UKIYO 8

Eight

“Nizan chu Johny birthday party ah Becky leh Zodina pawh an rawn inzui nasat kha” 

Ka thawhpuite thusawi chu ka hre phak reng a, kan inkar hresaa sawi an ni lo bawk a, huat tur pawh a awm hran lo. Chumi piah lamah huat theihna chhan ka nei lo, kan inkar a tawp tawh miau a.

Social media hi ka khawih tam lo a, IG erawh milarte thlalak en nan a nuam ka ti a, ka lut nasa. Mahse, khatia Zodina nen kan inkar ka tihtawp atang khan ka la lut leh miah lo a, a thlalak hmu tur ang tlata ka inhriatna chuan min luh tir ngam lo a ni ber ang chu. Engemaw tak hian min mawlh, ka phone chu phawrh chhuakin Ig chu ka han install leh a, ka lut leh ta nge nge. Milarte news a Becky leh Zodina thlalak an post chu ka va hmu hmasa ber. Comment tlar thla duah chu chhiar ka chak rualin ka natpui leh dawn tih hriain ka chhiar lo law law. Kan lo inthen hman chu ka lawm zawk, chutiang nilo se chuan Zodina hian min kalsan dawn tho tho a nih hmel, hmeltha leh pian nalh, chhungkaw zah kai leh lar an ni a, kei ang mai mai hi chuan ka chelh hlen tak tak pawhin ka ring lo. A tan leh ka tan a tha tia thutlukna ka siam kha ka tisual dawn lo te pawh an I mahna.

Ka pa pawh a hnaah a kaisang ve a, hmundangah a awm dawn. School kan chawlh rei dawn avangin kalpui ka tum a, ka nu remchan loh chhung ka awmpui zui ang. Helai boruak ai chuan ka chak reng reng, Zodina leh a chhehvel chanchin hian ka nun a ti hrehawm ngawih ngawih a, boruak thar hip hi ka mamawh ve reng reng a ni.

“Pu Ruata fanu I ni ang maw?” tia min zawttu chu ka han en a, tlangval keimah ang rual vel tur hi a ni. Tlangval ka han ti ngawt tak na a, nupui pawh a nei tawh maithei, ka hre lo le.

“Aw ni e” ka han ti a.

“Hei in thenawm chiah hi ka luah ve a, I pa thawhpui, Muansanga ka nia” a ti a, nelawm tak hian a nui a.

Thingpuite ka lumsak a, a tawng duh bawk a, a nelawm khawp mai.

“Keipawh hi thla hnih vel chiah ka la awm a” a ti a, ka pa chuan thawhpui a nei fel dawn khawp mai.

Ka pa hnenah chaw kan ei laiin Muansanga chungchang chu ka hrilh a.

“A fel hmel khawp mai, I awm chhung chu in inkawm thei anga, I khua pawh a har lo saw tang” a ti ve a, ka lo bu nghat a.

Ka pa office hlana tihtur ka neih loh thin em avangin a quarter thlang lam chu ka thlo ta thin a, nakinah ka nu in a awmpui hunah huan siam a duh leh tho thoa ka rin vang a ni. A hmaa luahtuten an siam lem lo a ni ang, a hnim a chhah angreng a, nithum lai ka bei ve.

“Thingpui ka lo in dawn ania” inchhung atangin min rawn ko a, ka han hawi chhoh chuan Muansanga a lo ni. Chawlh ka tum mek lai a ni a, chutia min rawn koh chuan ka chhuak chho ve ta nghal a.

Muansanga bula awm chu a bengvarthlak, a mah hi a bright tih reiloteah hian ka hre nghal vek. A kumzat a sawi chuan kei aiin kumhnihin a lo upa, tlangval hnahkhat ngat a lo ni. 

“Ka bialnu ka sun a”tiin a bialnu nen an chungchang chu ka zawt chhuak ta nge nge a. Khatia sun thu a sawi atang khan hriatchian ka chak ve miau a, a hnuah ka zawt ta reng a.

“Hman kuma Dehrahdun leh Delhi inkar bus chesuala Mizo thi kha I hre ve em? Kha kha Nunui a nia, min hmu tura a rawn kal kha chesualin a boral ta a ni. Ka zir chhuah kum tur tak a ni lehnghal a, ka zir chhuah veleh inneih tum kan ni a, ani khan Delhi ah hna neiin a awm tawh a, min nghak ve tang tang a nih chu. Ka tuar na bawk a, hmeichhia reng reng hi ka ngaihsak ta miah lo a” a tih chuan ka thinlung chhung hi a lo na veng veng.

“A van hrehawm dawn tak, ka sawi thiam lo zawk” ka ti hul hak a.

“Tunah chuan hun a liam ve ta nual a, ngaiah neih har viau mah se a rawn kir tawh dawn lo tih ka pawm ve tawh a, ka zia tawh lutuk” a ti a, a nui sak a.

“A tana I inpekna hi han hre ve se, vannei a va inti dawn tak” ka tih chuan a lo thaw halh a.

“Ka tan khan engmah tih hreh a nei ngai lo a, a tana tih ka neih ve hmaa min kalsan hi chu tun thleng hian hriatthiam har ka la ti. Awmzia awm tawh lo mah se, amah hriatrengna nena hetia hun hman mai mai hi ka duh. Ka nu ka ngaihtuah chang erawh chuan nupui neih hi a ngai tih chu ka hre leh thin.”a ti a, ka lo khawngaih ngawih ngawih.

Zanah chuan ka ngaihtuah a, Muansang chu ka khawngaih thar tat lat. A thil paltlang ka hriat hnu hian ka ngaisang bawk. A nihna takah chuan nula tha tak tak a la hmu dawn lutuk tih ka hria, chutichunga Nunui a hmangaih vanga midang a la nei thei lo chu a hlu ka ti.

*ka chanchin ka hrilh ta vek che sia, I inpeih hun hunah I chanchin min hrilh ve rawh aw* 

A message chu ka chhiar chuan ka nui hak a, chanchin sawi tlak ka nei ve der si lo a.

Thla khat dawn ka cham hnu chuan Muansanga nen kan inkawmngeih tawh hle a, ka chanchin pawh ka hrilh ve nual a, Zodina nen kan chanchin erawh ka sawi lang duh lo.

“Dingpui, hriatchian zel che hi ka chak khawp mai” tiin ka haw dawn zanah hmaichhanah a ti a, ka chhing deuh sawk.

“Heti mai hi ka nia, hriatchian leh tur chuang ka awm tawh lo” nui chunga ka tih chuan, “Chhuanawma hnenah I let leh lo ang tih a hriat si loh a” a tih chuan ka nui tawp hmuk.

“Ngaih loh lamah ngai chuang lo la aw, thla khat chauh kan la inhria a, mahse, kum tam tak a liam hnua hmeichhe chanchina ka curious awmchhun I ni a, min hrethiam dawn nia aw” a ti a.

Ka haw hnuah pawh phone hmangin kan inbe ta fo, mahse, thian anga en ka tum thu leh a bak chu engmah ka ngaihtuah loh thu ka hrilh tlang vek a, ani pawhin a hrethiam khawp mai.

Ni tin hna ngai thawkin naupang zingah hun ka hmang chho leh ta a, Mpi pawh a chawlh neih a zawh tawh avangin a rawn zawm leh tawh a. Zodina nen kan chanchin chu min zawt dawt hreh pawh a ni mahna, kan sawi chhuak ngai lo. Ka thiannu hian ka rilru nat hi a hlau thin em a, a nau nen ngei a kan chanchinah pawh hian ka na dawn tih min zawt lo mah se a hre vek dawn, chuvanga min zawt dawt lo chu a ni tih ka ring thiam mai.

Hun chu a kal ngaiin a kal reng a, hmasawnna awm lutuk lo, hnungtawlhna pawh awm chuang loin kan hmang liam ve zel a, krismas pawh a lo hnai leh ta kuar mai. Kum hmasa lamah kah chuan Zodina nen kan hmang tlang a, kumin erawh chu ka room ah ka hman leh hmel e. Zan khat chu room ah ka thawmthaw ka thleh fel mawlh mawlh lai chuan kan kawmthlanga thawm ri deuh nawk nawk chu an thawm a rin tak deuh avangin tukverh chu ka han hawng a. Motor insu tih velte an sawi deuh nak nakin ka hria, veranda lamah chuan ka chhuak thla a, ka ngaihven ve ta a. Ka rin loh deuhin Zodina pawh ka hmu, rang zet hian ka room ah ka tlan lut leh nghal a, ka awm zawn a rawn phu deuh dawt. A mak, tinge amah vang hian ka la danglam fo le? Rei vak lo hnuah ka phone a rawn ri a, ka en chuan Zodina a lo ni. Ka khumah chuan ka han theh thla ringawt a, ka kutte chu a khur deuhin ka hria. 

Chumi zan atang chuan min rawn call a ching thar leh a, ka pickup ngai chuang lo na in chutianga a awm chu ka duh lo. Engmah nghah chhuah tur leh beisei tur awm chuang si lo a a bul atang bawka buainaa inhnuhluh ka duh tawh lo.

"Au Pui, inleng i nei" ka nauin a tih chuan mak ka ti deuh. Room atangin ka chhuah chuan Muansanga sitting roomah a lo thu reng. Kan inbiak khat deuh avangin helamah a awm tawh tih pawh ka lo hre lo. Ka pa pawh naktuk lamah a rawn haw thei dawn a, ka nu in karhmasa lam khan a rawn hawsan tawh a ni.

"I lo haw tih pawh ka hre lo a" ka tih chuan a bulah thu turin min ti a, a lo thau ve deuh hmak chu a inhmeh phian.

"Surprise che ka tum alawm" a ti ve ngei.

Ka nu pawh kan thawm hriain room atangin a rawn chhuak a, Muansanga a rawn hmu chu sawi tur an ngah dun teh e.

"Inhmu ngai lo awm ang taka sawi tur pawh chu in hriat viau le" ka ti nghe nghe.

"Naktuk zan chu min chhuahpui la" ka nu awm loh hnu chuan a ti a, zan lama chhuah hi ka ti meuh lo a, aw han pawh mai ka harsat deuh tlat. "Ka cousin birthday a nia, mahnia tel ka peih vak lo a" a tih chuan hnial dan a vang bawk si, a tawpah chuan kal turin thu ka titlu ta nge nge.

Dar 8 ah min rawn lam chat a, hetiang vela ka tel ngai loh vang hian inchei dan tur pawh ka hre lo viau. Mahse, thil pakhat vanga danglam erawh ka tum lo bur, jeans ka ha a, highneck ha in overcoat ka ha tawp a. Ka bun khat ve tak ka boot la chhuakin ka bun a, ka duh tawk der. Ka confi dan tur ber nia ka hriat leh ka inchei dan than a nih vangin mi hak ve leh ve loa buai ka tum lo.

Kan va thlen chuan an lo awm ve nual tawh, Muansanga'n inchhungah min hruai lut a, chutah chuan a hmaa zawhna chang ka hriat loh, hmachhawn ka chak loh leh kal ka chak lem lohna tak ni turin Becky chuan min lo chhawn siah mai. Chutia rin loh taka kan inhmu chu kan inbeisei lo tawn tih hriat tak hian kan inmelh ta reng a.

"Hei birthday girl Becky, ka nau duhtak a nih hi" tiin Muansanga chuan min han inhmelhriattir a.

"Tunge anih ka hre ve thei angem?" Becky chuan khap lek lo hian min melh reng.

"Aw.. Tehreng mai, Dingpuii a nih hi, a bak chu kan la inhmelhriattir zel dawn nia" tiin a nui suk a, Becky ner deuh nang chu ka hmu hman hram.

Boruak chu a uap churh a, vawt viau e ti loin ka thaw chu a sa pap pap mai. Zodina hmel hmuh ka inbeisei deuh nge, ka lo zawng leh thin. Programme an tan mawp mawp a, boruak pawh a sang chho viau. Thlang lam bathlarah ka chhuak a, boruak dang hip ka mamawh.

"Ka zawng che a, hetah ni maw i lo awm?" ka phu zawk a, ka bulah Muansanga chu a lo ding reng a.

"A.. Nia.. Pawn boruak hip ka chak deuh a" ka ti ve mai a.

"Lut ila, cake an zai tawh dawn a" a tih chua  inchhung lamah kan inzui lut ta a.

A hma zawnga awm si lo kha cake zai dawn chuan Zodina pawh hmuh tur a awm ta, Becky bulah a ding a, ka khur ru nghal der der. Becky nen cake an zai a, an inbarh bawk. Ka en thei thlawt lo, ka maimitchhing ta ringawt. Chuta ka meng chhuak leh chu chiang lutuk hian min lo melh reng a, hawisawn nachang pawh hre loin ka lo melh ve ta reng a.