UKIYO 2

Two

Khami hnu khan Zodina chu a reh ve ta hmak a, fiamthu ho te te ka sawipui thin a nih avangin a reh ve deuh chu a khawharthlak, mahse, hetia kan inbiak loh hi a tha tih ka hrechiang a, pawi ka ti lo. Ni tin a ngaitein school lamah ka liam a, Mpi nena ni tin hun hman dun theih hi nuam kan ti tawk ve em em a, lungkham kan nei hran lo.

“Vawiin tlai chu Micky nen kan inhmu dawn a, min haw san mai dawn nia aw” a ti a, a bialpa rawn haw lai a nih avangin tunlai chu an inhmu ngun ve viau.

Micky hi chhim lamah hna thawkin a awm a, a awm tirh chuan a rawn haw zing ve thin a, a rei hnuah erawh a theih bik loh a ni ang, a rawn haw zeuh zeuh chauh. Mpi bulah inneih a duh thu a sawi fo a, ani lah hian chuti maia pasal neih hi a ngam thei si lo a, ka nawr ve fo. Hetianga chhuanlam a siam zel chuan Micky hian a thawhna lamah a neihsan lo ang tih a sawi theih loh, kan hmelhriat tam tak pawh hetiang hian an buai fo tawh si a.

“Inneih a sawi leh chuan I ngaihtuahna hmang ve tawh tak tak rawh aw” ka ti a, a nui leh vak vak ringawt.

“Zanah ka lo bia ang che” tiin kan inthen ta a.

Zanah chuan a sawi ang ngeiin min rawn bia a, a rilru a rawn hah lehpek hle a, tun tum chu a rilru hah dan pawh a dang ve ta in ka hria.

“Micky chuan palai rawn tirh a tum a, ‘I duh loh chuan min nei duh loah ka ngai tawh ang, ka nghak rei ve tawh che a, ka chhungten min nawr nasa bawk si’ a tia, ka rilru hi a hah ve tak tak tawh” a rawn ti a, ka lo nui deuh suk.

“A thinrim har ka ti ngawt zawk asin, a duh ve em che a, chutiang chu nilo se chuan hmanah I chan daih tawh ang” ka lo ti a, a nui ve ta hak.

Ka ngaihtuah chhunzawm neuh neuh a, Mpi hian pasal a neih chuan hrehawm ka ti ngawt ang. Thian ka kawm tam si lo a, engkim ka tihpui thin ber a nih avangin ka lo huphurh ngawih ngawih. Chutih rual chuan tuna a neih loh chuan kum hi a kal chak si a, a nei lo hlen thei takngial dawnin ka hre bawk si, Micky dinhmun ka ngaihtuah phei chuan val senior an ni ve der tawh mai si a, a nawr pawh chu awm ka ti.

Chutianga thu a kal vel mek lai chuan mipa lam an hmanhmawh ngang a ni ang, palai an tir ta rum rum a, Mpi tan lah Micky tluka mipa tha an tam bik lo ang tih a rin theih tho si a, hreh ru tak chungin aw a pawh ve ta ringawt kha a nia, rei rial loin palai hmel a hmu ta reng a ni. July ni 2 a innei turin an inbe fel ta, thla khat ngawr ngawr inbuatsaihna hun an nei thei dawn. Ka pasal neih khan ka thianah a tang a, tunah ka tang ve thung dawn a, anni chu an damchhung daih inneihna ni thei se ka ti. Ka dinhmun angah hian rawn awm ve lo sela, hlim takin awm se ka duh ber.

Ni tin hna kan lo nei ve bawk nen inbuatsaihna pawh a kal chak hlei thei lo, zan lamah erawh tih tur a tam thin avangin ka phei ve deuh reng a, Zodina hmuh tur a awm ngai lo a, ka lawm ru viau na a, engtin emaw tak hian khawharthlak ka ti. Chutiang chuan thla khat dawn kan han buai ve nak nak a, an inneih hma zanah ka riak phei a, mut tam kan mamawh tih hre reng chungin kan han titi tlaivar deuh thaw tehreng a nih kha. Zing ka thawha ka hmuh hmasak ber chu Zodina a ni. Room atanga ka chhuak chiah chu a thawmhnaw khai chung hian room-ah rawn luh a lo tum a, min hmuh chu a inring bik chiah lo nge a hrilhhai hmel ve deuh. Rei erawh a meng buai lo, a nui sak a, room ah chuan a rawn lut ta a. Kei erawh chu inphihfai turin bathroom lam ka pan tlang a, ka mit kham urh chuan ka awm a tinuam lo.

Chaw kan ei sawk sawk a, min cheituturte an rawn thlen chuan room ah kan lut leh ta a. Mpi mit sen rum chu kan han nui leh thin, kan meng rei lutuk chu kan tuar dawn chauh a nih hmel, a rukin kan innuih leh suk zel. Ka hmai an chei zo a, ka sam an chei dawn chuan Zodina a rawn lut nulh a, khumah a thu a, uluk fe hian min han thlek a, ka hmu lo der ta ringawt.

“Hetiang hian ti zawk ula a inhmeh ka ring” tiin ka sam chu a rawn kawk kual a, min cheitunu lah chuan, “Ni e, a inhmeh zawk ang” tiin a tihdan hmasa chu a han phelh leh a, engmah sawi tur pawh ka hre lo.

“Zodinthar, ka sam hi rawn en ve teh, ka pawimawh zawk aw” Mpi chuan nui pahin a rawn ti a.

“I tap hmelchhe leh dawn tho a, a ho emai” a ti duh lek.

“I chhe zep zuap e a, va chhuak tawh teh” a ti a, an unau chuan an nui dun var var a.

Darthlalanga ka hmel lo lang chu hmuh nuam ka ti ve tawp, ka pasal neih khan ka nei holam bawk a, engkim kha a awlsam tur angin kan ti a, makeup artist te ruai ve tho mah ila ka duhzawng pawh ka thlang ngam lo kha ania, vawiin ni zet chu ka confi ve khawp mai.

‘I mawi tak zet” Zodina chuan ka beng bulah a rawn ti sap a, a kal sawn nghal daih.

Inneihna pawh tluang takin kan hmang zo thei a, Mpi hnuk ulh deuh reng chu ka hrethiam ve ngang mai. Ka mawhphurhna ka hlen chhuak thei chu ka lawm hle a, school lama la inhmu fo tur kan nih hrerengin ka mittui chu ka dang kir thei hram hram. Micky thianten an riahna tur an lo hauh fel sak a, khawiah nge tih erawh kan hre bik lo. An room ah chuan a thawmhnaw mamawh tur bag ah ka khung a, an pa thianten min lo tur chhen bawk nen a hmunah inbualna tur a awm dawn a ni ang tiin inbual pawh a inbual hman ta lo. Pawn kan chhuah chuan motorah an lo awm far tawh a, kal ve tura min tih luih tlat avangin ka hnial ta lo kha a nia, a nihna takah chuan Micky thiante hi tumah hriat ka nei lo a, ka huphurh ve reng.

“Mate, hrehawm I ti awm sia, Zodina ka be tawha, a bulah I chuang daih dawn nia” Mpi’n a tih chuan ka lawmna leh lawm lohna a inzat vel chiah.

A sawi zo chiah a, Zodina a rawn thleng chiah bawk. Duhthlan tur awm chuang hek lo, a motor ah chuan ka chuang ta nge nge a. Motor danga leng lo pahnih an rawn chuang tel ve bawk a, boruak an ti ziaawm deuh. Hotel lam kan pan dawn emaw ka tih laiin khaw pawn lam kan pan mek a, khawiah nge riah tir an tum tih ka hrethiam ta hauh lo.

“Hotelah an riak dawn emaw ka tia” ka ti sup a.

“Mopa thianpa te farm ah khan nia, a nuam lutuk” chuang ve pakhat chuan a lo ti a, ka lu ka bu nghat.

“A vawt I ti em?” Zodina chuan a ti a, ka ban ka lo tawm leh thin chu a lo hmu a ni ang.

‘Ti lutuk lo e” ka ti a, ka zam deuh nge ni dawn ka pangngai thlawt lo.

A hmun kan thlen chuan an sawi lawk ang ngei khan a lo nuam hle a, high mass an dah chuan an farm chu a chhun eng kulh a, zan a ni tih pawh a hriat loh lek lek.

“Awi, I hlau angem?” an mutna tur ka siampui lai chuan ka ti a.

“A enkawltute chhungkua an awm ve an tia, ka hlau lo sawt” a ti a, keimah ang bawkin a dawih tih ka hrechiang a, ka ngaihtuah veleh chhawng a ni.

“A hmun erawh a nuam thlawt, khaw en laia fan ka chak” ka ti a.

“Shooting neih nan kan hmang dawn a ni awm e, I duh tawkin I fang dawn nia” a ti a.

Micky chu a rawn lut ve a, beer pahnih hi a rawn keng lut a, dawhkanah a rawn dah a, Mpi nen kan nui suk. Beer hi a hranpa chuan kan inngai lo a, mahse, ka pasal neih khan inneih zanah a tha an tih avangin ka in a, can khat pawh ka in zo thei lo. A duh lo chung kha ka in tir ve a, kan chet buai dun zia kha!

“Engtin niang?” ka tih chuan a va hawng nghal pawp a.

“I pasal neih khan ka duh lo chung min in tir a, I in ve dawn hi a ni tawp” tih pahin min pe a, hnial miah lo in ka lo in vei pap. A chanve vel ka in chuan ka lu a rawn hai deuh tih ka hre thei. Kawngkhar a rawn ri deuh rak a, Zodina a rawn lut, ka beer ken lai chu a melh vung vung a, min laksak hmak.

“I in ve chak mi?”Mpi’n a tih chuan a u chu a melh no lo nasa mai.

“Kan haw tawh dawn” tih pahin min kai a, Mpi nen kan ding rual thawt.

“Enge I hriat a?” Mpi bawkin a ti leh a, sana ka en chuan a lo tlai tawh zek.

“Thiannu, kan kal mai ang” tih pahin ka siai a, a inthlahdul ve nghal.

Kan tlan liam thleng chuan min thlir a, Micky thiante thawm erawh chu a la tha viau. Ngawi rengin kan tlan mawp mawp a, tumah chuan tawng kan tum lem lo. Kan veng kan thlen chuan kawng kawiah a motor chu a tiding a, a ngaihna hre lo zet hian ka lo melh a.

“Naktukah pawh ka rawn hruai ang che, ka telloin shooting in nei lo ang” a ti a, a hmel chu a tak ngal a, ka awm a tinuam lo vek.

“Zodin..”

“Ka hria, nuthlawi i nih vanga min hnar i tum a nih chuan awmzia a awm chuang lo ang. I nihna engkim hre chung leh nang aiin ka naupang tih hre vek chungin I laka ka rilru puthmang hi ka tilang zel tawh dawn. Min lo hnial emaw kha tum duh suh, chumi hnuah min duh ve thei thlawt lo a nih erawh chuan rilru ka la siam tha leh ang” a ti ta a, ka thaw hak.

Tun ang tluka ka hun kal tawhin min vuak nat hi a awm lo ang, Zodina hi mipa dang ang chuan ka en ve lo tih ka inhre daih tawh. Mahse, ka nihna ka hria a, ka insit ngawih ngawih avangin theihnghilh ka tum ve tang tang a, hetia a awm tlat chuan ka duh loh deuh hi a thlen ka hlau a ni.

“Kal phawt ang” ka ti a.

“Dingpui, naktukah emaw, tuk leh ah emaw pawh ka rilru hi a danglam dawn chuang lo a nia” luhlul zet hian a ti a, ka lo nui lui sak.

Khumah chuan ka bawk thlawp a, Zodina hmel thutak leh fiamthu tel miah lo kha ka mitthlaah a rawn lang leh thin. Keimah chiah ka inngaihtuah thei lo, Mpi hian ka rilru puthmang hi hria se a thiannu hi min dem viauin ka ring. A nau tih ka hriatsa reng nen boruak nei tur anga ka inngaihtuah hian ka thiannu hmel ka hmu ngam lo ang. Kum a liam fe hnua ka mipa duhzawng tak ka neih leh hmasak hi engtin nge rilru na miah loa ka kal tir ang?