SOME THINGS NEVER CHANGE

"SOME THINGS NEVER CHANGE"

.

"Mam, file kha ka thlauh daih ania"

.

"Engtin nge i thlauh theih aaaaa? Bag- ah i ak lo em ni?"

.

"Pb-a thil ka lei khan ka phawrh alawm,ka hre tawh miah lo. Ka thil leinaah khan ka dah aniang a.."

.

"Shit..!! Ka documents pawimawh awmkhawmna anih kha"

.

"Ka hria alawm. K'n kal leh nghal ang e"

.

Darkar khat a liam hnu feah beidawng zetin ka cousin Sawma chu a rawn let a,

.

"Mam..sorry, ka hmu zo tawh lo"

.

Ka mittui a tling pam a, engmah tih theih kan nei tawh si lo. Ka patea chuan chhung inkhawm kan neih naah chuan ka documents kan hmuh leh ngei theih nan tawngtai thupuiah a thawh a,tlem chuan ka hahdam deuhin ka hria. Zanah pawh ka muhil thei lo, khami tello chuan engmah ka ti thei dawn der mai si lo. Ka marksheets leh certificates awmkhawmna ka chhungte min rawn thawn chu Sawma hian min lam sak a, in a rawn thlenpui hmain a rawn tibo ringawt mai a ni. Amah tak pawh chuan hrehawm a ti em em a, kei lah ka țap deuh pur bawk si!

.

"MBSE-ah i nutei fapa a thawh kha, be chhin teh"a tih chuan ka harh chhuak deuh zawk a.

.

Ka phone ka lachhuak a, ka cousin Atea chu ka bia a,thil awmzia ka sawi chuan thil harsa anih loh thu min lo hrilh a,Krismas chawlh an hman dawn tawh avang erawh chuan engmah a tih theih tawh lo va, kumthar a ngaih tawh dawn thu min lo hrilh a, ka hah chu a dam reng reng e. Nielit lama ka certificates erawh tihngaihna ka hre hlawl lo thung a, ka rilru ka tihah belh duh lo.

.

Nihnih a liam hnu chuan inah ka nutei nen buh kan thap a, ka phone charge lai chu a rawn ri ral ral a, number ka en chuan ka hriat ngai a ni lo tih ka hria.

.

"Hello.."

.

"I documents pawimawh hmel tak ka chhar a, a neitu i ni em aw?"

.

Ka au thawt a,ka nutei chuan hlauhthawn hmel tak hian min lo en a,

.

Ka address kimchang ka hrilh hnuah a hman veleh min rawn pek a tum thu a sawi zui nghal a, ka tan lak a harsa lo tih hrilh nachang ka hriat meuh chuan phone a lo dah daih tawh.

.

"Quarter pawnah ka awm a, lo luh tawp chu ka hreh deuh" a tih avangin ka tana thil hlu tak chhartu chu hruai lut turin pawnah ka chhuak a, a bike chungah a lo la chuang a, min hmuh chuan a nui sak a.

.

"Hai.."a ha var rual siau chu a then tha a,

.

"Sawi ngaihna pawh ka hre lo, ka lawm lutuk"ka ti a. Ka file chu min pe a, inchhunga leng lut tura ka sawm chuan min hnial a.

.

"Engtin nge ka koh ang che?" Tiin min han zawt nghal zat a, ka hrilh chuan a nui ri hak a,

.

"'M' tiin ka mo mai ang che aw"a ti a, kan vawikhat inhmuhna mah ni se fiamthu a duh tih a hriat hle. A hming chu ka han zawt ve a.

.

Jedidaia Lyngdoh anih thu leh Mawlai-a awm an nih thu chu min hrilh a. Nidanga rawn leng leh tura insawm chungin a haw ta a, ka file chu ka han pawm vawng vawng a, he thil vang hrep hian ka zan mut pawh a buai zo a, tunah chuan ka hahdam ta.

.

Shillong khawpuiah hian ka patea te chhungkua hi a pastor hna avangin an awm a, hmundanga an awmlai atang reng tawhin an bulah ka khawsa tam a. Shillong-ah tak erawh ka college zawh hnua an awm avangin lehkha zir chuan ka awm hman lo. A fate pahnih Sawma leh Johan-a te lah hi ka pianpui unaute ang mai an ni a, anni pawh hian enhranna  min nei ngai lo. Johan-a hi tlema ala naupan fal deuh avang hian Sawma nen kan inkawm nasa a, kan pahniha kan awm chuan thian dang kan kawm tam ngai lo. Eng eng emaw exam kan tum avangin ka chhungte chu ka documents min thawn turin ka ti a, hemi an rawn thawn hi Sawma'n alo tihbo tak chu a ni.

.

Sunday zing a ni a, ka patea min tihtir dan thin angin mahni room theuhah bible kan chhiar a, fianrial hun hi a ngaihpawimawh thin em avangin kan nunah pawh min tuhsak hi a tum hle tih ka hria. Ka țawngțai zawh fel chiah chuan ka phone-ah chuan message ka dawng tih hriat takin a rawn ri kerh a, ka hawng nghal mai lo. Ka bible chu ka dah fel a, ka khum ka siam leh phawt a, chumi hnuah ka phone chu ka han bih ve dak dak a.

.

"Gud morning.. M, have a nice day"

.

Jedidaia hnen atang alo ni a. Ka thil min rawn pek hnua kan inbiak leh hmasak ber a ni a, kar khat a liam leh hnu a ni. Ka han thawn let ve a, reply na ka beisei tawh lem loh avangin ka phone pawh la lovin choka lam chu ka pan ta daih a. Thleng ka sil zawh fel hnuah ka phone chu ka han en a, message lo awm chu ka han chhiar leh a,

.

"Bethany hospital-ah ka thianpa pa a damlo a, kan ka tum a, a rem chuan ka rawn tlawh thei che ang em?" Tih  amah Jedidaia min lo reply  na a lo ni.

.

Ka inkhawm dawn thu leh inkhawm ban hnu anih erawh chuan ina ka awm dawn thu ka hrilh ve ta a, tlai lamah a nih a rin thu a rawn sawi ve takah chuan tha takin lokal turin ka sawm a, thingpui rawn in ve reng reng pawh a phu ka ti. Tlai lamah khawsak rel pahin ka nu nen kan inbia a, ka nu nen kan inbiak hi chuan kan ri leh hlut a, duh aia rei kan inbe leh nge nge thin. Doorbell a rawn rik chuan ka nu bulah inleng an awm dawn thu sawiin kan inbiakna kan titawp a, kawngkhar chu ka va hawng a, Jedidaia chu a lo ding zum deuh dak a.

.

"Ka be tlang thei lo che a"mangan hmel deuh hlek hian a ti a.

.

"Ka nu nen kan lo inbe laklawh lutuk a, rawn lut rawh"tiin inchhung lamah kan inzui lut a.

.

"I chhungte an awm lo em ni?"a ti a, inchhung chu a han melh kual a.

.

Ka patea te nupa hmundanga chaw an ei dawn thu leh ka unaute erawh an len thu ka hrilh a. A hmel en aiin hepa hi a fel zek niin a lang. A hmel en a luhlul leh ngen hmel zet chu hre thang lo tan chuan a nelawm fahranin ka ring lo. Thingpui in pahin Shillong-ah eng ti tur bera awm nge ka nih tihte chu min zawt a, ka chanchin ka sawi zawh chuan  chanchin tlema zawng min hrilh ve bawk a. Zirna avanga Delhi lama hun rei tak a awm hnuah an chhungkaw business luhchilh tura a rawn haw thute chu a sawi a. A tawngkam leh cheziaah upa tak ala nih lohzia a lang reng a,chutihrual chuan a hmaa awm erawh huaisen takin a su tlang zel ang tih ka ring thung. A bula awm chu eng emaw takin a hahdamthlak riau a, hnamdang ka ngainat loh thin tehlul nen hepa hi chu ka kawm thei riau tlat a ni.

.

A khat tawkin min rawn tlawh fo a, phone-ah kan inbe nasa bawk. A thian ang tak takin min ngai tih ka hria a, a bialnu nen an inkar thlengin min hrilh ve ta hial a. Khasi culture-a hmeichhe lal zawkna( Matrilineal system) an kalpui chu ka țha ka tih lohzia ka sawi chuan min thlawp kher mai. Keini Mizote min awh thu pawh a sawi ve a, 'matrilineal system' chu englai mahin a thlawp lo tih pawh a sawi ve thin. Zankhat chu tlai tawh angreng takah hian min rawn call a, pickup loh tur em ni ang tih ka ngaihtuah lai chuan chutiang huna min rawn biak a duh anih chuan a pawimawh hle anih ka ring leh ta zawk a,ka han pickup a.

.

"M... Ka rawn tihbuai che chu ka ring tho a,mahse, ka ngai lutuk che"a ti a,a thaw halh chu ka hria.

.

"Mite i ngai ve thei a ni maw?"uang takin a thu sawi chu lo lak ka han tum a.

.

"Ka uang lo ania"a ti hmuk a.

.

"Jd(ka kohdan), ka tihpalh"ka ti a.

.

"A chhan ka hre lo, ka rilruah hian i awm reng thin. Ka thawhhlim atanga ka mut thleng hian ka ngaihtuahnaah i awm reng a, a mak ka ti. Ka a zo tawh ni ber hian ka hria"a ti ban charh a.

.

"Jd... Thian kan ni a,kan ni reng bawk ang. I thian anga min en theih dawn loh chuan inbe tawh lo ang"ka ti a, a thaw hak ri chu ka hria.

.

"Chu thu chu i sawi ka hlauh vang chuan alawm ka rilru hi ka sawichhuah ngam ngai loh, mahse thian ang ringawt erawh chuan ka en thei lo che a ni e, sorry"a ti a, phone chu a dah nghal a.

.

PART-II

.

Zing ka thawh veleh a message chhiar tur lo awm thin han awm ta lo thut chu tlemin a hrehawm ve lek lek a, kan inbe nasa a, kan inkawm nasa a, ngai tur reng pawh ka ni alawm. Mahse, chumi anih avangin biak pawh leh kher chu ka tum lo. Nihnih hnuah JD message ka dawng a, ka reply lo. Tlaiah Sawma nen kan chhuak a, Johana school form pheikhawk lei pah kan ngaih avangin kan rei ta phian a, kan haw chuan khua a thim lek lek tawh. Motor kan dah fel hnu chuan muangchangin inchhung lam panin kan inzui a, ka hminga min ko ri ang tak ka hriat avangin ka han hawi a, Sawma chu a lut tlang nghal a.

.

“M… Reilote biak che ka duh”

.

Thim zing atang chuan JD chu a rawn pen chhuak a.

.

“Inchhungah lo lut la”ka ti nghut a.

.

“A fala biak che ka duh, khawngaihin…”

.

Ka thaw hak a, engtin nge ka tih ang? Ka han ngawi deuh ran a.

.

“I hman hun ka lo nghak ang. Garage bulah khian ka lo nghak ang che”a ti a, a kal ta nghal a.

.

Room-ah ka lut a, ka inthlak a, ka thin phu deuh dup dup chu ka han dawm vang vang a, hetiang hian ka la awm ngai hauh si lo. Chawei ka siam mawp mawp a, kan ei deuh nghal mai bawk a, ka chawei pawh chu a tui lo zo vekin ka hria. Kan chaweina ka sengfel a ka silfai meuh chuan a lo tlai ta phian a, JD pawh chu a awm ka ring tawh lem lo. Pawnah ka chhuak a, garage lam ka han hawi chuan vawt tih hmel taka a lo thu ka han hmu a, ka phu deuh zawk a, min hmuh chuan a ding a.

.

“I rawn chhuak dawn lo emaw ka ti hman tawh a”a aw chu a khur lek lekin ka hria.

.

“Haw mai tur che nia, khua lah chu a vawt bawk si”ka tih chuan a lo nui deuh hak a.

.

“Hmuh ngei che hi ka duh tlat si alawm”a tih chuan ka mitsirin ka melh a, min en reng tih hriain ka hawisawn daih a.

.

“M.. Thian chu ni leh mai ang, a hmaa ka thusawi kha chu theihnghilh mai rawh. Nang hi ka lak atang ka kaltir ngawt thei lo che a ni.”a ti a. Chutah, amah vek chuan, “A hmaa I thian JD kha nih leh ka duh, chance min pe leh hram rawh”a ti a.

.

“A tha alawm, ka remti e”ka ti a, “Phone-ah pawh I sawi thei tho si a, rawn kal kher a ngai hleinem”ka tih chuan a message ka reply duh loh chu ka hrechhuak zawk a.

.

“Ka call I la duh lo va, message I chhang duh lo bawk a, ka mangang alawm”a ti leh mai a.

.

“Haw tawh rawh, I haw na tur a la hla si a, khua lah a vawt ropui si”ka tih chuan a then sak a, ka melh sawn nghal a.

.

“Ok.. Hun remchang hmasa ber lo zawng la, dinner ka treat ang che”a ti a, ka lu chu ka thing a, ka patea strict –zia sawi lan kher chu tul ka ti lo.

.

“Lunch tal.. plizz”ngenngawl tak hian a ti a.

.

“Kan tum dawn nia”ka tih chuan a thaw huai a, ka sana ka bih deuh sek chuan a tur ve ani ang, a haw ve nghal mai a. A tlan liam thleng chuan ka thlir a, thian ang hian ka kawm zui thei tak tak ang em? Keimah ngei pawh inrintawk har ka ti!

.

A hma ang bawkin kan inbia a, a khat tawkin a rawn leng ve bawk a, lehkhabu ka chhiar nasa tih hriain a pa lehkhabu roh tak tak min rawn ken ruk fo a, ka hmuh phak loh tur tam tak ka hmuin ka chhiar a, man hla ka ti thin hle. College kan kal lai chanchin min zawt fo a, a hriat duh tak erawh ka relationship chungchang a ni tih ka hria, pehhel takin min zawt a, keiin ka hre lo der ang a, chutah inthlahrung takin a hriat duh tak min zawt tawh ang. Keiin uang takin ka lo chhang ang a, a tawpah hlim takin kan nui leh thin. Mipa thian ka neih tlemte zing ami a ni tih ka hrilh chuan a nui a, a lawm vang nge tih ka hre lo thung. An sumdawnna tih len an tum tih a hma atanga ka hriat tawh chu bul an tan ta vat a, ka tna pawh hun a nei tlem sawt viau. Nitin insakna lamah a liam a, zingkar message ka dawn chhung chuan ka lungawi tho mai. Zanah a chauh thin em avangin a mu leh tawp a, chuta tang chiah chuan ka thinlungah hian hmun a lo chan thuk hmanzia ka hriat phah! A tan pawimawhna neih ka duh a, zingkara a message lungawipui thin khan a mut dawna goodnight wish chauh chu ka lungawipui ta lo vat a, mahse, engmah sawichhuah loh hi kan tan a tha ber lawi si!

.

Sunday zan a ni a, ka room lamah lehkhabu chhiarin ka tawm melh melh a, boruak inthlak leh thut thin avangin ka hritlang deuh nghe nghe. Ka lo chhing sek anih ka ring, ka phone ri-ah chuan ka harh hlawl a, ka han en chuan JD hming chu a lo lang kalh a.

.

“Hello..”

.

“I lo muhil tawh mi?”aw zangkhai vah hian a rawn ti a.

.

“Ka lehkhabu chhiar ka lo muhil daih a”

.

“I nuamsam leh vak lo a ni maw? I aw chu a danglam tlat”a ti a, tlema ka hritlan deuh thu ka sawi chuan nidang ang bawkin zingkara tui vawta inbual turin min han ti leh ngei a.

.

“Naktukah lunch ei pui che ka lo tum asin le… Anyway, ka sawn mai ang”a ti a, a ngawih deuh hnu chuan, “Mi pakhat hmelhriattir che ka duh a”a tih chuan a chhan hriat miah lovin ka thin chu a rawn phu leh dup dup a.

.

“Weekend hi ka hunawl neih ve a ni rih si a, ka rawn hrilh leh ang che”a ti a, kan inbiakna chu kan titawp a.

.

Ka muhil leh mai tur chu eng emaw tak hian min mawlh deuh tlat a, ka phone chu ka lachhuak a, whatsapp ah lutin JD dp chu ka han en a, min hmelhriattir a tum chu henu hi a ni ngat ang! Ka en a, ka en ta reng a, ka thik chu a ni ber lo maw? Ka data ka off tur chiah hi message a lo thleng a, JD message tih ka hriatin ka hawng duh lo va, data ka off hnan a, ka off hnuah ka chhiar ta chauh a. Engvanga chutianga awm chu nge ka nih le? Hei hi ka duh loh ber thil a ni si a, ka duhthu ngeiin ka lut a, ka chhuak leh mai thei ang em?

.

PART-III

.

Ka hritlang chu ka la na ta phian a, ka khua a sik deuh reng a, ka khuh nasat em bawk avangin ka chau ta phian a, hospital lama min kal pui an tumin ka duh si lo, ka chhungte ka ti mangang ta deuh a nih ka ring, ka patea chuan a rukin min hau a. Ka that leh mai ka beisei bawk avangin ka duh chuang lo. Chutianga nihnih ka awm hnu chuan tleimin ka ziaawm ta deuh a, ka khuh erawh a la nasa tho mai. Ka khawsikin ka taksa a tihrawlna chu Sawma chuan min hmeh sak neuh neuh a, chutihlai chuan ka room kawngka chu a rawn ri rak a, ka nutei chu a rawn dak a.

.

“I thiante an lokal a, ka rawn luhtir mai dawn em ni?”a ti a.

.

Luhtir mai tura ka tih hnu rei vak loah chuan JD leh hmeichhe pakhat hi an rawn inzui lut a, chu nu chu uluk fe hian ka lo thlek a, JD-an whatsapp dp-a a hman kha a ni tih ka hre mai.

.

“I damloh thu engmah min hrilh lo a..”tiin a vui ve hle a.

.

Ka that leh mai ka rin thu leh chutianga serious a nih loh thu ka sawi chuan min melh deuh hrawk a, ka nui lui hram hram a.

.

“Ka call I la thei si lo a, ka mangang deuh a, kan bazar tur kan rawn kal hmasa a nih hi”a ti a. A rawn kalpui nu lam chu a han hawi a, “Hei ka thiannu Frieda ania, ka tum loh deuhin ka introduce che u a ngai ta a nih hi. Freida, hei hi a nih hi ka thiannu tia ka sawi thin Mami anih hi”a ti a.

.

Freida chu  a nui sen sen a, a hmeltha kher mai. A kut a rawn phar chhuak a, min chibai a.

.

“I hming chu ka hre tawh thin alawm, kan inhmuh theih avangin ka lawm e”a ti a.

.

Bazar an la ngaih avangin rei tak an awm thei lo va, an kal dawn chuan Freida chu a kal hmasa a, JD chuan ka chal chu a rawn fawp zeuh a, “Dam vat rawh aw”a ti sap a, ka lo bu nghat ringawt a. Room kawngkhar chu a vuan a, muangchang hian a rawn hawi let a, a mitmenga min ngaihtuahna a tihlan vang chu nge ni ka pangchang ru zo vekin ka hria.

.

An chhuah fel hnu chuan ka thaw hak a, ka kuttum chu ka han pharh a, ka lo tan rukzia chu ka hre chiah, ka na thum hian ka hria. Sawma chu nui var var hian a rawn lut a, a chhuah lai pawh ka lo hre pek lo.

.

“Teh thaw che chuan, I va hlim bawk ve”ka lo ti hmuk a.

.

“In induh ru chiang mai”a ti a, a la nui reng a.

.

“I mawl mi?”ka ti vin hlar a.

.

“A… I unaupa leh I thianpa ka ni tho a, engmah zep a ngai hleinem”a han ti zawm zat a.

.

Ka ngei lutuk chu ka inher a, ka hmel a hmuh loh nan ka puan chuan ka inkhuh a, ka theih chhung chu ka rilrua awm hi ka sawi  chhuak lo vang.

.

Darthlalangah chuan ka han inen a, ka hmel pawr fep leh ka sam ro bum ka hmuh chuan ka ner sak a, khawsik chuan min lo nuai nah man ngei mai. Ka inbual chu ka harh sawt hian ka hre bawk a, uluk takin lotion ka inchulh a, dam loh nan hun a uiawm tawh tlat; exam tura inbuatsaih a ngaih nasat vei nen! Ka khuma lehkhabu chu ka han ban a, zir tur hlir hian a khat tlat a, Sawma nen combined exam pek ve kan tum avanga kan materials lakkhawm chuan min tihah ngawih ngawih.  Ka phone chu ka han ban leh zat a, whatsapp message lo awm ho chu ka han chhiar thuak thuak a, JD morning wish pawh ka lo la hawng lo. Tunah chuan hnathawhna lamah a liam leh daih tawhin ka ring a, ka reply ta lem lo. Tukverh chu ka hawng a, boruak thianghlim tak mai han hip vang vang chu a nuam a, a hrisel hliah hliah hian ka hre bawk. Ka lehkhabu chu ka chhiar a, ka chhiar tui ta phian a, ka phone ri pawh ka lo hre lo lek lek a, JD-a bawk a lo ni, a tawp hma in ka la hman ta hram a.

.

“Sawma nen kan inhmu a, kan hnathawhna bulah an rawn kal a, I that tawh thute min hrilh a, ka lawm tak zet a ni”a rawn ti hmasa a, “I that deuh tawh chuan ka message kha I reply-te pawh ka lo phut ru ve viau a”a ti leh a.

.

“Ka lo hmu har deuh hlek a, hnaah I kal daih tawh ka ring a, ka lo chhang ta lo mai che”ka ti a.

.

“A tha vekah ngai mai ang. Lo dam tha vat la, kartawpah lenchhuahpui che ka duh dawn a nia”a ti a, thawm chu a bengchheng leh hle a, “Khawl kan hmang bawk sia, a bengchheng deuh a, ka dah phawt ang a, zanah ka lo bia ang che”tiin kan inbiakna pawh kan titawp a.

.

Ka ngaihtuah chhunzawm melh melh a, kar lovah hepa hi ka duh lutuk hman tlat a ni, ka lu chu ka han thing a, amah hi pumpelh dan kawng ka zawn zel a ngai tawh tih pawh ka hria, chuti chung chuan keimah ngei hian harsa ka tis i. Freida kha ka hrechhuak zawk a, an lo inngaizawng tak tak a nih chuan ka tan a awlsam sawt ang; JD lak atanga inthiarfihlim tur hian. Tlai chaw kan eilai chuan Sawma chuan chhunah JD nen an inhmuh thu chu a rawn sawi chhuak hlawl a, Freida pawh a awm tih a sawi lang a, ka duh dan ber ni mah se chu nu hming chu ka ngaina ta hauh lo. Ka ngaihtuahna chu ka lo kawm nasa deuh a ni ang, Sawma rawn chhuah lai ka lo hre lo va, arsi eng bik ka hmuh chuan kan naupanlai hunte hrechhuakin chu chuan ka rilru an lo luah daih a. Thawm a rawn neih avangin ka han hawi vat a, thingpui sen hang dawm chungin ka bulah chuan a rawn ding ve a.

.

“Kan naupanlai khan min tihder nasa thei ngawt mai”a ti a, a nui hak hak a.

.

“In boss thu kha chu in awih ve thei sia”ka lo tih chuan a duh lo ve kher mai.

.

“Mam, kei chu hnamdang hi ka support miah lo”thu tak deuh tak hian a rawn ti a.

.

“Leh ringawt a, hnamdang tuin nge nei dawn?”ka tih chuan min rawn melh a.

.

“Ka mit hi a daw ve khat khawp asin, nang pawh I pha thei hauhin ka ring lo”a ti a.

.

Ka thaw halh a, ka unaupa hnenah tal hi chuan ka inpuang mai tur niin ka hria.

“Sawma, engmah zep kan nei ngai lo tih I hria a, tuna mi kher hi chu sawichhuah harsa ka ti. A intanna tak pawh rei ala ni lo bawk”ka ti a, a lu chu alo bu nghat nghat a. “Engtin nge ka sawi ang tih pawh ka hre chiah lo, ka hre ngam lo a ni mah zawk maithei”ka tih chuan a thingpui chu a han lam khalh a.

.

“Ka hrethiam alawm, chuvang chuan thui I thlen hma hian inthiarfihlim la ka duh a ni. Tawpna awm lo tur inlaichinna siam hi awmzia a awm lo emai”a ti a, a dik chiah a ni.

.

Nihnih chu harsa ti tak chungin JD chu ka pumpelh a, a message leh call chhang lova awm chu harsa ka tiin ka na ru ve em em a, kan thatna tur a ni si. Chhun thingpui in turin choka ka pan a, ka patea meeting-in Aizawl lamah a zin a, ka nutei pawh Johana te school-ah a kal a, parents meet a awm dawn a ni ta awm e. Doorbell a rawn rik chuan kawngka ka va hawng vat a, pawr fap hian JD chu kawngkhar bulah a lo ding reng a, ka phu deuh zawk a, phung hmu ang mai ka ni. Ka sawm hun pawh nghak lovin a rawn lut nghal a, min nam lut deuh nawk nawk a ni mah zawk.

.

“Engati nge hetiang hian  I awm?”a aw ah chuan nelawmna reng reng a awm lo.

.

“Engtin nge ka awm a? ka danglam tih ka inhre lo”tiin ka han chhang ve a.

.

“KA hrethiam thei ngai dawn lo che a nih hi, engati nge ka call leh message I chhan duh loh?”a ti a, a hmui chu a han khawih deuh zauh a.

.

“JD… exam hmabak ka nei tih ka sawi a, insawrbing ka duh mai chauh a ni”ka ti a, ka aw chu a khurh loh hram ka beisei.

.

“M… Danglam suh, khawngaih takin.. FReida I hmuh hmasak ber nia keimaha feelings I neih ang kha nei reng la ka duh a ni”a ti a, min kuah a, tal chhuah ka tum chuan min kuah nghet zual sauh a.

.

“I hre sual anih dawn chu, negative  feelings ka nei lo”ka ti a, min thlah a, ka mitah tak min melh a, “KA mitah tak hian en la, chu thu chu han sawi nawn leh teh”a ti a. Ka ngawi ta reng a.

.

“Mawh, chu thu chu ka mita en chung hian sawi rawh, ka rilru ang hi I pu ve miah lo tih chu sawi rawh”k darah chuan a vuan a, min thing nawk nawk a.

.

“Ana ania”sawi sap hian ka ti a.

.

Min thlah vat a, inthiam lo hmel hi a pu nghal a.

.

“Sorry.. ka tina che em?”a ti a, ka lu ka thing a. “Ka duh che, ka duh lutuk che. Ka rin loh takin ka nunah I raw lut a, ka rin loh dan hlirin nang hian ka thinlungah hna I thawk a ni. M, kan hnam in an loh vang mai mai hian kan thinlunga awm hi kan thup tlat dawn em ni?”a ti a, a mitmengah chuan na a ti tih ka hria.

.

“JD, hmeichhia ka ni a, nang ai chuan ka dawih deuh zawk pawh a ni mah na…”ka ti muang ta raih a.

.

Sofa ban chu a hum ngawt ngawt a, a ban puama thisen zam chu a rawn pawng tawlh tawlh a, a mamitchhin daih avangin eng nge a ngaihtuah ka hre thei lo. A rawn men chuan min rawn melh chat a.

.

“Kan pahnih chuan engkim hi kan hmachhawn theih ka ring tlat a ni. Kan pahnih inkar a ni a, midang inrawlh I remti dawn em ni?”a ti a, ka khupah ka kiu ka nghat a, ka hmui chu ka hup a. KA kut chu dimte hian a rawn la a, “Ka tina lovang che”a ti leh sap a. Ka in daidanna bang chu thiah a ni ta riai riai mai.

.

PART-IV

.

Hlim takin kan inkara hmangaihna par chu kan tlan dun ta a, kan hma lam hun ai chuan tuna kan hlimna hi kan dah pawimawh ni mai hian ka hre thin. Mipa hmelhriat ka nei ve ta nual mai, chungho zingah chuan JD hi a danglam tiin sawi ta ila, a danglamna erawh a tha lam a nih loh vek pawhin mize chhia chu a ni lo reng reng ang. A khat tawkin kan inhmu ve deuh reng a, a kianga awm hi a nuam a, ka thlahlel ve ngawih ngawih thin.

.

Zankhat chu thil eng eng emaw ka ngaihtuah mai mai a, JD hi an chhungkaw chanchin ka zawt ngai miah lo tih ka hrechhuak a, ani lahin a sawi ngai bawk si lo. An family background hriat ve hrim hrim chakna chuan min tur a, remchang a awm veleh zawh chu ka tum a ni.

.

“Vawiin chu kan hnathawhna rawn hmu ve reng reng la ka ti deuh a”JD chuan a rawn ti a. Chhuah ka ngaih tho avangin a rem lohna tur a awm lem lo in ka hria.

.

Ka mamawh ka lamkhawm zawh chuan JD nen an hnathawhna lam pan chuan kan inphur chhuak a, boruak chu a nuam tawk viau leh nghal. Darkar chanve dawn kan tlan hnuah kan thleng a, ka han hawi vel a, engkim chu a ropui vel vek hi a ni ber. JD chuan ka darah a rawn vuan a, an insak mek lam chu a han thlir a.

.

“Ka design vek a nih hi”a ti a, a nui sak a, amah vek chuan, “Kan zawhfel hunah chuan hetah hian business ka kalpui vek tawh ang. Hei hi ka naupanlai atanga ka dream, ka puitlin hunah chuan helai hmunah ngei hian eizawnna ka tan ang ka tih thin chu a tak takin a lo thleng ve dawn a ang khawp mai”a han ti a.

.

“JD, I kum ala tlem tehlul nen I va puitling bik tak”ka ti a, min en a, nghet deuh tak hian min kuah a.

.

“Hemi phenah hian thawnthu thui tak a inphum tel alawm, hlawhtlin chak ngawih ngawiha min siamtu thil leh tun dinhmun thlen chakna min petu hi”a ti a.

.

“Ka hriat ve te a rem em?”ka tih chuan a lu chu a han bu nghat a, gate a hawng a, min luh pui a.

.

Hnathawk ho chuan JD nen min hmuh chuan an lo chhaih sap sap a, ka zah hlauin min kai tlat bawk a. An hnathawhna thlir rem tak hian dap hmangin in an sa a, chutah chuan kan lut a, boruak a dai nuam hle a. Chair lachhuakin thut hmun kan rem a, a hmun hma engkim chu duhthusam vek a ni.

.

“Ka pu hi Meghalaya Home Minister hlui a ni a, chhungkaw pangngai tak atanga chawr chhuak kan ni. Politics tuipui em em chhungkua kan nih avangin tute mai pawh hian ka pu ang a politician nih chu kan chak ve hial thin reng a, keipawh ka naupanlai chuan ka pu hnungzui hi ka tum ruh ve hle thin. Chutiang anih lai chuan ka pa erawh hi chuan tum hran daih alo nei thung a, politics hian a ngeng a chhun lo a ni ber ang chu. Ka la hriat reng chu, naupang te ka la ni a, zana ka muhil lai hi ka harh hlawl a. Tawng thawm ka hriat avangin chu thawm awmna lam chu ka pan a, ka pu leh ka pa chu an lo inhau na khawp mai hi a lo ni a. Room kawngkhar ka vuan a, ka pawh ngam loh avangin chuta tang chuan ka va thlir ve tawp mai a ni. Kan school chawlh lai anih avangin ka pute inah ka riak a, hemi tlai hian ka pa chu min hruai turin a rawn kal a, zan riak a a tuka haw leh tum kan ni.

.

Ka pa hi ka zah em em thin a, a chhan chu tawngkam vin vawikhatmah a hman ka la hre lo va, ka nu a enkawl dan leh kan unau min enkawl danah hian hetiang bak a awm theih ka rin loh vang a ni. Ka lo zah ve em em thin ka pa chu ka pu in a beng ta tlat mai a, engvanga chutia ka pu in kutthlak nge ka hre lo, ka tlanchhuak a, ka pu chu ka va nem ta sawk a, ka pa in min lo pawm vat a. Ka pa mita mittui tling ka hmuh chuan ka pu hi ka damchhunga ka tlawh leh ka ring tawh lo. Zanlaiah chuan ka pa nen ka pu in chu kan chhuahsan a, nidanga ka hlim loh hlaua min be siam siam thin ka pa chu a ngawi reng a, kha hunk ha chatuan tluk zeta rei niin ka hre hial nia!”

.

A thaw halh halh a, a thinlunga natna inphum chu hmu hmaih rual a ni lo. A mit chu a han ti zim deuh san a, a thusawi lai chu a han chhunzawm a.

.

“A hnua ka hriat leh dan chuan ka pu khan ka pa hi a politics khelhna hmanruaah hman a tum niawm tak a ni. Ka pa hi an unaua lehkha zir sang ber alo ni bawk nen, a lo awt viau pawh chu thil awm lo tak a ni bik lo. Chutih rual chuan ka pa tum ber erawh politics lam ni lovin, mahni ke ngeia dinchhuah chu a lo ni zawk si. Chuta an thu inhmu lo chu an buaina bul ber a ni ta a ni. Chuta tang chuan ka pu thiltihna reng rengah kan chhungkua chu telh kan ni ve ngai tawh lo va, ka pa na tih rukna chu kei naupang tan pawh hai theih a ni lo. MAhse, chu chuan tumruhna nasa zawk a lo pe a, ka nau rawn pian hi chuan ka pa in a sumdawnna bul a lo tan ve thei tawh a, ka nu in a theih ang tawkin a pui bawk a, rethei takin bul tan mah se kan chhungkua kha chhungkaw hlim ber kan ni tih ka pawm thlap. Workshop te takte atanga bultan ka pa kha vawiinah chuan Meghalaya chauh nilo, India rama Automobile Company tha zingah a lo tel ve ta reng mai. Rethei taka bul kan tan avang hian ka nu leh pa hi englaimahin chapo takin an khawsa ngai lo va, keipawh hian ka zah em em a, an tan ka theihtawp chhuah hi ka tum bawk a ni.”a ti a.

.

Ka thaw hak a, hlawhtlinna kalkawng hi kawng nuam leh mam a ni ngai lo reng a ni. JD kut chu ka han hmer vawng vawng a.

.

“Huaisen taka hrehawm tam tak lo paltlangtu I nu leh pa te chu ka ngaisang khawp mai. Fapa fel tak an han nei lehzel che hi a vannei ka ti”ka ti a.

.

Min en a, a then sak a, ka kut chu a la kang a, a fawp zeuh a.

.

“Ka thlah ang che chu, Pb-ah lunch chu kan ei dawn nia”a ti a.

.

Regal restaurant-ah lunch ei turin kan lut a, rei kan thut hmain kan lam pan hian inngaizawng ni awm tak hi an rawn phei a. Kan thutna zawn an rawn thlen chuan mipa zawk hian JD chu a darah a rawn beng pawp a.

.

“Wow… Ka rin loh deuhin….”chupa chuan a ti a, a hmelah chuan mak a ti tih ka hria.

.

“Dapyn… nangpawh chu… “JD chu a thutna atang a tho a, an inchibai a.

.

“Hei ka bialnu anih hi, duat takin ‘M’ tiin ka ko thin ania”a ti a, an nui var var a.

.

“Ehe! Kan va in la romantic ta sawt ve aw….”Dapyn chuan a ti a, a kut chu ka lamah a rawn phar chhuak a, “Dapyn ka nia, JD bestfriend hi ka ni e”tiin kan inchibai a.

.

A hmeichhe rawn kalpui chu a bialnu a lo ni a, kan buala rawn thu ve tur chuan kan han sawm a, anni pawh chu an rawn thu ve mai a. Eng eng emaw sawiin an phul hlut a, Dapyn chu fiamthu duh tak mai a ni a, min fiam zauh zauh a, kan vawikhat inhmuhna ni mah se ka nel ve deuh nghal mai. Kan in thleng min thlah a tum chuan ka lo hnial a, Sawma nen kan haw rual theih tho avanga hnial ka ni. Sawma nghah pah chuan JD nen a bike park-na bulah kan ding a.

.

“Ka chhungte nen engtikah nge in inhmuh theih ang aw..”a ti a.

.

“Ka duh lo, a zahthlak”ka lo ti vat a.

.

“Zahthlak loh e. Engkim kan in share vek thin a, hmuh che an chak tawh lutuk zawk”a ti a.

.

“A la rei lo si, ka duh lo”ka ti deuh bur a, a nui suk ringawt a.

.

PART-V

.

Exam turin Aizawl lamah Sawma nen kan chho a, kan cousin te ho nen kan inhmukhawm chu kan ri chel chul a, nuam kan ti tlang ngei mai. Ka cousin thenkhat chuan JD nen kan chungchang hi an lo hria a, min hau tawk lah an bo lo. Ka nui mai mai a, ka natna mai mai anih tur thu min hrilh chamchi hlawm a, mahse, chung mai maiin ka rilru hi a thlak zo lo. Kan inbe nasa bawk a, a then phei chuan phone-ah te chuan an han be ve nawk nawk bawk a, an ngaina vat ta reng a, mi hipna ngah tak bialpa ka nei miau a!

.

Shillong lama ka let leh hnu chuan mahni buai buaiin kan buai a, JD nen pawh inhmuhna hun kan nei ta lawk lo. karhnih dawn a liam hnuah kan inhmu thei ta chauh a, chumi tum pawh chuan Freida nen an bazar a, kei Sawma nen, rem leh rem lovin kan inhmu ta hram a, chumi ni atang chuan a ni, Freida hian thian ang mai maiin a en lo tih ka hriat ni. Kan pahnih inkar hre reng chungin a laka a awmdante, engkim kha thian piahlam a ni tih ka hai lo. Zanah ka mut hnuah min rawn call a, a chhan pawh ka hre lo, ka pick-up lo ve ringawt, chhuna thil thleng vang kha a ni pakhat bawk a, ka be chak rih lo a ni ber. Zing tin morning wish min thawn ziahtu kha a vawikhat nan a reh ve mial a, ka be duh bik lo. Chhunah a call ka dawng a, ka lungawi loh chhan min zawt a, ka tahte chu a chhuak a, ve ngawt a!

.

“Lungawi lohna I neih ka hre si lo a, tinge I danglam thut?”tiin min zawt a.

.

“Tukin zingah pawh min wish lo…”ka tih chuan a nui hak a.

.

“I lo notice ve hram maw.. ka lawmah tla mai rawh se chu tak chu”a han ti a. Amah vek chuan, “Naktukah Lady Hydari Park-ah Dapyn te nen kal kan rawt a, I rawn chhuk leh hnu hian mumal takin kan la inhmu si lo va, I remtih ka lo beisei ve tawp mai”a ti a.

.

Ka han ngaihtuah a, kan inhmuh khat vang hi a nih pakhat ka ring, hetia ka thinchhiat em em hi.

.

Ka hmun ngainat tak mai chang reng tawh tur hmunah chuan Dapyn leh a bialnu Mary, kei leh JD te kan inhmukhawm a, kan hlim a, a nuam kan ti khawp mai. An naupanlai chanchin atangin Dapyn chuan a sawi chho a, JD zei loh thinzia a sawi lai chuan kan nui nasa bawk bawk hle. Achang chuan tawng dang kan hman a ngai tlat chuan min tibuai ve thin, duh ang tawka an tawnga an inbiak laite chuan ka lo en leh reng thin a, mahni tawng ngeia biak theihte hlutzia pawh ka hre tharin ka inhria?

.

“Ka nu leh pa tan engtikah nge hun I insiam theih ang?”JD chuan a ti sap a.

.

“KA hre lo, JD, k huphurh tak zet  a ni”ka ti a. Ka kut chu a la a, a hum a, “Engmah huphurh tur a awm lo. Lunch ei tur ang chauhin inngai la, engkim a fel vek mai ang”a ti a.

.

“Ka theihtawp ka chhuah ang”ka han ti a, a nui sak a, “I know, you can do it”tiin ka biangah a fawp zeuh a.

.

Ka haw chuan ka chhungte an lo awm kim tawh a, ka patea chu muk zet hian sitting room-ah a lo thu a, min hmuh chuan thaw huai hmel hi a puin ka hria. Sawma chuan min lo melh zak zak a, thil fello chu  a awm chiang mai. Room-ah ka lut a, Sawma chuan min zui lut zat a.

.

“Khawnge I kal?”

.

“Kan leng, JD te nen…”

.

“Vawiinah kan kohhran ami ten an lo hmu cheu a, ka pa an rawn hrilh peih ngat mawle”

.

“Ka patea chuan engtin nge a tih a?”ka hlauthawng ve ta deuh hlek a.

.

“Engmah chu a sawi lo, mahse, a mitmeng hmangin warning chu I hmu ngei ang”a ti a. Ni e, ka patea hi zawng mi hau hreh ngang chi a ni a, a tawpkhawkah bak tawngkam hmangin min hau dawn lo tih a fate hian kan hrechiang khawp mai.

.

Chaw kan ei chhung zawng chuan ka patea chuan min melh lo hrim hrim, min hau se nuam ka ti zawk ngei ang.

.

“Chhuak tam lo ula a tha, Sawma leh Mami duh aiin pawn lamah in tam, pawimawh fe anih loh chuan inah tawm deuh a tha ang”a ti boh a, Sawma nen kan inen a, kan then deuh thaw a, ngawi reng lova chutianga a tawng chhuah chuan a nuam kan ti zawk.

.

Ka chhungten an hria chu hlauhthawnna neiha inhmuh pawh tlem deuh awm, ka duhna chu a zual telh telh ni mai zawk hian ka hria a. JD pawh chuan a chhungte nen kan inhmuh dan tur chu a lo ngaihtuah ve reng a, ka hun neih leh a hun neih a in nan fuh theih lawk loh avangin a duh aia tlaiah kan inhmuh a ngaih phah ta a ni. Ka duhthusam a ni mah zawk, eng ang pawhin sawn hla mah ila ka huphurhna chu a tlem phah chuang lo. A tawp atawpah chuan a chhungte ka hmu dawn ta. Ka beisei leh rin phak bakin an in chu a lian a, kan lut chiah chu ka insitna chu a nasa ngei mai. JD chuan min kai a, a nu leh pa leh a nau chuan hlim takin min lo chhawn a, ka hmuh tirh atangin chhungkaw inkawmngeih leh inhmangaih tak an ni tih chu ka hre thei nghal. A nu leh pa hmachhawn zawngin kan thu a, a tirah chuan chik zetin min han en phawt a, hun reilote chhung mah ni se chu hun chu hun rei tak ni mai hian ka hre hman, JD nu chu a thutna atang a tho a, ka bulah chuan a rawn insawn a.

.

“Nula hmeltha tak I ni, inhmuhna hun tha min pek avangin ka lawm e”a ti a. Ka kut chu a la a, a chul heuh heuh a, a nelawm kher mai.

.

Mizoram chanchin sawiin kan titi tui hle a, vawihnih khat chu an rawn zin ve tawh thu leh nuam an tih thute pawh an sawi a, mi fel tak nupa chu an ni. Hnam inan loh chungchangah kan lut a, kan titi pawh a dang ta zaih mai.

.

“I chhungte ngaihdan chu ka hre miah lo va, mahse, keini lamah hi chuan harsatna a awm lo a nia. In inhmangaih phawt chuan dan che u kan tum reng reng lo, keini chuan mihring hlimna hi kan dah pawimawh ber”JD pa chuan a ti a.

.

“Ka fanu ang thlapin ka en nghal che a, harsatna I neih pawhin min hrilh hreh reng reng suh aw. Kan fapa hi heti ve mai hi a ni a, tlin lohna a nei lutuk ang, I lungawi lohna pawh a awm ang, min hrilh la, keiman ka lo hau zel dawn nia”a nu chuan alo ti ve thung a.

.

Ka haw hnu thleng chuan ka ngaihtuah a, JD chhungte lamah chuan harsatna kan tawk lo chu a ni phawt a, ka chhungte hian min dang ngei dawn tih lah chu a lang chiang nasa mai si a, ka ngaihtuah duh ngai hauh loh, ngaihtuah loh ngawt theih bawk si loh chu ka hmaah hian a ding reng tih ka hai lo. Ka chhungte thuawih lovin han nei lui ngawt dawn ila, ka chhungte rilru na tur chu ka ngai ngamin ka ring si lo, hringnun hahthlak tak zawng a lo ni.

.

.

PART-VI

.

Kan hun hman dan ngai rengin kan hmang a, ka zirlai bikah chuan hma han sawn em emna ka nei hran lo va, chutih rual erawh chuan ka chhungte hian keimahah venthawn an nei tih ka hria a, ka theihtawpin keipawhin an mitmei chu ka veng ve bawk. Chawlhni tuk khat chu inleng kan nei a, ka patea nen sitting room-ah an inkawm a, thingpui ka pek pah chuan chupa chu ka han enchiang a, kan biakinah vawikhat chu ka hmu ve tawhin ka hria.

.

“Hei ka u fanu Mami ka tih chu a nia, ani hi college zo fel tawhin helamah a awm ve rih a, ka fapate pahnih hi an room lamah an awm a nih ka ring”ka patea chuan a han ti a.

.

“Aw…. Hmanni khan ka hmu tak alawm, lo inchibai ila, Ruata ka nia”a ti a, kan inchibai a.

.

Ka thil tih lai a laklawh avangin ka kalsawn leh mai a, rei pawh thu tawh lovin ani pawh a haw ve ta a. Chaw kan ei laiin ka patea chuan Ruata chungchang chu ka nutei a hrilh mawlh mawlh a, a hna avanga helaia rawn awm anih thute, kohhran bel chat mi anih avanga a ngainatawmzia te chu a sawi a.

.

“Au Mami nen inngaizawng se a fel chuan”Johana chuan alo ti khauh a.

.

“Hm.. Ngawt a! “ka ti hluai a, min en thap a, an nui vur vur hlawm a.

.

“Ni e, tiang mi fel hi hmuh an vang a, tunlaiah chuan hmeichhia pawh hi fin a ngai ve tawh ania”ka nutei chuan a ti a. An sawi chhuak dawt lo na in JD nen hian kan inkar hi tawp vat turin min duh tih ka hria.

.

Inchungah ni lum ai pahin lehkhabu ka chhiar a, ka lo muhil sek a ni ang, tuemaw ka bulah hian rawn dingin ka hria a, ka mutna atang chuan ka tho zawt a. Ruata chuan nui sang hian min lo en a, ka mit chu ka han nuai deuh nawk nawk a.

.

“Ka ko che a, I hre thei lo reng reng. I chhungte an awm lo mi?”a ti a. An chhuah awm ka hriat loh thu ka sawi chuan, “Anih chu, ka rawn hawi chho a, ka hmu che a, ka rawn chho tlang ve ringawt a”a ti a.

.

Inhnuai lamah kan chhuk a, ka nutei’n min hmuh chuan hlim hmel tak hian a lo ri luai a, hetiang boruak kual vel hi ka ning ngawih ngawih. Sawma chhuak chu a rawn haw chiah bawk a, Ruata nen thil eng emaw  tih tum an nei a nih hmel.

.

“U Ruat, kan inthlak lawk ang e aw, ka pa pawh biakin bulah a la tei a la tei a, a hmanhmawhthlak lo hang”a ti a, a room lamah a lut nghal a.

.

“Eng nge in tih dawn a?”tiin ka han zawt a.

.

“Piano thar kha a rawn thleng a, kan va fit ang e”a ti a, “Lokal ve la”a ti a, a nui deuh suk a.

.

“A peihawm chiah lo, in zawh hunah ka la play zawk dawn nia”ka ti a.

.

An chhuah hnu chuan roomah ka lehkhabu chu chhiar zawm tumin ka lut a, a mood-ah ka cheng thei tawh lo. Ka lukham hnuaia ka phone chu ka han phawrh chhuak a, JD hnen atangin call emaw message emaw engmah ka la dawng lo. Ka thaw hak a, ka phone-a call rawn kal chu ka han en vat a, Dapyn a lo ni.

.

“M, JD accident kha I hria em?”

.

“Hre lo. A serious viau em? Khawiah nge accident a tawh?”

.

“Unconsious in  a la awm, ka rawn hruai I duh em?”

.

“Aw, ka lo insiam ang, rawn hmanhmawh rawh aw…”

.

Ka thaw hlawp hlawp a…. Min rawn biak hun nghakin ka awm a, ani erawh hliampui tuarin alo let reng si. Ka inthlak sawk sawk a, Dapyn-a min rawn hruaina tur hmun pan chuan ka kal nghal a, ka kawchhungte chu a so bulh bulh hian ka hria.

.

Hospital kan thlen chuan JD chhungte chuan min lo ko vat a, engtia chesual nge a nih ka zawh chuan an insakna atang a tla thla hi a lo ni a, tunah chuan a rawn harh chhuah tawh thu leh ngaihtuahawm lutuk a nih tawh loh thu chu min hrilh a, ka thaw huai mai.  Hmanhmawh zetin Freida chu a rawn tlan lut ve hlawk hlawk a, chanchin a rawn zawt ve nghal mawlh mawlh a.

.

Tukverh bulah chuan ka ding a, ka rilruin ka tawngtai reng a, chanchin chhe lam kan hre thut ang tih chu ka hlau ber. Ka haw dawn chuan a hmel hmuh ve hrim hrim ka duh avangin JD nu chuan min hruai a, a chhunga luh a theih loh avangin pawn atang chuan kan thlir a, a muhil hmel chu ka thlir ngawih ngawih a, “Dam vat ang che”tiin ka phun sap a. Dapyn chuan damdawiinah a riahpui tur thu a sawi chuan chanchin min rawn hrilh zung zung turin ka chah a, ani pawhin min hrilh zel ang tih a sawi bawk a. Zana ka mu laite chu ka harh zawk zawk a, Dapyn hnen atang chuan chanchin tha lo hre tur ang mai hian ka inngai a, zan a rei duh ngei mai. Zing khua a var chuan Dapyn chu ka be vat a, chanchin tha lo engmah a awm lo tih a sawi chuan ka hahdam huai a. Sawma room-ah ka lut a, guitar inchhawpin eng emaw hi a lo ziak leh mawlh mawlh tawh a, hla a phuah leh tawh a ni ngei ang.

.

“Sawm, vawiinah hospitalah min kalpui lawk rawh aw”ka tih chuan phawk fe hian min rawn melh chho a.

.

“Tunge awm?”

.

“JD’n accident a tawk a”tiin ka hrilh ta vek a.

.

“Mam, sawi a hun lo tih chu ka hre tho na, in inkar hi tawp vat se, I tan atha ber nia”a ti a.

.

“Min kalpui dawn nge dawn lo?”mi mah rilru hah naklaiin, “Taxi ka hmang mai ang”tiin ka inher vut a.

.

“Ka kalpui lo ang che ka tih loh kha, kan kal dawn nia”tiin a nui a, a khumah chuan ka thu hnawk a, kei ai a thla in a naupang a, mahse, a lakah hi chuan ka pangchang riau thin a ni. Ka mittui chu ka hru zeuh a.

.

“Kan inkawp hi rem lo tur si tinge kan inhmelhriat kher kher le?”ka mittui rawn luang thla ngiai chu ka han hru thuak a. A guitar chu a tung tha a, chair chu ka bulah a rawn hung phei a, thawk a han la te te a.

.

“Ka hrethiam lutuk che ania aw, keichuan ka hrethiam reng che. Mahse, ka hriatthiam ringawt che hi a tawk zo dawn lo, Mam, tunah chuan engmah sawibelh ka duh lo. I hrethiam tih ka hria, engpawhnise, kan kal dawn nia”a ti dam ta diai a.

.

PART-VII

.

Hospital kan thlen chuan Dapyn chu pawnah alo tei nulh nulh a, min hmuh chuan min rawn pan vat a, Sawma a hmuh chuan a mit ko a han san deuh ak a, ka cousin a nih thu hrilhin a hmingte chu ka han sawi nghal a, JD chanchin ka zawt a.

.

“A tha lutuk, a hmu chak tawh ngawt ang che.”a ti a, “Mahse, tunah chuan Freida a lut rih a, pahnih awm an

la phal lo a”ban charh chuan a ti a. A hmelah chuan inthlahrung hmel hi a langin ka hria, za lo te hian ka nui lui sak a.

.

Minute 10 vel kan thut hnuah Freida chu a rawn chhuak a, ka ding vat a, amah pawh be tawh chuang lovin room lam chu ka pan ding nghal a. Eng nge alo an tih mawi hnaia han zawh hmasak pawh thil tih awm tak anih laiin ka bialpa chu keimah ngeiin a dinhmun va hriat ka duh zawk.

.

“Hey..”a bulah chuan ka ding a, min hmuh chuan a nui var var a, “Hai”sawi sap hian a ti a.

.

A bulah ka thu a, a kut chu min lo pe vat a, hahdam hmel tak hian a han maimitchhing a.

.

“Ka hmuh chakzia che I hre lovang”a ti a, min rawn melh a.

.

“Min tihhlauhthawnzia hi I hria em? Dam vat ang che”ka ti a, a lu chu a bu nghat a.

.

“Ni tin I rawn kal thei ang tiraw?”

.

“Ka tum ang..”ka kut chu a hmer salh a.

.

Kawngkhar chu a rawn ri rak a, JD nu chu ei tur kengin a rawn lut a.

.

“Oh.. I lokal tih Dapyn’n min hrilh a, I fel lutuk. Tunah chuan bawiha pawh a dam chak viau ang”a ti a, nelawm fe hian a nui a. “Cabin kan chang ve hlauh mai a, chawhnu lamah chuan kan insawn thei taw hang”a ti a.

.

“M, nangpawh I duh hun hunah I rawn lut thei taw hang”JD chuan a ti a, a hmai chu na tih hmel deuh hian a han khawih a, a nerd an atang chuan a na tawk ve viauin ka ring.

.

Rei tak awm duh mah ila thil theih a ni lo va, a tuka tlawh leh ngei tum chungin kan haw san ta a, ka haw dawn chuan ka kal a phal mai lo va, ka kut chu a vuan bet tlat a, ka kal leh vat ang tih tiam chungin ka haw a, keipawh hian kalsan chu ka hreh a ni. Kawngtluanin Sawma nen chuan kan inbe lo, kan ngaihtuahna kan kawm ve ve pawh a ni mah na! Zan lamah ka patea chu kohhran lehkha kan tihfel pui a, kan mengrei ta phian a, ka mut dawn cuan dar 11 a lo ri der tawh a. Ka khum ka siam zawh chuan ka phone-ah whatsapp message pahnih ka dawn chu ka han hawng a, pakhat chu JD hnen atang a ni a, pakhat ve thung chu Ruata hnen atangin a ni. JD message chu hawngin ka han chhiar a, kan inbiak chhunzawm avangin Ruata chu ka lo chhan theihnghilh zui bawk nen, JD nen kan in mang tha hnuah ka chhang ta chauh a.

.

“Ka rawn call thei che ang em?”a ti a, a theih lohna ka hre lem lo bawk a, min rawn call a. Thil ho tak tak kan sawi a, kan ka ti tak na a, sawi tur ka hre ve lem lo. Min hmuh hmasak bera a awmdan a sawi chuan ka nui hak a, a chhan chu JD min hrilh ang chiah a nih vang a ni. A chang chuan an mizia thlengin in anna lai an nei a, thil pehhel thiam lo leh thup mawi vel thiam lo tak an nihte chu an in an em emna a ni bawk.

.

“Bialpa I nei tih chu I nau hnen atangin ka hre tho a, chance ka hmu ve anih phawt chuan ka bawhzui vat ang”a ti a.

.

Thil tam tak chu chuan min ngaihtuah tir a, JD nen hian kan inkawp rei theih a ring bik lo em niang? Tu pawh mai hian kan relationship hi a last dawn lo tih hi an ring thup ni hian ka hria a, kei hian ka hria a ka awih phal lo nge ka ngaihtuah ngam loh vang hian mi min thlirpui dan hi ka haider mai mai zawk? Engpawh chu lo ni se, a tawp ka thleng phawt tur a ni, kan tawpna chu engpawh lo ni dawn se!

.

Ni chuan ka hmaiah tak a rawn chhun a, zing tin min kaitho tu tha tak a ni. Ka patea chuan chanchinbu a lo bih leh vang tawh a, ka nutei chuan thingpui a lo pe mek a.

.

“Bawiha’n a hruai che a va ngai awm ve”ka nutei’n a tih chuan ka lo phawk hru a, Sawma nen hospital kal leh kan lo tum ru viau a, ka patea hian eng programme pawimawh nge a neih leh tak?

.

“Tih tur I nei mi pate?”ka ti a. A tarmit kar atang chuan min rawn melh a.

.

“Guwahati lehlanga kal kan ngai dawn a nih awm chu, Synod thil pawimawhah”a ti a, a chanchinbu chu a keu leh mual mual a, Sawma chu ka chang lo phawt a, taxi talin ka kal mai aniang chu. “I nutei I lo pui dawn nia aw, biakinah pangpar huan vel saw kan kohhran nu hoin chinfel an tum aniang”a rawn ti leh a, ka kun deuh lap a, ka hnial ngam der mai si lo.

.

Ka theih loh leh hman loh dan JD ka hrilh chuan a lo hrethiam em em a, ka nutei nen biakin lam kan pan hnak hnak a, ka rilru chu a kim chuang lo. Chhunah rei vak lo kan inbia a, Freida a awm thu leh eiturte a siam sak thu hlim takin min rawn hrilh a, chu nu hming a sawi chuan ka thin a ti rim hlur ringawt. Ani a hman laia ka hman lo bikte chu ka thin a rim bawk a, tih theih ka nei der mai si lo. Karkhat a liam hnu chuan JD pawh a tha sawt khawp a, hospital atangin chhuah an dil a, doctor remti vak lo chung chu an inhawn lui ta tho a, damdawiin khuma mut reng chu a ning ve tawh ngang a ni ang. Nikhat ka hman lo tih loh chu ni tin ka tlawh ve ziah a, in lamah erawh chuan ka kal zen thei tawh dawn lo.

.

Ruata pawh mawi lo khawpa che miah si lo hian min hnaih reng a, ka tan biak chhiata lo tih that loh ngawt thu awm bik lo chu chhuah tlan chang pawh kan nei ve thin. Kan in a lo inhlat lo bawk nen a rawn chuangkai zan tin a, ka unaute nen an tuina music alo in ang leh zel chuan a tlangneltir bawk a, a felzia hi kan chhungkaw titi a ni ta reng mai a ni. Inrinni a ni a, bazar lamah kal ka tum tih Ruata’n a hriat chuan kalpuiah min rawn sawm vat a, motor alo nei bawk nen a remchang a, ka lo remti ve mai bawk a. Chhungkaw mamawh bakah Mizoram lama ka unaute thil tur enkual a lo ngai a, nileng hun chu kan hmang a ni ta der. Kan haw pawh chuan khua a thim lek lek tawh a, mahnia chhuak ni ilang chuan ka patea nupa chu an lo buai chhe leh der taw hang. Inchhung thlengin Ruata chuan min thlah thlap a, mipa smart ve tak a ni tih ka hria, mahse ka tan chuan mipa fel tak pakhat a ni ve mai. Tlaia JD message ka thaw chu ka han en a, min chhang miah lo tih ka hriat chuan ka han call a, a pickup chuang lo. Miscall a hmuh hunah min callback mai ang chu tiin ngaihthat lohna pawh ka nei hran lo. KA mut dawn thleng pawha thawm ala neih loh vang chuan ka han call leh a, a in reject tih ka hriat chuan a ngaihna ka hre lo hle a, chanchin tha lo a awm em ni tiin Dapyn chu ka be ta ringawt a.

.

“Engmah that lohna a neih ka hre lo, tlaiah pawh chaw ka ei a, a tha alawm. Naktuk Sunday a ni bawk sia, I rawn kal theih a rin loh thute pawh a sawi ve luam kha maw le, ka titi pui nasa deuh a, a chau ve deuh a ni ang”a lo ti a, tlem chuan ka ngaih a tha leh deuh.

.

Zingah pawh a message ka la dawng chuang lo, a last seen check ka tum chuan a lo hide daih chu niin, chu mai a ni lo, a dp ah pawh Freidan en an thlalak ngat a ni a hman ni! Chutah chuan ka thin a rim ve ta tak zet.

.

“Ka biak che I duh lo anih chuan ka be tawh lo chiang hle ang che, mangtha”tih chu ka thawn a, ka thinrim lutuk chu ka khur deuh dawt dawt a, huat theihtawpin hemi tuk hian ka hua!

.

PART-VIII

.

Chhung inkhawmnaah ka hun neih tuk a ni leh zelte chu hrehawm ka ti a, ka thaw chu a ipik ngawih ngawih tawp a ni. Ka aw te chu ka theihtawpin ka han thup ve bawk a, ka chhungril na ngawih ngawih chu ka chhungten an hriat ka duh lo. Kan inkhawm pawh chu a hming mai chauhin a ni, ka rilruah engmah dang ka ngaihtuah thei lo. Kan inkhawm bang chu ka haw tlang nghal a, tumah ka be kual peih lo. Kan in chhakah chuan car pakhat hi a lo ding a, ka pelh dawn chuan Dapyn chu a rawn chhuak a, min ko nghal  vat a.

.

“JD kan ang hmiang, hun I nei thei ang em?”a ti a.

.

“Ka hmu chak lo”ka ti hmak a.

.

“M, in inhmuh ngei hi a ngai ania, I message kha min chhiartir a, thil hriat dik tawk lo I nei a ni ngei ang”a ti a.

“Dapyn, engmah tih dik loh ka neih ka hre lo, amah zawk a nih kha..”ka sawi zawm thei lo, ka tap mai dawn hian ka hria.

.

“Oh, ka hrethiam che, kha vang khan alawm in inhmuh hi a ngaih”a han ti leh a.

.

Sawma leh Ruata pawh chu an rawn thleng chawpchilh ve mai a.

.

“I thingpui lum rawn in kan tum asin”Ruata chuan a ti a, inah lo zu tlang turin ka ti a, an kal ve nghal mai a.

.

“Dapyn, ka chhungte ka dil phawt a ngai, ka thawmhnawte pawh hi ka thlak lawk ang”ka ti a, ka inher tur chiah hi ka banah min pawt lawp a, car ah min nawr lut a, “I kal ngei ngei hi a ngai tlat,ka thiana khu a chhe mai ang”a ti a.

.

Eng thu nge a sawi zawh chiah kha, engvangin nge a thianpa chu a chhiat vek ang? Kan tlanlai chuan ka phone a rawn ri a, Sawma a lo ni.

.

“Ka chhuak lawk, ka lo haw leh vat ang, I pa te bulah tha deuhin lo sawi phawt rawh, nangmahah ka innghat”ka ti a, a rawn nui hak a.

.

“Ka nu te pawh an rawn haw lawk lovang, lunngai lo phawt la, mahse dar 4 hma in lo thleng ngei ngei ang che”a ti a, ka thaw huai mai.

.

JD te in kan thlen chuan a lo reh deuh thiap a, Dapyn chuan JD room lamah min hruai lut nghal a, ani chu a khumah a lo mu reng a.

.

“Hey.. thiana, I bialnu a lo thleng a nia”a han ti a, min siai zeuh a.

.

JD chu a rawn inher a, min rawn melh zawk a, harsa tih hmel tak hian a han tho a, Dapyn chuan alo pui vat a.

.

“Hun tha tak inhman ka duhsak a che u, sitting room-ah ka lo va awm ang e”tiin a chhuak zui nghal a.

.

“I hlimna tur anih chuan reh ta che, rawn kal kher pawh hi a ngai mi?”a ti hluk a.

.

“Min be duh miau si lo alawm”ka tih chuan thinrim em em hian min rawn melh a.

.

“Kei khuma na tuara ka awm laia mipa dang nen hlim taka han len vel chu a nuam khawp ang. Kei chu heti mai hi ka ni, ka dam loh hma pawhin I tan hun ka nei tam lo, a tha vek e”a ti a. Biak zui huphurawm khawp hian a awm zui bawk a.

.

“JD, I tawng duh dan chu a va mak ve, I awmdan hian ka thin I tih rim loh I ring bik em ni a?”ka ti a. A mutna bula eitur awm chu a vai thla pawp pawp a, ka thutna atangin ka ding a, a chetdan chu rap zet hian ka en tawp a.

.

“Min tina asin…”a ti sap a, a tukhum chu a dawm a, “KA na asin”mittui tling pam hian min rawn melh a.

.

“JD, ka hrethiam lo tak zet a ni…”ka ti a, ni e, a thinrim chhan hi ka hre lo a ni.

.

“I hre lo tak tak maw?”tiin a phone chu a hmet mual mual a, “Kha, a chiang em?”tiin min pe a. KA han en chuan Ruata nen bazara kan inzui lai vel chu chi hrang hrang panga vel a lo kawl reng a, mipui kan tam deuh avanga kan innek laia Ruata’n min ven nan a min kuahna pakhat pawh a tel ve vang mai. A chhan chu hei hi a lo ni chiah mai, hei hi tu tih tak ni maw?

.

“JD, hei hi maw I thinrim chhan chu? Nizan khan min hrilh ni la chuan maw tuna kan buaina zawng zawng hi kan pumpelh vek tur a nia, hei hi Ruata a ni a, kan chhungkaw thian hnai tak a ni”tiin bazar lama kan inzui dante chu ka hrilh ta vek a. A thil paih ho chu ka chhar khawm a, a bulah chuan ka thu a, “HEi hi tu thawn che nge tih ka hre lo na a, mi rilru tihnat hreh lo tak anih ka ring”ka ti a.

.

Ka hnung lam atang chuan min rawn kuah a, “Ka chet dan mawi lo tak avang khan min ngaidam rawh aw. Chuan, thudik lo vanga ka tihnat vang che pawhin… M, ka thinlung hi hmun sang tam takah a kehsawm hman asin”a ti a, “Dam tha ni ila chuan ka rawn hmu vat che ang a, hetiang hi a thleng lo vang, khawiah mah ka la chhuak thei bawk si lo hian  thil ni thei leh thleng thei hrang hrang hi a ngaihtuah a, ka na thut atin ni”a ti dam diai a.

Hlim takin kan sawi dun a, thlalak thawntu ka zawh erawh chuan min hrilh duh lo va, ka rilru a na mai mai tiin a sawi duh lo a ni. A dp vel ka sawi chhuah chuan mak tih hmel tak hian a phone chu a la vat a.

“Keimah chuan ka hmang miah lo, ka phone khawih tu an awm a ni ang”a ti a. 

Inngai leh inthlahlel tak chung chuan ka haw san leh ta a, tute maw avang hian kan hlimna hi tihchhiat a ni fo mai zawng a ni. Chu thil thleng erawh chuan kan pahnih inkar bikah inlaichinna nghet zawk a rawn thlen a, pawh then harsa khawp inlaichinna a ni kha thil khan a hrin tak ni!

PART-IX

Kumkhat chhung zet chu kan lo inkawp ve ta, ni tin hian kan hlimna a zual emaw tih theih a ni a, JD pawh a taksa a chak tawk tawh a, tunah chuan a dam tha var tawh. Chutih rual erawh chuan ngaihtuahna sen nasat ngai chi thil chu fimkhur thuah doctor-te chuan thawk lo turin an ti a, zawm erawh a zawm tha lem lo. An insak pawh zo fel tawhin office pawh an sawn fel tawh a, a pa tha chhang dawltu anih avangin ni tin a liam a ngai a, a chang chuan Sunday-ah chauh inhmuh theih ni te pawh kan nei thin. Kan inngai a, kan inhmangaih a, chu chuan khawi hmun nge min thlen dawn tih kan ngaihtuah ngai lo.

Tlai khat chu ka patea hnen atangin kamkhat ka tawk a, ka na ve zawk mai, thudik mah nise a chang chuan thu dik hian mi tina fo thin a ni.

“Kan fanu ang tak takin kan en che tih nangpawhin I hai lo, heti chung hian han hauh che emaw hi I nutei nen hian harsa kan ti a, hauh nachhan tur che lah a awm ngai lo. Mahse, I bialpa nen inchungchang hi chu sawi nawn ngai tawh lo se ka duh tak zet a ni. I nu leh pa hian hria se, keini min rin em avanga kan bula an dah ngam che avangin khua kan hawi ngam lo ang. Ngun takin I inngaihtuah dawn nia”a ti a.

Ka muhil thei lo chu ka inlet tawn chhen a, JD nen inthen tur anga ka inngaihtuah ringawt pawh chuan ka bing mup mup a, lehlamah ka patea thusawi kha  a dik vek bawk si.

“JD, hnam inan loh vang hian kan inthen ngai ta se, engtin nge I tih ang?”tia ka zawh laite chu ka hrechhuak a.

“Ka na viau ang, Pathian hian mihringte inkarah inhmangaih tawnna a dah miau a, ani chuan a thliar hrang ve hauhin ka ring lo. Kan pahnih bikah chuan engkim hi a risk a ni miau a, I chhungte rilru hi hmin thei ila ka ti ngawt mai”tiin min chhang a nih kha.

Ka thaw halh halh a, he hmun hi ka chhuahsan a nih ngawt loh chuan JD hi ka thlah thei dawn lo tih lah chu ka hrechiang si a, mahse chumi ti tur pawh chuan thil awlai a la ni lo cheu leh nghal. Ka tawngtaina pawh chu ka duhdan ka thlenna a ni ringawt tawh a, tawngtai dan thar ka hman pawh a ngai tawh hialin ka ring.

JD nen kan inhmuh tumna lam pan chuan ka chhuak a, kan hun tiam a bawhpelh ngai lo. Nidang ang lo takin ka thlen chuan a lo la awm lo va, hna laklawh a neih ka ring a, ka thu ve ta reng a. Ka rin aia a rei tak avangin ka phone chu ka lachhuak a, ka han call nghal a. A ring quit thak a, vawithum ka tih hnu chuan ka beidawng tawh. Ka thutna atanga ka tho chhuak chiah chu Dapyn a rawn lang hlawl a.

“M, ka thianpa in min rawn tir a, ka rawn tlan nal nal anih hi. Freida hospitalah a awm a, a chau thut a ni awm e. Heta rawn kal hmain a kawi hmasa a, Freida lah chuan alo chelh bet ta daih si a, anihna takah chuan a damloh laia rawn kal ve reng anih vangin han hnial tawp a hreh ve si a, rei vak lo chu I lo nghah ve a ngai dawn a nih hmel”a ti a.

Regal restaurant-ah darkar chanve dawn kan nghak leh a, keimah ni lovin Dapyn a rawn call a. A la kalsawn theih loh avangin nghak lo mai turin a rawn ti leh a, zanah kei chu min rawn be dawn tiin a thianpa chu a rawn hrilh a ni. Engmah ka sawi lo, tawp law law rawh se. In ka thlen hnu chuan ka inngaihtuah nasa hle a, remchangah la in inthen ka rawt mai dawn em ni ang? Ka thin a rim rual rualin hei hi kan inthen theihna tura hun remchang ber a ni lawi bawk si, awmdan ka thiam lo va, sawi tur ber pawh ka hre lo.

Ka mittui rawn far fap chu ka hru a, inthen tih tawngkam hi sawi mai awlsam mah se a taka tihhlawhtlin hi ava har si em! Ka bula phone call rawn kal mek chu ka en ngawt ngawt a, a tawpah chuan thumal pathum chauh sawi turin ka pickup a, “JD, inthen ang” tih chu. Ka dah leh nghal hmak a, ka switchoff nghal a, ka awm chu ka dawm vang vang a, hei hi maw kan tawpna tur chu ?

“M, kan inthen ang maw? A theih loh, a theih loh ania aw… Ka thlen tir ngai lovang, ka hun zawng zawng hi pek che ngai mah se ka duh zawk tho ang”tihte chu ka phone ka on chiah chuan ka dawng nghal a.

Engmah ka ti thei lo, ka room hi ka chhuahsan mang lo a ni ber. Ka phone chu ka on ngam lo a, ka tuar tlawk tlaw ringawt mai a ni. Ni thum chhung chutianga ka awm hnu chuan ka taksa chu a chau tak zet tawh a, chaw ka ei thei lo va, ka mu thei bawk si lo, ka patea pawh ka ti mangang ta hle a. Damdawiin a luh te chu an han rawt bawk a, ka natna ka hriatchian em avangin luh ngai ka ti lo a ni. He hmun hi chhuahsan ka mamawh a ni, kan khuaah haw ila, sulhnu kan neih miah lohna hmunah chuan ka dam vat zawk maithei asin tiin.

“Mam, a fair ka ti thei thlawt lo a ni, vawikhat chiah hmu leh rawh, a chhe zawnga damchhung huna miten min hriatreng hi a tha lo a ni. Engkim sawi dun ula, a hrethiam em em ang che”Sawma chuan a ti khauh a, a dik tih ka hria, mahse, hmuh ber hi a ni ka hreh chu ni.

Ka unaupa thu min rawn ang chuan a tawpah inhmuh chu ka titlu ve ta hram a, phur taka min rawn pan lai te chuan ka mittui chu ka hru ru reng a, kan tawpna tur a ni tih a la hre ve si lo. Min thlahlel tih hriat takin min pawm vawng vawng a.

“I inkhawm ringin niminah in biakin bulah ka chang reng che a, mahse ka hmu chuang lo che. Ka hmu tawh dawn lo che emaw ka ti hial a, M, ka a mai dawn hian ka inhria asin”a ti a. 

“JD… Ka thusawi tur hi sawi ngai lo se ka ti mange…”ka tih chuan ka hmui chu a rawn hup a.

“Ka hria asin, ka hre vek alawm. Nimina nangmah nghaka ka thut reng lai khan I unaupa nen khan kan inhmu a, engkim ka hre tawh alawm. Mahse, a hnenah pawh ka intiam a, kan inthen kher hi a ngai ta anih pawhin karkhat tal chu hlim taka nangmah nena hun hman hi ka dil a ni. Chuvang chuan kan tawpna tur hre lawksa anga awm hi ka duh lo va, hun tlemte kan neih hi hlim takin hmangdun zawk ang”a ti a.

Chumi ni atang chuan inngaizawng hlim ang mai hian kan awm tha leh a, kan thil la tih dun ngai loh tam tak kan ti a, nitin chutiang chuan thil thar kan ti dun a, kan hlim a ni. Ka chhungte pawh chuan lainat takin min thlir tawp a, Sawma’n engkim a hrilh vek tawh avangin min dang lo. Kan hlim hun chhung hi a rei tawh dawn lo emai a, tunge chutichung min tihchhiatsak duh ang ni? Ni lah chu a kal duak duak a, karkhat chhung hi a lo va rei lo thei ngai em! Kan inhmuh tawp ber ni a lo thlen chuan kan hmel pawh a ngui riai a, inthup viau thin mah se JD pawh a inthup thei meuh tawh lo. Laitkor-ah a tawp nan kan kal a, hriatreng tawh tur hmun hrang hrang zingah he hmun pawh hi a tel ve reng tawh dawn a ni. Hmun nuam leh mawi tak ni mah se kan rilru chu a kim tawh tlat lo va, kan kalna hmun ai mahin kan kal chhan chuan kan rilru a kap zawk niin a lang. Kan haw dawn chuan ka mittui chu a rawn baw zawih a, ka inveng seng tawh lo a ni. JD chuan ka mittui chu duat takin a hru a, a lu chu a thing a.

“Thil pakhat ka hrilh ang che aw, ka sawi loh chuan ka inchhir kumkhua ang tih ka hlau a ni. KA HMANGAIH CHE, KA HMANGAIH LUTUK CHE”a ti a.

Min kuah thlawp a, ka lu chungah a khabe a nghat a, a khur der der a, tap lo turin a theihtawpa chhuah tih ka hria. Kan inbulah chuan kan ding a, car steering chu a hum ngawt ngawt a, tunah chuan kan pahnih thawnthu a tawp dawn ta, ka va hawi a, mittui tling pam chuan min lo nuih sak a. Ka kuah thlawp a, ka tap ta zawih zawih a.

Hun harsa leh khirh tak tak ka paltlang mawlh mawlh a, a chang chuan ka tuar chhuak thei lo mai dawnte hian ka hre bawk a. Mahse, kumhnih zet ka beih hnuah chuan ka tuar chhuak thei ve ta, ka lawm a, ka chhungte hlei hlei an lawm. Chutiang chu ni mah se ani kha ka theihnghilh ngai reng reng lo va, kan inhmangaihna hian rah chhuah ve ta lo mah se mi pawimawh tak ka nuna tel ve reng tawh tur avang chuan ka hlim leh thin.

TLIPNA

Ka patea pawhin Shillong-a a term a hmang zo ve dawn ta reng mai, ka hunawl neih chu an rawn chuh ve vat a, ka hun lo hman tawh thinna lam pan chuan ka kal leh ta vang vang a. Tunah chuan a tawp nan tak tak he hmun hi ka pan a ni, mittui nen ka chhuahsan tawh em lo ang chu maw! Mizoram lama kan hawn tur lamkhawmin Sawma nen kan vir buai ve hle a, nihnih hnuah chuan he hmun hi kan mang tha tak tak tawh dawn a ni. zanriah eikham chuan eng eng emaw sawiin kan hlim ve hle a, ka phone a rawn rik avangin ka han pickup vat a. Engtik lai mahin min rawn be tu aw chu keimahah hian a mikhual ngai lo vang.

“M, vawiinah PB-ah ka hmu che a, nangmah ngei I ni tiraw??”

Ka kut chu ka hum ngawt ngawt a.

“JD, I dam thin maw?”chu thu sawi tur chuan ka va han bei nasa tak em!

“M, ka taksa chu a dam alawm, ka rilru dam leh dam loh erawh ka hre bik lo a ni. Hun leh ni lo ralin khawvel hi ni tin mai hian lo danglam mah se, engtik lai maha danglam ve ngai lo tur thil hi a lo awm reng si a. Ka ngai thin khawp mai che”a ti a, “I phone number nei tur hian ka bei nasa khawp mai, a tawpna a ni tak tak tawh ang, I dam tha tih ka hria a, ka hahdam e”a ti a. . “JD, nupui I nei tawh em?”

A nui hak a, “Ka la nei lo tluang zel chu a nih hi”a ti a. . “Nupui nei la, pangngai takin nun hmang tawh rawh. JD, hlim taka awm hi phu asin”ka ti a.

“Ni e tiraw? Mahse, chuti maia awlsam a ni tlat lo hi buaithlak lai ber chu a ni si a. M, engtikah emaw chuan maw nangmah anga hmangaih hi ka la tawng anga, chutih hunah chuan, nangman I kawl tak vek ka thinlung hi ala nei ve thei maithei asin. Chu hun chu a lo thleng anih ngai chuan, chu mi ngei chuan zalen takin a hma ang khan min nuntir ve ang chu. Chu hun alo thlen hma erawh chuan nang ka hmangaihna che kawl reng chung hian nun ka hmang zawk ang e”a ti a.

Ka mittui chu a sur zung zung a, “JD, mi thar tawng la, hlim takin nun hman tum tawh rawh. Hahdam taka awm hi I phu ngawih ngawih asin”ka ti a.

“Inhmangaih takte inhmangaih thei lo a siamtu leh daidangtu bang(Hnam inan loh vanga inthenna} hi thiah a nih hunah chauh ka hahdam ve tawh ang. M, kumhnih a liam hnu pawh hian ka hmuh hmasak ber ni chea keimaha I thaw hang chiah khan I la thawk reng a ni. Ka ngai che a, ka ngai em em thin che. M, ‘Some things never change’ tih kha lo ngaithla rawh aw. Ka sawi duh zawng zawng chu kha hlaah khan a kim vek a, ka rilru ka phawrhchhuahna hla anih kha”a ti a. 

After all this time, I still miss you everyday 

The same world spins around I guess some things never change 

Sometimes I go out, but it never feels the same I still look for you 

Baby some things never change 

When I said I'd love you for eternity

I just never knew how true those words would be Just an old love song,

just the mention of your name 

My heart breaks in two again 

I guess some things never change .

Maybe someday, someone else will set me free Until then,

I'll live with your love's legacy 

And I'll keep holding on Hoping you'll come back someday

You can rest assured baby, some things never change 

Girl, I'm still in love with you, I guess Some things never change  

Ka playlist-ah hian a awm tih phei chu ka sawi duh ta kher lo, hun rei tak ka ngaithla ngam lo tawh a, ka delete phal chuang lo. Ka tana phuah ni maia ka hriat thin hla kha a ni miau a, ka earphone ka la chhuak a, mittui nen ka ngaithla a, ka tahpui lohna pawh a rei tawh asin, tunah chuan a ngaite bawkin ka mittui a sur leh ta zung zung mai.

Ka phone chu ka han lekkang a, JD number chu ka hmetchhuak a, engvangin nge kan inhmangaihna avanga kan tawrh reng bik ang? Tihsual kan nei em ni? 

“Hello… JD”

“M”

“Kha hla kha ka playlist-ah hian number one a ni reng thin tih ka rawn hrilh che” . “I la danglam bik lo tiraw?”a ti tham chal a.

“Engtikah mah danglam ve thei lo tur chu nang ka hmangaihna che hi a ni. Kan inkawp lai zawng khan ka hmangaih thu che kha vawikhatmah ka sawi ve ngai lo va, mahse ka hmangaih che a, ka hmangaih reng che”ka ti a, a thaw hak ri chu ka hria.

“M… Ka rawn kal dawn, engmah hi indal tir ka tum tawh lo. I hre chiang tiraw, ka rawn kal dawn…”phone a dah nghal a. 

Ka khum atang ka zuang tho zawk a, hmangaihna leh indonaah chuan thiang lo a awm lo an ti a ni lawm ni? Engtin nge miten min sawi ang tih-ah buai lovin kan inhmangaihna zawk hi a pawimawh tih chu ka pawm ve tawh ang. Pawnah chuan ka ding a, van lam chu ka han hawi a, Siamtu kutchhuak mawi tak tak thlir chungin ka hmangaih em em, a hmangaih ber hmu tura rawn kal mek chu nghakhlel tak hian ka lo thlir a………………

~~~The end~~~~