UKIYO 7

Seven

Zodina nen karkhat chhung kan inbe tawh lo, min rawn biak a tum lo a, biak ka tum bik lo. Kan pahnih tana thatna tur a nih chuan lunglen hi chu ka tuar thei mai turah ka ngai. Mahse, amah hi ui ve deuh na ka nei, mipa rintlak a ni tih ka hriat vang leh ani ang hi chu an vang tih ka hriat ve tlat vang hian chan hlen hi chu ka ui ve thlawt. Chumi vang ringawta chelh erawh ka duh lo a, tuna awlsam taka min kalsan theih lai hian kal se a tha, chu chu a hmakhua ka ngaih vang  a ni.

Chawlhni zan a ni a, ka chhungte an inkhawm vek a, kei erawh chu khumah mu chungin lehkha ka chhiar a, ka chhiar tui viau mai. Ka phone ri cher cher reng chu en pawh ka tum chuang lo a, a rik ngun tak em avangin ka han  ban a, Zodina a lo ni. Ka melh reng ringawt a, pickup pawh ka tum chuang lo. A ring quit a, a rawn ti leh nghal char char, chutia ngawi renga kan inkar tihtawp chu a tha in ka hre ta bik lo nen ka pickup a, mumal taka inthen dawn pawhi inthen a tha ka tih vang a ni.

“Lo chhuak rawh”

Phone ka pickup rualin a rawn ti nghal tawp.

“Khawnge ka chhuah anga?” ka ti a.

“In kawtah ka awm, lo kal rawh” tiin phone a dah nghal daih.

A ngaihna hre lo zet hian ka tho chhuak a, kawngka ka va hawng a, kan garage bulah Zodina chu a lo ding reng. Sawi tur pawh hre loin ka melh tlawk tlawk ringawt, awlsam taka kan tawp theih ka lo beisei ve asin maw le, a harsa leh zo vek dawn a nih hi.

“Ka chhungte an awm lo a, rawn lut phawt rawh” ka ti a, inchhungah kan inzui lut ta a.

“Tinge insawifiah tur pawhin min lo biak loh?” rilru nat hmel tak hian min melh a.

“Sawi tur ka hre lo alawm” ka ti sap ringawt.

Kan ngawih vang vang hnu chuan ka thutnaah a rawn insawn a, ka kut chu a rawn ban de de a, lo laksawn pawh ka tum chuang lo.

“Ka thin a rim chuan ka thinrim reh thleng thakin min thlem ve tur a ni lo mi? Engati nge engah mah ka lungawi lohna kha I ngaih ve loh?” ka kut a vawn chu a han hmer salh a, “I telloin ka awm thei tawh hleinem” a tih chuan ka thaw chhuak hak a, keipawh hian harsa ka ti.

“Zodin, ka tihpalh”

Kan pahnih inkar buaina pawh nilo vanga inthen tawp chu a harsa ve em a ni. Ka lo intih luhlul ve n ate, ka lo tawrh tang tang nate kha amah ka hmuh chiah chuan thiahin an awm ta vek mai. Ka ngai a, ka thlahlel ve em em chu a ni si a.

“Tunge Chhuanawma nen kan thlalak kha rawn thawn reng reng che a?” tia ka zawh chuan, “Ka spy te I hriat te chuan a chi nang” a nui suk a, khawiah mah spy a nei dawn lo tih ka hre ve reng sia.

“Engtikah nge I chhuk leh ang?” ka ti a.

“Tinge zawhna I ngah em em a” a ti daih, ka lo nui tawp.

Ka chhungte an rawn haw hnu deuh lawkah ani pawh haw a tum ve ta a, pawn thlengin ka thlah a, ka kutah a vuan leh reng tawh.

“Khatiang khan awm tawh suh aw, a hrehawm emai” a ti a, ka lu ka lo bu nghat a. A tlan liam thleng chuan ka thlir reng a, ka thawveng huai chu ka hre thei, mahse, keimahah hian nuam tih lohna erawh ka nei nasa. A nu hnenah engtin nge a sawi ang tihte chu ka buaina tawk a tling em em a, keimah vang ringawta rawn haw tih hria se an lawm loh dan tur pawh ka ngaihtuah thleng vek. Chutichung chuan ka lo hnar phal miah si lo a, hma hunah hetiang hian ka awm ang tih ka lo suangtuah ngai lo a, ka tum loh danin a thleng mawlh mawlh chu a nih tak hi!

Ruah a tla cherh cherh reng a, Mpi nau vei lah chu a tal a tal a, zan lamah keimahin ka riahpui a, a nu leh anau min chhawk turin an rawn thleng tawh a, ka thiannu berin ka haw a phal leh si loh avangin pawnah chuan ka awm a. Hun kal chak dan chu ka ngaihtuah neuh neuh a, ka thiannuin fa a han nei ve tawh dawn chu ania, tihte ka ngaihtuahnaah a rawn awm a, ka chhehvela mi phe suau suau pawh chu ka lo en liam ve tawp.

“Enge I ngaihtuah a?”

Ka hawi chhuak zawk a, Zodina chu ka bulah dingin a lo nui var var a.

“Mpi nau vei kha a nat hmel lutuk a, nei fel vat se ka ti. Tunen nge in lo kal a?” tiin ka han zawt nghal a.

“Ka nu te nen, canteen ah thil an lei kawi lawk a” a tih chuan ka ding nghal zawk a.

“Chhuk ang”

“Dingpui, ka nu hi hel theih loh hun I la nei dawn tho tho ania”tiin a thaw halh a.

Vawi tam tak an inah min hruai a tum tawh a, ka inpeih hun nghak turin ka ti a, inpeih hun erawh ka nei thei lo chu a ni ber. Khatia Delhi atanga a rawn let leh hnu phei chuan ka inthlahrung ngawih ngawih a, keimah vanga rawn haw tih a hre tur kha ka ngaingam ngang lo. Chuvangin a hma ang bawkin inthup deuh takin kan inkawp chho kha a nia, min hnial bur lo na in chutiang ringawt chu a ning ve tawh tih ka hria.

“Reilote nghak leh ila, Mpi’n naute a neih fel hunah” ka tih chuan min rawn din hnaih a.

“Engang pawhin min dodal mah se ka thlah dawn lo che’ ti leh supin inhnuai lamah chuan min chhuk pui ta a.

Naute tap ngak ngak ri ka hriat chuan ka hahdam huai, ka thiannuin fapa a nei ve ta. Ka lawmpui tak zet a, Micky pawh a nui reng mai. Intihfai te ka duh ve tawh avangin haw ka tum ta a, Zodina’n min rawn umzui vat.

“Mama, lo kalbo suh aw, Becky pu kan tlawh a ngai ania” titu chu ka va en vat a, Zodina nu a lo ni.

“Rawn kal suh” ka ti zawi sup a, nui chungin min zui tho.

Ka scooty dahna kan thlen chuan min lak chhuah sak thlap a, a tinung nghal a. A hlim hmel pu reng thei bik hi a awhawm, hei hian min hip bet tlat bawk niin ka hria.

“Zanah ka lo kal ang” tiin helmet min pe a, a nu ka hmuh vang kha nge engtin emaw tak hian nuam lo tihna riau ka nei thar a, ka sawifiah thiam chiah lo.

Mpi pawh damdawiin atangin an chhuak tawh a, nihnih chu ka tlawh tawh lo. Chhun lamah school kal a lo ngai ve bawk nen ka rilruah chuan a awm ve reng. Chawhnu lamah hna kan thawh avangin kan bang hma deuh a, tlawh kawi ka duh vangin an in lam pan chuan ka kal a. Ka va thlen chuan nau min lo bualtir nghal, ka zei lutuk bik lo nen kan va nui nasa tak. Kan bual zawh chuan Zodina nu leh Mpi nu an rawn lang ve chiah.

“Dingpui, I awm tih kan hria a, kan rawn hmanhmawh ta lo law law anih kha”Mpi nu, Nu Hruaii’n a ti a, Zodina nu chuan min en duh tawp.

‘Nia, nau bual thiam lutuk a awm alawm” tiin min nuih a, ka lo nui ve var var.

Thingpuite ka lum a, ka che chu ka khawr ru deuh tung a, a va hrehawm tak.

“Hmanni chu Chhuanawma nen kan inhmu hlawl a, an nu nen khan an inthen leh daih tawh kha a lo nia” Nu Hruaii’n a tih chuan ka ip deuh zawk.

“Nu….” Mpi chuan a lo ti vin deuh hlar a, a sawi zawm ta bik lo. Mahse, a nuam hlawl lo, Zodina nu chu a tawng tam vak lo, thawk bawrh bawrh chi a nih hmel. Naute puan vel chu a su zung zung a, naute chu a chhaih leh zauh zauh thin.

“Mpi chu a vannei a, a ni hian a buaipui vek a, kei tak hi chu zei lo chi tih takah engmah pawh hi ka thiam lo a” tiin Nu Hruaii chuan naute ka pawm lai chu min rawn lak sak a, rei vak lo ka awm leh hnu chuan ka hawsan ta.

“Au Pui, Becky model kha I hria em? A pa pawh lar ve deuh kha” ka nau in a tih chuan ka lu ka lo thing mai a.

“U Zodina nen an thlalak a post nasa rap” atih chuan ka phu deuh zawk.

“Enge an thlalak chu a post ve ngawt a? An inkawm ve thin aniang chu “ rilru nuam vak lo chuan ka ti a.

“Inkawm ve mai mai pawh nise khatianga an pahnih chauh thlalak post vak vak kha chu kei ni ila ka duh miah lo ang” a ti a, ka thin chu a phu deuh zeih zeih.

Ka room ah lutin ka phone chu ak bih ve vat a, ka nau sawi ang tak tak khan tunhnaiah vawi thum vel lai a post tih ka hmu nghal. Zodina number chu ka hmetchhuak a, ka call nghal a, a pickup thei mai lo lehnghal. A la thei dawn lo emaw ka tih hnuah a pickup ve ta hram a, mahse, ka beisei loh deuhin hmeichhia in a lo chhang.

“Zodina ka be duh a” ka ti mawl tawp.

“A laklawh deuh a, ka lo call back tir dawn che nia” a tia, a dah daih.

Ka mit na urh chu ka hre reng, mahse, ka muhil thei chuang lo. Zodina nena kan inbiak na chu ka ngaihtuah leh thin a, ka lawm thei lo a ni.

“Ka laklawh lutuk a, nakinah ka hrilhfiah ang che” tih bakin min chhang lo. Engang pawhin laklawhin thil tih tur nei pawh ni ila kan inhrilh thlap zel kha ania, tunhnaiah hian kan inkar hi a hla ru deuh tlatin ka hre thar.

Nilengin a reh vang vang a, ka va be duh ta bik lo. Tlai lamah call ka dawng a, ka rin loh leh beisei loh deuhin Becky kha a lo ni lehnghal. Inhmuhpuiah min sawm a, ka hnial lek lek nain engkim thil thleng hriat tha ka tih vang zawkin inhmuhna tur a sawiah chuan ka va kal ve ngat.

“Zodina lak atang hian lo inthiarfihlim tawh la ka duh a, hmaichhan ngeiah hmuh che ka duh chhan pawh a ni” a ti a, ka lo nui hak.

“Ama hnen atanga ka hriat hunah ka lo inthiarfihlim ang” ka tih chuan a dar chu a san ak a,

“Nuthlawi zuna uai chu a na ang tih ka ring thlap, mahse, nangmah zawk hian a hma hun I ngaihtuah tak tak anih chuan I thlah a ngai”

“Nuthlawi..” ka phun sap a.

“Ama hnen atang ngeiin nuthlawi I nih thu hi ka hre tawh, chuan, hei hi hre rawh, iai hun a la nei dawn che tih I hi pawm mai rawh” a mitmeng chu a ling hlar a, min vau zam a tum a ni berin ka hria.

“Zodina nen kan lo sawi dun ang, keimah mai chuan thutlukna ka siam thei lo tlat” ka tho nghal phat a.

“Nuthlawi fa pawh nei thei lo hnenah a nu hian a fapa hi a hlan phal I ring em ni?”

Chu thu chu ka thinlungah hian a ring lutuk tlat, ni e, fa ka neih theih leh theih loh pawh ka chiang bik hleinem. Mahse, chung thleng thlenga ani hian a hria anih chuan tudang mahin an hrilh lo ang, Zodina hian engkim a hrilh a ni ngei ang. Chutianga ka mimal nun zawng zawng a hrilh tur khawp chuan tunge atan a nih chiah? Hmanhmawh takin ka tlan chhuak a, ka awm zawn hi a na ngut ngut. Ka nuna thil thleng zawng zawngte kha amah ka rin em vang chauhin asin ka hrilh, min hmusit thei tur bula sawi chhuak vek tur khawp chuan ka ring lo, mahse, thil awmdan hi a mak thei dawn hle mai. Chutiang a nih rual erawh chuan ka thinlung mit erawh a var nghal uar, ka duhna vang ringawtin Zodina hi ka chelh bet thei lo. Ani chuan a hmaah tih tur hmachhawp tam tak a la nei a, chung ti thei loa siam hmasatu pawh ka ni. Tun hnu zela a nih tur ni phak loa siamtu nih hi ka duh tawh lo. Tun hi ani nena kan inzawmna tihchahna hun remchang ber a ni ang. Awlsam taka kaltir tur anga ka inngaihtuah chuan nep ka inti, mahse, Chhuanawma vanga ka nihtur ka nih phak loh ang bawka Zodina dinhmun tihchhiat hi ka thei lo ang.

Ka phone screen a call lo lut char char chu ka melh reng a, vawi 23 misscall a awmna chiah a ni. Ka mu a, ka muhil thei lo chu ka mit a kham urh tawh. Zodina vanga tawrh hi ka inhuam ve viau emaw ka tia, mahse, hetiang zawng kher hi chuan ka lo la inpeih lo tak zet a ni.

School ka thlen chuan gate ah Zodina a lo ding a, min hmuh veleh min lo tiding a, min kai nghal dawr dawra, a motor ah min thut luhtir a tum a.

“I kut hmawr pawh khan min khawih tawh suh” ka tih chuan mak tih hmel deuh hian min en reng a. “Nang nena inzawmna neih hi ka duh tawh lo” ka tih rualin ka kut chu ka thing sawk a.

“Thutlukna I siam hmain ka thusawi hi ngaithla rawh. Tuna I ngaithla lo anih chuan ka sawi nawn tawh dawn lo ania” a ti a.

“Min vau suh aw” ka tih chuan a mit chu a tizim san a.

“Ka rualin I rawn kal dawn nge kal dawn lo?”

“Kal dawn lo”

“Vawikhat chiah ka zawt leh ang che, min zui dawn em?”

“Aih”

A lu chu a bu nghat a, a nui lui suk a.

“Aw le. I duh anga awm turin I zalen e” tiin a motorah a lut a, a tlan chhuak ta a, tunah chuan hahdam takin ka awm ve tawh ang chu. Ka thinlung hliam leh ser dam nan hun duh rei mah se ka paltlang thei em em ang. Miten an hmuhsit a, an nuihzat dawn ai chuan a nun atang hian ka inthiarfihlim tur a ni. A la naupang a, hma hun eng tak a nei bawk a, kei hian ka tihchhiatsak ang maw? Chutiang khawpa mahni hmasial tur ka ni si lo.