UKIYO 5

Five

Kum a thar a, school pawh kan tan leh tawh a, Zodina pawh exam hmachhawn tur a neih avangin a inkhung thei ve khawp mai. Mahni thutiama ding nghet tak a ni tih ka hre tawh a, a tih tawh lamah chuan kal na ve tak, midang thusawia buai mai mai ngai lo a ni tih ka hriatbelh zel bawk. Inrinni leh chawlhni hi kan inhmuh theih ve hun a ni a, a bakah chuan kan inhmu tlem khawp mai. Ka chhungte pawhin eng vak mah an sawi zawm tawh lo a, mit kham khawpa kan awm loh vangte pawh a ni ang. Chhuanawma erawh a rawn ri zeuh zeuh a, ka chhang ngai lem lo. A thianpa Chhana hnen atangin a nupui nen khan an lo inthen daih tawh a ni awm a, a zialo ka tihpui khawp mai. An inthenna kum khat a tling tep tawh tih a sawi erawh chuan ka lo hnial ve a, a chhan chu Zodina nen kan inhmelhriattirh khan restaurant ah khan ka hmu tlang tlat a ni.

“An nu kha a nasa ve a, a tibuai chhunzawm char char a, chutah pawh chuan an inthen daih tawh ang. A umzui reng a, Chhuanawma te chu I hriat ang khan mi ti let vak chi a ni lo a, a en liam ve mai mai ang” a ti deuh tlat a, ka hnial duh lem lo. An inneih leh neih lohin ka nunah awmzia a nei tawh miau lo a, ka sawipui ngai tawh lo.

“Ka nu hian Delhi a chhuka coaching kal turin min ti char char a” Zodina nen kan inbiak chuan a ti a, ka lo huphurh nghal ve ringawt.

“I tana tha ber chu a nia, hetah chuan duh ang tawkin thiltih a har sia” ka ti ve mai a.

‘Hmm.. I van ngai awlsam bik ve” titau aw deuh hian a ti a, ka lo nui deuh sak.

Tunah bul kan tan ve deuh chiah a, awm hrang leh nghal tur chuan ka huphurh ve reng, mahse, a nu sawi chu atana tha ber tih ka hre ve tho. Zanah a rawn leng a, chhun lama kan thil sawi chu engmah sawi chhuah a duh lo. 

“Ka kalsan dawn lo che” a ti deuh bur.

“A rei dawn chuang lo a, chutia awm lo reng tur I ni dawn hleinem” ka tih pawh chuan, “Heta ka zir dan nen a inang reng, coaching kal ka ngai lo” a ti deuh tlat, ka nui tawp.

A haw hnuah min rawn be tha leh a, chutah pawh chuan ka hlata awm a tum loh thu a sawi a, hna hmu ngei tura a beih tur thu erawh a sawi uar hle. A chang hi chuan a chhungte min ngaihdan tur ngaihtuah hian ka rilru ka seng nasa ve thei hle a, Mpi min pawm ringawt hi a tawk zo lo tih ka hria, pa telloa a nuin a pawm seilen an nih avang hian a nu hian nasa takin a hauh ve dawn tih lah a lang reng. Kei lah ka upat zawk chu thuhran nise, nuthlawi ve mai ka nih avang hian ka insit ve ngawih ngawih a, eng ang mi nge ka nih a hriat hunah chuan a fapa tan hian min pawm theih ka ring lo a ni.

Holiday anih avangin a hma atanga kan lo tum tawh angin Zodina nen kan chhuak a, thawmhnaw lei a duh avangin kalpui turin min sawm a, ka hunawl neih ve ah chuan han chhuahpui pawh chu pawi ka ti lo. A thianpa Amuana dawrah min kalpui a, hmundanga en pawh tum hran loin a mamawh chu a dawr ta vek a, thil leipui a harsa lem lo khawp mai. Ka duh lo chung handbag min lei tel hram bawk a, ka hnial nasa viau na in ka hnial hneh ta lo, thil min tihsak a tum ve miau si a. 

“Naktuk chu in rawn kal ve ngei a ngai ang, ka nu leh pa inneih silver jubilee a nia “ Amuana chuan a ti a. 

“Min va sawm official lo ve” Zodina’n a lo ti.

“Hmaichhanah ka sawm cheu nia, a official ber zawk lo maw?” Amuana ve thung.

“Changtunu kal leh kal loh ni mai keichu’ Zodina’n a tih chuan ka lo melh rum vak.

“Dingpuii a pawimawh ta hle tihna a nih chu, I kutah ka innghat a nia aw” Amuana bawk chuan a ti a, ka lo nui ta ringawt.

“Ka kal hman loh pawhin I kal tho tur a nia, I thianpa ve ber ania” kan haw lamah chuan ka ti a, a nui mai mai lehnghal.

“I kal lohna hmuna kal ka tum lo hrim hrim” te chu a la ti tak deuh deuh a.

“Ka ngaihtuah char char a”

“Eng chu maw?”

“Delhi ah chuan chhuk phawt la”

Min chhang duh tawh lo, a hma lam chu a melh ngar a, biak a huphurhawm tawp.

“Titau kher lo la, tha deuha sawi chi a nia” ka tih chuan chiang zet hian min rawn en a.

“Kal ka tum lo, sawi nawn a ngai tawh lo” a ti hmak. Sawi pui ngaihna ka hre tawh lo, sawi zel chi ni pawhin ka hre bawk lo. Zana ka ngaihtuah hian ni thei nganga ka hriat loh vanga tunah pawh sawi chhuak ka ni a, ka rilru a nuam lo a ni ber ang chu. Keimah nen hian lo intawng lo ta ila chuan a kal awm si a tih vel ka ngaihtuah vang a ni.

Zanah rei vak lo kan inbiak hnuah lehkha a zir dawn tih a sawi a, ka awl zan tiin keipawh movie ka en daih. Ka thil en lai pawh en zo loin ka lo muhil tlang daih a, zingah ka thawhin Zodina message engmah a lo awm lo. Zan tin a mut dawn apiangin message a lo dah ziah thin a, zing lam dar 2 thleng a online tih ka hre tho sia, ka awm thiam lo deuh nghal huin ka hria.

Amuana te programme chungchang sawina hun pawh a awm ta lo a, kal ka tum em em loh avangin engmah ka va sawi lang bik lo. School lam panin ka chhuak a, naupangho bula ka awm chuan ka mood hi a inthlak nghal vek zel. An  bulah chuan ka nun hlui te, ka hlim lohna te hi ka theihnghilh vek thin. Anmahni vang hian ka tawrhna te kha a nihna ang in ka liam tir thei a, tunah chuan nunphung pangngai takin ka nung ta  a nih hi. Lunch break laiin ka phone ka han en a, Zodina miscall a lo awm nual. Ka phone ka silent daih avangin ka lo hre lo a, ka han call back nghal a.

“Amuana te inah chuan kan kal ve loh chuan..” tiin kal turin min rawn tur leh nghal ringawt. Zan lam chungchangah ka lawm lo ru viau na in tihlanna hun pawh a ni chiah lo.

“Dar 2 velah ka hman thei ang” ka tih chuan a ngawi deuh vung vung a, “Um, school ah ka rawn sawm ang che” a ti ta a.

Dar 2 ah chiah chiah school kawtah a rawn ding a, principal ka lo dil fel vek tawh avangin ka chhuak nghal a, min hmuh chuan a lo nui sak. 

“Enge kan pek ve ang?” tia ka zawh chuan seat hnung chu a kawk va a, a lo lei fel vek tawh a lo ni.

“Ka fel thlap thlap I ti viau lo maw?” tiin min fiam a, ka lu ka lo thing a, a ner nang mai.

“Nizanah pawh message I dah lo a” ka ti a. 

“I lo notice ve ta maw?” a ti duh lek.

Amuana te in kan thlen chuan programme an lo tan tawh a, pawnah kan thu ta daih. An thiante an rawn thleng ve zel a, kan bulah an rawn thu a, a tam zawk chu ka hmelhriat loh an ni. An zingah hmeichhe pahnih an tel ve a, ka la hmuh ngai pawh ka hre lo. Zodina chu an fiam zauh zauh reng a, a bialnu hlui chungchang vel te ni berin ka hria.

"An rui a nih kha" ka beng bulah a ti sap a.

"Phaia awm ho hi chu an rin tlak loh tlangpui" pakhatin a rawn ti leh hram a, Zodina thinin a tuar tawh lo a niang, a ding hluai a.

"Kal ang" tih leh min kaihthawh a rual a, ka zui ve nghal. Inchhungah min luhpui a, thutthleng hnung ber awlah chuan min thutpui ta daih a.

"I thiante emaw ka tia" ka ti ve mai a.

"An thiannu nen kan ni ve thin a, Delhi ah a awm a. Vawikhat kha a birthday ah ban surprise ka tum a, ka han kal a, mipa nen a inluah ah ka phawk a. Chu chu keimah zawk thiam loh angin min ti zui char char, an mak tak tak a ni" a ti ta a. A mak lutuk, a nunhlui mah ni se ka thik veng veng. Engmah ka nih bik lohzia hrereng chungin a nunhlui a mi, a ngaihsakna leh a duhna lantir dan chuan ka nuna mipa hmasa ber nen an danglam lutuk a, thikna a piantir lo thei lo. 

"I thinrim mi?" A ti chat a, ka lu ka lo thing.

"Kawng engkimah a tluk lo che, a tluk ngai lo ang che" nui chungin a ti a, ka lo nui ve tawp.

Amuana te unau chuan a nu leh pa silver jubilee lawmpui nan scooty an present a, an tiropuiin a nachang an hre kher mai. An la naupan ngaihtuahin an tihsak ropui a, a nachang kan hriat ve hauh loh thil anih avangin ka fak ngei mai. Programme a zawh hnu chuan kan bulah a rawn kal ve ta a, chawei chhunzawm nghal tur a nih avangin chaweia intlar turte kan lo buaipui a. Catering an tih vangin buaina tur kan nei vak lo.

Chaw kan eikham hnu chuan haw mai loin Amuana room ah kan awm a, a nu leh pa tana an thiltih chu ka fak ve luam a.

"Ka nu leh ka pa thawhrim rah tho ania, tih kan nei hleinem" Amuana chuan a ti ve ngei. Ani hian bike leh scooty showroom a nei a, a nu leh pa bul tansak chu a ni meuh mai, mahse, amah hi a thawkrimin a puitling tih ka hre tawh a, fak loh chi a ni lo. A hrisel loh avanga zirna ti hlei thei lo a ni a, mahse, amah hi a rintlak tawp q ni ber mai.

"Tikhan lo awm ula, inleng la awm te kha ka va ngaihven ve ange" tiin min chhuahsan thurh a. Zodina ka bulah a rawn insawn nghal zat.

"Thil hrilh tur che ka nei a" a tih chuan zawhna mitmengin ka lo melh a. " Nizan khan lehkha pawh ka zir lo a, ka inngaihtuah nasa lutuk a. Delhi a chhuk phawt chu ka tum ta e" a ti a.

"Chuan..?" Ka lo ti vat a.

"Ka kal phawt anga, ka ngaih nasat viau che chuan ka lo haw leh ang" a nui suk.

"I kal chuan hlawhtlin chiah i ngaihtuah tur a ni. Chuan, i thutlukna chu ka lawm e aw" ka ti a. A ruk tak chuan ka huphurh reng sia.

"Ka huphurh lutuk, hei ka ngai dawn si" tih pahin ka hmuiah a rawn fawp a. Keipawh hian ka thlahlelin ka ngai ve em em reng a, kartawpa kan inhmu pawh hi inhmu tlem ka intih ve nen, a awm lo vung vung tur chu ka huphurh thlawt!