UKIYO 4

(Ads hi vawikhat click a tawk aw)

Four

Krismas urlawk zan a ni a, inkhawm ban lamah Zodina rawn kal a tum avangin ka haw tlang nghal a, in ka thlen chuan a lo awm reng tawh. Kan upa ber pasal nei tawh te chhungkua an lo phei ve bawk a, naupang nen kan ri nghal chel chul mai. Ka nu leh ka pa an lengkhawm nghal a, ka naute pahnih an thiante nen hmangho turin an chhuak tawh bawk.

“In chhuak ve dawn em?” ka u in a ti a.

Zodina ka va melh a, a lu a lo thing.

“Chhuah dawn pawh a awm chuang lo” ka ti a, ka u te chhungkaw bula awm chu hrehawm a tih ka rin nen engmah a sawisel lo.

Ka u hi a tawng duh ve a, reiloteah an innel nghal vat reng a, ka u pasal U Puia nen ar an talh a, kan boruak pawh a nuam ve tawp. A khat tawkin U Puia’n “ Ka tirhkah tur” a lo ti deuh chhen bawk a, Zodina pawh a nui deuh suk suk reng.

“Hrehawm I ti lo mi?” inchungah kan thu a, ka ute nupain ar an kang mek a.

“I chhungte nena hun hman tam hi a tha ka tia, tun ang hun hi inpawh tlan hun tak a ni tih ka hria alawm” a ti.

“Chutiang zawng pawhin ka lo ngaihtuah hleinem” ka ti ve mai a.

“Hei vang tak hian alawm a upa zawk nih hi puitling nihna a nih kher loh” te a ti vel.

“I chhungten an hriat hunah chuan an hau hrep dawn che sia” ka tih chuan a mitko a han san deuh ak a.

“Chutianga hauh rual pawh kan nih si loh, chu lo bakah puitling kan ni ve tawh a, duhthlanna chu kan kutah a awm ve ang chu” a nui rah rah a. “I chhungten engtin nge an tih che?” tiin min zawt let a.

“Kan inngaihzawng tih pawh an la hre lo” ka tih chuan a tum nghal hmak. Ka nuih pawhin a nui duh lo, a kawngah ka va kuah a.

“Ka unaute hi chuan engtinmah min ti dawn lo a, ka nu leh ka pa hian engmah an la sawi lo a, engemaw hi chu an la sawi ka ring a” ka ti ta a. Amah en thei turin min kuai her a, “Engpawh lo thleng se ka dinna ngaiah hian ka ding tlat dawn a, nang pawh ka ring tawk che” a ti a, min kuah ta hle hle a.

Kan hma hun tur hi ngaihtuah vak vak ka duh tawh lo, kan tawn apiang pawm thiam thei tura insiamrem theih zel ka tum. Amah Zodina ka tawn atang hian huaisenna tam tak ka nei a, ka hun kal tawh min tina tu pawh ka theihnghilh phah ve ta fo. Hetia ka let leh hnu hian min beiseia min umzuitu pawh ka tawng ve fo, tu lakah mah ka inhawng ngai lo. Chutiang a nih laia Zodinthara’n ka thinlung a rawn nei hmak hi chu a mak ka ti ve thin.

“Zanin chu thil tih chak deuh ka nei a” a tih chuan ka han melh chho deuh ha a, zawimuangin ka biangah a rawn dawm a, min rawn fawp ta a. Ka lo nui suk tih a hriat chuan min thlah a, lawm loh hmel deuh hian min melh ralh a, “Lo nui tawh miah suh” tih pahin uar fe hian min rawn fawp leh a.

Dar 1 velah haw turin kan kawtah kan indinchilh ran a, khua a vawh deuh avangin ka shawl chu ka bahtir a, haw a hreh deuh tung chu ka nuih a za.

“I thlen veleh min lo hrilh la aw” ka ti a, a bu deuh nghat nghat a.

“Naktukah inkhawm banah lo leng leh ta ila ka ti lutuk angem?” a tih chuan ka lu ka lo thing a. Kan inbe tha leh dawn nia tiin kan inthlah thei ta hram. Kan inhmu zo chauh a, whatsapp ah dar 4 thleng thak kan inbiak chhunzawm leh nghal zat. Message type ka peih loh thinzia ka inhrechiang a, ani nena inbiak nan erawh ka lo type peih ve lutuk a lo nih hi.

Krismas pawh hlim takin kan hmang zo a, kumthar lo thleng tur atan rilru a inbuatsaih chho leh mek. Engtin nge kumhlui kan thlah ang tih chu titi tlanglawn ber a ni a, kumthar atana kan inrelbawlna ai mahin kumhlui thlah dan turin kan rilru a lapeng hrih zawh niin a lang. Inchhungah tih tur neuh neuh ka neih avangin ka buai nileng ve zak a, zan lamah Mpi te ina kal kan tum avangin ka inhmakhua lawk ve a ni. Ka awm a nuam lo nileng zak a, a chhan pawh zanah Mpi bulah Zodina nen inpuan kan tum vang a ni. Ka thiannu hian engtin nge a lo dawnsawn ang ka hre lo a, ka thin chu a phu leh dup thin. Ani laka rei tak thuruk neih ka duh si loh avangin Zodina tul ti vak lo chung kalpuiah ka sawm ta kha a ni a, engtin pawhin min lo ngai se ka awm a nuam zawk thoin ka ring.

‘Kan pahnih thutlukna a ni a, ka chhungte emaw I chhungte emawin kan rilru an ti danglam dawn chuang hleinem” a ti ve tang tang a, a nihna chen pawh a awm. Mahse, ka thiantha ber a ni a, engkim a hriat hi a ngai ka ti ve tlat.

Chhun lama ka chet nasat deuh avangin zan lam pawh ka inkhawm peih ta lo a, Zodina inkhawm chu in atangin ka lo nghak ta ringawt. Kohhran ngaina tak chhungkua an ni a, an seilen danin a zir bawk a, kohhran an bel nghal zel. Mpi pawh kha a ni chiah a, kan mizia tam tak hi chu a inang lo, chutichung chuan kan inkawm ngeih ve em em tho a, mihring mize inang lo hi inkawm te pawh a lo theih ve viau zel e. Kan unauah ro ro pawh lehkhazir atchilh tlut, inkhawm pawh chawlhnia inkhawm duh tawk mai thin ka ni a, ka zirnaah ka hlawhtling ve thawkhat bawk a, chhungte hauh pawh ka tawk em em lo. Khatia pasal ka han nei ve ringawt pawh kha ka nu chuan mak an ti lutuk lo, kan vengah thian ka kawm tam lo a, kohhrana inhmang tak tak vek an nih avangin kan hun neih a in ang lo ka ti mai thin a, chuvangin ka thlarau nun pawh a lo chak lo ve nge nge a ni ang tiin ngaihdan a lo nei thin tih tun hnu hian min hrilh. Ka u erawh kohhran dan thianghlimin pasal a nei a, a hming ka hriat vang khan ka tum ruh ve em em ringawt thin, a tak takah erawh chuan kohhran belh hi a lo tha tih ka unaute atang pawh hian hrechhuakin ka inhre ve tawh.

Chutiang thil ka lo ngaihtuah lai chuan ka phone a rawn ri a, Zodina a lo ni.

“Kan bang chiah a, ka inthlak anga ka lo phei ang” a rawn ti a. Khum atangin ka tho a, ka insiam ve nghal sawk sawk.

Sitting room ka chhuah phei chuan ka chhungte pawh an lo haw tawh a, chhuah ka tum thu ka hrilh chuan ka nu in an room a luh pahin min ko a, ka zui ve nghal mai.

“Zodina nen em ni in chhuah dawn?” a ti a, a nih thu ka sawi chuan ka pa chuan a aw a lo thian deuh kharh a, an sawi tur chu ka hresa in ka hria.

“Mi fel tak a ni tih chu kan hria a, mahse, thil tha ber a ni dawnin kan hre lo. A hmain I lo tisual tawh a, I tihsual leh hi I pa nen chuan kan hlau ngawih ngawih tawh a. Mipa chu a tirah fel viau mah se naupang zawk an nih chhung chuan a fuh tak tak thei lo a nia” a ti leh ta a.

“Ni e, I nuna inrawlh hi kan duh hran lo, mahse, I hma hun hi chu uluk taka I ngaihtuah zel a ngai dawn a ni” ka pa in a lo ve a, an rilru chu ka hrethiam khawp mai.

Zodina rawn thlen chuan pangngai takin an lo bia a, ngaihbel theih tur pawhin an rilru an tilang lo. Kei erawh chu ka hnual deuh rawih a, an thusawi kha dik lo engmah an awm lo. Ka thatna tur vek an ngaihtuah tih ka hre bawk, mahse, dodalna awka tih hriat dawnsawn chu a nuam chuang miah lo.

“I va ngawichawi ve” in atanga kan chhuah hnuah Zodina’n a ti a, a ngaih a tha vak lo in ka hria.

“I ngaihbel mai mai aniang” ka tih chuan chik zet hian min en a.

“U Mpi chu nidangah kan hmu mai dawn em ni?” a tih chuan ka lo hnial vat a, tuna kan kal loh chuan ka ngam lo hlen mai dawnin ka hria.

Kan va thlen chuan an nupa chauhin an lo awm hlauh a, min hmuh chu an inring lo mai niloin Zodina nen min hmu chu mak an ti tih ka hai lo. Micky chuan min lo fiam luam a, nau an pai tih a hriat atang phei kha chuan a mizia a danglam a, a tawng duh ta em em ngawt mai a ni.

“Kan ina kal turin tleirawl I rawn hire a ni maw?” tiin min lo la fiam lehnghal a, nuam lo ru tak a ni.

“Tleirawl pawh ka ni tawh lo e a” Zodina’n a lo ti hmuk a, ka lo nui lui hak.

“Tak takin enge in hriat a, in pahnih ber khera in lo kal a?” Mpi chuan ka bula rawn thut pahin a ti a, sawi tan dan thiam a har.

“Kawtah sawn kan intawk a” ka tih chuan Zodina’n min melh rum nasa mai.

“Ka nu te kawmchhak khawhar inah an kal daih sia, kan pa nen khawhar deuhin kan lo awm a, in lokal chu tihzia hle mai” a ti a, a naupai chanchin chu a sawi leh nghal siam siam a. Zodina lah chu a che sek a, sawi vat ila kal leh thuai ila a duh tih ka hria. Kei lah chu ka lai laklawh kual vel vek a ni ber, sawi tan dan ka hre lo.

“Nangni hi in inngaizawng a ni lo maw?” Mpi chuan a rawn ti ta thut a, Zodina nen kan inmelh a, kan nui tawp. “Engtik atang khan nge?” a ti nghal zat bawk.

“A tak takna chu ala rei lo” ka lo ti sap a.

“An ina min hruai zan khan ka star nghal a” Zodina ve thung.

“Awi.. a mak e” mak a ti ve tak zet tih ka hria, enge a sawi leh ang tih ka ngaihtuah lai mek chuan, “In inngaizawng ngam a nih chuan a tawp thleng ngam ang cheu” a ti ta a, ka thaw huai. “Ka thiantha ber I nia, I mizia ka hrechiang a, Zodinthara hi engtikawng mahin mitmei I hmuh hmasa dawn lo tih ka hria. A tum ve em a a hlawhtlingah ka ngai, mahse, a laklawhah I beidawnsan bik tur a ni lo” a ti ta kauh kauh a.

Kan kal lama kan mood chu a inthlak hlawk a ni ber, kan nui deuh reng mai. Midang zawng zawng aiin Mpi tawn kha kan lo huphurh ve ve tih a lang reng. Ka thiannu hian a thinlung takin min pawmpui lo mah se mi dodal chuan ka ring lo reng a ni.

“Hlauthawng lo ang deuhin I awm a, I hlauthawng ve reng sia” ka tih chuan a nui ta hak a.

“I thiannu a nia, khatiang em ema han hlauhthawn kha chu a mak alawm” a ti leh hram.

A thianpa te inah min hruai a, an lo awm ve nual. Min hmuh chuan min lo be ve luam hlawm a, hrehawm ka ti lutuk bik lo. Inchungah min hruai daih a, boruak vawt deuh var chuan a ti kumhlui thlah viau bawk.

“School in tan leh hun chu kan inhmu khat leh awm” a ti a.

“Kartawpah kan inhmu thei tho alawm” ka ti a, zan lamah inbuatsaih lawk ka duh thin tih a hre ve tawh a, min tihbuai a tum ngai bik lo.

“Keipawh kum a thar chuan lehkha zir ve tak tak ka duh tawh” a ti a, hna neih hi a tum ve em a, ka phur zawng tak a lo ni bawk si a, hetiang kawngah hian kan inmil thlawt. Kei hi lehkhathiam ngaisang chi ka lo ni bawk si a, ani pawh a lo ni ve chiah a, kan inngaisang tawn a ni deuh ber.

“Kum thar chu hna a awm ve nual dawn kha” ka ti a, a bengkhawn lehnghal tawp. “Ka hrechiang lutuk lo a, ka pa sawi ka hre thawi tlat” ka ti a.

“Chawmhlawm nih kha ka duh dawn miah lo a” nui chung hian a ti a, innei tur anga ka inngaihtuah hian ka inthiam lo deuh. Kum inthlau tak tak pawh an innei fo tih ka hria a, keini pahnih hi kum 5 in kan inthlau a, kan thiante ngei ngeiah pawh hetiang chu ka hre nual. Mahse, nula hnahkhat ka lo ni tawh bawk si lo hian keimah insitna a tizual a, a hrehawm ngawih ngawih.

An eitur siam kan ei zawh chuan rei awm lovin min chhuahpui leh a, kal tumna em em pawh nei loin kan tlan kual ta vel mai mai. Dar 2 velah a chhungten an rawn bia a, a nu tawng chu ka hre phak ve vek. Zandangah hetianga rei a chhuak ngai bik lo ang tih ka hrethiam mai, an inbiak zawh chuan haw ka rawt a, min hnial bik lo. Kan in kawtah a ding a, kal ka tum chuan a phal mai lo. Rem lo zet hian min kuah a, a mut a chhuak tawh tih ka hria.

“I men theih tawh loh kha haw tawh rawh” ka ti a.

“Reilote, hetianga awm ka chakna hi a rei tawh lutuk a” a ti a, engmah ka sawi tawh lo.

Engkim mai hi ka tan chuan thil thar vek a ni mai, Chhuanawma nen kan inngaihzawn lai khan engthil mah romantic taka tih kan nei ngailo a, thian inkawmngeih em em inngaizawng kan nih avang khan kan inngaihzawn hnu pawh khan thian ang maiin kan awm zui a, a zei chi alo ni bik bawk lo nen kan inneih hnu thleng khan han ngaihtuah vak pawhin amah ngaihna tur ang hi a vang thin. Zodina erawh chuan amah ngai lo thei lo hian min siam thiam ve tlat a, ka nu leh ka pa thil hlauh ang kha thlengin kei hi ka nghet tellh telh dawn a ang ta tlat!

Note: Tunkar atana a tawp ber a lo ni leh ta, bang loa min comment sak thintute nangmahni vang hian ka phur thin. Pathian zarah kan dam anga, Thawhtan lamah kan Zodina leh dawn nia. Kartawp hman nuam vek ule 😇