UKIYO 9

Nine

Party pawh awm tluan peih loin Muansanga’n min thlah haw a, leng lut tur pawhin ka sawm duh ta lo. Ka lo hel ve tang tang thin kha a live ngeiin ka han hmu dun ania, ka thinlung la dam lohzia leh la inpeih lohzia a chiang e. Zodina mitmeng kha ka mitthlaah a cham reng, min haw hmel a pu lo a, min lawm hek lo. A mitmeng hriatthiam har zet kha ka thinlungah a cham rei leh dawn mange.

Kar a liam leh meuh chuan krismas kan thleng ve ta der mai, engmah hi ka hlimpui lo a, nuam han tichhan tur ka nei hek lo. Muansanga a rawn lang ve reng a, thian angin inkawm mah ila min en dan hi hai rual a ni bik lo. Kei erawh chuan chutiang zawng chuan ka en ve thei ngai dawn lo tih ka hria, thian tha tak erawh a ni chiang e.

“Ka pasal nen kan inthen hnu khan serious deuhin midang nen kan inkawp leh a, mahse, chhan hrang hrang vangin kan inthen a” ka chanchin sawi chhuahna remchang tak a inhawng a, ka sawi ta hram.

“Ka hria alawm”

Ka va melh a, a kut chu a hum ruh sauh a.

“Engtin?” a ti bah nak ringawt a.

“Dingpui, thil hrethiam rual kan ni ve tawh alawm. I pasal I ngaih vang leh amah I nghah vang chu nise an rawn koh khan  I haw em em ang. Mahse, I thinlung zawng zawnga hmangaih I lo tawn tawh vangin I let duh tawh lo a ni lawm ni?” a ti ta a.

“Ka hmangaih tih chu phatrual a ni lo a. Chuvang ringawta ka pasal hlui hnena let tawh lo erawh ka ni chuang lo” ka tih chuan a thaw ta hak a.

“Ka nghak ang che, thinlung taka ka ngainat leh hmasak ber I ni a, chuti mai chuan ka danglam thei dawn lo” a tih chuan hrethiam takin ka lo bu nghat a.

Muansanga zarah hrehawm lo leh mal bik lo takin krismas ka hmang tluan ve a, min thlahthlam lo a ni ber. Mpi pawhin Zodina nena kan inthen hnuah a vawkhat nan rilru thar pu turin thurawn min pe a, vawikhat mah Zodina chungchang kan sawi ta lo.

Kumhlui thlah zan mawlh chu ka huphurh, Zodina nen kum hmasa lamah hlim takin kan hmang dun kha a nia, tunah chuan kan sulhnu ngaihtuah chung leh amah ngai tak chungin ka hman a ngai leh dawn. Ani erawh chuan ka awm ve tih pawh a hre tawh kher lo anga, hlim takin a hman ka ring.

“Va chhuak ve mai mai ila” Muansanga chuan kan tv en la chuan a rawn ti sup a.

“Ka peih vak lo e, tian awm mai mai ang” ka ti a.

“I nguai ber bur emai, chhuah harh I mamawh” tih pahin min tung tho nawlh a, pawi ka ti ta lutuk bik lo.

“Kal duhna I nei em?” tia min zawh chuan ka lu ka lo thinsan mai a.

“Bawngkawnah Jona te inah kal lawk ang aw, a nu damlo tlawh pah a ni mai” tiin Bawgkawn lamah chuan kan tlan chhuak a. 

Kawi tinah chuan Zodina hmu mai tur anga inhriain a lo hawi leh deuh hu thin, Muansanga pawhin engmah a sawi bik lo a, a hla play chu a sak pui rat rat a, ka rilru ka lo awm melh melh thung. Jona te inah rei vak lo kan awm a, amah ber thalai thiltih khawmnaah a lo chhuah daih avangin kan thu rei lo. Kan chhuah hnu chuan hmundang kalna vak hre tawh hek lo, kan in lam pan chuan kan haw leh ta ringawt a. Ka rilru tak chuan Muansanga chu ka khawngaih ve, mahse, ka rilru ka pe thei thlawt si lo a, ka inthup zo lo a ni ang, hrethiam takin min hawpui ta a. Kan inpeng a lang thei tawh a, kan kawta car ding chuan ka mit a la zak mai. Kan tlan hnaii zel a, Zodina car tih chiang takin ka hre ta. Ka thin chu a phu nghal zawt zawt a, ka awm chu ka han dawm ringawt a. Kan garage bulah Muansanga a ding a, chhuk mai nachang pawh ka hre lo. 

“Chhuak ila” Muansanga’n a tih chuan ka harh chhuak deuh zawk, ka chhuak ve nghal a.

“Dingpui..”

Ka ke pen a tawp nghal chat, gate bul thim zing atangin Zodina a rawn lawr chhuak nghal. Muansanga chuan tunge tih a mitmengin min zawt a, ka chiai dan atang chuan rin a nei ta aniang, a bu nghat nghat a.

“Biak lawk che ka duh a” Zodina’n a tih chuan Muansanga chuan ka darah a rawn vuan a, a rawn hmer a, a kalsawn ta a.

“I dam thin maw?” pangngai thei ang berin ka ti a, a nui ta huk a.

“I hlim tawh ngawt ang chu tiraw?” min rawn din hnaih a.

“Im,, hlim ve zel e”

“Ka ring ta e, ka rin phal loh vang ngawtin thudik hi a danglam hleinem tiraw?”a ti a, ka ngawi reng. “A tirah pawh khan ring tur che ka ni lo asin, mahse, ka lo â ngawt mai. Pasal then hnu reilotea ngaihzawng nei leh thei kha ring lo turin vawi tam min titu an awm laia ka lo thlang tlat che kha mawl ka inti, ka mawl tak zet a ni” a ti a, a thaw kawk kawk a.

“Zodin, enge sawi I tum chiah?”

“Nang ka lo hmangaih kher che hi ka tihsual lian ber a ni. Chu te mai chu.. Nawmsak I thlahlel bawk a, I thlakhlelh nawmna chu nei mawlh ang che” tiin a inher a, a kal ta.

Ka thu hnawk a, ka na lutuk chu au chhuah vak vak ka chak. Ka nihna ni miah loa min hriatdan chuan min tina thlawt, mahse, min kalsan theih dan tur a nih chuan ka insawifiah a rem silo. Ka hmangaih em emin chutianga min hre reng tawh tur erawh chuan ka rilru hi a tina a ni e.

“Lut ang hmiang, a vawt si a” titu Muansanga chu ka mittui kar atangin ka han hmu phe ruai a, ka darah vuanin min kaitho a, inchhungah min luhpui nghal a.

“Ka tihpalh” 

Bathroom atanga ka chhuah chuan min ngaihtuah hmel zet hian min lo en reng a.

“A pawi reng reng lo” tiin a nui a, ka va mualpho chiang tak.

“Kha kha a ni ang maw?” atih chuan ka bu nghat a, “Khawiah emaw chuan ka hmu tawhin ka hria” a ti zui sap a.

“I cousin Becky birthday kan kal khan” tih thleng chiah ka sawi thei, ka thikzia ka tilang tur a ni lo.

“Aw, ni tak e. Becky nen an lo inkawm ve thin a ni maw?”tiin amah chuan a phun zui a, engmah ka sawi belh tawh lo. 

Muansanga haw hnu chuan thil tam tak ka ngaihtuah a, mi tam tak chuan nep min tingawtin ka ring. Mahse, nuthlawi dinhmun hi a taka ding ve ngei te lo chuan an hrethiam tak tak lo ang. Mahni insit reng rengin kan awm a, mi tha kan tawnin sawisel kan hlawh a, mi tha vak lo kan tawn lahin sihhnip tih kan hlawh bawk a, kan duh reng vang bika nuthlawi kan ni bik hauh si lo. Zodina na hmel kha ka mitthlaah a awm reng, min lo duh ve tak zet thin a nih te ka ring ve ta hial. Min thlah ve mai ang tih kha ring mah ila ka sawi vanga awlsam taka min thlah nghal chu ka ring phal bik lo a, mahse, khatianga a awm theih nghal vang khan kawng erawh chu a awlsam reng a nih kha. Mahse, ka va han duhkhawp lo tak em! Beisei ka nei ve a, a lo sang hret a ni tih erawh ka hrechiang ta.

Kum a thar a, riilru erawh a rhar ve si lo. Tinge hetiang taka awm leh tur si kan lo intawn tiin ka inzawt fo a, chhanna erawh ka hmu si lo. Kan nunah hian kan thu ang angin thil a lo thleng thei lo a, kan duhthlanna erawh chuan min hliam ve fo thung. A tir atang khan Zodina hi lo kaltir phal ila chuan hetiang tak hian ka na lo maithei, mahse, amah nena n hun hman kha a hlu a, a tak takah chuan intawng lo tur anga ka ngaihtuah erawh chuan ka phal chuang lo. Hun a kal anga, heng zawng zawng hi chuan min la liamsan ve em ang chu tiin beiseina nen hma hun ka thlir ta ringawt mai a ni.

MPSC in Taxation Department hnuaia Inspector of Taxes exam result an tihchhuah ah chuan Zodina hming pawh a chuang ve vang mai, exam a tum tantirh vela kan buai theihzia te kha ka rilruah a rawn lang thar uar uar a, a zir that theih loh hlau khan ka bei chikim ve viau thin. Amah ngaiin hmu chak viau thin mah ila a zir that loh ka hlau khan lehkha zir ve tho ka ngai tite khan ka hrilh thin a, ka theih ang angah a zir tur ka buaipui ve nasa viau bawk. Chung zawng zawng hnua a hlawhtlinna hian min tilawm ve em a, ka tel ve leh ve loh chu ka chiang ngam bik lo a, a hlawhtlin nan erawh ka theihtawp ka chhuah tih ka chiang ve a, ka lawm reng reng e.

*Min lawmpui ve dawn miah lo em ni*

Zodina message chu vawithum ka chahiar nawn a.

*Ka lawmpui che* inngaihtuah buai duh loin ka thawn a.

Minute 10 hnu velah min rawn chhang leh a, min chhanna erawh chuan min ngawng ve det.

*Tunah chuan hna ka nei ve tawh a, rawn let I duh ve tawh mai lo maw?*

Ka rilru tihnat  dan pawh a lo thiam ve tawh anih hi, enganga harsa pawh nise min vawn tlat duhtu khan ka nat pawh a lo phal ve tho anih hi ka ti rilru ta neuh neuh a.

Note: Tlai lamah hunawl tlem ka nei a, ka rawn thai nawk nawk,  a van tawp teuh tawh tak 😄