IRRESISTIBLE-XII

Twelve

*Dr Zoa POV*

Tetea te inchhung ka lut chu ka nui vur vur a, an chhungkuain mak tih hmel zet hian min lo en thap a.

“Apa Zo, tinge I nuih?” Zosangi, an fanu upa zawk chuan a lo ti a.

“I Pa Zoa khan naupang a ngaizawng a, a naupang tha leh a nih kha” Tetea chuan a lo ti a, an nu nen an innuih tak ang vur vur a.

“Engati nge tshirt nen chauh tun ang khawvawtah I rawn chhuah a?” an nu chuan a ti a, an heater ai lai chu ka thut hnaih suah suah a.

“Kawr lum ka hawh duh, tiang ringawt chuan kan veng ka thleng zo lo ang” ka ti a.

“Tikhan in veng atangin I rawn thleng chho thei tho sia” Tetea chuan a lo ti chat, ngeiawm thei lutuk.

“Khawi maw in pa kawrlum I phal ber chu va la teh” tih pahin ka han nghawk a, nui ruh ruh chungin an room a pan tak kha.

“Bawiha, I che fuh ta nge nge a va ang ve”

“Zothansanga hi a che fuh lo ngai lo”

“Naupang zûnah kan han uai tha leh dawn chu a nih hmel si ah.. “

“Naupang hi ti ve ziah lo mai teh a”

Ka hnungah chuan a rawn beng thak thak a.

“Sunday school ah kan zirtir nasa ve em a, naupang chhia ang hian ka lo en leh thin” a ti a, min tiel hi a bansan dawn lo a nih hi.

Kawng tluanin Feli ka ngaihtuah thla char char, a changin ka lo nui leh vur vur thin a, ka thianpa sawi ang chiah kha ka ni mai, tleirawl tirh ngaihzawng nei te pawh ka ang alawm le. In ka thlen hnuah ka han in report vel ta thlap chu a nia, ka tih ngai miah loh hi engzat tak la ti zel dawn chu maw? Engpawhnise, thianpa te nupa zarah lum nuam takin in ka thleng e.

Zan tin len thu awm bik suh, ka kal loh zanah erawh phone in uluk takin kan inbe thin, whatsapp a inbiak te hi ka peih ngai miah loh thil a ni a, mahse, ka chuk ve ta koh koh mai chu anih hi. Kumhlui thlah zan hman dan tur ka ngaihtuah ru ve reng a, a chhungte phalna thlapa hruai chhuah chu ka tum khawp mai. An chhungkuain an hman leh ka ring tho a, chhungkaw inkawmngeih leh inlungrual tak an ni a, midang an mamawh em em in a lang lo. Mahse, kan hna kan zawm hunah hetianga zalen hian kan inzui theih ka ring tawh chiah lo. Thingtlangah chuan thuthang te hi a nasa hma a, tum loh deuha mualpho hi a hlauhawm ve tlat. Ka tan chuan thil pawi tak a ni lem lova, Feli ka venthawnpui a ngai tih ka hria. Hmeichhiate hmingchhiatna hi a ho a, kumkhaw hmingchhiatna pawh ho te a ni tlat.

Nilengin ka motor siamtirin ka buai a, kum a thar chuan hna zawm nghal mai a ngaih dawn avangin ka inhma khua ve a ngai a, zinga kan inbiak bak kha Feli nen kan la inbe lo. Ka chhuah dawn khan ka call a, a pickup thei lova, tunah chawhnu dar 3 a ni tawh a, min rawn call back chuang lo. A buai a nih ringin ka call nawn duh ta lova, zana chhuahpui ka tum thu pawh ka hrilh lawk duh ta lo kha ania, harsatna a awm em lo ang chu. Dar 5 velah in ka thleng thei tawk a, ka tum loh leh rin loh deuh thil ka va tawng leh ta nghal a. Sitting room ah chuan Biakhmingi leh Tea an lo inhmachhawn ran a, ka nu chu lungawi lo tih hriat zet hian single sofaah a lo thu bawk a, ka lut chu hria ang pawhin an awm lo.

“Hei enge a awmzia?” ka tih chuan an rawn hawi chhuak thap a.

“Biaki hi a rawn kal ve ringawt a, ka haw duh tawh lo a ti tlat a nih hi” ka nu chuan zawi sap hian a ti a.

An bulah chuan ka va thu a, thil kaldan hi a dik lo chho dawn tlatin ka hria.

“Tea, I hruai em ni?” ka tih chuan a lu a thing a, “A rawn thlen lai pawh hian ka awm lo, ka nu nen kan chhuak daih a, kan thlen chuan kawtah hian a lo awm reng a” a ti a.

“Engpawhnise Biaki, ka va thlah haw phawt ang che” tih pahin ka ding a.

“Ka haw dawn lo, kan mualpho laklawh tawh, ka pasalin min pawm thei tawh lo. Chuvang chuan Lza bak pan tur ka nei lo” a ti ta bur a.

Ka pa a awm lova, ka u te lah an nu te khuaah Krismas an hmang daih bawk si, rilru a buai map mai. Ka beisei loh thil thleng vang pawh chuan ka lawm lova, ka nau hmel ngui lap chu ka khawngaih bawk. A thil tihsual khan a lo la kalsan miah lo chu ka lainat zual a, ka hlauh em em thin chu a chungah a thleng ta anih hi.

“Anih chuan, ka pa rawn haw phawt se kan sawi tha dawn nia. Tea, ka room ah min rawn zui rawh” tiin ka room lam ka pan a, min rawn zui ve nghal a.

“Engtia chinfel nge I tum?” ka jacket khai that mawlh mawlh pah chuan ka ti a.

“Ka hre tawh bik lo, ka buai zo vek tawh. Ka hmangaih miah loh neih hi ka chak I ring bikin ka ring lo a, mahse, mi nun tichhetu ka ni tho bawk si” tiin a sam chu a tuai puat a.

“I duh lo chung kei chuan nawr luih che ka tum lo. Mahse, huaisen taka I tihsual pawm thei tura thutlukna I siam erawh chuan I lam ka tang thung ang” ka ti a.

“Duhawmi’n engtinnge a ngaih ang? Zo, ka buai vek. Duhawmi kha ka duh tak zet asin” a ti a, ka khawngaih ve tak zet.

“Ka pa lo haw kan nghak phawt ang. Ka nu leh ka pa hian an pawm theih mai ring lo la, engpawh hmachhawn thei turin I rilru lo siam ang che” ka ti ta a.

Ka inbual zawh hnu chuan inhnuai lama chhuk thla mai lovin Feli biak tumin ka phone ka lek chhuak a. A ring quit leh dawn emaw ka tih laiin a rawn pickup hram.

“Aw, U Zo.. ? “

Feli nau tu zawk nge emaw an ni tih ka hre mai.

“I u a awm nange?” ka tih chuan, “U Kima nu damdawiin an rawn panpui a, a kal ve a. A phone hi a keng lo a” a tih chuan ka thin chu a rawn phu nghal deuh dup hian ka hria.

A haw veleh min rawn be turin ka ti a, kan inbiakna chu kan titawp ta a. Engtin emaw hian ka awm, ka thin a rim tih dawn chuan a ni chiah pawhin ka hre si lo a, ka hlauthawng ni berin ka hria. Kar khat pawh tling lo aliam ve chauh a, hetia hlauthawng deuh a nun nghal tawp chu ka thiam dawn hauh lo. Ka pa rawn haw laite chuan chhuah thlak pawh ka tum lo, ka room ah ka vei chhen a, in lamah buaina awm bawk, lehlamah rilru tibuai tawk chiahin Feli a lo awm bawk, ka ngaihtuahna a buai vek. Ka nu in min rawn koh takah chuan ka chhuk ta hram a, ka naute chu an lo awm tawh lo.

“Khawnge?” ka tih chuan, “Tea’n  a va thlah a nih kha. Tun leh tunah engmah a tih theih chuang lo a, I pa in va haw phawt se hma kan la ang a ti ta a nih kha” ka nuin a ti a.

“A thuhrimah Tea ngaihdan te pawh zawt ve ula” ka ti a.

“Ngaihdan pawh a nei lo a nih kha. Lianzuala hi chuan mi a va tibuai tak” ka pa chuan room atanga rawn chhuah pah hian a ti a. an rilru tur ka hrethiam khawp mai. Kan naupanlai atang tawhin Tea hi chu a dang zar bik reng reng a, naupang ber a nih vang hian kan hau chiam ngai lo bawk nen tun hnua han tih hluai hi kan hreh tlangte pawh a niang.

“Chaw ei phawt ang u, inkhawm kan duh dawn” ka pa bawkin a ti a, ka phone a rawn ri ve nghal chiah. Sitting room lamah chuan ka lut tlang a, phone chu ka pickup pah a.

“Nghaka a thi a nih chu”

Ka thianpa Seph-a a ni. Ka kut chu a khur ve dawt dawt mai, ka va lenna pawh a rei lo tehlul nen, enge thil awmzia nit a?

“A that loh thu kan hre si lo a” ka ti chuai raih.

Zing atanga a chau thut kha tlai lamah chuan a zo nghal der a ni awm e, min thawng takzet. Chaw ka ei sawk sawk a, Nghaka te in lam pan chuan ka inkhalh chhuak ta nghal a. Ka va thlen chuan kan thian thenkhatte an lo awm tawh a, a nu in min lo tahkhum nasa kher mai. Keipawh ka mittui a hnam ve sawk, naupan tet ata inkawm char char kan ni a, kan tleirawl chhuak kha sual kawng a zawh ve ta zeuh a, chutah accident a tawk chho ta bawk nen a khawvel hun hman dan chu a inher danglam ta dawrh mai a ni. Hmundangah kan lo awm bo nasa bawk nen ka haw chang hi chuan an inah ka tam ve thei hle a, tun tum erawh ka lut tam lo. Chu chuan ka thinlung a ti na bawk.

“Feli’n a call tlang thei lo che, be lawk ta che” Tetea chuan a phone a rawn lekkang a.

“Nakinah ka be mai ang” ka ti a. Tunah hi chuan ka be chak hlawl lo. Ka thin a rim tun a, tunah kan inbia anih chuan ka inthunun zo lo ang tih ka hlau.

Dar 9 veleh kan inah kan thianhoin kan phei dial a, tlaivar kan tum tho avangin kan va hahchawl ve lawk a ni. Nghaka chanchin chu kan sawi sap sap a, ka thianteho chuan niminpiah lawk pawh khan an lo kan a nih chu, kei lah chu keima buai buaiin ka buai a, a hnai bera awm e ti loin ka haw chhoh hnuah vawikhat chiah ka tlawh. Chu pawh titi dunna hun kan nei loa, Mali ka thlah haw ta daih a nih kha. Tui vawtin ka intleuh a, khua vawt viau mah se ka thinlung sa hi a reh deuhin ka ring.

Dar 11 rik hma deuhin tlaivar tumin kan thawk chhuak leh ta a, inchhung kan luh chuan Feli te thianho chuan ruang an lo kil thap. Kan haw phei khan ka bia ang ka ti kha ania, ka rilru a lo buai deuh nen ka lo theihnghilh daih. Min rawn melh zawk a, a hawisan hmak. Rilrua lo thinrim ve deuh sa bawk nen ka va ngaihven duh rih lo. A hnu deuhah an rawn insawn chho a, thalai an rawn kal belh zel bawk nen keini thianho pawh midang thutna kianin pawnah kan insawn chhuak ta a. Dar 1 velah Feli chu a thiante pahnih nen an rawn chhuak a, ka zui nghal vat.

“Khawnge in kal dawn?” ka va umphak chuan ka ti a.

“Kan zung lawk dawn a” Zampuii a tih khan min lo chhang a.

Zui ta zel lo chuan ka lo nghak ta a, an rei zek lehnghal. An rawn let leh chuan Feli chu ka lo tiding a.

“In thiannu hi ka lo be lawk ang aw” tiin a thiante hnenah ka ti a, ngaihtha takin an luhsan a.

Ka motor dahna lamah ka kai phei a, engmah sawi loin min zui ve mai. Motor chhungah ka thutfel tir hnuah ka lut ve a, khawi lamah nge kan kal dawn ka hre bik lo, ka tinung a, ka tlan chhuak nghal. Chawlhhmun lamah ka tlan pui a, a mut a chhuak ve deuh tawh tih ka hria. Motor glass ka down sak a, thli thaw leh boruak vawt deuh raih chuan a tihharh deuh ka beisei. Kawng kual zau laiah chuan motor ka tiding a, ka chhuak zui nghal a. Rei vak lo hnuah a rawn chhuak ve a, vawiin nilenga a awmdan khan ka thin tirim viau mah se amah ka hmuh hi chuan thinrim har ka ti.

“Engmah min zawt suh” ka kawngah min rawn kuah a, a duh ang chuan ka awm leh phawt dawn chu a nih awm hi.

*Feli POV*

Ka rin loh deuhin Kima kan inah a rawn lut hlawl, a call ka lak duh loh zozai vang khan a rawn lan hi ka ring lo kha ania, a rawn lut heu mai. Ka nu in inhnuaia ka ar chaw pe lai min rawn ko a, inchhung ka luh chuan Kima leh ka nu chu an lo titi dun mawlh mawlh a.

“Nang maw?” ka ti lut hluai a.

“Ka call I chhang duh si lo a, ka lokal ve tawp” ka hriat tawk lek hian a ti sup a. Kut sil turin ka kaltlang nghal.

Vawiin hi urlawk ni a ni a, ka naute nen bazaar lama chhuah phei a, zanina ei tur vel lei tum kan ni a. Zoa pawh a motor entir a tum avangin kan haw rual theih ka beisei ru deuh a, tlai lama inhruai tir kha ka lo rilruk hrim hrim.

“Mate, hei Kima nu hi damdawiin an rawn panpui a nih awm chu” ka nu in a tih chuan mak ka ti deuh.

“Engati nge a?” Kima chu ka melh pah a.

“Hmanzana rawn biak che ka tum zan atang khan a buai tan a, khuaah doctor a awm silo a, min lo biaksak tura rawn tih che kha ka tum a. Phone kha I la thei ta bawk si loa, a tukah khan damdawiinah kan luh pui ta ringawt a. A tha zel tura kan ngaih laiin nimin atangin a zual leh deuh a, helamah kan rawn chhohpui ta mai a nih hi. Stroke a ni awm e” a ti ta duah a. Ka inthiam lo ru kher mai, anihna takah chuan ka hna leh ka mimal nun hi kalkawp tir ka duh ngai lo.

“A pawi ka ti hle mai. Enge tunah a an?”ka ti a, Kima chhungte hi an fel a, kan inpawh em em a, kan inthen hlim pawh khan a nu leh a u khan min rawn bia a, Kima khawsak dan an thinur zia an rawn sawi nasa thin. Ka tan sawiselna tur an awm hek lo, helai hmun an lo thleng tawh anih chuan kan ve ngei chu ka tum.

Ka nau te hnenah chuan ka chhuahpui theih loh thu leh Kima nu damloh thu chu hrilh pahin ka insiam mawlh mawlh a, chawhnu lamah a theih tak leh bazaar a inhmu turin kan ti a, Kima nen Durtlang hospital lam panin kan inzui chhuak ta nghal.

“Fel, helai hmun ka lo thlen leh takah chuan rawn tlawh loh che kha harsa ka ti ve em a ni. Ka nu in a hmuh che chuan a hlim ngawt ang “ a ti a.

“Kan pahnih inkar engmah sawi ka duh lo a nia. I nu ka ngaihpawimawh vang leh min duat thin em vanga kal ka ni tih I hre dawn nia” ka ti a, a bu nghat.

Hospital kan thlenin Zoa biak ka tum a, ka bag chu ka hai chhuak vek tawh. Phone reng reng ka lo ak chhuak pek lo. Engpawhnise, ka rei em lo ang chu maw ti chungin ward lam chu kan pan a. Nu Hmatei ka hmu chu ka rilru a na vawng vawng, U Ziri’n a kut a lo hmeh sak a, a cher kuam mai.

“Nu, Feli a lo thleng a nia” Kima chuan a bengbulah a ti sap a.

Nu Hmatei chu thei leh thei lo hian a kut a rawn phar a, ka lo vawnsak a, tawng harsa  a tihdanah ka rin ai daihin a natdan hi a serious tih ka hrethiam mai. ‘

Rei vak lo awm tum kha nilengin test chi hrang hrang tiin kan buai ta a, an buailaia hawsan daih chu ni theiin ka hre bawk si lo, ka rilru erawh a nuam zan lo, phone tal keng ni ila chuan Zoa pawh chanchin ka hrilh thei tur a nia.

In ka thlen chuan dar 6 a lo ri der tawh, ka chau ve tak zet. Inbual hmain ka phone chu ka la hmasa a, Zoa biak tumin a number ka hmetchhuak chiah, Zampuii call a rawn kal nghal zat. Kimtei u thih thu min rawn hrilh. Zoa pawh be ta lo chuan ka inbual sawk sawk a, chaw ei loa kal chu ni thei chiahin ka hre siloa, tlem ka ei a, ka ei pah chuan ka nu leh pa hnenah thil awmzia chu ka hrilh pah mawlh mawlh bawk a.

“Inthuam lum la, in tlaivar ve dawn nia. Tiang hunah tak hian thiante hi an hlu ania” ka pa in a ti a.

“A u awm lohte chuan zanin a nuam awm lo” Pekpeki’n a lo ti a, a hmel a nur nghal sung.

“Bawihte, thihna te chu tupawhin kan tawk vek thei a, kan dam anga, keinite chuan zanin ang hi kan la hmang fo dawn alawm” ka han ti ve ngei a.

Ka thianten min rawn sawm a, motor ka luh rualin Zoa ka call nghal, a ring quit thak thak a. Kimtei u kha an thianpa anih chuan an kal ve ngei chu ka ring, U Tetea chu zak deuh chung hian ka call ta ringawt a, ani chuan a lo la nghal vat. Ruang bulah Zoa chu a awm thu leh nakinah min rawn biak tur thu min hrilh a, a lungawi vak lo a nih ka ring sa hrim hrim.

Kimtei ka hmu chu ka mittui a tla ve zawih zawih, an in awm nasa bawk a, a tuar ngei mai. Ruang kan kil pui ve a, a tap khawng deuh nghal zel si a, an inhnuaiah te kan awmpui leh rih thin. Dar 11 rik hma deuhin ruang kil turin kan inzui chho leh ta a, Zoa pawh ka hmu ve ta hram. Ka hlau deuh bawk sia, ka melh tha ngam lo hrim hrim. Ka zun chhuak pawh ka insum char char a, a tawpah chuan ka insum thei tawh lo, Zampuii leh Tenuni chu ka sawm a, anni pawh an zun a lo chhuak reng sia. Pawn kan chhuah chuan Zoa’n min rawn zui nghal a, dik tak chuan a mizia tak tak ka la hre bawk si lo a, min hauh hrep loh pawhin min biak duh loh kha ka ring a nia. Ka thiante bulah min biak duh thu tha taka sawiin min chhuahpui a, thinrim angin  a lang miah lo. 

Motor a tiding a, a chhuk nghal nalh a, ka zui mai ngam lo. Mahse, thil ka tisual pawh a ni lo a, enge ka hlauh viau na tur awm tiin ka intihuai lui a. A bulah va dingin a kawngah ka kutpahnih ka rawlh lut a, ka kuah a, engemaw sawi tumin a che a.

“Engmah min zawt suh” ka ti ta sup a.

Ka kut chu lo vuanin amah en thei turin min pawt let a, min kuah ta vang vang a.