BIAKRINAWMI 6

Part 6

Rinawmi pawh karhnih zet chu an in lamah a awm ta, ka nu leh ka pa in ka thu lo in palai an lo va kaltir tawh a, a taksa nawm loh chhuanlamin la awm rih tawh se tiin a nu leh paten kan palai te chu an lo chhang a, kal nawn ngai ka ti rih lo. Dawr lamah ka buai bawk a, zanah ka thawh chhunzawm thin avangin ka chau a, in ka thlen hi chuan tui takin ka muhil ve thei zel. Pathlawi nih reng tumna ka nei lo a, mahse, kan pahnih ve ve hian hun thawl kan mamawh nia ka hriat avangin ka zar buai duh lo. Tin, ngaihzawng a neih tak tak hi ka ring miah lo bawk a, khatia an ina ka va kal tum pawh khan rinhleh viau ngaihna ka hre lo, a pasal ka nihna angin ka thikthu erawh ka tichhe ve thlawt.

“Naktuk zingah Rinawmi ten bungrua rawn lak an tum anih chu” ka farnu Teremi chu ka dawrah a rawn lut hlawl a, ka thiltih lai dah meuhin ka lo melh.

“Ekhai, chuti taka inthen a duhte chuan rawn la ngei ngei rawh se“ ka lo ti hmuk a, chutiang thleng thlenga kal a duh anih chuan chelh talh a ngaihna ka hre bik lo.

“Tea, chutiang tur a ni lo a nia, nupui hial nei tawh chu puitlin ve tur a nia” a ti a.

“Ka thiam chu ka ti miah loa, mahse, nilai zanah pawh khan palai an kal a nia, chuti taka min nei peih tawh lo chu chelh ka tum luih khan awmzia a nei hleinem” ka ti a, a ngawi roh roh.

“Engpawhnise, hmaichhanah sawi hrim hrim teh u” a ti a, ka lo aw liam vel ta mai mai.

Zanah ka haw tlai leh viau a, ka nu leh pa in min lo la nghak. An sawi tur awm ang chu hriain ka inhria.

“Naktuk zingah in nu ten bungrua an rawn la dawn  anih chu” ka nu chuan ngui deuh tak hian a ti a.

“Teremi’n min hrilh tawh alawm” ka ti a.

“A tha chu ka ti lo mange aw” ka pa vet hung.

“Inthen hi ka duh bik hleinem, mahse, amah zawkin min nei peih tawh loa, a chhuak a, chelh luih talh ka tum lo” ka lo ti ve mai.

“In pahnih tana insiamthatna tur te pawh a ni zawk turah ngai ila, in puitling lo dun lutuk a nih hi” ka nu chuan a ti leh a, a dik viau ang.

Ka mu chu ka muhil lo chiang kher mai, ka ngaihtuahna a vak kual thui ve khawp mai. Pathlawi ni mai tur dinhmunah ka ding a, ka duh ngai miah loh thil a nih avangin pumpelh dan pawh ka ngaihtuah ve, mahse, engmah ngaihtuah chhuah theih erawh ka nei si lo a. A pawi ber chu induh dan kan thiam lo a, kan duhzawng leh mizia pawh inzir chiang loa kan innei ringawt hi a ni berin ka hria. Ka duhna ringawt ka lo thlir lutuk a, chu chuan a tawpah hetiang hi min thlen a nih hi.

Rinawmi hmel dang deuh bail eh cher deuh kuam chu hmuh hrehawm ka ti, theihtawpin ka chhungten chelh tum mah se chhuah a tum ta miau si a, a mak dawn mange.

“Inthen hi nangma duh thu ngei a ni em?”

Room ah kan pahnih chauha kan awm fuh lai chuan ka zawt a, “Aw” tiin min chhang. A tawk e, a tawk lutuk e, ka tuar chhuak ve em em ang.

Ka room chu a thawl huau a, Rinawmi sulhnu pawh hmuh tur a awm ta lo. Ka hun kal zel dan tur ngaihtuah dan ka thiam lo a, ka hriat chian tak erawh chu ani kha ka hmangaih tak zet a ni tih hi. Dawr kal chakna pawh ka nei lo, nilengin ka room ah ka tawm a, kum khat vel ngawr ngawr kan innei ve hman a nih chu.

“Zanin chu chhuak ang” tiin Zara ka phone a, engmah ka la hrilh chian loh avangin Rinawmi ten bungrua an rawn la tih pawh a la hre ve lo ang. Ina ka awm reng zawngin ka hah zo dawn, chhuah harh ka mamawh.

Rammawia inah kan inhmukhawm a, kan thian dangte pawh an awm nual, Zara chu ka han kheuh hrang deuh a, thil awmzia ka hrilh chuan pawi a ti ve khawp mai.

“Thiana, nang tal hi chuan ka hnung rawn zui lo la ka duh asin maw le, engtia tih chi nge ni ang?” a ti a, pawi a ti ve tak zet tih ka hria.

“Hetah in lo awm daih a” Dini chu kan bulah a rawn phei a, a awm ve tih pawh ka hre lo.

“Thil pawimawh kan sawi a” ka lo ti nghut a, ka hmu hne ngawih ngawih.

“Pathlawi thar lam kan awm a ni lawm ni?” a ti lung lung lehnghal.

“I inrawlhna tur a ni chiah loin ka hria” ka tih chuan min rawn thutchilh a, a nui suk a, engemaw a hriat teh fo ni?

Midangho an rui deuh tawh nen a tawng ngaihven an awm lo a niang, tumah chuan min rawn bengkhawn lem lo.

“Kan kal phawt mai dawn mi?” Zara chuan a ti a, pawi ka ti lo nasa.

Kan chhuak tur chu Dini chuan min rawn zui leh ta hram a.

“Rammawia’n a lak belh leh chauh si a, haw hma ka duh ve deuh min thlah haw ru” a ti a, motor ah a lut nghal hmak, ka ner sawk a, ka mood nen chutiang thil tih ka chak lohzia chu hria se a tih ngam pawh ka ring lo.

“Khawi ka lo khalh mai ang” tiin Zara chuan chabi chu a la a, zial ka tan a, ka pak khu ta vak vak ringawt.

“Tea, I zial kha paih teh” Dini’n a tih chuan runluih ka chak tlat, a thar ka tan leh ngat a, ka pawi a sawi pawh ka hre hran lo, ka mil lo zual tlat. Kan nupa buainaah hian tel vena a nei tlata ka hriat vang pawh a ni maithei, amah nen khan hospital kawtah khan min hmu lo se Rinawmi nen kan inthen hi ka ring lo ve tawp a, ka ngaihdan mai mai a ni em tih phei chu ka hre lo. An in kawtah kan dah a, Zara in lam panin kan let leh nghal vang vang.

“Rinawmi bulah hian engemaw sawi a nei a ni lo maw?” Zara’n a tih chuan ka thil ngaihtuah lai mek a lo ni ve tho.

“Ka lo ngaihtuah ve mek tho a, mahse, engemaw sawi nei ta se Rinawmi chuan a sawi chhuah chu ka ring bawk si a, ka hrethiam tawh bik lo” ka ti a.

“Ho deuha nun I tum ringawt ange aw, inthen hlen tur in ni tihna a ni kher lo a, Rinawmi tan pawh tui awm loh deuh hian I lo nung ringawt ange” tiin min han zilh leh nghal zat a.

“A lo haw tawh lo ang” ka ti sap a. Hetia kan inthen takah hi chuan a lo let leh hi ka ring lo hrim hrim, tunah a nula tan dawn tak tak chauh a, bul a tan that leh duh ka ring zawk. Fa kan lo la nei lo bawk nen a rilru hi a nghet tak tak lo te pawh a ni ang. Kan nupa chungchang bikah chuan lungawi lohna tur a neih ka hre lo a, kan inpawh tih ka hria, mahse thildangah hian kan lo inpawh tawk lo te pawh a ni mahna.

Hun a liam a, thla hnih a ral leh chuan ka pangngai ve viau tawh. Engtik lai mahin theihnghilh lo mah ila zan mut ka harsat zual leh chaw ka ei theih loh pawh a zia ve sawt viau tawh a, dawr bungrua lain phai lamah ka kal bawk a, min chhawk ve nasa viau. Rinawmi ka hmu ngai loa, a chanchin pawh ka hre khat viau. Nimin lamah an result a chhuak tih ka hria a, a result en erawh chuan ka buai viau. Ka rin aiin a pass tha a, ka lo lawm ve veng veng. Pasal nei chungin tha takin a zirlai a zo thei a, kan inneih chhunga a tana ka tih that awm chhun pawh a ni maithei e.

Kan thianpa nau nupui neihnaah kan kal ve a, rin loh deuhin Rinawmi ka hmu a, min hmu ve pawhin ka hre lo. Remfela a tih kha a tel ve a, an inkawp tak tak pawh a lo ni maithei e. Joint reception an tan tep tawh a, haw mai tumin ka motor dahna ka pan a. Rammawia leh Zara’n min rawn umzui tih pawh ka lo hre lo, ka tum tawh lo chung chu min hruai let leh a, Rinawmi te hmuh leh kha ka huphurh vang a ni tih an hre si lo. Ka huphurh ber erawh a tel ve ta lo a ni ang, ka hmu tawh lo.

“U Te, Rinawmi luhai a tlu a, min lo pui thei angem?” Lawmi chuan kan thutna bul tukverh atangin min rawn ko a, ka tho nghal zawk. Rammawia leh Zara chuan min zui ve nghal.

Biak in sirah an lo kil laih a, Remfela kha ka hmu tawh lo, chu ringawt pawh chuan ka thaw ti veng huai. Rinawmi chu ka pawm lawp a, ka motor chhungah ka luhpui a, Lawmi chu chuang ve turin ka ti a, an thian dangte erawh chanchin kan hrilh leh ang che u tiin kan kalsan. Hospital hnai berah ka luhpui a, ka thlante chu a sa phat phat mai. Casualty ah kan luhpui a, an lo buaipui nghal char char a, pawnah dingin a chhungte chu ka bia a, ka thiante pahnih pawh chanchin hrilhin hospital kan thlen tawh thu te ka hrilh ve nghal. Zara’n min kalpui a tum viau na a, programme a la zawh loh avangin awm tlang turin ka ti ta kha a nia, Rinawmi a rawn harh hunah nuam lo a tih ka hlauh vang a ni.

‘Ward ah kan sawn phawt anga, test tih tur hrang hrang hi in lo ti dawn nia” tiin lehkha min pe a, a chhungte an lo thleng ve chiah bawk.

Thil thlen dan leh thil awmdante chu ka han hrilh chhawng zung zung a, ngaihtuah viau mah ila ka tan awm ve reng a nuam chiah si lo a, ka dinhmun chu a lai ru angreng.

“Tea, I lo awm hlauh chu ka lawm hle mai. Thil eng engemaw han sawipui che pawh ka duh viau a, ka la rawn bia ang che” ka pi chuan a ti a, lehkha pawimawh ho chu ka hlan chhawng a, ka kal ta.

Rinawmi hmel ka hmuh khan ka lung a awi thei lo, a cher riau a, thisen a neih tlem hmel hle a nih kha. Ka inthlak fel anga, ka kal leh ngei ang ti rilruin ka haw ta a. In ka thlen chuan ka inbual nghal a, ka chau ve vekin ka inhria. Ka phone ri lo tawp chiah ka hmuh chuan ka ban vat a, Rinawmi nu a lo ni. Ka call back dawn a, a la tlang mai thei lo lehnghal. Ka thawmhnaw ka ha sawk sawk a, hospital lam panin ka tlan chhuak leh nghal. Engemaw thleng a awm a nih ka ring a, ka thin lah chu a phu dup dup lehnghal. Ka va thlen phei hma deuhin Rinawmi te motor ka tawk a, ka ding chawt a.

“Kan in lamah rawn tlang ve mai rawh” Rinawmi pa chuan a ti a, ka inher a, ka umzui ve nghal.

Rinawmi chu drip an khai nghal a, an che chu ka lo en ve tawp ringawt. A che sek chu hmuh hrehawm ka lo ti viau, ka va pan a, ka insum thei tawh ngang lo a ni.

“Khawi lai nge na ?” tiin a lu chu ka chul a, mittui tling pamin min rawn melh.

“Tea, lo kal lawk teh” tiin ka pi chuan min rawn ko a, an room lamah kan inzui lut.

“Rinawmi chuan nau a lo pai a”

Ka thutna atangin ka tho nghal zawk, tu fa nge tih chiah ka rilruah a awm. Thlahnih kan inthenna atangin a liam tawh a, tunah a pai tan chauh a nih chuan ka fa a ni dawn si lo.

“I thutlukna kan nghak tawp mai a ni” a tih leh phei chuan awmngaihna ka hre lo.

“Ka pi, han sawi chiang vek law law teh” tiin ka lo tur hmanhmawh a.

“Thla thum a lo ni tawh a, engmah kan hre miah lo hi kan thiam loh a ni. Doctor in nau pai tlang hi a remti lo a, nau hi neih a duh luih tlat chuan aman a tuar dawn a ni tiin min hrilh a, keini chuan a rilru hi kan hneh dawn lo chiang tih kan inhria, I kutah a awm e” a ti a.

Ka mittui a tla tih pawh ka hre lo, rinhlelhna pakhatmah ka nei lo, ka fa ngei a pai tih ka ring a, ka hrechiangin ka hre bawk. Rinawmi room lamah ka lut a, a lo muhil mek. A bulah chuan ka thu a, a sam chu ka chul sak a, awmze nei loin kan inti na tawn vel mai mai tih hi a hma khan lo hria ni ila heti tak hian kan awm lo tur a ni a, engkim hi keima puitlin loh vang a ni. Rinawmi tan rintlak leh rin turin ka awm lo a, a rinchhan zawk hi naupang chhia ang maiin ka awm kual a, hrethiam a kan harsatna chingfel tura min beisei laiin a mah aia nep zawkin ka lo awm zel a, a beidawng tih ngaihna hre loin hetiang hian a thiam dan angin a awm ve ta a ni tih ka hrethiam ta.

Ka bungrua rawn thleng tur a awm avangin hma angreng takah dawr lam ka pan a, vawiin chu Rinawmi awmpui ka tum ran, a dinhmun a tha deuh tawh a, thu a sawipui theih tawhin ka ring. Ka nu leh pa pawh engkim ka hrilh tawh a, ka mawhphurhna a ni tih hriain ka duhdan min kalh an tum lo tih min hrilh. Rinawmi te in ka thlen chuan a thiante pawh an lo awm ve a, sitting room ah a lo thu chhuak peih a, ka lawm tawk em em.

“Enge I lo an a?” ka tih chuan min melh uluk viau, engahmah ka ngai duh chuang lo.

“Ka tha e” a ti zawi sap a, a bulah ka thu nghal.

Tih tur an neih chhuanlamin a thiante pawh an chhuak ta a, titi na hun kan nei ve thei tawh ang chu.

“Engatinge engmah min hrilh loh?” tiin bul ka han tan ringawt a, sawi chhuah dan ka thiam chiah loh vang a ni.

“Ka hrilh theih turin I awm ngai hleinem , I leng chhuak reng a, bialnu hluite nen party naah in kal vel a, hun min pe ngai em ni?” a ti ta a.

“Rinawm, ka tihtur ka tih loh zawng zawng leh ka tih ngei ngei tur ka tih loh ah min ngaidam rawh, khang hun kha siamthat theih loh mah se tun atang chuan hlim taka awm dun hi ka duh tawh a ni” ka ti a.

“In inkawp tawh lo em ni?” harsa tih hmel zet hian a rawn ti a, ka lo hawi hu ringawt.

“Tu nen nge kan inkawp anga?” ka tih chuan hnuai lam a bih ngar a, a heh a pet fan bawk.

“I bialnu hlui Dini tih kha, ka hre vek alawm” a ti ta.

Kei hian hriat loh ka lo nei a nih ngei dawn hi, engtin chiahin nge Dini nen chuan min lo rinhlelh tih ka hriat a pawimawh ta.

“Rinawm, kan inneih hnu hian vawikhat te pawh ka la pelhesan lo che, ka hmangaih em em che a, tihlan dan erawh ka lo thiam tawk lo ang tih ka ring. Mahse, Dini emaw, tu hnenah mah hian ka la rinawm lohsan ngai lo che” ka tit a a, a thaw halh a.

“Heng hi I hmuh hunah chuan I pha thei kher lo ang” tih pahin a phone a rawn lek chhuak a. Dini’n message a thawn zawng zawng chu ka hmu thei ta, a mak tih mai loh chu sawi tur ka hre lo.

*fa pawh I neihsak thei si loa, a neih reng peih che ring suh*

*ka hnenah bak chuan a hlim tak tak lo*

Tihte.. a tam mai, a birthday party a min kuah lai te, ka inrin loh laia min rawn fawh ringawt te kha, thlalak a lo nei vek a, Rinawmi a lo thawn vek bawk.

“A mak tih loh chu sawi vak tur ka hre lo, mahse, khatiang kha chu min hmuh ve tur che ania. Tinge thudik zawnchhuah I tum miah loh? Khang I message dawnte kha min hmuhin kan sawi fel thei lo em ni? “ ka ti a, ka thin chu a rim ve ngawih ngawih.

“Sawi pui che ka tum ngun ve viau asin, mahse, min hlat tlat a, kha khan thudik a ni ang tih min rin tir tlat si alawm” a ti a, a dik ve leh vek tho.

“I tan ka rinawmzia hi ka hmuhtir thei ang che, khang kha dawt vek a ni tih pawh” ka tih chuan ka ding hluai a, ka kutah a lo vuan vat a.

“U Te, keipawh ka thiam lo tak zet a ni, engmah sawi pui che tum loin ka thu dawn an g ang kha ka lo awih vek a, ka ringhlel bawk che a. Fa ka neihsak thei dawn lo che emaw tiin ka insit ngawih ngawih bawk nen engmah kha ka sawi ngam ngai lo a ni. Min then hun nghak khan hrehawm ti takin ka awm ve thin asin” a mittui a baw zawih a, ka kuah nghal vat a.

“Fa kan neih loh pawhin ka danglam chuang lo ang tiin ka hrilh che kha” ka ti a.

“Mahse, ka dinhmunah hian ding ve ta la, I ti ve tho maithei asin. Ka la puitlin lohzia ka hria, mahnia tuarah chuan a harsa ve em a ni” a ti a, ka khawngaih ngei mai.

“Naute aiin I pawimawh, chu chu I hria tiraw?” ka ti a, a mittui karah min rawn melh ve tawk tawk a. “Ka enkawl tawh ang che, I lo haw anga, engkim kan pahnihin kan hmachhawn taw hang” ka ti a.

“Ka duh lo, bungrua kan lo la tawh si a, ka tan a zahthlak emai” a ti ve a, ka lo nui huk.

“Bungraw lak te kha  a ngai mi, I luhlul lutuk vang a nih kha” ka tih chuan min nghawk sawk a.

“Nau ka pai tih ka hria a, min chhuhsak ka hlau a, I bialnu nena min neihsak daih kha ka hlau alawm” a tih chuan ka thin pawh a rim tawh lo, ka nuih a za tawh zawk.

A sawi hmangin amah a lo in test ve a, test kit ah chuan a positive a, a hmaa a in test in chutiang chiah chuan a awm tho a, a lo rai leh loh avangin a hlauthawngin min lo hrilh ngam lo a lo ni. Damdawiin kalpui ka tum pawh khan a hlauthawngin a thiannu a lo sawm zawk a lo ni a, phur takin min hrilh hlan nghakhlel em em in a lo awm ve a, kei lah chu Dini nen damdawiin kawtah min hmu leh ta mai kha a tuar thei ta lo a ni tih min hrilh.

“Dawr I kal hnu lawk khan Dini chuan message min lo thawn leh a, inhmuh intum thu leh engvanga kan in lama la haw lo nge ka nih tihte min rawn thawn a, chhiar pawh ka chhiar chhuak lo. Ka theihtawpin rin che ka tum ve a, mahse, tikhan ka hmu leh ta si cheu a, engmah ka ngaihtuah thei tawh lo, ka hmuh reng che chuan ka naupai hian a tuar ang tih ka hlau a, ka haw ta  anih kha” a ti a, a thusawi chhung zawngin ka lo insehruh a. Hmeichhe nasa leh zawktheilo tak ka lo tawng kha a pawi ka ti ngawih ngawih.


"Remfela ve thung kha?" ka tih chuan a ip chawih a, a nui rah rah a.

"Ani te chu ka cousin bialpa a nih kha, min khawngaih a, tiang khan a ti ve mai mai anih kha" a ti a, a lu ah na lo te in ka beng.

Inrunluih te kha kan boruak siam that nan a tha emaw kan tia, kan lo va mawl dun tak. Tunah chuan a liam tawh a, a thleng nawn tawh lo ang chu.

“Tun hnuah chuan harsatna kan la tawk fo ang, engkim hi nupa kan nih angin kan sawi tlang zel tawh tur a ni. Kha vanga kan tuarna kha kan theihnghilh tur a ni lo, inpawh takin engkim kan hmachhawn anga, hlim takin kan awm thei tawh ang” ka ti a.

Nupa nunah chuan thuruk a awm tur a ni lo, hriatfiah loh hrefiah turin kan sawi tlang fo tur a ni a, harsatna pawh a ruka tuar bik awm loin kan inhrilh anga, kan theih ang angin chinfel dun kan tum tur a lo ni. Keipawh ka ngaihsam luatah te, nupa awmzia ka hriat loh luatah te hei aia nasa kan lo tuar thelh a lo ni.

Khuma ka nupui leh ka fapa muhil chu ka thlir reng a, harsatna kan tawhte khan min tichak a, kan harhchhuah phah bawk. Ka nupui duhtak Biakrinawmi huaisenna leh tumruhna avangin nau pai tlang thei lo tura ngaih khan fapa duhawm tak min hrinsak a, chu ka fapa chuan chhungkaw hlim berah min siam ta si a.

--------------------------------x-----------------------------------x-----------------------------

note: hetiang short story hi ka ziah hman tawk a ni zel rih dawn a, a dang dah chhunzawm vat kan tum ang.