EUPHORIA 2

2

Unau zinga hmeichhe awmchhun, nuta ten an duat rawn ka ni ve a, chutiang bawk chuan Ruatdika pawhin min duat a, a thlazar hnuaiah khan ka him ve thin. Mahse, vawilehkhatah ka innghahna chu a chat a, mal tak leh khawhar takin ka awm ta. A nihna takah chuan lunglenna te, malna te hi ka hmelhriat vak lo, a chhan chu ka hriat theih chin ata tupawhin min duat a, ka rilru lah a no ve bawk. Ka tleirawl chhuah te chuan ngaihzawngte pawh nei lo chu ka ni bik lo a, mahse, tih tak zeta ka neih erawh chu Ruatdika hi a ni a, ka saerious bawk a, kan inthen pawh ka la na. Ka chhungte pawhin kan inthen tih chu an hre vek tawh, min khawngaih tih ka hre ve reng. Ka nutate pahnihin an hna avangin hmundangah an awm a, kan upa ber hian nupui nei tawhin kan inchung berah an indang tawh bawk. Ka nutate pahnih hmun danga awmte chuan mi an rawn ngaihtuah viau mai, an farnu duat kha ka ni ve miau a.

“Bawihi, kan tawrh hnu vek anih kha aw, nat kha zak miah suh, a hunah chuan I dam ve vek mai ang” tia min hnemna chu ka chak pui ber.

Engang pawhin I rilru tina duh suh inti thin mah ila a hunlai chuan tawrh dam dan a awm tak tak lo, hun hian kan thinlung hliam chu a dam puiin a liampui ve mai a ni tiin min fuih nasa a, keipawhin chu hun chu a lo thleng ve ngeiin ka ring. A  dik zawk leh rinawm zawk ka ni a, ka tawrh hi na mah se a hlim zawk ka la ni tho ang tih ka ring tlat a, min tina ngawih ngawihtute avanga beidawnga indawmkun mai hi ka tum bik lo.

Chhungkaw hausa leh ropui tak kan ni lo a, ka pa hian huan zau tak mai neiin enkawl hi a kutah a awm tawp a, ka nu hi middle school zirtrtu a ni thung. Kan upa ber hi police a ni a, ka u te pahnih erawh chu hna nghet tak pawh an la nei bik lo, contract in an thawk ve ve rih a, ka zir chhung zawng khan hneh takin min chawm theih phah a, ka vannei phah hle. Anni zir hun lai erawh kha chu kan chhungkaw khawsak a phet ve deuh lai, ka pa huan siam tirh te anih avangin ka nu hlawh ringawt kha kan ring thin a, a upa pahnih phei hi chu inhlawh chawpa zir chhuak an ni a tih theih hial ang. U Tetea nen erawh kan vannei ve ta thung a, retheih lutuk hre loin kan zirlai kan zir zo vet hung. Chutiang chhungkua chu kan ni a, ka pa hi taima rumrut, hlawhtlin tum tlat, eng hna pawh thawk se dinchhuahpui nana hman tum a ni a, tunah chuan a tumna pawh hlawhtling ve zelin kan huan atang hian in tha tawk tak sa tawhin motor pawh a duh zawng ang apiang chu a lei ve thei ta zel. Chumi anih avanga duh duha khawsa thei, lungkham nei miah lo erawh kan ni lo thung. Kan thawhchhuah hmanga kan nawm theih nan min hrual nasa a, ka u ten a hlawkna an hmu tih ka mit ngeiin ka hmu. Keimah bawk hi a naupang ber leh hmeichhe awmchhun tih takah ka u te a hrual ang em em chuan min ti ve lo a, puitlin tawk lohna tam tak pawh ka neih phah in a lang.

Hun a kal ve zel a, bank-a thawk tih takah kan hunawl hi a tam lo thin khawp mai. Ka tan erawh a tha thlawt, mahni inngaihtuah ngut ngut hun ka nei lo a, in ka thlen hi chuan ka chau lutuk hi ka mu tawp tawh zel. Hetih lai chuan Ruatdika leh Thanmawii pawh fb lam thlengin an lo che nasa hle a, relationship status ah pawh an lo in engage kuau a ni awm e. Hyderabad lama kan thianten group ah an rawn kap sap sap a, chu thil ka hmuh zet chuan ka mualpho lek lek, ka thinlung a dam ve hle tawha ka hriat kha a lo la dam lo tawp a lo ni. Whatsapp group pawh leave ka tum hial a, mahse, anni pahnih vang mai mai a chutia awm erawh ka duh leh bik lo, inthlahrunna an nei miah lo anih chuan engvang maha inthlahrun chu ka tum bik lo.

“Tun Saturday chu holiday a ni bawk a, chhuah harh I mamawh riau, kan huanah lo kal ve rawh”Mimiin a tih chuan pawi ka tih loh zawng tak a ni. Kan huana kalpuia sawm ka lo tum mah zawk a, ruahmanna a neih chu ka pawmpui ta zawk.

Miimi te huan kan huan ang ni turah ka lo ngai a, a lo ni hauh lo. Picnic spot a ni mah, an ruahman ang erawh chuan an la siam puitling lo a ni ang, hmachhawp an la nei tih a lang reng.

“Ka u boral ta hriatreng nana kan siam a nia, a nih dan tur ang a la ni lo lutuk a, thian dangte pawh ka la hrilh duh lo a nih kha. I boruak tawn ka ngaihtuah hian I ipik dawn hian ka hre lutuk a, ka hruai tawp che a nih hi” a ti a, ani hi ka thawhpuiteah pawh ka kawmngeih ber, ka rin ngam ber ni bawk a ni.

“Awi, a nuam e, a nih dan tur anga a awm hunah phei chuan a pui dawn lutuk” ka ti a, engkim mai chu a nuam a ni tawp. Swimming pool kotlangah kan thu a, kan ke chu kan chiah dai a, hnathawk an awm reng bawk.

“Ka u chu lo boral lo se chuan ka tihpui chiang ngawt ang che, duh lo mah la ka duh luih tir ang che maw le” a ti a, a nui hek hek a.

“I u zawk chuan min lo duh lo maithei asin” ka ti ve a.

“In nih hma chuan ka bei nasa ngawt ang” a ti a, a nui leh hak a. “Ka u kha chu ka ngai thin asin aw, min duatin min tihlim peih sia maw” a chawl dat a.

“Engvanga thi nge a nih?” a tih chuan min rawn melh zawk a, “ A leng haw tlangval rui awmkhawmin an lo sawisa ringawt a, nikhat damdawiin kan awm hman tihin a boral” a ti chuai raih a.

Ka unaute chanah ka han dah a, ka lainat ngawih ngawih. 

“Tuna ka nu hi ka nu tak a ni lo a, ka pianpui unau chu ka u chiah kha a nia, tuna ka nuhrawn sawn fa pahnih a nei a, ka u awm loh hnu hi chuan ka mal thei lutuk” a tih chuan a thuruk ber min hrilh ve tih ka hria. “Ka nu hi ka naupanlai hian a uire hlauh mai a, a uire na pa nen chuan an tlan ta daih nghe nghe a. Kum thum chhung chu ka pa hoin kan cheng ve a, a kum thumnaah tak tuna ka nuhrawn hi ka pa in a nei ta a. A tirah chuan min duatin min ngaihsak ve khawp mai. Mahse, fate an han nei chiah a, a mizia tak tak a lo lang a, min michuang en ve ta mai mai a. Ka pa hi a fing em a, phaiah min dah ta daih a, ka inzir chhuah ve phah ta a nih hi” a tih chuan ka lo khawngaih tawp.

“Mim, I nun hi a hlim hmel tho sia, I van awhawm tak”ka ti ta hial a.

“Min lawm lo tute avang emaw, min hmangaih miah lo tute avanga intih nat leh intih hreahawm hi ka tum lo a, chuvangin ka nun hi hlim taka hman ka tum a ni tawp. Chu chuan min tinat chaktute rilru a tina a, phuba lak dan tha ber a ni bawk” atih chuan a harh chhuak ve hlawl.

Ni e, ka thiannu thusawi hi a dik tih ka hria, a taka hman harsa nghal mah se tlem tetein a zawm theih lai zawm ka tum ve tur a ni. Mimi chu ka ngaisang zual sauh bawk, a tawrhna ka ngaihtuahin ti khawpa a strong thei hi a fakawm ka ti a, hrehawmna hre lo lekin ka seilian a, hetiang hunah hian ka nu leh pa ten min lo enkawl nem lutuk hi a pawi tih ka hrethiam ve ta. Min duatna leh min hmangaih vang chu a ni meuh ma, mahse, kan puitlin loh phah tih keimahah hian a lang a, ka thiannu hi a tha lama entawn a hma lam pan chu ka tum nghet ta hle.

“I tha maw?”tia min zawttu chu ka en ha a, a nui deuh sang a, laon rawn diltu kha tiin ka ngaihtuahnaah a rawn lang ve nghal mai.

“Aw, ka tha e, nang zawk?”tiin ka han nuih let a.

“Keipawh ka tha e, inzarah ka hna pawh ka tan thei tawh a, ka lawm tak tak a ni”a ti leh a. Kan inhmuhna hmun hi kan venga ka thiannu Remtei dawrah a ni a, ka office kal tur ka peng kawi lawk a ni.

“A lawmawm hle mai, lo hlawhtlinpui ngei rawh” ka han ti ve a. Ka rilruah Mimi a lo lang, hmanni khan a star thu a sawi zauh a, sawi chhunzawm em em lo mah se  a duhzawng tak a nih ka ring mai. A palian ve khawp mai a, a hmuihmul vel a zuah ve deuh hlek vang nge ka hre lo a, a lang upa ve deuh. 

“I star kha ka rawn score sak che ania” office ka thlen veleh Mimi hnenah ka ti a, a rawn ngaihven nghal danah a star ve hle a ni ang.

“Awi, engtinnge a nih theih? Ka hmu ve chak asin” a ti chul a.

“A polite tawp a, min lo bia a, a hming ka hre bawk si lo a” ka tih chuan a hmui a’n hup ngeiah.

“Malsawmzuala ngat, a mawi asin” tih pahin coffee thli turin a tho chhuak nghal zat a, nuih var var pahin ka kal sawn ve ta a.

Nilenga min dawrtu hrang hrang kan hmachhawn hnua mahni in kan thlen chuan chhungte mah ni se tawng vak hi a peihawm tawh thin loh a, mahse, ka pa huat zawng tak a nih avangin ka inzir ve nasa. Ka pa hi hnathawk nasa lutuk thin a ni a, ina a rawn haw reng rengin hlim hmel tak puin a fate min la chhaih peih thin. Engtikah mah tluk ve ngai dawn lo mah ila tlem tal chu entawn ve hram hram ka tum. 

Ka phone riah chuan ka phu deuh zawk a, chaweikhama ka mu kha ka lo muhil daih chu niin, ka thawmhnaw pawh ka lo la inthlak fel lo. Ka phone chu ka han ban a,Mimi a lo ni.

“U Rin, ka rilru a na tawp” a rawn ti a, a nui tho bawk sia, ka hrilhhai zawk.

“Enge ni ta? I nu a sual mi?” ka ti ringawt a.

“Ka nu a sual ngam I ring mi? I mawl emai” a ti a, a nui vak vak a, ka thophang bawk nen ka ni deuh nuai.

“Ka lo muhil a, ka harh fim lo tawp” ka han ti a.

“Ka star kha I hria em? Sawmzuala kha? I number min dil anih chu, awi, engtia awm thei nge mihringah ?” nui uar uar chungin a rawn ti ta a.

“Engati nge a dil che a?”

“A be chak che niang chu”

“A awihawm loh emai”

“Ania min dil reng hi”

“Khawnge in inhmuh a?”

“IG ah ka va follow chhuai chhuai alawm. Awi, thla khat vel chu a ni tawh ang, nizanah min lo follow ve ta nih chu, ka lawm ve em em a. Zaninah min rawn dm a, I number min dil ta ziai ziai nih chu, ka rilru natzia chu” a nui khek tuar tuar a, ka lo nui ve suk suk mai.

“Ka chhe lo em alawm” tiin ka lo fiam a.

“Nia, miss hi chu ka la tluk lo deuh che anih hi, I number ka pe ka ning, bye”tih pahin phone a dah ta daih a, ka nui suk suk ringawt. Mimi chan ang deuh hi high school kan kal laiin ka chang tawh a, chumi hrechhuak chuan ka nuih aza tlat. Ka star em em khan ka thiannu zawk kha a lo star tlat a, ka thiannuin min hmaizah si, chhang ngam lo boruak velte kha a hlimawm.