BIAKRINAWMI 4

Part 4

Ka phone ri char char chu ka melh reng a, Rinawmi call a nih avangin ka la duh lo. Ka lungawi lo ru ngawih ngawih a, engtin emaw tak hian amah rinhlelhna ka nei a ni deuh ber. Khatia ka chhuak ta kha Zara te in lam ka pan a, a lo nuam lo deuh lehgnghal a, ka awm ve ta reng. Dar 8 velah ka haw ve ta chauh a, ka nu in TV a lo en a, ka u fate nen an lo video call bawk a, ka pa erawh chu ka hmu lo. Room ah ka lut a, Rinawmi chuan lehkha a lo zir mek. Ka thawm a hriat veleh a rawn hawi nghal a, min hmuh chuan a tho nghal a.

“Ka call I la thei lova, chaw ei ka lo nghak char char che a” a ti a, amah vek chuan, “Ka’n siam nghal ang aw” a ti leh a.

“Ka ei tawh” ka ti a, khumah chuan ka bawk a.

“Engmah I lo sawi si lo a” a tih chuan ka han inbengkang deuh a.

“Engkim ka hrilh vek che a ngai mi?” ka ti nghut a, a ngaihna hriat loh hmel fe hian min melh reng a.

Engmah a sawi tawh bik lo, a thu leh a, lehkhabu chu a bih leh ta a. Ka lo rin dan chuan ka lungawi lo tihte a hrethiam anga, a chhan a zawng bawk turah ka lo ngai kha a nia, a lan danah erawh chutiang tih tum hmel a pu lo. Ka tho a, ka in ti fai thuak thuak a, ka mu ta daih a. Ka phone chu khawihin thianho group ah ka pawt ta vel mai mai. A khat tawkin Rinawmi chu ka va melh a, ka awm ve tih pawh hre angin a awm lo.

Ka phone a rawn lak sawn chuan ka harh deuh a, ka lukham bulah dahin amah a rawn mu a, zan dangah chuan min nek talh talh thin. Zanin erawh chu min hlat thei ang berah a mu a, va hnaih ka tum lem bik lo. Thawklehkhatah kan inkar chu a hla ta dawrh a ni ber. Engtin tin emaw ka lo muhil leh mai a, ka mumang lah chu a chhe em em a, ka duh ai hmain ka thawh phah. Kawt vela thinghnah tla chu ka phiat a, zingtin ka pa hna a ni thin. Ka phiah hnu rei vak loah a rawn tho a, chutia ka lo phiat a hmuh chuan mak ti hmelte pawh a pu.

“I muhil tha thei nange?” tiin min zawt hial.

“Ka mu hma lutuka, ka thiam lo aniang” ka ti ta ringawt a.

Zanah hian ka meng rei tlangpui a, zana thawh ngai chi hna ka ngah thin bawk a, zing hi chu ka thawh hma tuman an beisei lo hrim hrim. Ka nu rawn thawh hnu chuan thingpuite kan in a, Rinawmi thawh hmain ka chhuak leh a, ka awm dan mai mai chu a ngeiawm ve ngawt ang. Dar 10 velah ka haw a, Rinawmi chu class kal turin a lo chhuak tawh a, chaw min lo eisan vek tawh. Chak vak lo chungin chaw chu ka han ei ve a, tih tham pawh ka ei lo. Phur vak lo chuan dawr lam ka pan a, Cindy a lo thleng tawh a, hna pawh kan ngah ve leh hmel viau.

“U Te, I dam vak lo mi?” chhun kan chawlh lai chuan Cindy chuan min zawt a.

“Dam e, tinge?” ka tih chuan, “I ngui bur bawk sia, damlo I ang lutuk a” a ti a.

Ka thlen tirh atang khan hna chungchang bak ka la tawng miah lo tih ka hrechhuak, ka nui lui sak a. Kei hi mihring zawng zawnga inthup thiam lo ber mai ka ni a, kan nupa inkar tha vak lo pawh hi ka lo lantir leh tawh tih a lang reng. Whatsapp ah chuan ka han lut a, Rinawmi status chu ka han bih hram a. A thiante nena an thlalak, tun lawk ami anih ka ring. A nui sang a, chu ringawtte chuan ka thian a tirim. Ka mize danglam leh ka awmdan danglam vanga amaha nghawng a awm lo lutuk chuan min tina. Chawhnu lamah Rammawia leh Dini an rawn lut hlawl a, an rawn thawveng lehpek hle.

“Naktuk zan chu I rawn kal ve ang chu tiraw?” Dini chuan a ti a.

“Khawiah chuan maw ka rawn kal ve ringawt ang?” ka lo ti hu a.

“Ka birthday party ah. Inthen vanga inkawm duh loh zui kher a ngai lo a, thian kan la ni reng tho a nia” a ti leh nghal a.

“Nia, ka lo tum dawn nia” ka ti ve ta a.

An chhuah hnu chuan Zara a rawn lang ve nghal zat bawk.

“Rammawia te kha an lo kal ve em?” a rawn ti a, an rawn kal thu ka sawi chuan, “Kal ve ang aw, kan chhuak khat tawh emai” a ti a.

Pawi ka ti vak hran lo, hetia nupui ka neih hnu hian thianhoa thiltihkhawm a awm khat a, a awm pawhin Rinawmi chhuahsan ka hreh thin a vangin ka kal ngai lo. Ka thiante an vui viau thin a, a awm ve reng. Dawr ka khar thlengin Zara chu a leng ve ta reng a, kan insawi phur a, tum lawk em em lo chuan zu in turin kan chhuak ta ringawt a. Tun nikhat thil thua ka nun ho ta riau chu a chhan ka hre reng, han siamthat mai dan ka thiam lo a, ka thiam angin ka awm ve tawp.

Dar 10 velah ka haw a, Rinawmi a lo mu tawh. Vawikhatmah min rawn biak a tum lo te chu ka haw em em a, mahse, thinrima ang bawrh bawrh chi ka ni lo a, keiman ka tuar tawp thin. Chutiang bawk chuan a chunga ka lungawi lohna pawh ka thiam dana lantir hi ka tih theih ve tawk a ni, ka nep viau pawhin ka ring. Ka inbual zawhah ka mu ve mai a, ka muhil mai thei lo chuan zial ka tan a, Rinawmi chu a rawn inher a, a lo la muhil miah lo a nih ka ring.

“Ka chungah lungawi lohna I neih chuan sawi ve mai la, zu in kher a ngai mi?” lungawi lo angreng tak hian a ti a.

“Ka in chak vangin ka in a nih hi” ka ti a, a thaw halh.

“Hetiang I ni tih lo hria ila..” a ti sap a, a inher leh nghal daih.

A thusawi chuan min run angreng khawp mai, harh fim ila chuan engah vak mah ka ngaiin ka ring lo a, chu bakah chutiang chu a sawi kher a ngai lo maithei bawk.

“Engtin maw hetiang ka nih chu..?” ka ti a. A ngawi reng.

Ka tho a, ka insa sawk sawk a, chutia ka insiam mawlh mawlh chu a ngaih a tha vak lo ni tur a ni, a puan a theh hlim a, khumah chuan a thu a.

“Hetianga puitling lo I ni tih hi ka lo hre lo a” tlema nem deuh zawkin a ti a.

“Ni e, ka puitling lo, chuan hei hi ka nihna a ni bawk. Zu in mi ka ni, ka duhthlan niloin I duhthlanna innei kan ni bawk”

A inhnit nghal faih, ka tawng tam mah mah tih ka hria, mahse, ngaih a lo sam tawh thin si a, inthununna pawh ka nei hman tawh lo. Ka motor chabi ka la a, ka chhuak zui nghal. Ka awm reng chuan kan inhau nasa dawn tih ka hria, boruak that loh zual ai chuan chhuah mai kha tha ti tur tawk velin ka rilru a harh lawi si.

Kalna tur em em pawh hre lo in ka hma zawnah chuan ka tlan mawp mawp a, nupaa insiam hi thil namai lo tak a lo ni. Ka mizia hrechiang loin min nei tih a sawi khan min tina ngut ngut ringawt, min hriatchian loh vanga min nei tih sawi lang kher lo mah se a sawi tum a ni tih a chiang. Kei hi chuan ka duh tak zet tih ka inhria, a nihna ang ang pawhin ka pawm, mahse, ka lo hlauhthawn ruk thin chu min iai hun a la nei ang tih hi a ni. Kum 10 chuang in kan inthlau a, a rualpuite nena inngaihzawnna boruak neih a la thlahlel ang tih pawh ka ring. Chutichung chuan ka theih ang tawkin ka duatin ka ngaihsak a, rualawt pawhin ka siam bik lo chuan ka hria. Mahse, min nei hi a lo inchhir ngawih ngawih a nih dawn hi.

Dini te in kan thlen chuan kan thian dangte pawh an lo thleng tawh hlawm a, ka hriat ngai loh pawh an awm nuk. Nidang ang bawkin Dini chu a inha chhing leh pek hle a, a pian hi nalh ve a, tihlan dan hram a ngaihtuah thin. Min hmuh chuan min rawn pan a, ka biangah a rawn fawp zeuh a, engahmah ka ngai hran lo. Midang pawh a lo ti ve vek tho a, rilru dang a pu lem lo ang, chutiang bawkin keipawh ka danglam lo.

“In nu ka lo sawm tel ve lo a”

Thlang lam bathlarah zial ka zu a, Dini chu a rawn kal tih ka lo hre miah lo.

“Lehkha zir a ngai tawh lutuk a” ka lo ti ve mai a.

“Te, I mak ka ti” ka bulah chuan a rawn ding a, min rawn ngheng deuh titih a, ka lo tawlh sawn vat.

“Tupawh hian makna chu kan nei vek ang chu” ka ti a.

“Kan serious lo ve ve tih chu ka hria, mahse, awlsam lutuk a nupui I nei hi chuan min ti tlawm ve ngawt mai” a ti zawi sap a.

Ni e, ka hrethiam khawp mai. Rinawmi nen kan inhawn ve tawp hma zawng kha chuan nupui neih chakna leh tumna ka nei lo tak tak, chu chu tu bulah mah ka sawi ngai chuang lo. Dini nen kan inzui ve chhung kha rei lo mah se a hmain kan lo inkawm nasa ve a, nupui neih ka tum lo ah an ngai vek a nih kha.

“Hma hun tuman kan hre bawk si lo alawm. Kan inthen hnua nei ka nia, thiam chu ka chang tho a ni lawm ni?” tiin ka han en a, min lo en ve reng. A che phat a, min rawn fawp chawt, ka hamhaih luatah chet mai nachang pawh ka hre lo lehnghal. Ka harhchhuak thut chuan ka namsawn a, a thaw chhuak halh.

“Ka tihpalh aw, min hrethiam dawn nia. Zanin chu nangmah bak ka rilruah I awm thei lo” a ti a, a chet dan khan min la thawng tho.

“Khatiang rilru kha I put reng dawn chuan kan inkawm thei tawh lo ang, nupui nei lai ka ni tih pawh I hria a, rilru dang pu chung chuan kan inkawm hi a rem dawn lo” ka ti a, a nui hak. Min nuihzat vang a ni lo tih erawh chu ka hre ve tho.

Ka thian dangte pawh hmu tawh lem loin ka haw a, boruak a dik dawn lo tlatin ka hria a, ka inthiarfihlim ta mai a ni. Garage a motor ka dah luh lai chuan kan room light thim khup chu ka han hmu a, ka haw hma chuan Rinawmi’n light a off ngai lo tih ka hria. Inhnuai atanga kan room luh theihna ka siamah chuan ka han lut chho a, ka tlangval lai atangin helai hi chhungte tibuai kher loa ka haw nana ka siam a ni a, ka chhungten an mut dawna ka la haw loh chuan kawngka an kalh theih nana ka tih a ni. Room chu a lo thim vek a, light on na chu banin ka han hmet eng a, Rinawmi a lo awm lo. Sitting room ah ka chhuak phei a, a awm chuang lo. Room ah ka lut leh a, ka phone chu la chhuakin ka han call a, ka call tlang thei hauh lo. Ka nu te room ah chuan ka kal a, inthlahrung tak chungin ka nu chu ka han ko a, vawihnih ka kohnaah a rawn harh mai.

“Khawnge Rinawmi?” ka ti a.

“A nu te in lamah a phei ta a nih kha , dar 8 vel khan a pa pum a na thut an tia, damdawiinah te an kal pui a, nang lah kan be tlang thei si lo che a. Nichin deuh khan min rawn call a, a riah tlang tur thu a rawn sawi a” a tit a a.

Engmah ka bulah sawi duh lovin min pehhel dan a zawng tih ka hre mai, a pa pum na chu pawi ka tihpui tak zet, chutiangah em chuan whatsapp ah message te pawh dah ve tur a ni a. In atanga ka chhuah dawn khan tha takin kan thiannu birthday lawmnaa ka kal tur thu ka hrilh a, ani pawhin remtih lohna engmah a sawi lo. Lehkha a zir leh dawn avangin a ei duhzawng te ka lei khawl sak a, kan boruak tha lo pawh hriat em em lohin ka kalsan kha a nia, nge lungawi lohna a lo pai reng zawk? Aman min chhang thei ang chu.

Zing chaw ei dawnah ka nu in min rawn kaitho a, Rinawmi a lo la haw lo, ka ni hman pawh a fuh lo vek dawnin ka hria.

“Ka fate hi a nazawnga hauh che u hi ka tum lo tih in hria a, mahse, tunhnaiah duh aiin pawn I ngaina tlat, nupui nei tawh I ni a, pawn I ngainat lutuk chuan nupa hlim in ni thei ngai lo ang” ka pa chuan a ti a, ni e, ka pa hian min hau mai mai ngai lo. Min hauh hi chuan kan awmdan a dik lo ve hle tihnaah kan ngai.

Dawr ka thlen hnu chuan ka inti fel sawk sawk a, Rinawmi nu te in lam chu ka pan ta nghal a. Ka va thlen chuan chaw an lo ei mek a, a pa pawh sitting room ah a lo thu.

“Eng nge I an tawh a?” tiin ka pu chu ka han bia a.

“Hei ka tha tawh e, damdawiin kal kan ngai dawn emaw kan tia, in nu pawh kan rawn tibuai ta ringawt a” a ti a. Chutia kan inbiak mawlh mawlh lai chuan room atangin Rinawmi a rawn chhuak a.

“U Te, min thlah hman angem, kan test dawn a” a ti a.

An college lam pan chuan kan chhuak a, a lehkhabu chu a bih ngar a, a pa te ina min en dan ang khan min en leh tawh lo.

“Ka tihpalh aw” ka tih chuan a rawn dak chhuak zawk a, a lu a bu nghat a.

College kan thleng a, a thianten gate bulah an lo nghak, nidangah chuan kan infiam bawrh bawrh thin a, vawiin chu melh pawh min lo melh tha duh lo. Tumah chu ka be ta bik lo a, ka inher a, ka tlan chhuak leh nghal. Side glass ah chuan ka va en leh kher a, mipa pakhat hian Rinawmi darah a vuan a, an nui sang hlawm. Tlemin ka han tlan muang leh deuh a, chu pa dinna bulah chuan bike a inhung a, a ngheng pah deuh bawk. A awmzia chu, a hmaa rawn thlahtu kha tihna. Ka ner sak a, tunge tih ka chhui chhuah vat a ngai dawn.

Note: Comments min petute vang hian phur deuhin kan phuahchawp leh lawp lawp thin, in hlu thlawt!