IRRESISTIBLE- III

Three

*Thla khat a liam hnu chuan*

Kayakalp intihsiakna kan hmachhawn leh dawn avangin kan buai thei em em a, a hmain kan hospital hi kan lo che tha tawh bawk a, tutepawh kan phur hlein a hriat. Chutihrual erawh chuan kan hna a pangngaiin thawh a ngai reng tho a, indaih a harin District lama kan hotuten hna an rawn dah thulh chuang si lo, kan chau ve thei hle.

“Fel, zanin chu I inah hna ka rawn thawk dawn”Nunpuia chua a ti a.

“Nia, a pawi hleinem. Kan inpui tawn dawn nia”ka lo ti ve mai a.

Kan pu room bul chiahah thutna a nei tawh a, an inhmu thei lo na in a uap natzia ka hriatpui a, ka khawngaih. Record bu a siam vek a ngaih avangin mahnia tih atan chuan a tam a, puih pawh ka hreh hran lo. Kan haw dawnah hming sign tir a ngaih avangin pu room ah chuan ka va lut a, phone a lo la hman avangin chhuah leh mai ka tum a. A kut chuan min hui a, ka nghak leh ta zawk. A biak zawh hnuah min rawn en a, ka thil ken chu la in a sign nghal mai a.

“Nunpuia kha I lo pui ve dawn nia. Zanah ka inah lokal ula ka enpui cheu a ngai dawn a”a ti tha ve mai a. A in ber khera kal chu ka peih lo viau na a ka sawi lang lem lo.

Chaw ei khamah muang changing ka insiam a, khua a vawh deuh sur reng avangin ka inha lum a. Nilengin Kima nen kan inbe lo, a hna a zawm dawn avangin Mamit lamah nihnih a cham tawh a, tunlai chu kei ka lo buai bawk nen kan inbe tlem angreng. A number chu ka hmetchhuak a, ka han call a. A pickup thei lo, miscall a hmuh chuan a lo tilet ve mai ang. Nunpuia’n min rawn sawm a, kan pu in lam pan chuan kan inzui hnak hnak a.

“Fel, tinge hetah I awm peih zawk a?”a ti a.

“Aw, ka hna hmuhna hmun ania, ka thawh loh ten”ka lo ti a.

“In harsat hmel vak chuang si loa, mak ka lo ti deuh mai mai a.”a ti a, “ A thuhrimah enge min hrilh tur I neih chu?”a ti a. Chhunah khan thil hrilh tur ka neih thu ka sawi lang tak e, Duhawmi nen tihpui ka tum a, a rilru enchhin vel phawt kha ka tum a nih tak kha.

“I rin loh daih ka zawt dawn che nia, bialnu I nei em?”ka tih chuan a nuih a zat hmel.

“A mak tehdaih ve”tiin a nui suk a, “A chhan sawi phawt la”a ti a/

“Duh deuh tu che ka hria  a, mahse, bialnu I neih chuan ka sawi lo ang”ka ti a.

“Ka hriat chakna leh hriat chak lohna a inzat vel”

“Anih chuan hre lo mai rawh “ka lo ti nghal.

“Bialnu chu ka nei a, mahse kan chiang lo lutuk, on - off relationship kan nihna hi a rei tawh lutuk a, hna ka rawn zawm dawn khan kan inbe tha lutuk. Ka rawn thlen hnuah a reh leh daih bawk a, ka hrethiam lo lutuk. Mahse, hrilh chuang lo la”a nui a.

“Ka hrilh vek dawn”ka tih chuan a lu a thing a, “Min inhmelhriattir ve hrim hrim la, kan inkawm chho ve ang chu”a tit a nge nge.

Chutia kan titi chhung chuan kan pu quarter chu kan thleng nghal mai a. Kan luh chuan bathroom atangin a rawn chhuak chiah a, towel a bat a, sitting room lamah thu tura min tiin room lamah a lut ta nghal a. A inchhung chu a felfai thlap a, mipa mahnia awm tih a hriat loh, engkim a inrem fel thlap a, ka in hi ka enkawl uluk ve viauin ka hria a, engtik laiin nge hetiang teh thap hian a enkawl hman zawk. Ngawi rengin kan lo nghak a, min hauh vak loh pawh hian kan ngaina lo laklawh a, a awm tih kan hriat hi chuan kan kimki ve hrim hrim.

Lehkhabu a rawn lachhuak a, Nunpuia bulah chuan a thu nghal a.

“Heng hi kum hmasa lama an lo siam tawh ania, siam that duh ka nei nual a. Hei hi Felin’n lo bel vek se”tih pahin ka hna tur min chhawp nghal a. An thutna lo lam zawkah chuan ka  thu a, inhrilhfiah pahin anni pawh an inziak nghal mawlh mawlh a.

Ka ngaihtuah mai mai a, Aizawlah mahni in atanga nuamsa taka thawk thei reng, helai hmuna a rawn awm peih chu mak ka ti. Kan pi hlui, Dr.Manuni sawi kha ka hrechhuak nghal zat, maternal death chungchangah tel ve na a neih avangin a pa in a hming hliau loh nan hetah a rawn dah tih a sawi a nih tak kha. Ka va melh a, chutianga buaina tlansan duh tur hmel a pu pawhin ka hre lo. A thu a duh a, a huaisen bawk a, chhan dang a awm ka ring ta mah zawk. Kan pi pawh khan a lo hre fuh lo te pawh a ni maithei asin. Thla khat vel chauh la inhrawn mah ila a mizia tur ang tlang pui chu ka hre tawhin ka hria.

Thinpui kan inchhung kan chawl tih loh chu kan bur ngar ngar a, dar 10 rik dawn tepah chuan kan duhtawk ta rih, ka ham deuh bai bai a,  Zoa chu a lo nui ri huk( Zoa tih hlirin kan ziak tawh mai dawn nia, kan M.O/pu tih reng chuan a ngaihnawm dawn loh). Ka va en chuan min lo la en, a nui lai ka hmuh vawikhatna a niang.

“Mahnia awm chu I hlau miah lo mi?”min thlah tura a rawn chhuah ve pah chuan a ti a.

“Hlauh tur a awm hleinem”ka lo ti ve mai a.

“Naktuk bikah chuan report buaipui ngai I nei nual a, chu lam chu I lo buaipui dawn nia. Nunpuia erawh khawdang I hawi thei rih lo ang”a ti a, kan bu dun nghat nghat a.

“Sir chu a mizia tha lam chu a tha tho sia, office ah hian a inla zahawm duh ve aniang”Nunpuia chuan a ti a, keipawhin ka lo ngaihtuah.

“Mihring mizia inhriatchian hi a har ve bawk em a ni”ka ti ve a, Kima thusawi kha ka hrechhuak zawk. Mi tupawh kan hriatchian tak tak hma chuan an chungchangah ngaihdan siam vat loh tur a ti anih kha.

Ka inbula car lo ding reng ka hmuh chuan ka ding dat a, Nunpuia chuan min en a, a ngaihna a hriat loh hmel. Kima rawn chhuak mek chu ka pan nghal nawk nawk a, ka hlim bawk si, Nunpuia a awm tih pawh ka hre tawh lo. Min hmuh chuan hahdam huai hmel hi a pu a, ka va kuah chawt a, a nui nghawr dat. Chutihrual chuan Nunpuia a awm tih ka hrechhuak chawpchilh a, Kima ka vawnna chu ka thlah nghal hmak.

“Mangtha aw”Nunpuia chu a nui vur vur a, phur hmel fe hian min kalsan ta a.

“Awi, ka zak lutuk”tih pahin Kima chu ka chum a.

“A mak ka ti reng a ni”a la ti duh lek zui. Inchhungah kan inzui lut a, chutia ka rin loh deuha a lo haw chu ka la hamhaih reng.

“Ka call I pickup thei siloa, ka rilru hah hmanzia chu”ka ti a, thingpui lumsak tumna gas awman lam ka pan a. Ngawi rengin min zui a, ka hnung lam atang chuan ka kawngah a rawn kuah a, ka lo phu zawk lehnghal.

“Tian awm lawk ang, ka awm chak dan ber a nih hi”a ti a. Rei vak lo hnuah ama lamah min kuai her a, a mitmeng chu en thei turin min kuai dak deuh a, “Ka ngaihzia che hi I hmu thiam em?”a ti sap a. Ka nui sak a, ka biangah a kut pahniha dawmin thlahlel deuh hian min fawp vawng vawng a.

Ngaihzawng nei ngai lo ka ni bik lo a, kan training lai pawhin kan sir pakhat phei chuan tih takzet hian min ngaizawng ve thin. Mahni aia upa fe kha kan inti ten chiam thin a, ka training chhuah hnuah pawh min rawn bawhzui na in hlawhtling ta lem lo.Ka sawi tawh ang khan pian nalh hi ka ngaisang a, taimak a ngaihzia ka hriat miau avangin. Keipawhin theihtawpin ka taksa hi ka uluk ve a, insawizawi ka ngai pawimawh em em bawk. Tun hun thleng hian pian mawi ve tawk tak ka la nei niin ka hria. Cher erawh ka duh miah lo thung a, ka cher viau ngai lo. High school ka kal laite, higher ka kal laite pawhin ngaihzawng chu ka nei ve reng thin a, mahse han duh ngawih ngawih ang kha ka la neih ngai loh avangin ka tan chuan Kima hi danglam ve thlawt.

“Ka ngai tawh lutuk che a, naktuka rawn haw tur pawhin ka nghak thei tawh lo anih hi. Ka rawn thlen khan I in a lo inkalh deuh khap bawk sia, ka mangang hman deuh a, mahse ka din rei hmain in rawn lang ta hlauh a, information ah ka lo autir hman tep a  ni”a ti fiamthu a.

“I lo haw a ka mood pawh a dik tawh”ka ti a, a hlim hmel ve tak zet.

A tuk atang chuan Nunpuia chuan min chhaih zuk zuk reng a, midang hriatah chuan min chhaih duh bik chuang lo. Zan lama kan chunga a fel tehreng nen  Zoa chu a ngawi leh hmuk tawh a, thingpui in zawha file ka putup lai pawhin min melh leh duh tawh lo. A mizia a mak lutuk, ka hrethiam dawn lo aniang. Ka din reng laiin a phone a rawn ri a.

“Min rawn be tawh suh”tih pahin phone a dah hmuk, ka meng zau kawk a, midang awm lai ema chutia rawn betu a ti chu ka haw hle. Tunge tih hre lo mah ila ka lo khawngaih ve ringawt, ka buaina tur ni miah lo mah se a mizia midang ngaihtuahna nei lo zet hi ka hua.

Kima nen ka khaikhin lo thei lo, mipa theuh theuh an inang lo hle mai tiin ka room a ka awm hnu chuan ka ngaihtuah roh roh a. Ka lo buai ve na tur a awm lo tiin ka lu chu ka han thing nawk nawk a.

“Ka haw dawna, pawimawh a awm chuan inah in rawn kal mai dawn nia”kan IV grade Pu Thanga bula a sawi lai chu ka lo hre pha a, kan roomah a rawn dak zawk a, engemaw sawi tum niawm tak hian a ang deuh zuau a, engmah sawi loin a chhuak tlang nghal daih. Vawiin chu a mood a fuh vak lo a nih ber kha.

Kima’n min rawn call a, an huanah a feh tih ka hria a, chawhmeh ka duhzawng min zawh chuan min lo hawn tur ho ka han list leh thlap thlap a. An sangha mawlh kha, man ka chak tawh. Thingtlanga kan awm thin laiin kan man thin a, ka nghal ru phian a, tui chen te kha ka hrat em avangin ka nu phei chuan kan school chawlh laiin ka chhuah hlauin min veng hial thin. Ka thian mipaho nen tuicheng turin dil lam kan pan daih zel a, haw huna ka nu min hau tur pawh kha ka hlau phal lo thin.

In ka thlen hnuah ka inbual a, ka mitthlaah  Zoa  rawn lang ve ringawt. A haw dawn khan enge maw tak chu sawi a tum tih ka hria, ama mimalah harsatna a tawk ni turah ka ngai lui ringawt. Zanah hna kan thawh leh dawn avangin Kima pawh huan atangin a rawn tlang a, kan pu inah hna kan thawk leh dawn tih ka hrilh lawk avangin a rawn leng thei dawn lo tih hriain an in pawh pan hmasa loin tihian a rawn tlang leh tawp. A chawhmeh min rawn hawnsakho chu ka dah fel a, an huan atang ringawt pawh hian sum an lalut hnem ngawt ang.

“In pu chu tlangval a la nih hmel sia fimkhur rawh aw”thingpui in pah chuan a ti a.

“Awi, engvang ngawt chuan maw?”ka ti a.

“Ka hlauthawng tehmai ania, ka chan phah vaih che chuan aw”a ti a, a nui suk a.

“Khipa khi mihring pangngai pawh a ni lo ang, khitiang ang em ema mihring vawt hi ka hre lo”ka lei ka chhuah zuk a, khipa ka tih chu a ka inthlahrung leh deuh, Kima bulah phei hi chuan fimkhur a ngai thei si. Mi zawng zawng hi angkhatin a en vek a, tawngkam mawi lo deuh hman te hi a duh lo tih ka hria.

“Nangmah hi I duhawmzia I inhre bawk si lo amaw”tih pahin ka biangah a rawn piai a.

“Naupang chhia deuh hian min en tawh suh”ka lo ti hlar a.

“Ka va phei tawh ange aw, ka bal bawk si”a ti a, kan inzui chhuak ta a. Pawn kan chhuah chuan  Zoa chu a silai nen a lo chhuak a, min rawn melh zawk a, a kal nghal hmawk hmawk a, Kima nen chuan kan inmelh zauh ringawt a.

Tunah rama kal a tum em mawni le? Zanah hnathawh kan ngai reng sia, hepa hi a awmdan hi a mak thei e. Ka chawei laiin Nunpuia’n min rawn call a, tlai atangin a pum a nuam thei loa, zanah a rawn kal theih loh tur thu a sawi, ka hnual nghal vek, keimaha hna han thawhpui chu ka chak lo em a ni. A chhuak tlai angreng sia,a haw lai pawh ka la hmu lo. Tukverh chu ka melh deuh zauh zauh a, a haw lai awm pawh ka hre lo. Sana ka en chuan dar 7 a lo ri der tawh, muangchangin a quarter pan chuan ka chho a, ka han thlen chuan a lo inkalh bar. Rei vak lo ka nghah hnuah ka haw leh ta a, tihtur kan nei tih a hre ve reng sia, ka ngei tlat. In ka luh hnu rei vak loah min lo call a.

“Engati nge tun thleng thlenga I la rawn kal loh?”vin deuh hlek hian a rawn ti a nih chu.

Ka phone chu ka melh nghek.

Thinrim rilru takin ka chho tau nghawng nghawng a, ka thlen chuan dawhkanah a lo inchhawp hnawk vek tawh.

“Tun dinhmunah hi chuan ngaihzawngte aiin kan hna hi a pawimawh zawk”a la ti zui, insawifiah emaw insawithiam emaw ka tum lo. Ngawi rengin tihtur min pek chu ka ti nghal mawlh mawlh a, min biak loh avangin sawi tur ka hre bik lo.

“Naktuk tuk lehah Aizawlah ka chho dawn a, min chah duh te I nei em?”a hmaa a lungawi lohna hriat tur awm miah lo hian a ti a. A tawngkam dam thlap vang chuan ka lo hamhaih letling zawk.

‘Ka hre mai lo, ka nei maithei”ka ti muang ban charh a.

“Ka awm loh chhungin I hunawlah Nunpuia I lo pui thin dawn nia, ani hi a la thawk tira, puih a la ngai nasa ve a. Zanin atan chuan kan duhtawk dawn nia, chhun lamah I hah si a, a bak chu ka lo ti tawh mai ang”a tit a duah a.

“Sir, ka tih zawhpui thei tho che lawm”ka tih chuan a nui a, “Naktuk atangin kan hnatlang char char tawh dawn a, I la hah dawn chauh alawm. I hahdam theih lai chuan lo indim zawk rawh”a ti ta a.

Ka haw tur chu min thlah a, ngai ka ti lo chungin ka in thlengin min thlah. Kan inhlat chuang lo a, mahse a awmna erawh kan hospital piah deuhah tual zawl nuam lai takah a ni thung. Kuthnung suihin min si deuh thaw hian a kal a, kawr ka hnaih tawh em avangin han tawlh sawn ngaihna pawh a awm lo. Engmah a sawi bawk si lo a, Nunpuia awm lo kher kher chu hrehawm ka tihzual phah. Ka zam bawk si chu lungah ka inchhuih lehnghal, ka bu lawp a, rang fe hian min rawn vuan a, ka han melh chuan a mitmengah engemaw ka hmu zawk, rei erawh a ni lo. Ka kawt kan thlen chuan hmanhmawh deuh hian ka mangtha a, ka lut sawk sawk a. Mihring ka ni a, mi pangngai ka ni ve a, min en dan nia ka hriat kha ka duhdan a ni lo, ka duh lo.

(A thawnthu hi a la kual ve fe dawn ania, in ngaihnawm tihzawng te a ni dawn em? comment lamah te lo sawi ve ula, a ziaktutan a phurawm ve duh a. Chuan fakna milem min click sak hian vawikhat hmeh a tawk aw)