EUPHORIA 12

12

Ka muhil ka harh chuan u Tetea te thawm a awm der tawh, ka sana ka han bih chuan dar 7 a lo pel thui viau tawh. Zan lamah ka muhil thei lo kha zing lamah ka lo muhil tui viau a nih dawn hi. Tho mai loin thil tam tak ka ngaihtuah a, nizana ka nu nena kan inhnial dan te chu ka ngaihtuah zui a.

“Kan neih ang anga hau tak ti chung chunga phaia ka dah chhan che chu hna tha tak I neih nan leh pasal tha tak I neih nan a ni” tiin min thlah anih kha.

“Ruatdika nen kan inthen chhan I hre chung pawha hetianga min nawr hi chu ka rilru I tina tak zet” ka ti a.

“Mi zawng zawng hian tlin tawk lohna leh famkim lohna kan nei vek, a tihsual siamtha tur a a rawn kir chu I lawm ngawt zawk lawm ni?”min ti a nih kha. A mak ka ti ngawih ngawih, a fanu chu ka ni ve si a!

Shooting nei turin kan chhuak a, ka u te nupa hlim hmel chuan min ti hlim chawp vel mai mai a ni ber. Sawmzuala ka la be thei chuang lo, ani tal chu be thei ila ka hahdam ang maw le. Min then mai duhna rilru a pu ang tih ka hlau ber a, a tawp thlengin kei chuan ka chelh tlat dawn tih ka chiang a, atana harsatna ka thlen erawh ka hlauh ber a ni thung.

“Sawmzuala nen in inbe tawh em?” Mimii chuan min ngaihtuah hmel zet hian a ti a, ka lu ka lo thing a. “Nghak rawh, a rawn be em em ang che. Ngawi renga kalbo tur chi mizia a ni lo” a ti a, keipawh ka ngaihdan ve chiah tho a ni.

Nilengin kan in pose kual a, kan photographer hian a duh tui si a, ka ning hman khawp mai. Dar 3 velah haw turin kan inbuatsaih hman chiah a, ka inthlak mawlh mawlh laiin ka phone a rawn ri a, Sawmzuala tih ka hriatin rang zet hian ka pickup a.

‘Engati nge I biak theih loh a?” ka ti nghal a.

“Signal ka nei lo a, ka neih veleh ka lo bia che a” a ti tha mai a, ka ngaih erawh a tha chiah chuang lo.

Shooting kan neih thu leh kan haw tep tawh thu ka hrilh a.

“Keipawh huan atangin ka chhuak chiah a, ka pa a nuam lo deuh a ni awm a, ka haw leh thut dawn anih hi” a ti a, a aw velah engmah ngaihbel tur hriat nuam lo a awm lo.

“Inhmuh ka duh” ka tih chuan a thaw deuh halh a.

“Rin..”

“Umm”

“Inngaihtuah tha leh la ka duh”

“Sawmzual, ka hrilh chian tawh che kha”

Chu baka han sawi vk dan ka thiam si lo a, ani pawh a ngawi deuh roh roh.

“Engpawhnise, hun thawl inpe tawn phawt ang, um?” a ti a.

“Aih, chutiang hun thawl inpek kan mamawh lo, engkim paltlang dun kan intiam kha” ka ti a, min chhang mai lo.

“Im, engpawhnise, I tan chuan engkim ka ti thei vek ka tih kha aw” a ti dam dap a, ka tah a chhuak tung.

Min lo chik rengtu Mimii chuan min lo ngaihven vat a.

“Ka nu khan engtin chiah nge a tih le?” tiin ka zawt a.

“Ka hre vek hman bik lo a, step ah khan an lo indinchilh a, inhnuai chhuk ka tum khan ka hmu thuak chauh a, ‘ka fanu lakah hian lo inthiarfihlim turin ka duh che’ a tih lai chiah ka hre hman a” a ti a, ka inhum ruh vak.

Kan haw hnu pawh chuan ka inbual a, ka mu bo daih. Zan ka mu tlem bawk nen chhun lamah ka lo chau tel si a, ka muhil ta bawrh bawrh a, ka harh leh chuan zanlai dar 12  a lo pel tawh. Ka phone a rawn vibrate cher cher a, ka han en vat a, Sawmzuala a lo ni.

“Pawnah lo chhuak rawh” a tih chuan rang zet hian ka inperh tho a, ka inha sawk sawk a, thawm dim thei ang berin ka chhuak ta a.

Kan garage ah motor nghengin a lo ding a, min hmuh veleh min rawn pan a, kan inpawm deuh chawt.

“Ka ngai lutuk che a” a ti sap a, ka mittui a luang nghal zawih.

Kan kawmthlang school ah kan chhuk a, thla chu a eng kher mai. School office step ah thuin engdang mah sawi loin kan inkuah dun rial a. Thla chu ka thlir dauh dauh a, kan nun nen hian inrem zetin eng a rawn chhuah a, chu chuan ka lung hi a tileng veng veng.

“Nizanah ka nuin a lo tawngkhum che tih ka lo hria a, a aiawhin ngaihdam ka dil che. Khawngaih takin engahmah ngai lo hram rawh aw” ka ti a, ka chalah a rawn fawp a.

“Heng hi chu a la thleng dawn tih ka hria alawm” a ti a, a thaw hak a.

“Min beidawnsan lo hram turin ka duh che a” ka tih chuan a nui ta sak a.

“Rin, I tan hi chuan tih theih loh ka nei lo tih hria la ka duh a” a ti a, hetianga a tih apiang hian min kalsan dawn hian ka hre tlat thin.

“Min kalsan dawn loh phawt chuan a bak chu ka tuar thei vek ang” ka ti a, a rawn thle bak a, a darah ka lu ka lo nghat a.

“Naktuk atang chuan kan inhmu zen zen thei tawh dawn lo a, hrehawm lo ti suh aw, ka theihtawpin ka hna hi kan thawk ve tang tang anga, nuam taka siam che hi ka tum ber a ni tih I hrereng dawn nia. I rilru a danglam loh a, min nghah theih phawt chuan kei chuan chu tluka duh chu ka nei lo tih hrereng la” a ti a.

Ka sawi thiam lo, kan boruak hi a ni deuh ruih, inhmu tawh loa inthlah vang vang turte pawh kan ang deuhin ka hria.

Kan in lam kan pan lai chuan dar 2 a ri tep, thil tam tak kan sawi lo a, mahse, kan inthlakhlelhzia leh kan inhmangaihna erawh sawi duah lo pawhin kan inhriatsak tawnin ka hria. Kan kawt kan thlen chuan a ding dat a.

“Ka ngai dawn e” tih pahin ka hmui chu a rawn tawk zeuh a, ka lo nui a.

“I haw kawngah te fimkhur la, rei tak hmu lo chein ka awm thei lo tih hriain min rawn tlawh zeuh zeuh ang che” ka ti a, a bu nghat a.

Ka kal leh tur chiah chu min pawt let a, min fawp leh vawng vawng a, zanin chu zan dang aiin a duhthawh tih ka hre reng. Kan inhmu lo rei dawn a nih hi tiin ka ngaihtuah ve mai a, in kalsan vang vang turte pawh kan ang lek lek.

Ka mut fel meuh chuan dar 3 a lo ri chiah.

*ka hmangaih em em nu, muttui aw* tih message lo let bam chu nui sukin ka chhiar a.

U Tetea chawlh lak a zo a, Champhai ka la hmuh loh avangin kal ve ngei chu ka tum. Mimii pawh a hna a bang fel tawh a, ka u a zui chho tawh dawn. Ka thawmhnaw ken tur chu ka rem mawlh mawlh a, rei cham tur ka nih loh avangin ka inkeng tam hran lo. Sawmzuala hnenah ka zin tum thu ka hrilh a, laphetauh leh nghapih min han chah ngei ah! Zingkarah Champhai lam panin kan chhuak a, ka rin aiin kawng a lo thui zek a, ka chau ve hle. U Tetea inluah chu a lo nuam zek a, Champhai a awm tirh khan kal ve ka tum a, eng engemaw harsatna vangin ka kal thei ta lo kha a nia, ka rin ang ngeiin a lo nuam.

“Naktuk han awm hahdam ila, tuk lehah Rihdilah kan kal dawn nia” a tih phei chuan phur tak ka ni.

Mu pahin Sawmzuala nen kan inbia a, ka chau ngang a niang ka lo mutthluksan daih. Zingah chiah ka harh a, ka phone chu ka lo la hum reng chu niin, ka ban chu a kham tha duh ngei mai. U Tetea office lamah in report a ngaih tawh avangin a kal a, Mimii nen inchhung kan tifai a, mipa mahnia khawsa tih takah sulhnu chhui tur a ngah angreng. Nilenga kan chet meuh chuan a in chu hmuhnawm tawh tak a ni, Mimii nen chuan kan nui dun var var a, a inthlau lutuk chu thla kan laksak chhen.

Rihdil kama han in pose vel chu nuam vet vet tak a ni, thlalakah chiah ka lo hmuh thin kha a hmunah kalin ka han hmu ve ta chu a nia, camera a rim duh ngei mai. Airtel network a lo awm tawh hlauh a, Sawmzuala pawh video call in ka hmuhtir ve a, ka hlim bawk a, min rawn hlimpui tawp. Beer in ngai miah lo khan ka han in ve a, can khat ka in zo a, ka rui deuh der. In kan thlen pawh chuan ka la normal thei lo, inbual loin ka mu tawp a, ka u te nupa in min nuih nasa khawp mai.

Ka haw hma niin kan han bazaar a, lei duh ka ngah si a, ka inhawn seng lo ang tih hlauhawm zawk tak a ni. Chau hnepin kan haw a, khua a lo thim deuh tawh. U Tetea;n ei rawng a lo bawl a, kan thlen vela kan thu hriat chuan min thawng lutuk a, tawng nachang pawh ka hre lo.

“Ruatdika’n palai a rawn tir dawn” tih thu ka nuin U Tetea a lo hrilh.

Ngawi rengin room ah ka lut a, ka phone phawrhin Ruatdika ka call a, a lo pickup nghal.

“Rawn tir buai duh suh u” ka ti nghal tawng a.

“Rini, mi puitling I nih tawh kha, I pa hi thlamuang taka I kaltir duh chuan min neih a ngai” a rawn ti a.

“Engvangin nge ka pa chu thlamuang taka ka kaltir ang?” ka ti a, a au in ka au tawn tawn a ni ber.