IRRESISTIBLE - XV

Fifteen

Ka tha te chu a zawi zo vek, dik tak chuan Zoa ah hian ka lo innghat thuk tawh lutuk, thil tisual ve thei turah pawh ka dah ngai lo.

“Fel, a rei lo ang, I thei ang tiraw?” a tih leh chuan min kuahna atangin ka tal chhuak a.

“Ka ngaihdam theih loh khawp thil I ti anih chuan kan inzawmna hi tha leh tawh ngai lo turin ka kal ang. Chutiang chuan ka ti thei tih I hriat kha” ka ti a.

“Englai mahin I ngaihdam theih loh tur thil tih hi ka duh ngai lo a, ka ti ngai lo bawk ang. Engpawh miin sawi se, ka sawi anih loh chuan engmah lo awih lo ang che. Keimah tih loah chuan Tetea I ring thei bawk ang, mahse, keimah hi min ring tawk ber turin ka duh bawk che” a ti leh duah a.

“Kan inbe thei dawn lo tihna em ni?”ka tih chuan a thaw hak a.

“Mali hi a duh dan ang berin kan chettir phawt a ngai si a, lemchan hi ka thiam loh ber thil a ni, mahse, reilo te chu ka tum ve chhin a ngai dawn a. I tawrh tel ve a ngai ta erawh pawi ka ti tak zet. Ka chingfel vat ang tih ka tiam nawn leh che” a ti a, a lamah chuan min pawt hnai a, a kut pahnih chuan ka hmaiah a rawn khuap a.

“Ka hmangaih che” ti leh sapin min fawp vawng vawng a.

*Thla khat a liam hnu chuan*

Ruah a sur cherh cherh a, tukverh ah chuan dakin kawnga mi kal chu ka en pah mai mai a. Ka thawhpui Diki a chawlh vangin keimahin ka kal a, Rema erawh kha chu hmundangah a awm tawh thung. Zoa nen kan inhmuh atang khan thla khat a liam der tawh, phone hmang chuan kan inbe deuh reng. A hrehawm ber zawk lai chu a rawn haw chhoh changin kan inhmu thei lova, Mali ta ang maiin a awm a ngai thin. A chang chuan a chhan min hrilh miah loh vangin ka thin a rim a, chutihrual erawh chuan min hrilh theih loh khawp harsatna a tawk erawh ka khawngaih leh tho bawk si, awm dan thiam a har thin khawp mai.

Chutiang thil ka ngaihtuah lai chuan kawngka chu a rawn ri rak rak a, hmannia ka scooty nung thei lo min puitu Ruata kha a rawn lut hlawl a, a rawn nui lut var var a, a ngainatawm reuh thin.

“I va awl awm ve” a rawn ti lut a.

“Nia, hei vawiin chu ka awl khawp mai, lo thu ve rawh” ka ti a, chair ka pe a.

“Tihtur a awm lo lutuk a, ka rawn leng thla mai mai. I buai chuan ka chho leh ang tih rilru pu in” a ti a, a hmel chu a nui deuh sang reng bawk sia, kawm nuam tak a nih ka ring.

“A khawharthlak sia, I lokal chu a lawmawm zawk. Ti daih ila, lehkha I la zir nge?”ka ti a, a chhan chu a hmel hi a la naupang deuh tlat a.

“Aw, zir ti ila M.Tech result ka nghak ve mek a nih hi” a ti a.

Kan inkawm chho zel a, a bright sia, a bula awm a hahdamthlak bawk si, a hmel hlim thei deuh chuan amah a ti ngainatawm. A titi vel reng rengah thil chik mi tak anih ka ring, tin, thil a eng lam zawnga thlir tlat mi a ni tih ka hre thei.

“Ka nu hian ka naupanlaiin min boralsan tawh a, ka pa hoin kana wm a, nupui dang neih pawh tum tawh loin tihian min tulpui thak a nih hi. Kei hi ka piang tlai fal deuh a, ka u te ho chuan nupui pasal an nei vek tawh a, tihian ka u chiah te chhungkua leh ka pa nen kan la chengho a. Nu neilo hma tih takah ka u nupui hi ka nu en deuh a, ani pawh hian a fate nen hian min endan a dang lo. Ka nu awm loh hi inhnehtir ka duh loa, harsat chang hi chu a tam. Mahse, tihian tun thlengin a tha lam hlir ka thlir tlatna hian min siam puitling ve a nih hi” a ti a, khawhar rukna a neih ngun ve tur zia ka lo ngaihtuah a, ka khawngaih zawk.

Engang pawhin kan chhungte hian min duatin min ngaihsak mah se nu te hi chu a dan a dangin an lo hlu em a, nu nei loa a thanglian leh a puitling lutuk chu a fakawm bawk si, a titi melh melh lai chuan chutiang hlir chu ka lo ngaihtuah.

“Hna neih hi ka chak ve tawh, ka pa damlai hian ka nei hman lo ang tih ka hlau” a ti a.

‘I nei em em ang, in thiamna pawh a sang alawn” ka lo ti a.

“I phone number min pe phal em?” a ti leh daih a.

“Ka phal angem aw” ka tih chuan lai deuh hian a lu a hiat a, ka lo nui hak a.

A phone min pe a, ka number chu ka chhut sak a, “Bialpa ka neih vangin chutiang hawi zawng chuan min be tur a ni lo” ka la ti zui.

“Ka hre lo le” a phone lak let pahin a ti a, a nui zui nghal var var.

Ka inthup thiam ve lo hi ka miziaah chuan ka duh loh deuh ber a ni ang, mahse, inthup thiam tak nih erawh chu ka duh leh chuang miah lo a. Ka tawngkam hian mi rilru a hliam angem tih erawh ka ngaihtuah let fo. Kima chungchangah pawh ka ngaihdan ni lo chinah chuan keimah na dawn mah ila ka tawp hlen hmak thei, tun thleng hian ngaih veng veng changte chu ka nei, mahse, tawngkam tha leh mawi hi a laka hman har ka ti tho. Chuvang chuan tumah hi huat leh ngei neih loh hram hi ka duh a, keimahah hian kham chin ka nei hmiah thin.

Zanah chuan min rawn be nghal tak tak a, mahse, ka rin loh lam daih a ni thung.

*I oppa nen hian in inhmeh tawp*

Hyunbin nen kan thlalak a lo edit a nih chu, Hyunbin nen ding tlang angin min han siam ngei ah, a va nuam mai mai tak, ka khuma ka mu lai ka ke ka leng vak vak. Engtin nge a lo hriat zawk le, a mak tak zet.

Engtinge ka duh tih a hriat tih ka zawh chuan ka phone cover vel a lo hmu ngei.

*Phone cover, wallpaper thlenga tial rei ruai te chu hmuh kan a har em alawm* a ti leh mai.

Rei vak lo kan inbiak hnuah kan inmangtha ta a, chu thlalak chu whatsapp status ah ka hmang nghal a.

#Ruat, ka lawm e

Tih caption ka hmang a, thil dik lo a awm lem lo bawka ka inthlahrung hran lo bawk. Minute 5 vel a liam hnuah Zoa’n a rawn reply.

*Ruata nge Ruati*

Ka nui suk ringawt, thikthu chhe thei siah. Reply ka tum zet na in ka call leh ta zawk. Ruata chanchin vel chu ka hrilh a, enge a ngaihtuah pawh ka hre lo, a tawng  tha duh lo tawp.

 “Vawiinah Kima nen kan inhmu a.. “ a ti a, sawi zawm loin a ngawi daih.

“Chuan” ka lo ti hap a.

“A hnena let leh I duh em?” harsa tih hmel zet hian a ti a.

“Chumi lo chu sawi tur I hre lo anih chuan ka dah phawt mai ang” tiin phone ka dah hmak.

Amah nghak turin min ti a ni lawm ni? A thutiam a hlen theih dawn loh vangin Kima hnena let leh turin min ti maw? Ka mittui a rawn luang thla ngiai, ka dang hman ngang lo a ni. Tinge hmangaih hi ka harsa bik viau em ni? Zawhna hlir, zawhna hlir. Kan hmangaihte tan chuan harsa mah se kan tuar hram hram thin a, chu chu keipawh ka ti mek a, mahse, engmah lo mai a ni leh dawn anih hmel.

*Dr.Zoa POV*

Feli telloa ni han hman liam ve ringawt thin pawh chu a ho duh hle mai, amah vanga haw chhoh ka chak thin nen tunah chuan haw loh dan ngawt ka ngaihtuah a ngai a, chutichung chuan ka pumpelh vek seng si lo. Ka thianpa, Sama, intelligence officer chu ka buainaah ka hnuk lut ta ringawt kha a ni a, thla khat chhung vel zet a rukin kan bei tawh a, hma kan sawn viaua ka inhriat lai hian Mali hian min lo dai khalh leh keuh thin. Ka beidawnsan mai dawn em ni tiin ka inzawt fo a, ka nu in ka chunga rinna a nghah thukzia ka hre bawk si, a va harsa thin em!  Feli hmu tura kal si, amah nena inhmu thei silo hi a hrehawm lai ber chu a ni. Ka duhthlanna ngeia ka nu buainaa zuang lut ka nih avangin chutia awlsam taka bansan chu ka thei bik si lo, ka nu a ni miau si a.

Mali te inah chaw ka ei dawn avangin hmanhmawh lo leh phur lo ru zetin ka insiam a, niminah hna thilah ka haw chhoh kha a nia, Feli pawh ka hrilh lo law law, tihlunghnur reng hi a hrehawm ve em bawk a. Room atanga ka chhuah dawn chuan ka pa chu a rawn lut a.

“Zoa, I thil tih lai hi chhunzawm lo tura I duh chuan I tawp thei ania aw. Kawng dang ka zawng mai ang” a ti dap dup a.

‘Ka pa, a tawp ka thleng tep tawh alawm” ka tih chuan rilru hah hmel tak hian a vei tawn chhen a.

“I hlim lo hmel hmuh hi hrehawm ka ti em a ni. I nu chu I hriat chian kha, an chhungkua hrim hrim hi zahawmna ngai pawimawh chi an ni tihte chu, mahse, chu chu a pawimawh ber lo tih hi a zir ve te pawh a ngai a ni maithei asin” a tih chuan ka pa min ngaihtuahzia ka hriat phah a, ka khawngaih zawk.

“Ka pa, tunah hian fiahna kan lakhawm mek a, a hmawr kan bawk tep tawh e. Min ngaihtuah suh, ka nu duhdan hi ka hlawhtlintir anga, chuan keipawh ka zalen bawk ang” ka ti a. Ka bulah a rawn ding a, ka hnungah chuan a beng ta thak thak a.

Mali te in ka thlen chuan an chhungkua chu an lo kim kher mai, ka thlen tlai deuh avangin chaw kan ei har ka ring lo kha ania, a ni leh ta pek lo. In chi lam an dawm leh far tawh a, kei erawh chu inchung lamah ka inthiarfihlim. Step pen ri chu a rawn hnai zel a, reiloteah Mali chu ka bulah a rawn ding a, pawn lam ka lo thlir daih avangin ka lo ngaihsak hran lo. Ka kawnga rawn kuah pahin min rawn fawp ngawng ngawng a, hei hi a ni harsa ka tih em em chu. Feli ka mitthlaah a rawn lang a, Mali chu ka nemsawn nghal lawp a. Mak tih hmel deuh hian min en a, a mitah pawh ka en duh lo.

“Kan inneih hunah chuan ka thei ve mai ang” tih chiah ka sawi, a nui ta hak a, min duh bur tih ka hriat a vang hian ka thu chu a zawm leh tho dawn tih ka hre ve tlat.

“Zo, enge kan la nghah? Ka pa te lah hian inneih ringawt an sawi bawk si” no zet hian min melh a.

“Kan la nghak hret thei alawm, ka inpeih ve tep tawh e” ka ti a, chumi sawi tur ringawt pawh chuan harsa ka va ti thin tak.

An nula in chawei an peih thu a rawn sawi chuan inhnuai lamah kan inzui thla ta a. An chhungkua hrim hrim hi chu an sual pawh a ni lo, an changkang lutuk hi keini ang tan chuan a buaithlak a ni.

“Zoa leh Mali pawh innei turin rilru lo siam rawh u, inzui reng hi a mawi ngai lo. Zoa pawh helamah awm se a awlsam bawk ang” Mali pu chuan a ti a, ka lo ner sak.

“Ka pu, a hmanhmawhthlak hleinem, ka khuate khuan min la mamawh ve em a, kumhnih khat tal chu awm ka la duh”ka ti a, Mali’n ka malah a rawn sik. A pu hi an chhang ngam ngai lo tak e. Apu chuan a aw a thian a, min melh ralh ralh pahin engmah a sawi zui tawh lo.

“Thil I tibuaithlak zo vek, tinge ka pu kha I chhan a?” balcony ah kan thu a, kan chaweikham hnu khan a pu chu a haw daih a, Mali’n a umzui tawk tawk pawh ka hmu reng, thiltihtheihna hman chak lutuk hi ka ngaithei lo. A pu a mangtha hnuah balcony ah rawn chhuak ve a, ka chungah lungawi loh a chak tih ka hre reng, a ngam lo mai pawh a.

“Mali, ka hrilh ang che. Politics tel miah lo pawh hian Aizawlah hian ka duh chuan ka awm thei, min tilui miah suh u” ka lo ti hmak.

“Khatiang zawng khan ngai tlat lo la, I chapo emai” a ti a, a mittui a tla lek lekin ka hria. Ka lo nui sak a, min blackmail te a tum ve khanglang a, enge ka tih theih hi an hmu vat dawn alawm.

Mamita kan office dawr tumin zing takah Aizawl ka chhuahsan a, tunlai chu ka hna piah lamah chhungkaw buaina nen, ka taksa hi a chau ve ngawih ngawih. Mamitah chaw kan ei a, chaw eikham lamah CMO office lam kan pan nghal a, ka nau te ho khan report form eng engemaw te kha min chah nual bawk a, chung chu ka tifel zung zung a, kan pu bulah kan hospital mamawh langsar zual ka thlen bawk a, khaw lam pana chhuah nan a la tlai chhe lo. Venghlunah ka driver Mama chuan a putea te tlawh kawi a duh avangin kan han peng leh phawt a, inchhung kan luh chuan ka rin loh deuhin Rinkima a lo awm ve. Thingpui an lo in dawn chiah a, ngai lo kan ti chungin min siamsak a, in loh theih pawh a ni tawh lo. Mama lah chu a muang siar siar lehnghal a, han tur hmanhmawh viau lah chu a ni thei chiah bawk si lo, an verandah ah chuan hawi thawven pahin ka chhuak a.

“Feli a dam em?” tih riah ka hawi chhuak a, ka bulah chuan Rinkima chu a lo ding reng.

“A dam, a tha” ka ti zawi sup a.

“A rilru tihnat sak ve suh ang che” a ti a, ka lo nui hawk.

“Lo lungngai suh” ka ti nghut.

“Ka chance tha ber ka hloh kha a pawi ka ti a, ka inchhir em em bawk. Feli khan min hmangaihzia ka hria, min hmangaih ang bawkin a lung a lian em em bawk. Keimah anga inchhir I duh loh chuan tina ngai suh” a ti a, a kalsawn nghal.

‘Min hmangaihzia ka hria….’ Chu chu ka thinlungah hian a ri tluk tluk, chuan, atthlak takin ka thik em em bawk.

Ka quarter ka luh chuan ka taksa te hi a na vekin ka hria, ka hmangaih che vawikhat mah min la ti ve lo a, min hmangaih ve lo tihna a ni thei angem? Tih velte chuan ka nun ram a ti chau, kum heti zat ni tawh hi hmangaihna vangin a vawikhat nan ka talbuai ve ta chu a ni si a.

A status en pah chuan ka nui var var a, a oppa te atchilh thinzia ka hria, tunah pawh hian a hriat miah loin Photo book ka order sak a, a hmuh huna a lawm turzia te ka mitthla fo thin. Ka thinlunga thikna chu thunun zo loin Kima bula let a duh em tih ka zawt a nih kha. Ka zawt zo a, ka thusawi atthlakzia ka hre chiah.

Note: Ka dah ni ka tihlan zel kha aw, ka dah tawh hnuah 'zanin a awm dawn em?' Tih zawhna te kha awm ve thin a, a date kha kan en zel dawn nia☺️)