IRRESISTIBLE- XI

Eleven

*Dr Zoa POV*

Krismas tluang takin kan hmang zo a, chhungkuaa km taka kan la hman theih chuan a lawmawmah ka ngai. Feli pawh ka be zeuh zeuh reng a, ka thianten ruahmanna an neih chu tihhlawhtlin ngei tumin ka inbuatsaih ve a, ka zei lohzia leh helama ka lak tlak lohzia min hriatpuitute an ni bawk a, an thu thua awm chu ka tum nghet ve tawp. Ruaitheh zawh hnuah tihanpa Nghaka te in lam panin Govt.complex lamah ka inkhalh chhuak a, ani hi hun rei tawh tak damlohna avanga pawn chhuak thei tawh lo a ni a, thianho hian an theih ang angin kan tlawh ve thin. Veng hrang hranga awm darh tih takah a chang chuan inthurual hi a har ve deuh thin a, tun pawh midang hrilh lem lovin keimahin ka chhuak ta mai. Ka va thlen chuan ka rin loh deuhin Mali a lo awm reng a, mak ka ti viau dawn a, a mak leh vak lo. Nghaka nen hian keimah atanga inhria ni mah se an inkawmngeih em em a, Mali hian a vuina thu a thlenna ber pawh a ni. Ka thian dangte hian an tan lutuk tho na in Nghaka hian a tan zual a, hei hi a hrechiang ve pakhat bawk a, a theihtawpin a ngai pawimawh thin reng a ni.

“Zo, I dam maw?” a ti sap a. 

“Nangni pahnih hi in awmdan hi ka duh miah lo a nia aw” Nghaka chuan a lo ti nghal reng a, hriat a nei tawh a ni ngei ang.

“Ka va haw tawh ange, ka leng rei tawh a” tih pahin Mali a tho a.

“Zoa’n a thlah dawn che nia, motor pawh I rawn keng lo a ni lawm ni?” Nghaka bawk chuan a lo ti leh a, ngawi rengin an pahnih chuan ka lo en tawp. “Va thlah rawh, I haw tlang nghal dawn nia” a la ti ta deuh deuh a.

“Ka rawn leng ve dawn anih hi”ka ti nghat a.

“Min hmuh tawh tho hi, ka tha lutuk. Mut hahdam te ka duh tawh reng reng” a tih chuan ka ngaihdan ni lo viau mah se ka hnial duh ta lo.

Ngawi rengin kan inphur chhuak a,”Tah hian ka lo chhuk mai dawn mi? Ka nauin in vengah min nghak tho a, ka haw duh huna call mai turin min ti a” kawn kan thlen chuan a ti a.

“I haw tlang tih hrilh mai rawh” ka ti a, chutiang hnihnea hnutchhiah te zawng ka tum lo tawp mai.

“Zo, ka hrethiam ngai dawn lo che anih hi” a tih chuan ka khawngaih ve reuh lutuk.

“Mihringte hian duhzawngte, ngainatzawng te hi kan lo nei hrang si alawm tiraw?”ka tih chuan pawn lam chu a hawi a, min chhang tawh lo. 

“Hetah hian ka lo chhuk mai ang, kan in thleng min thlah chuan ka chhungten lo leng turin an beisei ang che”a ti a, an inthlen hma pengah chuan min dintir a tum a, ka tlan tlang ta tho. Mipa inti ve tan chuan hmachhawn ngam loh hi kan nei tur a ni lo. A sawi ang ngeiin a nu in thingpui in turin min ti a, ka lut ve nghal.

Mali inthlak zo chuan thingpui min rawn pe a, a nu leh a u nupui leh an naute te chiah an lo awm. Thingpui min pek zawh chuan ka bulah a rawn thu a, a nu chu a titi siam siam a, nu ngainatawm tak a ni.

“In inkawpna a rei ve tawh bawk a, I nu nen inneih lam hi sawi a hun tawh lo maw kan lo ti cheu a, in pahniha in lo lut chu a tihzia hle mai” a tih chuan Mali hian engmah a lo la sawi lo tih ka hre chiah.

Kan inkawp loh thu tha taka sawi mai hi a tha in ka hria, ka tawng dawn chuan Mali chuan ka kawrah a rawn pawt zauh a, ka va en chuan a lu a lo thing a, a ngaihna hre loin ka thingpui chu ka in ta ringawt.

“Nu, kan inpeih hunah chuan kan sawi mai ang” a ti a, a thaw deuh halh a.

“Inkawp reng hi a mawi lo hma a, engmah nghah ngai in nei tawh chuang lo a, a rang lamin in rilru lo buatsaih rawh u”  a ti a. 

Ka haw dawn chuan ka motor dahna thleng Mali’n min thlah a.

“Min hrethiam rawh aw, kan inthen tawh tih sawi hi harsa ka ti em a ni” a ti a, ka hrethiam ve lutuk.

“Mahse, an hriat loh chuan kan pahnihah beisei an nei zel a, nakinah a thawng thut anga, an hrethiam lo zawk dawn asin” ka ti ta tho.

Zanah chuan ka nute an inkhawm a, Tea nen in kan nghak a, ka bula arawn awm ve zawk atang khan a fel ve rih viau a, a chhuak tam lo khawp mai. Feli thiannu nen an la inbe tluang ve zel niin ka hria a, amah hi puitlin phah ve se hi ka ti khawp mai. Whatsapp lama Feli chaw ei hmaa ka text kha min la chhang miah lo. A chhiar vek tawh tho sia, a inkhawm tih dawnin tunah pawh a online reng, min la chhang chuang lo. Ka dawhtheihnain a tlin tawh lo, ka call ta ringawt a, vawihnih a ring a, a reject hmak. 

‘Tiang zawng khan maw I awm dawn’ tiin ka phun sap a, ka room ah inthlak turin ka lut nghal a.

“Khawnge I kal dawn? Ka leng dawn lo I ti ve sia” room atanga ka chhuah chuan ka nauin a lo ti a.

“Ka chhuah a ngai leh thut a, khawi I bike ka lo hawh”tih pahin chabi ka dil a.

Feli te veng lamah chuan ka tlan chhuak leh ta vang vang, engang chiahin nge ani hi ka ngaihpawimawh tih a hre tur a ni. An in ka thlen chuan a lo reh deuh thap a, a awm lo emaw ka ti hman lek lek. Doorbell ka hmeh vawihnihnaah a rawn hawng a, min hmu thut chu mak tih hmel zet hian min melh reng a, luhtir nachang pawh min hre lo.

“Ka lo lut thei angem?” ka tih chuan ka luh nan a ding sawn deuh a, ka lut zui nghal a.

“Eng nge I lo tih dawn?” tih pahin min zui ve ta tho.

“Eng dang nge ka lo tih anga” tih pahin ka thu a, ka thutna lo lamah a thu hmak. A phone a bih ngar a, min ngaihsak angin a awm duh miah lo.

“Feli..” 

“Movie ka en min lo tibuai suh”

Ka nui hak a, dik lo a awm tih ka hre mai. Hman zana Tetea nen kan len hnu kha chuan min be chhe lutuk bik lo tih ka hre ve tawh a, awlsam taka a inhawn ring lo mah ila zawi zawiin a thinlung hi ka neihsak ve dawnin ka hre hial a nih kha. Tuna a landanah pawh hian lungawi lohna engemaw tak a nei a ni ngei ang. A bulah chuan ka han insawn a, a che duh eih lo. 

*Feli POV*

Ruai kan theh zawh chuan ka thianteho nen len kual mai mai tumin Lalbawiha bolero in kan chhuak a, kum dangah pawh ruaitheh zawh len hi chu kan uar hrim hrim a, kan ngaihzawngte thlimin kan chhuak thin. Mak deuh maiin kuminah chuan tumah thlim ngai lovin kan single dial a, a nuihzatthlak zawk. Kal duhna leh kal tumna em em kan nei hran lova, Aizawl khawchhuang fan kual tawp kha kan tum chu a ni mai. Chutia kan kual kan kual hnu chuan kan thiannu Kimtei kan hrechhuak thut a, ani hi Govt Complex-a awm, school kan luhpui thin a ni. A u damlo enkawl hian inah a awm chawt thin tih kan hria a, kan tlawh khat bawk nen tlawh chu tha kan ti tlang. An in lam chu kan pan ta nghal a, an in peng kan thlen chiah chuan car pakhat hi a rawn dawk chhuak dalh dalh a, ka thiante tan chuan car satliah tak a ni ngei ang, mahse a chhunga chuang pahnih vang chuan ka thin a lo na ngut ngut thung.

“Feli, in pu kha a ni chiang mai” Zampuii chuan ka hriat tawk lek hian a rawn la ti zui.

“ah,, aw.. aniang” ka ti bah nawk a.

Kimtei te ina kan awm chhung zawng chuan nuam pawh ka ti lo. Amah lah chu kan len avangin nuam a la ti em em zui a. Kan theitui inna no a sil lai chuan ka insum thei thlawt tawh lo, ka va pui ve a.

“Kimte, nichin khan Dr.Zoa te kha ka hmu tlatin ka hria” ka ti a.

“Aw, ka u an rawn kan a, in lo thlen hma chiah khan an haw a” a ti a.

“Tunen nge an lo kal a?”ka tih chuan mak a ti deuhiin ka hria.

“U Mali nen an nia, an lo thlen laiin ka awm lova, an haw tur chiah kha ka hmu a. Tinge min zawh teh daih a?” a ti ta nge nge.

“Ah, englo, khuta ka hnathawhna hmuna kan pu alawm” tiin ka nui ta var var a.

“E, aw, ni dawn tak” a ti ve ta a.

Ka thin a rim ngut ngut, ka haw hnu pawh chuan a message chu ka chhang duh lo. Tinge bialnu nei reng chungin min tihbuai a thulh chuang loh? Ka ngei lutuk, ka bulah chuan awm se ka chum hrep hrep duh hial ang! Hetianga a awm chiah hian ka en dan a lo dang tih ka inhrethiam chiah lehnghal! Ka chhungte inkhawm tur pawh chu ka pum nawm loh chhuanlamin ka zui ve peih lo. Mipa hi an tenawm emai, Korean movie en ila, rilru a hahdam ber.

Ka en tui dawn chauh a, doorbell a rawn ri ral ral a, ka hawng duh mai lo. A rawn rik nawn leh chuan a pawimawh a nih ringin ka va hawng ta nge nge a, pawnah chuan Zoa a lo ring reng. A kawr hak te chuh.. a inah pan si, tun ang huna hetiang themlem lutuk hakte chu a! Ka khawngaih tho a, mahse ka be chak thlawt lo a ni.

Ka bulah a rawn insawn a, ka movie en lai chu a rawn bih ve duk duk a, ka la be duh chuang lo.

“Zonuam atanga in veng hlatzia hi I hria em?” tih pahin ka phone min laksak.

“Khawi, min lo tibuai suh” tih pahin ka  phone chu chhuhsak ka tum a.

“Ka thusawi chu I hria em?” 

“Aw, leng tura ka sawm pawh I ni lo a, I duh leh thu ve mai mai la” ka tih chuan chung lam a melh ralh a, a nui hawk.

“A vawt..” a ti leh daih.

“ I duh leh I bialnu Mali bulah a vawh thu chu hrilh la, a lo kuah lum duh ang che” ka ti salh a.

“I bialnu a?” tih pahin za lo zet hian a nui leh.

“Aw, I bialnu, vawiinah pawh  I lenpui kha maw le” ka ti ta phawng. Ka va inchhir tak, tunah chuan ka thik emaw a ti tawh ngei ang.

“Aw, chuvang a ni maw kan lo tum len em em?”a ti ta reng a.

“Ka buaina a ni lo” ka ti tak na a, a hmelah tifuh a inti tih ka hre mai.

“Nangmah chiah hi duh ka nei tih lo hre tawh rawh aw” tih pahin min kuah ta hlu hlu a. 

A mak lutuk, ka thinrim ka rin tehreng nen ka thlamuang huai a nih chu! Keimah leh keimah chu ka inngei zawk, hmanni lawkah bum ka tawk a, tunah tihian midang bulah ka awm leh a nia. Chu ngaihtuahna avang chaun min kuahna atangin ka talchhuak a, mahse, ka zep lo, Zoa kha ka thlamuanpui tih hi.

“Fel, bul min tan pui chu a harsa viau em ni?” a ti a, chhan ngaihna pawh ka hre lo.

“Mali nen chuan engmah a awm tawh lo, vawiin tlai pawh kha kan lenna hmunah kan inhmu a, ka thlah haw ringawt a nih kha. Chuan, bolero a rawn chuang zingah khan I tel a ni maw?” a ti a, ka hawi sawn daih.

“I rilru dik tak hriat hi chu ka duh tawh ngawt mai” a tih chuan ka inngaihtuah nasa ve tak zet.

Ka laka a awmdan hi a der ni theiin ka hre lo, mahse, ngaihzawng dang han nei leh mai tur hi chuan hma ka la ti, bakah ka ring ngam dawn em? Engmah hi ka hrethiam lo.

“Sir..”

“Office ah chauh in sir ila” a lo ti dam dup a. Ka lei ka chhuah zuk.

“Kan pu I nia, a nuihzatthlak e” ka tih chuan min rawn kuah leh a, sawi tur hi ka hre lo ve em a ni.

“Tun atan chuan in pu ka ni lo angah ngai phawt ang aw. Chuan, kan pahnih inkar hi a awlsam sawt dawn a lawm” a ti a, a dik viau mai.

“Mali khan min tihbuai dawn ai chuan engmah kan inkara thlentir loh ka duh zawk” ka ti a.

“Chuan, chutiang bawk chuan Kima pawh..” a lo ti a, kan nui dun thei ta.

Ka chhungte rawn haw hnu thlengin a leng a, ka nu nen an inkawmngeih viau zel, ka pa erawh chu a zak leh tawh aniang, an room ah a awm daih. A haw dawn chuan tshirt ringawt a ha bawk si, ka pa kawrlum ha mai se ka duh.

“Kan inngaizawng tan ve chiah a, I pa tihbuai nghal chu a inthlahrunawm emai. Tetea te inah ka kawi mai ang, a kawrlum ka han risk ange” a tih tak kha. Engvanga kawrlum ha lo nge a nih ka zawh lah chuan, “Ka message leh call I chhang duh si loa, hmuh che ka duh tawh lutuk ah engmah ka lo ngaihtuah hleinem” a ti leh et. Gate bulah a bike a dah a, tun ang khawvawt hnuaiah kawrlum ha bawk si lo, bike lehnghala a lokal chu ka khawngaih ve lutuk tlat. 

“I thlen veleh min lo hrilh la aw” ka tih chuan a bu nghat a.

 A ngawi vang vang a, “Min ko chhin teh” a tia nih chu.

“A ho e a” ka tih lah chuan min tur et et sia, “Zoa “tia ka koh tak sap kha.

A bike-a a chuan hnuah min pawt hnaia, min fawp zeuh. A rei loa, mahse ka tha a khur nasa lutuk!

Inchhung ka luh chuan ka nu leh ka naute chuan min lo nuih thaw a, ka lai kual vel vek. Ka nau te pahnihin ka room ah min zui lut a, an hriat chak ka hre reng sia, engmah ka sawi duh mai lo.

“Keichu U Kima a chhe lo ka ti zawk” Pekpeki chuan a ti a, Tatei’n a lo nghawk zawk.

“Mahse U Zoa kha chu a fel hmel e, bakah a chhiat zawkna ka hre lo” Tatei chuan a ti a, ka nuih an ti za dun reuh.

Kima leh Zoa chungchang an sawi chhunzawm mawlh mawlh a, thil thleng mek chu ka lo ngaihtuah daih thung. Zoa chu ni lo se tumah ka hnaih mai theih ka ring lo, mahse, Kima nen kan boruak a that loh chhoh atang khan min ngaihven tura ka ina a rawn lut ringawt thinte kha ka thlamuanpui theihzia ka hre ve kar a, hei vang hi a nih ka ring tuna hetianga kan awm tak nachhan pawh hi.

*Ka thleng chiah e*

Ka whatsapp message chhiar pah chuan ka nui var var a. Rei vak lo kan in text hnuah kan inmangtha a, kan mut ve ta. Muhil mai loin ka ngaihtuahna chu ka kawm chhunzawm a, kan hna kan zawm leh hun tur ber hi ka huphurh, kan thawhpuiten an hriat chuan mak an ti ngawt ang.  Ka phone chu a rawn vibrate chuan ka lukham atangin ka la chhuak vat a, Kima’n min lo call chu niin! Ka en reng ringawt, a ring ral thlengin screen chu ka melh ta vung vung a. Message a rawn thleng chhunzawm lehnghal zat a.

*Fel, inbiak ka duh, khawngaihin..* 

Notification bar atang chuan ka bih a, ka open duh ta lo.

Ka ngaihtuah hian Kima tluka mipa duhthusam hi ka neih theih ka ring tawh lo. A lerh ve deuh pawh hi awm tihna chin ka nei reng, tiang khawpa mipa chhelo hi chu hmeichhia ten kan duh theuh ang chu. Ka haw hran lova, mahse ka ring nawn tawh dawn lo tih erawh ka chiang ngang thung. Ka rin ngam leh rinchhan tur an awm tawh a, amah vang mai maia nghing hi ka tum lo bur.