BIAKRINAWMI 2

Part 2

Kan inneih hun atan September ni 10 chu ruat fel a ni ta. Tute mai pawh chuan mak an ti a, ka thiante hlei hlei hian mak an ti. Rinawmi nen kan inngaihzawn thu an hre lova, ka vanneihna erawh chu tumah kawp ka neih loh lai a ni a, mahse, ka kawp hnuhnun ber Dini erawh a rawn vui viau. Thla hnih vel kan inzui ve a, nupui neih ka tum loh thu leh tlangval nuam ka tihzia ka hrilh vanga inthen kan ni a, min rawn chhuahchhal nghal zat. Ka thiante hmuh ka huphurh viau a, chutihrual erawh chuan min phurpui tih ka hre tho, a tam zawk hi nupui fanau an nei tawh an ni a, nupui nei tawh tura min nawr thin an ni deuh vek. Ka nu leh pa lahin mo neih an chak tawh em avang hian ka thiante hnenah min nawr turin an lo ti fo bawk nen, an duh dan ang takin nei ta lo mah ila an lawm em em tho ang tih ka ring.

“U Te, Au Mapuia nen in inbe tawh em?” Rinawmi’n a tih chuan kan la inbe miah lo tih ka hrechhuak. Keima phur phurin ka phur a, Mapuia lam reng ka lo ngaihtuah tawh lo.

Ka phone chu ka han phawrh chhuak a, Mapuia chu ka call ta nghal a. Engtin emaw tak hian ka lai deuh hu lehnghal, ka thianpa makpa ka ni mai tur chu a nuihzatthlak angreng.

“Ka nau ka duatzia chu I hriat kha, a rilru I tihnatsak chuan I chak lo ang” a rawn ti a, ka lo nui huk huk.

“I duat ai letin ka duat dawn alawm, lungngai lo la” ka tih chuan a hmel a ner nasa leh viau in ka ring.

“Ka makpa rinawm tak ni la, chu chu ka duh a ni mai. Tunge thianah I hman dawn? Min hmante kha I lo tum ringawt ange” a rawn tih chuan nupui kan neih hunah thianah kan inhmang ang kan tih kha a theih dawn ta lo tih ka hrechhuak.

“I makpa chu ni dawn lo ila chuan nang tluka ka bula din phu hi an awm lo. Dam takin rawn haw phawt mai teh” tiin kan inbiakna chu kan titawp ta a.

Nupui han neih dawn takah chuan ka rin aiin a lo hau tak a, tih tur neuh neuh a lo tam bawk. Ka farnute pahnih pasal nei tawh pawh an rawn phur khawp mai a, engkim ka ngaihtuah phak loh leh a nachang ka hriat loh thlengin min ngaihtuahsak a, ka tan chuan an hlu tak zet. Ka pa rilru dam chiang lo ber hi hrehawm ka ti, ka nu chuan a pawm thei viau zawk a, fapa neihchhun ka ni ve miau a, an duh dan ka tih puitlinsak lo hi chu keipawhin hrehawm ka ti reng tawh ang.

Hun a kal ve zel a, kan inneih ni pawh a lo herchhuak ve ta. Keimahniin tlin tawh lo mah ila kan chhungten kan phu loin min lawm ropuisak a, tunah chuan an zarah nupui ka nei ve ta tak tak e. A hmaa ka sawi tawh ang khan Rinawmi hi college kal lai a la nih avangin a nu leh pa te chuan kal zawm zel se an duh a, ka nu leh pa ngaihdan chiah pawh a ni. Amah tak hi chuan a chak tawh lo tih ka hria, mahse, ama tan vek anih avangin keipawhin kal zawm se ka duh. A bulah pawh chiang takin ka duh dan engkim ka hrilh tawh a, min hnial tung bik lo.

‘U Te, kum khat lai kal ka la ngai dawn sia, nau ka pai hman chuan ka kal tha thei dawn chuang em ni?” tia min zawh chuan ka rilru a buai ve lek lek. Chumi vang ringawta a zir zawma loh chu ka duh si lo a.

“Kan ti lo char char anga ni mai a” ka ti a, a hrilhhai hmel chuan ka nuih a tiza.

“I theih dawn chuan ka lawm khawp ang” thutak hmel fe hian a ti a.

“Ka ti tak tak lo tih kha lo hre tawp rawh” ka tih chuan a nui chhuak hawk a, ka fiam fuh vak lo.

Ni tin ka dawr lamah ka kal a, Rinawmi pawh class a kal leh tawh a, a chang chuan nuam lo a tih thu a sawi ve thin. Mipa tan chuan nupui nei chunga kal chu a hrehawm vak lo anga, hmeichhe tan chuan a nuam lutukin ka ring lo. Chutihrual chuan chutiang vang mai mai a a tawpsan erawh ka remti hauh lo thung.

“Nangmah alawm, I hmanhmawh thawt thawt lutuk a” zankhat chu a lehkha zir lai hian ka ti a.

“Ka chang lo ang che tih ka hlau alawm “tiin min chhang ve khauh.

Inchhunga mo awmchhun nita chu ka nu leh ka pa hian an atchilh khawp a, a bik takin ka nu nen hian an inmil em em a, nufa ni awm zawk takte pawh an ni. Rinawmi te chhungkua hrim hrim hi an zia a tha a, an zaidam bawk. Keini lam erawh thawm na chi kan ni a, keimah tak hi ka tawng tam em em lo zawk a, kan chhungkaw zia tak tak chu a hre chho ve dawn chauh a ni.

College-a kal tur hi ka thlah ziah a, haw lam erawh chu a thiante rualin a rawn haw ve mai zel. Dawrah ka buai thin tih a hria a, a ban hma deuh chuan min rawn pui thin a, ka dawr chhak school-a a luh lai khan ka nupui a ni ang tih kha ka hre der mai si lo a, kan rin loh deuh deuh hian kan chungah a lo thleng thin tih chu a takin ka tawng ve a ni.

‘Tea, zanin chu min chhuahpui lawk thei angem? Ka laklawh lutuk a” tiin ka thianpa Zara chuan min rawn bia a. Nidangah pawh ka chhuahpui zeuh zeuh a, mahse tunhnaiah hian a reh ve ta riau a, a zia turah ka lo ngai kha a nia, a bei nasa leh ang tih ka hlau khawp mai. Thlahnih kalta khan a nupui nen an inthen a, a lungleng tuar bawk si chu zu lamah a tuan ta vak mai a ni. Kan thianhoin kan sawikhawm thin a, annu hi hruai sak mai kan tum fo a, ngaihzawng a neih vanga inthen an nih avang hian Zara hian hruai mai hi a tlawm la a ni deuh ber.

“Zanin chu ka chhuahsan lawk dawn che nia aw”

Room a ka insiam mawlh mawlh lai chuan a thlengsil zo a rawn lut ve a.

“I rei dawn em?” a ti tha ve mai a.

“Rei lutuk lo ang, lehkha te lo zir la” ka ti a, test an nei hnai tih ka hria a, kan inneihna hian a zirna a tichhia ang tih hi ka hlau ru ve viau.

Zara te in ka va thlen chuan a lo insiam peih ve diam tawh a, rei thu loin kan chhuak ta nghal a. A van lai pawh hian lakna tur hi chu a lo hre viau zel mai, mak pawh ka ti hran tawh lo. Kan lak zawh chuan kan thianpa tho Rammawia, mahnia inluah chu kan pan a, an lo ri nak nak lehnghal. Kan va luh chuan rin loh deuhin Dini ka va hmu a, min hmuh chu a inbeisei bik lo aniang, a phawk ve hra mai.

“Chaw kan lo eikhawm a, a then an haw tawh a” Rammawia chuan a lo ti sawk sawk a.

Dini nen hian amah Rammawia atanga inhria kan ni a, tum loh deuhin kan inngaizawng ve ta ngawt kha a ni a, amah a chhe lo a, rual a pawl zau bawk. Amaherawh chu mi tam takin an hriat loh, kei ngei pawhin kan inkawp hnua ka hriat ve chauh erawh chu a lem ve thei viau tih hi a ni. A fing a, a thiante ngei pawh hian an hre lutuk lo, mi inthup thei ngang kha a ni miau a.

“Nupui neih kha I tum lo in ka hre si a” a ti nghat a, ka lo nui mai mai.

Zu hi in lo tawp chu ka ni bik lo, ka in ve zeuh zeuh a, in lo pawh hian ka awm thei lutuk tho. Zanin pawh hian in tuma kal ka ni lo, mahse, Zara chuan min thlit kep tlat si a, in ngai lo nih bawk si loh chuan ka in ve mai. Ka thutna bulah chuan Dini chu a thu ve ran a, min melh dan hi ka hai miah lo, thla hnih kan inzui ve chhung khan tih dun loh engmah kan nei lo a, mahse inthiam loh phahna tur erawh ka nei lemin ka hre lo. A chhan chu nula thianghlim a ni tawh miau lo a, chuvang erawh chuan ka hmuhsit phah chuanglo.

“Zara, I thianpa hian nupui a neih duh loh thu min hrilh na kha thla thum pawh a la liam lo ang, a ti mak a sin” a han ti leh kher a.

“A neih duh zawng tak a hmuh takah chuan a rilru a thlak a ni mai alawm” Zara chuan a lo ti hmuk a, ani hi chuan engtikawng mahin min dodal dawn lo tih ka hria.

“A lo nih vel tak chu a” tih pahin a tho a, Rammawia nen chuan an inbe ru sar sar a, rei vak lo hnuah chuan an chhuak ta a.

“Kha nu nen nunhlui in lo nei kha chu a pawi ka tih ber zinga mi a niang. Rinawmi hi a rawn buai duh lo ang tih a sawi theih loh a nia” Zara chuan a ti charh charh a. Ka lo nui mai mai thung, nupui ka neih tawh ber chuan min beisei zui ka ring lo. Khawvela mipa tha ber ka ni lo a, chutianga hlu ka ni hek lo. Min rawn tibuai zui duh hi an awm ka ring hlawl lo a ni ber ang chu.

In ka thlen chuan dar 11 a lo ri tawh, Zara ka thlah fel hnuah ka haw ve ta chauh kha a nia, ka rin aiin ka rei. Rinawmi chu dawhkana a lehkhabu chungah a lo bawk a, a lo muthlu a niang ka thawm pawh a hre lo. Zu ka lo in nam ve khanglang chu pawi ka ti hnuhnawh viau. Amah pawh kaitho hmasa duh loin bathroom lam ka pan nghal a, ka inbual zuai a, ka va chhuah chuan ka nupui chu a lo la mu tui viau mai. Ka han sawi deuh dat dat a, mit nuai chat chat hian a rawn meng a.

“ I lo haw har si” lawm loh hmel deuh hian a ti a. Ka rei lo ang ti khan ka chhuahsan kha a nia, ka rin aiin ka lo rei a, pawi ka ti.

Khumah ka pawm phei lawp a, a thinrim rei hran lo. Ka rim erawh ka inthlahrung ru viau, a hre lo der nge phei chu ka hre lo a, engmah a sawi lang lo. Ka nupui muhil lai chu ka en reng a, ka mut a chhuak ve der si lo. Zu ka in lohna a rei tawh a, ka han in ve ta kher chuan min tibuai tawk vel chiah a ni ber. Ka tho leh ringawt a, bathlar thlanglamah chhuak thla in zial ka zu ta a. Engtia rei nge ka thut ka hre lo, ka darah rawn vuantu chu ka han en a, Rinawmi chu ka bulah a lo ding reng a.

“Ka tiharh che mi?”ka tih chuan a lu a thing a.

“U Te, tunah bul kan tan dawn chauh a, zu hi chu in tawh lo la” a ti a. Ka malchungah chuan ka pawt thu a, a hre lo emaw ka tih kha a lo hre reng a lo ni.

“Ni e, zanin pawh ka tum lo deuhin ka in alawm maw le” ka ti a.

“Kan inhruai zan khan mak min tie m?” a ti leh sap a, chhang lo in a biangah chuan ka fawp zauh a.

“Ka vawikhat zu inna a nih kha, zu tih pawh ka hre lo a. Beer hi chu ka in ve thin tih chu thup ka tum chuang lo a, khami zan pawh khan beer ka in emaw ka ti a, zu an lo telh tih kha ka hre miah lo. Ka rui ta lutuk a, room ah ka mu a, tah khan kan thianten min awmpui tir an tum pa ka hrilh che kha an lo luh tir a lo nia. Ka hlauhthawnzia kha ka la feel thei. Pasal neih chuan virgin ngeia neih kha ka tum ve tlat sia, misual deuh chu nise ka him angem ka hre lo. Mahse, thil awmzia ka sawi hnu khan tha deuhin room atang khan a chhuak veleh mai a, ka rilruah I lo lang hmasa ber a, ka lo call tawp che kha ania” a ti leh a.

“Min lo call lo ta la chuan ka nupui pawh I ni awm tawp si lo a” ka tih chuan a nui ri deuh hak a. “Kei chu ka nih ka ring tho” tia min chhanna chuan min tihlim veng veng.

Chhun lamah tih tur kan neih ve ve avangin mutchhuak lo chung chuan kan han mu lui a, engtin tin emaw chuan kan lo muhil ve ta a niang, ka harh chuan ni a lo tlang sang tawh viau. Rinawmi chu a lo tho tawh a, a thawh lai pawh ka hre lo. Mahni duh takte nena nun bul han tan chu a hlimawm ngawih ngawih a, hma bak hi a eng riauin a hriat bawk. Kan hlimna hian kan damchhung a daih dawn nge, harsatna kan la tawk dawn chauh tihte chu ngaihtuah tham tak tur a ni.

Note: Story sei tak tak hi chu ziah loh law law ka duh rih, ka hun neihin a zir thin thlawt si lo a. Tun ami pawh hi sei tak ni turin ka duang lem lo a, tunkarah chuan a tawp maithei. Tihian reh tawp aiah sei lutuk lo hi rawn dah regular tum ta zawk ila thain ka hria.