UKIYO 6

Six

Zodina pawh thla khat lai chu Delhi lamah a awm tawh a, kan lung a leng thei bawk a, kan phone a rim thei viau. Naupang an exam dawn avangin ka buai ve a, chu chuan ka lungleng lutuk tur erawh a ti zia zawk.

“Zanin chu ka chhuak ve dawn nia aw, ka chhuk hnuah ka la chhuak miah lo a” zinga kan inbiakin a ti a, ka hnial hran lo. A inkhung thei ka ti ngawt zawk, a thiante an awm nual a, chutichung chuan a tawm thei viau mai.

Exam tan ni a ni a, ka duty nghal dawn avangin exam centre lam ka pan a, ka va thlen chuan Chhana a lo awm ve vang.

“I duty ve dawn a?” tiin ka bia a.

“Nia, duty tur hming ka va bih a, ka lo hmu chiah che a” a ti ve a, “Office ah khian lut chho ve lawk ila” a tih zawm nghal a. Kan inzui ta a.

“Chhuanawma pawh a hna a han bansan lailawk ah khan an la leh a, a nghet dawn a ni awm e” tiin office chhung kan luh rual chuan min melh a.

“A va lawmawm ve” tiin ka lo chhang mai a, Chhana hi chuan Chhuanawm chungchanga min hnuhluh hi a tum ngar ngar zel.

“Nakinah inbe teh ang, thil hi ngaihtuah chian a ngai a nia” a han ti leh hram a, chhang lo in ka lo nui mai mai.

College kan kal lai atang tawh khan a thianpa tana rinawm em em, kan inneih theih nana hma la char chartu kha a ni reng a, a mak chiam lo. Mahse, ka rilru erawh hre chiang se chuan hetiang zawng hian min sawipui peih ka ring lo, chutia rilru dik tak va phawrh vek erawh thil tih chi ah ka ngai hran lo a, beidawn hun a nei ve mai turah ka ngai. Tin, amah Chhuanawma’n min rawn beisei leh viau te nise thuhran a ni a, chutiang a nih chuan ama bula chiang taka sawi kha ka tih tur a ni mai a, Chhana bula han sawi vak chu a tul ka ti tawh lem lo a ni ber ang chu.

Dar 2 velah in ka thleng a, ka inbual zawhah ka mu daih. Zodina nen zinga kan inbiak bak kha kan inbe miah lo a, ka haw tawh thu message ka hnutchhiah a, ka tihbuai ka hlauh avangin ka call duh ta lo. Ka mu chu ka lo muhil daih a, ka harh chuan dar 5 a lo ri tep. Ka phone ka en nghal a, ka message min la chhang lo mai ni loin a la hmu lo hrim hrim. A last seen ka en in dar 3 vel bawr a ni tho si a, tlemin ka ngaihdan a ni lo deuh. Ka tho a, ka nau eirawngbawl chu ka va pui a, ka nu leh pa an rawn haw chiah bawk.

“Au Pui, U Zodina bialnu ka stalk a, a nasat hmel rap” ka nau Bawihi chuan a ti a.

“Engtinnge a bialnu hlui tih I hriat?” tiin ka zawt vat a.

“An thlalak a post nasa em alawm, a tir chuan ka hre bik lo a. Midang ka stalk naah ka hmu chhuak a, a inha chhing thei si” a ti leh a, ka phone ka ban a, Ig ah lutin a hming ka search tir nghal.

A rawn lan chuan ka phone chu ka la nghal vat a, ka han en ve a, ka nau sawi ang em em a inha chhing reng chu a ni bik lo, a thlalak pahnih thum vel a chhing ve deuh tih a ni mai. A hmel chu a tha ngang mai, a pian a dik bawk si, followers pawh a ngah. Zodina nen an thlalak chu ka hmu ve a, mahse, kumhlui lam ami daih a ni, tunhnaiah chuan a post bik chuang lo. Mahse, ngaihthah lohna ka neih erawh chu tunah an inngaizawng tawh lo a, a thlalak a la dah ve reng chu ka tan nawm lohna deuh a awm.

Chaw kan ei lai te chuan ka phone chu a rik ka ring deuh thin a, a ri chuang lo. Thleng pawh seng peih lo chuan ka room lam ka pan nghal daih a, hetianga ka awm ve ringawt hi ka duh lo ngawt mai. Engpawh lo thleng thei a ni a, ka inveng thei turah ka lo inngai ve kha ania, ka tum aiin ka lo lut thuk daih tawh mai tih ka hria. Lehkhabu ka chhiar ta daih a, ka rilruah erawh a lut thei lutuk lo. Dar 9 velah Zodina’n min rawn call ve ta hram, ka lo tawng tha peih lo.

“Sorry lutuk aw, thiante bula awm chuan phone pawh kan lo ngaihsak lo thin a” tha deuhin a ti ve mai a, mahse, ka haw laklawh ve deuh tlat.

“Ka mu dawn chiah a, nih phawt” ka ti vei hmak a, phone ka dah nghal, message a rawn lut nghal zut zut.

*thinrim lo la, ka chhuah khat ve em hi* tih te, a tam mai.

Ka chhang duh lo vek a, a rawn call ngat ngat bawk. Ka awmdan chu ka hrethiam chiah bik lo, mahse, amah hi ka chanpual bik ni lo a ka hriatna chuan min tina ni berin ka hria. Ka muhil thei bik ta chuang lo, a tawpah chuan a call chu ka la ta nge nge a. Kan inbiak kan inbiak takah chuan ka lung pawh a awi chhunzawm ve ta mai a, a telloa awm harsa ka tihzia lantirna mai a ni. Ka theihtawpa inthup ka tum pawh hian ka thei tawh lo tan der a nia.

Mpi te in lam panin ka inkhalh chhuak a, an indang ve tawh a, an inthara ka la kal loh vangin a vui ve nasa a, Zodina’n a rawn haw huna kal a ti na a a rei dawna ka hriat vangin ka kal ta a ni. A dul pawh a lo puar ve al tawh a, amah a thau hmak bawk.

‘I rai rei dawn e” ka tih chuan an pa a lo ner nasa mai.

“Chu chu lawm, a lang lian hma lutuk a, rai rei chi” Mpi chuan a lo ti ve a.

“Kan puk lawk emaw I lo ti vel ange aw”Micky’n a lo ti a.

“A ni lo ang tih hi a hriat miah loh, ka chhinchhiah uluk viau a nia” tiin ka han fiam a.

Kan inhmu khat bawk a, kan inngai ve khawp mai. Micky chu office turin a chhuak a, thingpui in turin a lo haw hi a lo nia, an nu a ngaih vang bak a ni leh tawp lo ang. Mpi hi a vannei ngawt mai, hetiang khawpa hmangaiha duattu pasal a nei hi chu ka lawmawm thlawt. Tun ang laiah hmel ringawt hi a lo ni lo, Micky pawh hmel tha viau lo mah se pasal a tana thlan nahawm ngawih ngawih a ni ve a, ka thiannu chuan a tifuh dawn khawp hian ka hria.

“Thiannu, kan pa hi ka lo nei lo ang tih hi ka hlau asin aw. A chang chuan ka ngaihtuah thin a, Zodina nen in inkawp hi a fuh ber em aw ka ti fo asin. Ka nau a ni a, ka tan inrawlh hi a nuam miah lo. Mahse, pasal atan chuan mahni aia upa hi an lo tha ania aw” a ti a, engmah sawi dik loh a nei lo.

Tutepawh hi zawt ila, mahni aia naupang hi min duhpui ber a ni dawn lo tih hi chu keipawhin ka hre ve reng, mahse, hrereng chungin ka zuanglut a ni a, chuti maia han chhuah leh theih pawh a ni tawh lo.

Chutianga hun kan hman chhoh ve mek lai chuan ka rin loh deuhin palai hmel kan hmu ta thut mai a nih chu, tudang ni loin Chhuanawma te atangin a ni. Chutianga engmah kan pahnih inbiakna pawh awm loa an lo leng ringawt chu ka lawm lo angreng khawp mai, ka nu leh ka pa erawh chuan engmah an sawi lang lo. Chhungkua kan lo inbe rawn ange tiin palai te chu an haw a, an haw fel hnuah room atangin ka chhuak nghal a.

“Engatinge an rawn len ringawt a?” tiin ka nu leh pa chu ka melh nghal a.

“Thu ve phawt la” ka nuin a ti a, an thutna epah chuan ka thu a.

“Chhuanawma hian neih leh che a duh a, min rawn dil a nih kha” ka pa ve thung.

“Kan inthenna pawh kum hnih a ral tawh a, kan inkarah midang tla zep tawhin lan ka nih kha in theihnghilh em lo ang chu” tiin ka lungawi lohna chu ka lantir nghal mawlh mawlh.

“Kan theihnghilh reng reng lo, kan thin pawh a rim. Mahse, hetia naupang nena inkawp ringawt ai chuan tikhawpa a rawn tlawm leh anih chuan I neih leh ka duh zawk” ka pa chuan a ti hmak.

Ka nu ka en a, chhuat chu a bih ngar a, engmah a sawi ngam lo a ni ngei ang. Zodina nen kan chungchang engkim hrechungin hetiang hian min nawr lui ve lo ang tih ka hria, mahse, ani aia thunei zawk an la awm tlat a, kan hriatah phei chuan a hnial hauh lo ang.

“Ka pa, vawikhat ka tihsual kha ka duhtawk, a hnenah chuan ni tawh lo e” tiin ka tho a, kal ka tum a.

“In inneih leh phawt chuan in indang ang tiin a nu in min hrilh kha, lo inngaihtuah ang che” a ti leh a, ka kal tlang.

Ka muhil thei lo chu ka inlet chhen a, Chhuanawma nena inneih leh hi ka rilruah a awm tawh ngai lo. Kan ina ka let leh rual khan a hnenah ka damchhungin ka let tawh lo ang tiin ka intiam a, ka rilru hmun sang tam taka min hliamtu hnenah chuan ni tawh lul lo mai. Ka mittui chu a rawn luang thla ngiai a, tun ang dinhmuna min dintirtu hnena min lettir hnial lo tu ka pa chungah ka thin a rim em em bawk.

Mit bui lukin ka tho a, ka nu chiah a lo tho. Dawhkan bawhin a lo thu a, a hmel chu a hlim lo ve hle tih ka hria.

“Mate, lo thu teh” tiin a bulah chuan min thuttir a.

“Nu, engtikawng mahin ka let tawh dawn lo” ka ti nghal deuh tawp a.

“Ka hrethiam alawm, I let tawh lo ang, keipawh hian ka phal tawh lo. I pa pawh khan a phal tak tak lo, Zodina nen hian inkawp tawh lo ula  duh a, a tihlan thiam ve dan a nih kha. I pa chu in hriat angin fate hau chiam chi a ni lo a, va nei leh ngei ngei rawh a tihna a ni lo ania.” A ti ve ta a, tlem chuan ka thaw a veng huai.

“Zodina hi naupang mah se a puitling a sin” ka ti hak a.

“Ni e, ka hria alawm. Mahse, hma hun hi thui tak thlir a ngai ve a, chutiang a nih loh chuan I ti sual leh mai ang tih hi kan hlau ngawih ngawih a ni. Vawi khat tih sual tawh chuan vanduaina hian min zui duh riau lehnghal a, chuvang chu a ni” a tita a.

Thil awmzia chu ka hrethiam ve ta kuar, ka nu leh pa thiam loh engmah a awm lo. Ka phone chu ka phawrh chhuak a, Chhuanawma number chu ka lo la theihnghilh bik em lo. Kan inkawm chhung a rei a, en lova sawi thei zat zat khan kan lo inhriatsak ve bawk a, chuvang a ni. Chhuna inhmuhpuiah ka sawm a, hetah hian duhtawk se ka duh a, keimahah hian beisei nei tawh lo turin engkim hrilh tlang vek chu ka duh.

Kan inhmuhna tura ka tih ah chuan ka va thlenin a lo awm reng tawh, a nun a sim ve tak tak pawh a ni maithei, a fai ve vang a, hriatreng tur tam tak kan neih ve tawh avang te pawhin a ni ang chu, han inhmuh chuan ka haw run bik lo.

“Ka hmuh duh chhan che hi ka sawi tlang nghal dawn a, min lo ngaihpawimawh sak dawn nia. Ka thu hmu miah loin palai in lo kal tir a, ka lawm lo hle tih hre hmasa phawt la, chuan, ka lo let tawh dawn lo a, chuvangin palai kha rawn kal nawn lo se ka duh” ka ti a.

“Dingpui, a pawi ka ti tak zet a ni. I telloa nun hi a har em a ni, I thu hmu miah loa kan lo chet chungchangah kha chuan ngaihdam ka dil che. Mahse, tunah lo pawh engtikah pawh nise lo let leh ngei ngei la ka duh a ni” a ti a.

“Nangmah nena inbiak leh pawh awm loa khatianga I rawn ti kha chu ka tan a tlawmthlak tak zet bawk. I nu duh dan ang ngeiin kan awm a, min rawn tihbuai zui hi chu ka beisei piah lam a ni” ka ti kher a.

“Ka nu vanga I tawrhna kha ka hai lo. Khatia midang ka rawn hawn chhan pawh kha ka hmangaih vang a ni lo asin. Ka nu laka ka chhan theih dan che awmchhun nia ka hriat angin ka ti mai a nih kha. Kan ina hrehawm taka I awm kha ka hmu thei lo che a ni, khatiang vang mai maia min then kha ka ring si lo a, ia tawrhna tihtawp kha ka tum ta tawp a ni” a ti a, a mitmeng faih kak chu ka va melh a, kan lo inhriatchian tawh vang te pawh a ni ang, ka ringhlel hran lo.

“Mahse, a hunlai engmah I ti ngam chuang hleinem. Tuna thiam chan nana hetia I sawi hi ka awih chu ring lo zawk mai rawh. Ka lo let leh tawh dawn lo a, a chiang viauin ka hria”tiin ka ding a, a rawn ding ve nghal zat.

“Dingpui, chance vawikhat chiah min pe leh rawh” a ti a, ka lo nui hak.

“Kan chance neihchhun a ni thei tiin uluk takin thil hi kan ngaihtuah tur a ni a, tunah chuan ka pe thei tawh lo che ni phawt rawh se” ka ti a, ka banah a rawn vuan nghal chat.

‘Khawngaih takin, tunah min chhang kher turin ka ti lo che, tunah chuan ni lo.. min chhang suh, ka nghak ang che” a ti leh hram a. Min vawnna chu phelhsakin ka kal san ta.

Ka hlim ve dawn chauh emaw ka tih hian buaina hrang hrang hian min tlakbuak leh thin, ka message dawn chu ka en reng a, chhan let emaw insawifiah emaw tumna ka nei lo.

*ani nena hmuh dun che u hi ka thil chak loh ber a ni, mangtha*

Zodina message, Chhuanawma nen vawiin lama kan inbe lai thlalak a rawn tel bawk.

Tun hi ka tal chhuah theih hun tura ka tana ruat pawh a ni maithei asin, ka kawng hnawk bik nuai hi a fel ve duak tawh em ang chu. Zodina dp chu ka melh vawng vawng a, ‘mangtha’ tiin ka phun chhuak sap a.