EUPHORIA 10

 

10

 

Kan zingkar boruak chu a hahdamthlak angreng, rin loh deuha mo kan han nei thut chu ka pa a phur ngang mai. U Mama nupui neih hnuah ka u te pahnihin neih leh mai zai an rel si lo a, kum 6 a liam hnuah mo hmel an hmu leh a nia, an lawm pawh a awm viau mai. Ka nu pawh a phur a, hei tak hi mak ka ti thin. Ka u te ho reng rengin ngaihzawng an neih hian a inrawlh ngai lo mai ni loin duhzawng a sawi ngai lo. Kei erawh chu min thunun a tum ran thin thung.

 

“I putea te phone ula, tunah rawn phei nghal rawh se” ka pa in a ti nghal zung zung a, Mimii lai hmel chu ka lo nuih suk suk a.

 

“U Rin, chawei ka huphurh e, ka zak dawn e” a ti ngei a.

 

“Chawbel I chang ang, I lak tlak dawn leh dawn loh ka test dawn che” ka tih phei chuan a huphurh hmel tak zet.

 

Ka pute ho leh ka ni pasal an rawn thleng a, kei erawh office kal ka ngaih avangin chaw ka ei hma a, ka chhuahsan. Office ka thleng fel a, Mimii leave vel ka tihfel sak a hnuah thingpui ka dawm vang vang a. Ka u te pahnih hmangaihna kawng bumboh leh tun hun an thlen dan ka ngaihtuah neuh neuh a, a ziah a ziah tham hi a awm ve tihte chu ka rilruah a rawn lang a, chuvanga hetia ziak ta chiam pawh ka ni reng a.

 

“Nizanah ka taxi an su a, hei workshop ah ka awm mek a” Sawmzuala chuan min rawn call a.

 

“Engtin nge an sut theih a? A chhe nasa em?” tiin ka zawt a.

 

“Chhe nasa lo e, an khawih hman tep tawh ang, min ngaihtuah lo la” a rawn ti dam dup a.

 

“I mamawh tur pawh I la inlei awm si lo a” ka ti leh hram a.

 

“Ka riah phei hman chuan a pawi chuang lo a, rilru nuam deuhin lo awm la aw” tiin min han hnem zawk a.

 

Nilenga hnaa buai chuan ni pawh a kal liam ve duak duak a, dar 3 velah Sawmzuala call ka dawng leh a.

 

“I hman chuan pawnah lo chhuak la” a tih chuan ka va chhuak a, office kawtah a lo ding a, min hmuh chuan min lo nuih var var a.

 

“Ka kal dawn chiah a, ka ngaih che chuan ka rawn kal vang vang zel ang ka tih kha, hei ka rawn hmu leh hram duh che a” tih pahin a thil khai chu min pe a.

 

“Ka rilru a nuam sawt, inhmu miah loin I kal dawn emaw ka lo ti hman tawh a” tiin a thil min pek chu ka han en a, kfc a lo ni. “Enge hengte I lo lei duh a, nangmah zawkin keng la” ka ti a.

 

“I ril a tam ve thei sia, I haw tlai leh awm sia ka ngaihtuah che alawm” a ti a.

 

A ka liam tur chu ka thlir zui vang vang a, chhuah leh ngaihna awm tawh lo khawpin ka duh tawh tih ka inhria, ani tluka ka hahdampui leh thlamuanpui hi an la awm lo a, an awm mai mai tawh pawh ka ring lo.

 

Chutiang chuan hun kan hmang liam ve zel a, U Tetea te pawh an inkutsuih hun tur an ruat fel tawh a, thla thar April ni 10 ah an innei dawn. Chumi hma chu Mimii pawh an inah a let leh rih a, u Tetea pawh a hna a zawm leh phawt a, a dawn hnaiah a rawn chawl ang. U Mama te nupa nen an room tur kan buaipuisak a, ral atangin a duh dan a rawn sawi a, kan hah letling angreng. Sawmzuala pawh a hmalakna a lian zel a, kan inhmu thei lo telh telh a, pawi ti lo turin min ti fo thin. Kei pawhin ka hrethiam khawp mai, karkhata vawikhat kan inhmuh hi a tam zawk a ni ang, nakina kan nawmna tur a ni tih min hrilh fo a, keipawhin ngaihah ka nei chho ve mai.  Ngaihzawng ka neih hian nei em em an tih ang hi ka ni thin a, Ruatdika nen pawh khan inzui reng, mi hriat khawpa inkawp ang hi kan ni thin, mahse, Sawmzuala nen erawh engkim a danglam a, mak ber zawk chu chutiang a ni chung pawhin vuina ka nei ngai miah lo hi a ni.

 

Mimii mo kawr en turin kan chhuak a, mopa ka u ni bawk, mo thiana tan bawk chu indaih a har viau. In lamah tihtur a tam ve em em a, Mimii tihpui ngai thil a tam bawk, ka hah ve thei hle. Ka lawmpui rualin huphurhna lian tak ka nei a, chu chu Mimii hian a hna a chawlhsan dawn. Hna nghet lo zawkte a lo ni bawk a, nupa awmhran kan chhungte lamin rem an tih loh bawk avangin thla thar atangin a bang dawn a ni.

 

“Awi, en miah suh aw, Ruatdika hi kan sirah sawn ka hmu” Vakiria a mo kawr kan enlaiin Mimii chuan min rawn hrilh ru sar sar a.

 

“Khawiahhh?” ka tih chuan min rawn sik a.

 

“An kalsawn tep, hawi chhuak lo la ni mai” a ti leh a, rei vak lo hnuah, “An kal tawh e” a tih chuan rang fe hian ka va hawi a, a rawn haw tih pawh ka hre lo. Min tihbuai a tum tawh loah ngaiin ka lawm em em a, a chhan chu a rawn haw tih pawh min rawn hrilh loh vangin, ka lawm chhung erawh a rei lo kher mai. Zanah a rawn lawr nghal zat, ka nu thil chah a rawn pe ni awm tak a ni. Mimii te ina kal tumin room atangin ka chhuak a.

 

“Ruatdika’n a kal pui ang che, hmeichhia mahnia zana vah reng hi a him lo” ka nu chuan a lo ti a, ka thaw hak.

 

“Ka riak nghal maithei a, kal pui ka ngai lo ang” tih pahin ka chhuak lui a, Ruatdika’n min rawn umzui nghal.

 

“I nu thil min chah ka rawn pe lawk a, I lungawi loh phah em lo ang chu tiraw?” a rawn ti a, chhan loh ka tum zet na a ka insum leh hram.

 

“In pahnih inkar a nia, lungawi loh chhan tur ka nei hleinem” tiin ka inher a, ka scooty lam ka pan a. Engtik laiin nge min rawn zui tih pawh ka hre lo, ka banah a rawn vuan a, a rawn thingthi rawp a.

 

“Khawngaih takin chance min pe leh rawh, ka ngen tak zet che” tiin.

 

Sawi mai tur hre loin ka ding reng a, chutiang tehthuta a rawn che chuan min thawng lutuk.

 

“Ruatdik, tho rawh, I ti awm ang lo emai” tiin pawh thawh ka tum a.

 

“I tello chuan ka hlim tak tak lo, khawngaih takin vawikhat chiah chance min pe leh rawh” a ti leh a, miin min rawn hmu ang tih chu ka hlau tak zet.

 

“Ding phawt teh, miin min hmu ange” tiin ka han pawt leh a, a rawn ding ve ta hram a.

 

“Ruatdik, midang ka nei tawh ka tih kha, hriatthiam tum tawh teh” ka ti a, ka kalsan lui ta a. Min tina hmasatu mah nise hetiang ngawih ngawiha inngen hi thil nuam pawh a ni lo.

 

Mimii te in ka thlen thlengin ka rilruah Ruatdika chu a awm, ka let tawh dawn lo tih keimah hian ka chiang si a, hetianga a awm reng chuan Sawmzuala hian hriat chin a nei vat dawn a, kan inkarah buaina a thlen phah ang tih hi ka hlau ber. Ka tum lawk loh ang deuhin Mimii te inah chuan ka riak ta tak tak a, ka nu hmuh ka peih lo a ni ber. Zing chaw pawh ka ei nghal a, Mimii’n pasal a nei bo tur chu a nu pawh a lawm aniang, a che vel engkim a phur sarh a, a thuam chhawm pawh a tih thatsak khawp mai. Chaw eikhamah kan inphur chhuak a, chawhma lam chu a kawr hak tur thlan that nan kan hmang leh a ni ber, chawhnu lamah ngaihtuahna hran ka nei thut.

 

“Sawmzuala va tlawh thut ila” ka tih chuan ka rin aiin a lo phur, kan chhuak zui ta nghal a, in eipuar kan tum zet na a ei tur kan lei leh ta zawk. Dar kar khat chuang kan tlan hnuah Sawmzuala huan pawh kan thleng ta, thawm dim angreng takin kan tlan a, a huan chhung kan tlan thlak dawn chuan a switch ka off daih, surprise ve hrim hrim ka tum. Thlam thlanga a hnathawk chu ka zuk hmu a, Mimii chu ka kawhhmuh nghal a. Thlam bulah scooty ka dah a, woofer ah hla a play vangin kan thawm a hre lem lo, thlamah lutin namthlak lamah ka chhuk a, a hnathawk chu ka thlir vung vung phawt a.

 

“U Sawmzual” Mimii chuan tiphut a, phu zawk chung hian a rawn hawi  ta a, chutah mak ti leh hamhaih zet hian min melh reng a, chutah harh chhuak thut ni mai awm tak hian a rawn tlan chho a, thlam kawngkaah ka lo nghak a, a bianga thlan tui luang zawih zawih chung hian min rawn nuih a.

 

“A van mak” a ti deuh tawp, hlawhtling inti fe hian ka lo nuih ve a.

 

“Ka ngaih viau che chuan ka rawn kal ang I tia, I rawn kal bawk si loa, min ngai lo anih hi ka tia, keimah zawk ka lo kal mai” ka tih chuan a thle bak a.

 

“Zaninah ka rawn kal ang ka lo tia’ a tih chuan ka lo ner nang a, “Tak tak alawm” tih pahin thlamah chuan kan inzui lut ta a.

 

“Kan inneihnaah khan I lo kal loh ka hlau teh ania aw” Mimii chuan a lo ti nghal a.

 

“Kal ngei chu ka tum ve alawm” tiin an inchhang a. Kan ei tur kente chu phawrhin kan ei tlang a, a thil ei laite chu ka lo en leh reng thin, ka chan ang tih hlauhna hian min tuam vel vek.

 

“Sawi duh in ngah awm sia, chance ka pe ang che u” tih pahin thil kan ei zawh chuan Mimii chu a tho nulh a, Sawmzuala nen kan inen a, kan nui tawp.

 

“I mo thar tur a ni mai sia” tih pahin Mimii kalna lam chu a en vung vung a.

 

“A mak tiraw?” ka tih chuan a lu a bu nghat a.

 

“I chak ve tawh em?” tih pahin min rawn en a.

 

“Kum hnih emaw kum thum emaw kan nghah a la ngaih kha” ka lo ti.

 

“Chumi chhung chuan rilru dang hi I lo pu ang tih ka hlau” a tih chuan ka va thut hnaih a.

 

“Ka hmangaih che” ka ti sap a, phawk deuh hian min en leh a.

 

“Sawi nawn leh teh” a tih chuan, “Ka hmangaih che” ka lo ti leh a.

 

“Keipawn ka hmangaih lutuk che” tih pahin min rawn kuah a tum a, “A… ka bal leh si” a ti a, keimah zawkin ka va kuah a.

 

“Engpawh kan chungah thleng se inphatsan awih loh aw” ka ti a, a mittui tling deuh chu ka hmu ve reng.

 

“Ka nihna ang anga min pawma min hmangaihtu hi ka phatsan thei lo ang” a ti a, hlimna hian kan khat veng veng.

 

Mimii nen ringawta kan haw tur chu min ngaihtuah si a, a insiam sawk sawk a, min zui haw ve ta ringawt a, Mimii’n ka scooty khalhin kan hmaah a tlan a, Sawmzuala motorah ka chuang thung. Kawng a tawi duh kher mai, Mimii te in thleng min thlah a, an in lam panin a haw ve ta a. In lamah engin nge min hmuak tih pawh hre loin hlim takin Mimii te inah chuan tlai chawte ka ei leh a, rei vak lo ka thut leh hnuah kan in lam panin ka haw ve ta a.