IRRESISTIBLE- XIII&XIV

Thirteen

*Feli POV*

Aizawlah ka awm dawn tih thu ka hriat chuan mak ka ti deuh, ka thian tam takin khawpuia awm an chak a hun rei tak an service hnuah pawh a tih mai mai theihloh laia rin loh deuha chutia ka awm tur chu mumangte pawh a ang rum rum zawk e. Ka chhungte lawmah a tla a, kei erawh chu ka lawm nge lawm lo pawh ka hre chiah lo, Zoa nen kan awm hran tho chuan awmzia a awm chuang lo ang.

Ka bungrua hawn chhoh a ngaih dawn avangin ka pa nen kan motor in kan chhuk a, kan thlen zanah Zoa a rawn leng a. Ka pa mut hnuah kan awmdan tur kan han ngaihtuah vel a, Zoa vang hian thil a khirh zo vek.

“Chutia ka awm loh veleh a I insawn ve nghal chu ka duh chuang lo a” ka ti a, a ngawi ngal mai.

“Zo, tikhan ngawi reng lo la, enge I ngaihdante sawi ve la” ka tih chuan a thaw halh a.

“Ni e, ka lo ngaihtuah nasa ve tho a, engpawhnise i insawn fel phawt anga, kan la ngaihtuah tha leh dawn nia” a tih chuan ka lawm leh mang chuang si lo a.

“Sorkar ta kan nia, kan thu thua awm hi a theih bawk si lo a, ka pa duhdan angin kumin chu hetah ka awm tluan leh phawt anga, kawng chu a inhawng mai ang chu maw” a ti dam dup a.

‘

Kumkhat chhung zet awmhrang tur anga ka inngaihtuah chuan ka huphurh lutuk, mahse, ka sawi chhuak duh bik chuang lo.

*Thla nga liam hnuah chuan*

Hna atanga ka haw chu ka chau lutuk, vawiin ni ber kher chu ANC checkup kan ngah si, khua a lum bawk si, ka chau ve thlawt. In ka thlen chuan khumah ka bawk thlawp a, chet pawh ka che peih lo. Nilengin Zoa ka be thei lova, ka mood te chu a fuh lo vel vek. A number chu ka han dial leh a, a pickup ta hram.

“Tinge I biak theih miah loh?” ka ti nghal tawng a.

“Nizanah emergency kan nei a, kan tlaivar a. Ka lo muhil char char a” tho phang aw zet hian a ti a, ka lo thaw huai thung.

Anihna takah chuan bum tawk tawh nih chuan kan hlauthawng hma em em zel tawh a, ho teah pawh thil ni lo deuh deuh ngaihtuah hi  a awl tawh tlat a ni.

“Naktuk chu engtin nge niang?” ka ti ta tho a, rawn chhoh a tum chu a thulh phah em lo ang chu maw.

“Ka la tum chu a nia, harsatna dang a awm tea nih loh chuan, ngaihtha deuhin lo awm phawt la” a ti a, a nui ri deuh hak a.

“Biak theih loh khan awm lo la ni mai” ka ti a, biak theih loha awm chu amah hian hrehawm a ti mah zawk tih ka hre ve reng.

Ka ngaihtuah let mai mai a, engvanga Zoa nen awm hrantir kher duh chu nge an nih ang tih hi ka la hrechhuak thei lo. Nunpuia hnena engkim ka lo sawi thin pawh kha ka sawi duh tawh lova, Mali hian hmanruaah a hmang tih hi chu ka hre chiang tawh. Keiin thianthaah ngaiin engkim Zoa nen kan chungchang pawh ka lo sawi ve ringawt zel a, mi ka ring hma lutuk hi ka sim a ngai.

“Mali pu hian thil a tithei a, CM ber pawh hian a hlau ru tlat a, a langah chuan nihna leh chanvo a chelh lo na in tuna kan sorkar tan hi chuan mi pawimawh tawpkhawk a ni thung” Zoa’n a tih kha ka la hrereng. Chuvanga keipawh min sawn an ni a, Zoa nen kan inkar a hlat nan an ti a nih hmel. Tunah hi chuan kan awmna a inhlat tih mai loh chu kan awmhran vang hian harsatna kan la tawk lem lova, kan hma hun erawh ka hre lo thung.

Ka scooty nung thei lo chu ka dinchilh ran a, Aizawl ka chhoh leh hnu khan ka hna atan a pawimawh tiin ka pa in min lakchhuahsak ve kha a nia, ka khalh thiamna a la rei lutuk lo, a chinchang phei chu hre lo tak ka ni.

“Ka lo enpui dawn che em ni?” tih ri ah chuan ka hawi chhuak a, tlangval hmel fai ving veng hi ka bulah a rawn ding a.

“Um, a.. hei a nung thei lo ringawt a” tiin ka ding sawn nghal a. Ka thawhpuite pahnih an haw tawh a, hetiang a ni ang tih hre bik ta lo chu haw hnuhnung berah ka tang ta kha a nia.

A engemawni lai chu a khawih rak rak a, rei vaklo hnuah a tinung thei ta mai a, ka lawmzia chu.

“Tikha chuan a tha tawh ang” a ti a, nelawm deuh hian a nui a.

“Ka lawm lutuk aw, ka lo mangang hman lutuk a “ ka ti ve niah niah a.

“Ruata ka nia, khi lai khi kan in ania” tih pahin kan dinna chhak chu a kawk a. Kan sub-centre chhak lawka awm chu a lo ni reng a, nichin atang khan min lo hmu tawh a ni ngei ang.

“Feli ka nia, Venglaiah kan awm a” ka han ti let ve a.

Ka tlanliam hnu thleng chuan min lo thlir zui reng tih ka hria, min pui tura a lo awm hnai hlauh chu ka lawm tih piah lam  a ni.

Zanriah kan ei fel hnu chuan ka pa chu pavalai inkhawm turin a insiam a, ka nu pawh MHIP section committee an neih dawn avangin a insiam ve nghal. Ka nau te pahnih exam nei mai tur an nih avangin an thleng seng zo an room ah an awm tawh a, inti awlthawng deuhin Tv ka en thung. Chaw kan eidawn khan Zoa pawh a lo thleng fel chiah a, a chauh deuh ka rin vangin zanin chuan a rawn len peih ka ring lem lo. Ka nu leh pa chhuah hnu chuan thutthlengah chuan ka mu a, ka pa hian thutthlenga mut zun zunte hi a phal loh vangin kan ti ngai lova, kei erawh hi chuan an hmuh lohah hian ka mu leh duai zel. Tunlai chu ka chau ve deuh thin bawk a, ka lo muhil deuh siar siar a, ka mit rawn hup chattu kutah chuan ka han vai pawp a, ka mumangah ka mit an lo hup emaw ka lo ti lehpek, ka harh zawk a. Zoa chuan uluk fel hian min en a, a la nui vur vur zui. Ka inperh tho chiang ngei mai, ka muthilh lai ber kher min hmuh hi chu ka duh lo thei ngawt mai.

“I lokal peih ka lo ring vak lo a” tih pahin ka bula thu tur chuan ka ti a.

“I mak ve thei ngawt mai, engtin nge lokal peih lo tura min ngaih theih zawk?” tiin a han tum deuh ngei a.

“I chauh ka ring alawm, chutia tih tauh chi pawh a ni lo” tih pahin ka kuah a.

“I phakar bawk sia” a tia, a nui leh tho.

Thlahnih hnuah kan inhmu leh thei chauh a ni a, ka insawn tirh kha chuan kartawpah a lo haw ngun deuh a, kan inhmu zing deuh, mahse khatiang reng kha a ni thei bik si lo a. Tun tum pawh hi thawhlehah Mamitah meeting an nei dawn a, tihian a rawn haw tlang a, thawhtan tlaiah Mamit ah a chhuk dawn a ni.

“Thla tharah hian Tea te insawirem kan tum deuh a’ a ti a.

“An innei dawn ta maw?” ka lo ti halh a.

“A buaithlak a nih hi, Tea lah chu a nun hmasa ang khan a awm leh tawh bawk si, Duhawmi kha a lo duh hman em a ni” a ti a, ni e, khatia a hmeichhiain a va luhkhung takah khan Duhawmi beng a thleng lo thei si loa, rilru na em emin an inthen ta kha ania, tun thleng pawhin Duhawmi hian a la tuar a, an inkawp rei lo nain an lo inhmel duh hman ve lutuk kha a pawi angreng zawk.

“Lza tak pawh ka khawngaih e a” ka ti a.

“Ni e, nei suh se han ti ngawt dawn ila hmeichhia hi a chan chhe zawk an ni zel si a, a buai zo vek a nih hi” a ti ve mai a.

Kan titi mawlh mawlh lai chuan a phone a rawn ri a, Mali hming chu phone screen ah a rawn lang kalh a, ngaihdan ni lo zet hian Zoa chu ka melh a, pickup lo in a ring quit tir.

Fourteen

“Tinge a la rawn biak che a?” ka ti nghal chat a.

“A.. chutiangin min be ngai chuang lo, a chang zeuh zeuh hian min lo be thin a” a ti a, ka tum hmak. “Fel, ngai kawi lo la, ‘min lo be tawh suh’ han intih tehthlawt hi chu a dawngsawngtu tan a hrehawm dawn em alawm” a tih chuan dik ka ti ve tho.

A phone ka lak sak ta tho a, message a lo thleng chiah lehnghal.

*I lokal dawn emaw ka tia, ka nghak rei tawh che*

Mali hnen atang tho  a dawng.

Ka tho nghal phat a, a phone chu a awmah ka hum hnan a, ka thaw a ipik vek.

“Va kal rawh, keini chu hei kan inhmuh tawh hi” tih pahin a phone chu ka thlah a.

Mitmeng buai naka min melh chu hmu duh loin ka room ka pansan hmak.

Keimah min thlakhlelh ve vang te, kan hun neih tlemte pawh hman dun a duh vanga lo haw emaw ka ti a, keimah chauhin ka lo nghakhlel lo tih ka hriatna chuan min ti na tak zet.

Ka mu a, ka muhil miah lo, Zoa call rawn lut zozai chu chhan tumna pakhatna mah ka nei lo. A tawpah phei chuan ka switchoff ta ringawt a. Tinge Mali hming kha hmuh tur a la awm? Kima pawh tikhawp khan a ngaithei lo a, min biak pawh theih lohna turin ka tih vek phah a, chutiang khawpa mi dang rilru hliam a hreh a nih chuan kei hi engvangin nge min tihtir tho si? Ka hrethiam thei lo. Ka thinrim pawh pawiti loin ka lungawi dan tur ngaihtuah miah lohin a chhuak nghal thei a nia, engpawh hmachhawn ka hreh lo. Kei aiin a thlang zawk anih chuan tunah hian thlang fel rawh se, ka hun hi ka ta tur ni loa inhambuai nan chuan ka ui lutuk.

Zing lamah ka lo muhil a, ka harh meuh chuan a lo tlai duai tawh. Ka thawh chuan min kaihthawh tumin ka nu a lokal mek a.

‘I nuam lo em ni?” a ti a, ka lu ka thing.

Kan chawei laite chuan ka lo ngaihtuah leh ngut ngut thin a, ka phone kha ka on tawh a, zing lamah engmah Zoa hnen atangin message ka dawng lo. A duh leh reh hlen daih se, min biak loh vangin ka thih phah lo ang tiin ka insawh ka insawh ringawt a.

*Dr Zoa POV*

Ka haw chhoh chhan dik tak hi Feli hrilh tumna ka nei loa, tunah pawh hian keimah hian ka buai tawk em em si a. Kan inkarah hian thuruk engmah kan nei hran lo a, mahse, thudik ka hrilh vanga amah hi ka chan ai chuan thuruk neih pawh ka pawiti lo zawk. Chutiang khawp chuan ani hi ka duh a, chan ka hlau a ni.

Mali vanga buai hi ka ning ve tawh tak zet a, Feli nen kan inkar tihla tura min sawn chhuahsak ringawt pawh hi ka lawm tawh lo a, keimahah a beidawng duh hauh lo tih ka hriat hnu phei chuan khawngaih vanga biak pawh ka thei tawh lo anih kha. Mahse, beidawn erawh a lo tum ve hauh lo a nih dawn hi. Kan chhungkaw chak lohna chu remchangah hmangin min bei chhunzawm a, ka nu thil lo tihsual chu tawrhtarh ah a hmang ta miau si a. Ka nu hi a hna atanga a pension pawh a hun ve lek lek tawh a, chutih lai kara hmingchhe taka a chhuah hi ka duh ngai lova, ka duh ngai bawk lo ang.

Nizanah ka pa nen an room ah kan sawiho a, ka kutah a innghat thui hle tih an hriat avangin ka ngaihdan an ngaichang a ni ber.

“Zoa, mualpho hi ka hlauh ber a ni lo, mahse, I pa leh in unau in mualpho tel tur hi ka ngaingam lo a ni” ka nu chuan a ti a.

‘Engpawhnise, tuna taka hetia hmanruaa a rawn hmang hi ka ngaihdan a ni lo. Kei chuan a tawp thlengin ka bei dawn, I tel ve vang ringawt a an bitum che hi ka duh lo bawk” ka ti a.

“Rilru fim taka I ngaihtuah a ngai ang, Mali hian a pu hnen a thlen chuan a punlun mai mai dawn a, chuvangin hmaichhanah ngei be phawt la thain ka hria” ka pa in a ti.

Ka ngaihdan chiah a ni, Feli ka hmu phawt anga, ka kal ang. Kan chhungkaw zahawmna chhe thei a ni a, Feli pawh engmah hrilh ka tum lo. Nakinah min hmuhsit nan a hman ka hlau a ni ber ang chu. Ka phone chu ka han en leh a, 2006 kuma ka nu chet pelhna lehkha pathum min rawn thawn chu ka thlek vang vang a, khatih lai khan nasa takin kan chhungkua pawhin kan tuar a nih kha, an thawhpui pakhat fin vervek avanga ka nuin a tawrh nasatzia kha. Ka maimitchhing vang vang a, a tih ni miah lo mah se signature a chuang miau a, kha lehkha kha bumna thi hre loin a lo sign miau a, a tel ve lo thei ta lo a ni. Hmingchhiat duh hauh lo ka nu hian a zahawmna chhiat ai chuan engpawh a tih duh ka ring, chuvang chuan kei a fapa Zothansanga hi min mamawh a, min chah chho a ni.

Feli hmu turin ka pan a, thutthlengah a lo muhil bam a, tihharh hlau zetin ka phone ka lachhuak a, a thla chu ka la a. Engtikah emaw chuan ka nupui a la ni ngei ang, tuna kan chhungkaw rukna pawh hi nakinah chuan ka la hrilh thei mahna! Chutiang ka ngaihtuah lai chuan a rawn harh a, kan pahnih hlimna hi engmah hian a man zo lo ang.

Mali min rawn call a hmuh atangin a hmel a danglam nghal vek a, a message a hmuh phei kha chuan min kalsan hmak a nih kha. Engkim hi hrilh theih a, ka ruahmanna te pawh hrilh vek ka duh hman hial a. Mahse, hmeichhiate hian mipa anga thil an zep theih loh avangin ka hrilh leh ta lo  zawk. Amah ka rin loh vang ni loin thil kalsual thei a awm miau a, chuvangin engmah ka hrilh duh ta lo a ni.

Mali te in ka va thlen chuan hlim sarh hian min lo hmuak a, ka ruahmanna hmasa kha thlakin ka hawsan leh mai dawn em ni ka ti rum rum. A lang amawi chuan hmeichhe fel leh invawng tak a ni a, mahse, beer inchhawp loh lai a nei lo tih ka hria, kan inkawp lai kha chuan ka sawisel fo a. Ka thu erawh a zawm lem lo a, mak ka ti vak ta lo. An chhungkaw khawsak hi a changkang a, chhungkuaa dawm thei an nih avangin an tan chuan thil mawi lo leh thil tha lo a nih an hre lo a ni ang. Kan inchhunga rui pakhat a awm thin avanga ka nu leh pa tlaivara an tawngtai thin laiin hetah chuan an nun hi a zalen em em a, kan inkawp ve lai pawh khan an ina ka len tum chuan duh tawkin a khawsak theih. Mipa inti pa ve tak ni mah ila nupui neih hmaa sex hman ka tum lo bur a, chu ni lo se kan him lo nasa thin viau in ka ring. Ka sawi duh ngai hauh loh sawi chhuah a ngai ta a nih chu, midang chanchin chhe lai sawi hi nuam ka ti tlat lo a.

“Zoa, Bawihi room ah lo han inkawm rawh u. A pa in inleng a nei dawn a” A nu chuan a ti a, Mali chuan min kai a, a room ah min kalpui nghal.

“Zo, hetiang zawnga ka chet a ngai hi min hrethiam rawh aw. Ka hmangaihzia che I hriat kha, ka neih theihna tur che a nih phawt chuan ka duh loh ber pawh hi ka hman a ngai miau si a” a ti sap a, ka kut chu ka humruh fan a.

“Engtia awm turin nge min duh?” ka hre tho na in ka zawt lui tho.

“Kan innei ang, chuan I nu chungchang chu engmah a ri chhuak lo ang” a ti a.

A hma pawh khan ka nupui ni turah ka ngai reng thin, midang ka hawi ngai lo hrim hrim avangin ka nupui a nih loh kha ka ring ngai miah lo a, hetianga ka rilru a danglam ta pawh hi ka lawm zawk khawp mai. A nihna dik tak ka hre tawh a, Feli nen an inthlauhzia ka hrechiang tawh, tunge ka chelh tur tih hi ka lo hrechiang hman hlauh a, engkim mumal takin ka kalpui tur a ni.

*Feli POV*

Sunday chawhma inkhawm ban chuan haw lovin Zampuii te inah ka kawi a, Bangkok-ah thawmhnaw lain a zin a, nizanah a lo thleng ve chiah a, inkhawm pawh a inkhawm peih lo. An in ka va thlen pawhin a lo la tho chhuak lo a, a room lam ka pan nghal a, a lo muhil tawh lo.

“Enge min hawn?” ka va ti lut a.

“I hmelchhe lutuk, dam taka ka lo haw hi lawm phawt mai teh” a lo ti zek.

Zoa nen kan chungchang min zawt a, nizan hmasa thil thleng vel chu ka hrilh mawlh mawlh a.

“Tun thlengin a lo la be leh lo che mi?” a ti a, a thin chu a rim ve hle.

“Min lo be tawh lo mah se pawi ka ti lo e a” ka ti a, a ruk tak chuan min be tawh miah lo tur anga ka ngaihtuah chuan ka na.

“Lungngai lo la, mi puitling a nia, engkim a tha leh vek mai ang” a ti a. A tho a, a wardrobe chu a va hawng a. “ I rilru a na deuh sia, ka lo duat ang che” tih pahin handbag mawi uluk tawk mai hi a rawn phawrh a.

“Chhete, hei min lo hawn maw?” tih pahin ka la a, ka pawm nghal chuk a.

“Khawi maw, I ninawm lutuk” tih pahin min thlah a, “Hlep nei miah lo pawn zuar ila e cheng 2500 a ngai ang aw” a ti a, ka ringhlel lo. Handbag chu ka ngaina bawk a, a man zat hi ka hre ve zel zul. Tuna ka hmanlai mek pawh hi ka birthday a Zoa min present a nia, a man a to tih ka hria.

‘Ka van hmangaih tak che em” ka tih chuan a ner nang a.

“Kan thian dangte hrilh suh aw, ka hawn nen a inthlau si min chhuahchhal ka peih lo ania” a ti a, ka lo bu nghat nghat a.

Chutia kan titi lai mek chuan room kawngka a rawn inhawng a, Zoa a rawn lut nawlh.

“I nu in heta rawn kal mai tur hian min ti a” Zampuii chu a melh a, "Inbe tu" ka thiannu chuan min melh tawn zek zek pahin room chu a chhuahsan.

‘Enge heng lai thleng thlenga rawn kal nan chuan a va pawimawh awm ve” ka lo nghat a.

“Inbe lawk ang” tih pahin ka kutah a rawn vuan a, ka lo tal nghal phat.

“I duh duh huna I biaka I biak loh tur pawh ka ni lo” ka ti a, thil dang ka sawi leh hmain min rawn kuah bet nghal.

“Hun reilote chu hetiang hrehawm hi I tawrh a ngai dawn aw, ka hmangaih che tih hi hrechiang la,a rei lo ang” a ti ta sup a.