IRRESISTIBLE-XIII

Thirteen

*Dr. Zoa POV*

Nghaka thlan siamin kan thianho pawh kan thawk chhuak a, mak hi ka la ti reng. A hun hman dan hre mah ila hetiang teh thuta min kalsan hi chu ka lo ngaihtuah ngai miah lo kha a nia, mihringte hian hma hun kan va hre lo tak em! Nimin lamah a ruang thlak zawh khan Feli te inah ka phei a, zan lama lenkhawm kan duh dawn vangin ka va tlawh ta hram a, a tlaivar kha a zo lo deuh aniang, a khua a lo sik deuh hluah lehnghal. Pawn khawvawtah kha chuan ka chhuah rei pui hran hauh lo a, kan let leh vat kha a nia, chutia kumthar boruak nen nuam sam loa a awm chu ka khawngaih reuh ngei mai. A damdawi tur tukinah ka thawn phei a, ngeih turah ngai phawt ang. Tlaiah chuan chaw ei an lo siam avangin kan han ei leh phawt a, thiante pawh zai tawh lem lovin ka haw ta a. Feli chanchin ngaihven tumin ka call a, a pickup thei lo, message ka hnutchhiah ta ringawt a.

Dar 7 velah chuan in atangin ka chhuak a, Nghaka te ina kal tum ka ni na in Feli te inah ka tlang ta zawk. Ka va thlen chuan Nu Mapuii pawn rawn chhuak tur nen kan intawk chiah a.

“Awi Zoa, I lo kal thei hlauh chu a va lawmawm ve. Matei khawsik hi a reh tha duh lo riau ania” a lo ti mawlh mawlh a.

A room lamah kan inzui chho a, ka va luh chuan ka hmuh tum loh deuh Rinkima ka va hmu tel. Feli chu a muhil nge a maimitchhing a, min hmakhalh zel hi ka ngaihdan chu a ni lo deuh.

“Nu Mapui, ka va chhuak phei tawh ange, naktuk haw thlak lawk ka tum si a, tihfel ngai ka la nei bawk si” tiin a tho a, Nu Mapuii nen an inzui chhuak.

Feli khumah chuan ka va thu phei a, an drip khai chu ka han la thla a, a damdawi ei chu ka thlak a ngaih hmel. A ban ka vawn laiin a rawn harh a, min hmuh chuan a rawn nuih seih a, a chalah ka lo fawp.

“Kima kha a haw tawh mi?” a ti a, ka lo bu nghat a.

“Ka be miah lo ania aw” a tih chuan ka nui hak.

“Ka thinrim I hlau mi?” ka ti a, a mit chu a khap sak a, a biangah ka piai a.

“I damdawi ei hi ka thlak dawn” ka ti a, “Ka dam nghal na tur kha min chawh rawh aw” a lo ti a.

“Naktukah I zun kan test tir bawk ang” ka tih chuan a lo nui ri hak a.

“Doctor bialpa neih chu a va nuam ve” tiin min lo fiam.

Nu Mapuii te nupa chuan ka damdawi ziah chu an va lei nghal dawn a, a naute pahnih pawh a pu te in lamah chawhmeh an dah phei a, ka chak deuh thin tihna hun ka nei dawn. Feli bulah chuan ka inthawlh kuk a, “Ka nu ten min hmu ange” a tih pawh chuan engahmah ka ngai duh lo. A kawngah ka kuah a, a darah ka khabe ka nghat a, kan lungphu dat dat chu kan inhriatsak hialin ka hria.

“Fel..”

“Umm”

“Inzui rei lo ang aw. Inneih ka duh vat dawn nia” ka tih chuan ka kut chu a chul heuh heuh a, kan inmil lutuk hi mak ka ti zawk. Reilote bak kan la inngaizawng lo a, mahse, hun rei tak lo inkawp tawh ang mai hian kan inpawh em em a, kan thinlung hi kan inhmu hlein ka hre bawk.

“Pathian thu thu a ni mai” a ti sap a.

“Kan inneih hunah I hna hi I bang phal ngem?” ka tih chuan a rawn inlet a, chiang deuh hian min melh a.

“Min bantir chu I tum em lo ang chu tiraw?” thutak fe hian a ti a, ka lo nui nghawr dat a.

“I duh phawt chuan I thawk dawn nia” ka ti ta.

“MCS nula aia min thlang ta hi I la inchhir maithei ania” a tih chuan a hmui chu ka lo hup vat a.

“Engtikah mah nang ka thlang che hi ka inchhir dawn lo tih ka hria. Chuan, MCS nula in a neih ve loh thinlung ropui deuh I nei tih hre bawk la” ka ti a. A chhungte thawm kan hriat takah chuan ka tho vat a, ka thu fel chiaha a pa a rawn lut, Feli ka melh chuan a lo nui var var a, keipawh ka khi deuh suk.

A khawsik a reh laiin ka haw san a, ka rilru kilkhatah a awm reng mai. Ka rin phak bakin ka thinlungah a tla na a , hetiang bak chuan tumah hi ka duh leh theih ka ring ta hauh lo. A bula ka awm chuan hunte hi a kal zung zung mai hian ka hria. Kum 40 kan hnaih ve ta hle a, ka nunah mi hrang hrang ka seng lut lem lo bawk a, duh tak tak leh duh ve deuh inkar hlatzia ka hre ve chiah.

Ka hna zawma ka chhuk thlakna pawh karhnih lai a liam tawh, Feli pawh naktuk hian rawn chhuk ve tumin a inbuatsaih a. A dam that hma chu hna zawm lo tura ka tih avangin a rawn thleng thla har deuh dawn a ni. A telloa karhnih hman chu a rei duh ngar ngar hle mai, tunah erawh chuan ni tin ka hmu leh thei tawh ang. Ka office ka chhuahsan chuan dar 3 a pel fel chiah a, vawiin chu OPD ah inentir an tam deuh avangin ka thu rei a, kan han zin rei deuha kan haw leh hi chuan hetiang hi a ni duh ve reng reng a, thil mak pawh a ni lo.

*Zo, min lo be vat teh aw*

Feli message lo awm reng chu ka hmu ve chiah. Ka han call nghal a, a lo pickup var a.

“Zo, ka transfer order kha I lo hmu em?” a rawn ti nghal a, ka bangho lutuk engmah sawi tur pawh ka hre lo.

“Nunpuia’n min hrilh a, tinge engmah nangman min hrilh ve loh a?” a la rawn ti lehnghal.

Office ah ka tlan let leh a, OPD a ka thut hma khan lehkha check kim loh ka nei a ni maithei e, ka room ah ka tlan lut nghal a. Envelope la inhawng lo chu ka hmu ta ngei, ka han hawng a, Feli sawi ang chiah chu a ni. Enge thil awmzia hi ni ta? Ka pa ka call ta nghal a, thil awmzia chu hrilh pahin ka zawt pah bawk a.

“An khua ami ngei kha tunah a tling thar a, an khawtlang hruaitute ngenna angin Feli zawk sawn chhuah a ni dawn a nih chu” a rawn ti a, “Pa, ka insawn theih nan hma lo la rawh” ka ti ve ta nghat.

Vawikhatmah hi ka pa power hman ka tum ngai lo, chutiang chhungkua lah chu kan ni hek lo. Tuna helai hmuna ka awm tur pawh hi kan chhungkuain tha kan titlang a, sawiselna pakhatmah kan nei lo. A hmaa Medical Officer khan sulhnu a nei pawr deuh a, chumi siamtha tura kei min dah kha an ni a, tuma hnenah erawh ka sawi lem lo. Ka hriat leh dan erawh chuan kei hian ka lan niin a lo sawi kual ve hman viau a, pawi ka ti hran lo. Amah lah ka haw chuang bawk lo a, ka tum ka hlen chhuah hma a chhuak tur anga ka inngaihtuah erawh chuan ka hreh ve deuh.

“Zoa, uluk takin ngaihtuah tha leh la, I awm chhan kha ngaihtuah la, kan inbe leh dawn nia” ka pa chuan a ti ta reng a ni.

Keimaha thutlukna siam erawh ka tum lo bur, Feli nen kan sawi dun anga, a duhdan ka zawt anga, ka ngaipawimawh bawk ang. Engpawhnise, rawn chhuk phawt se, ka release phawt loh chuan engmah a tih theih chuang loh.

(Dah loh tawp aiah ka dah, hemi ah tho hian a zawmna kan dah leh mai dawn nia)