IRRESISTIBLE-IX

Nine

*Feli POV*

Kima nen kan inthenna pawh thla khat a lo tling der tawh. Vawi tam tak min rawn biak a tum a, ka inah a rawn kal bawk a, ka be thei thlawt rih lo. Khami zan Duhawmi te nen an ina kan va kal khan a rawn let chho tawh lova, a tuk tlaiah a rawn haw chauh, dawtin a pha mar hran lova, ngaihdam erawh min dil nasa. Midang zingah chuan tuar lo ang leh na lo angin ka lang na a, ka thinlung erawh a kehchhe chiang ngang mai.

*Fel, then che hi ka ngaihtuah ngai lo, sawi tha ang*

Vawi tam tak chu thu chu a rawn thawn a, mittui nen a message rawn thleng apiang chu ka chhiar a. Vawi tam a number block ka tum a, tlawm ah ka la bawk si, ka tuar chhuak dawn anih chuan hel nuai ka duh zawk hrim hrim. Krismas a lo hnai tawh bawk nen ka chhungte bula awm theih vat chu ka duh ber.

“Inkhawm turin ka lo sawm che” Duhawmi chu ka room ah a rawn lut a.

“Dawm, min hrethiam la ka inkhawm lo mai ang” ka tih chuan ka khumah a rawn thu a.

‘Hetianga awm tur hi a ni hleinem, i rilru natna hi Pathian hnen I thlen a ngai zawk asin” a ti a, ka sam chu a chul heuh heuh a. A sawi chu a dik tih ka hria, mahse, a harsa ka ti bawk si. Min nghah tlat avangin ka insiam ta nge nge a, biak in lam pan chuan kan inzui chhuak a.

Inkhawm chhung zawng chuan ka rilru chu ka kawm tluan parh, Kima hmel ka hmuh ringawt pawh hian min ti na a, tunah chuan a beidawng ve ta nge ka hre lo, min rawn be tawh ngai lo. A hma zawng pawh khan mawihnaiah min lo be ve a nih ka ring ta hial, hlim taka an awm theih chuan a tha alawm. Inkhawm ban chuan hla zir a awm a, Krismas hla tur a nih avangin ka zir ve lo. Keimahin ka haw a, banah chuan Kima chu ka hmu reng, a nui hmel ka hmuh chuan ka thinlung hi a na veng veng. Ka in ka thlen hma kawng kawiah hian min ko ri ka hriat avangin ka hawi let a, Kima chu thaw hlawp hlawp hian a rawn tlan a, ka bul a thlen chuan hah tih hriat zet hian a kun a, a thaw kawk kawk a.

“Inbe lawk ang” a ti a, ka nui hak a, kal leh nghal ka tum. “Khawngaih takin” tih pahin ka kutah chuan a vuan a, in lam pan chuan min hnuk ta dawr dawr a. A chetdan avang chuan ka hamhaih vek a, tal chhuah pawh ka tum hran lo.

“Bul tan that leh ka duh, khawngaih takin ngaihtuah tha leh rawh” a tih chuan  a hma a hmela inchhirna leh na chu ka hmuhsak ve in ka hria. A tisual ngei a, mahse a hlim miah lo tih chu ka hre thei.

“Ka rin theih che ka ring tawh lo” ka ti sap a.

“I duh thleng min hrem rawh ka nghak ang che” a ti leh ta zel a.

A hma kha chuan engang pawhin ngaihdam min dil se ka ankhum vak vak ang kha ka lo ti ve ania, mahse, hmaichhanah hi chuan a lo har aniang e. Engpawhnise haw phawt tur leh ka lo ngaihtuah tur thu ka hrilh a, hreh tak chungin min hawsan ta. A haw dawna ka chala fawh a tum chuan ka lo thle sawn a, a tum lui bik ta lo.

Ka mut hmunah ka inngaihtuah nasa kher mai, ka lo hmangaih hman viau em ni le? A telloa ka hlim lohzia te, ka ngaih thinzia te lah chu ka thinlungah a rawn lang lian em em zel si, mahse engmaw ho te teah ka ringhlel zel tawh dawn. Hei ber hi ka tawrh theih ka ring lo a ni.

*Karhnih a liam hnu chuan*

Hospital kawtah nilum kan ai a, ka tum dan chuan naktuk hian Krismas hmang tur a haw ka tum a ni. Ka chawlh ka tifel tawh a, kumtharah rilru thar nen helai hmunah hian ka awm leh ngei ka inbeisei. Motor rawn tlan lut mek chu ka lo en reng a, Zoa chuan min hmu ang pawhin a awm ve lo. Ka hauh hrep zan atanga vawiin ni thleng hian mimal thilah kan inbe ngai lova, min hlat tura ka tih angin min hlat theih ang angin a awm zel a, thawk tlang nih bawk si chuan thil buaithlak tak chu  ni e. Ka haw dawn avangin loh theih loha ka hmuh a ngai a, nimin lamah khan ka dil a, tawngkam khat mahin a sawisel lova, min be hek lo. Ka leave min grant sak a, hrilhhai angreng takin a room ka chhuahsan a nih kha. Zanah te hian ka tum loh deuh hian ka lo ngaihtuah leh thin a, ka nat em em laia ka tana a thil tih te kha lawm tur ka nihlaia a tana tlawmthlak thei ang bera ka lo tawngkhum kha ka inthiam lo ve tak zet. Mahse, a nih tur a ni zo tawh a, a thutiam ang ngeiin min tibuai tawh lo chiang hle bawk. A bialnu in a lenchilh nasa a, midang hi chuan an hre lutuk lem lovin ka hria, ka in kaltlang ngei ngei a ngaih avangin ka tan chuan hmuh leh hlawl an awl a, an inthlah tur hi ka hmu fo. Ka lo hau hrep kha a chang chuan ka lawm zawk, tunah pawh tihian bialnu nghet a nei reng a nia, Kima ang bawkin ka chungah a ti lo ang tih a sawi theih loh. Tunah hi chuan hetia felfai taka mahnia awm hi ka duh, Kima pawh nise engmah chhanna ka pe thei lo.

*Dr.Zoa POV*

Vawihnih vel kawngka ka kik hnuah Feli chuan phak chapin a rawn hawng a, min hmuh chuan mak a tih hmel hle. A mit bui deuh lak chu a nuai chat chat a, a tap nasa tih ka hre mai. Min sawm hma chuan ka lut tlang nghal pawp a.

“Sir, zing kar karah enge ni ta?” a ti a.

Amah vangin ka mu tha lo hle tihte hi a hre der mai reuh si lo a.

“I tho har em a, ka ngaih a tha lo a” ka ti ta ringawt a.

“A la tlai loh hi” a bana a sana bunlai chu a melh zeuh a.

“Ka han haw tawh ange” tih pahin ka tho a, ka chetdan chu a atthlak ngawtin ka ring.

Chhunah thingpui in zawhah ka room ah chuan ka ko lut a, a hmel ngui deuh raih hi hmuh hrehawm ka ti. A report form mamawhho ka hawnthlaksak chu ka pe a, ti lui tih hriat zet hian a nui a, ka insum hman ta ngang lo. A chhuak tur chu ka pawt let a, ka kuah ta thlawp a, rei vak lo chu chet pawh che lovin a ding khawng reng. A harhchhuak ta aniang, ka kuahna atang chuan tal chhuah a tum a.

“Tap tawh suh” zawi te hian ka ti a, a mittui a tling nghal pam.

“I tap lai hi ka hmu thei lo ania” tih pahin a mittui chu ka hru a, engmah a sawi lo, ka inrin loh lai chu remchangah la in a tal chhuak phut a, hmanhmawh deuh hian a tlan chhuak ta daih a.

Engtin nge a rilru na ka hnem ang, engtin nge atan ka awm tih ka lantir ang? Hetiang lama tawnhriat ka la nei lo pawi ka tih ber tum a ni hial ang. Ka thiante leh ka chhungten chut lutuk tia min lo sawi thin kha an lo ti dik hle mai, hetiang hunah tak hian a rilru hneh tuma beih nge tha ang a rilru dam hun nghah tih pawh ka hriat tawp loh hi.

“Zo, ka nu in min rawn chah ngun bawk sia ka haw chho lawk dawn sin” Tea chuan a ti a.

Ni e, kan naupang ber tih takah ka nu hian a duatin a ngai em em a, keini hi chu hmundangah kan awm thang a, min ngai lo tihna ni loin ngaihah hian a nei ve a, Tea erawh hmundanga awm ngai miah lo, ka nu thachhangdawltu tak tak anih avang hian han awm tha duh lo viau thin mah se a ngaih ber leh a lam tam ber a ni tho tho. Tunah pawh krismas dawnah chiah rawn haw ang che tia an thlah kha a ni a, thla khat a awm deuh chauh a, an rawn chah leh chung tawh hi.

“Ni e, han haw phawt la, I duh leh I lo chhuk leh anga” ka ti ve mai a.

“Rawn chhuk leh te chu sawi lova lum alawm” a ti a, a nui deuh suk a. Feli thiannu chu thutak pui ve riauin ka hria, kei hi chuan pawi ka ti lem lo. A nun a that phahna turte hi ni hlauh se ka ti zawk. Ka nu tan erawh chuan a ngaihtuah phak ngai loh a nih dawn avangin a lo dawnsawn dan tur ka hre thiam lo. Ka pa erawh pa tha ve tawp, a hnaa rinawm leh dik, chhungkaw tana pa nih tling tawp a ni mai a, engmah a sawisel hran lovang.

Nihnih a liam tawh a, ka nau awm lo ta chu ka khua a har ve vung vung mai. Inbe luam lo mah ila ka bula a awm ve khan min tiphuisui a, ka haw hnua rawngbawl chawp ngai lo ringawt pawh kha a lo thlakhlelhawmzia ka hre thar bawk. Feli chungchangah hian thil tih duh tam tak ka nei a, mahse thianpa Tetea berin a sarhu laia ngawi rih tura thurawn min pek avangin ka ngawi rih a, a harsa lam hret chu a ni. Mali pawh ka chungah danglamna awm miah loin a la awm chhunzawm zel a, Feli rilru ka hneh thei anih phawt chuan a beidawn ve mai ka ring. Kan inkar ka tihtawp hnu pawha min tihbuai a bansan thei lo hi mak ka ti ve deuh thin na a, midang ka neih a hriat bik loh vang aniang tiin ka ngaihtuah a, midang duh ka neih a hriat hunah chuan a inthiarfihlim ve mai ka ring. Ka fel viau hran lo na a, mi rilru tina lutuka tawngkam neih hi ka duh lova, chuvangin keimah hi theihtawpin ka inveng ve thin, ka chaklohnaa ngaia min zuam sual a nih erawh chuan ka mize chhe lam hi a chhe ve viau maithei bawk, chutiang em chu tuman an la tawng lo chuan ka hria.

Chawlhni tlai a ni a, chawmhma ka inkhawm bak chu ka chhuak lo. Kartluanin ka chau ve deuh a, chhuna ka mu chu ka lo muhil daih a, chawhnu chu ka inkhawm ta lo. Zan lama ka inkhawm peih tak leh ka inkhawm tawh mai ang chu. Chaw ei nan a la hma deuh bawk si chu ka tei chhuak mai mai teh ang tih pahin ka chhuak a, Feli chu a inkhawm a nih hmel, a in a lo inkalh thap a. Ka kal zel a, Mali quarter ka thlen chuan tum loh deuh hian ka tei lut nawlh a, chutia ka va lut chu mak ti zet hian min lo en a, keima thua ka luh vawikhatna a ni ngei ang.

“Zo, lo thu rawh, ka lo leng ang ka lo ti mek asin” a ti a.

“Ka rawn vak harh mai mai, thut pawh ka tum em em lo” ka ti a, ka thu tat ho a.

A cold drinks dah vawt raih chu a rawn thli chhuak a, thlasik mah nise chhun lamah hi chuan a lum hiam reuh a, helam boruak hi chu a dang deuh a nih hi. Aizawlah chuan tun angah hian ka thawmhnaw neih lum ka phawrh chhuak deuh vek tawh thin a ni si a.

“Kum tharah Aizawlah ka awm chho dawn a” ngui deuh hlek hian a ti a.

“Tinge hetah I va awm rei leh si lo ve” ka ti a.

“Nia, promotion vang hi maw le. Ka pain ka awm a phal a rei dawn lo lutuk tih chu I hriat kha. Nangmah hi lo awm ve thei daih la ka ti’ a tih zawm leh zat a. Ni e, a pa fanu duat lai a ni miau a, an ruling lai a ni lehnghal, lak chhoh kha a tum hmasak tur chu a ni ve reng a.

‘Kei chu helai hi nuam ka ti a, sorkarin ka awmna tura min ruat a nia, ka awm tluan ang chu’ ka ti duah a.

“Chu, ka pa thiltih chu I va dem awm ve” a ti nghat a.

“Chu chu ka sawi tum a ni lem lo, doctor tha an mamawh a, kei hi he khaw tan hian ka tha tawk a, ka awmna tur dik tak niin ka hria” ka tih chuan a nui var var a.

“I rilru vang hi alawm ka thlah theih miah loh che. Kumthar chu kan inneih ngei theih nan kan chhungte ka sawipui ang” a tih chuan ka ngaihdan a pel ve ta deuh.

‘Mali, ka sawi tawh kha, kan inthen tawh” ka ding hluai a.

“Ka then ve lo che, chuan I nu hian kei lo chu mo neih a tum loh thu min hrilh bawk. I nu duh hi I hlawhchhamtir ka ring lo bawk” a ti a, ka nui ta sak a. Min la hrechiang tawk lo deuh niin ka hria, ka chhuahsan lai pawhin a thut ngaiin a thu reng.

Ka boruak tawn ninawm zet chu ka kham tawk viau, khawiah mah kawi tawh lovin ka haw tlang a, Feli in ka thlen chuan kawng a lo inkalh tawh lo a. Ka hmuh chak avangin han tlawh kawi lawk chu ka tum a, ka rin loh deuhin tukverh hawi zawngin a lo thu a, ka thawm pawh chu a hre lo a nih hmel. Ka koh chuan a rawn hawi chhuak a, a hmel kha ka theihnghilh thei tawh lo ang, chhan ngai hmel hi a pu.

‘A na ang tih chu ka ring, mahse, I mittui kha a phu lo a nia” ka ti sap a.

“I hre ve em ni?” a ti a, a mittui chu a hru nghal tawk a, ka lu chu ka lo bu nghat a.

“A zahthlak tiraw?” nui lui chung hian a ti a.

“Aih, zahthlak loh e. Mahse, hmalam pan tum zawk la ka duh a” ka ti a, han sawi chiam dan tur ka thiam lo. A thutna bulah chuan ka thu ve a, thli rawn thaw heuh heuh chuan a sam chu a rawn chhem leng a, a benga ka zeh sak chuan min rawn melh kiau a, a mitmeng mawi lutuk hian ka lungphu a tirang thin.

“Ka tuarchhel lo lutuk a, ka zahpuiawm thei lutuk a “ tih pahin a thu tha a, tunah hi chuan amah dik tak kha a ni leh tawh. Ka thiante bulah pawh sawi tur hrelova lo hawi vel mai mai thin kha khaw thim thak thlengin nula bulah ka tawlh a, ka titi ve luam tih hi hria se min nuih nasa ngawtin ka ring. Zanah ka lo len leh a ngai I ti em tia ka zawh lah chuan inkhawm a tum thu a sawi daih sia, a bula awm ka chakzia hria se chuan a tum bik hauh lo ang.

A tukah chuan a hmel hmuh a nuam ta deuh, hospital kawt a rawn thlente chuan ka room atangin ka lo thlir reng a, ka duh thu hrilh nan leh ka rilru bunruah nan a la hma ka ti si, ka nghak thei angem tih erawh ka hre lo. Tlaiah ka haw dawnah an room ah ka va lut a, an khawl a lo chiang leh tawh lo nge Pu Zaua nen an lo bih dun a, an phun bal bal a, he khawl hi a thar teh vawr ringawt a, a tha hlei thei lo chu a nih hi. A thar kan nei tep tawh a, chumi hma chu siamdan a awm mai turah ngai ang. Zan lamah enge thleng dawn tih hre miah loin thawveng angreng takin ka haw a, ka kawta huan ka siam ve lian vak loah chuan ka lut a, hnimte chu ka thlo pah a, a zim bawka, enkawl a harsa lo. Krismas hmanga haw ka tum ve avangin tun bak chu tihfaina hunt ha ka neih ka ring lo bawk a, ka uluk phah viau.

Chaw ka eikham hnu chuan Feli in len tum ranin tv ka en a, ka hmanhmawh duh lem lo. DDK news ka en zawh chuan muangchangin kawmthlang lam chu ka pan ta a, Feli thiannu Duhawmi chu hmanhmawh deuh hian an in atangin a rawn tlan chhuak a, Feli inah chuan a lut a. Ka ke pen chu ka tichak a, engemaw a thleng niin ka hre tlat. A inkawt ka thlen chuan inhnial ri a lo chhuak chiah a, ka tlan lut nghal. Feli leh Rinkima chu an lo inpawt deuh chawt chawt a, Duhawmi chuan an pahnih chu a lo hau mawlh mawlh bawk a.

“Hetiang mai maia tih tur atan chuan ka thiannu hi a tha mah mah” a ti hlaih hlaih a.

“Ngaihdam ka dil mai alawm, lo inrawlh lo la a ni mai” Rinkima chuan a ti vin thak a.

Feli mittui chu a tla tih ka hria, ka dawhtheihna in a tlin tawh lo, a kut a vawnsakna chu ka va phih pawp a, an pathum chuan mak tih hmel deuh hian min melh thap a.

‘Nang bawk maw? Kan inkarah lo inrawlh lo turin ka tih tawh che kha” a ti a, engahmah ka ngai duh lo. Feli chu ka lamah ka pawt hnai a.

“Ka hriat miah loh hian eng emaw in inkarah hian a lo thleng hman zawk a ni lo maw? Keimah chauh hi ka dik lo emaw ka ti dawn alawm, ka hriat loh lamah inzawmna in nei a lo nih dawn hi. Feli, hei hi hre rawh. Hepa hian kan inngaihzawn lai atanga a tibuai ngam che a nih chuan a mize dik tak hi a tenawm hle tih hre rawh. Tunah hian Mali nen an inkawp mek a, chutichunga a tibuai che hi zuamawma a ngaih vang che a ni lo maw?” a tih chuan Feli chu a tawlh hnung dawrh a.

"I rilru tenawm zet kha pu ve turin min dah hauh suh" ka ti chang fak a.

"Kima, lo va haw phawt rawh" Duhawmi'n a tih chuan min rawn melh a, nuihzat hmel deuh hian min en a, a chhuak ta.

"Duhawm, i thiannu hi a lo be lawk ang chu" ka tih chuan min melh vang vang a, a chhuak ta.

Feli chu thutthlengah ka thuttir a, a bulah ka thu ve nghal a. A tap tawh hauh lo, a mitmeg chu a ling hlar a, a inhumruh tlat tih pawh ka hria.

"Hahdam ka duh a, min hawsan ve phawt thei angem?" A ti a, hawsan erawh ka tum lo.

"Ka tum aia hmaa ka rilru phawrh chhuah a ngai hi min hriatthiam ka beisei. Ka aamdanah hian i hai bik pawh ka ring lova, Feli i nat ka hlauh em em chhan pawh hi i hria" ka ti a.

"Sir, ka tan chuan ka hnathawhna hmuna ka pu i ni a, chu chu i ni reng ang" a ti hmak.

"Tunah chuan i rilruah hetiang lam hi a awm miah lo ang tih ka ring, mahse hre ve hrim hrim tura ka duh vang che a ni" ka ti leh hram a.

"Khawngaihin min hawsan phawt rawh" a ti a, ka beidawng lek lek.

 Ngawi renga kan thut hnu chuan ka va melh a, a heh a lo pet fan a, a mittui a tl emaw ka ti zawk. Ka insum thei thlawt lo, a hmuiah chuan ka va fawp zeuh a.

"Ka zuamawm viau em ni?" A ti vawt raih.

"I zuamawm vang a ni lo, ka insum thei thlawt lo a ni" ka tih chuan a nui ri hak a.

"Mahnia awm ka ni a, ka zahawm lo a ni maithei. Mahse, in duh ang anga ka chunga awm tur hian tumah in ni lo. Min hnaih hi tum buai lo mai rawh, i thei chuang lo ang" a ti ta khawl a. Ka na veng veng.

"Ka haw san phawt ang che" tih pahin ka thutna atangin ka tho a.

"Khawngaihin lokal tawh suh ang che. Hna thil a nih loh chuan min be lo la, ka hlim i duh tak tak chuan min tibuai tawh lo ang che" a tih chuan ka ding a. Ka melh chhuk ran a, vawikhat pawh min melh duh lo.

Ni e, a duhdan ang ngei chuan ka hnaih lo anga, ka tibuai lo ang. A nuna lo inrawlh a lo buai ve tur hian atan engmah ka ni lo. Ka rilruah chuan a thi lovang, mahse, atana ka tih theih awmchhun amah hlata awm chu a nih chuan harsa hle mah se ka tihsak dawn a ni. Ka duh loh vang emaw ni lovin, ka duh em vang zawkin a thu ang chuan ka awm ang.

Hna thilah lo chuan tihbuai ka tum lova, ka hmuh phaka a awm loh erawh ka hlau em em thung. Krismas hmang tura haw min dil a, a thil tawrh ka ngaihtuahin haw hma a tum pawh ka sawi buaisak lo. Amah hi ka beidawnsan lova, a inpeih hun ka nghak a ni zawk.

Mali rawn leng fo pawh hi ka sawisel duh lova, thian ang bakin ka lo kawm ngai chuang lo. Vawikhatmah ka khawih lova, amah pawh hian min en liam ve tawp. Ka nupui nih bak duh a nei lo tih a sawi mai zel a, a thleng ngai dawn lo tih ka hria a, engamah ka ngai duh lem lo. A haw dawna han thlah vel hi phur ruk deuh na ka nei thin thung, Feli hian min hmu thin tih ka hria a, a rilru a thunun theih loh hun a awm hian ka ring ve tlat.

(A tawi tih awih loh, vawiin chu nidang aiin a sei deuh ania😄 )