IRRESISTIBLE-VII

Seven

*Feli POV*

Mahni in ngeia han awm chu a nuamin a thlamuanthlak ngawih ngawih. Motor ka ruih ngai pawh ka hre silo a, khati tak maia ka han rui kha mak ka tiin hrehawm ka ti tak zet. Zanah chuan Kima nen kan inbe deuh reng a, Thursday ah a rawn chho ve dawn a, kan chhuk tlang leh theia a rin thu a sawi chuan a fuh dawn hlein ka hria. Zoa khan Saturday ah kan chhuk rual dawn nia a ti a, mahse, pu te uap hi chu a na ve em a, Kima bula rilru thawveng deuha haw theih kha a thlanawm fe zawk. Ka chau ve bawk a, mahni inah mahni khum ngeia thlamuang takin ka muhil ta siai siai a, chawei dawnah chiah ka harh. Kan in thar lam pan chuan ka pa nen kan chhuak a, naktukah insawn phei kan tum avangin a theih ang ang vawiin lamah kan tifel dawn a ni. A hma atang tawha an lo tih deuh nual tawh avangin bungrua hautak deuh tur vawiin lamah chuan kan thiar dawn a ni. Ka nu leh ka naute erawh an chawlh theih loh avangin an chhuak dial tawh a, naktuk lamah tanrual a ngaih dawn zawk avangin vawiin chu ka pa nen kan tih theih ang ang kan lo ti dawn a ni.

Nilengin inbe mang lovin kan thawk mawp mawp a, ka pa hi chu a tawng tlem bawk a, sawi tur hi a hre hlawl lo. “Mate, kha laiah kha chuan dah suh”tih chiah chawhma chhung zawng khan a la sawi. Ka hrethiam tawh a, a bula awm hrehawm tih phah nan ka hmang ngai lo, min hmangaih tih ka hria a, a takin a lantir mai thin.

Ka phone a rawn rik chuan ka ipte chu ka hai rak rak a, Zoa a lo ni.

“Vawiinah em ni in insawn chhuah?”a rawn ti a, naktuk lamah anih thu leh vawiin lama kan hnathawhte chu ka sawi a. “Naktukah ka lo pui ve dawn cheu nia, khawilaiah tak khan nge in awm?”a ti a.

“Sir, I hah lutuk ang, kan insawn zawhah I lo leng zawk dawn nia”ka ti a, ka ti tak tak. Kan pu a ni a, chutianga mimal thil deuh min puih chu zahthlak ka ti, ka duh teuh lo.

“In awmna chu sawi mai teh, in pu ka nih hi aw”a ti a, a nui deuh huk.

“Tetea hmar te in I hria em?”ka ti ta nge nge.

“Ka thianpa alawm”a ti awlsam et a.

“An in thlanglamah khan”tih pahin ka dah daih.

“A va mak hlek hluk ve Tei”ka pa in a lo ti boh a.

“Kan pu ania, naktukah min lo puih talh a tum a nih kha”ka ti a, ka thin a rim deuh.

“Khatiangin tih tur a ni hleinem, in hnathawhnaa in hotu a ni lehnghal a”a tih chuan ka ngawi ta roh roh.

Tunhnaiah ka duh aiin min hnaih a, ka hre lo a ni lo, ka haider mai mai zawk. Kima’n a hriat chuan ka chungah a thinrim ka hlau a, mitmei ka hmuh emaw te a ti ang tih ka hlau. Hmanzana a ina chaw kan eikhawm te khan a bialnu nen a room atangin an rawn chhuak kha a nia, engtin nge an awm tih hre lo mah ila mi pangngai tan chuan ngaihdan kan nei vek ang. A bialnu pawh a hmeltha a, officer a ni bawk a, duh tawk ve mai se keimah hi chu min tibuai tel lo se ka duh.

Zanah kan motor phurh theih tawk bungrua kan dah phei leh a, naktuk lamah chuan inrem fel nen kan buai dawn lutuk a, a theih ang angin kan inhmakhua ve a ni. Kan cousin te hoin min pui a, kan zo deuh zung zung. Ka pi leh ka pu in min la dampui a, kan in thar lamah hian rawn awm ve daih se ka ti rilru thei hle a, mahse, patea ten an phal ka ring si lo. Pi leh pu te kiangah kum khat dawn kan va tal ve a, an hlutzia ka hre thar niin ka hria.

Zing chaw kan eikham hnu lawkah Zoa a rawn lut hlawl, ka lo melh reng ringawt. Ka nuin a lo be vat a, engemaw a hriata min lo puih chu a tum tlat le. Min be lova, ka be bik chuang lo. Ka nu nen innel deuhin an inbe bawrh bawrh erawh mak ka ti deuh. Kan room tur lamah ka buai nghal char char a, inhnuai lamah Zoa chu a la awmin ka hria. Chhun thingpui inlaiin ka bulah a rawn kal a, a la nui vur vur zui.

“Tlai chaw chu ka ei lo mai ang”a tih chuan ka melh deuh hrawk a, “I nu khan ei nghal turin min ti tlat a, hnial kha ka hreh deuh sia I lo sawi mai dawn nia”a ti leh a.

“Sir, Saturday kha ka thianpa a lo chho dawna, chhuk rual kan tum leh ta sia, ka hrilh nghal che ni mai aw”ka ti a, a hmel landan a inthlak nghal hmak.

“Monday a hna I zawm hman chuan I chhukna tur ngaihtuah chu I thu thu alawm”a tia, a kal daih.

Ngawi rengin ka nu a pui leh char char a, inchungah ka tihtur ka la zawh loh avangin ka chhohsan leh a, nuam lo ka ti leh deuh. Hei leh chen hi min pui turin a rawn kal vang vanga, kan pu a nihna zawng zawng hriat miah lohin min pui a nia, that chhuah ve tur ka nih tehreng nen khatianga lo awmkhum tlat kha ka thiam lo tih ka hria. Mahse, keimah leh keimah ka inven thiam loh chuan Kima mit ka tikham ang tih ka hlau miau si a, ka ngaihpawimawh tur zawk a nih avangin ka inthiam tho mai. Inhnuaia ka chhuk leh chuan a lo awm tawh lova, ka thlah liam lo chu nuam ka tizan lo.

“A u, in pu kha a van fel em em, a mizia kha a cool tawp”Tatei chuan a ti a.

“Ta, kan ina ka thil tur a rawn lam khan a leng rei mi, ka nu nen an va innel hmel em em”ka ti a.

“Hmm, anu te chuan tupawh a kawm thiam a, nel chhunzawm lo an awm I hre tawh mi”a tih chuan dik ka ti leh viau si.

Zanah chuan whatsapp ah message ka thawn a, lawmthu ka va sawi a, a seen a min reply lo. Kima nen kan inbiak chhunzawm a, naktuk lamah a rawn chhoh dawn avangin ka hlim ve deuh, mahse, Zoa vang khan ka rilru a nawm loh phah vek.

*Dr Zoa POV*

Ka huang chin ka pel ve mah mah tih chu ka hre tho, mahse, Nu Mapuii nen a hma ni in kan inhmu a, puih ka tum thute ka lo sawi ve luam avangin ka va kal ta kha ania, Feli lahin min be tha duh bawk si lo. Kei hi ka ti mah mah tawhin ka hria, ka theihtawpa ka insum a ngai tih chu hrilh hranpa ka ngai tawh lo. A bialpa Rinkima khan a rawn hruai dawn lehnghal a ni awm e, a pawi lo, keipawhin a lakah rilru ka seng tawh bik lo ang. Ka theih chhung chu ka rilru hi thunun ka tum tlat tawh dawn a ni. Rinkima hi ka ralkhat hriat ve tawh a, ani erawh chuan min hre lovang. Kan thiannu nen hun engemawchen an inkawp ve hman, na lutukin a kalsan a, ka mi rin zawng a ni lo tlat. Khatiang kha Feli chungah a ti ang tih ka hlau a, chuvangin ka buaina tur ni miah lo ah ka lo buai phah fo a, ka inthunun tawh ang.

Ka u te chhungkua an rawn thleng tawh a, ka pa pawh nidang aia hmaah a rawn haw a, ka haw chhoh chhan ber ka nau chungchang kan ngaihtuahho dawn a ni awm a, ka bangbo angreng viau. Ka pa inthlak chu kan nghak thap a, ka nu nen an rawn inzui chhuak a, ka u te fapa Jona chu ka pawm a, ka u te nupa chu an ngawi chawi riau hian ka hria.

“Khawnge Lianzuala chu?”ka pa in a ti nghut a.

Kan naupang ber hi Lianzuala chu a ni a, ani hi chu kan chhungkaw blacksheep hi a ni ve hrim hrim a, damdawi em hi chu a la khawih lo, thildang erawh a ti kim vek niin ka hria.

“A room ah a awm reng kha”ka nuin a ti a.

Rei vak lo kan nghah hnuah pawr deuh phang hian a rawn chhuk ve a, a chhun mut leh a nih hmel.

“Zoa pawn ka koh haw chhan hi a la hre lo maithei a, Mama te nupa erawh chuan an hre tawh a, thu lawmawm lam hre tura lo haw ni la ka ti khawp mai. Mahse, tunah hian thil zahthlak deuh mai kan tawk tlat mai a, hma lak ran a ngaih vanga chah haw che ka ni tih lo hre phawt la. Lianzuala hi I hnenah a rawn awm phawt a ngai dawn a ni” thinrim insum tih hriat zet hian a thaw kawk a.

“Ka pa, thingtlangah ka awm duh miah lo a nia” Tea chuan a lo ti vat a, ka pa chuan a melh rum ngang mai.

“A chhante chu han sawi phawt ula maw le”ka tih chuan ka pa chu a bu nghat a.

“I pa Mawia (kan bialtu MLA a ni a)te monu a lo uire a nih kha”

Ka pa ka va melh chu a hmai a sen vek, ka nau chu a melh tlawk tlawk a, ka nau hian thu pakhat chauh pawh sawi se ka pa hian a hnek thluk tawp ka ring. Ka u te nupa chu ipik hmel zet hian an thaw hawk a, ka nu chuan hnuai lam a melh tlawk tlawk bawk.

“Tea, I va timak ve, I thiltih rapthlakzia I hria em?”ka ti a.

“A pawi ka ti reng alawm maw le” a ti vin hlar a, ka pa kut hum ruh tlat chu a thlah mai loh nan ka nau bulah chuan ka va thu hial a.

Kan bialtu MLA hi ka pa thian hnai lutuk a ni a, chhungkua kan intitha in kan inpawh em em a, chutih lai kara kan chhungkuain pawi kan lo khawih chu ka pa tan a hrehawm dan tur ka hriatthiam pui ve hial mai.

“Inrinniah I chhuk rualin hruai thla la, engemawti chhung chu I bulah awm rawh se” ka pa chuan a ti a, a tho nghal hmak.

“A hmeichhia khan a lo bia che a nih pawhin lo chhang reng reng suh ang che”Ka u in a ti a, ka nu chuan a mittui a hru a, a rilru a na dawn lutuk hian ka hria. Chhungkaw zahawm ve tak kan ni a, chutia mualphona kan han tawk rup chu an tan a na dawn em a ni.

Ka hnaah ka buai ve em avangin engmah min lo hrilh duh lo hi a lo ni a, kan vengah chuan kan chhungkaw chanchin aia lar a lo awm lo, engmah lah chu ka lo hre ve der si lo a. Ka nau chu a room ah ka zui lut a, ka thu hi a  awih ve ber avang hian ka pa hian min pun deuh zel a, ka u tan chuan naupang ber anih bakah an kum a inthlau a, han hau vak hi a ti ve ngai lem lo. Chuvangin ka pa hian ka kutah a dah deuh thin a, tunah pawh min rawn chah leh ta tawp a ni ber.

“Te, I awmdan hi I sim a ngai ania, ka nu leh pa pawh an kum a upa tan tawh a, hetianga rilru I tih hahsak rengte chuan engtin nge niang?”a ti a.

“Zo, a hrehawm ka tihsa naklaiin nang lehzel chuan min hau lo teh”a ti sup a.

“Ka bulah chuan I lokal duh angem?”ka ti a.

“Ka rawn kal lohte chuan, ka pa ka hlau si alawm. Mahse, min awm rei tir suh aw” a ti a. Kum 30 lai a ni ve tawh a, a la puitling thei thlawt lo chu a nih hi.

"Tea, chiang deuhin ngaihtuah rawh aw. Tunah kum 30 i ni ve tawh a, puitlin hi a hun tawh viau a nia. Ka nu leh pa hian min dam pui hlen dawn lo, nupuite ka la nei duh keipawhin, nangmaha i din theih nan kawng i zawn hi a ngai ve a nia" ka ti dam dap a.

"Keipawhin chu chu ka duh a lawm. Vawilehkhatah insiamthat thut erawh a har ve a. Ka pa sawi ang khan i bulah ka lo awm ve phawt ang. Chuan thil pakhat ka hrilh ang che, Biakhmingi khan min nagizawng nasa lutuk a, mipa ka nia, thisen lum ve thei ka ni bawk. Min beisei rengtu leh min tibuai rengtu lakah chuan ka lo che tha reng thei bik lo alawm" a ti a.

Ka ngaihtuah a,Biakhmingi hian high school kan kallaiin tih takzetin min ngaizawng tawh a, a rah chin a sanzia pawh ka hai chuang lo. Ka nau thiltih erawh ka pawm lova, dik ka ti hek lo.

Inrinni tlaiah kan unau chuan kahnathawhna hmun lam chu kan pan dun ta phawt a, ka nu leh pa rilru na te han reh phawt se, khawtlanga ra hmingchhiat zualpuite han reh se a duh leh a chho leh ang chu. Kan chhungkaw boruakin a zir ta lo bawk nen Feli lam pawh ka lo ngaihtuah tawh miah lo, a quarter lo inhawng hiau ah chuan ka hrechhuak chiah a, keini aiin an chhuak hma a nih hmel. A kawta car var ding ran chu ka melh zawk a, ka ngaihtuah zawm duh lo lui.

*Kima POV*

Feli te in thar chu a nuam tak zet, a nu a fel em em a, a pa erawh chu a tawng mawh ve hmel khawp mai. Nu Mapuii chu zirtirtu a lo nih vs tho avangin kan titi a rual a, amah tawng zawt zawt nisi ll hian a tawng duh a, midang thusawi a ngaichang thiam si, a nelawm thlawt.

"Kima, Matei hi hmeichhia mahni chauha awm a ni si a, ho teah mualphote hi a awl em em a, ka ring tawk viau na cheu a ka sawi lang duh ve hrim hrim a nia" a ti a, a zahawmin a lawmawm ka ti.

A chhungte mut hnuah kan pahnihin kan inkawm leh deuh reng a, kan hna ve veah kan buai dun bawk a, inhmuhna hun tha kan nei khat a, kan inthlahlel ve hman hle a lo ni.

"In pu chu i hrilh chiang tawh em ka rualin i chhuk dawn tihte chu?" Ka ti a, a nihna takah chuan Aizawl kal tum em em pawh ka ni chiah lo. Mahse, ka duh aiin he doctor hi a nghal ru tlatin ka hria a, venhim ka duh. Feli lah a rilru atluang si a, engtin emaw an lo inhnimhnai ang tih ka hlau.

"Um hrilh tawh e" a ti tha ve mai a.

"Taka kan BDO thar chu a fel hmel em? Ka nuin a rawn sawi hlut a, an pi anih vangin a rawn fak nge phei chu ka hre lo a" ka ti a.

"A fel ve ang ka ring, kan pu nen khan an inngaizawng alawm" a tih chuan ka thaw huai.

A mitmeng hi a mawi ka ti, ka pawthnai a, chiang zet hian kan inmelh a, rei tak ngihzawn ka tum lo, nupuia neih vat ka duh tih ka hrechiang! A hmui pawrh deuh tar chu ka han nawk a, a thaw halh a, chutah dam leh uar zet hian ka fawp ta vawng vawng a. Ani pawhin min chhang let tha kher mai, a kawrchhanah a hnute chu ka khawih , a phal dan tawk a ni miau a, ka nawr lui ngai lova, ka nawr luih ngai ka ring lo bawk. Hmeichhe tam tak ka kawp ve tawh a, rilru tha lo zawngin ka kawm vek e tihna ni lovin, anmahni an inhawn em vang hian thil tha lo pawh ka tihpui fo tih ka pha lo, Feli erawh chutianga tih chu ka tum chhin ngai lo.

Ka hnaah ka tui ve bawk a, thawk tirte mah ni ila naupangho nen kan inzawmna a tha a, chutiang bawkin ka thawhpuite nen pawh. Kan principal hi ka ngaihsan em em thin a ni a, a pension a lo hun reng tawh chu ka ui khawp mai. Ani hnuaiah hian hun engemawti chhung chu han tal thei ila ka chak tehlul nen, a hun hnuhnunga ka awm thei chu ka lawm mai a ngai tawh. A thlahna puitham deuh hleka siam kan tum avangin kan buai ve thei hle a, chhunah class kal a ngai a, tlaiah emaw zanah emaw inbuatsaihna hun kan hmang thin. Chuvanga khuaah pawh haw chho thei lo thin ka ni reng a, Feli te buailai a ni chho ve kha ka lawm ru zawk, chu ni lo se a lungawi leh vak dawn lo tih ka hria.

“Kim, min lo pui thei lawk em?” ka thawhpui Tleipuii a ni a, ani hi ka thawhtirh atanga min titlangneltu leh ka kawm zui tak ber a ni. Stage an chei lai chuan seat kan lo rem a, a duh anga puan a zar theih loh avangin min rawn ko a ni. Ka han pui vat a, amah hi nu te lam deuh, ngo sen siah mai a ni reuh a, hmeichhe sam tawi nalh ka tih tlemte zingah a tel ve ang. A tawng duh a, a bulah hi chuan kan nui leh dar dar thin. Kan haw rual deuh zel a, ka thlah thin. A inluah hi ka veng thenawm chiah a ni a, ka tan kal pah a buaithlak lem lo. A nau nen an awm a, a nau chu kan college ah a lut nghe nghe. Anmahni tak hi Lawngtlai khua an ni a, a hna avanga heta awm a  ni a, kei aiin kum khatin a lut hma zawk.

“Chaw ei leh mai la” tih pahin a bag chu thutthlengah a theh thla a, ka laklawh tlai deuh hi chuan ka ei ve zeuh zeuh thin.

“Ka ei ngun emai, vawiin tlai chu ka ei lo mai ang” ka ti tha ve mai a. Ani pawh inthlak turin room ah a lut a, fridge chu hawngin tui ka in a, haw san ka tum lai takin a nau Nui a lo haw.

“I haw dawn mi? Chaw ei ve la, Puii’n vawksa a bai sin, a bai tui thei rap”zawi te hian ka bengbulah a rawn ti a.

“Rohluzual, ngawi mai mai rawh aw” a u in room atanga rawn chhuah pahin a ti a, a nau a nui nghal. Ka ngaihtha lo chuan an chawhmeh bel ka en a, ka nui tawp.

“Siam lohin lo dah mai tur alawm, ka siamsak tur cheu nia”tih pahin ka chhin leh a, a tui loh hmel em lah tak a.

“I haw dawn chuan haw tawh rawh, a tlai zel” a tih chuan nui chungin ka chhuak ta a.

Sana chu ka bih zeuh a, khuaa haw ka tum deuh kha ania, ka chau deuh bawk nen ka haw lo phawt mai ang. Feli hnenah chuan ka sawi fel thei em ang chu, tukina ka chhuah dawn khan ka haw tur thu kha ka lo hrilh laklawh ve si a, a lawm erawh chu a lawm vak lo ang tih ka ring.

(A thawnthu laimu kan thleng chho tan tawh dawn e)