ZOELLA 1

PART I

IOh woman! lovely woman! nature made thee To temper man; we had been brutes without you; Angels are painted fair to look like you; There's in you all that we believe of heaven, Amazing brightness, purity, and truth, Eternal joy, and everlasting love - Thomas Otway

Tukverh atanga thli fim rawn thaw lut heuh heuh chuan min tiharh sawng sawng hian ka hria a, ṭhal boruak hi hrehawm ka ti thin. Dawhkan chu bawhin pawn lama kan thingkung lian zet chu ka melh reng a, thli a thawt nasat châng te, ruah a sur nasat te hian dinhmun hlauhawmah min din tir fo mah se nipui a lo thlen hian ka bihrukna leh ka inphenna anih avangin kih ka remti ngai lo. Inhnuai lama kan nula Lily leh ka fapa Nathan ṭe chel chul ri chu ka hre zui zat a, ka nui ve suk a, ka fapa hi awm lo se engtin nge ka nun hi ka hman zel ang ka ngaihtuah ngam lo. Hmanhmawh zet hian room atang chuan ka chhuak a, uluk fe hian kawngka ka kalh leh thlap a, inhnuai lamah chuan ka chhuk zui nghal a. Ka fapa in min hmuh chuan min lo pawm chawt a, Lily chuan towel nen a lo um mek a, a inbual tur an lo inthlem thei leh tawh lo ni ngei tur a ni. Nathan chu bathroom ah ka pawm lut a, keimah ngeiin ka bual ta a, a mitmeng mawlh hi thlir nin har ka ti thin. A bek kir deuh chiat te chu ka han tuai sak a, ka fapa mah nise a duhawm hliah hliah hian ka hria.

"Anu.. school banah min lo hruai dawn em?", Nathan chuan min lo melh reng a.

"A u in a lo hruai mai dawn che mi niang, dawrah ka buai leh hle dawn asin" ka tih chuan lungawi lohna pawh a nei hran lo. Lily hian a duat em em a, keipawhin ka ring tawk a, Nathan enkawl tur hian amah bak rin tur dang ka nei lo.

Motor a rawn thlen chuan school lam panin an chhuak zui nghal a, ka thlir reng a, ka neihchhun liau liau a ni a, ka thinlung zawng zawng hi a luah khat vek a ni. Muangchangin inchhungah ka lut a, dawra kal turin ka insiam a, hlawhtlinna hi hlawhchhamna in a zui hian hlawhtlinna hi a tluantling em ka hre chiah lo. Mahse, dik nia ka hriat kawng ka zawh a, ka hlawhchhamnaah khan ka rilru hi ka tihnual tur a ni lo ang.

*---------*-----------*-----------

Ka dul puar liah chu darthlalangah chuan ka en reng a, hlimna nasa tak hian min tuam a, nu dinhmun ka luah ve lek lek tawh tih ka ngaihtuah zawngte chuan ka phur thar leh thin.  Ka pasal Malsawmzela nen hian kum 5 chuang kan innei tawh a, a ruka kan awh ngawih ngawih, kan sawi rik ngam si loh chu fa neih hi a ni. Tunah kan beiseina chuai tawh lamah nau ka han keng a, kan hlim in hei baka malsawmna hi kan dawng leh tawh pawhin kan ring lo. Ka dul thep zaih thin chu a ni telin a lo lian ve zel a, en nin har ka ti a, ka hmu kham thei ngai lo.

"Sangi...."

Inhnuai lamah chuan ka tlan thla vat a, Zela haw hun tih reng reng ka lo ngaihtuah tawh lo.

"Tlan vak thin suh ka tih kha, doctor in indim tur atih kha hrereng la", a bul ka thlen chuan a lo ti dam dap a.

"I lo haw hun pawh hi ka hre thei tawh lo", inthiam lo deuh chuan ka han ti a.

"Keimah ai i ngaihsak lutuk tur hi ka thik sa in ka hria", ka dul chul pah chuan a han ti a.

"Keipawhin chu ngaihdan chiah chu ka lo nei ve a",ka tih chuan a nui ta suk a. Inthlak turin room lam pan chuan kan inzui ta nghal a.

Zana ka mut lai te hian ka harh leh hlawl zel a, a chang chuan ka phur lutuk vang ni te hian ka han ngai ngawt a. Mahse, a rei a, ho te te nia lang ka hlau tlat zel te chuan ka ngaih a ti ṭha lo telh telh thung. Zela bula han sawi atan em chuan a ho hian ka hre bawk si a, mahniin ka buai ka buai thin. Kan kawta thingkung lian zet hnuaiah chuan ka chawl hahdam thin a, helai hmun hi ka tan a him berin ka hre tlat bawk. Gate chhunga motor rawn tlan lut chu ka thlir reng a, ka pasal a ni tih ka hria, chuti chung chuan ka chhungril hi a khur a, ka hlau titih ta tlat mai. Min rawn hmuh chuan a nui sak a, motor chu ka ṭhutna bulah a rawn ding a, ka hmelah ka lo thup thei lo deuh a ni ang, hlauhthawn hmel tak hian motor atang chuan a rawn chhuak a, ka thlanfimte hi a rawn bawl chhuak vek thei nia.

"I ṭha em? Engtinnge i awm?", a rawn ti mawlh mawlh a, ka chhang thei tawh lo. Hospital lam panin hmanhmawh takin min kal pui a, ka mumang ang mai hian ka hre deuh ruai a, a hahthlak ka ti tak zet a ni.

Doctor in min endik hnuah test chi hrang hrang nei turin min ti a, hospital kan thlen hnu hi chuan ka nunphung pawh a pangngai leh tawh. Ina haw ka duh thu ka sawi chuan Zela chuan a phal lo a, test nei turin hmun dangah min hruai leh nghal a, chutianga that lohna ka neih pawh ka hre leh tawh lo. Test hrang hrang kan neih hnuah inah kan haw a, ka pasal nen chuan kan inbe lo. A hmel chu a tak ngul a, a ngaihtuahnaah eng nge awm ka hriat sak thei lo a, hun eng emaw chen hnua kan ngaihtuahnaa awm kan inhrilh loh hmasak ber a ni hialin ka ring! Khumah chuan ka mu a, ka taksa rawn zawi telh telh chu ka hre reng a, mahse, engmah ka ti thei lo.

"Sangi... i awmdan hi a dik lo reng reng", tih paha Zela'n min sawi dat dat te chu ka hre reng a, ka taksa a che thei lo. Min pawm kang lawp a, hmanhmawh takin motor ah min dah lut a, min tlan pui leh ta dawr dawr a. Phone-ah tuemaw a bia a, a aw ah chuan mangang aw ka hre tel, intihharh ka tum a, ka thei der bawk si lo. Beidawng zet hian ka maimitchhing ta ringawt a. Hospital khumah chuan ka mu reng a, nurse leh doctor in a khat tawkin ka ban leh ka awm chu an rawn khawih che deuh reng a, mumal taka hriat ka nei lo. Ka muhil ka harh chuan khua a lo thim vek tawh a, Zela chu ka kut hum hian ka bulah a lo ṭhu reng a, ka harh tih a hriat chuan a tho zawk a. Ka biangah a rawn fawp a.

"Duhtak.. i lo harh ta maw?", a han ti a. Ka lu chu ka bu nghat a, a mit chu a bui deuhin ka hria. En chian tuma ka han thlek chuan ka hmuh theih loh turin a thlesawn ta daih a.

"Engtinnge ka awm?", tiin ka han zawt a.

"I ṭha lutuk ania, engmah hlauh tur a awm lo", a ti a, mahse, nidanga min hnemna aw nen a dang deuhin ka hre thung.

Ka bu nghat a, ka kut a humna chu na deuh tak hian ka han hmer a, a thaw hak a.

"Ka bulah hian lo mu ve la", ka tih chuan rang zet hian a rawn mu ve a. Inhmachhawn zawngin kan mu a, ka hmai chu a chul heuh heuh a, sawi duh engemaw tak a nei niin ka hria.

"Thil min hrilh duh i nei em?",ka tih chuan a maimitchhing daih a.

"Eng dinhmunah pawh ding ila, kan inneih laia kan thutiam kha vawn reng ka duh ang", tiin a phun sap a.

"Keipawhin ka duh alawm", ka tih chuan a rawn meng a, ka hmui te, ka biang te chu a khawih kual den den a.

"Ṭhat lohna ka nei tiraw?", ka ti ta phawng a.

"Nei hran lo e, i lung hi a chak lo deuh a, chu chu a ni mai", a ti a. Ka mut dan chu min thlak tirin ka hnung atangin min rawn kuah a, ka dul chu dim te hian a han khawih a, a thaw leh hak thin. A muthilh lai te chuan ka en reng a, ka muhil ve thei lo. Ka pasal duh tak sam chu ka khawih sak neuh neuh a, rilru hahna engemaw tak a nei tih ka hria, keima chungchang piah lamah ama mimal nunah hian buaina a tawk a ni tih ka ring daih tawh.

Ka lung a lo chak lo hle a ni tih doctor pawhin min hrilh a, ka nau pai zelna turah pawh nghawng a neih a rin thu leh pai zel pawh rem a tih tawh loh tur thu thlengin min hrilh a, ka nau pai ṭan tirh a ka buaina te ka sawi lang duh ta lem lo. Fa neih ka tum em avanga ka beih ṭang ṭang na te engmah lo maiah a lo chang teuh hle a ni tih ka hriat ni chuan keimah ngei pawh indim lehzual ka ngai tih ka hrethiam mai. Doctor thurawn min pek zozai pawh a theih ang ang chu zawm ka tum a, ka pasalin eiin lamah nasa takin min pui bawk a, ṭha taka nau ka neih theih nan theihtawp kan chhuah tlang a ni ber.

Ka nau paiin thla kaw hmel a hmuh atangin ka taksaah insawisel neuh neuh ka neih belh a, scotor rem min ruatpuina in Durtlangah kan in admit a, zai mai a tha an tih avangin ruahmannna pawh an kalpui ta vat a. Zela chu a zam a ni tih ka hria, mahse, tihlan erawh a duh hauh lo. Ka kut chu a hum ran a, ka nuih chuan za lo tak hian a nui ve sak a.

"Naute nen hmuh vat cheu ka lo beisei ang", tiin ka chalah a fawp a. Inzaina room lamah ka luhsan ta.

Naute ṭap ri ka hriat rualin ka beidawnsan lek lek tawh beiseina chu ka nei thar leh a, ka dinhmun hi ṭha lo viau mah se ka dam khawchhuak tur a ni tiin ka infuih mawlh mawlh a. Ka rilru harh mah se ka taksa a chak lo miau a, enkawlna ṭha ber ber hmangin min enkawl zui nghal hmiah jmaih a. Doctor leh nurse te rin phak bakin ka tha chak a, ka fapa pawh keimah ngeiin ks enkawl ve thei dawn ta.

"Nathan Lalchhanchhuaha", ka fapa pawm pah chuan ka han ti sap a.

"Hming nalh leh ṭha tak a ni", Zela chuan a lo ti vat a.

A pian hma atang daih tawha a hming ka lo hauh lawk chu a pu ve ta. Tunah chuan nu dinhmun tak tak ka luah dawn ta, ka mumang ni mai te hian ka la hre thin. Thi lek leka nau nei ka nih avangin ka taksa chu a chak har viau mai a, ka tum aia rei ka dawr pawh ka chawlhsan a ngai hial a. Engkimah ka pasal a awm a, ka ngaihtuah lo. Mahse, ama hna nen engkim a kutah a awm chu a phurrit duh dawn hlein ka hria a, phurrit anga lak erawh a duh bau lo.

Nathan pawh thla thum a tling ve tawh a, ka hriselna pawh a ṭha chho a, chhungkaw hlim tak kan ni tih hi min hmu tu leh min hretute chuan an hre bel khawp ang. Kan khum bula darthlalang lian zetah chuan ka inbih vang vang a, ka taksa pawh a mawi chho veleh viau tawhin ka hria. Tukverh ah chuan ka han dak a, gate chhunga ka pasal duhtak rawn tlan lut mek chu ka lo thlir reng a. Muangchangin inhnuai lamah chuan ka chhuk a, kan nula Lily chuan naute a lo paw mu mek bawk a. Kawngkhar chu hawngin verandaah chuan ka tei chhuak a. Pawn boruak ka hip khat em avangin nuam sawng sawng hian ka hria.

"Ka nupui duhtak hian helai hmun a rawn thleng peih a ni maw?", Zela chu a nui sang a. Ka ban ka lo phar chu hmanhmawh tak hian a rawn chhang vat a, "Ka ngai lutuk che", a ti sap a.

Inchhung lama inzui lut ta mai lo chuan ka pangpar huan lamah min kal pui a, enkawl ṭhat tih hriat tak mai hian a lo par vul chuk a, mit tla lo lek hian ka en dauh dauh a. Zela chu nghet zet hian ka vuan a, hlim hmel taka min kalpui lao te chuan lawm avangin ka hnuk a lo ulh ṭeuh thung! Pangpar huan atangin kan chhuak chho a, kan kawta thingkung buk lian zet hnuaiah chuan hahdam tak hian min ṭhutpui a, a darah ka lu ka nghat a, pawn boruak avang chuan ka rilru te pawh a harh hawk hian ka hria.

Zoella  Online Shopping neitu ka ni a, Mizoramah chuan online-a thawmhnaw hralh chhuak hmasa bertu kan ni. Ka atchilh leh tuichilh bur anih avangin ka hming pawh ka chher ve hle a, ka pasal min ṭawiawmna leh min phurpuina avang a ni tih loh rual a ni lo. Ka bulṭan dan ngaihtuahin tun dinhmun thleng tura ka beihna hi a namai lo hle a, min puihna tam tak awm mah se ka tumruhzia min hriatpuitu hi ka pasal a ni miau a, ani pawh hian chhuan tak takin min chhuang ve  tih ka hria.

"Dawr lampang eng nge boruak?", tiin ka han zawt a.

"Ka awm chhung hi chuan ngaihtuah lutuk lo la", a ti dam diai a.

"I buai lutuk ang tih hi ka hlau a, i hnaah pawh hian i buai tawk ve tawh viau ania", ka tih chuan a nui ri hak a.

"Theihtawpa i lo beih tawh chhunzawm mai mai te chu thil huphurhawm lutuk a ni hleinem", tiin amah en thei turin min kuai her a. "I dam veleh i enkawl leh vat dawn alawm, lungngai reng reng suh aw", a ti a. Ka chhang tawh lo, a tukhumah chuan ka han dawm a, ka lamah pawt hnai deuhin ka han fawp a. Chu veleh phur tak hian min lo fawp ve a, mahse, kan awmna chu a ual au a ni tih hrechhuak thut ni awm tak hian tlem hian min han nam sawn deuh a, ka beng bul sétah chuan a hmui rawn chuktuahin, "Zanah i hre khawp ang aw", a han ti zeuh a.

Note : Ads hi vawi khat (1) chiah click a tawk aw. A aia tam i click chuan ka blog hian harsatna a tawk thei tih hriain VAWIKHAT chiah i click anga i chhuak dawn nia.