BIAKRINAWMI 5

Part 5

Ka muhil thei lo chu ka in let chhen a, Rinawmi erawh chu tui takin a muhil bawrh bawrh thung. A phone chu ka hmet eng zeuh zeuh reng a, whatsapp message ka en fe pawhin rinhlelh tur engmah a awm lo. Chutichung chuan ka ngaih a tha thei chuang lo a, engemaw thleng turah hian ka ngai deuh tlat a ni ber. Lehkha a zir nasa ve a, a taksa pawh a tla ve deuh hlek, ka leng chhuak ngai lova, a lehkha zir laiin lehkhabu te ka lo chhiar ve mai thin. Kan inkar pawh tlem chuan a ziaawm ve tawh a, mahse, amah ah hian phurna engmah ka hmu lo. Thil engkim hi a nih phungah ngaiin sawisel loin a ti mawp mawp ni berin ka hria.

“Vawiin hi kan in checkup leh hun kha a nia” insiam mawlh mawlh pah chuan ka ti a.

“U Te, vawiin chu ka peih lo e, naktukah kal mai ila” a ti a.

Pawi ka ti hran lo, nimin atang khan a che reng reng hi a zuai raih a, an exam zawh tawh avangin a tha chho ve zel chuan ka ring. Ina awm turin ka ti a, dawra min zui a tum pawh ka phal lo. An exam chhung khan a bei nasa ve bawk a, engemawti chhung chu han hahdam ve se ka duh.

“Rinawmi a nuamsam vak lo a, lo ngaihsak deuh r’u aw” tiin ka chhuah dawnah kan nula chu ka chah a, chawhnu lamah haw hma tum ranin ka kal ta a.

Ka rin aiin hna kan ngah a, chuti maiin ka chhuak thei lawk lo. Ka thlen hlima ka biak bak chu biakna hun pawh ka nei thei ta miah lo a, haw hma ka tum tho avangin ka tum lui ta hram lo a nih mah. Dar 3 velah haw tumin ka insiam a, Dini a rawn lut chiah.

“Tea, hospitalah min lo hruai lawk teh” a rawn ti a.

“Haw ka lo tum chiah a, taxi la mai la” ka ti a, ka insiam pah reng tho.

“Taxi in kal duh ila ka rawn tibuai kher nang che. I haw kawng tho ania, min hruai kawi lawk rawh” a ti ta tlat a. Ni e, ka haw kawng tur tho a ni a, pawi tawh lo mai ni rawh se.

Hospital gate ka tlan luh chuan ka tum loh deuhin Rinawmi ka hmu hlawl. Min rawn hmuh ve chuan phawk fe hian kan inmelh a, helaia inhmuh hi kan inring lo dun khawp ang. 

“In nu a ni lawm ni?” Dini chuan a ti a, ka chhang lo.

Motor atangin ka chhuk a, Rinawmi te dinnaah chuan ka phei a. A thiannu Lawmi, kan inneiha thaina a hman nen an nih avangin tlem chuan ka rilru a nuam deuh.

“Enge in tih a?” tha takin ka ti a.

Rinawmi chuan min melh reng a, min chhan pawh a tum lo. Lawmi chuan a nghawk zauh a.

“Nangmah zawk khan enge I tih?” a ti chang fak.

“Hei ka thiannu ka rawn thlah lawk, in hman tawh chuan haw ila” ka ti a.

“I thiannu chu I rawn phur haw leh dawn nia, kan haw ve thei” tih pahin Lawmi chu a kai sawk sawk a, kal an tum a. Ka lo vuan bet a, min melh rum ngang mai.

“I kut hmawr pawh khan min dek suh” a ti hlar a, a thing thla nawlh.

“Khatiang kha pasalte tih dan tur a ni em ni?” Dini chuan a rawn ti a, ka beisei loh deuh thil thleng vang chuan a ngaihna hre lo zet hian ka ding a.

“Chutiang min hrilh tur khawp chuan tunge I nih?” Rinawmi chuan a ti pawr hlar a, boruak a dik dawn lo tih ka hrechiang ta.

“Haw phawt ang” tih pahin Rinawmi chu ka kai a, a tang nasa viau lehnghal, Lawmi chu ka mitmei a, min zui ve nghal dat dat. Motor ah ka thut luh tir a, a khur deuh dawt dawt chu ka hria.

“Tah hian ka lo chhuk ang, taxi in ka lo phei taw hang” Lawmi chuan kan veng kawn kan thlen chuan a ti a, an in thleng thlah duh viau mah ila Rinawmi ina hruai haw vat ka duh si a, a duh lo chung taxi fare ka pe a, kan haw tlang ta.

In kan thlen chuan motor ka dah lut fel a, Rinawmi erawh chu inchhungah a lut tlang nghal. Ka indah fel hnuah room lam ka pan ve a, a bag ah a thawmhnaw a lo thun mek.

“Enge I tih?” ka tih chuan a thiltih lai chu a dah a.

“Ka haw dawn” min melh khar a.

“Engvangin nge I haw ngawt anga” tiin a bulah chuan ka han thu a, min chhang lo. A kut chu ka vuan a, min nam sawn tumin tan a khawh ve tlat.

“Tha deuhin sawi ang, I lungawi lohna min hrilh la, ka insiamtha ang “ ka ti a. Ka ti tak tak, nupaah kan insiam tawh a, inthen leh mai mai hi ka duhzawng a ni lo.

“U Te, engati nge min neih kha I duh? A tirah pawh khan I duh si lo a” a ti ta a.

“Ka duh vang chein nei tur chea min tih khan rem ka ti, chuan tunah phei chuan ka hmangaih tawh che” ka ti a,  a chhing sawk.

“Ni lo, a ni lo. Ka haw duh” a mittui a tla ta zawih zawih a.

Zan khat vel va riak se a rilru pawh a pangngai leh maiin ka ring a, ka chelh talh duh lo. A nihna takah chuan kan pahnih inkarah hian buai chuar laklawh hi a awm a, kan chingfel thiam lo ni berin a lang. Inthen hlen hi ka ngaihtuahnaah a awm ngai lo hrim hrim bawk a, naktuk lamah ka hnathawh zawhah ka lam haw ang tih rilru ka pu ran. A luhlulzia ka hrechiang bawk a, a duh angin ka thlah pawh duh loin kan inhnuaia ka cousin chuan a thlah phei, an tlan liam thlengin ka thlir a, ka ruak huai.

Chawei laiin ka nu leh pa chu Rinawmi an ina riah tur thu ka hrilh a, lungawi loa riak tau a nih thu ka sawi lang duh lo.

“Naktukah dawr atanga I rawn haw pahin I rawn hruai haw dawn nia. Harsatna engemaw a awm a nih loh chuan nupa hi inriah bosan loh tur” ka pain a ti a, dik ka ti.

Rinawmi telloa muthilh chu a har ngei mai, zan tir atangin inah ka awm a, zan a rei duh si a, ka lo leng chhuak mai mai lo kha ka inchhir hnuhnawh ta khawp mai. Cigarette bawm khat zuk zawh a awl duh khawp mai, biak ka tum lahin a phone a switchoff tlat bawk si a, a duh ang takin han awm phawt mai rawh se.

Nilengin dawrah ka buai a, buai theia kan awm hian kan tan a hlawk a, hah erawh ka hah ve viau  thin. Dar 5 velah ka inchingfel thei ve chauh a, Rinawmi nu te in lam panin ka inkhalh chhuak ta a. Ka va thlen chuan a u fapa an thenawm lawk a mi a lo pua a, a nu in rawng a lo bawl mek a, midang ka hmu lo.

“E, Tea, lo lut rawh” ka pi chuan a lo ti a. Rinawmi chu kan thawmah pawh a lo hawi chhuak duh lo.

“Kan nu ka rawn hruai dawn a” ka tih chuan a ngawi ta deuh reng a.

“Ka haw tawh dawn lo a ti mauh mai a, engemaw in inkarah intihthiam lohna in nei em ni?” a ti ta a.

“Chutiang a awm ka hre miah lo, naktukah ka rawn hruai ang che tiin nimin tlai pawh khan ka rawn kal tir a nih kha” ka ti a.

Rinawmi chu a ko phei a, mi pawh melh duh loin a nu thutna lamah chuan a kal a.

“Hei, Tea’n a rawn hruai dawn che a nih hi, Bawihtea chu an inah va dah mai rawh” a ti a, Rinawmi erawh chuan, “Ka haw dawn lo ka tih kha” tih pahin a kalsawn leh nghal daih.

Beidawng zetin ka haw a, tih tur leh tih loh tur pawh ka hre lo. Zanin ngaichang leh phawt turin ka pi khan min ti ta kha ania, ka pa ngaihdan chu a ni lo viau in ka ring. Engpawhnise, tlawmah ka la thei lo phawt, naktukah ka kal leh ang.

Zanah Zara nen kan leng chhuak a, kan hriat miah loh hian nupuite hian kan nun hi min lo control sak tih a lang reng, haw huna awm lo tur hre ranin zu pawh ka in hnem, chu bakah ka lung hi a awi bik lo. Engvangin nge Rinawmi kha a lungawi loh? Ka zawt ka zawt chung pawhin a sawi duh miah lo a, sawi se chuan kan chingfel thei em em ang. Zu in lo hian ka awm thei lutuk tih pawh a hria, zu hi kan nupa buaina a ni lo tih pawh ka hrechiang, a nih chuan eng hi nge kan buaina ber chu ni ta ang? 

Chhun chawlh laiin a ei duhzawng kengin an in lam chu ka pan leh ta a, zanhnih ngawt amah vangin ka mu tha thei tawh loa, lo haw tawh se ka duh tak zet a ni. An kawt ka thlen chuan bike a lo ding a, ka hmu tawh tlatin ka hria. In chu a reh deuh thap a, an awm lo emaw ka ti lek lek. Kawngka a inkalh loh avangin ka lut ta tho a, sitting room a ka hmuhte pahnih vang chuan ka kang dawrh hian ka inhria. Rinawmi leh mipa(A hmaa rawn thlahtu, college a ka hmuh nawn leh ngei kha) chu an lo inthutchilh ran a, phone an lo bih dunin ka hria. Min hmuh chuan Rinawmi chu a tho nghal zawk a, mipa zawk erawh chu a  awm ngaiin a awm reng.

“Kha le” tih pahin a eitur ka ken chu ka pe a, chhuah leh tumin ka inher nghal.

“ U Te” inthlahrun hmel deuh tak hian min ko a, ka kal ta tho.

Min rawn zui zel a, biak chakna ka nei hlawl lo, ka thinlung a na em em bawk.

“I hmuh ang kha a ni lo ania” ati sep a, ka lo nui lui hak thung.

“I rawn haw duh loh chhan chu a chiang tawh mai alawm, tiraw?” ka ti a.

“Aih, chutiang a ni lo. I chunga ka lungawi loh vanga haw ka nia, Remfela nen inkungkaihna a nei lo” a ti a.

“Remfela” tiin ka phun sap a.

Ka inher vut a, sitting room lamah ka let leh a, Remfela chu ka va dinchilh a.

“Rinawmi hi I tan enge a nih?” ka va ti nghal tawp.

“Ka engkim” tiin min lo chhang.

“Tha deuhin I lo enkawl chhunzawm dawn nia” tiin an pahnih chuan ka nuih a, Rinawmi mittui a tling pam.

Ka chhuak chu min rawn zui a, ka thinlung hi a let but a ni ber, ka hmangaih em em a, mahse, a dinhmun laklawh vang mai maia min neih a nihzia a tilang tan ta. Tunah chuan a rualpui a duh ang angin a ngaizawng thei tawh ang chu.

“Engmah min zawt ve dawn lo em ni” beidawng zet hian a ti a.

“Nangmah ni loin a mipa zawk min chhanna khan engkim a tichiang alawm. I lo thei hle mai” tiin ngeiawm fe hian ka nui a.

“Thudik zawn chhuah tum miahloa I awmna hian a la inchhir tir ang che, mangtha” tiin a lut ta hmak. Ka hrilhhai letling zawk, ka nui lui ta ringawt a.

Thudik zawn chhuah te a tia, insawi thiam ngaihna pawh a hriat tawp loh kha. Ka va hmulo ang tih hlauhawm hian a! Amah ngaiin duh hle mah ila chapona ka la nei ve alawm, a ngaihzawng nei lai enkuala enliam mai mai tur zawngin ka thei lo. A duh angin han awm sela, a hlimna tur anih chuan a pawi lo e.

Zan ber hi hrehawm ka ti thin, karkhat lai nupui telloin hun ka hmang a, ka nu leh pa lah chuan koh an sawi reng bawk si. Keimah ber hi ka thiam loah an ngai vek hian ka thin a tirim. Mahse, thudik nia ka hriat hi ka sawi ngam lo, ka nupui a ni a, a hmingchhiat hi ka phal hauh lo. Ka chhungte chu min ngaichang phawt tura ka tih tlat avangin ka la khap thei hram a, hetiang erawh a ni reng lo ang.

Note: ka hman tawk hi a tawi thei tih ka hria, mahse, in hrethiam thin hian min ti lawm, a tawp thei tep tawh ania, sei tak tak ziah ka tum rih lo☺️