IRRESISTIBLE- V

Five

*Feli PoV*

Ka awih thei lo zawk, Zoa’n kan in lo va zawng chhuakin ka nu thil min rawn thawn tur ho a lo va lam anih chu. Nizanah min rawn call in chah tur ka nei em tih min zawt a, an awmna min hrilh tur leh ka paten an dah tur thu ka hrilh a, mahse, amah ngeiin kan inah a va kal! Ka lawmna aiin ka inthlahrunna a nasa zawk, kan pu ber a ni a, ka thil tur mai mai lama a hun a seng chu inthlahrun loh theih pawh a ni lo. Hospital atanga ka haw hnu lawkah ka kawtah motor a rawn ding a, pu driver Mama chuan min rawn ko vak a, ka va tlan chhuak nghal a. Bolero hnungah chuan ka thil tur an rawn phurh chu min lakchhuahsak a, Zoa chu ka melh zauh a, a thinrim emaw tih turin a ngawi leh hmuk tawh, a thinrim dawn aite chuan min rawn hawn sak lo mai se tha zawk asin le.

“Sir, ka lawm lutuk”tih pahin ka inkhai lut a. Ka nu thil min rawn thawn ka hmuh chuan ka hlim chawpchilh leh nghal. Mircrowave oven ka awhzia ka sawi ve ziah a, tunah hian min rawn thawn anih chu. Cake urna tur ka mamawh tam tham deuh nen, ka phone ka la a, ka nu chu ka han be nghal a, ka hlim veng veng. Cake ur hi ka atchilh thin a, a hran pawhin ka zir chuang lo, youtube ah te hian ka en peih a, ka thiam ve ta viau ringawt. Duhawmi a rawn luh laiin ka lo la inchhawp hnawk nuai a, ka thil inchhawp a hmuh chuan a rawn rak chul a.

“Awi, Fel, kan khua pawh hi kan vir ve lutuk asin, cake hi siam tak tak la, duh an awm nual ka ring”a ti a, sumdawn nana hman em emah pawh ka lo ti lem lo. Mahse, enchhin nan siam pawh chu ka pawi ti chuang lo. Thildang tih pawh ngaihsak ta lo chuan cheese cake chu kan buaipui ta nghal a, fridge ka neih loh avangin Duhawmi te fridge ah kan va dah a, ur fuh tak ang imaw?

A tuk zingah ka walk zawhin Duhawmi te inah chuan ka kawi a, cake chu kan zai a, ka ei tur leh Zoa ei tur ka zai a, a bak chu Duhawmi te eiah ka dah a, Zoa chuan a ngaina angem ka hre lo, mahse, min rawn phurhthlaksak vang vang sia, pek ve ngei erawh ka duh. Chaw ka ei laiin Kima a rawn lut a, naktuk inrinni anih avangin an sangha dil an sah dawn a, min rawn sawm nghal a, ka phur kher mai. A hnaah a kal dawn avangin rei a thu lo, ka chawei min nghak a, ka eikham chuan pawnah ka va thlah a, tunlai chu kan buai buai hian kan buai dun a, zan lam rawn kal miah loh chang a nei ve fo. Keipawhin rawn kal ziah tur hian ka beisei hran lova, khawkhatah kan awm tih ka hriat hian ka thla hi a muang ve em em zel.

Ka thlen hnu rei vak loah Zoa a rawn thleng a, a cake tur ka tuam that chu kengin a room ah ka va lut a, a lo thu fel deuh chiah.

“Sir, nizan khan cheese cake ka ur nghal a, ka lo ken ve che a”ka ti a, ka pe nghal a.

“A va lawmawm ve, I ur tui ve ngut dawn emawni le?”tih pahin a nui suk a, a la ve tho.

Chawhnu lamah staff meeting a koh avangin keipawh ka haw thei tawh nain ka la awm, Nunpuia pawh Duhawmi nen an inbe tan tawh a, an inbiak fel that chhoh vat ka beisei. Ka thutna bulah a rawn thu ve reng a, thingpui ka lum chu kan lem sek a, ka rin aiin kan pu chu a hman har leh sia.

“Enteh Fel, kan pu hi a bialnu pawh MCS an tia sin”a ti hlut a.

“Awi, an va chhuanawm dun em em”ka tihlai chuan Zoa chu a rawn chhuak a, Nunpuia nen chuan min melh kur a, a chanchin kan sawi chu a duh lo a nih ka ring.

Kan hospital building hlui an la thiah zawh loh lai, felfai taka an siamthat zui hi conference room angreng ah hian kan hmanga , a tangkai viau. Staff pawh kan awm kim viauin ka hria, Nunpuia nen kan thu a, a phone chu bih deuh ngurin a rawn lek chhuak a.

“Hei hi anih hi, a van chhe lo tak”tih pahin min rawn hmuh a. A hmel chu a tha tak tak, a pian a nalh bawk si. Chutah officer a la ni zui, Zoa chu ka han melh a, an inhmeh dawn hian ka hre lutuk. An thlalak dunna pakhat chu kan en leh a, a hmeichhia hi a nu deuh hnap bawk sia, inhmeh tak hi an ni ringawt. A rawn dingchhuak nghal a.

“Hei vawiina ka koh khawm chhan cheu chu in hriat vek angin Kayakalp intihsiakna kan hmachhawn leh tawh dawn a, kumdangah pawh in che chhe ngailo tih ka hria a, ka phur khawp mai. Kuminah pawh pakhatna ni ngei  turin kan tang anga, kan nih ngei pawh ka ring a ni. Kan Record bu pawh Nunpuia leh Feli ten an buaipui chho mek a, kum hmasa lama kan mark hmuh chhiatna lai te kan en pah bawk a, tan lak ngaihna hi a tam tawh lova, chuvangin theihtawpin kan tanho ngei ka beisei”a ti a, kan hna chanpualte chu a sem nghal vek a. Hnatlan chhoh kan ngaih deuh tawh dawn avangin chulam hawi zawnga hna pawh kan thawh chhoh a ngai tih te a sawi a, Aizawlah khan kan mamawh thenkhat a lo han khawm tel bawk tihte a report nghal a. Amah hi tawng duah chi a ni lem lo a, mahse tunah chuan kan hrethiam tlang viau tawhin ka hria.

Kima te sangha dilah sangha man turin kan kal a, khua a tha bawk a, a nuam kher mai. A u te chhungkua leh Kima thiante pahnih U Dika leh U Biaka an tel ve a, tui an sah chhungin U Ziri nen rawng kan lo bawl a. Green house lamah chawhmeh kan veh pah bawk a, a nuam ka ti tak zet.

“Fel, I phone a ri ania”thlam atangin Kima chuan ka phone a rawn lek lang va a.

“Tunge?”ka tih chuan, “Dr. Zoa” a ti a, hmanhmawh fe hian ka tlan phei ta hlawk hlawk a.

“Hello”thaw hlawp hlawp hian ka chhang a.

“Hnatlan a ngai tih kha I hre nange?”a ti a, a aw chu chang lehpek tawh.

“Aih, hre miah lo..”ka ti bah nak a.

“Group en ve tur che alawm, lo kal vat ang che”a tia, phone a dah daih.

Whatsapp group ah ka lut a, hnatlan tur tih a lo post tak tak, tinge ka kal hmate khan ka lo en loh, ka va han mawl thei tak.

“Enge a?”Kima chuan ka bula rawn thut pah hian a tia a.

“Hnatlan tur a lo ni reng sia, ka lo hre lo a”inthiam lo deuh hian ka ti a.

“Ka va thlah mai dawn che mi?”a tih chuan nuam lo ka ti tak tak.

“Ka chak ve tehreng nen a ho hle mai”ka phun sap a. Kima erawh chuan min hrethiam tak hian min va thlah ta a. Tlaiah sangha min rawn pe kawi ang tih a sawi a, ka mood hi a fuh lo zo vek.

Hnathawk tur tho ka nih avangin inthlak duh lovin hospital ka tlang nghal a, an lo thawk sup sup tawh. A thenin thingzar an lo thlak a, a thenin electric wiring an khawih bawk a. Nunpuia’n min hmuh chuan min lo ko vat a, a bulah chuan ka kal a, ka ding fel chiah tihin Zoa a rawn kal nghal.

“ILR a tha lo I ti a ni lawm ni? Hei vawiin te hi Pu Bta hman ni ania, enpui t ache”a ti a. Kan pu pawh nise ka mood off hi ka inthup thei thlawt lo. Kan room lam ka pan a, Pu Bta chuan kan ILR chu a lo en duk duk a, a la thar tehreng nen niminpiah atang khan a rawn chiang lo ringawt a, chu chu a buaipui dawn a ni.

“Kan fridge mechanic kan koh mai a ngaih hmel, a that lohna tur awm hi ka hmu lo reng reng”a ti a.

Kan thlek ve ngial na a a mik amak pawh ka hre der si lo.

Thingpui kan inlaiin Nunpuia nen kan lo titi mawlh mawlh a, ngawi rengin Zoa chu kan bulah a rawn thu leh tawh. A rawn kal ve tih hre lo ang hmakin ka awm, ka mood a ti chhe lutuk ka ngei tlat. Ka mitthlaah sangha dil bak a lang der si lo a.

(56th Baeksang Art Awards Most Popular Actor leh Actress Award an dawng sia, ka zep tel lo thei lo ka hmangaihte pahnih hi 🤗)

*Dr Zoa PoV*

Zing karah chhuna hnatlan tur ka post a, midang zawngin an seen vek, Feli’n  a seen veleh tlat lo. Chaweikham hnu lawkah car in an rawn phur ka hmu a, message kha a la chhiar chuang lo tih ka hriat chuan ka thin a rim hlur tawh. A hmuh hunah a rawn ngaipawimawh mai ang chu tiin hospital lam ka pan a, an rawn thleng sap sap tawh. Anihna takah chuan vawiin hi chuan rawn kal lo pawh nise inhriatthiam dan a awm lo chu a ni bik lo. Mahse, a telloa nilenga hun hman chu a rei mah mah dawn. Ka phone ta nge nge a, ka rin ang ngeiin a lo hre lo. Nunpuia khan sangha an man dawn tih kha a sawi a, a chak viau ang tih hre mah ila ka hmuh chakna chu ka thunun zo ta lo. Hospital a rawn thlen chuan a hmai a tai hlar a, a pian fuh lutuk hi a mak ka ti zawk. A bulah hi chuan ka awmdan hi a buai deuh tlat zel, pangngai taka biak ka tum pawh hian ka lo tawng bul leh nghut thin. Thingpui inlaia an bula ka awm ve laite chuan ka awm ve tih hria ang pawhin a awm duh der lo. Ngaihzawng nei lai a ni tih hre vek mah ila chu ringawt chuan amah ka hmuh chakna te hi min dal zo lo chu a ni ber e. A cake min pek te kha ka ei phal loa, ka fridge ah a la awm reng tihte hi a hre ve der awm si lo a.

“Sir, fridge mechanic kan chah mai loh chuan kan siam thei lo”ka room a ka thut hnuah a rawt a, min be ta nge nge alawm, ka lo nui ru suk a.

“CMO ka lo be dawn nia, chu lo chu harsatna dang I nei em?”ka ti a.

“Aih ,nei lo e”a ti a, a kal ta a. A chhuah hnu chuan ka en zui vang vang a, hmeltha hluah tih tur a ni lo, mahse, a mitmeng lian fiah kak leh a hmel bial deuh hmeih kha a inhmeh ka ti. A vun a nalh a, a aw te hi a mawi ka ti. Ka ti lutuk mah mahin ka hria, ka lu chu ka thing a, mi duhlai lo duh pui ve tlat hi ka lo hrethiam ngai lova, experience lah ka nei lo. Engpawhnise, Mali rawn awm dawn thu ka hriat na hian min ti hlim lo chu a ni deuh hi. Tukin khan ka nu in min rawn bia a, BDO in a awm dawn tih a sawi a, a tul lo ka tihzia leh ka thu lohzia a inzat vel chiah ang.

Zanah a call ka dawng ta reng a, engang pawhin then tawh mah ila lo be duh lo tur khawpin ka sual bik lo a, a phone call hi chu ka la chhan sak ziah. Ka nu lah hian mo ah a duh si a, engtin nge ka chinfel ang tih pawh ka la hre lo. Ka pa hian engtinmah min nawr lui dawn lo tih ka hria a, tlem chuan ka hahdam deuh. Mahse, hmeichheho in an mutpuia an thawhpui thu hi chu pa ber hian zawm chin hi an nei thin bawk si a, a buaithlak a ni e. Ka tan pawimawhna a nei tawh chuang loa, rawn awm ve mai mai ang hmiang.

*Kima PoV*

Feli ka thlah phei hnu chuan keimahin kan huan lam chu ka pan leh a,tunlai chu ho teteah thik tur hi ka hmu reng. An pu hi ka chik deuh a, Feli laka a rilru hi staff dang nen chuan a inang lo tih ka hrechiang tawh. A hnathawhnaa an pu anih avangin a thu a zawm loh theih si loh a, ka thin chu a rim ru deuh hlur. Mahse, a langah erawh lungawi lo hmel ka pu duh lo, a chhan chu ka mood tel lo pawh hian a mood a fuh lo tawk tih ka hria. Sangha man a chak avangin ka pa in hun a la ti chiah lo chungin ka ti lui ve a, amah ber a awm leh thei der si lo.

Feli hi ka hmuh tirh phat atang khan ka duhzawng tak a ni tih ka hria, ka umzui nghal vat reng a. Ka rin aiin a lerh lo, amah a fel thlap bawk. Kei hi ka landan aia lerh ru zek ka ni a, chumi anih avanga va tal hiar viau ka ni tihna erawh a ni lo. Ka zirlai ka ngaipawimawh a, ka thiam ve tawk bawk. Ngaihzawng hi chu enjoyment atan bak ka ti ngai lo, ka lehkhazir lai pawh khan neih loh lai ka nei ngai lova, ka zirna tibuai tur erawh chuan tutemah hi ka hmang ngai lo thung. Feli ka biak tantirh pawh hian MZU a ka zirpui thin nen kan inkawp lai a ni a, mahse amah Feli hian min hnar bik lo tih ka hriatin kan inkar ka titawp a, tihian ka awm chho ta kha a ni a. Ka lerh ang ai hian ka fair vet ho, inkawp hi ka duh lo bur, min kawp pawh ka duh hek lo. Chutiang chuan nun hlimawm angreng tak, engkim a eng zawnga la thei mai ka ni. Mi min hriatdanah erawh chuan tlangval fel leh chhuanawm tak hmuhin min hmu tih ka hria a, ka pen san thui lutuk em lo ang chu!

Kan sangha man zawh hnu chuan green house a tomato leh bean vel chu Feli tan ka lawhsak leh a, tichuan muangchang tawh loin kan haw ta a. Zana len ka duh leh dawn tho avangin tlawh kawi lovin kan haw tlang a. Ka inbual zawha chaw te kan eikham hnu chuan muangchangin Feli in lam chu ka pan a. Ka va thlen chuan a lo inbual zo chiah a, a pian nalhzia hi a kawr hak lang thei chinah pawh hian a chiang viau a, tuna bathrobe nen a awm phei hi chuan ngaihtuahna tha lo put mai te pawh awl tak tur a ni. Ka thil kensakho chu a dah fel zung zung a, tukverhah dakin khaaw thiang ruih chu ka chuan voh voh a. Hlim deuh hian ani a zai rat rat a, tihian innei tawh ila ka ti, amak ngawt mai. Kha zat kha ngaihzawng te pawh ka lo neiin humsual pawh ka lo daipui ve zeuh zeuh hlawm a, nupui tur anga suangtuah kha ka nei ngai lo. Feli erawh a danglam a ni, nupui atan ka iai miah lo tih ka inhria.

“Ka’n inthlak lawk ang aw”a tih chuan a tv chu ka lo on a, rock bottom deuh a ngaih thin avangin ka han chum deuh chawt chawt a.

‘Ka nuin tv thar kan lei dawn atia, tuna kan tv khi ka la thla daih ang”room atang chuan a rawn ti a.

“I tv hmanlai hi ka rochun dawn nia”ka tih chuan a rawn nui hak a. Rei vaklo hnuah a rawn chhuak a.

“I inlengten an nuihzat thin lutuk ang che, chum deuh chawt chawt a ngai thin bawk si”tiin a nui sen sen a, ka insum zo leh ta pek lo. Ka pawthnai a, a hmui chu tawk zeuhin ka fawp a, phur deuh hian min lo chhanglet ve a, chin tawk hi ka nei lo lek lek thin.

“In pu khan a lo hau che em?”ka ti a, nui chung hian a lu a thing a.”A hauh che chuan min hrilh rawh aw”ka tih chuan, “I hnek ngam dawn em ni?”a nui var var a.

“I tan chuan ngam lo chung chung pawhin ka hnek mai ang chu”ka han ti ve a, a nui hmel hi ennin a har.

“Karleh lam chu ka rawn haw lo zeuh zeuh dawn nia, I lo thinrim leh bur ange aw’ka tih chuan a hmui a tipawrh tar a, chu chu remchangah lain ka va fawp a, a lo thle sawn vel. A tawpah chuan a nui leh ta ar ar a.

(Kum 2015 khan Health Dept.ah hian ka lut a, ka ngaihtuah a, vawikhatmah kan department lam hawi hian thawnthu ka lo la ziak miah lo hi a lo nia, chuvanga he thawnthu hi lo piangchhuak ta a ni. Covid19 vanga mahni hrehawm pawh pawisa thei lo, kan doctor, nurse, health worker leh thawktu dang zawng zawngte, hrileng kara ral hmatawnga dingte zahna chibai ka buk che u a, in tan he story hi ka hlan e)