EuUPHORIA 1

1

“Tunah hi chuan kan inkar hi tihtawp phawt a tha in ka hria, innei tur kan nih chuan kan intawng leh tho ang” titu Ruatdika number chu ka melh tlawk tlawk a. Kum 5 chhung rinawm taka ka lo awm ve na te, a tan chauh tia ka lo nghah ve na zawng zawng chu engmah lo mai an nita.

“Ruat, space I mamawh a nih chuan ka pe ang che, I duh tawk thleng pawh ka pe mai ang che. Heti ringawta tawp chu ka duh lo” ka ti tawk tawk a, mahse, dil leh ngenin awmzia a nei ta lo.

“Kan inneih hunah chuan I duh dan ang thlapin kan in tur ka design anga, room pawh I dream ang ngei khan kan sa ang” a nui var var a.

“Ka nghakhlel tawh” tih pahin a darah ka lu ka nghat a, duat takin ka sam a chul leh heuh heuh a.

“Keipawh hian ka nghakhlel tawh alawm, hmun hranah awm dawn mah ila ka ngaihtuah lo che” a ti sap a.

Kum 4 chhung zet chu Hyderabad ah kan awm tlang ve ta a, kuminah ka zirlai zir zoin ka haw tawh dawn a, ani erawh chuan M.Arch (Master of Architecture) a zawm leh dawn a, ka la nghah ve hret chu a ngai dawn a ni. Mahse, ka tan a rinawm tih ka hria a, ka ngaihtuah hran lo. Chu ai mah chuan kum 4 chhung zet kan lo awm tlang ve a, inhmuh reng theih bik loh mah se a lungleng lo tawk chuan kan inhmu ve thei zel a, tunah erawh  chuan a harsa ve hret tawh dawn, chung ngaihtuahna chuan min ti lungngai ber.

Tunah chuan Aizawl lamah haw chho tawhin HDFC ah Branch Delegated Authorizer hna thawkin Dawrpui branch ah ni tin office kal ka kal ve a, ka tuina ber a ni bawk a hah mah ila hrehawm ka ti ngai lo. Ruatdika pawh a zirlai a har bawk a, hunawl a nei mang lo. Chutichung chuan zan lamah erawh kan inbe regu viau mai. Ka lunglen zual a reh tawh a, mahse, ka ngai em em reng tho. Kan hnain a lo zir lo bawk nen thian kawmna hun ka nei mang lo a, office a ka thawhpuite hi ka thiante an ni ber e. Kan vengah naupanlai atanga kawm ka nei bawk a, ani nen hian inkhawmna leh chhuah ve nikhuaah kan inkawp chawt a, a bak chu kawm em em ka nei lo. Ruatdika hi mi khirh ve tawk tak, thian pawh kawm vak phal lo chi a lo ni a. Phaiah kum 4 ka awm chhung khan thiantha tih tham ka nei lo. Chutiang khawp chuan a strict a, ani pawhin a kawm em em lo. Kan pahnih hian thiantha ber nih tluka tha a awm lo a ti a, a thu ang ang khan ka awm ve tawp a ni ber mai.

“Ka pi, ka loan dil chungchang kha ka rawn ngaihven leh a”

Office ka luh chuan mipa pakhat hian Mimi-I a lo dawr mek a, ka va melh zawk a, hmel fel ving veng tak a ni a, rei melh loin ka thutna lam ka pan ding nghal a, Manager awm loh lai a ni a,  Mimii’n ka hnena kal tura a tih ri chu ka hre phak.

“Ka pi chibai”

“Aw chibai, lo thu rawh” tiin thutna ka kawhhmuh a.

A laon dil chungchang vel chu a sawi a, uluk tak hian ka lo ngaihthlak sak a, thla hmasa lam atanga a beisei ve tawh avangin a hmel hi chu ka hre ve deuh tawh.

“Eng atan ber nge I hman ang?”nui chungin ka ti a.

“Huan ka lei ve tawp mai a, thawh zawmna tur ka nei si lo a, risk ka la tawp dawn anih hi” tiin a sawi a, a hmel ka en a, huan enkawl vel chu inhmeh thei hian ka hre thlawt lo.

“Kan bank chu a pung hi a tam asin” ka han ti hram a.

“Ni e, ka hria alawm. Mahse, ka hmanhmawh tawh si a, a theihna hmasa sa kha ka duh tawh mai a” a ti a, documents vel chu ka check mawlh mawlh a.

“Engpawhnise, vawiin chuan a tihfel nghal theih dawn lo a, I documents kan lo chec k anga, kan nauten an rawn be leh mai dawn che nia”tiin kan inthlah ta a.

A chhuah dawn chuan polite tak hian lawmthu a sawi a, kut hnathawk atan chuan ka lo ui ve em em ringawt. Tun ang laia hna vanzia ka ngaihtuah erawh chuan a fakawm chu ka ti, thalai mahni inchawm thei lo an tam em a, chung lai karah kut hnathawh hreh lo ka tawng chuan min tihlim viau lawi.

“Vawiin chu kan bang hma ve deuh a, enge vawiin lam I an a?” zanah Ruatdika ka bia a, tlaia min lo biak hun ngaia min biak loh vangin zan dar 8 velah ka call ta ringawt.

“Keinipawh kan bang hma deuh a, John te hostelah ka va leng a” a ti a, ka sa deuh phat.

“E, anih chu” ka ti hmuk a.

“Assignment kan ngah lutuk a zanin pawh, ka inbual anga ka ti nghal char char ang” atih chuan ka dawhtheihna in a tlin leh tawh lo, kan inbiakna ka titawp a. Ka khumah ka thu tum bur a, ka buai ve em vang hian ka lo ngaihtuah tlem mai pawh a, tunhnaia Ruatdika khawsa zia hi ka duhzawng a ni lo. A run dalah tak meuh min rawn call na hi karkhat a chuang tawh, kan kalna tur leh kan thiltih tur inhrilh thlap thin kan ni a, John te hostel a a kal tur pawh ka hre lo. John hi chu ka hrechiang ve a, kan pahnih thian a ni a, rinhlelhna leh ngaihtuah phah nan ka hmang hauh lo. Mahse, a inluah atanga John te in hlat zawng ka ngaihtuahin chutia ngawi renga kal thei chu ka thin a rim hlur.

*Tunlai chu zirlai a tough lutuk a, min hrethiam ve la aw*

Whatsapp ah message a rawn dah a, tlem chuan ka rilru a dam deuh.

Chutiang chuan hun kan hmang chho ve zel a, inhauh hi ka thil peih loh ber anih avangin lungawi vak loh zanah pawh engmah ka sawi peih lo. A tira ka lungawi lohna kha chu a lo ho lutuk zawk a lo ni, weekend a riahchhuah a ching chho tan a, a riah chhuah chuan biak tur a awm ngai lo. A thiante inah a riak ngei tih erawh a fiahna ka nei zel a, inhauh buai ai chuan ka en liam ve ta mai mai. Dik tak chuan Ruatdika hi pasal atana ka duh a ni a, midang hi pasal tur angin ka dream ngai lo. Kan inneihna tur a tihbuai loh chuan palzam a tum ve ringawt  a ni mai ang chu. Ka at vangte pawh a ni maithei, midang nena relationship tan that leh hi ka peih lo ngawih ngawih.

“Rin, thil hrilh tur che ka nei a, Ruatdika lam a nia”

John-an min rawn call a, office-a ka buai lai tak a ni.

“Eng lam nge ni?”tia ka zawh chuan ngaihthat loh na em em pawh ka nei lo.

“Tunlai chu kan inhmu ngai lo a, I bulah kan hostelah a rawn riak thin angin a insawi thin niin ka lo hria a” a tih chuan ka nghing lawih mai. A chhan chu nizanah pawh weekend hmang turin John bulah riah atum tih a sawi a nih kha.

“John, enge a awmzia? Min lo bum char char tihna a ni em?”tia ka zawh chuan a ngawi vang vang a, a tan a harsa viau ang tih ka ring, a thiante ve ve kan ni si a.

“Tu zawk pawh ni ula thudik hi ka hrilh cheu a ngai tho ang. Tunah pawh hian in pahnih inkar chhiat hi ka hlauh ber a ni fo tih in hre ve ve a, mahse, Ruatdika’n hmanruaah min hmang hi a tha ka ti l oa, thudik ka hriat hnuah ka rawn hrilh tawp dawn che a nia, dawn sawn dan lo thiam ang che”tiin min han fuih hmasa a.

“Aw, theihtawpa pawm dan thiam ka tum ang” tiin ka chhuak a, mi awm lohnaa awm ka mamawh.

“Thanmawii kha I hria em? Kan college miss ve thin kha” a han ti phawt a, ka hria tih ka sawi chuan, “An inzui ve fo a ni awm e, club ah pawh an kal dun an lo hmu nasa lutuk a. Thanmawii chuan a status ah pawh a hmang nasa an ti, number kan in nei lo a, ka hmu ve ngai lo a. Ka thiante hian an sawi nasa a, keipawhin ka ringhlel tawh lo. Nimin piah tlai khan hostelah an rawn kal a, min hmuh tuma rawn kal pawh an ni lo, min hel ve tang tang a niang, mahse, ka inkhel zo khan ka han hmu ta sia, Ruatdika chu a lai khawp mai. Min be lo a, ka be bawk lo a, Thanmawii khawsa ziaah khan inkawp lo se khatiang khan an awm lo ang” tiin a rawn sawi ta vek a. Thanmawii chu ka hria, chhe lo ve deuh, boruak pawh ngam ve deuh a ni. Mahse, mak ka tih chu, ngaihzawng nghet a nei ve tho sia, Mizo zirlai hruaitu a ni nghe nghe.

“Mahse, John, Thanmawii chu U Peka nen an ni sia” beidawng zet hian ka lo ti a.

“Nia, chu tak chu alawm mak kan tih em em, Peka pawhin a tuar viau a ni awm e” a rawn ti ta zel a.

Boruak chu ka hip kawk kawk a, mu leh mal pawh ka nei meuh lo. A dik zia tichiang turin zanah U Peka’n min rawn bia a, engkim min rawn hrilh ta vek a. Thanmawii chet lak hmasak a nih thu thlengin min rawn hrilh, mahse, chu ringawt chuan ka rilru na a hnem zo lo. Engang pawhin lo che se, Ruatdika hian lo hnar tur a ni, amah pawh a dik bik lo tihna a mai.

“Vawiin chu I va nawm loh hmel ve?” Mimii’n a tih chuan ka bu nghat a, nizanah chhin khat mah ka chhing lo. Ruatdika hnen atangin call ka dawng lo a, message ka dawng hek lo. 

Chhun chawlh laiin thingpui leh chhang ka ei a, thil dang ei chakna pawh ka nei lo. Pawnah ka chhuak chho a, mi che vel chu ka thlir ngawih ngawih ringawt. Ka dinna bulah bike a rawn ding a, a khalhtu pa chuan a helmet phelh pah hian min rawn nui suk a, tunge tih ka hre lo thelh. Hmannia loan rawn diltu kha tih ka hrechhuak a, phur lo zet hian ka lo nui ve suk a, office ah a lut tlang a, a thil dil a hmu ve tawh ni ta in ka hria.

“Awi, khapa kha ka star tlat a nih chu” Mimii’n a lo ti sar sar a, ka lo nui tawp.

Zanah chuan rei fe ka inngaihtuah a, heti tawpa chiang loa awm chu tha ka ti ta lo. Ka phone la chhuakin Ruatdika chu ka call ta a, a lo pickup rang angreng viau.

“Enge I awmdan hi?” ka han ti thawr a.

“Rini, ka zirlaiah ka buai tih ka sawi fo kha, min hrethiam ve la” a tih chuan ka lo nui hak.

“Thanmawii chungchang kha ka lo hria a” ka ti tlang tawp, thu pehhel hi a thiam vak lo.

““Tunah hi chuan kan inkar hi tihtawp phawt a tha in ka hria, innei tur kan nih chuan kan intawng leh tho ang” titu Ruatdika number chu ka melh tlawk tlawk a. Kum 5 chhung rinawm taka ka lo awm ve na te, a tan chauh tia ka lo nghah ve na zawng zawng chu engmah lo mai an ni ta.

Tlawm theihtawpin ka tlawm a, a tira ka sawi ang khian hun thawl pek pawh ka hnial lo, pasal atana ka duh ve ngawih ngawih kha a ni miau a, mahse, ka tlawmna chuan awmzia a awm lo. Midang vang a ni lo ti chungin inthen a duh ta zawk miau si a, engtin nge a telloa awm thiam lo thin khan a telloa hun ka hman chhoh dawn? Engkim mai hi a reh tlawk tlawk a ni ber e.