ZOELLA 2

Part 2

Nupa nunah kan inlungrual a, tun hnaia ka hriselna athat loh deuh thut hma lam zawng kha chuan sawisel ngaia kan awm ka hre lo. A chang chuan Zela hi ka khawngaih thin a, ka ti lawm tawk ve viau thin tih kha ka hre miau a, hetianga ka taksa lama harsatna ka neih hnu hian min hrethiam hle a, kuah mai mai pawh ka ngai thei lo hial hman anih kha. Mahse, theihtawp ka chhuah a, a rukin ka infuih nasa a, ka chak chhoh rual rualin ngai ka awh leh vat ang tih ka hria. Hemi zan pawh hian a sawi ang tak takin a che a, lungawina inpe tawn chungin zan hun kan hmang ral a, a hnung hnawp chap chu ka han khawih a, ka nui sak a.

"Ka nghak chhuak ta e", ti supin min kuah ta hlu hlu a.

"Ka hmangaih che", ka tih chuan min chhang lo in min fawp zui ta vawng vawng a.

A ni telin ka ṭha telh telh a, doctor pawhin ka hmasawnna chu a hmu a, a lawm ve hle nghe nghe. Nathan enkawl turin Lily a awm bawk a, keipawh hun rei tak ka ngaihtuah theih loh ka dawr lamah ka insawrbing thei ve leh tawh ang chu. Ka nau neih hnu hian ka nalh zual emaw tih tur khawpin ka taksa a nalh chho a, 'fa neih i ngeih hle mai', tia min fiamtu pawh ka tawng nuk reng. Ni tin dawr lamah ka kal a, kan sumdawnna pawhin hma a sawn a, kan nupaa kan hlim vanglai ber kan tawng a tih theih hial awm e.

Ka bul ṭan dan te chu ka ngaihtuah let neuh neuh a. Pathian malsawmna ka dawn nasat bik zia te hi mak ti thin. National Institute of Fashion Technology, New Delhi atangin Bachelor of Design(B.Des) ka zir zo a, zir zawm zel tuma ka awm laiin ka pa hriselna a that tak loh avangin ka zir zawm thei ta lo a, khawl pakhat chauh nen bul tanin dawr ka hawng ve rawih a, a tirah chuan kan veng mi thenkhat te nuih leh khak ka tawk nasa a. Ka duhdan leh ka tum ang a ni bik hauh lo, duhthlan tur dang erawh ka nei miah lo. Mi min en dan hre reng chungin theihtawp ka chhuah a, beidawn rum rum chang pawh ka ngah thin khawp mai. Mahse, ka tumruhna chuan hlawhtlinna min thlen ve ta a ni. Zela nen kan intawn dan pawh hi ka dawr te takte atangin a ni a, a u pasal nei mai tur lawi kawr ka thui sak a, a rawn lam sak avanga inhre chho kan ni a. A tirah chuan an khawsak a san em avang leh minister fate an nih avangin ka hnaih ngam ngai lo. Vawikhat kawr ka ṭhuisak atangin Zela u, U Siamtei chuan keima ṭhui ngei loh a ha duh ta tlat lo a, a pasal neih dawn pawhin min rawn pan leh ngat a ni. A nau a rawn lam tir dawn tih a sawi lawk vek a, amah ang bawka kawm nuam tak hmuha lo hmuh ka tum ve ngawt a, a lo ni reng reng lo. Ka vawikhat hmuhna atangin Zela chu a mizia tur awm ang ka lo hre vekin ka hria, ka dawr a melh kual dan dan te chu ka mit sirin ka hmu reng a, a ṭawng tam lo khawp ang tih ka hria. Kartawpah dawrah chuan a rawn lut kawi ta ziah a, ṭawng duh ve tak ka nih avangin ka kawm bawrh bawrh thei mai a. A changa a lo nui ve suk suk te chuan thu tak a sawi ni ber hian ka hria a, ṭawng ve luam turin ka beisei ngai lo hrim hrim. Nikhat chu U Siamtei a rawn lang hlawl a, a pasal neih hnua ka vawikhat hmuhna a ni.

"Ka nau hian a sawi ve zuk zuk fo che a, a vei che ni ngei ngei ang", a ti a, ka ṭe nasa teh asin. "Ka nau hi mize zawi leh ṭawng luam chi a ni lo a, mahse, a rilru hi achhe lo nia. Ka nau anih vang ni miah lo in keipawh hian u en hian ka en lek lek zawk thin. Ka pa hian a hnungzui turin a duh thina, ani erawh chuan tihian a thiamna a taka hman chhuah a, sumdawnna beih hi a duh zawk a. Tihian a hlawhtling chho ve der tawh ania, hmeichhia hi a sawi ngai zen lo ania." a ti a.

Chumi ni atang ka theih ang angin Zela chu hlat ka tum a, a rawn len luh chang pawhin a hmaa ka rik vawrh bawrh ang khan ka awm tawh ngai lo. Rawn len luh nuam ti lo se, rawn kal tawh lo se ka duh ber. Ka rilru hria ni awm takin dawr lama rawn kal a bansan a, kan in lamah a rawn kal ta tlauh tlauh a, ka mang a ang ru viau thin. Thla thum vel chutianga zan tin a rawn kal takah chuan ka tan pawh hnar harsa khawpin a awm tlat a, ka ngainat ve tho avangin hnial fithlak ṭhak chu ka thei ta bik lo. Kum thum chhung kan inzui a, vawithum aia tam mah dinhmun avangin kalsan ka tum a, mahse, mi rilru nghet leh luhlul zet anih avangin min ṭhen chu a tum ngai reng reng lo. Ka dawr pawhin hma a sawn ve zel a, a lian chho ve zel bawk a, Zela hian min tanpui lo ka tih chuan a dikchiah lo ang, mahse, kan la inneih miau loh avangin a tum dan ka dang chat vek a. Chumi avanga kan inhauh ṭum chuan kan inhau na ve khawp mai. Mahni inngai hlu leh chapo tiin min ṭawngkhum ve hial a, thla khat zet chu ka be duh lo a. Ka dik vek bik lo tih ka hria, chutichung chuan a tanpuina lo dawn ringawt kha ka thei bik lo. Ka thu pawh hmu miah lo in palai a rawn tir hmiah a, ka chhungte bula sawi lâwk pawh a awm loh avangin an hrilhhai hle nghe nghe. Palai an haw hnuah amah a rawn kal a, ka nu leh pa hnenah kan inneih phalsak turin a rawn ngen a, keimah pawh min be lo chuan a haw leh mai a. Ka chhungte hnena harsatna sawi a rem tawh loh em avangin min râwn pawhin an thu thu a nih thu ka sawi ta tawp mai a ni.

Thla a vei leh meuh chuan nupa kan ni ve ta reng a, keipawhin ka lungawi lohna kha theihnghilhin ka pasalin hlimna min pek thung rulh tum ni awm takin ka theihtawp ka chhuah ve thin. Mi lar sa leh ni naran kan inthlauh em em na chu kan inneih hnu hian ka hre chho dawn chauh a ni. A hmaa tu khaw hriat ni lo kha JN Pvt.Ltd neitu nupui ka nih tawh avangin miten min bengkhawn ṭan a, eng hna nge ka thawh tih hre chak lah an lo tam. Ka dawrin malsawmna a dawn phah a, reiloteah sang takah min vawrh phah a tih loh theih loh ang. Ka beih nasat vang leh ka beidawn duh lohna rah ni tel mah se ka pasal vang a ni ka ti tel lo thei lo.

Kan inneih thlalak chu ka hru fai mawlh mawlh a, hun kal tawh ka ngaihtuahna chuan min ti nui sak a, thlalak chu a awmna ngaiah dah let lehin inbual turin bathroom lam ka pan ta a.

Dawr lamah ka theih ang angin ka awm a, in lamah Lily a rintlak tho bawk avangin dawr lamah ka rilru ka sawrbing thei veleh tawh a, a chang erawh chuan keimah ngeiin ka fapa enkawl hi ka duhin ka châk ve thin. Mahse, ka kawng zawh hautak zet ka ngaihtuah chhuah chang hian chuti maia han tawpsan chu ka hreh thin a, ka tello pawhin ka nau te ho hian an kalpui theih ring mah ila a neitu ngeiin a awp theih tluk a awm lo tih ka hre thung. Kan buai zual a reh lai erawh chuan inah awm hram hram ka tum thung.

Hun a lo kal ve zel a, Nathan pawh kum 3 a tling ve tawh a, ka hnaah harsatna min siamsak ngai lo. Zela pawh phai lam nen a kar tawn reng a, vaiho nen an thawhho avangin a zin kual reng a ngai a, kan hna ve veah kan buai a, a chang chuan kar khat tawp inhmuh loh te pawh kan nei. Kan hna chuan kan nupa inkar pawh zawi muangin min pawt hla ve tial tial a lo ni reng a, keini pahnih erawh chuan kan hmu thiam mai lo. Thahnem ngai takin kan hmazawna awm kan thawk dun a, hlawhtling thawkhat pawhin kan inhre ve, chutih rual erawh chuan kan nupaa awm tlanna hun kan nei tlem ta em em a, Zela phei chu inah awm reng mah se phone hmanga hna kaihhnawih rawn zawt buai reng tu a neih avangin hunawl leh han titi na hun tha pawh kan neo thei ta meuh lo.

"Karleh chu Kolkata lamah kan chhungkuain kan kal dawn em niang?", tiin min zawt a.

Ka awl ve deuh lai anih bakah hun hman dun tam kan mamawh tih ka hria a, keipawhin rem ka lo ti vat a. Hetia kan nupa kar a hlat thut na hi tun hnai mai emaw ka ti a, a lo ni mai lo tih ka ngaihtuah chhuak tel bawk a, siamthat leh vat hi ka mawhphurhna a ni tih pawh ka hria, theihtawp ka chhuah tur a ni.

"Holiday ka nei leh thei dawn lo tlat mai", khum ka siam mawlh mawlh lai chuan bathroom atanga a rawn chhuak chuan a rawn ti a.

"Mahse kan ruahman sa vek anih tawh kha", ka ti a, ka lungawi lo ngei mai.

"Delhi-ah shareholders meeting awm leh thut dawn sia, ka kal ngei a ngai tlat si a ni", khuma ka ṭhu chu ka bulah a rawn ṭhu ve a.

"Kan tan hian hun i nei thei tawh thlawt lo anih hi", tiin ka tho a. Ka banah a lo vuan vat a.

"Min hrethiam tu tur ber chu i ni alawm, ka duh vang a ni bik lo a. Nuamsa taka in awm hi ka duh ber chu ania lawm", a ti dam dap a.

"Ka hrethiam lo ngai lo che. Mahse, chhungkuaa kal chhuahna remchang kan neih khat em avangin keipawh buai chung chungin hun ka inpe a. Ka lawm lo em a ni", ka ti hmarh hmarh a.

Khumah chuan a han mu a, a thaw hak a.

"Anih chuan ka ṭhulh anga a ni mai alawm", a ti a. A aw ah lungawi lohna lampang a ri tel lo. Ka han ngaihtuah chiang a, a pawimawhzia ka hriatpui ve reng, a kal loh vaih chuan a pawi thui dawn tih ka hai lo. Ka lungawi lo laklawh mai chauh a ni.

"Sangi"

Ka va hawi a, min lo melh kiau a. Ka chhang duh lo.

"Dawr hi midang kutah kan dah mai dawn em ni?" A rawn tih chuan ka melh ta vak a. A hmel lah chu a thutak phian bawk si.

"Ka chhan dan tur che chu i hre reng alawm", ka ti a.

"A kawi zawngin lo ngai lo la, a kal ngaiin a kal reng dawn a. Keiin theihtawpin ka hnaah ṭan ka la bawk a. Nuamsa tak chuan kan awm em em ang, ka bulah hian hun hmang tam la ka duh a ni", a ti a.

"Hun kan hman dun tam theih loh chhan hi chu ka hna vang a ni lo. Nangma lam zawk anih kha", ka ti a. A ni reng bawk a, kei chu ka duh hunah leh ka chhungkua ka ngaih pawimawhna kawngah ka sumdawnna hian min tibuai ve tlat lo.

"Anih chuan ka hna chu ka tawpsan mai dawn em ni?

"I thu thu alawm. I ta ania, i duh duhin i ti thei", tih pahin khumah chuan ka inthawlh nghal a. Ka hnung lam atangin ka kawngah a rawn kuah a, "Tih thinrim che hi ka tum lo ania, a hma ang khan engtin nge kan awm leh ang tih hi ka ngaihtuah vang zawk chauha sawi ka nia. I duh loh chuan engmah ka ti lui lo che ania", a ti a, ka chhang tawh lo.

Tui taka ka bula mu ka pasal chu ka thlir reng a, a thusawi zawng zawngte chu ka ngaihtuah let leh a. Keipawhin ka duh lo a ni bik lo, mahse, amah hnial leh dodal hi engtik lai atang khan nge ka lo chin ka hre bik lo. A hmai chu ka han chul a, kan tan theihtawp a chhuah a, min sawisel ngai lo. Hei vang hian kei hi ka in luling ta lutuk a ni mai lo maw tih thlengin ka ngaihtuah a, siamthat theih a nih lai hian siamthat pawh ka duh ve bawk. Mahse, a tak taka ke pen erawh a lo harsa phian lawi a! Ka tho a, room tukverh chu inhawng atanga thlifim rawn lut chu ka han dawng a. Kan kawt lai taka thingkung pawh thli in a chhem phe siau siau a, ka âwm chu ka han dawm vang vang a, thingkung chuan engemaw tak ka hriatchhuah theih si loh hi a din pui tlatin ka hria a. Ka han maimitchhing vang vang a, engmah ka hrechhuak thei bawk si lo. Vawilehkhatah thli chu na zet hian a rawn thaw vâwk vâwk a, ka inring hman lo, ka ṭe ṭhat a, chhuatah chuan ka ṭhu ta hnawk a. Ka lu na lutuk vang chuan ka che thei tawh lo, Zela ka koh chu chiang lo riai hian ka hria a, zo zeta min rawn pawm nawlh chu ka hriat hnuhnun ber a ni.

Ka harh leh chuan sitting room ah ka lo mu a, ka bulah ka pasal chu rilru hah hmel tak hian a lo indawm kun a, ka thawm hriain rang zet hian a rawn hnai a.

“I tha em?” a ti zawi sap a.

Ka lu chu ka han bu nghat a, thil awmzia hriatchian tumin ka han maimitchhing nghal a.

“I lung tha lo a chhuak leh deuh a nih kha, I tha leh mai ang” tih pahin ka chalah a rawn fawp a.

“Khawnge Nathan?” tih pahin ka hawi kual a.

“Lily bulah a mu, ngaihtuah suh, a tha” a ti a, a hma aiin a awki chu a ram deuhin ka hria.

Vawi tam tak dawra kal tawh lo turin min hrilh a, a thu ka awih loh vanga hetianga awm ah hian min ngai a ni maithei. A thlirna atang chuan a dik reng, mahse, ka pa atanga ka chhawm tumruhna leh luhlulna hian min kiansan thei lo chu a ni ber e.