EUPHORIA 11

11

Sitting room ah ka nu a lo thu a, ka thawm chu hria ang pawhin a awm lo. Ka room lam pan nghal ka tum a, min lo ko a.

“I kal thui hmain tawp rawh, ka dang tho dawn che” a ti a, thinrim angin a lang duh miah lo, mahse, ka nu hi ka hrechiang a, hetianga a tawng dam dap hian a hlauhawm zawk tih ka hria.

“Nu, duhthlang rual ka ni tawh” ka ti a.

“Ruatdika lo chu makpa neih ka tum lo, chu chu I lo hre chiang dawn nia” a ti a, a tho a, an room lamah a lut nghal a. Thutthlengah chuan ka thu hnawk a, hun harsa ka paltlang zawng zawngte ka ngaihtuah let a, tiang mai maia awm leh tur hian ka paltlang lo tih ka hrechiang bawk. Ka nu pawh nise ka hlimna tura ka kawng thlan min dal anih chuan min tih ang apiangin ka ti let ang, chutiang khawp chuan Ruatdika hi neih ka tum lo. Ka rinna a tichhe tawh a, rin nawn leh hi ka tum lo hrim hrim.

Ka mut dawnah Sawmzuala message lo thleng chu ka chhiar a, huanah let tawh loin an inah a haw tlang thu min rawn hrilh a, ka mittui a rawn hnam sawk. Muttui tih zawng ka thawn a, engmah ka sawi zawm thei lo. A hlim hmel mawlh kha ka mitthlaah a cham reng a, tihchhiata a awm ka phal teuh lo. Chhin khatmah chhing loin khua ka nghak tlaivar thak a, ka mit ana urh thei. Khua a var veleh ka tho a, ka chhuak leh daih. Ina awma ka nu hmel hmuh ka chak rih lo. Ka nutei te in ka thleng hlawl a, ka nutei a lo tho chiah.

“Enge zing kar karah I tih?” tiin min lo be nghal a.

“Exer ka rawn la a” ka ti a, ka nuih a, tui lum a chhuang nghal a, kan in ta sar sar a.

Rei vaklo ka thut hnuah ka haw leh ta a, Sangbawihi chiah ka hmu.

“Khawnge ka nu hi?” ka tih chuan an room lam a kawk a.

“Au Rin, nizan I awm loh lai khan u Ruatdika a lo leng char char a, ka ning tlat” a ti a, ani hi chu ka lama tang reng thin a ni a, hemi chungchangah pawh hian ka lamah a tang leh ran tawh.

“Min hauh kha I lo hre phak em?” ka tih chuan a lu a bu nghat a.

“U Sawmzuala ka khawngaih, nang chu I tuar thei leh mai dawn tih ka hria a, u Sawmzuala tan a tha nat thlak dawn e, ani hian a hmusit deuh tlat” a tih mek lai chuan ka nu chu an rawn chhuak a, kan thusawi lai pawh kan tawp nghal.

Ka room lam panin ka inbual a, chaw ei chakna pawh ka nei lo. Sangbawihi’n chawei tura min rawn koh laiin ka lo insiam mek a, ka ei peih loh thu ka hrilh a, tiffin erawh ka siam tir, office a ei ka chak fe zawk.

“Kal hma ka ngai a” tih pahin dawhkana ka tiffin chu ka la a, ka nu chu ka va melh hram a, min melh lo. “Ka rawn haw tlai ang” tih hram pahin ka chhuak ta a. A fanu ka nia, a luhlul ang bawk hian ka luhlul ve tih a hre mai ang.

Office ka thlen hmain Mimii’n min rawn call a, chhuna chhuah lawk a ngaih thu leh kalpui a ngaih thu min rawn hrilh a, Mimii dinhmun hi ka awt ngawih ngawih. Ani chuan a hmangaih ber a nei dawn a nia, hringnun hi tinge a fair loh em em thin le ka ti hial. Ka hna ka inching fel deuh thuak a, Mimii chhuahpui ka ngaih vangin khawih hman loh erawh ka nei tho. Ka pa hian hna pending hi a duh lo thin em a, chutiang thleng lo tur chuan kan unau pawh min hrilh tam thin, a theih ang angah chuan keipawhin pending nei lo turin ka thawk ve bawk, loh theih loh chin erawh a awm ve tho. Mimii nen kan innghahna tur lam pan chuan ka chhuak a, a lo awm ran tawh. U Tetea naktukah a rawn chhuk ve tawh dawn a, buai pawh a ziaawm tawh ang. 

“Ka bo vang vang tur hi ka nu a lawm ngang aniang, pawisa pawh min thehchhuah hnem thei tawp” a lo tia, a la a ve bawk a, ka nuih tawp.

Pheikhawk tur kan en a, a thiannu USA a awmin a rawn thawn a, chu chu kan lam dawn a lo ni. Ka hriat miah lohin ka ta tur nen a lo tia, a mawi ngang mai. Kan han bun chhin vel a, bun pawh a nuam. 

“Ka bun phak ngai miah loh tur I zarah ka bun ve dawn ania” tiin ka pheikhawk chu ka han thlek vang vang a, ka lung a awi ngang mai.

Kan pheikhawk kan lam zawh chuan kalna tur dang a la neih avangin a kal a, keipawh office lam ka pan leh ta. Ka pheikhawk chu ka va bih leh duk duk thin a, min tihlim tawp. Sawmzuala nen kan in videocall a, videocall aduh ve tlat hi a chang chuan ka nuih a za deuh thin. Message type te hi a peih thlawt lo a, social media lah a khawih tam lo. Chanchinthar chhiar nan leh inkhel chungchang vel chhiar nan bak a hmang lo. Kan mizia hi a inletling ve thlawt, kei hi chuan a khawih theih ang ang hi ka khawih a ni deuh tawp, mahse, ka nuna rawn inrawlh chiam leh ngai theih loh a nei lem lo hi ka duhdan ang chiah a ni. Inngaihzawn lai atanga min thunun tum ran hi ka ngai thei lo a, nulat man a awm ka rin loh thin vang a ni.

Ka nu nen pawh boruak tha lo em em nei zui lem loin kar kan hmang liam ve leh a, Ruatdika ala reh a, boruak tha zel turah ka ngai. U Tetea inneih hun pawh ni thum chiahin a dang a, ka pa pawh a rawn haw a, chhungkua kan awm kim ve thap. Hetianga chhungkua kan awm kim hi a khat a, ka ngaihlu viau.

“Ruatdika chu MZU ah Asst.Professor hna a tling a nih awm chu” kan chaw ei laiin u Thantea’n a ti a, ka chaw bar lai dah meuhin ka nu ka va melh a, min lo melh ve reng. 

“A ngaihtuah awm loh hrim hrim alawm a zirlai atangin” ka pa in a lo ti pangngai ve mai a.

“A reh ka ti reng a” U Mama ve thung, an nu U Feli’n a lo nghawk deuh chu ka va hmu hman.

U Tetea te inneih chungchang kan sawi chhunzawm a, ka chaw ei erawh a tawp daih, han thawh nghal chu ka hreh ve deuh sia, ka chaw chu ka thai let deuh mai mai. A tawpah ka tho ta nge nge a, ka nu hmela phurna awm kha ka hai thei hauh lo.

Inneih ni a ni a, dan thianghlim tlin tawh lo mah se a ropui thei ang bera tih duh ve ve kan ni bawk a, mi pawh an rawn kal hnem. Kohhran hall khat tlat bakah pawna thu pawh an tam viau tih a hnuah thlalakah ka hmu. Inneih programme kan hmang zo a, thla lakna hun kan hman lai chuan Sawmzuala ka va hmu. Coat suit nen a lo induang ve zar a, hetianga ka hmuh vawikhatna a ni bawk a, ka rin phak bakin a inhmeh. Amah a palianin a pian a nalh bawk a, chhuang veng veng tak ka ni. Mimii thiante lakpui tur tihah a rawn ding ve a, zan lama lakpui ve tura ka tih nasat em vangin a rawn kal ve hram, a tirah chuan min hnial ve ngar ngar, a huphurh ve bawk em a ni. 

“I nalh tawp” a kalsawn dawn chuan ka lo ti sap a, a khi var var mai.

Ke kham urha kan din zawh hnuah kan zo ve thei ta, Sawmzuala chu ka zawng rilru deuh reng a, a tawpah thingpui a in lai ak va hmu, ka ko a, thla kan han la dun lawp lawp a, Mimii chuan a kutzungpui min hmuh deuh reng.

“A u, hei ka thianpa Sawmzuala kha” U Tetea bulah chuan ka ti a, pangngai takin ka la inhmelhriattir loh vang a ni.

“Aw, a ni maw, I rawn kal theia, a va lawmawm ve” tih pahin an han inchibai a.

Chutia kan inbiak buai vel lai chuan Ruatdika a rawn lang thut a, u Tetea te nupa chu chibai a rawn buk a. 

“Thla ka lakpui ve duh cheu a nia” tih pahin a phone a rawn phawrh a.

“Ka lo hmehsak ang che u” Sawmzuala chuan a lo ti var a, din ve loh ka tum zet na in mopa thianpa a ding ve sia, hreh ru deuh hian ka dinpui ve. 

“Ka lawmpui lutuk che u, in lamah ka lo va phei ange” tiin a kalsawn ta a.

“Ka hne lutuk” tiin ka phun hluk a.

“Engmaw?”Sawmzuala chuan min ngaihtuah hmel deuh hian a lo ti a.

“A.. aih, engmah ni lo e. Ka ke a na deuh tawh a” ka tit a ringawt.

“Ka haw tawh mai dawn em niang?” tiin min zawt a. 

“A la ngai lo, chaw pawh I ei ang chu” ka ti a.

“Zanah ka lo lang zawk anga, vawiin hi huan enkawltu turte lo thlen ni kha a nia, huana ka va dah lawk an ngai dawn a” a ti ta a, ui ru deuh chungin ka kal tir ta.

Catering a chaw ei siam a nih avangin a felfai viau a, inkhawm tam zawk pawhin chaw an ei theih phahin ka hria. Min lawmpui tura lokal ten chaw an ei lo ang tih mawlh kha ka pa leh Mimii pa hlauh a ni a, a hlawhtling thawkhat chuan ka hria.

Ka rilruin vawiin hi kan inneihni ni zawk se tihte ka lo ngaihtuah a, ka nuih a za zawk angreng.

Mimii te in lamah kan phei leh a, kan inthlak fel a, thlahna hunte kan han hmang leh te te a, kan zawh hma deuhin mo hruaitu tur an lo thleng. Chutiang chuan lawi programme pawh hlim tlang takin kan hmang a, an room tur ka panpui lai chuan u Tetea leh Ruatdika an rawn inzui a, inkawm ve zeuh zeuh thei an nih vangin a mak viau lo a, mahse, ka awm a tinuam lo.

“Awi, ka dream ang chiah chiah” tih pahin Mimii chu a rak hlut a.

“I dream dan kha u Tetea hian a la hre reng a nih chiah chu” ka ti a, u Tetea a lai vel.

“Ruatdika chungah hian lawm hle rawh, buai chung chunga min design sak anih kha” u Tetea chuan a ti a, Ruatdika ka va melh a, min lo melh ve reng, ka hawisan nghal vat a.

Ka phone a rawn rik chuan rang zet hian ka pickup a, Sawmzuala a lo ni. Inchungah rawn chho turin ka ti a, a rawn lut chho a, a coat a rawn ha tawh lo a, a thawmhnawm dang erawh a la inbel. Mimii nen chuan an infiam bawrh bawrh a, Ruatdika a chhuak tawh.

“An riahna turah thlah ve ila” tiin Sawmzuala chu ka sawm a.

“Thingpui rawn lum lawk teh” tiin ka nu chuan min rawn ko.

“Hetah hian lo awm la, ka zuk lum sak lawk ange aw” tiin ka kalsan a.

Inleng an lo awm tawh mang lo, ka u thianteho tih loh chu.

“No engzat nge ka lum dawn?” tiin tha takin ka zawt a.

“Keiman ka lo lum zawk mai ang, Ruatdika nen I pa damdawi va lei lawk rawh u” tiin pawisa min pe a, ka lo thaw hak.

“Sawmzuala nen kan kal mai ang” ka tih chuan min melh rum ngang mai, zanin anga buai ka peih loh vangin ka hnial peih ta lo. Pawnah Ruatdika chu a lo ding a, ka nuin koin min kalpui turin a ti a, engmah sawi loin a motorah ka lut a, ngawi rengin kan tlan chhuak.

Damdawi dawr an lo hawng tawh mang lo a, kan tum aia hla a mi kan va zawn phah. 

Ruatdika pawhin ka awmdan atangin biak chi ka ni lo tih a hria aniang, ngawi rengin min en liam ve tawp. In kan thlen chuan motor atangin ka chhuak nghal vat a, kan kawtah Sawmzuala lo ding reng, a kekawr ipte zenin a lo hawi a, min hmuh chuan a nui ta sak a, ka pen sawk sawk a, a bulah chuan dingin a banah ka vuan a.

“Damdawi kan lei lawk a” tih pahin ka thil khai chu ka hmuh a.

“Haw ka lo tum tawh a, I awm loh laia haw chu ka hreh deuh sia” a ti a.

“Mimii te chu kan thlah ve dawn lo mi?” tiin ka en chho deuh ha a.

“Im.. naktuk zingkarah chhuah ka ngai dawn sia, min hrethiam hram la aw” a ti dam diai a. Nilengin min tawiawm tawh a, ka tilui ngam tawh lo. A tlan liam thlengin ka thlir a, phur lo zet hian inchhungah ka lut a, Mimii ka hmuh chuan a mittui tling deuh chu ka hmu, rang zet hian ka pan a.

“Engati nge?” hmui phunin ka ti a.

“Khawnge I kal daih a, I nu in, awh, ka nu in Sawmzuala kha inthiarfihlim turin a ti alawm” a ti a, a mittui chu a rawn far fap. Ka room ah ka tlan lut nghal a, ka phone chu la in Sawmzuala chu ka call a, switchoff a in ti!