THAMRAL SI LO 2

Fortis Hospital kawtah chuan ka doctor hmuh tum nghakin darkar khat dawn ka ding tawh a. Ka phone a rawn rika ka han en chuan Lizzie alo ni reng a, kan inbiak khat zia ka hrechhuak chiah a, aw zangkhai vah hian ka dam leh dam loh te chu min rawn zawt a, a chhungte tlawh in Mizoram ah alo haw daih hi alo ni a. Ely chanchinte min rawn zawt a, nurse fel tak ani ngeiin ka hria. A rawn chhukthlak leh hunah Ely pawh a rawn kan ngei tur thu a sawi a, kanin biakna pawh kan ti tawp ta a. Brain tumour surgeon zinga a tha ber pawl a kan neih Dr. Rana Patir nen chuan kan inhmachhawn ran a, Ely result chu ka han hmuh a, a chal chu a ti chuar chap a, engkim tlang taka min hrilh tur chuan ka han ti a.

.

“Duh ai chuan kan tlai hret chu ka ti ani. Zai risk dawn pawh ni ila, a chhungten an remti kher angem? Tin, amah pawh hian a duh kher lo thei, risk a sang deuh hlek in ka hria a ni, 50-50 ah chuan ka dah ngam chiah lo, beiseibo tawp erawh ani lo. In chhungkua lo inrawnkhawm ula, inthutlukna a zirin hma kan la leh dawn nia” a ti a.

.

Ka car ah chuan ka thu reng a, chu damdawiin lian tak mai chu ka thlir reng a, miten beiseina sang tak nen an pan a, a dam chhuak an awm a, nitinin thi an awm bawk a, ka car steering chu ka bawh rawp a, “Lalpa, tidam lul teh”ngenngawl tak chuan ka phun chhuak sap a.

.

Ely te in lama ka insuan phei atanga karkhatna vel atang a natna chu a zual hret hian ka hria a, a lu na ti lutuk hi kei mipa meuh pawh hian hmuh hrehawm ka ti thin. A damdawiin a chhawk meuh hi chuan a chau tawh lutuk hi a mu hle hle a, biak ngam ani tawh thin lo. Ka mang a ang ru em em a, hospital lama awm lah chu a duh lo bur bawk si. A nu leh pa te nen doctor thusawi pawh kha kan han sawiho a, ama thutlukna ngaih chan chu kan duh ta ber a, tunah erawh engmah kan sawi lang ngam hrih lo.

.

Sunday tuk ani a, Ely pawh a rawn chhuak ve peih a, a nu leh pa leh Betty te inkhawm turin an chhuak a, keini pahnih pawh sitting room ah inngheng rialin TV kan en a, “The fault in our

Stars” tih chu a chhuak a, dik tak chuan hetiang touching story hi hmuh nuam ka ti ngailo. Remote chu la in hmehsawn ka tum a, Ely chuan ka remote kenlai chu min laksak a, “Heyyy! I dawihzep lutuk aw”nui ver ver chuan a han ti a, a chal ah ka fawp zeuh a. Kan en tui dun bawk ani ang ngawi rengin kan entluan a, a tawpah chuan Ely chu a thaw hak a, “Joe.. I tan hian thil hlu tak tihsak che ka duh ani, entirnan ka awmloh hun..”a hmui chu ka lo hupsak a, “Chutiang ka ngaihthla duh lo tih I hriat kha. Ely pian nawn lehna hi a awm I ring em?”ka ti ta daih a. Mak tih hmel hi a pu zawk a,”Joe Kristian kan nih hi, chutiang te chu kan bible ah a inziak lo”a ti a. A lu chungah ka khabe ka nghat a,”A lo awm anih tak hlauh chuan chutih hunah pawh nang hi tawn leh che ka duh ang”a thusawi chu hrelo ang maiin ka han tih zawm a.

.

“Apa”

.

Betty te inkhawm an bang tawh ani ngei ang, pawnah ka chhuak vat a, motor atang an lo chhuak chiah a, min rawn pan a ka lo pawm vat a. Pa ni ve tak tak ten ka inhre hial thei nia! Nitin Ely bulah hun ka hmang a, in zai tura ka thlem chuan min hnial bur a, thildang min sawipui daih zel a, a chhungte bei pawh a dawng tan tawh viau. A han kang ve viau thin a, mahse a lu hi dam var chuan a awm khat khawp mai. A nachhawkna hian a chhawk ve deuh mai mai niin a lang. Ka chawlh lak pawh a zo lek lek tawh a, nitina chhuahsan a ngaih hun tur chu ka huphurh lawk ngei mai.

.

Friday zan ani a, Betty chu milem ka ziahpui mawlh mawlh a, Ely erawh tlai atanga a muhil a la harh lova, dar 8 velah chuan a tui in hal a rawn harh a. ka han in tir hnu chuan a lu chu a na a tih deuh avangin damdawi min dil a, a ei hnu rei vaklo ah a rawn luak ta vak a. Betty pa chu ka phone a, hospital pan vat turin min ti a, min han hnial leh zet na a tun tum chu min hnial zo bik lo. Hospital kan thlen chuan a chau angreng tawh viau a, a thlanfim a chhuak bawk a, pachan a har ka ti kher mai. Betty pa chuan pawnah min lo nghak reng tawh a, misual chu ani bik lo tih ka hrechiang tawh. Luh ve min phalsak loh vangin pawnah Pa Rina nen kan thu a, ka thu hle hle thei lo. Lizzie chu a rawn chhuak a, chanchin ka lo zawt vat a, ward ah an dah tawh thu leh kan duh chuan a luh theih thu min rawn hrilh a. Kan luh chuan a lo muhil bam a, a hmel dang bem mai chu thil hmuh nuam a ni lo. Betty pa chuan amah hmu lawk turin min ti a, a room a ka va luh chuan tlang angreng takin thil awmzia a sawi a,”Ely hi kan hospital ah chuan enkawl ngaihna vak a awm lova, a damdawi hian engtia rei nge a chhawk ang ka hre bik lo. Dr. Rana Patir ka lo bia anga, an hospital lama insawn a fuh ka ring a. Joe, mipa I ni a, I hnenah chuan tlang deuh takin han sawi mai ila, Ely hian hun rei tak anei tawhin ka ring lo ani”hmel ngui bar chuan a han ti a.

.

Ka hna chu zawm hun tawh mahse zawm thei niin ka inhre lo, chawlh ka han dilbelh leh a, ka thawhtirh atang ka record a tha ve thawkhat viau a, pute duhsakna pawh ka dawng ve nasa a, chawlh ka lak gai loh avangin tun tumah pawh an lo ui lo angreng viau a, thlakhat dang chu ka han la leh a. A tul anih chuan bansan hial pawh pawi tihna ka nei lem lo. Kan hun neih ang ang te hi hlimtaka hman a, a tma thei ang ber Ely kianga hman hi ka duh a ni. Fortis Hospital ah karkhat kan awm hnuah kan chhuak a, Ely pawh a ziaawm ta viau mai. Tlai lamah ka lenchhuah pui thin a, kut inkai rialin tlaini tla tur kan thlir liam thin. Hetiang a kan chhuah chang hian kan hun hnuhnung chu kan hmang liam mek zel a hriatna ka nei thin a, hlim taka awm ka duh laiin heng ka ngaihtuahna te hian min ching chau leh thin. Lizzie leh Betty pa pawh an rawn kal awl lova, an ngaihtuah ve takzet in ka hria. Betty chuan hreh viau mahse a nu enkawl a ngai tih chu a hre ve reng a, a pa bulah a awm a, kartawpah erawh ka hruai hram thin. Hun a kal ve bek bek a, November thla pawh a ral ve lek lek tawh a, thlasik boruak chuan Ely natna chu a ti zual ve deuh niin a hriat. In lam aiin hospital a awm chu a tam zawk a, ka awmpui chawt avangin keipawh ka pawr ve tawh viau anih ka ring, Ely unauten min chhawk an tum pawhin ka duh lova, a hlat a awm chu ka ngam lo ani ber. Nikhat chu lehkhabu ka chhiarsak a, ka lo muthlu daih pek a, ka harh chuan chiang takin Ely chuan min lo en kiau a, “Ehe! Ka lo muhil daih anih hi”Sana chu ka en a, “I damdawi ei pawh ahun tawh alawm”tih pahin ka han tho a, “Ka ei tawh alawm. Lizzie alokal a, min rawn pe a”a nui sak a, “Joe, va haw la va hahchawl ve rawh. Ti hi chuan I pawr chhe zo vek dawn alawm”a ti a, ka lu chu ka lo thing mai a, “Heyy!! I awmloh laia ka thih I hlau mi? Chutiang chu a thleng hauh lovang, va haw la va hahchawl rawh”a han ti leh a. A kutah ka vuan a,”Ely, thihna chungchang kha sawi fo lo turin ka tih che kha”thu tak zet hian ka ti a. Ka kut chu a hmer salh a, a lu chu a bu nghat a, dik tak chuan a thusawi kha a dik lutuk tlat, ka awmloh laiin min kalsan ang tih hi ka hlau ani.

.

Hospital a hawi khawthawnna an siam ah chuan ka han hawi harh a, ka zial chu lachhuak in ka hna pak vang vang a, “Zial zu ka man e”ka hnung a aw lo chhuahna lam chu ka han hawi a, Lizzie chu kut kuangkuah hian alo ding reng a. Ka zial chu leiah ka nawr hlum a, “Engzatnge ka chawi ang”ka lo ti fiam let a, ka bulah chuan a rawn phei a, “Joe, mipa hi nangmah ang vek nise khawvel hi a nuam ngawt ang”a ti a, ka zawhna mitmeng a hmuh chuan ti hian a han tihzawm a,”Hetiang taka hmangaihna dik taka Ely I hmangaihna ka hmuh hian hmangaihna hi a awm lo ka lo tih ve thin kha alo awm ngei ani tih ka hriat phah a, chuan mipa te hi rintlak an ni tih ka hriat phah bawk”a ti a.

.

Ely te kawta pangpar chi hrang hrang par vul chuk thlir chuan an veranda ah kan thu a, hospital ai chuan in lama awm a chak zawk vangin doctor phal vak lo chung chu kan chhuak a, a hmel pawh a hlim sarh in ka hria. December thla tir ani a, kan boruak tawn mek avangin ka nu hnenah ka haw theih loh tur thu ka hrilh tawh a, min hrethiam hlauh chu ka lawm kher mai. Kumin hian Krismas ka hmanpui ve tawh ang tiin kumtir atang ka lo ngaituah a, mahse Ely kalsan chu ka thei lo.

.

Sunday inkhawm banah Ely kan in Lizzie te thiandun an rawn leng a, engengemaw sawiin kan hlim ve viau a. Thingpui lumsak tumin Ely room atang ka chhuak a, Lizzie thiannu chu rei vaklo hnuah a rawn chhuak ve a, “Joe, keiman ka lo siam ang. Ely khan in pahniha biak cheu a duh aniang”a ti a. Room ah chuan ka lut leh vat a, ka va luh lai chuan Ely chuan Lizzie kut chu a lo vuan a, an bulah chuan ka thu ve a, “Joe, ka awmloh hunah chuan I khua a har thei ngawt ang tiraw?”a ti a, “Ely..”ka aw chu a vin lek lek a, Lizzie chuan hlauhthawn hmel tak hian min lo melh vat a, Ely erawh a nui sang a, “Joe, ka sawi emaw ka sawi lo emaw a hun chu alo thleng tho dawn asin. Ka aiawh turin Lizzie tluka tha hi an awm lo”a maimitchhing a, Lizzie nen chuan mak tih hmel tak hian kan inmelh rual thawt a, “Liz, Joe hi pawnlama a landan ang hi ani miah lo ania aw, pawnlamah chuan tuarchhel leh huaisen hmel a pu a, mahse a chhungril erawh nem tak, rilru na hma tak ani. Dawhthei takin lo enkawl la, min ngaih chang te a nei anga, kei mitthi tawh chu rawn thik hauh suh ang che aw…”a mittui a luang ngiai a. Tawng ngaihna pawh ka hre lo, Lizzie chuan a mittui alo hru leh zauh thin a, “Ely, I tawngvai anih kha.. “ka tho a, ka chhuak ta daih a.

.

“Joe, I che mawi lo hle mai”Lizzie te haw hnu chuan a ti a, “Nangmah alawm, khang I thusawi te kha Lizzie pawn entinnge a ngaih ang tih I hre lo”ka ti a, a nui hak a,”I hrelo mi? Lizzie hian a hmangaih lutuk che tih hi”

.

“Maw??”

.

“a hmangaih takzet che ani Joe.. A aia tha hi I hmu lo bawk ang”a kutah ka hmer vawng vawng a.

.

“Ely, ka hmangaih che tih I hria tiraw?”a mitah ka melh kalh a, a mitmeng chuan aw tih nan a han chhing sak a,

.

“Tuman I ai hi an awh zo ngai lovang, chuan ka phal lo bawk. Kan sawi ta bawk a tiraw, Lizzie chu nula fel tak ani alawm, mahse keia khawhar mai maiin han tibuai tur chuan ka phal lo. Amah hmangaih tu tak nen hun hmang se a fair zawk ani”ka thusawi chu ka chiang khawp mai. Ka rilru tak tak anih avangin ka sawi lai pawhin ka mitthlaah Lizzie chu a rawn lang a, nula fell eh hmeltha tak ani a, hna zahpui awm loh tak a thawk bawk a. Min lo duh ve anih pawhin min khawngaih na vang mai mai ani ang.

.

Ka muhil lai chu ka harh hlawl a, Ely chu thlan in alo bual huh vek a, ka tho vat a, bathroom ah towel ka ti huh a, ka hru a, a khawsik chu alo sang hle alo ni. A nu leh pa ka kaitho a, hospital pan mai chu ka duh a, mahse Ely chuan a duh leh tlat lo. Betty pa leh Lizzie ko turin min ti a, ka phone vat a, rei vakloah an lo thleng a. Hetih lai hian Ely hian mu leh mal a nei mang lo. Damdawi a ei pawh chuan ala chhawk thei lo anih ka ring, a bulah kan thu thap a, chau zet hian a rawn meng a,

.

“Daddy”

.

Betty pa chuan a kut alo vuan vat a,

.

“Ama…heta hi ka awm”a mittui chu a khap per sak a,

.

“Ka chunga I thiltih zawng zawngah khan ka ngaidam a che, in thiam lo takin I hun hmang tawh suh aw. Ka tana theihtawp I chhuah hi hrereng zawk la, Betty tan pa tha tak nih rawn tum angche”a sawi zo chu a thaw halh a,

.

“Engpawh lo thleng se kan fanu chu rawn ngaihtuah reng reng suh, khawvela pa tha ber Joe a nei , keipawhin ka phatsan ve lo ang.”a mittui chu a luang zawih zawih a.

.

Ka lam chu a rawn hawi a, min han hui a, Betty pa chuan a thutna chu min lo kian a,

.

“Joe, chhel takin aw niang”ka kut chu la kangin a han fawp zeuh a,”Ka nu in Lizzie nen in lehkha tur a kawl a, in lo chhiardun dawn nia”a maimitchhing a, a mittui tla chu ka kutin ka hru a, a biangah ka fawp a,

.

“Ely I thusawi apiang chu ka zawm zel ang, mahse min kalsan suh khawngaihin”

.

Peih lo zet hian a rawn meng leh a,

.

“Vanram kawtchhuah ah ka lo nghak dawn che u ania, Liz, lo kal hnai teh”Lizzie chu ka bulah a rawn thu a,

.

“Ka hnena in rawn kal ve hun chuan Joe hi min pe let phal ang tiraw?”

.

Lizzie chu mittui luang ngiai in a bu nghat nghat a,

.

“Ka nu ka pa, ka hmangaih lutuk che u”a nu leh pa chuan an kuah a, Betty chuan hlauthawng takin a pa kawr alo pawt tawk tawk a, a nu nen an inkuah lai chuan thil awmzia hrethiam vek lo mahse kan boruak chu hlimna lam ani lo tih a hre ve ani ang, a mittui a tla ve reng a. A damdawiin hna a thawk a, a muhil ta chiah chiah a, Betty pa leh Lizzie chu haw turin kan ti tak na a haw chu an tum bik lo. Zing lam dar 4 rik hma deuhin a rawn harh a, mahse a vai vek a, engmah chiang a hriat anei ta tlat lo. Chuta a muhil leh chu rawn harh chhuak tawh lovin chawhma lam dar 8 velah khawvel a lo chhuahsan ta.

.

Ely vui ni chuan mi kan tam em em a, helai a thi ah chuan vui tu ngah pawl ani awm e. Mi nun tha tak mai, midang khawngaihna ngah tak nih avang hian mi hriat pawh a hlawh ve ani. Thlan atanga kan haw chuan Nu Kimi chuan Lizzie nen an ina kal tura min tih avangin kan zui a, kan thlen chuan an room ah a lut tlang a. Lehkhathawn hi a rawn keng chhuak a, “Hei hi Bawihi khan lo pe tur cheu a min tih chu a ni a”tih pahin min pe a. Ka han hawng a, Lizzie chu chhiar hmasa turin ka ti a ngawi rengin ala a, a chhiar lai chuan a mittui chu a hru reng a, a chhiar zawh chuan min pe a, a tho a, tukverh ah chuan a dak chhuak a. Lehkha mittui in a farhnan na tih hriat taka val awm kalh kalh chu tun maia huh a nilo tih a hriat theih a, Ely khan a ziah laiin vawi engemawzat a tahpui ani ngei ang. A chhungah chuan he thu hi a lo in ziak a.

.

Duhtak Joe & Lizzie,

.

Hun ka nei tam tawk tawh lo tih ka hriatin in hnenah sawi duh tam tak ka nei a, hetia kutziak ngeia dah ka duh chhan chu min hnial na ri ka hriat dawn loh vang a ni.

.

A hmasa in Joe hei hi ka sawi duh ani, ka hmangaih che a, I nuna min sengluh ve avang leh I hmangaihna famkim min dawntir avangin ka lawm e. Theih nise I hmangaihna hi rulhlet ve ka va han chak tak em! Mahse kei thihna kutvawtin a man mek tan hian tih theih a awm mawlh silo, I hnenah thil hlu tak tih sak che ka duh ani tih ka sawi kha I la hre reng em? Chu thil hlu chu maw Lizzie hi a ni. Hmangaihna dik tak in lo enkawl la, ani tluka hrethiam leh tur chuang che hi an awm lo ani. A mitmeng nangmah hmangaihnaa khata a enchang che hi chuan ka hmangaihna che nge tam anga Lizzie in a hmangaihna che hi tih ka inzawt fo thin asin. Joe, min thenhragtu hi thihna kher nilo se ka va ti em! Chuvang alawm I hnen atanga kalbo ka tum pawh khan thildang anga lantir hram ka tum a, min hua la min hriatreng danah pawh nangpawh ti na tu che tiin min hria la, min theihnghilh la ka duh vang ani. Mahse hmangaihna hi chu a chak a ni tiraw? Thlamuang taka ka thih theih nan hmangaihna Pathian hian I hmangaihna famkim chu min dawn tir a, tunah chuan thih hrehna reng ka nei ta lo. Hlim takin hun rawn hmang la, keimah ngaia in dawm kun nan hun I nei lo, midang tan nung turin ke I pen a ngai a,ka duhthusam hnuhnug ber pawh ka tana malsawmna I ni ang bawk hian Lizzie tan hian malsawmna rawn ni ang che.

.

Awle Liz, hei hi kan chah ve thung ang che aw, Joe hian min la ngai dawn chauh a, chung hunah pawh chuan thik lo turin ka hnenah I intiam tawh kha hrereng ang che aw. Nula hmeltha tak nui hmel a hmuh fo chuan Joe rilru tha tak hi I lakah a luangliam vat dawn tih hi ka hrechiang lutuk tlat. Hmangaihna mitmeng mawi tak khan melh fo la, hmagaihna thiltihtheihzia chu I hriat tawh kha. Mi tupawh hian hriatreng kan duh vek a, kei ngei pawh hian ka duh ve ani. Joe hi pa tha tak ani a, tin, hmeltha tak ani tih chu I pha bik lo anih kha, ka sawi tum tak zawk chu hei hi ani, hmangaih chakawm ngawih ngawih khawp a duhawm ani a, ka lakah pangchang theilo khawpin hun a hmang tawh a, chuvang chuan I lakah chuan pangchang takin a awm dawn ani tih hi hria la, hmangaihna in lo dawm zel ang che aw. In pahniha chhungkua in din hunah in fate hnenah vawikhat tal ka hming hi han sawichhuak ve ula, min theihnghilh lo a, min hrereng ani tih lantir nan leh van atanga ka lo thlir hunah cheu inchhuang taka ka lo nuih ve theih nan chu thil chu min han tih sak ang che aw.

.

A tawp berah chuan ka fanu Betty hi min lo thlahthlamsak lo ula, ka nu leh pa pawh hi in lo tlawh ve fo dawn nia. Hlimna in neih zel theih nan Pa hnenah ka lo dilsak thin dawn che u ania. Ka thiltih hi ka duhzawng tak ani a, nangnipawhin in duh a in pawm ve ngei ka beisei.

.

With love,

Ely”

.

Lehkha chu ka thlep tha a, Lizzie bulah chuan va dakchhuak ve in van lam chu ka han hawi a, rei ka en ngam lo, ka maimitchhing a, “Ely”ka phunchhuak sap a.

.

Ely’n min kalsan atang kumthum lai chu alo liam ve ta reng mai, December thla alo thlen apiangin kan nunhlui chang mai tur kha thinlungah a thar leh vawng vawng thin a, Ely nen kan nunah December hian thu a sawi nasa hle a, kan intawn hun leh kumkhua atana kir leh tawh lo tura min kalsanna thla ani miau a.

.

Ely thlan lung nghengin ka thu a, kumthum liam taa kan nun chu ka lo chhui kir neuh neuh a, ka dar ah min rawn khawihtu an awm avangin ka han meng kawk a, Lizzie chu ka bulah a lo ding reng a,

.

“Joe, a vawt si a lokal rawh”a banah man in ka bulah chuan ka han thut tir a,

.

“Lizzie, hmangaihna mitmeng chuan min lo melh thin reng em ni?”meng chuang lo chuan ka han ti a.

.

“Kumthum hnuah min zawt chiah a..”a nui hak a,

.

“Ely khan a sawi ve mai mai tiraw?”ka han meng a, Lizzie chu ka melh a, min lo en reng a,

.

“A sawi dik alawm, Ely I hmangaih em avang khan midang mitmeng pawh I chhiar thiam lo alawm”a then sak a,”Kha khan ania hmangaihna hi alo awm ngei ani tih min rin tir tu chu”a han ti leh a.

.

“Ely duhdan kha tihhlawhtlin ka duh ani, mahse min nghak leh hret la, a duhna tih hlawhtlin piah lamah I tana pasal tha tak nih ka duh avangin hun reilo te min nghak leh thei angem?”ka ti a.

.

“Joe, ka damchhung pawh hi ngai dawn se, ka nghak tho ang che”ka kuah a, a chalah chuan ka fawp zeuh a.

.

Thlanmual kan chhuahsan dawn chuan Lizzie chu ka kai a, Ely thlan lam chu ka han hawi let leh a,”Ely, I sawi dik e, hmeichhe tha tak min pek avangin ka lawm e”ka ti a, Lizzie chu ka han en a, hlim takin min lo nuih seih a, “Min hmangaih avangin ka lawm e”ka ti a, “I hmangaihna ka dawn ve dawn avangin keipawh ka lawm e”mahni inringtawk tak chuan alo ti let sap a,"Ely hi kan thinlung atang thamral tir ka phal ngai lovang"min melh salh chug chuan a han ti a, a ban chu ka lo hmer salh thung a. Chu thlasik khawvawt tak hnuaiah chuan in kai rialin Betty tlawh tumin kan kaldun ta hnak hnak a.

.