BIAKRINAWMI 3

Part 3

Hun chelh din loh ta chu a kal ngaiin a kal ve zel a, kan nupa pawh harsatna em em tawk loin kana wm ve zel a. Tunah hian thla ruk kan innei ve ta, nupa han nih takah chuan chiang taka ka hriat tak chu fa neih hi a chakawm tih hi. Rinawmi rilru chu ka hre hauh lo a, mahse, kei hi chuan fa neih vat hi ka chak. Chuti ngawta neih theih erawh a lo ni hauh lo, Pathian thu thu a lo ni tihte ka hriat phah ta zel a.


“In nu hi a la naupang sia, college a la kal bawk si a, nau hi chu in pai duh mai ka ring lo reng a ni” kan thianpa Thakima nupui chuan a ti hlawl a, a ngaihna ka hre lo kher mai.


‘Chutia duha paia pai loh theih em ni ngawt le?” tiin ka chhang ve ta tho a.


“In danna in hmang aniang chu ka ti mai a, han en mai chuan pai harsa hmel in pu lo em alawm” nui chungin a ti. 

Ka ngaihtuah mai mai a, Rinawmi hian ka hriat loh hian chutiang chu a lo ti a ni thei angem ka hre hauh lo. A la naupang a, tin, college a la kal bawk a, nau pai mai chu a duh lo tak tak maithei. Mahse, chutiang chu lo ni pawh nise, min hrilh ka ring bawk si a, ka awm a nuam lo zo vek. 


Dawrah ka buai ve thei em em a, in lam hi chu hriat ka nei mumal lo. Ka nu leh Rinawmi hian an hna an tlin a, ka pa nen hi chuan inchhungah kan awm tlem. Chutiang chu ni mah se nupuiin a tih tur hi chu hmaih loin a ti ve zel chuan ka hria. An exam zo chawlh a neih chhung pawhin ka nu nen kawmthlang huan an enkawl a, buai an inti ve thei hle. Hetiang kawngah hi chuan sawiselna tur ka nei lem lo, ka nu leh pa a tilawm thiam a, a der ni loin a takin a lantir a, amah ka chhuanna ber pawh a ni. 


Nikhat chu ka nawmsam vak loh avangin ka haw hma a, in ka thlen hma deuhin kan inkawta bike ding mek leh Rinawmi inbe mek chu ka va hmu a. Ka thlen chuan bike chu a lo tlan liam hman tawh a, ka nupui pawh chu inchhungah a lo lut hman tawh. Class an tan leh tawh avangin a thianten an rawn thlah ni turah ka ngai a, mahse, mipa thian a neih thu a sawi erawh ka hre ngai vak lo.


Room ka luh chuan a inthlak mek a, min hmuh chuan a phu zawk lehnghal.


“Tunge rawn thlah che a?” ka ti tha ve mai a.

“Kan class a mi nia, kan vengah kalna tur a nei a, ka rawn chuang nghal a nih kha” a ti a, ka awih lo hran lem lo.

Ka haw hma chhante ka hrilh chuan damdawi min ngaihtuahsak a, a phi buai nghal char char. Ka hriselna a tha a, ka dam lo khat angreng a, ka dam loh chhunah erawh ka la na viau zel. Damdawi te ka ei zawh hnu chuan ka mu ta nghal a, ka muhil ta char char a, ka harh leh chuan khua a lo thim tawh. Kan khum bula Rinawmi phone let reng chu ka han ban a, ka rilruaa lo lang hmasa ber chu ka ti nghal. Whatsapp ah ka lut a, a thiante nen an inbiakna leh group message vel chu a inthlar thla dul. Dah leh mai ka tum lai chuan message a rawn thleng chiah. Number hlang a ni a, chu tak chuan chhiar min tichak.

*Ka bike a I la chuang duh ringawt pawh kha ka lawm, nidangah pawh ka la thlah fo theih che ka beisei*

Chu message chu ka chhiar nawn leh thin a, ka na ta ngut ngut mai. Chaw ei dawnah room ah a rawn lut a, min rawn bih dek dek a, ka chal a rawn deh pawh chuan ka maimitchhing reng a.

“U Te” a ti zawi sap a.

Min ngaihchan hnu fe ah pawh ka chechang duh lo. A kal sawn ta a, ka taksa nawm loh aiin ka rilru nawm lohna hian min ti chau. Dik tak chuan min phatsan turte, ka tana rinawm lo turte hian ka la dah phal chuang lo. Tunah pawh hian khapa nen an inkar chiang taka hriat ka la nei lo a, hetia a engahmah hmaa lo awm chiam hi tul lo tihna te pawh ka nei. Mahse, chumi vang ringawtin ka rilru chu a dam chuang hauh si lo a. Thleng a sil fel hnuah a rawn lut leh a, ka phone ka lo bih kual vel mai mai.

“I ril atam tawh em? I harh siloa chaw kan lo eisan tawp che a” a ti a.

“Ka ei chak lo” ka ti a, pangngai taka chhan ka tum a, ka tum aiin ka chhang bung.

“I la zia chuang lo mi?” tih pahin ka bulah chuan a rawn inrawlh ve sawt sawt a.

“Ka dam tawh e, min ngaihtuah lo la” ka ti a, ka kawngah a kut a rawn rawlh lut a, min kuah a.

“Assignment ka ngah sia, min tihpui ang ka lo ti ve asin le” a ti leh ta nauh nauh a.

A puitling zawk, kum lamah pawh upa zawk ka ni a, engkim hi keimahah a innghat tih ka hr eve a, chuvangin thil ho mai maia a chunga thinrim chu a dik berin ka hre lo. A lu chungah chuan ka khabe ka han nghat a.

“Thil min hrilh duh riaute I nei em?”tiin ka zawt a.

“Ih.. Englam ?” a tih chuan, “Engpawh, min hrilh hreh deuh ang chi te pawh..” ka tih chuan a ngawi ta vang vang a.

“Chutiang a awm pawh ka hre lo. Mahse..” a ngawi leh ta daih a.

“Sawi hreh nei lo la” ka lo ti leh hman thawt thawt a.

‘Nau ka pai har I ti em?”

Ka vawnna ka thlah a, min rawn en chho deuh ha a.

“Nau pai leh pai loh hi chu kan thu a ni lo a, chung lam thu thu a nia, chu bakah thlak 7 vel kan innei ve chauh a, a la hmanhmawhthlak lo a” ka ti a.

“Zep lo chuan ka thiante hian an inneih hnu lawkah an pai thin sia, ka pai har ka in ti tawh a, hei hi hrehawm ka ti thin” a ti zuai raih a.

“Chutiang zawngin ngaihtuah tawh miah suh aw. A hun takah chuan I pai ve mai ang,  lehkha I la zir bawk sia, I la pai lo pawh hi Pathian remruat a ni zawk ang” ka ti ta a.

A awmdan chu a han insiamrem deuh a, min rawn fawp zeuh a, a nui ta var var a. Ama tawkah a lo ngaihtuah nasa ve thin hle dawn a lo ni tihte ka ngaihtuah chhuah phah a, keima buai buai hian ka buai a, ka ngaihsak tawk lo ang tihte pawh ka ring.

Bathroom ah preganancy test kid lo let bam chu ka han chhar a, ka thaw halh a, khatia naupai chungchang kan sawi dun hnu kha chuan helam hawi zawng hian kan sawi ngai tawh lo a, thla thum lai a liam leh tawh. Vawi engemaw zat chu a lo in test tawh ang tih ka ring thiam mai, ka hriat loh hian a rilru a hah thei ngawtin ka ring. Khumah chuan ka thu a, ka thil ken lai chu ka melh reng a. Chutia ka thut reng lai chuan Rinawmi chu a rawn lut ve a, a rawn nui lut var var a, ka thil ken a rawn hmuh chuan a nui tawp chat a, min rawn pan nghal a.

“A… a.. ka lo paih theihnghilh daih” a ti bah nak a.

Ka thaw ham ham a, sawi mai tur pawh ka hre lo.

“U Te, I thinrim mi?” a tih chuan ka bulah ka pawt hnai a.

“Rinawm, a hun takah chuan kan nei ve mai ang ka tih kha, nangmahin rilru hahna lo pai tawh lo la, engkim kan sawi dun thei vek a nia aw” ka ti a, a inhnit ta faih a.

“Ka zah em che a ni” a tih chuan ka pawm thlawp a, mi kalkhat ve a nih avangin a ngaihtuah lam chu a ngaihtuah tawp mai mai dawn lo tih ka hria, chuvang chuan doctor bula kal pui a, a tul leh counseling class lakpui mai pawh chu ka duh tawh.

Doctor room atanga kan chhuah hnu chuan tlemin a hmel chu a hlim ve ta deuhin ka hria, doctor khan damdawi kha kan pahnihin min chawh nual a, thla khat hnuah kan kal leh dawn a ni. An exam a hnai tawh a, a rilru lapengtu a lo awm ve zel hian a zirna a tithuanawp ang tih ka hlau si a, nawr vak ka duh si lo, a chang chuan harsa ka ti ve lek lek thin. Amah ka nupui hi phurritah ka ngai tihna ni loin unau zinga naupang ber ka lo nih ve bawk avang hian puitlin bik lohna tam tak ka nei a, chhungte pun chi ni bik si lo mahnia hmachhawn ngai thil tam tak vang hi a ni deuh ber. 

Ka bungraw chah tur ziakin ka buai hle a, pawn lam pawh ka hawi chhuak hman lo. Ka dawr enkawltu ber Cindy chuan thingpui min rawn pe a, amah pawh ka lo en lo.

“Rinawmi kha a lo kawi dawn emaw ka tia” a tih chuan ka han melh a.

“Dawr bulah a lo kal amaw?” ka tih chuan tlemin a kimki deuh.

“Bike-in an rawn phur a, an tlan tlang daih a” a tih chuan ka thin a rawn phu deuh zaih zaih.

Ka inziah fel hnuah thil dang pawh ka ngaihtuah thei tawh lo, in lam panin ka inkhalh haw nghal a. Ka va thlen chuan kawngka a lo inhawlh kalh. Huan lam ka hawi thlak chuan ka nu chu green house atangin a rawn chhuak chiah a, min rawn hmuh chuan min hui a. 

“Khawnge Rinawmi?” tiin ka han au nghal a.

“A lo la haw hleinem, leh ringawt zel a che” tiin min la hau let zui a.

Ka inbual sauh sauh a, ka leng chhuak ta daih.

Note: Dah loh aiah ka dah. Vawiinah current a eng zeuh zeuh tih ang vel a ni. Dah loh ka hlau sia ka type tlem ang angin ka vawm lut ta tho e