IRRESISTIBLE- IV

Four

Ka hnaa ka kal tur chu ka phur lo, hreh ruk riauna ka nei tlat a nih chu. Kawta Nunpuia lo ding te chu ka ngei ve ringawt, a la nui sawng lehnghal. Population report a hun leh tawh avangin house visit kan ngai dawn a, kan ASHA Pi Zaui pawh a lo thleng der tawh a, thingpui a lo lum peih diam a, kan han in leh rih a. Nilenga chhuah ka ngaih dawn avangin ka lawm ru phian, naktuk lamah Zoa a zin dawn tih ka hre tawh bawk a, chah duh te kha ka nei maithei te kha ka lo tia, engmah ka chah dawn lo. Ka chhuah dawnin office a rawn thleng chiah a, a hmel a lang zangkhai vah a, ka lo huphurh angin engtin a awm ve lo. Kei hi ka a zo tawh anih hi, engvangin nge ani chuan kei hi min endan a dan ringawt ang? Keimah hi ka lo inhmu tha mah mah aniang.

‘Sir, house visit chu ka tan dawn a, kan chhuak mai dawn asin”ka lo ti a, eng nge maw ngaihtuah nei niawm takin a ngawi dat a, Pi Zaui chu melh lehin a lu chu a bu nghat a, “Nunpuia tih tur ho chu I lo chhawp chhuak taw hem?”a ti a.

“Aw, ka pe fel tawh e”tiin kan chhuahsan ta a.

Pi Zaui hi nu valai tak, viak tha zet mai a ni a, a hna a tlin em em a, kan inkawp fuh bawk a, nuam kan ti ve vein ka hria.

“Mafel, tunlaichu kan pu hi a fel ka ti thar tlat a nih chu, biak pawhin min chhang hmuk ta lo deuh alawm”a ti a.

“Ni e, a rilru te pawh a hahdam ve tawh aniang”ka lo ti ve mai a.

Hun a kal chak phian a, kan hun hman ngaihtuahin kan kal chhuak tlem angreng viau lehnghal, nikhat thiilthuah zawh tum loin hahdam deuh hleka tih chu tha ka ti leh ta zawk. Ka rilruah Kima a awm reng, vawiin hi a hna zawm ni a ni a, tuk khawvar hmain Mamit lam panin a chhuak ta kha a nia, office ka kal dawn khan a thlen chiah thu leh nilenga a buai a rin thu a rawn sawi. Engemaw changa rawn haw theih loh hun a awm dawn avangin inluah tur ngaihven law law a tum thu a sawi bawk a, a hman hunah min lo be mai turah ka dah tawp. A hna nei chu lawmna leh lawm lohna ka nei, kei hi ka thikthu a chhia a, dawhtheih ka ngai viau thin. Khawhmuna awm hi chuan ka ngaihtuah hran hauh lo, mahse a hna a zawm tak tak hunah chuan thik tur ka hmu leh nual dawn tih ka hre reng. Ka puitlin theih lohna lam tak anih avangin ka nu pawh hian min hau fo, ka duh ve deuh te nen kan inthen chhan pawh ka thikthu chhhiat vang a ni tlangpui. Mahse, tunah chuan theihtawp chhuah ve hi ka tum, chan mai ka duh bik dawn loh avangin kan inkar a fel lo anih chuan hriatchian phawt ka tum ang.

In ka thlenin khua a thim deuhthaw tawh a, ka chau ve ngang mai. Office a kan awm hi chuan buai deuh pawh ni ila a la ziaawm a, kal chhuah hi chu a chauhthlak ve hrim hrim. Eirawng pawh ka bawl peih lo, ka inbual a, ka mu vel mai mai a. Ka nu nen inbiain ka naute nen kan inbe leh a, sawi tur an ngah thei si.

“A u, changtupa kha anu pawhin chhe lo a ti rap”kan naupang ber Pekpeki chuan a rawn ti zawi sap a, ka lo nui hak a. A thlalak ka thawn kha a lo hmuhtir ve a ni ngei ngei ang,

Ka sawi tawh ang khan Aizawl Venglaiah kan awm a, kan insak kan zo ve tep tawh a, Electric veng atangin kan phei leh tep tawh. Kan naupanlaia kan veng ni mah se nikhua kan hriat tak takah Venglaiah kan awm phei tawh a, chuvangin mahni veng ang tak taka en harsa kan ti deuh, kei chauh ka ni loa ka unaute pawh an ni tih ka hria. Unaua upa ber ka ni a, ka naute pahnih hmeichhia ve ve an ni. Ka nau chiah Tatei kan ti mai a, ani hian B.Pharm a zir mek a, kan naupang ber Pekpeki hi Nurse a training mek. Kan unau hian helam kawng hi kan lo awn tlang a nih ber hi. Ka pa hi sipai pension a ni a, a luh hma avangin a pension pawh hian a la vanglai a, awm mai mai aiah tiin dawr a siam a, a tifuh phian. Ka nu hi middle school zirtirtu a ni a, kan chhungkaw khawsak a harsa lutuk lova, hausa tiha han sawi vak theih kan ni lem lo bawk. Kan mamawh ang leh kan duhzawng kan nei ve thei zel a, vuina kan nei ngai lo. Ka pa hi pa tawng tlem zet a ni a, ka nu erawh chuan a fate min kawmngeih a, a bulah thuruk kan nei ngai lo. Ka thiante pawhin an ngaina vek a, a bula awm nuam an tihdanah hian nu sual a ni bik lo aniang.

Ka chhungte chu ka ngaihtuah zui neuh neuh a, Kima ka lo hlimpui ta lutuk nge ka ngaihtuah chhuak khat chu ka inthiam lo zawk. Ka nu rawn zin tum pawh a ngai ka ti lo leh pek kha a nia, a ngaih a tha lo ang tih ka hlau leh hnukhawh kher mai. Kum 27 na ka hmang chho mek a, kum 5 lai  Aizawl lamah a nghet loa ka thawh ve hnua hna nghet nei ka ni a, ka batchmate te zinga nghet har ber ka ni. Kan batch hnu lam erawh ngheh a harsa ta talh a, kan lo vannei ngawt mai.

Ka sana chu ka han bih a, mut nan a la hma ka ti deuh si a, Duhawmi te in lama len phei chu ka tum. An in ka va thlen chuan chaw an lo ei mek a, ina ka awm kha chuan ka riltam ka hre si lao, an chaw ei ka hmuh chuan ka ril chu a tam deuh tlat. Ei ve tura min sawm chuan an cooker chu ka han en phawt a, chaw an ngah tho avangin ka ei ve ta ringawt. Mahnia awm hrehawmna ber chu hna atanga haw hnua mahnia eirawng inbawl chawp ngai hi a ni ber. Ka nuin chawei loh hi a phal ngai lova, keipawhin theih ang angin chaw nghei loh hi ka tum ve thin. A changa ei peih ngang loh erawh ka nei ve nual tho. Chaw eina kan tih fel zawh hnuah a room ah kan inzui lut a, a khumah chuan ka let nghal huang huang a.

“Nunpuia chungchang hrilh tur che ka nei a”ka tih chuan ka bulah a rawn mu thla nghal.

“A lawmawm lam nge lawmawm loh lam?”a ti nghal a.

“Inkawm nel ve phawt ila a tia”tiin a dang kha chu ka hrilh duh lo.

Duhawmi hi a fel piah lamah a hmel a chhe lo a, a hrisel loh avangin zirna a chawlhsan hma a, puanthui te zirin tunah hian a theih ang angin sum a la lut ve a ni. A kuthnu hi a mawi a, keipawhin ka thui tir ve nual tawh. Mahse, amah hi hrisel lo ve thin tak anih avangin khawl khawih pawh hi an phalsak vak lova, chutichung chuan thahnem a ngai ve a, tuna an insaknaah pawh hian a thawhhlawk ve viau tih ka hria.

“Fel, ti daih ila maw, Kima hi a theih ang angin veng fimkhur rawh aw. Amah hi afel si, a friendly bawk sia maw, an kherhthluksak daih ang che tih hi ka hlau teh mai ania”a ti a, ka rilru ve ang chiah tho a ni.

“Hei bak chuan han tih leh dan tur  ka hre chuang lo ee”ka ti a.

“Khutah inluahtur a zawng nghal tihte ka hria a, loh theih loh ah lo chuan riah tur miah suh”a ti a, a hlauhthawn ve hmel deuhin ka hria. Keipawhin lo haw se, hemi chungchang hi chu sawi thatpui ka tum hrim hrim. Lehlam zawnga ka ngaihtuah chuan ni tin langa kal tur chuan darkar khat leh a chanve leka hla ni mah se a ninawmna chen a awm maithei a, tuna ka hriat chin chu amah hi ka ring ngam ve phawt tur a ni ang chu.

Nilengin house visit kan nei leh a, chau hnawpin ka haw a, kan zo fel ve ta hram chu a nia, ka thaw pawh a veng huai e. Zoa pawh Aizawlah a haw chho a, chah duh ka neih leh neih loh min rawn zawt leh ta mang siloa, han biak vel chu ka ngam chiah loh avangin ka sawi ta lo. Ka nu in eng engemaw min rawn thawn tur a nei nual a, sumo ah an rawn thawn tawh mai aniang chu. Zanah ka mu hma a, ka chau ve deuh nen chaw eiloa ka mu kha ka lo muhil tlang daih a lo ni. Ka phone riah ka harh a, sana chu ka han melh paha, dar 9 chauh a lo la ni.

“Hello..”

“Kawngka hi lo hawng la”

Ka maimitchhing vang vang a, chutah muangchangin ka tho a, kawng chu ka hawng a. Kima chu nui sang hian a lo ding a, nizan atang tawhin a biak tlang theih loh a, ka thin chu a lo rim deuh hlur.

“Lut turin min ti dawn lo mi”a tih chuan a luh theih nan ka lo ding sawn a, chauh hmel deuh hian a thu a. A thut lohna lamah chuan ka thu a, a bula thu tura min tih pawh chuan ka duh lo. Dik tak chuan ho tetea inhauh te, thinrimte hi ka peih lo, mahse tuna mi hi chu vawikhatna a nia, inbe lo tawpa awm hi ka hrethiam vak lo.

“Ka phone a chhia a, hei ka nu ta tunah pawh ka rawn hmang tawp alawm”tih pahin phone a rawn phawrh chhuak a, a ta a ni lo tak tak.

“Chu pawh nise midang phone atang pawhin a theih tho awm sia”ka la ti talh, a nui suk ringawt. Ka bulah a rawn insawn phei a, min kuah hlu hlu a.

“Tunah chuan hei I bulah ka awm tawh tho alawm”a tih chuan ka lungawi chhunzawm ve mai.

“In chu I hmu ta em?”ka tih chuan a bu nghat a, “Luah kher chu a ngai mi?”ka ti ta hram.

“Engemaw changin rawn let a rem loh tumte a awm thei a an tia ka nu ten, keimah phei chuan ngai ka ti lo lutuk. Mahse, an rilru nawmna kha a tha a ni ve mai”a ti a.

“Englo…” sawi zo loin ka ngawi ta daih a.

“Sawi duh I neih chuan sawi la”a ti dam thlap a.

“In thawhpuite pawh nise hmeichhia kawm vak suh ang che”ka ti a, a nui ri hak.

“Aw le, boss in I tih te chuan”a ti a, ka inrin hma in ka han fawp zeuh a, a phu zawkin ka hria.

“Khatiang khan I tih fo dawn phei chuan I thu ka awih ngawt ang”a ti a, min rawn fawp ta vawng vawng a.

*Dr.Zothansanga POV *

Aizawl ka thlen chuan khua a thim tan der tawh, chhuak hma ila chuan hma takah ka thleng thei a, mahse, Feli hmu hmasa lova kal ka hreh deuh avangin a thawh hun ka chang deuh reng a. tukin ataka a tho har chu mak ka ti, tuktin hma taka thoin a walk thin tih ka hrereng sia. Driver Mama chu phone a biain chaweikhamah law law kal turin ka hrilh ta ringawt. Chaw ka ei laiin min rawn call a, office tlawh lova an hna tan min rawn dil a, ka hmu lo takngial dawnin ka hria, office tlawh turin ka ti. Hmanhmawh deuhin ka insiam a, office lam ka pan nghal a, tihtur engmah ka nei hran lo. Tukverhah chuan ka dak chhen a, a tawp a tawpah a rawn kal ta hnak hnak mai. Ka dawhkana paper ka chhawpsa chu ka la a, a rawn thlen veleh ka room a lut turin Pu Thanga chu ka chah a. Reiloteah ka roomah a rawn lut a, a hmel chu a ngui deuhin ka hria.

“Hei hi ka awm loh chhungin in lo buaipui dawn nia aw”tih pahin ka pe a, a thlek vang vang  a.

“Sir, hei vang ringawt hian maw ka lo kal kher a ngaih”tiin a ner nang a. A hmuh lohah ka nui ru suk a, thil min chah tur kha a nei niin ka hria, mahse ka zawt duh lo. Nakinah biak chhuanlam atan ka duh tlat.

“Ka kal tawh dawn a, tha deuhin in lo awm dawn nia”tih pahin ka bag ka la a, ka chhuak ta a. ka va hawi let chuan a dinna ngaiah a lo la ding reng a, ka awmdan hi keimah pawh hian ka hrethiam tawh bik lo.

Chung ka ngaihtuah let chuan ka nui deuh sak a, tunah chuan ngaihzawng a nei tih ka hrechiang tawh a, tih theih ka nei tam hran lo. Helaia ka awm dawn khan ka hna ban hial ka tum kha ania, ka pa vang liau liauin ka zawm a, ka inchhir dawn lo tih staff ka hmuh kim khan ka hre nghal. Lalnunfeli, Health Worker tih a sawi khan ka lungphu kha mak khawpin a rang nghal a nih kha. Chutiang ka ngaihtuah roh roh lai chuan ka room kawngka a rawn inhawng a, Mali a rawn lut nghal.

“I lo haw tih ka hria a, ka rawn tlang nghal a”a ti a, ka khumah chuan a rawn thu a.

“Inhmu tawh lo ang ka tih kha”ka ti hmuk a.

“Zo, I sual mah mah lo maw? Hei chen hi kan inkawp tawh a, enge I hriata hetia inthen I duh tlat hi?”a ti a.

“Ka sawi tawh kha, inkawp tur kan ni lo”ka tih chuan ka thutna atangin ka tho a, tukverhah chuan ka dak tlat a.

Ngawi rengin ka hnungah chuan a rawn bei a, ka kawngah a rawn kuah a, phelh ka tum chuan a tang ve tlat.

“Ka thlah ve thei lo che tih I hria, ka beidawnsan dawn lo che”a ti hmak.

Dik tak chuan Malsawmzuali nen hian kan inkawpna a rei ve thawkhat tawh. St.Paul’s ah kan kal tlang char char a, class xii kan zir kumin kan inngaizawng tan a, a thiante min nawr nasat vang kha ni deuh ber. A hmelchhe lova, a pian a dik a, lehkha a thiam thei bawk. Ngaihzawng ka ngaihsak ngai lova, ka zirlai bak kha ka ngaihtuah ngai lem lo. Chutia min rawn biak ve fo takah chuan ka lo ngaina ve mai a, kan inngaizawng chu a ni chho deuh mai. Kei aiin exam naah a titha deuh thin chu ka tha a na ru deuh thin, board exam ah erawh min tluk ta lo. Chutiang chuan rilru dang pawh inputsan lo khan kan awm chho ta kha ania, MBBS ka zir chhung zawng pawhin ka rinawm lohsan bik lo. Chutiang bawkin a niin Delhi lamah college a zawm ve bawk a, kan zirlai kha kan dah pawimawh dun bawk a, hna zahawm tak kan thawk dun vat reng a ni. MCS a tlin kumah chiah keipawhin hna ka hmu a, kan chhungten kan inneih mai an ring nghal thup. Ka rilru erawh a ni ngai lo thung, Mali hi felin ka tan tling tawk viau mah se amahah hian kim lo a aw, ka hmangaih lo tih ka hria. Vawikhatmah chu thu erawh chu ka hrilh lo thung. Zohmuna ka awm dawn khan ka dineout pui a, tah chuan inthen ka duh thu ka hrilh ta kha a nia. Atan a fair lo ang tih hlauin hmeichhe dang duh ka neih hma in ka then fel. A mittui a tla a, a beidawng dawn lo tih chiang takin min hrilh hmiah.

“Mali, nawr luih chi ka ni lo tih I hriat kha”ka ti sup a.

“I nu leh pa pawhin palai rawn tirh an pawi ti lo, tinge hetiang hian I awm? Innei ila I rilru chu a hma ang khan a awm leh thei mai ang, mawh…”tiin a insut hraih a, ka khawngaih ve deuh. Ka inher a,a dar lehlam lehlamah chuan ka vuan a.

“I rilru tihnatsak tur che hi chuan I tha mah mah a ni. Midang kei ai tha hian an phu che, I nat tak tak hmain min beidawnsan zawk rawh”ka ti a. Ka vawnna chu a thing thla a, a mittui chu a hru a, a kal ta. Ka khawngaih lo a ni lo, ka hmangaih miau lova, risk ka la ngam lo.

Kan chaw ei laiin ka nuin palai kal tir mai a duh thu a sawi leh a, ka ngawi reng. Ka pa em in min nawr lova, sawi ngaiah ka ruat lo. Hmeichhia hi chuan an duh ang anga thil kaltir hi an tum a, inrawlh ve vek tul kan ti lo aniang ka pa nen kan ngawi reng.

“Pa-a, engmah hi I sawi duh lo a, mo ka awhzia I hre reng si a”a ti hlak a.

“A neitu tur berin mamawh a intih hunah chuan a sawi mai ang, a neitu tur I nihloh kha”tih zawngin a chhang, ka lo nui suk.

A tuk nilengin ka Aizawl kal chhan chu ka buaipui nghal zung zung a, ka rilruah Feli a awm deuh reng. Zanah ka bia anga, a thil min chah duh kha hawnsak ngei ka tum.



(In comment te hian min tihlim thin, a plot ka duan hian mitthla ka lo nei ve thin a, chung ang chuan ziah chhuah ka tum hram hram thin a. A chang chuan hmun hmingte, mihring hmingte pawh vawikhat chiah rawn langa lang zui ta lo, a thawnthu tikimtu nisi zeh tel a ngai ve thin tih min lo hriatsak dawn nia)