EUPHORIA 3

3

 “A rawn be tawh che em?” lunch tura kan chhuak chu Mimii’n min be ru sur sur a, ka lu ka lo thing mai a. “Awi, a zak leh si a niang a” a ti zui nang nang a.

“A chhuanlam ve mai mai aniang, ka number dil chhan tur che kha a nei lo aw” ka han ti a, a mitko a san zauh a.

Ka lo ngaihven em em lo bawk nen ka number a dil chungchang pawh ka lo hre tawh lo, kar khat a liam tep tihin Mimi hian min zawt ta a, ka rin dan ang chiahin min be lo. Min biak chhan tur kha ka hre lo ve em a, Mimi biak chhuanlamah a duh vang a ni ang. 

Ka u te pahnih an rawn haw rual thei hlauh a, rei tak kan inhmuhkhawm tawh loh hnuah kan hna inhmukhawm leh chu a hlimawm ve lutuk. U Mama te chhungkua nen chaw kan eikhawm a, ka vahpa a kal thei tan chiah bawk nen kan ri ve dar dar mai. Chaw kan eikham fel hnu chuan ka room ah ka lut a, ka chhungte erawh chu sitting room ah an la inkawmkhawm. Kei erawh chuan hna chinfel lawk tur ka neih avangin ka room ah ka luhsan ta a, ka u te an awm kim phei hi chuan ka hlim ve veng veng zel. Nupui fanau neia an awm kim hunah chuan tun ang reng hi a ni thei dawn lo tihte chu ka ngaihtuah ve fo thin a, min hmangaih loh vang ni miah loin kei aia an nupui fanaute an ngaihsak a ngaih hun a la thleng dawn tih ka hria, chung hun chu ka huphurh ber thin.

Ka mut dawnah ka phone chu ka han ban ve a, Mimii miscall a lo tam hle. Rang zet hian ka call back a, a pickup mai thei lo lehnghal. A tawpah a rawn la ve ta hram a, a muhil lai ka tiharh hial zawk emawni!

“Min lo call tih ka hre miah lo a” ka tih chuan a thaw hak a.

“U Rin, zanin chiah in inah ka lo riak thei angem? “a rawn tih chuan a tah a chhuah hmel tak zet.

Kan kawtah chuan ka vei chhen a, Mimii min rawn biakna kha a rei deuh tawh, scooty a rawn kal a tum avangin inah ka lo nghak tawp a, a rawn thlen lawk loh avang chuan ka buai vek tawh. Zanlai a ni tawh a, tun ang huna hmeichhia kan veng lama rawn kal tur chu a ruk tak chuan ka ngaihtuah a, U Tetea ka lo sawm mai lo chu ka inchhir tawh. Chutia rilru hah taka ka awm lai chuan kan kawtah a rawn tlan lut ta hlawl a, ka thawl nghal huai. 

“Lut nghal phawt ang” tiin a inhun fel chuan ka hruai lut a, ka chhungte pawh an reh vek tawh. Ka roomah kan lut chho nghal a, a mit a bui deuh luk a, a tap nasa a nih ka ring.

“I inthlak duh em?” ka tih chuan a lu a thing a, ka khumah chuan a thu a, khum bula chair ah ka thu thung.

“Rawn tihbuai loh hram che ka duh viau na a, kalna tur dang ka hre chuang si lo a, min hrethiam dawn nia” a ti sep a.

‘Inthlahrunna tur a awm lo ania aw, kan pahnih inkarah chuan engmah venthawn tur a awm lo ania” ka ti a, a nui lui sak a.

“Ka nuhrawnin hetiang em ema thui thil a lo kalpui hi ka ring ngai lo a, ka pa bumin engkim ama hmingin a lo kal tir vek a. Ka u hminga kan huan awm pawh kha a fapa hmigin a dah tir vek a, zaninah ka hrechhuak a, kan buai ta nuai nuai mai a nih hi” a ti a, a rilru chu a hah hmel tak zet.

“I pa in a hria em?”

“A then chu a hre ve a, a hriat loh pawh awm aniang. A tawpah chuan ka rindan ang chiahin a neih a laksak vek dawn anih hi. Thildang chu duh leh nei vek se pawi ka ti lo, ka u huan ber saw chu ka ngaithiam thei lo a ni” a ti a, a mittui chu a tla ngiai a, ka lainat kher mai.

“Zingah I pa pawhin rilru leh ngaihtuahna thar a hmang thei turah ngai ang, zanin chu hahdam taka awm tum phawt rawh aw” ka ti a, min hnial lem lo.

A muhil lai chu ka en reng a, chhungkuaa buaina neuh neuh nei reng chunga mi zawng zawng tana hlim hmel a pu thei reng hi a miziaa ropui ka tih deuh chu a ni.  A dinhmunah ding ve tai la, hetiang hian ka awm theih ka ring lo.

Zinga ka harh chuan Mimii a lo awm tawh lo, ka tho nghal vat a, ka chhungte nen an la innel vak loh avangin hrehawm a tih ka hlau. Room atanga ka chhuah chuan chokaa a tawng lang lang ri chu ka hria a, ka nui suk. Khawi hmunah mah hian a ngaihtuahawm loh a nih hi ka ti rilru neuh neuh a.

"Good morning, i mu hmelchhe ve sia maw" a lo ti leh nghal zat, nizana a rilru hahna kha khawnge an awm tak pawh ka hrethiam lo.

"Morning. I tawng ring lutuk a min tiharh vek" ka tih chuan a duho lo teh e.

Bathroom ah ka lut a, ka va chhuah leh chuan ka nu nen zawi deuh hlekin an lo titi. U Tetea a rawn tho chhuak ve a, a hriat ngai pawh ni lo a rawn hmu chu a phawk deuh hru. Mimii a tawng tawp chawt a, U Tetea nen chuan an inmelh run mai. Ka lo melh tawn chhen a, hetiang ang em ema kan Mimii zam hmel hi ka la hmu miah lo. U Tetea bathroom ah a lut a, a la en zui hram.

"U Rin, ka thi char char. Ka haw dawn" ka beng bulah a rawn ti sar sar a, tawngkam hi a nei mak sak thei.

"Hetatang office i kal dawn kha, chaw pawh ka nu in a thlak kep leh vek tawh ang che" ka nu hriat phak chuan ka han ti a.

"Ni e, ka thlak kep vek tawh che" ka nuin a rawn ti ve bawk a.

Ka  chawei boruak chu a chik lo tan chuan pangngai ang deuhin a awm a, mahse, ka lo chik ve bawk a, Mimii leh U Tetea an normal lo tluan thak. Hemite pahnih hian zep an nei chiang lutuk, ka la hre chhuak tho ang.

Office kan thlen phat atangin kan buai nghal a, Mimii phei chu buai tak a ni. Customer kan ngah ni ber a la ni zui, dawp tur ka nei asin maw le. Lunch ei tur pawhin kan chhuak rual thei lo, a awl ve dawn chauha customer an rawn kal leh nghal zel a. Ka lunch san ta ringawt. Thil ei pah chuan IG ah ka han lut a, request a lo awm va va. Ka account ka dah private avangin request chu ka han bih a, Sasmzuala niin. Ka confirm hmain a account ah chuan ka han lut a, thlalak pawh a awm tam lo. Ka confirm a, ka follow back chuang lo. Ka thil ei zawh meuh chuan ka lo theihnghilh leh hman tawh.

 Tlai ka haw dawn chuan Mimii pawh a lo thu thluang duai tawh. A sam a pawr phang a, vawiin chu a chau ve viau ang.

"Engtinnge i awm dawn?" Tiin ka va zawt a.

"Ka va haw ve ange, ka awm loh chuan nuam ti deuh a lo awm leh ang" tiin a hmel a ner nang a, a nuhrawn a sawina tih ka hria.

"Ka u nen khan in inhria" ka han ti tawl a, a hawi kual hruk hruk a.

"Awi, khawvel zim si zia hi. Unau in nih hi rin ngaihna pawh ka lo hre lo a" a ti a.

"Chuan?"

"Ka la hrilh ang che, min ngei miah lo la" a nui hak a.

Office kawt atangin kan inthen ta, ka u ka zawt ang nge amah Mimii sawi hun ka nghak ang tih ka ngaihtuah pah ta neuh neuh a. 

------------xxxxxxxx------------xxxxxxxx----------

Ka hna thilah Saikhamakawn lamah ka nileng hun ka hmang ral deuh thak. Ka haw dawn meuh chuan dar 4 a lo pel tawh, ka scooty chu ka han kick leh chawt chawt a, U Mama ta hlui ka hman a nih vang hian a chiang lo ve ta zeuh zeuh. Ka pa in a thar lei tura min tihlai a ni a, pawisa indaih ka la intih chiah loh vangin ka la lei lo. Ngaizel ka thleng phei a, ka scooty a thi ngut. Mi an tam lutuk lo a, an rawn tlan ve pheuh pheuh. Kawngsirah ka han stand tha a, ka han kick ta tlauh tlauh a, nun a tum ta der lo. Ka thlante chu a tla hluam tawh a, thlasik khua tih takah a vawh tehreng nen ka taksa chu a sa chhuak vek tawh. 

"Puih i ngai em?" Tih riah chuan ka hawi chhuak a, taxi atangin a khalhtu a rawn chhuak nghal. Kan inhmu chu kan nui tawp, Sawmzuala kha a lo nia.

"Kan va inhmu hla teh daih ve" a ti zui sap a.

"A nung thei miah lo a" tiin ka scooty chu ka han kawk a. A rawn dinchilh nghal a, a palian roh sia, a rinawm nghal tawp. A han kick ve nghal a, mahse, vawihnih bak a kick lo. A tanky a hawng a, a nui ta suk a.

"Petrol awm lo chuan a nung har dawn e" a rawn ti a, ka zak ru chem chem.

A metre a chhiat tawh avangin engmah a lang thei si loa, kartin thawhtanniah ka thun ziah a, tunkar erawh ka lo theihnghilh let der a ni.

"Tikhan lo awm la, ka va la lawk ange aw" tiin hmanhmawh tak hian a tlan chhuak nghal a. Ka thaw chhuak ham ham. 

Rei vak lo hnuah a rawn let leh a, bur ah petrol chu dahin a rawn lek chhuak a, a thun ta nghal mawlh mawlh a. A thun zawh chuan rei vak lo han nghak lehin a kick ta a, a nung ta hlarh hlarh mai.

"Ti hi chuan in i thleng ngei tawh ang" a ti a, chiang zet hian min melh a.

"Ka va lawm tak, awm lo la chuan ka buai dawn emai. Engzatman nge petrol kha?' Ka ti a.

"Engzatmah ni lo e, tikhan him takin haw la a tawk" a ti tlat.

"Chutiang ringawt te chu a chi loh, kha" tih pahin pawisa ka phawrh a.

"Loan awlsam takin ka hmuh kha, lawmthu ka sawinaah ngai mai rawh" a ti leh tlat. 

"Sawi ngaihna pawh ka hre lo, ka lawm lutuk" ka ti a, a khi suk.

Ka inbual zawh chuan dressing table hmaah ka thu a, vawiin lama ka taksa na thum pawh ka inbual zawh chuan a zia ta hawk. Ka phone chu banin whatsapp message chu ka han hawng a.

*I thleng tluang em ang chu maw?*

Dp chu ka han en vat a, Sawmzuala a lo ni.

Chhang let loin a number chu ka han save a, ka call ta a. Ka call chu a ring vak lo a ni maithei, a tawng bah ve nawk.

"Message type hi ka peih vak lo a, ka lo call mai che. I zarah tluang takin ka thleng e" ka han ti a. "Vawiin ni ber khera khalamah i lo kal hlauh chu a lawmawm" ka tih zawm a.

"Ka huan atanga ka rawn haw lam a nia, vawiin chu ka haw hma tlai a nih hlauh a" a tih chuan engemaw ti tak hian ka ngui nghal. 

Thianhoin duhthu kan sam reng reng hian kuthnathawk hi tuman kan thlang ngai lo. Sorkar hna emaw, sumdawnna liam khawih hi kan thlang tlangpui, Ruatdika nupui tur anga zan tin suangtuahna hmang thin tan chuan kuthnathawk chu a ho mah mah a ni maithei. 

"Hmuh a chakawm hle mai" a mawihnaiah erawh ka ti a, ka tawng te chu a tui lo zo vek.

A dp chu ka han en leh a, a hmel ka lo chik ngai loh chu ka han belchiang vel a, s hmel a chhe lo. A pa tawp kan tih ang chi, lian tha bawk si, hmel hmai fang chhe lo zet a ni. Ka han hui pap a, khumah chuan ka bawk a. 

"Engati nge hna dang te i zawn zawk loh le" ka ti sap a.

Note: Ka blog hi a buai leh deuh tlat mai, Ads a lang thei leh tawh lo maithei. Lawmman ka la thei ve tep tawh a, a rawn buai leh chat a, phurna hi a tlahniam ve thin. In comments hian min la kaltir ve thei chauh zawk a ni