EUPHORIA 5

5

Mimii chu a mu ar ar a, phone a hmang pah a, kei erawh chuan uluk fe hian Sawmzuala ka lo en thung. A pipe kan hun that pui tawh a, thingpuite kan in zawh tawh hnuin tui kawng a siam leh mek a ni. A bungrua chu ka melh kual a, gas thlengin a chhawp vek. Nakinah chuan ka pa ang bawkin a la awmchilh duh ngeiin ka ring.

“Tuikhuah en in duh em?” thlam chhunga rawn luh pah chuan a ti a. Mimii a lo zuang tho nghal.

Huan mawng lamah kan chhuk thla a, sangha dil kan thleng hmasa a, a piah ah tuikhuah pakhat awm lehin chu chu thlam bula tanky lianah a pump chho a, huan chawmna tur ber a ni.

“Hmanniah sangha chi ka dah ve chiah a, man hunah in lo kal ve anga” Sawmzuala chuan a ti a.

‘Min sawm duh loh pawhin kan hre reng ang” Mimii chuan a lo ti leh zat.

Kan haw dawn chuan kan bungraw hawn tur vel a hnungah a dah fel mawlh mawlh a, a seat hnunga thut ka tum chuan Mimii’n pipe bung vel chu a dah hmak.

“U Rin, a hmaah thu mai rawh aw, hei a hnungah ka dah leng lo a” Sawmzuala hriat tur kherin a han ti a, Sawmzuala a lo khi vur vur.

Kawng tluanin Mimii tawng kan ngaithla a ni ringawt, Sawmzuala’n a lo tuihnih ve zeuh zeuh a. Mimii nen an veng a inhnaih zawk vangin keimah min thlah hmasa a, an tlan liam thlengin ka thlir zui vang vang.

Chhun nisa ka do nasa ve deuh a, ka mu hma ngang mai. Zanlaiah pawh harh miah loin ka lo muhil tlang daih a, ka harh chuan ni a lo tlang sang viau tawh. Ka khum bula tukverh chu ka han nam hawng a, Sunday tuk anih avangin a reh deuh duk a, ka lukham hnuaia ka phone chu ka han la a, message lo awm chu ka han hawng nghal a, Sawmzuala a lo ni, ka nui sak a, a huan kan hmuhpui a lawm thu vel a ni deuh mai. Message lo awm pakhat ka en leh rual chuan ka nui lai a tawp chat a, Zawmi, kan venga ka thiannu a lo ni.

*Ruatdika a lo haw tih I hria em?*

Chu message ka chhiar zo chiah chu ka ni deuh hu hian ka hria. Kan inthen hnua kan inhmuh leh hmasa ber tur a ni a, ka pangngai zan lo chiang alawm. Khaw khat, veng khat inngaihzawn hrehawmna chu inthen hian a ni awm e. Ka awm zawn rawn phu dut dut te hian amah ka la theihnghilh lohzia a tilang chiang viau awm e. Ka tho chhuak a, ka nu eirawng bawl chu puih ka tum nain a lo zawh deuh vek tawh avangin inchungah ka chho a, ka vahte ka han ti rak leh phawt ang.

Naupang lam kan bang hmasa a, zirlai enlawk kan ngaih avangin Sunday school hall ah kan lut khawm a, tukverh bulah ka thu a, puitling an bang mek tih an thawmah ka hria.

“Ruatdika thau reuh zia saw” an tih thawm chu ka hre reng, ka maimitchhing tawp. Kan vengah chuan kan inngaizawng tih hre lo hi an tam vak lo, mahse, kan haw khat bakah kan haw chhunah kan haw rual thei mang lo a, chuvang chuan veng chhungah chuan kan inzui tam viau lo.

Kan zirlai ennawn pawh chu ka hre chiang mang lo, ka rilruah a lut lo a ni ber ang chu. Kohhranah hian ka fel vang ni em em loin ka inhmang ve thin a, kan zirna vangtein ka han awmbo a, mahse, ka haw erawh chuan ka phak tawkin ka inhmang ve thin. Chutiang vangte pawh chu aniang, ka haw hnu rei vak loah khan zirtirtuah min han ruat pek a, insit a na duh khawp mai. Bank-ah ka han thawk leh a, hunawl mang kan nei lo nghal phat bawk a, a tirah pawh phat ka tum hial. Ka pa in rema tih chiah loh vang leh kumin chu han awm tlang phawt tura min tih angin ka pha ta lo. Kumthar lamah te chuan kan pha ve mahna, kohhran inkhawm zan nang hman loa haw kan ngah thin si a, rawngbawlpuite pawh an zahawm e.

Chawhnu inkhawm leh nghal turin biak inah thingpui kan in ta nghal a, kan rei deuh tum chuan thingpui kan in nghal mai zel. Chawhnu chu biak in pui lamah kan inkhawm a, Zawmi nen chuan kan thu tlang a, a hawi kual leh thin chu ka han sik a, zawn a nei tih ka hre ve chiang e.

“Kan zawn saw en la, U Thara a thu anga, a hma chiahah Ruatdika a thu” a rawn ti ru sur sur a, ka nghawk nghal pawp a, ka thin a phu nghal zeih zeih.

Inkhawm chhung zawng chuan ka rilru chu hmundangah a awm daih, tuna a rawn haw hi a hma atanga kan lo thlir ve thin kha a nia, kum khat dawn hnuah kan inhmu leh dawn ta, engtin nge a awm ve ang le tih mai mai ka ngaihtuah. Min duh tawh lo a min kalsantu a nih vang erawh chuan ka rilru ang a pu dawn lo tih ka hre tho, chutichung chuan beiseina hi a piang lo thei bik lo. Inkhawm kan bang a, amah chu melh loh hram hram ka duh, harsa taka ka lo paltlang tawh kha hrerengin ka natzia ka tilang tur a ni lo.

“I dam maw?” gate kan chhuak chiah min lo bia a, amahin a lo ding. Hmuh ka hlauh vangin kan tawi khawmuang ve kha a ni a, min lo nghak tho.

“Um, dam e” ka ti a, ka tah a chhuak nghal tawp.

“In thenawmah ka kal dawn a, haw rual ang u” a ti a, duh loh theih a ni chiah si lo a, kan haw tlang ta. Zawmi chu ka kai a, a kut chu ka tuai na vekin ka ring.

“I cham rei dawn em?” Zawmi chuan a ti a.

“Thla khat vel chawlh chu ka nei a, chumi zawh hma deuh chuan chhuk ka ngai leh ang” a ti a, ka hre lawk vek. A chawlh tawp lamah an college ah interview an nei dawn tih thlengin, ka thaw ham ham chak. Kan inhrechiang hman lutuk leh engkim kan inhriatsak vek thin hian natna bak min hnutchhiah ve si lo.

“Hetah hian ka pensan ang cheu aw, chaw ei tui u” tiin kan thenawma a thianpa te inah a lut a. Zawmi nen an inchhan lai pawh chuan ngawi rengin ka kal tlang a, Zawmi chuan kan inah min zui lut. Kan ina rawn leng lut ve reng thin kha tunah chuan a rawn len a rem tawh lo a, a rawn leng tawh ngai dawn lo. Ka rooma ka luh chuan ka mittui a rawn far zawih a, khumah ka thu hnawk a.

“Rin, tap bawrh bawrh rawh, a zahthlak loh ania. Tun bak chu amah vang hian I tap tawh ngai dawn lo tih pawh ka hria, tun hunk ha paltlang a ngaih ber hunlai ania, a hma kha chuan hmun hranah in awm a, tawrh vak ngaihna pawh I hriat loh kha. Tun tak kha paltlang a ngaih ber tur ania, a dawt lehah chuan I na tawh lo ang” a ti mawlh mawlh a, keipawhin ka pawm thlap.

Zanah pawh ka inkhawm peih lo, Mimii nen kan inbia a, Ruatdika rawn haw vel chu ka hrilh a, min rawn hnemin min rawn fuih nasa. Ka mu meng kar a, hun liam tawh hnu hi kan duh vang reng ni lo hian kan thinlungah a rawn thar ve thin. Tun hunk an hman mek kan lungawi pui loh vang ni miah lo hian nunhlui leh hunhlui ngaih veng veng chang hi a tam thin, chu chu tu mihring chungah pawh a ni vekin ka ring.

“Ka zir chhuah rualin kan innei anga, kum thum vel tal chu hetah hna ka thawh zawm anga, chumi hnuah duh leh Mizoram lamah kan let ang” a tihte kha nimin lawka a sawi ang mai hian ka hria.

Kan inkarah hian midang an tlakzep theih ka ring ngai lo a, a tan rinawm takin ka awm ve tang tang thin. Hmun hranah, chhungte hmuh phak loah awm mah ila kan nun kha kan uluk ve thei em em a, nupa kan nih hma loh chuan sex lama fihlim turin intiamna pawh kan nei thlap. A chang chuan kan bawh pelh ve lek lek fo a, mahse, min nawr luih tumna a nei ngai lo. Khang hun chhung zawng zawnga a insum theihna te, a rinawmna te kha ka theihnghilh tawh bik lo ang. Ka tan mipa tha ber a ni thin a, a tawp min thlenpui zo ta lo mah se amahah hian ngaihhlut tur tam tak erawh a awm ve tho a, kei aia duh leh hmangaih a nei a nih chuan lawmpui mai tur ka ni.

Office lama kan buai a, nidang ang bawkin zan dar 7 velah kan haw theih chauh. Kar hmasa lawk khan scooty thar ka la chhuak ve a, buaina pawh ka nei tlem deuh tawh ang chu.

“Rawn riahpui che I ngai angem?” Mimii chuan min ngaihtuah zet hian a ti a.

“Ka tha alawm, min ngaihtuah lo la” ka ti a, dik tak chuan Mimii tihbuai leh thin hi ka inthlahrung ve.

“I rilru I thlak chuan min rawn call la aw” a tih chuan ka bu nghat a.

In ka thlen chuan ka inbual a, chaw pawh ka ei chak lo. Kan haw dawn khan thingpui leh cake kan ei a, ka la puar deuh ul in ka hria. Ka inbual zawh chuan khumah ka tlu zal mai mai a, mut dawn chuan a la hma deuh si, ka phone chu ka khawih pah mawlh mawlh a.

“Ani, inleng I nei” ka roomah Bawihtea a rawn lut a, ka lo pawm a.

“Tunge lo leng chu I hria em?” ka ti a.

“Aih, mipa lian deuh” fiah lo deuh hian a ti a, kan inpawm chhuak ta a.

Sitting rooma Sawmzuala lo thu chu ka va hmu nghal, min lo nuih var var a, a bulah chuan kan va thu ve a.

“Tehhlawl che chuan” ka ti a.

“Nia, hospitalah kan veng damlo ka rawn phur a, a rem em a ka rawn leng kawi anih hi” a ti a.

Ka nu a inkhawm a, ka pa a awm a, U Mama te pafa an awm bawk. Ka pa hi a tawng tam vak lo a, a sawi duh zawng tak sawi thiam erawh chuan pa tawng tlem a ni ang tih rin theih pawh a ni lo.

“Pa, Sawmzuala  anih hi, in tuizawng a inang a, in inkawm ngeih ngawt ang” ka ti a, ka rin ang chiahin huan chungchangah an lut vat. Thingpui ka lum zawh pawh chuan an lo la sawi tui ngang mai, ngawi rengin an tawng chu ka lo ngaithla ve mai mai a. Ka pa in sum lakluh nana tha deuh te, hlawk lo tha heh si te chu ama tawn hriat tawh atangin a hrilh nasa khawp a, Sawmzuala pawhin a ngaithla uuk khawp mai.

“I pa chu rawn kawm fo tur anih kha” a haw dawna kawta ka thlah chuan a ti a.

“In tuizawng a inang bawk a, ka awm kher loh pawhin in inkawm ngeih dawn kha” nui chungin ka ti a.

“A chi nang” a ti a, a khi deuh suk a.

“I haw kawngah fimkhur la aw” ka tih chuan a bu nghat a, min en reng a, ka zam tep. Ka lai lutuk chuan ka han chum ringawt a, a nui chhuak hak.

“I lai hma ve bawk sia. A nih ka va phei tak tak tawh ange aw” a ti a, a motor ah chuan a lut a. A glass a rawn tithla a, “Tui deuhin mu la aw, I chauh hmel si, mut tam I mamawh” a ti a.

“Nia, nang pawh aw” ka tih chuan a mit chu a tiche zeuh a, “Mangtha” hmui phun hian a rawn ti sap a, kan in vai liam ta.

Ka sawi thiam lo, min ngaizawng ka tih dawn chuan a ni miah si lo a, thian ang tak taka inen ka tih dawn chuan a ni leh chiah bawk si lo a, hmelhriat satliah anga sawi dawnin chu aiin a thukin ka hre bawk si a, Sawmzuala nen kan inkar hi chu kan pahnih chiahin kan hrethiam maithei. Midang tan chuan inhmelhriat, inkawm tia sawi theih chu kan ni lawi a, a mak ve ngawt mai.

Note: han chawlh lailawk ai chuan a theih ni hi chuan dah zel zawk ang aw, min chhiarsak tang tang thin vangin ka lawm e.