IRRESISTIBLE-X

Ten

*Kima POV*

Ka hun hman dan kha ka ngaihtuah let neuh neuh a, kei hian ka tisual a ni. Engtin nge Feli kha ka phatsan theih zawk? Ka rilru nat lutuk vanga zan ka mut that loh hi zan tam a nit a. kumkhuaa then hlen tur anga ka inngaihtuahte hian ka na ngut ngut thei. Hetiang em em hian ka lo duh hman tih pawh ka hrechhuk chho zel chu a nih hi.

Khatia college atanga ka haw khan Tleipuii haw tawh kha va tlawh kher lo ila chuan thil thleng hi kan pumpelh maithei titeh ka rilruah chuan a awm a.A in ka thlen chuan a lo reh thiap a, ka koh vawihnihnaah room atangin min rawn chhang a, a rawn chhuah mai loh avang chuan a room chu ka han hawng a, ka rin loh deuhin beer a lo dawm a, a lo in karh karh a. Ka koh chuan min rawn en a, a nui sak a.

“Kha I duh ve em?” tih pahin can dang chu a rawn lekkang a.

“Engthil nge I chungah thleng?” tih pahin a bulah chuan ka thu thla nghal a.

“Kim, phatsan I ni ve tawh em?”a ti sap a. Ka hrethiam ta uar mai.

“I solve tum dan hi a tha ka va ti lo ve” ka tih chuan a nui ri hak a.

“Mahnia in chu a nuam lo, kha in ve rawh” a ti ta sek a, in ngai lo ka ni lem lo bawk a, ka in pui ta a.

“Mipa hi tinge in rinawm zawh ve miah lo” a tia, a tap ta hlap hlap a. Hmeichhe tap kher hi chu hmuh nuam ka ti lo.

Hnem dan tur ka hre vak lo, ngawi renga a bula lo awm leh a tawng ngaihthlak chu ka tihtheih tawk a ni mai. Can khat ka in zawh chuan a dang a rawn phawrh leh a, khawi ami zozai nge a lei tih pawh ka hre lo.

“Khawiah nge I lei a? Fim taka hmachhawn zawk hi a tha asin” ka  ti a, a lungawi loh lek lek avangin ka han in belh leh a. Ka rilru kilkhatah chuan inthiarfihlim a hun tih ka hria, mahse mak tak maiin kalsan chu ka hreh tlat.

“Kim, mahnia chaw ei ka peih miah lo ania, miin eipui rawh aw. Ka nau a awm bawk si lo” a tih chuan ka aw ve mai a. A hmel hian khawngaih thla a la ve riau a, zep thu a awm lo, ka thil in hnathawh a tel ve ta bawk nen engkim chu ka ngai awlsam vel vek a ni mai.

Chaw ei lam pawh ngaihtuah ta lem lo chuan kan thil in lai chu ngawi rengin kan in ta mial mial a, ka in lohna a lo rei ve ta deuh bawk nen bur thum ka in zawh chuan ka khaw hmuh a buai tan, Tleipuii chuan min rawn nui sen sen a, ka rilruah Feli a rawn lang nghal. Zinga ka chhuah dawn kan inbiak bak kha ka la be miah lo tithe, haw ka tum thu ka hrilh tithe kha ka hrechhuak a, mahse eng ka ti ta nge kei lah chu tihian mahni pawh insaseng thei lovin ka awm chu a ni sia, hre ngat se chuan ka va chak dawn lo tak.

Ka muthilh lai pawh ka hre lo, ka harh chuan Tleipuii ka lo kuah! Rang zet hian a ban chu ka dah sawn a, thawh mai ka tum chuan ka lu chu a lo la hai muai muai, ka mutna bula ka phone let bal chu ka han la a. A lock ka phelh hmain Tleipuii chuan min rawn laksak a, a rum deuh nghut a, lak luih ka tum hran lo.

“Riak ve mai rawh aw”a ti tham chal a.

Thil dik a ni hauh lo tih chu ka harh fim lo viau na in ka hre ve tho, ka ui nge ka hrethiam lo, haw lui duh ila chuan ka theih lohna tur ka hre miah lo.

“Ka va haw zawk ange, a dik dawn miah lo” a langah chuan ka han ti ri ve a. Chu veleh min kuah nghet sauh a, thaw hawk chungin ka maimitchhing a, a hmeichhia zawkin pawi a tih loh chuan ka ngai pawimawh zui duh ta lo.

Kan muhil kan harh leh meuh chuan zanlai a lo ni tawh, Tleipuii chuan ka muhil lai chu minlo thlir vang vang a, ka harh tih a hriat chuan a nui sak a. A vawihnih nan thawh ka han tum leh a, a la phal chuang lo. A lu a rawn kan a, min rawn fawp a. Ka hamhaih deuh avangin ka che lo, a rawn uar tak deuhah chuan ka nam sawn a.

“Tleipui, bialnu ka nei ania” ka ti ta ringawt a.

“A pawi ka ti lo, zanin chauh chu a pawi viau I ti bik dawn mi?” a ti a, ka chhan leh hmain chet a rawn lak chhunzawm hmiah.

Ka hun kal tawh lamah khan ka fel chuang miah lo a, mahse ngaihzawng ka neih lai rengin ka rinawm lohsan ngai lo. Tuna ka chunga thil thleng mek erawh ka la tih ngai loh anga awm chakna, thil thar tih duhna ang zawngin ka rilruah a rawn thawk a, sualin min hneh tawh a niange. Ka la inchhir vawng vawng na tur tih hre phal loin ka rilrua a thawhdan angina k ache chhunzawm a, heti khawpa mipa ngam anih chuan vawi tam a lo pelhe tawhin ka ring bawk. Mahse, a rak deuh thawt leh ka hnung a ham thip zawkna te, a awm chhunzawm dan chuan a la thianghlim a ni tih min hmuhtir ta thung, pawi ka ti lutuk chu chet lak ngaihna ka hre tawh lo.

“Kim..” mittui tling deuh pam hian min en a, a nih tur a ni zo tawh, engmah siam that theih a ni tawh lo.

Ka bula muhil mek chu ka en reng a, a vawikhat nan ka nunah inchhir ngawih ngawihna tur thil ka ti ta reng mai. Lo thianghlim tawh lovin mipa dang lo mutpui tawh ni se ka tan chhuanlam tur a awm anga, mahse, ka rinloh deuh thil a lo thleng ta si hi ka awhna tur a ni ta zawk mai em ni?

Karkhat chhung chu Tleipuii’n ka hnenah engmah a sawi lo, kan khawsak dan kha hria ang pawhin a awm lo, mahse, keimah hian nuam ka tithe lo. Ni khat chu ka class la zo pawnah ka chhuah pui ta ringawt a.

“Tleipui, ngaihzawng ka neireng tih hre chungin khatia awm kha pawi I ti lo a” tiin bul ka han tan a, enge ka sawi leh dawn tih hre chak awm tak hian min melh a. “Mipa ka nia, hmeichhia zawkin khatia min sawmtlat chuan tlanchhuah a har tih pawh I hriaa”ka tih chuan za lo zet hian a nui a.

“Kima, ka duh thu ngeia kha thil kha thleng a ni, chuan I thiam lohna a awm lo. A pawi ber zawk chu ka harh fim lova, engmah pawisak ka nei lo, mahse chu aia pawi a la awm, bialnu I nei reng chunga khatia I awm duh tho kha a ni” a ti ta sak a. Engmah sawi belh tur ka hre lo, a sawi dik vek. Ka thiam chan nan keiin mawhphurhtir ka tum ran a, mahse a dik lo zawk leh tenawm zawk chu kei hi ka ni ta.

Khami ni, Tleipuii’n ka nihna dik tak min puan atang khan mahni indem reng rengin ka awm a, Feli lakah ka inthiam thei lo a, ka inpuang ngam si lo. Khuaah ka haw tlem phah a, Feli’n ka awmdanah a man anga, min then ang tih chu ka hlau! Ka tum loh leh beisei loh lutukin Tleipuii’n a rai thu min hrilh phei kha chuan awm ngaihna reng reng ka hre lo.

“Ka naupai hrehawm zual chhung min thlahthlamlo la, a bak chu ka tibuai lovang che” a ti.

Ka remti a, nep erawh ka inti.

“Bialnu nei reng lai I nih avnangin pasal atan ka ring ngam dawn chuang lo che a, chuvangin thla thum chhung chu ka duh ang angin I awm ve tur a ni”a ti hmak si a, hei hi a ni ka chet buai chhoh ta dan chu.

Khatia Feli pawh hrilh lova a tlai atlaia Mamita ka chhoh chhan pawh kha Tleipuii’n nau pai lo pui pai anga a insawi vang a ni a, ka hriat veleh rang takin ka kal a, engkim tihtawp hlen vek tuma kal ka ni.

“Ni e, ka bum che. Thla thum chhung I ngaihsakna dawn ka duh vanga ka thiltih kha a pawi ka ti, mahse I laka ka rilru puthmang hi I hmu thei chuang si lo a tiraw? “ a ti a.

Feli’n mn lo call tih hriain ka phone hmanlai te chuan a lo rak vak vak a, engmah a pawi sa tawh lo tih ka hriatin Feli chu ka biak that leh tur thu hrilhin ka dah ta a ni. Ka kawng zawh sual man ka hmu mek a, ka la hmu zel dawn anih hmel.

*Dr Zoa POV*

Krismas hma ni hnih la awmah Aizawlah ka haw chho a, karkhat vel zet Feli haw atangin a liam tawh. A awm lo chu a ngaihawm vung vung viau, a awm lo tih hre reng chungin a quarter ka lo melh leh thin. A status ka hmu fo a, Korean drama a en nasa viau a, a rilru la pengtu atana  a hman chuan a tha ka tihpui vek. A haw hnuah hna thilah vawihnih ka be tawh a, a bak chu ka be duh bik lem lo. A rilru buai lai ber remchana lo hman kha ka tum lem lo.

“Naktuk zan chu engtin nge ni dawn?”

Ka thianteho chuan an rel map map a, Tetea te inah kan inhmukhawm mek a, veranda ah dakin Feli te in lam ka lo thlir veng veng thung.

“Enge I ngaihdan Zoa?” tia min zawh chuan an sawi engmah ka hre lo.

“In tih dan dan a ni mai” ka han ti thla ve ringawt a.

“Anih chuan group ah a rel zawm theih tihna a nih chu. Tlangval pahnih hian duh dan in nei lem lo bawk a, Zoa lo haw lai a remchang bawk nen kan inah chaw chu kan eikhawm anga, a bak hun hman zel kha chu a tlachawpin aw” Tetea chuan a ti a, tha kan ti tlang aniang tuman kan sawisel lo.

Kan thian dangte haw hnu chuan ka la awm a, Tetea chu an veranda lamah koin Feli te in chu ka kawk a.

(Ka forever crush Pu Tetea Hmar 🤗🤭)

“Ka sawi kha, saw saw an in chu a nia” ka han ti ringawt a.

“Thianpa, nula emaw kan ngaihzawn dawn ka tia, naupang maw I lo buaipui?” a ti a, a nui ta kur kur a.

“A naupang chhe tawh chuang hlei nem” ka lo ti hmuk a.

“Tak taka, an la nau deuh a tih a ni mai a, a pa te chu ka hre tha lutuk alawm”a tih chuan ka thaw huai.

Urlawk ni anih avangin ka nu ka bazaarpui a, lei duh a ngah thei si, bazaar chhung hi a rei thei ngat ngat khawp mai. Mipui an tam si, khawvawt pawh sawi thei lovin thlan a tla dup tawh. Zion street ah ka nu nghaka ka dinlaiin Feli ka hmu thut a, ka va au teuh tak. Min rawn hmu ve tih hriat tak hian a rawn nui ver ver a, ka kutin ka lo hui zeuh a, a thiannu bulah chuan engemaw sawiin an rawn hawi a, chutah ka lam pan chuan an rawn kal ta a.

“Sir, engtikah nge I lo haw ve a?”a ti a, a hmel chu ka hmuh tum aiin a tha, a rilru dam tel se ka ti ngawih ngawih.

“Niminah ka lo thleng ve chiah a, in haw hma hlawm lutuk a, ka haw hma ve thei hleinem” ka han ti a, a la nui var var.

“Hei ka thiannu Zampuii ania, kan veng ami a nih hi” a ti a, a thiannu chuan min melh tha ngam lo, a lai ve deuh aniang.

“Naktuk zanah kan lo kal maithei ania, Tetea te inah chaw kan eikhawm dawn a” ka ti a, engvanga hrilh vek nge ka nih pawh ka hre lo.

“Awi, ka awm angem aw?” a tia, a chal a’n ti chuar deuh nang a.

Ka nu in min rawn zawm ve takah chuan kan inthen ta a, an kal liam thleng chuan ka thlir vang vang a. A nihna takah chuan hmeichhe dang chu nise min tawngkhum dan kha engtinmaha palzam loh tur a ni, mahse, amah a nit lat a, hnaih hi ka la tum khawp. In kan thlen chuan ka chau ve deuh nen ka room ah ka lut tlang nghal a, inbual nghal mai peih loin khumah chuan ka tlu zal a. Ka nau rawn lut chu ka lo mitsir zeuh a, ka khum bula sofaah chuan a thu a.

“Zo, pawisa min lo pe teh, zanin hman tur”a ti a, ka rin lawksa tho a ni.

“Ka nu I dil leh awm tho si a” ka tih chuan ka wallet, a thutna bul ami chu a rawn vawm phei a.

“A uikawm si, a phal tlem leh dawn lutuk” a ti a, ka lo nui ringawt.

‘Pocket money thlenga tum sak i la ngai hi chu inngaihtuah nasa ve hle rawh aw” ka’n ti hram a.

Pawisa ka pek hnuah a chhuak a, a la thawveng em em mai si a, rilru hi chu a tihah a ni. Nupui te nei duh se engtia chawm nge maw a tum le? Engpawhnise, inbual ila hah te pawh a zia deuh ang.

*Feli POV*

An rin aia hmaa ka haw thei chu ka chhungte an lo lawm hle a, Kima nen kan chungchang pawh ka nu leh ka naute ka hrilh a, min khawngaih ve hle.

“Mate, kan tana ruat loh hi chu chelh beh pawh tum ila a theih ngai loh ania” ka nu in a tih chuan a dik ka ti khawp mai. Tunah tikhawp hian ngaihdam min dil a, lo ngaidam pawh ni ila ka rilru hi a dam ve tak tak ka ring lova, amah chelh beh ka tum na mai mai anih hi ka hlau ve a ni. Ka la duh em em a, ka ngaih thinzia pawh ka inhria, mahse, ka ngaihdanah chuan hun hi han kal deuh se, min duh tak tak chuan min thlah hlen ka ring lo a, min nghah theih hi ka ring a, chung hun chu ka hmu anih chuan inngaihtuah that leh hi pawi ka ti miah lo. Chu ni loa tun leh tuna let erawh hi chu ka tum chhin eih lo.

Bazarah Zoa kan hmu hlawl a, ka thiannu Zampuii nen kan ni a, ral atanga kan hmuh chuan kan pu a nih thu ka hrilh mawlh mawlh a, kan va pawha kan inbiak lai te chuan ka thiannu chuan min vuan tawng tawng mai. A star tih ka hrethiam ve mai, a lai em em lehnghal. Zoa chuan nidang ang bawkin ka mitah min melh leh kar a, ka zam duh bik der lo. Min duh tih a sawi atang khan ka ring thlap, mahse, ka hnathawhna hmuna kan pu a nih avangin chutiang ang zawng chuan ka en ve thei lo, thil thleng thei tam tak ka ngaihtuah hian a ni thei hian ka hre ngang lo a ni. Chu lo rengah Mali kha ka khawngaih, keimah anga na tuar tur chuan ka ngaingam lo a ni ber ang chu. A inpuan zan khan zahpuiawm khawpin ka lawm tih hi a hre miah lo ang, ka rilru ka tihlan loh nan ka tum loh deuhin ka tawngkhum hial kha a nia. A zei lohzia te, tawngkam a thiam lohzia te kha ka hria, keimah ka zei lem loh vangin mipa zei tak te hian min hip deuh zel a, Kima pawh ka duh phah em em anih kha. Chumi letling chiah Zoa erawh chuan mak deuhin a rin tlakzia min hmuhtir thung a, ka ring ve tawp ringawt. Chumi avangin ka ngaihzawng atan ka duh e tihna lam erawh a ni kher lo, ka laka a thusawi kha ka ringhlel miah lo leh ka pawm lutuk kha mak ka tih em em zawk chu a ni.

Zanah kan inkhawm a, inkhawm banah ka pa in chhungkua hmankhawm tur, tumah chhuah  loh tur a tih avangin ka thiante chhuahnaah pawh ka kal ve thei lo. Kan naupanlai khan ka pa hi ka ning thei hle a, tun ang zanah te hian pawnah naupang dangte nena hun hman kha kan chak ve thei si a, chhungkuaa awm tur a ti ziah thin a, tun hnuah erawh chhungkua a ngaihpawimawhzia ka hriat phah ta. A thiante nena hun hman pawh chak lo a ni bik lo, a nupui fanaute uap kha a duh avangin a chakna kha a tlansan zawk tih tun hnu hian ka hrethiam ve chiah.

“Mate, I zo dawn tawh em ni?”ka nu in chokaa ka awm lai chu min rawn au a.

Krismas cake tur ka buaipui a, ka nauten min pui bawk a, ka pute ta tur ka siam kep bawk a, tihian zinga chei leh a la ngai dawn a ni.

“Aw, kan zo tep e” tih pahin kan chetna hnawk chu kan tifai a, inleng kan nei emaw ni ka nu chu a tawng lang lang ka hria.

Sitting room a ka va phei chuan Zoa leh U Tetea an lo awm tak tak, nimin khan lo len an tum thu a sawi a, ka lo theihnghilh tawh.

“Ehe, U Tetea te tehhlawl chu”tih pahin an bula thutna awlah chuan ka va thu a.

“Hei thianpa Zoa hian kan veng chanchin min zawt peih ka lo ti reng a, kan rawn inzui lut ta tak tak anih hi” U Tetea chuan a ti a. Ka nau te pahnih chuan min rawn melh rual nghal ngei ah!

Ka nu leh pa nen chuan an inkawm reng a, kei tak chuan an titi ka lo ngaithla vel mai mai. A khat tawkin Zoa nen kan mit a intawng a, ka hawisan rang thei em em lehnghal. Ka ngaihtuah hian ka zak deuh tlat, hnathawhna hmuna pu te nena inngaizawng kan hriatte khan zak thei lo kha kan lo ti thei em em a, chutiang ka ngaihtuahna ringawtte chuan ka hmai chu a ti sa hat hat thei. An haw dawnah kawt thlengin ka thlah a, U Tetea an kal hmasa ngei ah, ka va ngei thei tak.

“Ka rawn kal leh hunah chuan tumah ka rawn hruai tawh dawn lo a nia” Zoa chuan a ti sup a, chhan nachang pawh ka hre lo.

Ka mut hnuah min lo text a, in a thlen chiah thu min rawn hrilh.

*Sir, tinge in lo len a?*

Ka rilrua awm ang chu ka zawt tawp.

*Tlangval ka nia, nula rim chu a thiang a ni lawm ni?*

Tih min lo thawn let.

Ka dang leh der tawh, hmm…..

(Edit hman tawh lo, tunkar atan a tawpna a lo ni leh der tawh. Hun awm lo leh chep tak karah zan sawm lai mai kan tichhuak thei ta a, a ngaihnawm leh ngaihnawm loh lam ai mahin ka tan chuan ka huntiam anga ka tichhuak thei zel hi ka lawm tawk em em, chhiartu mi fel tak tak ka la nei zui cheu a. Lo him ula, inah lo tawm tha ula, kut sil fai uar ula, covid 19 lakah inchhungkua lo him zel ang che u.)