UKIYO 10

Ten

Ka nu nen bazaar lamah kan inzui chhuak a, inchhung mamawh kan lei hnuah ka nu kawr tur kan han zawng leh a, a duh khirh thei bawk a, kan zawng nasal eh viau. A tawpah Zodina te dawrah kan lut hlawl a, kal tlang ka tum viau na in ka nu a lut ta si a, ka zui ve lo thei ta lo. Ka hlauh ruk ang ngeiin Zodina chuan dawr a lo nghak a, min hmuh chu a inbeisei bik chiah lo aniang a lo phawk deuh hru mai.

“Zodin, in dawr a ni maw?” ka nu chuan a han ti a.

“Aw ni e, hei vawiin bak chu dawr ka buaipui hman tawh dawn si lo a, inchingfel nan ka hmang ve a nih hi” Zodina pawh chuan tha takin a lo ti ve a.

“I hna tlin thute kha kan lo hria a, kan lawmpui tak zet che a ni” ka nu bawkin a ti a.

“Ni e, hna hmuh hi a lo pawimawh em a, hna sang tak tih tur ni lo mah se ka lawm tawk ve khawp mai” min en reng chung chuan a ti a, ka hawi sawn ta ringawt.

Ka ding reng chu chair min rawn pe a, ka lo hmu lo der thung. An kawr khai vel chu uluk hmel takin ka thlir lui a, a nui ri hak chu ka hre reng.

“In tha zel maw?” a tih chuan ka inher a, amah hmachhawn zawngin ka ding a.

“Tunen chuan?” ka tawng nem vak lo.

“Nang berin I hriat loh te chuan ka hre bik nang” a dar a chhin ak a, a khi suk bawk. “Nge, midang I lo hmu leh tawh zawk?” a aw chu a chang fak a, a hmaa a tawng kam nen chuan a in ang tawh miah lo.

“Thudik I hriat loh chuan ngawi mai mai rawh” ka ti ve ta hmak.

“Dingpui, min tina asin”

Chutah zet chuan a hmaa a lo inlak paukhauhna te thiahin a awm tih ka hre ta, hnem ka chak a, mahse, a rem tawh lohzia ka hre ve reng si.

Ka nu a rawn chhuah tawh avangin ka ngawi ta a, pawisa te an inpek hnuah kan chhuak ta. An dawr kan chhuak tur ka va hawi chuan min lo la en ve reng, ka thinlung hi a na veng veng.

Mpi te inah ka leng a, an pa a zin avangin tlai chaw ei nghal turin min ti a, pawi ka ti vak lo. A insuk chhungin naute ka lo awm a, an naute lah hian min duh ve em em a, ka hmuh khat chuan a ka ngai ve thei viau.

“Thiannu, Covid-19 hian kan ram a rawn thleng ve mai dawnin ka hria” bathroom atanga a rawn chhuah chuan a ti a.

“Ni e tiraw? Rin aiin a hlauhawm hmel tlat” ka lo ti liam puat a.

“Tunlai chu ka chhiar nasa lutuk a, ka rilru hi hah leh ut ut zel. Micky lah hi tun thla chu an la cham hmel sia” tiin an pa Delhi lama training a awm mek chungchang chu a sawi a.

“Chuti mai chuan a rawn thleng bik lo ang. I rilru tihah lo phawt la” tiin ka han hnem ve a. Anihna takah chuan kan ram pawh hi a rawn thleng lo ang tih a sawi theih tlat lo, ram dang hian an buaipui mup mup mai si a.

Rawng kan bawl mawlh mawlh lai chuan kawngka a rawn ri rak a, Mpi nen chuan kan hawi rual thawt a, Zodina leh Becky an rawn inzui lut chiah. Kan inhmuh chuan kan inen deuh hu a, hmuh kan inbeisei lo dun viau ang.

“Khawnge in kal dawn a?” Mpi chuan a lo ti a.

“Sawlai lawkah sawn kan kal a, kan rawn kawi mai mai” thutthlak pahin Zodina chuan a chhang a.

Becky chuan min en duh vel tawp, ka che chu ka buai phah duh der lo.  Room-a an inzui lut lai chu ka mitsirin ka hmu reng a, Mpi chuan min melh leh zauh thin. A nuam lo ka tih a hlau tih ka hre ve reng a, ka nuih sak a, a thaw chhuak hak. A hnu rei vakloah chuan inhau thawm a rawn ri a, Mpi nen chuan kan inmelh tawn sek. An thawm a ring tan deuh tihah Mpi chu a va lut ta a.

“Kan inah khatiang khan rawn awm ringawt suh” a tih vel chu ka hre phak.

An awm deuh reng hnu chuan an rawn chhuak a, Becky chu a mit a sen deuh ram a, Zodina chu thutthlengah thuin a ngawi ngul bawk a, hmuh an hrehawm a ni deuh tawp.

“Zodinthar, Becky kha va thlah rawh” Mpi’n a ti a.

“Engvangin nge ka thlah kher ang? Amahin a rawn kal thei anih chuan amahin a haw leh thei tur a lawm” a lo ti hmuk a, en pawh a en duh lo.

“I hre ve khawp ang” tih pahin Becky chu a chhuak tau ta a, Mpi chuan Zodina chu a melh tlawk tlawk ringawt.

“I awmdan hi a tha lo emai” Mpi’n a ti dek dek a.

“Hetianga ka awm chhan hi tu vang nge tih hi ngaihtuah hmasa rawh u” tih hluk pahin Mpi te room ah chuan a va lut ta daih a.

“Thiannu, ka zah hle mai che” a ti sap a.

“A ho lutuk, hrehawm tih chhan tur engmah a awm lo ania” tiin ka han hnem ve a. Kan boruak a ti nuam lo zo vek.

Ka phone a rawn rik chuan ka han ban vat a, Muansanga a lo ni. A hna a zawm leh tak hnu hian kan inbe khat angreng viau, Zodina laka ka rilru a hriat hnu khan hun thawl min pek a tum thu a sawi a, a sawi ang ngeiin min nawr ngai lo. Min nghak dawn tih erawh chiang takin a sawi a, engmah ka tiam thei lo tih ka hrilh pawhin a rilru sawhsawn a tum chuang lo. Min be khat a, a chang chuan ka ngai ve lek lek thin. A chhan chu ka huphurh em em krismas lai khan ka bulah awmin min thlahthlam ngai lo a, ka tan a hlu a ni tawp. Mahse, amah nena hun hmang dun tura ka inngaihtuah apiangin Zodina hi ka thinlungah a rawn lang lian leh thin. Ani tluka ka thinlung ka pek theih hi ka tawng mai mai dawn lo te pawh a ni mahna. Naute a tah rin avangin pawnah ka chhuak a, veranda ah chuan chhuakin kan inbiak zawm a, ka pa chetchhiatna vel a rawn sawi a, kan nui dun hak hak a. Amah Muansanga hrim hrim hi kawm nuam tak,  eng pawh titi pui theih ang hi a ni a, thian ang takin ka ngaina. Chutia kan nuih dun hak hak lai chuan Zodina a rawn chhuak thurh a, min melh vang vang a, ka dinna bula a bike chu a rawn pan a, ka lo ding sawn deuh a. A kal mai dawn emaw ka tih lai chuan a rawn ding ve ta reng a, rilru a la peng lo thei lo.

“I buai aniang, kan inbiakah I rilru I pe tawh lo, nidangah ka lo be leh mai ang che” Muansanga chuan min hrethiam tak hian a ti a, kan inbiakna kan titawp ta a.

Inchhung luh tumin ka inher a, chutia ka che chu rang fe hian ka banah rawn vuanin min kuai her pawp a.

“A thiam lo zawk ni siin engvangin nge I hlim em em bik? Engvangin nge kei hi ka hlim ve loh?” hriatthiam har zet hian min melh a.

“Ana nia” tiin min vawnna chu thin thlak ka tum a, a aia nghetin min hmer salh.

“Dingpui, lo let leh rawh. Ka chunga I thiltih zawng zawng hi ka theihnghilhsak ang che” tiin bangah chuan min nawr bet a. Mpi te in hi kawng an hnuai chiah a ni a, kawng atangin tumahin min rawn hmu thei lo.

“Zodin, min thlah rawh” tiin ka han nam deuh a, a chet dan engkim hi a a tak tak nise ka ti ve tak zet. Mahse, min tihnat bak tum a neih ka ring lo, min tiel zawng hlirin a awm a, tin, tunah phei chuan Becky nen an inkawp, engtikawngmahin kei hi min thlang zawk lul lo ang.

“Engvangin nge ka thlah che hi a ngaih bik ziah? Mawh.. “ a thaw chhuak halh a. Chutah rawn kun hniamin ka biang chu a hmuiin arawn nul a, ka tah a chhuak zawk.

“Min zah lo emai” ka mittui chu a tla zawih zawih a.

“Dingpui” min vawnna chu thlahin a ding tha nghal a, min ngaihtuah hmel zet hian ka mittui a hru a.

“Ka zahawm lo tih ka hria, mahse, ti em ema inzah loh tur a ni hleinem” ka ti a.

“Ka tihpalh..” chung lam a melh a, boruak chu a hip leh kawk a. “Eng thil nge ka tih hrep” tih pahin a bike ah chuan a chuang a, a tlan chhuak ta a. Ka rin dan ang chiah a ni, min tihnat hi a chak ngawih ngawih tih ka hre tawh. Keimah zawkin kan inkar ka tihtawp khan a tina a, ka nat let hi a duh tih ka hria, chutiang ni lo se chuan hetiang hian min kalsan reng reng lo ang.

Inchhung ka luh chuan Mpi room ah a lo awm hlauh a, bathroom ah ka tlan lut nghal a, ka hmaite chu ka phih a, ka thiannu hian ka awmdan hi a man leh dawn tho tih ka hria, mahse, khatiang tehtawpa hmachhawn kha ka hreh a ni.

Mpi te ina thil a thlen atanga karkhatnaah chiah Covid-19 chu India ramah positive an hmu ve ta. Lockdown kan hriat ngai reng reng loh chu tawngkam mikhual lo taka chang chhunzawm turin India ram pumpui lockdown a ni a, Mizoram ngei pawh kan bang bik lo. A hlauhawmzia an tlangaupui nasa bawk a, kan ramah a la thlen hma hauhin kan inhlau nghal ta thum mai. School pawh kal zawm theih a ni lo a, exam zo tawh leh la zo lo pawh an awm nghal nuk. Keipawh ka subject an la exam ve hman loh avangin rilru a hah duh ngei mai. Chutia khawimah chhuah theih tak loh ah chuan inah kan tawm ta ngawt ngawt a, holiday thlahlel em em thinte pawhin chutia chhuak loa tawm reng chu kan lo peih bik reng reng lo.

“Hei chhuah phalna ka rawn la a, damdawiinah I pitei I riahpui a ngai tlat mai” ka nu in a ti a, ka pitei hian nau a nei dawn a, lcokdown vangin duh ang angin a chhungte an rawn zin thei ta si lo a, kan chhungkaw hoin kan buaipui a ngai dawn a ni. Chaw ka eikham hnuah ka nauin min va thlah a, damdawiina lo awmpui mektu an nau tleirawl chu ka nau rualin a haw ve ta thung a.

“Tun tum ka nau nei tur chu ka huphurh ve riau a, heng kan boruak tawn mek vang hi a niang” tiin ka pitei chu a titi siam siam a, a bulah thuin a ke vung al chu ka hmeh sak a.

“Hlauh lo tur chu a ni lo a, mahse, tunah chuan hlauh viau kha awmzia a awm lo ania. Tha takin I nei anga, thlamuang takin inah kan haw leh vat dawn alawm” tiin ka han hnem ve a. Chumi zan chu harsatna em em awm loin kan muhil a, ka mu tui phian lehnghal. Zan lama kan mut that tho avangin chhun lam pawh awm tlang ka tum a, canteen ah ei tur lamin ka chhuak a. Ka tum loh deuhin Chhuanawma te ka hmu a, min rawn hmuh ve chuan han kalsawn daih a rem tawh lo.

“I dam maw?”tiin min rawn be hmasa a.

‘Aw, dam e, enge in tih?” tia ka zawh chuan ka bulah  rawn ding a.

‘Ka nu a chesual palh a, hei karkhat kan awmna a ni tawh” tiin a nu tluk dan velte chu min hrilh a. Chutia dawmdawiina a awm tih ka hriat chuan han lan ve nghal loh chu nuam ka ti chiah si lo a, an awmna ward lam pan chuan ka zui ve ta a. Corridor kan kal lai chuan Becky a rawn lang thut a, ka phu deuh zawk. A rawn kal deuh hlawl hlawk a, rum zet hian min han melh hram a, khawi hmunah pawh hmuh tur a awm a nih hi ka ti rilru mai mai a.

“Tunge?”Chhuanawma chuan a ti nghal zat.

‘A.. ka hmelhriat ve deuh reuh” tiin ka chhang ringawt.

“Khati fahrana a rawn melh che kha a mak em a” a ti a, ka chhang tawh lo.

Ka rin aiin Chhuanawma nu chu a lo insawh na a, min hmu chu a lo lawm ve khawp mai. Dik tak chuan ka mo lai khan sual ve hle mah se chan chhe zawk an han nih hi chuan rilru tha lo put hi a theih bik lo, khawngaihna leh lainatna hi chawpchilh takin kan lo nei ve thin a lo ni. Ka han thu deuh renrawn a, ka pitei kha amah maia ka kalsan vangin ka ngaihtuah ve tawh a, ka pawisa ah angang chuan ka kan a, ka chhuah san ta a.

Ka pitei chu a lo tal a lo tal tawh a, ka tlan lut vat a, a remna lai laiah chuan ka va chum deuh nawk nawk a, kan bula awm ve chuan min lo nuih thaw hlawm a.

“Enkawl thiam bik lo hle mai maw” pakhat chuan a lo ti a, ka nui ve ta ringawt. Kan chhungte chu phone a biain ka pitei awmdan chu ka sawi zung zung a, an rawn thleng ve vat turah ka ngai.

Darkar thum a ral leh chuan ka pitei pawhin fapa duhawm tak mai a nei ve ta, fapa an awt bawk a, an lawmpuiawm e. Zan lamah midangin an riahpui tawh dawn avangin haw turin ka inbuatsaih a. Ka nau chu biain min rawn hruai turin ka ti a, hospital kawtah chuan ka lo nghak a. Chutia ka nau nghaka ka thut lai chuan ka bulah motor a rawn ding a, Zodina nu chu tiffin nen a rawn chhuak ta a, a rawn chhuah rual chuan min rawn hmu ve nghal. Ka nuih a, a rawn nui ve suk a.

“Enge I tih?”tiin min be hmasa a, ka pitei nau nei ka awmpui thu chu ka han sawi a, “Enge I tih dawn zawk a?” ka ti a.

“Zodina a bike in accident a, hei kar khat dawn chu kan awm tawh” a tih chuan ka phu deuh zawk. Kan inhmuhna kha karkhat a liam vel tawk a, chutianga a lo awm reng chu a zia lo ka ti hle.

“A va zia lo em aw, lo tha leh vat rawh se aw” tiin kan inthlah a, ka rilruah a awm zui reng.

In ka thlen hnu chuan ka inbual a, engmah pawh ti peih loin khumah chuan ka bawk thlawp a, ka mu zal ta mai mai a. Ka rilruah Mpi a rawn lang zawk, ka phone chu la in ka call ta nghal a. Zodina chungchang chu inthlahrung duh loin ka zawt nghal a.

“Kan ina in inhmuh tlai khan a haw lam kha taxi nen an insu a, a ke ruh te a lo tliak a. Ka ni khan naktuk lamah chuan an chhuah theih a rin tawh thu chhungkaw group ah a rawn post zo chiah” a ti a.

‘Awi, ka lo hre si lo a, I ni nen kan inhmu a”

“Enge damdawiinah I tih a?” ka thusawi laklawh lai chu a rawn pawt chat a. Ka pitei ka awmpui thu vel chu ka han sawi leh rih a.

“Thiannu, kei chu hetia thlir tawp cheu hi harsa ka ti, Zodinthara nen hian tha deuhin inbe teh u, nang pawh hian I la theihnghilh bik lo tih ka hria ania aw” a rawn ti a, ka lo thaw hak ringawt. “Ka inrawlh lo ang ka ti a, mahse, hetia en liam tawp cheu hi ka thei tawh lo. Zodina pawh hian a hmangaih che, in tilang chhuak thiam lo, inrunluih reng rengin in khawsa a, in inti na tawn mai mai” arawn ti ta a.

Ka thiannu thusawi chu ka ngaihtuah chhunzawm melh melh a, a dik na chen pawh a awm ve ang. Mahse, hetiang zawng zawng thlen huam hian ka then a, ka kaltlangpui lo anih chuan kan lo tawrh ve na khan awmzia a nei miah lo ang. Ka han inngaihtuah tha leh a, hei leh chen hi kan kal tawh a, kan paltlang ve mai ang tih bawk chu ka thutlukna a ni.

Thenawm ina kal pawh an khap bet tlat a, mahni inah kan tawm tlawk tlawk a, chakkhai pawh a lam theih loh. Chutiang tak chuan inkharkhip hun kan hmang a, a tha ber em tih ka ngaihtuah ve vang vang thin. Hetiang reng a nih chuan hri hian min rawn run tak tak hunah ei leh barah harsatna kan tawh hman chuan hlawhtling takin kan kalpui theih karing lo a, hetia fimkhur tak sia ramri veng chunga a chhunga chengte chet lak phal se tiin ngaihdan ka lo siam ve a, kan in pawh chung ka ngaihtuahna chuan a thleng pha der si lo a.

Hun a kal leh deuh a, tlemin inkharkhip an han thlah dul deuh a, khawsak phung erawh a buai a, kan ti deuh hru hlawm niin a lang. Zan khat chu Muansanga nen kan inbia a, rawn haw thlak a tum thute sawiin an ina lengah min sawm a.

“Muansang, ka zah viau che a, mahse, min hrethiam turin ka duh che. Ka rilruah hian mi pakhat bak a awm lo, chuti maiin ka theihnghilh thei si lo a, min nghak tawh lo turin ka duh che” ka tita ringawt a. Min nghak reng tih ka hriatna hian min inthlahruntir a, ka awm a ti nuam tlat lo.

“Ka hrethiam lutuk che alawm. I hmangaih tak nena intawng leh tur hian ka duhsakna ka hlan tawh mai ang che aw” tiin tha takin min rawn thlah thlap a, tunah chuan ka rilru a nuam ve ta.

Mpi thusawi kha vawi tam tak ka ngaihtuah nawn a, Zodina hmakhua ngai inti taka kan inkar ka tihtawp hi thutlukna dik ber a ni lo tih chu ka ngaihtuah thleng pha ve tawh. Mahse, keiin ka duh leh vang ringawta Becky nen an inkar tihchhiatsak erawh ka tum lo bur. Inthen tawh mah ila inkawp tur kan lo ni ve reng reng a nih chuan kan intawng leh ang tih ka ring ve tawp tawh.

Ka phone a rawn ri ral ral a, ka insuk lai dahin ka han pickup a.

“Zodina kan turin ka rawn sawm dawn che, kan pa an quarantine zo tawh bawk a, kan inah chaw I ei nghal bawk ang” a rawn ti leh hmiah a, ka lo nui tawp. Ka buai leh buai lohte, ka remti angem tih ngaihtuah miah lo hian thu min rawn pe deuh tawp zel, mahse, hei hi kan pahnih inkara hlu ve deuh chu a ni lawi a.

Zodina te in kan thlen chuan a room ah nau nen chiah an lo awm a, chutia min hmu thut chu a phawk hra mai. Mpi leh a nau chuan ngawi rengin min chhuahsan nghal a, kawng an khar nghal hmak.

“Ka mumang a ni lo tiraw?” kan ngawih dun vang vang hnu chuan a rawn ti chhuak a, ka hnuk a lo ulh deuh zawk. Ka lu chu ka bu nghat a, min rawn ban a, ka lo thuthnaih nghal a.

“Min va tina rei ve”tiin a mittui chu khap kir tumin a han khap sak sak a, a rawn luang thla ngiai tho.

“I tan a that zawk ringin khatiang khan ka awm a.. “ ka sawi leh tur nghahhlel hmel zet hian min lo en a, “Ka lo tisual a ni” ka ti a. Engmah sawi tawh loin min kuah thlawp a, hetiang tak hian min lo hmangaih ang tih hria ila chuan engkim huamin khang hun lai khan ka kal tur a ni a.

“Ka tana tha ber chu nangmah hi I ni. Min kalsan tawh suh aw” ati ta mawlh mawlh a.

Thil thlen dan chu a mak a ni deuh tawp mai, kan inthen dan kha awlsam hmel angin lang mah se kan lo tuar nasa dun a lo ni.

“Becky nen in thlalak kha hmu kher lo ila chuan hetiang hian kan awm lo maithei a” ka tih chuan a chal a tichuar nang a.

“Vawikhat mah ani kha nula angin ka la en ngai lo. Thian ang leh nau ang bakin ka en ngai lo, amah venhim kha ka tihtur ah ngaiin kawng tam takah a tan ka ding ngei a, mahse, inngaihzawn lam hawiin ngaihbel theih tur pawhin ka la awmpui ngailo” a tita a.

Ka bula thusawi erawh kha chu ka sawi duh kher lo, a huat ve kher hi a ngai ka ti lo a, kan inkar a that a hnu, khang kha chu ka theihnghhilh tur a ni.

“Chhuanawma nen a hmuh dun fo thu leh hna sang nei lo chu kawp I duh tak tak loh thu min hrilh thin lai pawh khan awih ka duh ngai lo. Mahse, a cousin ngei Muansanga I kawp thu min hrilh kha chuan awih loh a har, ka hmu dun ve ta fo si cheu a. Khatatang khan tlem tlemin a thusawi kha ka awih chho ve tan a, hna neih vat kha ka tum ber a ni tawp. Chutiang anih chuan ka hnenah let turin ka ti lui angche tih rilru puin, min ngaidam rawh aw. I lakah rilru tha lo tak tak ka lo pu ve thin a, ka ta I ni thei dawn lo tih ka hriat khan ka na thin em a ni” a ti a.

“Ka nihna ka hrechiang a, I la inchhir mai mai dawnin ka hria a, kan kal thui tak tak hma khan inthen ila, I tan a that kha ka ring a, tun thleng hian midang tumah ka la nei thei bik lo” ka tih chuan min vawnna a thlah a.

“Muansanga nen khan in ni lo maw?”

“Becky chu I la ring tho zawk tihna em ni?” ka lo ti vet hung.

Rei lo chu a inngaihtuah ve a niang, min melh reng hnu chuan zawi muangin a thutna a siam rem a, “Nangmah chauh hi ka ring tawh ang che” tiin min nuih ta sak a.

Hmangaihna hi kan duh hun huna awm tir a, tih tawp theih a lo nih lohzia ka hre chiang ve ta. Second khat chhung lek hian thinlung a kehsawm thei a, a dam leh nan hian second khat lek pawh hi a tawk tih thlengin.

“Ka hmuh cheu khan ka rilru a na thei lutuk a, ka nau hian a hmangaih che tih ka hre si a, mahse, I rilru zawng zawng ka rawn hre ve si lo a, ka nau anih vanga near che kha ka duh si lo a, a hrehawm thei asin aw” tiin kan hun tawn mek min lawmpui em emtu Mpi chuan a ti ve mawlh mawlh a.

Chhun lamah tih tur em em a awm loh thin avangin Zodina pawh a rawn lang ngun viau a, ka chhungte pawh hian min dodal duh tawh lo, hmangaihna hi pawh then mai mai chi a ni lo tih an hre ve miau a.

“I nu kha ka zah thei lutuk a, min pawm theih hi ka ring thlawt lo a” te ka ti mai mai thin a.

“Ka nu a nihna angin a fapa hma hun hi chu a ngaihtuah ve nasa thin tih ka hria alawm. Vawikhat mah then tur che hian min ti ngai lo, mahse, a tawpah rilru na zawk leh a tuartu zawk ka nih erawh a hlauh thu a zep ngai lo. ‘Ka hlauh ber chu an pasal hmasate hnenah let duh hunte an nei anga, na taka tuar hian a kalsan angche tih ka hlau ber’ a ti thin a, min dodal ngai lo” a tih chuan ka lo nui var var a.

“I nau chu call tawh rawh” tiin a phone chu ka pe a, a ke a la dam loh vangin a nauin a rawn leng tur hi a rawn dah tawp a, a haw dawnah a rawn hruai leh mai zel.

“Ka la haw duh hleinem” tiin a phone chu a lo vai kiang a.

“I nau hian a ning thei ngawt ang” ka tih chuan a nui hak a.

“A ning ngawt ang, ka nu hnenah pawh’ innei tawh rawh se ka hruai peih tawh lo’ a lo ti alawm” nui sung hian a ti a.

“Lockdown zawh hi chuan in training mai tawh lo ang maw?’ ka tih chuan a lu a thing a.

“Chuti maiin he hri hi a reh dawn lo, kumin chhung hi chuan a theih ka ring lo. Theih loh char char se ka ti” duhthawh tak hian a ti a.

“Hmabak neih kha hrehawm awm e” ka lo tih chuan a hmui a tipawrh a, a hmui sih tumin ka lek uai a.

“Nupui kutthlak hrat deuh neih ka duh dawn lo ania” a ti a, ka kut chu ka thlah rang lutuk. Innei tur anga ka inngaihtuah apiang hian ka awm a nuam lo ziah, ka insitna hi a thar leh thin.  Min ngaihtuah hmel zet hian ka darah a vuan a, “Hey, enge I lo ngaihtuah leh tawh” ka hmelah a lo chhiar thiam leh vek tawh aniang.

“Zodin, kan inneih theih tak tak hi I ring em?” ka ti a.

Min kuah a, ka hmai hliahtu ka sam chu hui kiangin chiang zet hian min en a.

“Ka neih loh che chuan tuman an neih che ka phal ngai lo ang. Hei leh chen hi ka tuar tawh a, tawrh belh hi ka tum tawh lo hrim hrim. I insitna hi paih bo daih tawh rawh aw” tiin min han hnem letling a, ka tan hian a hlu thlawt.

“Ka lawm e aw” tiin a awmah chuan ka hmai ka phum kak a, a naupanna hi ngainepsak ka duh lo. A hmathlir tih hlawhtlin a tumna kawngah hian theihtawp chhuahpuia amah hi vawn tlat zel ka tum tawh ang.

‘Ni a tla tep, min thlirpui teh” tiin thlang lam bathlarah chuan kan inkai chhuak ta a, chu lai hmunah chuan intiamna tahar neiin kan dam chhung zawng chuan he hun tawng dun fo tur leh engang pawhin kan hun kal tawh vanga harsatna a lo thlen pawha invuan tlat turin kan intiam dun ta a.

note: ti tawp tawh mai ang u, a kual a kual chuan a zindagi palh ang 😂 Story thar neih leh vat tum zawk ang u aw. Min chhiarsak a, comment taima em em te, in zavai chungah ka lawm em em e🥰