Transfer pangngai tak chu nise ka la na miah lovang, kei aia thil tithei zawk awm avanga ka kuhmuma rawn par tum hi ka rilru tina bertu chu a ni”a ti ta .

Ka thin a lo rim ve hlur, hetiang mi hi ka huat ber an ni ang. Keini pawh kan naupanlaiin ka pa hi hetiang ang deuh hian a lo awm ve tawh a, thingtlang pil ril zetah kan awm phah a nih kha. Ka thin chu a lo tawt ve ut ut a, kan pi rilru tur pawh ka hriatthiampui khawp mai.

“Tunge rawn awm tur chu I hria em?”ka tih chuan a bu nghat a.

“Kan junior a nia amah chu, mahse a pa avang hian kei aiin a nghet hma daih zawk a, a pa chu kan department-ah hian a thu ber a ni tawh.”a tih chuan ka lo meng phar deuh awk a.

“Dr.Thanzuala fapa maw?”ka ti a, kan hna kan interview khan live in kan inkawm ve hrep tawh. Kan pu a ni na a, a felin keiniho min biak danah kha engmah sawisel tur ka hre lo.

“I bulah chuan sawi vek ila, nang chu ka nau ang chiaha ka en I nia, tuna ka chelh tlai chhan che pawh hi midang hriata sawi ka duh loh vang a nia. Tuna a awmna Civil hospital-in Maternal death an neih kha I hria em?”zawi sap hian a ti a, ka hria tih ka sawi chuan, “A thihchhanah khan mawhphurhna a nei ve a nih hmel. A pa in thil a punlun hmain hetah a rawn dah hmak dawn, kei min rawn lan pawh pawi ti lo khawpin”a hmelah chuan thinrimna nasa tak ka hmu bawk.

“An va ti mak ve, ka lo hmuhdanah chuan pa fair tak a nih hmel ka lo ti asin”ka ti a.

A thutna atangin a tho a, a thutna bula tukverh chu hawngin a dak vang vang a, ka khawngaih zawk. Mahni khua leh pasalte bulah pawh awm theilo khawpin a hnaah a tuiin helai hmun hi a hmangaih ve a, chutia mi thil tihsual thup nana an han lan tur chu kei ni ila ka nasa viauin ka ring.

“Chuan I awmna tur  I hre tawh em?”ka tih chuan a rawn inher a.

“Kan pa in ka insawn dawn anih ro ro chuan awmtlan a duh a, Aizawlah ka awm ka ring. Mahni khuaa awm te chu tupawn kan duh veka , mahse chona hmachhawn ka duh vanga helaia awm ka nia, ka chhuak dawn anih te chuan ka duhna ngeiah ka awm ve tur a ni”a ti nghat a.

A quarter lamah kan inzui lut a, khati khawp khan a thinrim a, a in an thlen chuan a nunphung a pangngai leh vek. A nau Mama bula an transfer dawn thu a sawite chuan awihawm loh khawpin a nem a, nichin lawka amah kha  a ni leh tawh lo. Hetiang hunah tak hian kan pi hi ka fak ve thin, eng ang pawhin thinrim ve thin mah se a chhungril hi a nem em em a, tuman kan haw thei thin lo.

“Fel, chaw ei ve rawh aw”a ti leh a, ka lo rin lawksa a ni.

“Ka inthlak ve lawk anga, ka lo chho leh dawn nia”tiin ka in lam chu ka pan san a. Kan pi a insawn dawn tih ka hriatna chuan min ti ngui nghal vek. Kan thawhpui dangte tumah misual an awm lo a, mahse kum lamah tlemin kan lo inthlauh bakah ka awmna a la rei chiam loh avang hian a then chu ka la nel tak tak lo. Chutiang teh nuaih chu a nih avangin nuam ka tihchhan ber awm lo tur chu ui lo thei ka ni lo. Ka inbual fai hnuah a ina chawei tur chuan ka chho ta a, tunge lo awm tur chu ni anga, kan pi anga hrawn nuam a ni ang em tih ngawt ka rilruah a awm.

Kar a liam leh chuan kan pi chu kan thlah a lo hun der mai, a hmel ka hmuh chuan ka tap lek lek mai. A mittui tla lo turin a dang ve hram hram a, a thusawi laite chuan a then chu insum thei loin an mittui an lo hru sap sap mai. Mal leh khawhar dawn hian ka inhre lutuk a, insawn ve daih chu ka chak. Thlahna chawhlui kan ei laite chuan a bulah min awm tir tlat a, a chang chuan hrehawm ka ti zawk thin. Ka la junior bakah ka nihna ka hrechiang a, kei aia senior te mit a kham ang tih ka hlauthawng ru thei hle. Mi rilru tha tih takah engmah lah hi a ngaihtuah ngai der si lo a, ka inthlahrung ru thin tak zet.

“Fel, hrehawm I tih viau chuan min lo hrilh ngei ngei ang che”tiin min chah a, nau ang tak takin min en ve tih ka hriat hian ka tan hian a va hlu tak. Engtikah mah amah ang hi ka hrawn ka ring tawh lo, ka sawi zing bawka Kima pawh hian I u doctor-I tiin a sawi phah ziah nghe nghe.

Kan pi kan thlah fel hnu karkhatnaah chiah Medical Officer thar kan nei ta a,  a hming chu Dr.Zothansanga a ni. Kan pi luahlantu a nih avangin a rawn awmtirh atangin kan ngei ru nghal thum a, tuman sawi chhuak lo mah ila kan rilru chu a inang vekin ka hria. A mitmengte chu a chapo hmelin a thinchhiat hmel si, ka va huphurh tak!

“Feli maw I nih? I hna chanho min han hrilh teh le?”min en miah lo hian a ti a, a dawhkana lehkha chu a bh ngar a. Ka hna pangngai bakah kan piin report min khawihtir thinho ka sawi chuan a ban chu a rawn vai vut a, “Chung chu I khawih tur a ni lo tih I hre lo em ni?”a ti. Ka mitah chiang zet hian min melh a, min hmuhhniamna chu ka va hmu thei nghal.

Ka room-ah rilru na zetin ka thu a, keimah chauha ka awmlai a ni kha ka vanneihna awmchhun   a ni awm e. Khatiang em em a min hmuh hniam kha a tulna a awm lo, ka telloin engkim a tithei bik lo chiang emai. Zanah kan pi chu ka bia a, ka mittui a tla vel.

“Fel, Zoa chu a sual hran hauh loa, mahse tawh hi a khirh ve ania, I dawhtheih em kha nang chu, reiloteah ngaiah I nei ve mai ang”tiin min rawn fuih a. Ni e, ani vang mai maiin ka tui berna ka hna thawh hi ka hnual ngawt lo ang tiin ka infuih ve sauh sauh a.

Ni li lek chawlh neiin Kima a rawn haw a, awm rei dawn lo mah se ka hlim ve em em tho. A rawn haw lai chu Bial inkhawmpui neihlai a ni kher kher bawk si a, zaipawl a awm zel bawk nen duh ang pawhin kan inkawm tha hman lo. Sunday ah phei chuan kan inhmu tha hman dawn lo takngial tiin chawhnu inkhawm chu kan tlanbo tawp. An huanah min lenpui a, an huan nawmzia chu ka ngaihtuah phak bak a ni. Terrace awmze nei vekin an siam a, chungah chuan thlai chi hrang hrang an tuh a, green house lian em em a awm bawk a, a chhungah chawhmeh hrang hran a awm tuar bawk a. A thlang berah tuikhuah a awm a, sangha an awm teuh bawk.

“Ka lo haw leh hunah dil hi sah a hun chiah anga, sangha kan man dawn nia”a ti a, ka chak tawh lutuk.

“Kan doctor thar hi ka ning e”ka tih chuan naupang chhia min tih hmel zet hian ka samah a chul a.

“Mi zawng zawng hi an inang thei lova, a then chu pawnlama fel deuh, chhungril kha deuh an ni thei. A then erawh chu pawn lam landana khak hmel deuh, chhungril erawh ngilnei zet an lo ni thei bawk a. I hriatchian hma chuan sawi tawp lo la aw”a ti dam leh thlap a.

“Min hmusit alawm”ka ti nghal phat.

“A hmusit che emaw I tih vang vang mai a nih kha. Dik tak chuan, hna enkawl dan hi a inang vek bik lova, in pi hmasa tihdan kha a tha vek bik chuang lo a. Administration a felfai dawn chuan thil tam tak hi thlak kual a ngai ve fo thin a, chu chu I hriatthiampui hram pawh a ngai ve dawn a”a ti leh ta a, mi thiam nge nge thil an lo thlir zau deuh e.

Kan haw kawngah chuan ka tum loh deuhin kan pu chu kan tawk a, kawngsirah silai a lo keng a, sava a veh a ni ngei ngei ang.

“Sava veh an phal si lo a”ka ti sap a.

“Kan khaw inkaihhruai dan a la hre ve vat mai ang”Kima chuan a ti a. Amah vek chuan, “Thil hrilh tur che ka nei maithei”phur hmel deuh hian a ti a, ka beng a za nghal vek.

“I sawi nghal dawn lo mi?”ka lo ti a.

“Ka la ui deuh a”

Ka va ngei mai mai tak, ka tum nghal hmuk.

“Tak takin ka hna tur a fel tawh a..”a mitsirin min rawn melh a. “Mamit college-ah”a tih chuan ka te nghal tung. “Chuan, ka vanneih lehzelna chu ka lehlang thei dawn a, kan awmhran a ngai tawh dawn si lo a”a tih phei chuan ka hmai chu thli chhem theih turin ka dak chhuak hial.

Ama hnen atangin thil hriat hi chu ka nei tam vak lo ngai lova, min hrilh bak hi ka zawt ngai lo bawk. Mahse, ka putea fapa nen hian an lo in batchmate thin a lo ni a, a hnen atangin ka hre nual. Net an exam tum pawhin an batch ah amah chiah vawikhat exam naa through nghal a awm tihte, a JRF tih thlengin ka hre tawh. 3^rd Semester an nih atangin net hi a exam theih a, an through chuan a thiam bikte chu an JRF thin. A vanneih chuan kuminah hian a research pawh zovin doctorate degree a neih hman an rin thu a sawi bawk anih kha. Chung ka ngaihtuah lai chuan ka nui ru sak a, ka chhuang ve ngawih ngawih.

Rei awm theih hek lo, inhmuh leh vat intiam chungin kan han inthlah liam leh ta phawt a, tun tum chu inhmu lo vang vang tur kan ni lem lo bawk a, a hma ang em emin hrehawm ka ti ta lo. Hetih hunlai hian kan hospitalah staff thar kan nei a, hun engemaw chen BAM (Block Account Manager) kan neih loh hnuah kan nei leh ta. Lalnunpuia a ni a, keimah ang rual vel a nih ka ring. Aizawl khua ve tho a lo ni a, inhre ngai lo mah ila kan inrual tawk em avang chuan ka hlim ve tawp.

“Fel, zanin chu ka in luah turah ka awm tawh dawn a, min lo pui ve la”Nunpuia chuan a ti a. Nilenga kan awmdun takah chuan kan innel ve nghal mai a, amah a tawng duh phian a, a nelawm hrim hrim.

“Nia, ka lo tum ang aw”ka ti ve mai a.

A thutna tur a la fel chiah loh avangin ka room ah chuan a rawn thu nileng ve zak a, kan pu lahin engmah a sawi mang bawk siloa, a dinhmun a ti laklawh vek tih ka hria.

Zanah chuan ka va pui ta nge nge a, a rawn thlen tirha a rawn belh ve ber kan VCP te chhungkua in an rawn pui bawk a, a tawp thlengin an awm ve ta lo. Kan tihfel hnu chuan veranda ah thingpui in pahin kan thu a.

“Fel, sir chu a va strict hmel ve”a ti a, ka lo khi suk.

“Nang aiin karkhat vel chauhin a lo awm hmasa a nia”ka ti a.

“Ehe, I la hrawn rei bik lo hle mai”a ti tha ve mai a.

Kan thingpui inna no ka seng zawh chuan min thlah haw a, a tlai deuh tawh avangin rawn leng lut turin ka sawm duh ta lo. Mahse, a tuk zing ka tho chu Duhawmi a rawn lut vat a, Nunpuia chanchin min rawn zawt nasa mai. A lo star tih ka hre nghal mai, ni e, Nunpuia kha tlangval hmelchhia a ni tlat lo.

Office ka thlenin Nunpuia chu a lo thleng tawh a, a thutna tur a la hriat loh avangin ka room ah bawk a lo thu. Kan room ah hian kan Health Supervisor Pu Zaia nen chiah kan thu a, kan room kaltlang zel hian OPD a awm a, chumi piahah kan pu ber a thu thung. Nurse duty room hi a thlang berah a awm a, thawk tam viau lo mah ila mahni thutna hmun theuh nei kan ni bawk a, kan pu thu loa mi thar thutna lo buatsaih kha kan hreh ru vek a ni ber. Chawhnu lamah kan pu in min ko a, ka va luh chuan kan nurse senior Pi Mabuati a lo awm ve a.

“Hei hi engati nge reporting format dik loa I thawn?”tih pahin lehkha pakhat hi a rawn pawt parh a. Ka en ngial a, eng  nge a nih ka hre miah lo.

“Sir, kha chu ka khawih ngai miah lo”ka ti a.

“I khawih leh khawih loh pawh I hre lo a maw? Nangmah lo chuan heng hi an khawih si loa, eng nge I khawih ber tih pawh hre lovin I lo thawk char char tihna a nih zawk hmel. I report khawih zawng zawng ka hnenah rawn dah vek rawh”a tichang rat a, min vin miah lo mah se min vin ai pawhin chu chu ka la na zawk.

Ka almirah chu ka hai rak rak a, kan piin min khawih tir thin zawng chu ka la chhuak a, ka chan ve ho hi chu ka thiam em em loh pawhin ka hrechiang ve hlawm viau a sin maw le. Ka hmel landan chu Nunpuia’n a lo hai lo, zawhna min zawh hmain pu room ah chuan a lut leh vat.

“Hengho hi kan pi min khawihtir thin zawng chu”tih pahin file ka dahkhawmna chu ka pe a.

“Pi Mabuat, nangman khawih tawh ang che”mi pawh en loin a ti leh hmuk.