UKIYO 1

Kum hnih leh a chanve chauh pasal han neih a, nuthlawi dinhmuna han din chhunzawm chu a ruk tak chuan zah ngawih ngawih chang a tam em em a, engvanga nuthlawi dinhmuna ding ta nge kan nih min rawn ngaihtuahpui tawh ngai si lo hi a hrehawm lai ber pawh a ni awm e.

“Ka cousin a rawn haw dawn a, hmuah ve ngei ka duh sia ka rawn tlai dawn nia” tiin ka thiannu Mpi chuan min rawn bia a. Chhun lama kan hna thawh zawh loh zana thawh chhunzawm kan tum vang a ni.

Mpi hi ka thiantha ber a ni a, ka pasal neih pawha thiana ka hman a ni nghe nghe. Veng khat ni lo mah ila veng inthenawm chiah kan ni a, kan inkal pawh zung zung a, khatia pasal ka han neihsan pawh khan hrehawm a ti thei em em a, hetia nuthlawi nia ka haw leh hnu hian a lawm ber zinga mi a ni ang tih theih tur a ni.

Ka pasal Chhuanawma nen khan high school atanga kal tlang a, college luhna pawh inang chho kan ni a, kan inngaihzawn kha ka ring ngai lo mai ni loin ka pasal a nih phei chu ka ring ngai lo. Amah hi ze zawi deuh tak, tawng tam lo tak a ni a, thian a kawm tam lo bawk a, min zui ve hnak hnak thin. Engtik lai khan nge kan inthianthatna chu inngaihzawnnaah a lo in leh tak ka hre lo, BA kan zawh chuan kan inkawp nghet viau tawh. MA ka zir zawm a, ani erawh chuan zir zawm tawh loin engtin tin emaw sorkar hna a thawk a, ka zirchhung khan inneih a duh em avangin vawi engemaw zat chu kan inhmuthiam lo ve hman. Kei lah hi zirna ngaisang chi ka lo ni si a, ka duh ang tawk ka zir hma loh chuan neih kha ka tum lo ve bur ringawt a, vawihnih chu kan inthen phah. Mahse, thildang vanga inthen kan nih loh avang khan a rei a, kan boruak kha a tha ve leh mai thin bawk a. Chutiang chuan harsa angreng tak chungin MA ka zo a, M.Phil ka tih laiin kan inru deuh tawp. Ka chhungten mak an ti a, ka thiante pawhin mak an ti. Mpi hian thlakhat chhung zet min be duh lo, hrehawm ka ti thei em em a, mahse, kan insuihthat kha chuan ka bula ding turin a inpeih veleh ta tho. Khatia kan inru pawh kha ka inring bik lo, Chhuanawma nen kan leng kha haw a phal tawh lo a, a thiante nen min ru a ni deuh ber. Kha hun tluka kohkir a siamthat chak kha ka nei tawhin ka ring lo. Naupan lai atangin dan thianghlima pasal neih tum bur ka ni a, chutia ho angreng taka pasal ka han nei chu ka lawm thei lo. Ka phak ang tawkin ka zirna chu ka chhunzawm ve reng a, ka pasal chhungte hmaizah erawh a na duh viau. Ka zirna hi min sawisel sak chu ka ti dawt ngam lo a, mahse, zir lo ila an duh zawk tih erawh an tilang ve reng.

“Pasal kan neih tawh chuan kan pasal leh an chhungte hi kan ngaipawimawh ber tur a ni a, I pasalin hna a nei tawh a, eng hi nge la duhbelh a I la zir reng hi ka hrethiam lo” ka nuin a tih phei chuan ka hnual ve rawih. Ka pasal lah hi mize zawi leh engmah sawi ngai lo, tha ve tawp a lo ni bawk si a, ka thlavang hauh ngam khawp tal nise ka ti thin. Inchhunga ka tihtur hi ti loa ka awm ka hre ngai lo a, ka zirna hi inchhunga ka chet tihbuai nan ka hmang ngai lo tih ka hrechiang ve a, ka chhungte hlei hlei hian an hrechiang ang. Ka unaute phei chuan haw leh mai turin min ti fo a, chu erawh ka tum bik lo.

Kum khat a liam a, nau ka la pai chuang lo chuan inthlahrunna min siam telh telh a, ka nuin min tawng khum nasa telh telh bawk. Kan nupa inkar pawh sawi fiah theih fak si loh hian khi a awm tih ka hria, nupa inhau vak vak chi kan ni lo a, a hriat lem loh hlauh zawk a. Chhuanawma rawn haw tlai changin ka nu in min hau hrep a, a rawn haw hma lahin nupui te bula tal hruih hruih a ti bawk si a, a fapa ti khawlotu hmasa chu a nu hi ka ti lo thei lo. Office atanga rawn haw tlai kha a ching ta vat reng a, a tuartu chu chhungkua kha kan ni bawk. Zu rawn in a chin tak chingah phei kha chuan a chhungte mitmei ven a na zual a, ni tin em chu ni lo mah se Chhuanawma meuhin zu a in chu kei ngei pawh hian mak  ka ti.

“In dang daih ila” zan kan mut hnuah chuan a ti a, a rui lo a, min khawngaih ve tak tak tih pawh ka hria.

“Fapa mal I ni bawk si a, I nute hian an phal lo ang” ka ti a.

A thaw ve halh a, ka khawngaih ve thin. Mahse, a huna tawngkam a nei ngam lo leh a tha mual mual ringawt hi pawi ka lo ti. Vawikhatmah a nu leh pa dodal zawnga awm tur erawh chuan ka fuih ngai hauh lo.

Harsatna karah kum hnih chu kan innei tling ve ta, fa kan la neih loh vang te pawh a ni ang, Chhuanawma’n a nun a thlahdah tial tial a, a nu in hnawk min ti telh telh bawk. Zankhat chu ka mut hnuah a rawn haw a, nupui a rawn hawn a nih chu! Ka na tih hian a sawi fiah zo lo ang, khatih lai khan thih bak chak ka nei lo. Min lo tan zawk tura ka ngaih a chhungte lah chuan tawngkam khat pawhin ka thlavang an hauh duh si lo a, ka nauin min rawn hruai a, kan inthen chu a ni ta der, hringnun hohzia ka tem ve ta!

Thla engemawzat chu kawm tlak pawh ka awm lo, ka chhungte min hmangaihna leh min puih nasat em avang chauhin ka damkhawchhuak a, fa ka neih theih loh vanga inthen ang leh awm tha duh lo anga ka tlang thanna te chu min ti chaktu an ni ta hlauh a ni. Vanduai reng tur ka lo ni bik reng reng lo, M.Phil ka zo a, Higher Teacher an lak  tharah Mpi nen chuan kan tel ve hlauh bawk, ka nun chu a par chho leh mek a ni. Chutiang chu ni mah se nuthlawi ka nihna hian engemaw chen chu min tibuai lo thei lo a, min hmusit duh tawk an lo awm ve zel bawk a, mahse, a aia na leh harsa zawk ka paltlang tawh avangin chuti maia zama tluk chu ka tum reng reng lo.

“Zodingpui, hmeli..”

Ka room kawngkhar a rawn ri rak a, Mpi a rawn khek raih.

“Ka ning, ka hming pum hian min ko kiah suh” ka lo ti nghal zat a.

“Mate, lokal rawh” tiin tuemaw hi a ko a, mipa la tleirawl hmel deuh tak hi a rawn lawr ve nghal.

“Hepa vang hi alawm ka rawn tlai, a rawn thleng tlai lutuk a” tiin a nui a, “Ka cousin Zodinthara a nih hi” a ti leh zung zung a.

“Aw, khawi lo inchibai ang” tiin ka ban ka phar chhuak a, nui sen sen hian min lo chibai let ve a.

“Khawnge I awm kha?” tiin ka han zawt zui a.

“Bangalore ah” a ti a, hmel hlim a pu deuh sarh reng chu a nelawm tawp.

“I duh leh phei leh nghal mai la, kan rei viau chuan ka riak law law mai ang” Mpi chuan a ti a. Fel fai deuh hian min mangtha thlap, khatiang fapa kha neih a manhla viauin ka ring, tunlaiah chuan mipa tleirawl enkawl harsa tak tak an tam si a.

“Nimin chu Chhuanawma ka hmu a, a hmel a pawr tawp a, ka be peih lo a” Mpi chuan a ti a, kan inthen atangin kum a liam tawh a, ka hmu ngai lo tluk a ni.

“Ka u in a hna te kha a thawk tawh lo a ti tak asin, sorkar hna athawh loh chuan inhlawha chhungkaw chawm tur chuan a tlin lutuk bik awm si lo a” ka ti a. Ka khawngaih ve reng, a nu chu inhmuchhuak ve tak maw?

“An nu nen khan fa an la nei chuang lo a, Chhuanawma hi a dik lo a ni zawk ngei ngei ang. Nang hi chuan pasal nei la fa I neih nghal mai ka ring” a tih chuan ka lo ip deuh zawk a.

“Pasal..” ka ti sap a, pasal tih ringawt pawh hian engtin emaw tak ka awm a la tinuam lo.

“A tir atangin ka thu I awih tawh anga, I tisual tawh miah lo ang” tiin min fiam chhunzawm a, kan nui dun hawk hawk a. Ni e, pasal ka nei leh dawn anih chuan Mpi duhzawng leh tha tih zawng ka melh tel ve tawh ngeiin ka ring. Chhuanawma hi a tir atangin min duh pui lo reng a, mahni lu a zawh loh bakah mipa zawk backup ngai ngawih ngawih a nihna te khan a ti tui lo tih ka hre reng.

School lama kal turin ka insiam mek a, zan lam kan men rei avangin ka lu chu a rit deuh bur lehnghal. Ka thawh hmain Mpi chu a lo tho tawh a, a lo haw daih tawh. Vawiinah result kan puan dawn avangin thla khat deuh thaw kan chawlh hnuah school kan hank al leh dawn a ni a, thawh hma ngai ber hi a hrehawm thin. Ka scooty a lo nung thei lawk lo lehnghal a, ka tlai lek lek. School ka thlen chuan Mpi chu a lo awm vang tawh, ani hi zawng zing thawh hmaah ka tluk ngai dawn lo a nih hi.

“Haw pahin Zodina te dawr thar tur en pui ve lawk ila” a ti a, nizana a cousin a rawn hruai kha tih ka hre nghal mai.

Dar 1 velah kan haw thei ta a, Mpi sawi lawk ang khan Zodina te dawr en tur chuan kan inphur chhuak leh ta lawp lawp a, a hmun kan thlen chuan amah pawh a lo awm ve. Min hmuh chuan a lo nui sak a, a nu leh a unaunu niawm tak nen an lo awm. Zodina nu leh Mpi pa hi unau an ni a, colony khatah an awm. Thawmhnaw dawr tur a lo ni a, a awmna lai chu a fuh viauin ka hria.

“In inei puar tawh em ni?”Zodina chuan a ti a.

“Aih, kan lo ring che” Mpi’n a lo ti nghal zat, school ah khan kan ei tawh reng sia.

“A nih chuan min lo nghak lawk ula, kan ei chhuak dawn nia” a ti a.

Anu te chuan tihfel tur neuh neuh an la neih avangin kan kalsan ta a, an dawr piah deuh lawka restaurant ah chuan kan chawl a. Rei pawh kan thut hmain Chhuanawma te an rawn lut ve, Mpi chu ka sik zeuh a, ka awm a tinuam lo nghal vek. An nu nen an ni a, an nu lah chu a rawn inchei parh angreng si a, min hmu ve lo chu ka lawm viau.

“Dingpui, enge I ei ang?” Zodina’n a tih chuan ka harh chhuak deuh zawk a, ka ner deuh nang bawk. Mpi pawh a u reng sia, min u miah lo chu ka thin a lo rim ru deuh bawk.

Chu chu Zodina nen kan inhmelhriat tan dan a ni a, nau ang chiaha ka en ve theih nghal, ka tana tangkai em em ni zui ta a ni. A zirna zo fel loin a rawn haw a, thla khat hnu velah exam turin a ka leh dawn ni awm tak a ni. Whatsapp ah min rawn be ve leh zauh thin a, thu tak pawh sawi lo hian kan uang ngei ngei thin. Mpi pawhin kan inbe ve thin tih chu a hria a, thutak kan sawi a ring bik lo a ni ang, engmah a sawi ngai lo.  

Zankhat chu ka rin loh deuhin Zodina leh a thianpa an rawn leng lut nawlh a, Mpi telloa a rawn kal ngai loh avangin mak ka lo ti deuh.

“Khawnge in kal dawn a?” ka lo ti a.

“Kan lo leng” a ti vel hmuk.

Thingpui ka lumsak a, inkhel an en a, an en tui bawk aniang kan inbe mang lo. Manchester Utd a lo tan em em lehnghal a, inhnialna tur kan nei leh ngei dawn e, kei lah hian Chelsea ka tan bur mai si a. Inkhel a zo a, an haw veleh mai a, in a thlen hnuah min rawn be leh thlap.

*Zandangah kan lo leng leh ang aw*

Engtin nge ka chhan ang tih ka ngaihtuah laiin message dang a lo thleng leh a.

*I phal loh pawhin kan lo leng dawn tho tho*

Ka nui ta suk a, smiley tlar phei duai ka thawn ta ringawt.

A nihna takah chuan kan inkarah engmah awm lo mah se nuthlawi ka lo ni ve bawk nen chhungte mitmei a ven loh theih loh a, tin, Zodina chhungte, Mpi telin an ngaih a lo tha lo thei ve bawk tih ka hre reng. An lo naupang zawk bawk si a, mawi lo deuhin ka hming a ri thei tih ka hria, chuvang chuan a theih ang anga fimkhur hi ka tih ngei ngei tur a ni.

School kan tan leh tawh a, ka tuina ber anih avangin naupang zirtir hi ninawm ka ti ngai lo. Ka vannei a, ka subject hi nuam an ti ve viau in ka hre bawk, naupangte nen kan inlaichinna a tha a, an mimal tin hi ka zir ve nasa hlawm bawk a, an theihna leh an phak tawk pawh ka hre ve hlawm viauin ka hria. Chu chuan nasa takin anmahni zirtir kawngah min pui a, an result hian min tilawm ve em em thin.

Ruah a sur bur bur reng a, scooty ken na chi rual a ni lo. Mpi lah chu nihnih ngawt school a chawl tawh a, a natna benvawn a ruhna a chhuah leh vang a ni. Ani a awm chuan hetiang niah hian a nau a inthlahtir thin a, min rawn sawm kual mai thin a, vawiin erawh chu keimahin ka inngaihtuah a ngai dawn a ni. Pawn ka chhuah chuan tlemin ruah chu a lo tlem deuh a, taxi lo phar tumin ka han chang deuh a, kan in piah deuha car ding reng atang chuan Zodina chu a rawn dak chhuak hlawl.

“Lokal rawh ka thlah ang che” a rawn ti a, mak ti angreng deuh tak hian ka kal ve tat ho a.

“Enge tun ang hunah I tih a?” ka thut luh pah chuan ka ti a.

“U Mpi a kal thei si lo a, ka rawn thlah dawn che” a ti ta anih chu, ka va melh a, chiang zet hian min lo melh ve reng.

Engmah sawi tawh loin kan tlan ta mawp mawp a, tunhnaiah min biak dan reng rengah hian engtin emaw tak nuam lo ka ti a nih kha, tunah lah min rawn hruai ringawt a, nuam ka ti thei hlawl  lo a ni.

“Zodin, ka lawm lutuk. Mahse, tiang hian ti tawh suh” school kan thlen chuan ka ti ta tawp a.

“Engvangin nge ka theih loh?” a ti.

Ka chhanna beisei zetin min melh a, mahse, chhang loin ka kalsan. Ka rilruah a awm nileng deuh zak lehnghal, hemi ka duh loh vang hian hlat ka tum reng a ni.