EUPHORIA 4

4

Ka inbual zo ka room a ka luh chuan U Tetea chu ka khumah a lo thu run a, uluk fe hian min lo thlek a.

“Enge?” ka ti vin hlar a, a nui ta suk a.

“Engvak mah” tih pahin a tho a, sawi duh a nei tih ka hre ve reng.

“I sawi duh chu sawi mai mai teh” tih pahin ka sam chu ka hru hul mawlh mawlh a.

“Mimii kha hmana ka sawi thin kha  a ni tih I hria em? Tluangpuii ka tih thin kha” a tih chuan ka towel chuan ka lu chu ka tuam a, U Tetea chu ka en nghal a.

“Tluangpuii kha maw?” ka ti leh hu a, a lo bu nghat a.

“Avan mak em em! Engtin nge in inhmuh leh khan pangngai deuha in awm theih a? “ ka ti a.

“Kan pangngai leh ngai loh I hria emaw ni le, ngawt che hian” a ti a, ka lo ner nang.

“Engtinnge I awm?” tiin a bulah chuan ka thu ve nghal a.

“Ka hua a, ka haw hleithei si lo a, chutiang vel chu” a tho a, a kawng chu dawmin a han hui deuh pap a.

“I la hmangaih reng a nih chu” ka ti a, min rawn melh hrawk.

“Phuba ka la lo hi lawm mai teh se” tih pahin a chhuak nghal hmak.

Ka ngaihtuah zui neuh neuh a, khawvel hi a lo zim tak zet a nih dawn nih hi. Tluangpuii, chu hming chu kan chhungkuaah hian a mikhual lohzia ka hre ve. Phaia lehkhazira ka awm lai a nih avangin amah nen erawh kan inhmu ta lo kha ania, a thlalak ka hmuh thin kha amah hi tih engtin nge ka hriat loh theih zawk? Ni lo, Mimii ka tawn hmasak ber khan ka hriat tawh hnu ang ka ti anih kha, an pahnih chanchin hi ziah tham a awm, hmangaihna kawng an zawh ah khan an tawrh hnem ngaihtuahin a tawp an khar dan erawh heti hi a ni a, ka khawngaih dun theihzia mawlh kha.

Ka phone en mai nachang pawh ka lo hre lo, ka mut dawnah ka en ve chiah a, Mimii message a lo awm bal a.

*U Rin, hmangaihna in a hliam tawhte hi an dam kim vek bik angem le?*

Mimii hi kei aiin kumhnihin a naupang a, kei aiin kum chanve in a thawk hmasa thung. Ka thawh tirha min kawm tlangnel hmasa bertu leh min u entu a nih avang hian ka ngaina em em a, a hlim theih em avang hian harsatna tawk thei turah ka ngai lo. Mahse, a nih bik lohzia chu an chhungkaw chungchangah pawh khan a chiang awm e. U Tetea pawh hian thinlung takin an la hmangaih reng tih ka hria, an inkar siamthat hi ka tihtur dik tak niin ka hria.

Whatsapp message dang rawn thleng chu ka en leh a, Sawmzuala ve thung.

*vawiin tlai ka haw chu ka hmuhna ah che khan hmuh leh che inbeiseiin a ding reng a*smiley intlar phei deuh tuarh a.

*min hmuh leh pawhin khatiang mai mai chuan min hmu tawh lo ang”tiin ka han fiam ve a, a bula awma ka hahdam em em kha a mak ka ti. A hmel hlim sarh reng mai khan hahdamna tam tak a pai a ni ngei ang.

Zan tin chu ni lo mah se min rawn biak zeuh zeuh a ching a, over si lo hian min biak dan tawk a thiam. Mipa hman lutuk hi ka duhzawng an ni lo a, chutiang bawkin in la zei leh ti huam hian min hip ngai hek lo. Sawmzuala hian chung chu a hria emaw tih tur hian amah ka theihnghilh loh tur si hian min hnaih a, chu chuan reiloteah amah hriatchiantir min ti chak. Chhunah kan buai ve ve a, zan hi kan hunawl neih chu a ni mai a, chutiangah pawh a nazawnga min be lo te chu ka duh khawp lo tial tial tih ka hre ru reng. Mahse, hmeichhia ka ni ve a, duhthusam nei ve tho ka ni bawk. Amah hnaih ka chak apiangin a eizawnnana a thlan hian min tihnual leh thin. Ka pa hnathawh ang a nih avang hian ka hmusit hauh lo a, mahse, ka pa hahzia leh thawhrimzia ka ngaihtuah chhuah apiangin hetianga awm ngai lo tura lehkha zir kha ka tum tang tang thin. Chutiang anih laia ka pa ang maia kut hnathawh a thlang hi hriatthiam har ka ti deuh niin ka hria. Ka nuin a tir lama dodal thinte kha ka hrethiam ve ta rum rum mai. Chutianga duh va thlan sak tur erawh chuan engmah ka ni lo tih ka inhrechiang si.

“Nizan chu kan thenawmah kuhva ka lei a, Sawmzuala ka hmu nawlh a, an nula kha arawn rim ve deuh emawni “ lunch kan ei laiin Mimii chuan min hrilh a. Engtin emaw tak hian ka awm.

Zanah a reh leh ta vang vang mai, zan thum vel chu min rawn be tawh lo, IG ah ka stalk du du a, ka awmdan hi a mak angreng. Ka hriatchian pawh ni lo laka hetianga ka awm hi a awmzia ka hre vak lo.

*Ramthar nula rim leh em?” smiley chu ka han dah ve a, min la chhang har em em zui. Ka message chu delete leh daih mai ka duh, chu em chu ka duh loh ber thil a ni bawk si.

*Rim nang, ka rawn rim dawn che* 

Darkar chanve vel hnuah min rawn chhang, min chhan dan chu ka duhkhawp lo leh khawp a, ve ngawt hian!

*ngai lo mai se* tih ka thawn.

Min rawn call a, a rawn nui nasa mai, ka phone pickup turte kha ka khur vel maw le, a va nikhua loh theih tak.

“Ka nutei inah ka leng tih engtin nge I hriat a?” tiin min zawt a, ka zak lutuk. A nutei te inah a leng a nih chu, awi, ti kha chuan ka rilru a hre vek ang.

“Mimii nen kan titi naah a sawi che a, a lo hre ve tawh tho che sia, a rawn sawi mai mai” ka ti a, a nui leh hak.

“I thiannu kha min lo biak la” enghelh nei lo zet hian a ti a.

“Aw, tehreng mai” uar thei ang ber hian ka ti a, a nui leh hak hak.

“Tak takin, ka hmalakna hmasa ber min enpui turin ka duh cheu a, Mimii nen khan. Ka tan theihtawp in chhuah a, in hmuh chuan in hlim ve ka ring” a tih chuan a ruk taka ka chak em em thil a ni.

“Nia, hunawl hi kan nei lo thei lo lutuk a, forth saturday lamah kan tum dawn nia” tiin ka thlah ta a.

Hun chu kal chak lo riau hian ka han hre nghal phat a, ka a zo tawh aniang. Mimii bulah pawh chuan pehhel ang reng takin ka sawi a, kan inbia tih chu a rin tho ka ring. Ka hrilh chiah loh avangin min zawh dilchhut erawh a duh bik lo. Ka u nen an inkara thil thleng pawh sawi dunna hun tha kan la nei lo.

Zirtawp zanah Mimii a lo riak a, “U Tetea pawh a hnathawhna hmun lamah a haw leh tawh. Sawmzuala huana kal kan tum avang leh sawi pui duh tam tak ka neih vanga Mimii hi riak sawm ka ni a, an ina ipik taka awm reng ai chuan ani lahin a lo chak ve bawk. Kan chaweina kan tihfel hnuah ka room kan pan vat a, hun thawl kan neih khat em vangin ka am ve a ni.

“Mim,  U Tetea hi I la duh em?”tin ka han zawt thawr a, tawngkam tlip mawi dan hi ka thiam ve vak lo.

“Awi, ka hmu thut kha chu ka mit kha a pawng zawr zawr hian ka hria, ka lu te kha hai ziai ziai mai ni” tiin bul a han tan leh phawt a. “Ka hmangaih awmchhun leh theihnghilh ka duh ber aniang, tun thlenga midang ka neih tak tak theih loh chhan pawh hi amah hi ka nghak, engtikah emaw a lo let leh hi ka ring thin a, mahse, ka en angin min en ve tawh lo tih ka hrethiam” rilru nat hmel deuh hian a ti ta a.

“Ani pawh hian a la theihnghilh lo che tih ka hria” ka tih chuan a mittui parawl kang hian min en a.

“Min theihnghilh tawh bik lo ang, hna a neih veleh min neih kha a tum ruh ve thin em asin. Ka la naupang a, ka la at tehreng nen khan min hruai puitling em em a, ka hero a ni a, a la ni reng bawk. Mahse, min ring thei tawh lo a” a tih chuan a mittui chu a rawn luang zung zung a, ka kuah a, a insut hlawp hlawp a.“A rilru ka tihnat sak a, a thinlung ka tihkehsawm sak asin” a tih chuan keipawh ka insut ve hraih a. 

“In pahnih inkar hi ka theih ang angin siamthat ka tum ang, I la hmangaih a, a hmangaih bawk che a, in inhmuhthiam lohna leh inhriatthiam lohna chu thudik hmangin thiahin a awm ngei ang. Ka tiam che, I dik anih phawt chuan a lo let leh ang” ka ti ta a.

U Tetea’n Mimii a hmangaihzia ka hre ve miau a, chawlh hmanga ka haw ngai zen zen loh vang chauha hmaichhana inhmu lo kan ni, a thlalak erawh ka dawng ngun thei viau. Ka u khan a atchilh tak meuh a, Mimii tan lah a tleirawl chhuah tirh ngaihzawng kha a ni ve bawk a, min hrilh tura a inpeih hma chuan an buaina pawh hi zawh chhuah ka tum lo.

Mimii muthilh hnu lawkah Sawmzuala nen kan inbe ta reng a, inngaizawng inbia ni loin thiantha tak biak in kan inbia, chu chu amah Sawmzuala min en dan a ni a, thian awmin ka awm ve tawp.

Zing chaw kan ei har phian a, ka nu bazar aa rei thin em vang hian inrinni zing hi chu kan hma ngai meuh lo. Kan eikham a kan insiam fel meuh chuan dar 10 a lo ri der. Kan hman huna call mai tura zan lama min hrilh vangin Sawmzuala chu ka han call a, a lo pickup nghal vat. Scooty in kan kal ve mai ang ka tih khan a phal lo a, a taxi in min rawn hruai. Kan in awmna lai a rawn hai lehnghal a, kan in kan chhuah meuh chuan dar 11 a ri tep, ka inthlahrung ngei mai.

“Vawiin chu hnathawh vak ka tum lo hrim hrim a, chu nilose chuan ka rawn tur hmanhmawh ang che u. Agri department lamin pipe min pek kha senghawi ka tum mai mai” a tih chuan tlemin ka rilru a nuam deuh.

Darkar khat dawn kan tlan leh hnu chuan kan thleng ta, gate lo awm naah chuan min tlan thlak pui a, a awm dan tur pawh ka ngaihruat thiam lo. Kan tlan zel a, kawi a lo awm a, chutah chuan huan zau em em mai hi a lo in zar pharh hluai a, ka mit chu a bial nghak kawk in ka hria. Kan huanah te pawh ka kal ve fo a, ka hrechhuak lo thei lo. Ka pa tuna ber a ni na a, a faten a hnung kan zui ve ta mang lo tihte chu. Kan huan ai chuan a zim deuhin  ka hria, hmalakna tur erawh a la ngah ngawtin ka ring.

Thlamah min luhpui a, thlam sakna chu a la reilo tih a hriat, mamawh a inchhawp deuh vek a, khum thlengin. 

“Nakinah chuan ka la riahchiah chilh duh dawna, chutiang tur atan chuan ka ruahman vek a” a ti a, a che vel chu a  phur hmel tawp.

“Khutah khuan green house a awm a, Horti lamin ka dilna min tihhlawhtlinsak hlauh mai a, ka la tluang ve khawp a” tih pahin thlang lam a kawk a, Mimii nen chuan kan han thlir thla nghal a, a lian tha khawp mai.

“Awi, terrace ringawt pawh khi a hmuhnawm” Mimii chuan a lo ti ve a, engkim mai chu a nihdan tur angin a ni deuh thlup vek tawh.

“Ni e, huan mawngah khuan tuikhuah a awm a, pipe hmang hian tui chu ka la chho anga, ka ruahman anga a awm theih chuan a phurawm khawp ang” a ti a, a thlir dauh dauh a, keiin amah ka lo en thung. Hetianga mahni hnaa tui leh taima hi an hlawhchham theih ka ring lo.

“Nakinah chuan min hre duh tawh dawn lo anih hi” ka lo ti sep a.

“Saw saw ka va enchhin”tih pahin Mimii chu rang fahran hian a chhuak a.

“Ka hrereng tawh ang che” thuk deuh hian a ti ta sup a, ka va melh chuan chiang fe hian lo melh ve reng a.

Note: zanin hi ka khawngaih si cheu a, ka rawn dah hram. Naktuk hi chawl chhin ila, thla tharah hian ka blog enge a an I ngaichang lawk ang u hmiang.