BIAKRINAWMI- 1

Part 1

“U Te, min lo hruai thei ang em?”

Ka phone chu ka han melh tha leh ngat a, Biakrinawmi ngei chu a ni si a. Ka sana ka en chuan zanlai a lo pel tawh tih ka hria, meng tha hlei thei lo hian ka han tho ta ngawt a, ka mutui tan dawn chauh a ni si a, ka ngei angreng khawp mai. A awmna a rawn sawina lai ka thlen chuan ka va hmu mai lo lehnghal, ka phone phawrha biak ka tum lai chuan mi veranda thim lai atang hian a rawn pen phei ta chhet chhet a, ruih a nei tih chu ka hre nghal mai.

“Rawn lut nghal rawh” nelawm lem loh tak hian ka ti hmuk a, inthlahrun hmel fe hian a rawn thu lut ve a.

“U Te, min hrethiam rawh aw. Ka tum lawk pawh a ni bik lo, ka thianten hetiang hian min set up tih ka hre miah lo a, kan thianho inhmuhkhawmnaah an thianpa hmundang ami an rawn hruai ve a, min awmduntir an tum talh a, ka duh si loa min hawsan vek a” a tih chuan ka khawngaih ve ta deuh.

“Chu pawh chu nise, nula si ruihtheihthil tihte hi a tha miah lo ania” ka ti ta hram a.

Ngawi rengin kan tlan ta mawp mawp a, an in peng kan thlen dawn chuan ka kutah a rawn vuan chawt a.

“U Te, innei mai ang” a rawn ti sap a, ka ding chiang kher mai.

“Rinawm, inneihna hi fiamthu a ni lo ania aw” ka ti ram hmak a.

‘Ka haw ngam hleinem, ka pa chu I hriat kha, min neih duh loh pawhin tah hian ka lo chhuk mai ang” a ti leh ta zel a.

Ka ngawi ta roh roh a, ka ngaihtuahna chu kal thui ve kher mai. A nihna takah chuan Biakrinawmi hi ka thianpa nau a ni a, a tleirawl chhuah tirh atanga ka ngaihzawn ruk tawh a ni a, kei chang ka ni lo, kan thianho kha chuan a u Mapuia hriat loh hian kan sawi nasa ve thei hle. Ani lah hian u ang chiahin min en a, an school bul lawka dawr ka neih avangin an off period hi chuan a thiante nen an rawn lang ve leh hlawl zel. Ka buai deuh phei chuan min pui ve bawrh bawrh thin a, a thiante bulah chuan a u angin min sawi mai zel. Chutianga min sawi chu ka duh lutuk lo a, nau ang ringawta ka en ve loh avangin. Mahse, a rei deuh hnu chuan ngaiah ka nei ve mai. Chung hun lai zawng zawng chuan ngaihzawng pawh ka nei ve reng tho, Rinawmi tluka keimaha tla na erawh ka tawng ta miah lo. College a zawm hnuah erawh kan inhmu ngai ta mang lova, Mapuia lah phai lamah hnathawkin a awm ta si a, an inah ka lang khat bawk nen kan inhmu khat ta khawp mai. Ka dawra min rawn tlawh leh zauh thin a, a bialpa niawm tak a rawn hruai thin. Chutatang chuan ka thinlung atanga thaibo tumin ngaihtuah tawh loh ka tum bur a, chu rilru ka put atanga thla thumnaah chiah hetiang hian thil a thleng leh ta a ni.

“Kan inah ka hruai phawt che anga, naktukah I pa chu keimah ngeiin ka be dawn nia. I pa chuan min ring tawk em em ang” tiin kan in lamah ka inher a, min chhang tawh lo.

Ka room kan luh hnu chuan a inbual duh em tih ka zawt a, a duh thu a sawi chuan bathroom ka kawhhmuh a, a lut ve nghal mai. Ka thawmhnaw bawm ka hai rak rak a, a hak tawk awm bera ka ngaih ka tshirt leh kekawr bul chu ka khumah ka dah a, ka rizai la chhuakin sofaah chuan ka lo thu mu a. A inbual chhung chuan ka phone ka lo khawih vel mai mai a, bathroom kawngkhar ri rakah ka hawi chhuak a, Rinawmi chu towel bihin a lo chhuak mek a. A taksa mawizia chu a mak zawk, lo suangtuah fo thin mah ila a taka ka hmuh meuh chuan ka lo ngaihtuah zawh lohzia ka hrechhuak.

“Kha kha ha mai rawh aw’ tiin khuma ka thawmhnaw dah chu ka kawk a, a bu nghat a.

A inhak zawh chuan a rawn ding chhuak a, ka thawmhnaw chu atan a lian mah mah tih theih a ni. Chuti chung chuan a inhmeh em em lawi si a, ka lo melh vawng vawng ringawt.

“Tah khan mu la, kei hetah ka mu anga, him takin I haw leh dawn nia” tiin ka inher a.

Minute 5 hnu velah chuan inhnit faih faih ri ka hria, ka han hawi chhuah chuan Rinawmi chu khumah a lo thu a, a mittui a lo tla a!

“Rinawm, I tap elaw? “ tiin ka va pan a.

‘U Te, min nei duh lo viau em ni?” a lo ti tham tiak a.

Hetiang taka mipa ngam chu engtiang chiahin nge mipa nen an inchulnel tawh ang tih ka ngaihtuah a, ka na zawk mai. Mahse, amah hi a ni lawm ni ka lo suangtuah fo thin leh ka thinlunga lian em em thin kha? Mihring hi tumah famkim kana wm lo, kei ngei pawh hi ka fihlim lohzia ka inhria, tumah hi han dem a han hnualsuat tur ka ni lo.

“I inchhirna tur thil tih hi ka duh lo, naktukah khua lo var anga, I damchhunga I inchhirna tur a ni ang tih ka hlauh vang a ni” tih pahin a sam chu ka chul sak a.

Engmah sawi tawh loin a lamah min pawt a, tang tur ka awm der si lo a, chumi zan chuan nupui ka nei chu a ni ve ta reng mai.  Chutah ka beisei loh leh ka rin loh deuh maiin Rinawmi chu nula thianghlim a lo la ni lehnghal.

“ U Te, nung ho ve viau mah ila nulat tlangvalnaah hi chuan ka invawng ve asin” mittui tling pamin a ti a, ka va han hmangaih ngawih ngawih tak!

Zing khua a var chuan zan lama kan ngaihtuah thlen phak loh kan chhungte chu rilruah an rawn lang hmasa ber. Ka nu leh pa rilru ka tina ngei dawn a, Rinawmi chhungte an na dawn bawk.

“Tikhan lo mu la, ka nu leh pa ka zu hmu hmasa ange aw” ka tih chuan a mit a chhing diat diar a, a muhil leh ta a.

Ka nu leh pa thingpui lo in mek chu ka han thut hnaih a, tun ang hunah ka thawh ngai loh avangin mak ti zet hian min lo melh a.

“Nu, nupui ka rawn ru ve tawp” lai angreng tak hian ka han ti a.

“I ho mai mai e a” ka nu chuan ka thusawi awih loh hmel fe hian a lo ti a, a nui tut tut lehnghal.

“Mo kan mamawh tawh ka ti fo a, I nu hi a hah rei tawh lutuk” ka pa pawh chuan a lo ti a.

‘Ka uang lo” ka tih takah chuan an ngai thutak ve ta deuh.

“Biakrinawmi nen kan rawn inhawn ve ta mai” ka tih chuan ka nu leh pa chuan. ‘Eng a?” an ti rual thawt a, an tan chuan a mak dawn lutuk, ka tan ngei pawh hian a mak a nia.

‘Ka fapa neihchhun I ni a, nupui I neih dawn chuan kohhran dan thianghlim ngeiin ropui thei ang berin kan ti ang ka lo ti thin a, ka rilru I va tina ve. Rinawmi chhungte pawh an na ngawt ang” ka pa chuan a tit a charh charh a, a nuam lo ngei mai.

“Mama, thla eng zat nge ni tawh?” ka nu in rilru nat hmel fe hian a lo ti bawk a.

“Thla engzat mah, nizanah kan inru a, chu chu ni mai” ka ti a, kan puk lawk tawhah an ngai tih ka hre mai.

Chutia ka chhan phei chuan mak an ti lutuk chu an khawngaihthlak zawk.

“Chutiangte chu inruk kher a ngai em ni le? A va pawi take m” ka nu in a ti zuai ta raih a.

“Engpawhnise, mi pawi kan sawi der a nih chu. Zaninah I pute an va len vat a ngai anih chu” ka pa pawh chuan a tit a a, a bak chu ka nu leh pa ngaihtuah turah ka dah ta ringawt.

Nilengin inah kan awm a, dawrah pawh ka kal ta lo. Kan chawei lai chuan tupawh chu kan lai vel vek a ni ber, ka nu chu nu nih tling tih takah a buai rei lem lo. Rinawmi hrehawm tih lohna turin a be ta siam siam a, inhre ngai lo an ni hran lo bawk a, a tihdan dan a la awm. Ka pa ber chu ka khawngaih, kum 35 lai ka ni ve tawh a, nupui nei turin min nawr reng thin. Ka hmanhmawh loh thu bakin ka chhang ngai lova, tunah hetiang hian ka thawng leh ta thut si hi hriatthiam a har a tih ka ring. Mahse, keimah bikah chuan dan thianghlima neih hi a zahawm ka ti a, ka tlin lohzia ka inhriat avangin neih ka tum ngai lo hrim hrim. Tunah lah ka lo ngaihtuah phak ngai miah loh, a ruka ka duh ve ngawih ngawih kha ka han nei ta mai chu a ni a, engkim mai chu mumang ang ruai vek a ni.

Chhunah room ah kan awm a, ka thawmhnaw bawm vel chu Rinawmi chuan a rem tha malh malh a, a che vel chu ka lo thlir dauh dauh a. Mapuia’n a hriat hunah eng rilru tak pu ang maw? A thianpa ve berin a nau ka lo duh reng tih a hriat hunah chuan min hmu mak vek ang em?  Nge, thlamuang takin ka kutah a nau hi a dah ang? Zawhna hrang hrang ka rilruah a lo lut a, a tawpah chuan ka han thaw leh hawlh thin a. A nu leh pa tak hian nia mak ti tur chu, an fanu, college pawh la zo lo chu ka lo neihsak ringawt a ni si a, zanah palai an kal anga, a fel duak em ang chu? Beiseinain a nghak phawt mai aniang chu.

“U Te, O Mapuia nen zingah khan kan in text a, ka hrilh a” a rawn tih chuan ka va hawi hu a.

“A thinrim em?” inthiam lo ru deuh tak hian ka ti a.

“Thinrim ve tho, ‘in inneih duhte chuan tha taka inneih mai tur a nia, inruk kher a ngai emaw ni le’ a ti a. Mahse, thudik kha ka hrilh tawp a” a tih chuan ka na zawk.

Biakrinawmi hian a dinhmun laklawh vang mai maiin min nei tihna a ni thei mai em? Ka zawt ngam teuh si lo, engpawhnise, ngaihtuah vak vak lo phawt teh ang.

Zanah palai an kal ta ngei a, Pa Ruata te nupa chu an lo lawm lo viau a, thil mak pawh a ni hran lo, ka rin lawk tho a ni. Mahse, chutia kan lo inruk tawh ber chuan tihngaihna a awm tawh lo tih hriain insawirem mai chu pawi an lo ti bik lo. Palai kal leh hun turte an sawi a, chumi chhung chuan Rinawmi pawh haw phei phawt turin an ti a, chu ber chu ka huphurh. Zanhnih lek hun kan la hmang dun a, a telloa awm kha ka huphurh run tawh.

“Haw phei kher chu I duh em ni?” tia ka zawh chuan a rilru a buai ve hmel viau.

“Ka pa in a tih chuan hnial loh kha a tha zawk dawn a” a kuttin kheuh neuh neuh pahin a ti a.

Kan ngawi dun ta vang vang a, kan huphurh dun tih chu ka hre reng.

“Nia, engpawhnise, an tih tlat chuan I haw phawt mai anga, mahse, ka huphurh thlawt a ni” ka ti a, “Keipawh” a lo ti ve sap a.

Zing chaw kan ei laiin ka pa chuan ngaihdan dang a rawn nei ta hlauh a.

“Palai an kal leh phawt anga, kan insawirem hunah Rinawmi chu a haw chauh ang” a ti.

Kan va hlim dun tak.